Lesson 11: Хүүхдийн хөгжил ба хүмүүжил

Энэ хичээлийн төгсгөлд суралцагч дараах чадварт суралцсан байна:

(1) Хүн бүрийг бүтээсэн Бурханы гайхалтай ажлыг үнэлэх.

(2) Хүний амь эрхэм нандин гэдэгт итгэх.

(3) Хүүхэд бүрэлдсэн цагаас эхлэн хүний амийг хамгаалахад сэдэлжүүлэх.

(4) Хүүхдийн эрүүл хөгжилд эцэг эхийн халамж чухал болохыг ойлгох.

Марк, Мэри хоёр Энэтхэг улсад амьдардаг байжээ. Тэд гэрлээд хэдэн жилийг өнгөрүүлсэн ч хүүхэдтэй болж чадаагүй. Харин тэдэнд нэг санал ирсэн. Мэригийн хамаатны нэг хүн ихэр охид төрүүлсэн бөгөөд тэднийг өсгөх боломжгүй гэдгээ хэлжээ. Марк, Мэри хоёр бяцхан ихрийг их баяр хөөртэйгөөр хүлээн авсан ч бэрхшээлтэй тулгарчээ. Хүүхдүүд хугацаанаасаа эрт төрсөн тул ердөө 1.4 кг жинтэй байлаа. Шинэхэн эцэг эхчүүдийн хувьд бяцхан охидыг хэрхэн хооллож, асрах талаар олон зүйлийг мэдэх шаардлагатай болсон. Тэд олон шөнө нойроо хугасалж, тэднийг асарсан бөгөөд охид амьд үлдэж, хөөрхөн эрүүл хүүхдүүд болон өсөж торнижээ.

Хэвлийд бүрэлдэх үеийн хүүхдийн хөгжил

► Нэг суралцагч Дуулал 139:13-18 эшлэлийг бүлэгт уншина.

Энэ эшлэлд Бурхан биднийг эхийн хэвлийд бүрэлдсэн цагаас төдийгүй, бидний бие дүр төрхөө олохоос ч өмнө (16-р эшлэл) мэдсэн гэж хэлсэн байдаг. Бурхан таныг төрөхөөс ч өмнө таныг мэддэг байсан бөгөөд танд зориулсан төлөвлөгөө Түүнд байжээ.

Эрэгтэй хүний эр бэлгийн эс эмэгтэй хүний өндгөн эстэй нийлэх мөчид хүүхэд бүрэлддэг. Тэр мөчөөс шинэ хүн, шинэ хүний амьдрал оршин тогтнодог! Тухайн хүний бүх генетикийн мэдээллийг агуулсан цоо шинэ эс бий болдог. Үр тогтсоноос хойш 24 цагийн дотор тухайн эс хоёр эс болон хуваагддаг. Эдгээр эс тус бүр нь дахин хоёр эс болон хуваагддаг. Эс бүр хоёр хуваагдах тусам эсийн тоо олширсоор байдаг. Ойролцоогоор нэг долоо хоног өнгөрөхөд олон эсээс бүрэлдсэн хүүхэд эхийн хэвлийн дотор бэхлэгдэж, тэндээ өсөж хөгжсөөр байдаг. Эс бүр нь тухайн хүнийг бүтээх "код" (ДНХ) агуулдаг. Эсүүд кодын зааврыг дагаж, биеийн хэсэг бүрийг бүрэлдүүлдэг.

3 долоо хоног өнгөрөхөд хүүхдийн нугас болон тархи бүрэлдэж эхэлдэг. 4 долоо хоног өнгөрөхөд хүүхдийн нүд, гар бүрэлдэж, зүрх ажиллаж эхэлдэг. 12 долоо хоног болоход хүүхдийн биеийн бүх чухал эрхтэн бүрэлдэж тогтдог.

