Lesson 6: Гэрлэлтэд бэлтгэх нь

Энэ хичээлийн төгсгөлд суралцагч дараах чадварт суралцсан байна:

(1) Хань ижлээ ухаалгаар сонгохын ач холбогдлыг ойлгох.

(2) Библийн эрэмбэ дараалал болон зарчмуудад тулгуурлан, итгэгч хүн хань болоход тохирох хүнээ тодорхойлох.

(3) Хүүхдүүдээ гэрлэхээс өмнө Библийн зарчмуудыг эцэг эхийн үүрэг, оролцоондоо хэрэгжүүлэх.

(4) Гэрлэхээс өмнөх нөхөрлөлдөө ухаалаг шийдвэр гаргах.

Рут Энэтхэг улсын Христэд итгэгч гэр бүлд өсөж торнижээ. Нэгэн өдөр гэр бүлийнхэн нь түүнд эхнэр хайж байгаа залуу номлогч Самуелын талаар ярив. Тэд мөн Самуелтай түүний талаар ярилцжээ. Рут түүнтэй уулзахыг хүсэхгүй байгаагаа хэлэв. Нэгэн орой тэр гэртээ ирэхэд Самуел түүнтэй уулзахаар хэдэн цаг хүлээж байсныг олж харав. Рут түүнийг хараад таагүй байсан ч, түүнийг яриулахын тулд суув. Самуел: "Би Библийн сургуулийн багш. Надад их цалин төлдөггүй. Би мөн хүнд хэцүү газруудаар явж сайнмэдээ номлодог, заримдаа гадаа хоноглодог. Чи надтай хамт зовоход бэлэн үү?" гэж хэлэв. Рут түүнийг ярихад уйлж эхлэв. Учир нь Бурхан түүнд энэ бол түүний гэрлэх ёстой хүн гэдгийг хэлж байгаа мэт санагджээ. Энэ ярианаас хойш тэд хуримаа хийх хүртэл ховорхон уулзсан бөгөөд ганц ганцаараа уулзаагүй юм. Харин тэд одоо олон жил хамтдаа үйлчилсээр байна.

Няхуур сонго!

Есүс гэрлэлтийг Бурханы тогтоосон насан туршийн зориулалт гэж хэлсэн байдаг (Матай 19:6-8). Та зөвхөн энэ цаг мөчийн төлөө л хэн нэгэнтэй гэрлэж байгаа хэрэг биш. Та хоёрын хэн нэг нь нас барах хүртэл насан туршийн хамтрагчаа сонгож байгаа юм (Ром 7:2). Ухаалаг сонголт хийгээрэй!

Та хоёр зөвхөн амьдралын сайхан цаг үе, баяр баясгалангаа хуваалцахгүй. Харин хамтдаа амьдралын бэрхшээл, зовлон, хямрал, хагацлыг ч хуваалцах болно. Та ямар төрлийн уй гашуутай тулгарахыг мэдэхгүй. Хүнд хэцүү цаг үед сайн, бурханлаг ханьтай байх нь маш их ерөөл юм. Гэхдээ Эзэн дотор бат зогсдоггүй ханьтай байвал хэцүү цаг үе илүү хүнд болдог. Та бүх амьдралынхаа туршид, бүхий л нөхцөл байдалд хамт байх нэгэнтэй гэрлэж байгаа юм. Ханиа няхуур сонгоорой!

[1]Та хамтдаа гэр бүлээ босгох хүнтэй гэрлэж байна. Та хүүхдүүдийнхээ эцэг эхийг, мөн үр удмынхаа өвөө эмээг сонгож байна. Таны сонгох хүний сүнслэг амьдрал таны хүүхдүүдийн сүнслэг амьдралд маш ихээр нөлөөлөх болно. Таны хүүхдүүд зан чанар, дадал зуршил, үйлдлүүдийг нь даган дуурайх хүнийг сонгож байна (Ефес 5:1). Таны хүүхдүүдийг үлгэр дуурайл, үг яриагаар хэлбэржүүлж, сургах нэгнийг та сонгож байна (Сургаалт үгс 23:26). Хүүхдүүдээ хайрлаж, эрхэмлэх, анхааралтай, хичээнгүй, хайраар удирдан, сахилга батыг заах нэгнийг та сонгоорой. Та үе дамжин нөлөөлөх (сайн эсвэл муугаар) хүнийг сонгож байна. Сонголт тань мэргэн байх болтугай!

► Суралцагчид Сургаалт үгс 14:1, Сургаалт үгс 24:3-4 болон Сургаалт үгс 31:10-12, 30 эшлэлийг бүлэгт уншина.

Гэр бүлийн хүнээ сонгох нь амьдралдаа хийх таны хоёр дахь чухал шийдвэр юм. Эхнийх нь Есүсийг өөрийн Эзэн, Аврагчаар хүлээн авах сонголт юм. Таны сонголт амьдралын тань зам харгуйг өөрчлөхөөс гадна бусад олон хүнд нөлөөлдөг. Ухаалаг сонголт нь таныг болон бусад олон хүнийг ерөөх болно. Ухаангүй сонголт нь танд болон бусад олон хүмүүст хор хөнөөл учруулна. Залбиралтайгаар сонгоорой!

Дэлхий дээр төгс хүн гэж байдаггүй. Та ч гэсэн асуудал, сул тал, алдаа дутагдалтай. Таны хань мөн төгс бус байх бөгөөд амьдралын туршид төгс бус хэвээр байх болно. Тиймээс төгс хань хайх хэрэггүй. Харин Бурханыг болзолгүй хайрладаг хань хайгаарай. Алдаагаа хүлээн зөвшөөрч, засаж чадахуйц хангалттай даруу хүнийг хайгаарай. Ийм хань танд ерөөл байх болно. Мөн та хоёр бие биенийхээ сул талыг нөхөж, дэмжин тусалж чадна.

