Энэ хичээлийн төгсгөлд суралцагч дараах чадварт суралцсан байна:

(1) Бурхан бидэнтэй ямар харилцаатай байхыг хүсэж байгааг ухамсарлаж, үнэлэх.

(2) Хүн бүрийн дотор Бурханы дүр төрх байгааг ойлгож, үнэлэх.

(3) Харилцаандаа гаргасан сонголтуудынхаа төлөө бид Бурханы өмнө хариуцлага хүлээдгийг ухамсарлах.

(4) Библи бол бурханлаг харилцааны гарын авлага бөгөөд бид харилцаандаа Бурханыг дуурайх ёстойг мэдэх.

Бурхан бол бусадтай харилцаатай байж, харилцдаг бодгаль болохыг бид Бичвэрээс мэддэг (Еврей 1:1-2). Эцэг Бурхан, Хүү Бурхан, Ариун Сүнс Бурхан өнө мөнхөд хоорондоо харилцаатай байж ирснийг Бичвэрт харуулдаг.[1]

Бурхан тэнгэр, газар, тэнгис болон тэдгээрт буй бүхнийг бүтээсэн (Гэтлэл 20:11). Дуулал 8:3-8-д хүн төрөлхтөн бол Түүний хамгийн сайн, хамгийн чухал бүтээл болохыг харуулдаг. Бурхан хүнийг өөртэйгөө адил харилцаатай байхаар бүтээсэн. Бичвэрийн туршид Бурхан хүмүүсийг өөртэйгөө харилцах амь өгөгч харилцаа руу урьсаар байдаг.[2]

Орчлон ертөнцийг Бүтээгч Бурхан тантай болон надтай харилцаатай байхыг хүсдэгийг ойлгож мэдэх нь үнэхээр гайхалтай!

► Нэг суралцагч Эхлэл 3:8-9 эшлэлийг уншина.

Хэсэг зуур нүдээ аниад, дөнгөж сая уншсан дүр зургийг төсөөлөөрэй. Эдгээр эшлэлийг ойлгохын тулд төсөөллөө ашиглана уу. Өдрийн сэрүүн үед хамгийн үзэсгэлэнтэй цэцэрлэгт зогсохдоо, нүүрийг илбэх таатай салхийг мэдрээрэй. Бурханы хөлийн чимээг болон Түүний хайртай хоёр бүтээл чимээгүй байхыг сонсоорой. Дараа нь Бурхан “Чи хаа байна вэ?” гэж асууж байна.

Бурхан эрэгтэй, эмэгтэй хоёртой нөхөрлөхийг хүсэж дуудаж байсан тэр агшин ямар байсныг та төсөөлж байна уу? Дахин хэдэн хором Бурханы зүрх сэтгэлийг бодож үзээрэй. Бурхан Адам, Еватай, тантай, надтай нөхөрлөхийг хүсэж, эрэлхийлж байна!

Бид Бурханд дуулгаваргүй байснаараа Түүнээс өөрсдийгөө тусгаарласан ч (Исаиа 59:2) Бурхан амьд буй хүн болгонтой харилцаатай байхыг хүсдэг. Лук 19:10 эшлэлд Тэрээр нүгэлтэн бүрийг эрж хайж байгааг өгүүлдэг. Бурхан одоо ч гэсэн "Чи хаана байна вэ?" гэж асуусаар байна. Есүс бидний төлөө үхсэн учраас бид Түүнтэй зөв харилцаатай болж чадна (Ефес 2:13, 19). Та бид Бурхантай харилцахын тулд бүтээгдсэн.