Хүүхэд бүрэлдсэнээс 14 долоо хоног өнгөрөхөд хүүхдийн өвөрмөц хурууны хээ бүрэн бүрэлдэж тогтдог. 16-24 долоо хоног өнгөрөхөд эх нь хэвлийд байгаа хүүхдээ хөдлөхийг нь мэдэрдэг. Ойролцоогоор 26-28 долоо хоног өнгөрөхөд хүүхдийн уушги амьсгалах хэмжээнд хангалттай хөгждөг бөгөөд хүүхэд ойролцоогоор 0.9 кг жинтэй болдог. Хүүхэд хэвлийд бүрэлдсэнээс хойш 38-40 долоо хоногийн дараа төрдөг. Хүүхэд бүр бүтээгч Бурханы бүтээсэн гайхамшигтай, онцгой бүтээл юм.

► Нэг суралцагч Номлогчийн үгс 11:5 эшлэлийг бүлэгт уншина.

Бурхан хүүхдийг эхийн хэвлийд хэрхэн бүтээж, бүрэлдүүлж, хөгжүүлдэг нь үнэхээр гайхамшигтай юм. Хүмүүс энэ үйл явцыг болон үүнтэй холбоотой бүхнийг хэзээ ч бүрэн ойлгож чадахгүй. Гэсэн хэдий ч, бүх тив, нийгэм, ахуй соёлыг хамруулаад хүний хөгжил яг ижил дараалал, загварыг дагадаг. Бүтээгчийн загвар төгс төгөлдөр юм!

► Нэг суралцагч Иов 10:8-12 эшлэлийг бүлэгт уншина.

Эдгээр эшлэлд хүүхэд эхийн хэвлийд бүрэлдэх, хөгжих үйл явцыг Иов жишээгээр тайлбарласан байдаг. Бүтээгч Бурхан амьдралын эзэн гэдгийг Иов бидэнд хэлдэг.

Бурханы дүр төрхөөр бүтээгдсэн үнэ цэн

Эхлэл 1:26-27 ба Эхлэл 9:6 эшлэлд бид Бурханы дүр төрхөөр бүтээгдсэн гэдгийг хэлдэг. Бүх хүний амь эрхэм нандин билээ. Тийм учраас ямар ч хүнийг хөнөөх нь нүгэл юм (Эхлэл 9:5, Гэтлэл 20:13).

Езекиел 16:20-21, 36, 38-д Бурхан хүүхдийн амийг таслахыг хүссэн хүмүүсийн эсрэг хүчтэйгээр өгүүлсэн. Тэрээр израилчуудад хандан шүтээнүүдэд хүүхдээр тахил өргөхийг хориглож, тэднийг маш хатуу цээрлүүлэх болно гэдгийг тунхагласан.

Исаиа 46:3-4-д Бурхан хүний хөгжлийн үе шатуудад хүн төрөлхтнийг хэрхэн халамжилдаг тухайгаа ярьж байна:

Иаковын гэр ээ, Израилын гэрийн үлдэгсэд ээ, бүгд Намайг сонсогтун. Та нарыг эхийн хэвлийд байхаас Би тээсэн. Төрөхөөсөө та нар Надаар өргүүлсэн. Та нарыг өндөр настай болсон ч Би байсаар байна. Үс буурал болсон ч Би үүрч явах болно. Би бий болгосон, Би тээнэ. Би үүрнэ, аварна.

Ямар гайхалтай амлалт вэ!

Бүх хүн, үүнд төрөөгүй хүүхдүүд, хөгжлийн бэрхшээлтэй болон онцгой хэрэгцээт хүмүүс, ахмад настнууд багтана. Хүний үнэ цэн нь түүний юу хийж чадах эсэхээс, эсвэл тэр ганцаараа амьд үлдэж чадах эсэхээс хамаардаггүй. Харин хүн бүр Бурханы дүр төрхөөр бүтээгдсэн учраас үнэ цэнтэй юм.