► Суралцагчид Сургаалт үгс 11:14, Сургаалт үгс 12:15, Сургаалт үгс 13:18 болон Сургаалт үгс 23:22 эшлэлийг бүлэгт уншина.

Ухаалгаар сонго. Насан туршид хамт байх нэгнийг сонго. Бурханлаг хүмүүс болон эцэг эхээсээ зөвлөгөө ав. Тэдний анхааруулгыг сонсоорой. Зөвхөн өөрийн сэтгэл хөдлөлийг бүү сонс. Энэхүү сонголт таны хайхрамжгүй байдалтай зүйрлэшгүй чухал юм.

Итгэгч биш хүнтэй бүү гэрлэ

Бурханы хувьд маш чухал зүйлсийн нэг бол Түүний хүмүүс зөвхөн итгэл нэгтэй хүмүүстэй гэрлэх явдал юм. Учир нь Бурхантай харилцах харилцаа нь бүх амьдралын туршид болон мөнхөд хамгийн чухал нь юм. Хүмүүний бүх харилцаануудаас хамгийн ойр дотно нь гэрлэлт бөгөөд энэ нь хүний Бурхантай харилцах харилцаанд нөлөөлдөг. Итгэгч хүн итгэгч биш ханьтай бол Бурхантай ойр, нягт харилцаагаа хадгалахад илүү хэцүү болдог.

Цаашилбал, эцэг эхийн үл итгэх байдал нь хүүхдүүд нь Христийн эсрэг байхад ихээхэн нөлөөлдөг. Эцэг эхийн нэг нь итгэгч бус гэр бүлд бүх хүүхдүүд нь Эзэнд үйлчлэх тохиолдол маш ховор байдаг. Бурхан биднийг өөрт нь үйлчлэхийг хүсдэг бөгөөд Тэр биднийг хүүхдүүдээ өөрт нь үйлчлэгч байхаар өсгөхийг сануулж хэлсэн байдаг (Эхлэл 18:19; Дэд хууль 6:2, 7; Малахи 2:15).

Хуучин гэрээнд израилчуудыг итгэлийн гэр бүлээс гадуур хэнтэй ч гэрлэхийг зөвшөөрдөггүй байсан.[2] Бурхан итгэгч биш хүмүүстэй гэрлэх нь хүмүүсийг өөр бурхдыг шүтэхэд хүргэж, цорын ганц үнэн Бурхантай харилцах харилцааг нь сүйрүүлнэ гэдгийг мэдэж байсан! Хуучин гэрээнд Израилд яг тийм зүйл тохиолдсоныг бид хардаг.[3]

Өнөө цагт ч гэсэн итгэгч хүн зөвхөн итгэгч хүнтэй л гэрлэх ёстой. Энэ тал дээр бүү буулт хий. Итгэгч биш хүнтэй байгаа романтик харилцаагаа бүү өмөөр.

► Суралцагчид 2 Коринт 6:14-18 болон 1 Коринт 7:39 эшлэлийг бүлэгт уншина.

Хань нь итгэгч биш бол

Бурхан гэрлээгүй итгэгчийг итгэгч биш хүнтэй гэрлэхийг хүсдэггүй. Энэ нь тодорхой. Гэхдээ итгэгч биш гэр бүлийн хэн нэг нь авралын төлөө Христ дээр ирэх үед, хань нь түүнтэй үлдэхээс татгалзахгүй л бол тэр хүн аврагдаагүй ханьтайгаа гэрлэсэн хэвээр үлдэх ёстой (1 Коринт 7:12-16). Зарим тохиолдолд, итгэгч биш хань нь Христэд итгэсэн нөхөр эсвэл эхнэрийнхээ итгэлийн улмаас аврагдсан байдаг (1 Коринт 7:14, 16; 1 Петр 3:1-2). Гэхдээ Христэд итгэгч ганц бие хүмүүс итгэгч биш хүнтэй гэрлэх тухай хэзээ ч бодож болохгүй.

Ирээдүйн ханийнхаа талаар бодолцох зан чанарууд

Гэрлэлтэд бэлтгэхдээ хувь хүмүүс сайн хань байхад туслах зан чанаруудыг хөгжүүлэх ёстой. Гэрлэх хүнээ хайхдаа тэдгээр ижил төстэй зан чанарууд дээр өсөж буй хүнийг хайх учиртай.

[4]1. Түүний Христтэй харилцах харилцаа нь таны Христтэй харилцах харилцааг урамшуулж, сүнслэгээр өсөхөд тань туслах тийм хүнтэй гэрлэ (2 Петр 1:5-9, 2 Петр 3:18).

2. Сайн зан чанартай хүнтэй гэрлэ. Ефес 5:33 эшлэлд эхнэрүүд нөхрийнхөө зан чанараас үл хамааран түүнийг хүндлэхийг тушаасан байдаг. Гэхдээ хүндлэхүйц эрэгтэйтэй гэрлэсэн үед үүнийг хийх нь хамаагүй хялбар юм. Сайн зан чанар нь уучлах чадвар, өөрийгөө хянах чадвар, даруу байдал, хичээнгүй, хариуцлагатай байх, суралцах хүсэлтэй байх зэрэг үйлдлүүдийг агуулдаг. Таны гэрлэх хүн төгс биш ч эдгээр үйлдлүүдээр өссөөр байх ёстой. Бурхан чуулганы удирдагчид болон тэдний эхнэрүүдэд өндөр шаардлага тавьдаг (1 Тимот 3:2-4, 8-9, 11-12; Тит 1:6-8). Хэрэв чуулганы удирдагч муу зан чанартай хань ижилтэй бол, үйлчлэлд нь ихээхэн саад болдог.