Бурхан бүтээлээ хайрлаж, зорилготойгоор бүтээсэн гэдгийг үгүйсгэдэг хүмүүс өөрсдийгөө хэн болох, юуны тулд оршин байгаагаа ойлгох гэж тэмцэлддэг. Бурхантай харилцах харилцаанаас ангид байдлаар хүн төрөлхтнийг зөвөөр ойлгох боломжгүй юм. Дэлхийн мэргэн ухааны зөвлөгөөгөөр амьдардаг хүн буюу хүн төвтэй аз жаргалыг эрэлхийлдэг нэгэн амьдралыг үнэхээр ойлгож чадахгүй.

Бид хэн болох (өөрийн уг чанар), ямар зорилготой (оршин буйн учир), хэрхэн бүтээгдсэнээ үнэн зөв ойлгохын тулд бид Бүтээгчийнхээ зорилгыг мэдэх ёстой бөгөөд энэ нь Ариун Библид бичигджээ. Бид хэн болохыг Бурхан аль хэдийн тогтоожээ. Энэ нь бидний зохион бүтээдэг зүйл биш юм. Тэрээр биднийг зорилготойгоор бүтээж, санаа бодолтойгоор урласан. Бидний амьдрал болон харилцааны талаарх Түүний төлөвлөгөөг ойлгосон цагт л бид хэн байх ёстойгоо, оршин буйнхаа төлөөх Түүний зорилгыг биелүүлж чадна.

Бурханы дүр төрхөөр бүтээгдсэн гэдэг нь хүмүүс харилцахын тулд өвөрмөц байдлаар бүтээгдсэн гэсэн үг юм. Бурхан харилцаатай байдаг шигээ хүмүүсийг харилцаатай байхаар Тэр бүтээсэн. Бурхан хүн бүрийн сэтгэл, сүнс, бие махбодыг өөртэйгөө болон бусадтай харилцаатай байхаар төлөвлөжээ.

Хүн хоорондын харилцааны талаарх гарын авлага

Бурхан хүмүүсийг харилцаатай байхаар бүтээсэн гэдэг нь Тэрээр бидний харилцах зарчим, удирдамжийг тогтоосон гэсэн үг юм. Бүтээгдэхүүн үйлдвэрлэгч бүтээгдэхүүнийхээ загвар болон үүнийг хэрхэн ашиглах талаар тайлбарласан гарын авлага гаргадаг. Үүнтэй адилаар Бурхан бидэнд өөрийн Үг болох Библийг өгсөн бөгөөд энэ нь бидний загвар, амьдрал харилцаа маань хэрхэн зөв явагдах талаар тайлбарладаг.

Хүн хоорондын харилцаанд Бурханы тогтоосон үүргийг Библид тодорхой дүрсэлсэн байдаг. Энэ нь нөхөр, эхнэр; эцэг, эх, хүүхдүүд; ах, эгч, дүү нар; өвөө, эмээ; найз нөхөд; дайсан; хөрш; засаг төр ба иргэд; ажил олгогч ба ажилчид зэрэг үүрэг, харилцааг хөнддөг. Бид ямар нөхцөл байдал, орчинд байгаагаас үл шалтгаалж, Бурханы Үгийн зарчмууд нь бидэнд хандсан Түүний төлөвлөгөөг заадаг. Библи нь амьдралын бүхий л үе шатанд бидний төлөөх Бурханы хүслийг заадаг.

Хүний нийгэм, соёл нь төгс бус хэдий ч Бурханы загвар төлөвлөгөөг тусгадаг. Соёл нь бүх харилцаа болон нөхцөл байдалд хандах хүний хэвийн зан байдлыг тодорхойлдог. Соёл болгонд хүүхэд хүмүүжүүлэх, гэрлэлтийн харилцааг хадгалах зэрэг өөрийн гэсэн арга замууд бий. Соёлууд нь уламжлал, орчин, генетик, гол үйл явдлуудаараа ихээхэн ялгаатай байдаг ч, соёл болгон үндсэн ёс суртахууныг агуулдаг. Жишээлбэл, соёл болгон гэрлэлтийн аливаа нэгэн хэлбэртэй. Гэсэн хэдий ч, бүх зан байдлыг соёлын хэм хэмжээгээр бус, Библийн зарчмаар үнэлж цэгнэх ёстой. Соёл биш, харин Библи бол бидний эрх мэдэл билээ (Ром 12:2).