Библи бидэнд хүүхэд бүр бүрэлдсэн цагаас эхлэн Бурханы нүдэнд үнэ цэнтэй гэдгийг хэлдэг (Дуулал 139:13-18). Үүний улмаас хэвлийд бүрэлдсэн мөчөөс эхлэн хүн болдог гэдгээ бид мэддэг. Жирэмслэлтийг үр хөндөлтөөр санаатайгаар зогсоох нь хүнийг алах явдал юм.

Христийг дагадаг хүмүүс хэвлийд байгаа хүүхдийн амийг хамгаалж, эхчүүдэд үйлчлэхийн тулд дор хаяж дөрвөн аргаар ажиллах ёстой.

1. Тэд хэвлийд байгаа хүүхдийг хөнөөхөөс хамгаалах хууль тогтоомж, шүүхийн шийдвэр гаргахад нь улс үндэстнийхээ засгийн газар, шүүхийн тогтолцоонд нөлөөлөх ёстой.

2. Тэд үр хөндөлт нь цорын ганц сонголт гэж мэдэрч буй жирэмсэн эмэгтэйчүүдэд практик тусламж үзүүлж, хүүхдийнхээ амийг хамгаалах боломжтой гэдгээ мэдрэхэд нь туслах ёстой.

3. Тэд хүсээгүй нялх хүүхдүүдийг асрах ёстой.

4. Тэд өнгөрсөн үеийн үр хөндөлтийн гэм буруугаас болж зовж буй эмэгтэйчүүдэд нигүүлсэл, сүнслэг тусламжийг үзүүлэх ёстой.

Төрөөгүй хүүхдэд санаа тавих нь

Эхийн хэвлийд тээгдэж буй хүүхэд мөнхийн хувь тавилантай гэдгийг ойлгох нь чухал юм. Тэр хүн үүрд орших болно. Үүний улмаас эцэг эхчүүд хүүхдээ амьдралынх нь бүх талбарт буюу бие махбод, оюун санаа, нийгмийн/сэтгэл санаа, сүнслэг байдлаар халамжлах ёстой!

► Нэг суралцагч Матай 18:2, 10 эшлэлийг бүлэгт уншина.

Эрэгтэй хүний зан байдал нь хэвлийд байгаа хүүхдийнх нь эрүүл мэндэд нөлөөлж болно. Тэр ч байтугай анх удаа аав болох боломжийг ч үгүй хийж чадна. Архи, хар тамхи, эсвэл тамхи татах нь эр бэлгийн эсийг гэмтээж, үргүйдэл (үр тогтоох боломжгүй) эсвэл зулбах (жирэмслэлтийн үедээ амьгүй болох) магадлалыг нэмэгдүүлдэг.

Жирэмсэн эх хортой бодис, тухайлбал мансууруулах бодис (жороор олгодог эсвэл хууль бус), архи, тамхи зэргийг хэрэглэх нь хэвлий дэх хүүхдийг байнга гэмтээх боломжтой. Ийм бодисууд нь хүүхдийн хөгжилд саад болж, хүүхдийг бие махбодын эсвэл сэтгэцийн асуудалтай төрөхөд хүргэдэг.[1]

Хэвлийд байгаа хүүхдийн хөгжлийн хамгийн чухал үеүүдийн нэг бол эрхтэн, эд эсүүд анх бүрэлдэж эхлэх үе буюу ялангуяа жирэмсний 3-4 долоо хоногийн хооронд юм. Энэ үедээ олон эмэгтэйчүүд хүүхэд бүрэлдсэнийг хараахан мэддэггүй!

► Нэг суралцагч 1 Коринт 10:31 эшлэлийг бүлэгт уншина.

Хэдийгээр эх нь хэвлийд байгаа хүүхдийнхээ эрүүл мэндийг хянаж чадахгүй ч, тэрээр сайн хооллож, хортой бодисоос зайлсхийж, хүүхдэдээ чадах чинээгээрээ туслах ёстой. Бурхан хүүхдийг үнэ цэнтэй гэж хэлсэн бөгөөд бид тэдэнд ингэж хандсанаар Бурханыг алдаршуулдаг.