3. Цэвэр ариун ба сайн зан байдлын төлөө нэр хүндээ бүтээж буй хүнтэй гэрлэ (1 Тимот 2:9-10, 1 Тимот 3:7, 2 Тимот 2:19, Тит 1:15, Тит 2:4-5).

4. Библийн дагуу бодоход суралцаж буй хүнтэй гэрлэ (Дуулал 119:66). Уруу таталт, айдас, буруу хандлага эсвэл буруу сэдэл зэрэг тулгарах үед тэд Бурханы Үгийг санаж, итгэж, дуулгавартай байхад суралцаж байдаг (Сургаалт үгс 4:4-6, Иошуа 1:7-8). Хэрэгцээ, аюул, зовлон, эсвэл аливаа төрлийн бэрхшээлтэй тулгарах үед тэд Бурханд төвлөрч, Түүний Үгээс хэрэгтэй тусламжаа олоход суралцсаар байдаг (Дуулал 119:50, 92, 114).

5. Таны хүүхдүүдэд сайн эцэг эсвэл эх болох хүнтэй гэрлэ: хүүхдүүддээ Бурханы замуудыг зааж, тэдний өмнө тогтвортой христитгэлийн амьдралаар амьдрах хүн (Сургаалт үгс 6:20-23, Ефес 6:4, 2 Тимот 1:5, 2 Тимот 3:14-15).

6. Бурханлаг найз нөхөд, халамжлагчдаар хүрээлүүлэхийг сонгодог хүнтэй гэрлэ (Дуулал 119:63, 2 Тимот 2:22).

7. Эрх мэдэлд захирагддаг хүнтэй гэрлэ. Эр хүн өөрт нь захирагддаг эмэгтэйг эхнэрээ болгохоор хайх нь ухаалаг хэрэг юм (Ефес 5:22). Эмэгтэй хүн мөн адил Бурханд болон Бурхан түүнийг захирагдахаар чуулганд, ажилд, засгийн газарт тавьсан эрх мэдэлтнүүдэд захирагддаг хүнтэй гэрлэх ёстой (Ром 13:1, Ефес 6:5-8, Еврей 13:17, 1 Петр 5:5). Нөхөр нь Бурханд захирагдах үед тэрээр хамгаалагдаж, ерөөгдөх болно.

► Дээр дурдсан шинж чанаруудаас аль нь танд хамгийн чухал санагдаж байна вэ? Эдгээр шинж чанаруудын ач холбогдлыг харуулсан ямар жишээг та харж байсан бэ?

Олон соёлд эцэг эхчүүд хүүхдүүдийнхээ гэрлэлтийг зуучилж зохион байгуулдаг нь хэвийн үзэгдэл юм. Жишээлбэл, аль нэг улс оронд эцэг эхчүүд хүүхдэдээ боломжит хань сонгохоор, нөгөө талын эцэг эхтэй нь ярилцаж тохирдог. Үүнийхээ дараа тэд ихэвчлэн хүү, охин хоёрыг уулзуулах ажлыг зохион байгуулдаг. Залуучууд гэрлэх эсэх талаар шийдвэр гаргахаасаа өмнө нэг, эсвэл хоёр, гурван удаа уулздаг. Хүүхдүүдийнх нь хувьд эцэг эхийн сонгосон хүнийг хүлээн авах эсэхээ сонгох боломж олгогддог ч, тэд бие биенээ сайн таньж мэдэх цаг хугацаа олддоггүй.

Эдгээр соёлд амьдардаг христитгэлт эцэг эхчүүд хүүхдүүддээ ирээдүйн хань хайхдаа Библийн үнэт зүйлсийг дагах ёстой. Тэд хүүхдүүддээ бурханлаг, ухаалаг, төлөвшсөн хань хайх учиртай. Тэд амьдралдаа Бурханыг нэгдүгээрт тавьж буй хүнийг хайх ёстой. Эдгээр зүйлс нь эцэг эхийн сонголтод хэн нэгний боловсрол, мэргэжил, нийгмийн байдал, эсвэл санхүүгийн түвшнээс илүү нөлөөлөх ёстой.

Эцэг эхчүүд хүүхдүүддээ ханиа сонгоход нь туслах ухаалаг зөвлөгөө

Зарим нийгэм, соёлд, түүний дотор Европ, Хойд Америкийн соёлд залуучууд эцэг эхийнхээ чиглүүлэггүйгээр өөрсдөө ханиа сонгох нь түгээмэл байдаг.

Эдгээр соёлд амьдардаг христитгэлт эцэг эхчүүд нас биенд хүрсэн, хань ижлээ хайж буй хүүхдэдээ нөлөөлөх боломжгүй эсвэл нөлөөлөх ёсгүй гэж бодож болох юм. Эцэг эхчүүд хүүхдийнхээ гэрлэхээр тооцож буй хүнийг зөвшөөрөхгүй байсан ч эсэргүүцэх ёсгүй гэж бодож магадгүй. Тэдний шүүмжлэл нь ирээдүйд хүүхэд болон бэр/хүргэнтэйгээ харилцахад асуудал үүсгэнэ гэж болгоомжилж ч байж болох юм.