Соёлын нарийн ширийн зүйлс нь заавал төвийг сахисан байх албагүй бөгөөд бид тэдгээрийг ийм байна гэж хүлээх ёсгүй юм (Ефес 2:2). Өөртөө төвлөрсөн, буруу хүслээр хэлбэржсэн унасан хүмүүс соёлыг хөгжүүлдэг. Нийгэм нь Библийн үнэний талаар ямар нэгэн мэдлэгтэй байж болох ч, ямар ч нийгэм Бурханы зөв, буруугийн хэм хэмжээнд тогтмол нийцдэггүй. Зөвхөн тогтсон соёл учраас хэмээн юуг ч зөвтгөх ёсгүй юм. Зөвхөн Библи л бидэнд Бурханы хэм хэмжээг төгс байдлаар харуулдаг (Дуулал 19:7-11).

Хэрэв та Ливи улсад зочилж, Ливийн иргэд аюулгүй байдлыг үл тоомсорлон машин жолоодож байгааг анзаарвал "Энэ нь тэдний соёл; тэдний жолоодлогын хэв маяг тэдэнд тохирч байна" гэж бодож болох юм. Тэд өөрсдийн жолоодлогын соёлын хэв маягийг хөгжүүлсэн нь үнэн. Гэсэн хэдий ч, Ливи улс дэлхийд авто замын ослын улмаас нас барагсдын тоогоор хамгийн өндөр үзүүлэлттэй байдаг. Тэдний энэ үзүүлэлт дэлхийд хоёрдугаарт ордог улсынхаас хоёр дахин өндөр юм. Эндээс харвал тэдний соёл жолоодлогын сайн хэв маягийг хөгжүүлээгүй нь илэрхий байна.

Амьдрал хэрхэн явагдах ёстойг Бурхан мэддэг бөгөөд Тэр бидэнд дүрмийг өгсөн. Бид зүгээр л туршилт хийж, судлах ёсгүй. Бид зүгээр л хүссэн зүйлийг маань өгч байна гэж санагдсан болгоныг хийх ёсгүй. Бид зүгээр л аз жаргалтай амьдрал байх болно гэж төсөөлсөн зүйлдээ хүрэхээр хичээх ёсгүй. Харин харилцааны талаарх Бурханы загвар төлөвлөгөөг бид дагах ёстой.

Хамгийн сайхан зүйл нь бидний сайн сайхны төлөө байгаа Бурханы зааврыг дагах явдал юм. Бурхан биднийг хайрладаг учраас бидэнд тушаал өгсөн (Дэд хууль 6:24). Тэдгээрийг сахиснаар бид сайн үр дүнд хүрч, олон муу үр дагавраас хамгаалагддаг. Биднийг бүтээгч бидэнд юу хамгийн сайн болохыг мэддэг бөгөөд Түүний төлөвлөгөөг дагахдаа бид ерөөгддөг.

Харилцаандаа Бурханы өмнө хүлээх хариуцлага

► Бусад хүмүүстэй хэрхэн харьцдаг нь Бурхантай харилцах харилцаанд маань хэрхэн нөлөөлдөг вэ?

► Суралцагчид дараах эшлэл тус бүрийг бүлэгт уншина. Эдгээр хүн хоорондын харилцаанд Бурхан юу шаарддаг, дуулгавартай байдал нь Бурхантай харилцах харилцаанд маань хэрхэн нөлөөлдөг талаар товч хэлэлц. Бурханы зааврыг зөрчих нь Бурхантай харилцах харилцаанд хэрхэн нөлөөлөх вэ?