Төрөх хүртлээ амьдраагүй төрөөгүй нялх хүүхдийн хувьд харамсалтай. Төрөөгүй хүүхдийн эндэл нь ихэнхдээ эхийн хийсэн зүйлээс болдоггүй. Эцэг эхчүүдийн хувьд энэ нь маш их өвдөлт гарз хохирол байдаг учраас бусад итгэгчид тэр үед тэднийг тайвшруулахыг хичээх учиртай.

Төрөх үе

Хүүхэд төрөхтэй холбоотой зарим ахуй соёлын ялгаатай ёс заншил байж болох ч, хүүхэд төрүүлэх талаарх олон зүйл дэлхийн хаа сайгүй эмэгтэйчүүдэд ижил байдаг. Эхлэл 3:16-д Бурхан: “эмэгтэйд өөрийн чинь жирэмсний бэрхшээл зүдүүрийг Би бүр ихэсгэнэ. Өвдөж зовж чи үр хүүхдээ төрүүлнэ...”

Олон зуун жил өнгөрсөн ч Бурханы үг дэлхийн хаа сайгүй үнэн хэвээр байна. Адам, Ева хоёрын анхны нүглийн үр дагавар нь төрөх үйл явцад мэдрэгдсэн хэвээр байна. Тэр ч байтугай Есүсийг төрүүлсэн эх Мариад ч энэ хамаатай байсан бөгөөд тэрээр төрөлтийн өвдөлтийг мэдэрчээ.

Бие бялдрын хөгжил

Хүүхэд бие бялдрын чадварыг тодорхой үе шатуудаар хөгжүүлдэг. Нялх хүүхэд эхлээд толгойгоо өргөж, дараа нь сууж, мөлхөж, улмаар алхдаг. Эдгээрийн аль нэг нь хүлээгдэж буй хугацаандаа болоогүй тохиолдолд эцэг эх нь санаа зовдог. Хүүхдүүд өсөж томрох тусам бид тэднийг 4-5 насандаа үсэрч, авирч, гүйдэг болсныг харах болно. Тэд зөвхөн сүү уудаг байсан бол удалгүй бор хоол идэх хүртэл өсөж хөгждөг. Гэр бүлийн гишүүд хүүхдийнхээ эдгээр төрөлх бие бялдрын хөгжлийг дэмжиж, урамшуулдаг.

Оюун санааны хөгжил

Асран халамжлагчид нялх хүүхдийн анхны уйлахыг сонсож, ойролцоогоор хоёр сартайд нь хүүхдийнхээ цовоо цолгиун дуу авиаг сонсохоор хүлээдэг. Дараа нь нялх хүүхэд амандаа бувтнаж, дуу авиаг давтаж эхэлдэг. Ойролцоогоор зургаан сартайдаа хүүхэд нь "Аав" эсвэл "ээж" (мама) гэж хэлэхэд нь эцэг эх нь баярладаг. Хүүхдүүд ихэвчлэн нэг настайдаа үг хэлж, хоёр настайдаа бүтэн өгүүлбэрээр ярьж эхэлдэг.

Бяцхан хүүхдүүд ой санамж, санадаг зүйлсээрээ биднийг гайхшруулдаг. Тэд олон асуулт асуудаг. Хэрэв та тэдэнтэй ямар нэгэн онцгой зүйл хийхээр амласан бол тэд үргэлж санадаг. Тэдний оюун санааны хөгжил нь Бурханы бүтээл загвар учраас явагддаг ч, эцэг эх болон бусад асран халамжлагчид хүүхдийг бүрэн чадамждаа хүртэл хөгжихөд нь их нөлөө үүрэг гүйцэтгэдэг.