Хэдийгээр христитгэлт эцэг эхчүүд хүүхдүүдийнхээ гэрлэлтийг зуучилж зохион байгуулдаггүй ч, хүүхдүүд нь ханиа сонгоход тэд нөлөөлөх учиртай. Эцэг эхчүүд эдгээр зүйлсийн талаар хүүхдүүдээ бага байхад нь ярилцах хэрэгтэй. Эцэг эхчүүд хүүхдийнхээ сэтгэлгээ болон үнэт зүйлсийг зорилготойгоор чиглүүлж хэлбэржүүлэх ёстой (Дэд хууль 6:5-9). Эцэг эхийн хувьд та үүнийг хэрхэн хийх вэ?

1. Өөрөө бурханлаг хань, эцэг эхийн сайн үлгэр дуурайл байгаарай. Хэрэв та өөрөө Бурханы зарчмуудыг амьдралдаа дагаж мөрдөхгүй бол, хүүхдүүддээ хэлэх үгэн заавар тань юу ч биш болно. Хэрэв таны үлгэр дуурайл хэлсэн үгтэй нь таарахгүй бол, таны хүүхдүүд үгийг тань бус, харин үлгэр дуурайлыг нь сонсох болно.

2. Амьдралын зорилго, гэрлэлтийн зорилго ба утга учир, мөн ханиа сонгох шалгуур зэрэгт Бурханы хэм хэмжээг онцол (Дуулал 34:11-12). Бид дэлхийн хэм хэмжээг үзэж, сонсож, уншиж, эсвэл харахдаа, Бурханы Үг бидний үлгэр дуурайл байхын оронд дэлхий бидний үлгэр дуурайл гэдгийг хүүхдүүддээ зааж байдаг. Үүний оронд бид Бурханы сайн төлөвлөгөөг дагадаг хүмүүст анхаарлаа хандуулж, хүүхдүүддээ бурханлаг хүсэл тэмүүллийг төлөвшүүлэх ёстой. Ийм хүмүүсийн Бурханд дуулгавартай байсны улмаас эдэлдэг сайн үр дагавруудыг бид зааж өгөх учиртай.

3. Ханиа сонгохдоо зан чанар нь юу юунаас илүү чухал гэдгийг хүүхдүүддээ заа. Бага наснаас нь эхлэн хүүхдүүддээ бусдын гадаад төрх эсвэл хувийн араншингаас илүүтэйгээр сайн зан чанарыг анзаарч, үнэлэхийг заагаарай. Тэдний үе тэнгийнхэн хариуцлагатай эсвэл залхуу, дуулгавартай эсвэл тэрслүү, шударга эсвэл мэхлэгч эсэхийг анзаарч сургаарай. Гадаад төрхөөсөө илүү өөрсдийн зан чанартаа анхаарахыг тэдэнд зааж өг.

Хэрэв эцэг эхчүүд хүүхдүүд нь нас биенд хүрээд амьдралын ханиа сонгох үедээ өөрсдийг нь хүлээн зөвшөөрөхийг хүсвэл, хүүхдүүдээ бага байхад нь эцэг эхээ сонсох нь ухаалаг хэрэг гэдгийг заах ёстой! (Сургаалт үгс 1:8.) Өсвөр нас эсвэл насанд хүрэх үе нь үүнийг заахад хэтэрхий оройтсон байдаг. Эцэг эхчүүд хүүхдүүдээ бага байхад нь үүнийг заах хэрэгтэй (Сургаалт үгс 4:3-9). Бурханлаг эцэг эхээ сонсох нь хүүхдүүдийн хувьд хамгаалагдаж, ерөөгдөх Бурханы арга зам юм.

4-р хичээл дээр үзсэнчлэн, хүүхдүүд нь харилцаандаа ёс суртахууны цэвэр байдлыг хадгалахад эцэг эхчүүд тусалж, Бурханы өмнө хариуцлага хүлээдэг. Үүнийг хийхийн тулд та хүүхэдтэйгээ хэдийн сайн, нээлттэй харилцааг тогтоосон байх хэрэгтэй бөгөөд тэд сайн дураараа танд хариуцлагатай байж, зөвлөгөөг тань хүлээн авдаг. Ийм төрлийн харилцааг хүүхдээ бага байхаас нь та өдөр бүр нягт нямбайгаар зааж, сургаж, удирдаж, сахилгажуулснаар бий болгодог.

Залуу хүн ханиа сонгох мэргэн ухаан

Гэрлэлтийн тал дээр өөрсдөө шийдвэр гаргах ёстой залуу итгэгчдэд Бурхан мэргэн ухааныг зөвлөдөг. Сайн шийдвэр гаргахад туслах ухаалаг зөвлөгөө энд байна:

(1) Библийн дагуу биш сонголтуудаас татгалз.

Жишээлбэл, итгэгчид итгэгч биш хүмүүстэй гэрлэх нь Бурханы хүсэл биш гэдгийг бид мэднэ. Тиймээс бид итгэгч биш хүнтэй романтик харилцаа тогтоох талаар бодох ч ёсгүй.

(2) Мэргэн ухааны төлөө залбир (Сургаалт үгс 2; Иаков 3:13, 17).

Бид Бурханы ойлголтыг бүх зүрхээрээ эрэлхийлэх үед Тэр бидэнд мэргэн ухааныг баяртайгаар өгдөг. Бурханы Үгийг няхуур судалж, дуулгавартай байснаар мэргэн ухааныг олж авдаг. Түүнчлэн бурханлаг хүмүүсийн зөвлөгөөгөөр дамжуулан Бурхан бидэнд мэргэн ухааныг өгдөг. Бурханы мэргэн ухааныг хүлээн авах нь биднийг нүгэл болон хор хөнөөлөөс хамгаалдаг. Түүний мэргэн ухаан биднийг ерөөж, бидний амьдралд зориулсан Бурханы хамгийн сайн төлөвлөгөөг мэдэж амсах боломжийг олгодог. Хамгийн чухал нь, бид мэргэн шийдвэр гаргах үедээ тэнгэрлэг Эцэгээ алдаршуулдаг.