Бид ёс суртахуунтай бүтээлүүд бөгөөд энэ нь зарим үйлдэл буруу, зарим нь зөв гэдгийг ойлгож, сонголтоороо Бурханы өмнө хариуцлага хүлээдэг гэсэн үг юм. Энэ нь бидэнд асар том боломж болон асар их хариуцлагыг өгдөг. Бидний сонголт Бурхантай харилцах харилцаанд маань нөлөөлдөг. Харилцааны талаарх Бурханы зааврыг дагах нь зүгээр л аз жаргалтай байж, амьдралаас хамгийн сайныг авах практик асуудал биш юм. Бид харилцаан дахь шийдвэр, зан байдлынхаа төлөө Бурханы өмнө хариуцлага хүлээдэг (Ром 14:10, 12).

Бурхан биднийг бусадтай шударгаар харьцаж, хайр, энэрлээр үйлдэхэд уриалдаг (Мика 6:8). Асуудал нь Адамын нүглийн улмаас түүний бүх үр удам нүгэлт мөн чанартай төрдөг болсонтой холбоотой (Ром 5:12, 19). Үүнээс болж бид хайр, энэрэл, шударга ёсны дагуу тогтмол үйлдэж чаддаггүй (Ром 7:15-24). Гэхдээ бид дахин төрөхөд Бурханы нигүүлсэл биднийг өөрчилдөг. Ариун Сүнс бидэнд Бурханы шаардлагыг биелүүлэх боломжийг олгодог (Ром 8:3-4).

Хүн бүрийн үнэ цэн

► Суралцагчид Исаиа 44:24, Дуулал 139:13-16, Эхлэл 9:6, Иаков 3:9 эшлэлийг бүлэгт уншина. Амьдрал бүрийн үнэ цэнийн талаар эдгээр Бичвэр бидэнд юу хэлж байна вэ? Хүнийг юу үнэ цэнтэй болгодог вэ?

Бусадтай эрүүл харилцаатай байхын тулд бид хүмүүсийг Бурхан үнэ цэнтэйд тооцдог шиг үнэлэх ёстой. Хүн бүр Бурханы дүр төрхөөр бүтээгдсэн бөгөөд зөвхөн үүгээрээ л үнэ цэнтэй юм. Эрэгтэй, эмэгтэй, эрүүл, өвчтэй, бүрэн бүтэн, хөгжлийн бэрхшээлтэй, хөгшин залуу, баян ядуу (Сургаалт үгс 14:31), эхийн хэвлийд байгаа эсэхээс үл хамааран хүн бүр Бурханы өвөрмөц бүтээл юм. Үүнд арьсны өнгө ямар байх, оюун санааны болон бие махбодын чадвар, хязгаарлалт ямар байх нь хамаагүй (Гэтлэл 4:11).

Ахмад настнуудыг мартаж, эмэгтэйчүүдийг эрэгтэйчүүдээс дорд үзэх, хүүхдүүдийг зовлон гэж үздэг соёлууд бий. Зарим соёлд хөгжлийн бэрхшээлтэй хүмүүсийг хараагдсан гэж үзээд нийгмээс нуух, эсвэл гадуурхах тохиолдол байдаг. Дэлхий даяар арьс өнгөөр ялгаварлан гадуурхах үзэл түгээмэл. Нэг овог эсвэл үндэстэн өөрийгөө бусдаас илүүд үзэж, бусдыг гутаадаг. Эдгээр үйлдэл бүр Бурханы бүх бүтээлээс хамгийн үнэ цэнтэй нь болох хүмүүсийг үнэгүйдүүлдэг. Бурханыг өргөмжилсөн эрүүл харилцаатай байхын тулд бид эхлээд бүх хүмүүс хэн болохыг бодож үзэх ёстой. Тэд бол Бурханы дүр төрхийг тээгчид юм.