Нийгмийн болон сэтгэл санааны хөгжил

Хүүхэд бие бялдрын хувьд эрүүл хөгжихийн тулд эцэг эхээсээ тусламж авах хэрэгтэй. Гэсэн хэдий ч, нийгмийн болон сэтгэл санааны хувьд хөгжихийн тулд тэдэнд илүү их урамшуулал хэрэгтэй.

Эцэг эх, багш нар болон бусад асран халамжлагчид хүүхэд бүрийг нийгмийн болон сэтгэл санааны хувьд хөгжихөд нь зориудаар туслах учиртай.

Эцэг эхчүүд дараах жагсаалтад байгаа зүйлсийг хийснээр хүүхдээ нийгмийн болон сэтгэл санааны хувьд хөгжиж, төлөвшихөд нь тусалдаг.

► Энэ жагсаалтыг уншина уу. Дараа нь жагсаалтыг хоёр дахь удаагаа уншаарай. Эцэг эхийн хувьд таны аль хэдийн сайн хийхийг хичээж буй зүйлсийг болон та үүнийг хэрхэн хийж байгаа тодорхой жишээг бичнэ үү. Та зориудаар хийж байгаагүй зүйлсийн хажууд тэмдэг тавиарай. Тэдгээрийн дэргэд та юу хийж эхэлж болохыг бич. Хэрэв та эцэг эх биш бол, та өөрийн хамаатан садан эсвэл гэр бүлийнхээ ойр дотно хүүхдүүдэд зориулж хийж болох зүйлсийг жагсаалтаас сонгох боломжтой.

Хүүхдээ төлөвшихөд нь туслах арга замууд[1]

(1) Өөртөө санаа тавих байдлаар

• Хувийн стрессээ хянаж зохицуул.

• Гэр бүлийнхээ нөөцийг зохицуул.

• Бусад эцэг эхчүүдэд дэмжлэг үзүүл.

• Хэрэгтэй үед бусдаас дэмжлэг хүсэж, хүлээн ав.

• Өөрийн хувийн давуу байдал болон эцэг эх байхын давуу талаа таньж мэд.

• Хүүхэд өсгөх зорилтуудыг тавьснаар зорилгоо тодорхой байлгах.

(2) Ойлгох байдлаар

• Хүүхдүүдээ болон тэдний хөгжлийг ажиглаж, ойлго.

• Хүүхдүүд эргэн тойронд болж буй зүйлд хэрхэн нөлөөлж, хариу үйлдэл үзүүлж байгааг таньж мэд.

(3) Чиглүүлэх байдлаар

• Зохистой, хүсэн тэмүүлэх зан байдлыг үлгэрлэн харуул.

• Боломжтой хязгаарлалтуудыг тогтоож, хадгалж хэвших.

• Хүүхдүүдэд хариуцлагад суралцах боломжийг олго (Боломжууд нь тэдний хөгжлийн үе шатанд тохирсон байх ёстой).

• Асуудлыг шийдвэрлэх ур чадварт сурга.

• Хүүхдийнхээ үйл ажиллагаанд анхаарал хандуул.

• Хүүхдийнхээ бусад хүүхдүүд болон насанд хүрэгчидтэй харилцах харилцаа, туршлагыг хянаж анхаарч бай.

(4) Халамжлах байдлаар

• Хайр халамж, энэрэнгүй сэтгэлээ илэрхийл.

• Хүүхдийн өөрийгөө хүндлэх сэтгэл, найдварыг төлөвшүүл.

• Хүүхдийн мэдрэмж, санаа бодлыг сонсож, анхаар.

• Сайхан сэтгэлийг зааж сурга.

• Хүүхдийн хоол хүнс, орон байр, хувцас, эрүүл мэнд, аюулгүй байдлын хэрэгцээг ханга.

• Хүүхдүүдтэйгээ хамт амьдралын сайхныг тэмдэглэж бай.

• Хүүхдүүдэд гэр бүлийн түүх, өв уламжлалтайгаа холбогдож танин мэдэхэд нь туслаарай.