(3) Ариун Сүнсний удирдамжийг дага (Дуулал 119:133, Сургаалт үгс 3:5-7, Иеремиа 10:23).

Ариун Сүнс биднийг Бурханы Үгэнд дуулгаваргүй байхад хэзээ ч удирдахгүй. Харин ч Тэр бидэнд үүнийг итгэмжтэйгээр сануулсаар байдаг (Иохан 14:26, Иохан 16:13-14). Тэрээр Бурханд дуулгавартай хүүхдүүдийг нүглээс хамгаалж, тэднийг амь ба амар тайвнаар шагнадаг (Ром 8:5-6, 13-14; Галат 5:16, 22-25). Та нөхцөл байдал болгон дээрх Бурханы хүслийн нарийн ширийн зүйлсийг үргэлж мэдэхгүй байж болно. Гэхдээ та тодорхой мэддэг зүйлээ дагах ёстой. Бурхан таныг сүнслэг байдал болон ёс суртахууны хувьд итгэмжит байхыг хүсдэг гэдгийг та мэддэг. Тэр таныг тодорхой зүйлсээс зайлсхийж, тодорхой зүйлсийг дагахыг хүсдэг гэдгийг та мэднэ. Бурханаас удирдамжийг асуун залбирахдаа зөв гэж мэддэг зүйлээ хийгээрэй.

(4) Бурханлаг хүмүүсийн зөвлөгөөг анхааралтай сонс.

Бурханлаг эцэг эхтэй залуучууд тэдний мэргэн ухааныг эрэлхийлэх ёстой. Тэд гэрлэлтийн талаарх бодлоо эцэг эхтэйгээ илэн далангүй, үнэнчээр хуваалцах хэрэгтэй. Тэд эцэг эхийнхээ санааг зовоосон аливаа асуудалд анхааралтай хандах ёстой. Бурхан тэднийг хор хөнөөлөөс хамгаалж, сайн сайхныг өгөхөөр эцэг эх заяасан юм. Залуучууд эдгээр арга замаар ерөөгдөх боломжоо бүү орхигдуулаарай.

Олон христитгэлт залуучууд гэр бүлийнхээ ахимаг насны бурханлаг хүмүүсийн зөвлөгөөг сонсдоггүй. Мэдээж, бурханлаг зан чанартай, сайн үр дүнтэй ухаалаг шийдвэр гаргах чадвараа харуулсан хүмүүсээс зөвлөгөө авах ёстой нь үнэн.

Гэсэн хэдий ч, эцэг эх нь Эзэнд үйлчилдэггүй байлаа ч залуучууд тэдний зөвлөгөөг үл тоомсорлож болохгүй. Зарим тохиолдолд залуу хүн Бурханд дуулгавартай байхын тулд аврагдаагүй эцэг эхийнхээ хүслийн эсрэг явах шаардлагатай болдог. Гэхдээ үүнийг хэзээ ч тэрслэл (1 Самуел 15:23) эсвэл үл хүндэтгэх (Гэтлэл 20:12) байдлаар хийх ёсгүй юм.

Эцэг эхийн Бурханд зориулсан амьдралаас үл хамааран, Бурхан тэдний зүрх сэтгэлийг зөөлрүүлж, хүүхдийнхээ гэрлэлтийг ерөөх чадвартай болгодог. Эцэг эхийнхээ зүрх сэтгэлийг өөрчлөхийг Бурханаас гуйж, хүлээх нь тэрхүү хүү эсвэл охины итгэлийг шалгаж, бэхжүүлдэг.

► Гэрлэх шийдвэрт эцэг эхийн оролцооны талаарх Бичвэрийн зарчим, жишээг хэлэлцээрэй. Эцэг эхчүүд хүүхдийнхээ ханиа сонгох үйл явцад нөлөөлөхийн тулд юу хийх ёстой вэ? Итгэгч нас биенд хүрсэн хүн гэрлэх шийдвэрийнхээ тал дээр эцэг эхтэйгээ харилцах хандлага нь ямар байх ёстой вэ?

Хэрэв гэрлэхээс өмнө хугацаа байгаа бол, эрэгтэй, эмэгтэй хүн янз бүрийн орчинд бие биетэйгээ цагийг өнгөрөөх нь хамгийн сайн юм. Энэ нь тэдэнд нөгөө хүн хэрхэн биеэ авч явдаг, бусадтай хэрхэн харилцдаг, гэнэтийн нөхцөл байдалд хэрхэн ханддаг, өөр өөр нөхцөл байдлыг хэрхэн зохицуулдаг талаар таньж мэдэхэд нь тусалдаг. Хамтдаа өнгөрөөх энэ хугацаа тэдэнд гэр бүл байхад тохиромжтой эсэхээ ойлгоход тусална.

Цэвэр ариун байдлын төлөөх үүрэг амлалт

► Суралцагчид 1 Тесалоник 4:1-8 болон 2 Тимот 2:19-22 эшлэлийг бүлэгт уншина.

Бурхан эрэгтэй, эмэгтэйчүүдийг бие махбодын болон сэтгэл санааны дотно харилцааны хүсэл, чадавхтайгаар хайрлан бүтээсэн. Эдгээр хүсэл тэмүүллийн улмаас, ирээдүйд гэрлэхээр ярьж буй найзуудын хувьд бие биетэйгээ харилцах харилцаандаа болгоомжтой хандах ёстой. Бурхан эдгээр хүсэл тэмүүллийг онцгой, насан туршийн гэрлэлтийн гэрээний хүрээнд биелүүлэхийг зорьдог.