Илчлэл 4:11 эшлэлд Бурхан бүх зүйлийг өөрийнхөө төлөө бүтээсэн гэж өгүүлдэг. Үүнд хүн төрөлхтөн ч мөн адил хамаарна. Бид Бурханаар, Бурханы төлөө бүтээгдсэн. Бидний хийж буй бүхэн Бурханы алдрын төлөө байх ёстой (1 Коринт 10:31, 1 Петр 2:12). Бид бас бусад хүмүүсийн тусын тулд бүтээгдсэн.

Бурханы зорилгыг хэрэгжүүлэхийн тулд бид бусад хүмүүстэй хамтран ажиллахаар бүтээгдсэн. Хүмүүс хамтран ажиллах Бурханы загвар төлөвлөгөөний нэг жишээ нь гэрлэлт юм. Бурхан анхны эрэгтэй хүнийг бүтээсний дараа удалгүй "Хүн ганцаараа байх нь сайн биш. Би түүнд тохирох туслагчийг буй болгоё гэжээ" (Эхлэл 2:18). Эмэгтэй хүн чухал байдлаараа эрэгтэй хүнтэй төстэй боловч бусад чухал байдлын хувьд ялгаатай. Тэднийг оршин байлгаж буй Бурханы зорилгыг тэд хамтдаа биелүүлж чадна. Бурхан тэдэнд хамтдаа хийх ёстой ажлыг өгсөн (Эхлэл 1:26-28).

Чуулган бол хүмүүс хамтран ажиллах Бурханы загвар төлөвлөгөөний өөр нэг жишээ юм. Элч Паул биеийн эрхтнүүдийн талаар зүйрлэн хэлсэн байдаг (1 Коринт 12:12-26). Хүн ганцаараа Бурханы зорилгыг биелүүлж чадна гэж эсвэл бусад хүмүүс хэрэггүй гэж бодох ёсгүй. Хүмүүс хамтран ажиллах Бурханы загвар төлөвлөгөөний олон жишээний хоёр нь гэрлэлт болон чуулган юм.

Бид бусад хүмүүст үйлчлэхээр бүтээгдсэн (Галат 5:13-14). Бид бусдад өгч, бусдад тус хүргэх хайр дүүрэн харилцаатай байхаар бүтээгдсэн.

► Суралцагчид Сургаалт үгс 17:17, Галат 6:2, Филиппой 2:4 эшлэлийг бүлэгт уншина.

Бид Бурханы төлөө болон бусад хүмүүсийн төлөө бүтээгдсэн. Бурханы Үгэнд биднээс шаарддаг бүх зүйл нь Түүнтэй харилцах харилцаа, бусадтай харилцах харилцаанд эсвэл хоёуланд нь хамаатай байдаг. Үнэндээ биднээс шаарддаг бүх зүйлийг бүхий л зүрх сэтгэл, оюун ухаан, хүч чадлаараа Бурханыг хайрлах ба бусдыг өөрийн адил хайрлах гэсэн хоёр тушаалд нэгтгэн дүгнэх боломжтой гэдгийг Есүс хэлжээ.

► Нэг суралцагч Матай 22:36-39 эшлэлийг бүлэгт уншина.

Бид Бурханы төлөө мөн бусдын төлөө бүтээгдсэн. Эдгээр баримтууд нягт холбоотой. Бурханыг алдаршуулж, Түүний дүр төрхийг тусгадаг бидний анхдагч талбаруудын нэг бол бусадтай харилцах харилцаа юм. Бурханы зан чанар, үйлдэл биднийг Түүнтэй адил байхыг шаарддаг (1 Петр 1:16, Матай 5:48). Бүх хүмүүс Бурханы дүр төрхөөр бүтээгдсэн боловч бид Түүнтэй адил үйлдэхдээ Бурханы мөн чанар, зан чанарыг тусгадаг.