(5) Сэдэлжүүлэх байдлаар

• Хүүхдүүдэд өөрсдийнх нь, бусдын мөн тэднийг хүрээлэн буй дэлхий ертөнцийн тухай заа.

• Сониуч зан, төсөөлөл, мэдлэгийг эрэлхийлэх хүслийг өдөө.

• Ашиг тустай сургалтын нөхцлийг бүрдүүл.

• Хүүхдүүдэд мэдээллийг олж авах, боловсруулахад нь туслаарай.

(6) Өмгөөлөх байдлаар

• Өөрийн хүүхдүүдийн төлөө болон хүүхдэд ээлтэй нийгмийн төлөө хамт олны нөөц, эх сурвалжийг олж, ашиглаж, бий болго.

• Хүүхэд болон гэр бүлд дэмжлэг үзүүлэх орчныг бий болгохын тулд нийгмийн өөрчлөлтийг өдөө.

• Гэр бүл, хөрш, хамт олны бүлгүүдтэй харилцаа тогтоо.

Сүнслэг хөгжил

Бурхан биднийг сүнслэг амьдралтайгаар бүтээсэн учраас (Эхлэл 2:7) бид хүүхдүүддээ итгэлийг зааж, Бурхантай харилцах харилцаанд амьдрахад нь чиглүүлэх ёстой.

► Суралцагчид Дуулал 78:5-8 ба Дэд хууль 6:4-9 эшлэлийг бүлэг уншина. Та гэр бүлдээ хичээнгүйлэн заах Бурханы тушаалыг ямар арга замаар биелүүлж байна вэ? Та ямар талбарт хөгжих шаардлагатай байна вэ?

Бид гэр бүлдээ заах тухай Бурханы тушаалуудыг нухацтай авч үзэх ёстой. Үгүй бол, бид Бурханд дуулгавартай амьдарч чадахгүй бөгөөд бидний хүүхдүүд ч Бурханы эрх мэдлийг үгүйсгэх болно.

Хүүхдүүдэд заах олон янзын арга хэлбэрүүд бий. Үүнд: Библи унших, Есүсийн тухай дуу дуулах, Библийн эшлэл цээжлэх, залбирах, асуулт хариултаар заах, мөн өдөр бүрийн ярилцлага. Түүнчлэн чуулганд хамрагдах нь гэр бүлийнхэнд бүгдэд нь чухал юм.

Заримдаа эцэг эх нь хүүхдээ унтахаар хэвтэхэд нь тэвэрч, итгэл болон Есүс биднийг хайрладаг тухай дуу дуулж болно. Хүүхдүүд Бурханы хайр, итгэмжит байдлын тухай сонсож, эцэг эхийнхээ хайр халамжийг мэдрэх үедээ итгэл нь илүү хүчтэй болдог.

Эцэг эх байх таны өдрүүд урт удаан үргэлжилнэ. Тэд маш завгүй; таныг ядраадаг; түүнчлэн тэд таных биш. Гэсэн хэдий ч, хүүхдийн уйлах, сүү асгах, бохир живх, хэзээ ч дуусдаггүй өдөр тутмын ажлын дунд түр зогсоод, хэтийн төлөвийг анзаарч харахад цаг гаргаарай. Та Бурханы хүүхдүүдийн нэгийг халамжилж байгаагаа сана. Тэр өөрийн мөнхийн төлөвлөгөөгөө танд итгэж даатгасан юм. Тэрээр танаас төгс байшинтай байхыг, гайхалтай төсөв төлөвлөгөөтэй байхыг, тансаг хоол, эсвэл хүүхдүүддээ үнэтэй хувцас өмсүүлэхийг шаардахгүй. Харин Тэрээр танаас дараах зүйлийг хүсэж байна:

Чи ЭЗЭН Бурханаа бүх зүрх, бүх сэтгэл, бүх хүч чадлаараа хайрла. Өнөөдөр чамд миний тушааж буй энэ үгсийг чи зүрхэндээ байлгаж, хөвгүүдээ үүгээр хурцлан, гэртээ сууж байхдаа ч, замд явж байхдаа ч, хэвтэж байхдаа ч, өндийн босохдоо ч түүний тухай ярьж бай (Дэд хууль 6:5-7).