Хэрэв эрэгтэй, эмэгтэй хүн зориудаар өөрсдийгөө болгоомжтой, цэвэр ариун байх шийдвэртэй байлгахгүй бол тэд уруу таталтын үед өөрсдийн сэтгэл хөдлөлөө дагаж, Бурханд дуулгаваргүй байх боломжтой. Ёс суртахууны цэвэр байдлын талаарх Бурханы шаардлагыг үл биелүүлэх нь олон талаараа хор хөнөөлтэй бөгөөд зөвхөн эр, эм хоёрт төдийгүй олон хүнд нөлөөлдөг. Дуулгаваргүй байдал нь харамсал, хүлээс, гэм буруу, ичгүүр, айдас, үл итгэлцэл, эвдэрсэн харилцаанд хүргэдэг.

[1]Цэвэр ариун байдлын талаарх Бурханы төлөвлөгөөг дагадаг хүмүүст олон ерөөл бий. Дуулгавартай байдлаараа Бурханыг өргөмжилдөг хүмүүс Түүний тэдэнд зориулж төлөвлөсөн бүх сайн сайхныг амсаж туулах боломжтой. Дуулгаваргүй байдлын үр дагаврын оронд тэд баяр хөөр, амар тайвныг хүлээн авдаг. Тэд бие биедээ итгэж чадна. Тэд Эзэнтэй болон бие биетэйгээ баялаг харилцаанд байх болно.

Эдгээр ерөөлүүд нь цэвэр ариун байдлын талаарх Бурханы төлөвлөгөөг дагах хүчтэй сэдэл болдог. Гэсэн хэдий ч, энэ тал дээр болгоомжтой байх итгэгчдийн хамгийн том сэдэл нь амьдралынхаа бүх талбарт Эзэн Есүсийг дээдлэх хүсэл байх ёстой. Үерхэж буй хосууд "Бид харилцаандаа Бурханыг хэрхэн хамгийн сайнаар дээдэлж чадах вэ? Бид Есүсийг хэрхэн хамгийн ихээр алдаршуулж чадах вэ?" гэж асуух учиртай.

[2]Цэвэр бус үйлдлээс зайлсхийхийн тулд үерхэж буй хосууд биеэр ойртох харилцаандаа болгоомжтой байх ёстой. Юу хийж байгааг чинь мэдэх боломжгүй газар, удаан хугацаагаар хоёулхнаа хамт цагийг өнгөрөөхөөс зайлсхийх ёстой. Биеэр ойртож дотносох нь ердийн харилцаанаас нь илүү чухал болох үед хосууд уруу татагдаж эхэлдэг. Тэдний бодол санаа, зүрх сэтгэл нь бие махбодын хүслээр давамгайлж байгаа учраас сүнслэг болон харилцааны асуудлуудыг сайн шийдвэрлэх чадваргүй болж болох юм. Гэрлэлтээс өмнөх харилцаандаа юу хийх (мөн юу хийхгүй) талаар тодорхой зүйлсийг хамтдаа шийдээрэй. Таны төлөвлөгөө нь та хоёрыг нүглээс хамгаалж, ирээдүйн ханиа хайрлахад тусалж, Бурханыг дээдлэх боломжийг олгох ёстой. Төлөвлөгөөндөө үнэнч байгаарай. Бурханлаг халамжлагч нарын өмнө хариуцлагатай байж, тэдний зөвлөгөө, анхааруулгыг сонсоорой. Бурханлаг найз нөхөд, гэр бүлийн гишүүдтэйгээ хамтдаа цагийг өнгөрөө.

Өсөлтийг дэмжих үйл ажиллагаанууд

Үерхэх үе бол бие биенээ таньж мэдэх цаг үе боловч, энэ нь мөн өсөлтийн цаг үе байх ёстой. Үерхэж буй хосын хамтдаа хийж болох үйл ажиллагааны зарим санаа энд байна:

• Ажлын төслүүд хийх.

• Хэн хэнийх нь хувьд шинэ ур чадварт суралцах.

• Сайн ном уншиж, хэлэлцэх.

• Библийн эшлэлүүдийг зэрэг судлах эсвэл цээжлэх, дараа нь хэлэлцэх.

• Үйлчлэлийн үйл ажиллагааг хамтдаа төлөвлөж, гүйцэтгэх.

• Хамт жаахан хүүхдүүдийг харалцах.

• Бие биенийхээ гэр бүлтэй цагийг хамт өнгөрөөх.

Эдгээр үйл ажиллагаанууд нь:

• Эрэгтэй, эмэгтэй хүн бие биенээ таньж мэдэхэд тусална.

• Тэднийг бие биедээ тохирох хань мөн эсэхийг мэдэхэд тусална.

• Бие биетэйгээ сайн харилцах чадварыг нэмэгдүүлнэ.

• Тэднийг өсөхөд тусална.

► Үерхлийн талаарх эдгээр зарчим, санаануудаас аль нь танд шинэлэг байна вэ? Танай нөхцөл байдалд итгэгчид гэрлэхээс өмнөх харилцаандаа цэвэр ариун байдал болон Бурханыг дээдлэх Библийн зарчмуудыг хэрхэн хэрэгжүүлэх ёстой вэ?

Гэрлэхээсээ өмнө хэлэлцэх сэдвүүд

Хосууд гэрлэх шийдвэр гаргах үйл явцынхаа нэг хэсэг болгон бие биенээ таньж мэддэг ахуй соёлд хуримын өмнө хэлэлцэх ёстой чухал асуудлууд байдаг.