Хэн нэгэн гачигдалтай хүнд энэрэл үзүүлэхэд тэр хүний өрөвч сэтгэл нь Бурханы өрөвч сэтгэлийн тусгал бөгөөд түүний энэрэнгүй үйлдэл Бурханы ажлын дуурайл юм. Энэрэл үзүүлж буй хүн итгэгч эсэхээс үл хамааран энэ нь үнэн юм. Гэсэн хэдий ч, бид Түүнтэй эвлэрүүлэгдэж, Түүний Сүнс бидний дотор ажиллаж байх үед л бид Бурханыг хамгийн сайн дуурайдаг.

► Нэг суралцагч 2 Петр 1:2-11 эшлэлийг бүлэгт уншина.

Энэ багц эшлэлд Христийн дагалдагч бүрийн төлөөх Бурханы гайхалтай төлөвлөгөөг тайлбарладаг. Энэ хэсгээс бид дараах зүйлийг сурдаг:

1. Есүс өөрийн алдар, сайн сайхнаараа биднийг дуудаж, гайхалтай амлалтуудыг өгсөн (3-4-р эшлэл).

2. Эдгээр амлалтуудаар дамжуулан Христийг мэддэг бид Бурханы ариун мөн чанарыг өөртөө агуулж чадна (4-р эшлэл).

3. Эцэг Бурхан болон Есүстэй харилцах харилцаагаар дамжуулан бидэнд амьдрал болон бурханлаг байдалд хэрэгтэй бүх зүйл бий (3-р эшлэл).

4. Эдгээр зүйлсийн ачаар бид Есүстэй адил амьдралаар, Бурхан биднийг хэрхэн амьдрахыг дуудсан шиг тийм амьдралаар амьдарч чадна (5-8-р эшлэл).

► Бид харилцаандаа Бурханы зан чанар болон мөн чанарыг хэрхэн тусгаж чадах вэ?

► Нэг суралцагч 2 Коринт 4:4 эшлэлийг бүлэгт уншина. Бурханы төгс дүр хэн бэ?

► Нэг суралцагч 2 Коринт 3:18 эшлэлийг бүлэгт уншина.

Ариун Сүнс итгэгчдийг Эзэний алдрыг улам бүр тусгахын тулд өөрчилдөг. Есүсийг харах замаар бид хандлага, зан байдлаараа Түүнтэй улам бүр адил болдог. Энэ бол сайнмэдээний гоо үзэсгэлэн юм. Эцэг Бурхан, Есүс, Ариун Сүнсний хүчээр бид Бурханы зан чанарыг тусгаж, дуурайж чадна.

Бурхан биднийг бусадтай харилцах харилцаандаа өөрийг нь дуурайхыг уриалдаг (Ефес 5:1). Хүүхэд эцэг эх эсвэл ах эгчээ ажиглаж, дуурайдаг шиг бид Есүсийн үлгэр жишээг харж, бусадтай харилцахдаа Түүний хандлага, үзэл бодол, үйлдлийг хуулбарладаг (Филиппой 2:5-7, Ефес 5:2).

► Суралцагчид дараах эшлэл тус бүрийг бүлэгт уншина. (1) Бурханы зан чанар эсвэл ажил, (2) Бурхан биднээс хүсэн хүлээдэг зүйлсийг тэмдэглээрэй (Эхний хоёр хэсгийн тэмдэглэлийг жишээ болгон бичсэн. Энэ хичээлийн төгсгөл дэх 2-р даалгавар нь энэ судалгааны үргэлжлэл юм).

Бидний хэн нь ч Бурханы хайрыг төрөлх байдлаараа харуулж чадахгүй. Учир нь бид хувиа хичээсэн мөн чанартай төрдөг. Бурхан биднийг өөрийн загвар төлөвлөгөө рүү буцаан авчрахын тулд нигүүлслээ өгдөг. Түүнд буулт хийсэн даруу залбирал хүнийг энэхүү өөрчлөлтөөр алхуулдаг.