► Танай нийгэмд хүүхэд асрах ямар талууд ихэвчлэн үл тоомсорлогддог вэ?

► Гэр бүлүүд ямар бэрхшээлтэй тулгардаг вэ? Энэ хичээлд дурдсан хүүхэд асарч халамжлах зүйлс нь тэдэнд яагаад хялбар биш байдаг вэ?

► Итгэгчид жирэмсэн эхчүүдэд өөрсдийгөө болон хэвлийд байгаа хүүхдээ халамжлахад нь хэрхэн тусалж чадах вэ?

► Христитгэлт гэр бүлүүд бага насны хүүхдүүд болон ээжүүдийн амьдралыг ерөөхийн тулд хэрхэн хамтран ажиллаж чадах вэ?

► Чуулган бага насны хүүхдүүдийн хэрэгцээг хангадаг үйлчлэлийг хэрхэн зохион байгуулж чадах вэ?

Тэнгэрлэг Эцэг минь,

Бидний гайхамшигтай Бүтээгч таныг бид мөргөн хүндэтгэж байна. Та биднийг эхийн хэвлийд бүтээж, амьдралын туршид маань халамжилдаг. Биднийг төрөхөөс ч өмнө бидний тухай бүх зүйлийг та мэддэг байсан.

Эмзэг бүлгийн хүмүүсийг, эхийнхээ хэвлийд байгаа хүүхдүүдийг хамгаалахын төлөө чадах бүхнээ хийхэд бидэнд туслаач.

Жирэмсэн эхчүүдэд үйлчилж буй хүмүүсийг ерөөгөөрэй. Бидэнд хүүхэдтэй болох, өсгөх эрхэм дээд эрх, хариуцлагыг итгэж даатгасан танд талархъя. Та бидний хүүхдүүдийг бүтээж хөгжүүлэхэд, бид тэднийг халамжилж, сургахдаа анхааралтай, хичээнгүй байхад туслаач.

Бид хүүхдүүдээ өсгөхдөө танд дуулгавартай байхыг хүсэж байна. Хүүхдүүдийнхээ өмнө таныг сайн төлөөлөхөд бидэнд туслаач. Хүүхдүүддээ таныг хайрлаж, танд дуулгавартай байхыг заахад бидэнд туслаач.

Амен

(1) 2 Тимот 1:3-5; 1 Коринт 4:17; Филиппой 2:19-23 эшлэлийг унш. Дараах асуултуудад хариулж нэг догол мөрөнд багтаан бичнэ үү:

• Энэ хэсэгт ямар хоёр эмэгтэйн талаар болон тэдний гэр бүл дэх үүргийн талаар юуг дурдсан бэ?

• Тэд Тимотод ямар нөлөө үзүүлсэн байж болох вэ?

• Тэдний үлгэр дуурайл эртний чуулганы амьдралд ямар нөлөө үзүүлсэн бэ?

(2) Энэ курсын үеэр цээжилсэн Библийн эшлэлээ дахин шалгана уу: Дэд хууль 6:4-9, Ром 6:11-14, Колоссай 3:5-7, мөн 5-р хичээлийн 4-р даалгавар дээр цээжлэхээр сонгосон эшлэлүүд. Та эдгээр эшлэлээс суралцах үед энэ нь хэрхэн нөлөөлж байна вэ?

(3) Дуулал 78:4-8 эшлэлийг цээжил. Дараагийн хичээлийн эхэнд тус эшлэлийг цээжээр уншиж эсвэл бичнэ үү.

(4) Гэр бүлийнхээ хүн тус бүрийн хувийн хэрэгцээний төлөө залбираарай. Өөрийнхөө төлөө мөн залбираарай.