Гэрлэлтийг нь эцэг эх зуучлан зохион байгуулдаг зарим соёлд хосууд бие биенээ сайн таньж мэдэх боломжгүй байдаг. Тэдэнд хуримын өмнө чухал асуудал бүрийг хэлэлцэх боломж олддоггүй. Энэ нөхцөл байдалд, эрэгтэй, эмэгтэй хоёрын эцэг эхчүүд бие биетэйгээ мэдээлэл хуваалцаж, залуу хос бие биедээ сайн тохирох эсэхийг шалгах нь хамгийн сайн арга юм.

Бие биенээ бага мэддэг хүмүүсийн хувьд, тэд эдгээр асуудлуудыг гэрлэснийхээ дараа шийдвэрлэдэг. Гэхдээ эдгээр асуудлууд тэдний сонголтод нөлөөлж чадахгүй, учир нь тэд бие биедээ болон Эзэндээ аль хэдийн амлалт өгч шийдвэр гаргасан байдаг.

Эрэгтэй, эмэгтэй хүний итгэл үнэмшил, гарал үүсэл, соёл, амьдралын зорилго, үнэт зүйлс нь хэдий чинээ ижил төстэй байна, төдий чинээ гэрлэлтэд илүү тохиромжтой байх боломжтой. Хэрэв боломжтой бол, гэрлэхээр төлөвлөж буй хосууд дараах зүйлсийг хэлэлцэхэд цаг гаргаарай:

• Тэдний амьдралын зорилго

• Тэдний хувьд чухал үнэт зүйлс

• Тэдний бага нас болон хэрхэн өсөж торнисон түүх

• Эцэг эх болон бусад хамаатан садантайгаа харилцах харилцаа

• Тэдний хувийн онол сургаалын итгэл үнэмшил болон итгэлийн хэрэгжүүлэлт, тухайлбал хувийн сүнслэг сахилга бат, чуулганд хамрагдах байдал, үйлчлэл болон сайн дурын үйл хэрэг

• Хүүхэд өсгөх, түүний дотор хүүхдүүдэд заах, сургах, сахилга батыг заах, мөн тэдэнд Христийг таньж, дуулгавартай байхад сургах талаарх тэдний ойлголт, итгэл үнэмшил

• Санхүүгийн талаарх тэдний үзэл бодол, түүний дотор зарцуулалт, хуримтлал, хүнд хэцүү цаг үеийг даван туулах талаар

• Тэдэнд байгаа аливаа бие махбодын болон сэтгэцийн эрүүл мэндийн асуудал эсвэл хөгжлийн бэрхшээл, мөн тэдний гэр бүлд нийтлэг тохиолддог эрүүл мэндийн асуудлууд

Харилцааны энэ хэсэгт та амьдралын хэцүү, төвөгтэй сэдвүүдийн талаар ярилцах ёстой. Та нэгэнт Бурханд болон бие биедээ амлалт өгч үүрэг хүлээсэн л бол та хоёр гэрлэсэн бөгөөд нэг бол илүү дээр эсвэл бүр муу гэрлэлтийг эхлүүлсэн гэсэн үг. Гэрлэлтэд нөхөр, эхнэр хоёр бие биетэйгээ бүх зүйлээ хуваалцдаг тул илэн далангүй шударгаар ярилцах нь маш чухал юм. Энэхүү яриа улам нээлттэй, гүн гүнзгий байх ёстой. Хэрэв таны гэрлэхээр зорьж буй хүн эдгээр чухал асуудлуудын талаар ярилцахыг хүсэхгүй байвал, энэ нь ноцтой аюулын дохио юм.

Хуримынхаа өмнө хосууд гэрлэлт дэх бэлгийн харилцааны талаарх итгэл үнэмшил, хүлээлт, хүсэл тэмүүллээ ярилцах ёстой. Харилцааны эхэн үед бэлгийн харилцааны талаар ярилцах нь шаардлагагүй уруу таталт үүсгэж болох ч, үүнийг гэрлэхээс өмнө ярилцах нь чухал юм.

Гэрлэх гэж буй эрэгтэй, эмэгтэй хүн дараах зүйлс дээр ижил төстэй байх нь тустай:

• Оюун ухааны хувьд ижил төстэй байх.

• Гэрлэсэн амьдралын талаар ижил төстэй хүлээлттэй байх.

• Ижил төстэй онол сургаалын итгэл үнэмшил, сүнслэг дадал хэвшил.

• Мөнгө болон цагийг ашиглах талаар ижил төстэй үнэт зүйл, дадал хэвшилтэй байх.

• Амьдрал болон хүүхэд өсгөх нарийн ширийн зүйлсийн талаар нэгдмэл ойлголттой байх.

Үерхэх үеийн аюулын шинж тэмдгүүд

Жон Дрешер үерхэж байгаа хос харилцаагаа зогсоох талаар нухацтай бодох шалтгаан, найман асуудлыг жагсаажээ:[3]

1. Та хоёр байнга маргалддаг.

2. Та эмзэг сэдвүүдийг ярихаас зайлсхийдэг. Учир нь найздаа сэтгэл санааны хувьд хохирол учруулахаас айдаг. Хэрэв та өөртөө “Би энэ тухай ярихгүй байсан нь дээр” гэж хэлж байвал энэ нь аюулын дохио юм. Гэрлэлт гэдэг нь та олон зүйлийн талаар итгэлтэйгээр, хайраар ярилцах шаардлагатай болно гэсэн үг.