Бурхан хүмүүсийг хайрлаж, харилцаатай байхаар бүтээснийг Библи илчлэн харуулдаг: Түүнтэй харилцах харилцаа болон бусадтай харилцах харилцаа.

Бурхан хүмүүсийг бүтээгч, харилцааг зохиогч тул бид:

1. Хүн хоорондын харилцааны талаарх Түүний үзэл бодлыг олж авах ёстой.

2. Харилцаандаа гаргасан сонголтоороо Түүний өмнө хүлээх хариуцлагаа ухамсарлах ёстой.

3. Харилцааны талаарх Түүний төлөвлөгөөг хүлээн авч, дагах ёстой.

Энэхүү курс хичээл нь эдгээр зүйлийг хийхэд тань тусалж, хүн хоорондын харилцааны талаарх Бурханы хүслийг бусдад заахад таныг бэлтгэх болно.

► Соёл нь хүний харилцааны удирдамж болоход яагаад хангалтгүй вэ?

► Энэ хичээлийн ямар ойлголт танд шинэлэг байсан бэ? Энэ нь яагаад чухал вэ? Үүнийг ойлгох нь таны харилцаанд хэрхэн туслах вэ? Үүнийг ойлгох нь таны үйлчлэлд хэрхэн нөлөөлөх вэ?

► Энэ курсыг судалснаар та хэрхэн өсөхийг хүсэж байна вэ?

Тэнгэрлэг Эцэг минь,

Намайг өөрийнхөө дүр төрхөөр, амьдралыг минь зорилготойгоор бүтээсэн танд талархаж байна.

Намайг тантай харилцаатай байхаар бүтээж, үүнийг миний нүглийн төлөөх Есүсийн үхлээр дамжуулан боломжтой болгож өгсөнд талархаж байна.

Тантай хэрхэн харилцах, бусадтай харилцах харилцаандаа таныг хэрхэн алдаршуулахыг заадаг эрдэнэс болох таны Үгийн төлөө талархаж байна.

Таны Үг болон Сүнсээр дамжуулан өөрт минь зориулагдсан амьдралаар амьдрахад намайг сургаач.

Миний эргэн тойронд буй хүмүүст таныг зөвөөр тусган харуулахад надад туслаач. Ингэснээр тэд таныг мэдэх болтугай.

Амен.

(1) Бурханы дүр төрхөөр бүтээгдсэн тухай үнэн хүн бүрд хэрхэн үнэ цэн өгдөг, бүтээлийг үгүйсгэх нь хүний үнэ цэнийг хэрхэн бууруулдаг талаар тайлбарла.

(2) Доорх хүснэгт дэх Бичвэрийн эшлэлийг уншаад (а) Бурханы зан чанар эсвэл ажил, (б) Бурхан биднээс хүсэн хүлээдэг зүйлсийг тэмдэглээрэй.

(3) 2-р даалгаврын хүснэгт болон хичээлийн төгсгөлд өгөгдсөн хүснэгтийг хараад, амьдралаа хэсэг зуур эргэцүүлэн бодоорой:

• Та одоо Түүнийг өргөмжилж, алдаршуулах байдлаар Бурханы дүр төрхийг тусгаж байна уу?

• Бурхан таны амьдралд зориулсан зорилгод амьдралаа илүү тодорхой, хүчтэй нийцүүлэхийн тулд гэмших ёстой ямар нэгэн дуулгаваргүй байдал байна уу?

• Есүстэй улам бүр адил болохын тулд Бурхан танаас ямар алхам хийхийг хүсэж байна вэ?

Энэхүү суралцаж буй зүйлдээ хариулт болгон догол мөрөнд залбирлаа бичнэ үү (Та энэхүү бичсэн зүйлээ ангийн удирдагчтайгаа хуваалцах шаардлагагүй бөгөөд даалгавраа хийсэн гэдгээ л мэдэгдэхэд болно).

Хэвлэж болох PDF-ийг эндээс авах боломжтой.