3. Таны харилцаа бие махбодын хувьд улам бүр дотно болж байна. Та хоёр гэрлээгүй байхдаа бие махбодын хувьд хэдий чинээ их харилцаанд орно, төдий чинээ хэл яриа, дууны өнгө, нүүрний хувирал, биеийн хэлэмжээр харилцаж сурах нь багасдаг. Илүү их хүрэлцэж, харин бага ярих нь жинхэнэ аюулын дохио байж болно.

4. Та ямар нэг айдсаас болж харилцаагаа авч үлдэж байгаагаа мэдэрдэг. Жишээлбэл, “Би харилцаагаа зогсоохыг хүсэж байна, гэхдээ хэнийг ч гомдоохыг хүсэхгүй байна.”

5. Таны найз бүтээлч шүүмжлэлийг хүлээж авч чаддаггүй. Таны найз буруу байх үедээ уучлалт гуйхаас татгалздаг уу? Энэ нь одоо ч хор хөнөөлтэй бөгөөд хэрэв та хоёр гэрлэсэн бол бүр ч их хор хөнөөлтэй байх болно.

6. Эцэг эх тань эсвэл таныг сайн мэддэг найз нөхөд таны харилцаа болон ирээдүйн гэрлэлтийг нь эсэргүүцдэг. Энэ нь мэдээж аюулын шинж тэмдэг байж болох бөгөөд таныг харилцаагаа зогсоох талаар бодоход хүргэх ёстой. Та зөвхөн хувь хүнтэй гэрлэдэггүй, харин гэр бүлд нэгддэг бөгөөд энэ нь таны гэрлэлтийн аюулгүй байдал, амжилтад ихээхэн нөлөөлөх нь үнэн юм.

7. Таны найз хэтэрхий хартай эсвэл сэжигтэй байдаг. Жишээлбэл, хэрэв таны найз үгэнд чинь эргэлзэж, эсвэл өөр байдлаар танд итгэхгүй байвал энэ нь аюулын дохио юм. Үл итгэлцэл нь ямар ч гэр бүлийн харилцааг устгах болно. Тиймээс, хэрэв таны найз хэтэрхий хартай эсвэл үл итгэмтгий бол харилцаагаа боломжтой дээр нь зогсоо.

8. Та харилцахдаа тавгүй мэдрэмжтэй байдаг. Ялангуяа найзтайгаа ганцаараа байх үед. Танд "Ямар нэг зүйл буруу байна" гэсэн бодол эсвэл сэтгэгдэл төрдөг. Энэхүү дотоод амар тайван байхгүй байдалд анхаарах цаг болсон!

Сургаалт үгс 24:3-4, “Мэргэн ухаанаар гэр орон сүндэрлэж бодол ухаанаар тэр чухамдаа тогтдог. Мэдлэг нь өрөөнүүдийг чинь тааламжит үнэт баялгаар дүүргэнэ.”

Ханиа сонгох нь хэн нэгний хийж болох хамгийн чухал сонголтуудын нэг юм. Бурхан өөрийн хүүхдүүдэд ирээдүйн ханиа бодож, танилцах үедээ ухаалаг сонголт хийхэд нь туслах дуртай байдаг.

► Энэ хичээлийн ямар ойлголт танд шинэлэг байсан бэ? Энэ нь яагаад чухал вэ? Үүнийг ойлгох нь таны харилцаанд хэрхэн туслах вэ? Үүнийг ойлгох нь бусдын төлөөх таны үйлчлэлд хэрхэн нөлөөлөх вэ?

Тэнгэрлэг Эцэг минь,

Биднийг удирдан, хангаж байдагт талархъя. Амьдралын чухал шийдвэрийг ухаалгаар гаргахад тусалдаг зарчмуудыг өөрийн Үгээр дамжуулан өгсөнд баярлалаа.

Ханиа сонгохдоо таны чухалчилдаг зүйлсийг баримтлахад бидэнд туслаач. Таны хүссэн эрэгтэй, эмэгтэй хүн байхад бидэнд туслаач. Даруу байж, бурханлаг хүмүүсийн зөвлөгөөг сонсоход бидэнд туслаач.

Бид таныг алдаршуулсан цэвэр ариун, үр жимстэй амьдралаар амьдрахыг хүсэж байна.

Амен

(1) Энэ хичээлийн нэг хэсгийг өөрийн үйлчлэлийн нөхцөл байдалд тохируулан заахаар сонгоорой. Та хувь хүнд эсвэл залуучуудын бүлэгт зааж болно. Хичээлээс гадуур зааж дуусгаад ангийн удирдагчдаа мэдэгдээрэй.

(2) Танай ахуй соёлд, гэрлэхээр төлөвлөж буй эсвэл гэрлэхээр шийдсэн бурханлаг эрэгтэй, эмэгтэй хоёрын харилцааны шинж чанаруудыг тодорхойлж бичнэ үү.

(3) Та (гэрлэх ч бай, гэрлэхгүй ч бай) ирээдүйн ханийнхаа талаарх шинж чанаруудын жагсаалт гаргаарай. Өгөгдсөн Бичвэр бүрийг унш. Таны бодлын амьдралыг цэвэр, Түүнд таалагдсан байлгахын тулд хэрхэн өсөх ёстойг Бурханаас харуулахыг гуйгаарай.

(4) Хэрэв та ганц бие бөгөөд ирээдүйд гэрлэхээр төлөвлөж байгаа бол, ханийнхаа талаар тодорхойлсон жагсаалт бичээрэй. Та үүнийг ангийн удирдагчтайгаа хуваалцах шаардлагагүй, зүгээр л даалгавраа гүйцэтгэсэн тухайгаа мэдэгдэхэд болно.