(1) Omuyizi ajja kuba asobola okunnyonnyola:

• Omukisa n’obukulu eby’obuwanguzi bw’omukkiriza ku kibi.

• Ekisa Katonda kyawa okubeera mu bulamu obuwnguzi.

• Obulamu obw’omwoyo obuva mu nkolaganan ne Kristo.

• Okulabula kwe byawandiikibwa okw’okugwa okuva mu kisa.

• Ekiwandiiko ky’ebikkiririzibwamu mu Bukristaayo ku bintu ebikwata ku bulokozi.

(2) Omuyizi ajja kuba ne ssuubi erya waggulu ku buwanguzi ku kibi.

► Musomere wamu Abaruumi 6. Ebyawandiikibwa bino bitugamba ki ku biki ebiva mu bulokozi?

Obukakafu obwa ssekinnoomu obw’obulokozi kye kimu ku miramwa emikulu egye baluwa ya 1 Yokaana. Yokaana yayogera ensonga ye ey’okuwandiika ebbaluwa eno; “Ebyo mbiwandiikidde mmwe, mumanye nga mulina obulamu obutaggwaawo, mmwe abakkiriza erinnya ly'Omwana wa Katonda” (1 Yokaana 5:13).

► Omuntu yandibadde akola ki singa abeera n’okubuusabuusa ku oba yalokoka?

Omutume yamanya nti walibaawo ebiseera omukkiriza wajja okwetaagira obukakafu nti yaloka. Alaga nti kisaanidde omukkiriza okunoonya obukakafu obw’okwesigamyako obukakafu bwe. Okuyita mu bbaluwa yonna yawa ebimu ku by’okulabirako ebikakasa, nga agamba nti “ku kino kwetutegeerera”.[1] Yagamba nti abakkiriza basobola okukozesa obukakafu buno okukakasa emitima gyabwe (1 Yokaana 3:19).

Ekisaanyizo ky’omukkiriza ekisinga okussibwako essira okuyita mu bbaluwa yonna eya 1 Yokaana bwe buwannguzi ku kibi. Omutume yagamba nti, “Baana bange abato, mbawandiikidde ebyo mulemenga okukola ekibi” (1 Yokaana 2:1). Mu Kiwandiiko kino, Omutume alaga nti omukkiriza alina okubeera mu bulamu obw’eddembe okuva mu kibi ekigenderere.[2] Abawandiikira okubalaga omugaso gw’okubeera mu bulamu obw’obuwanguzi.

…Era omuntu yenna bw'akola ekibi, tulina Omuwolereza eri Kitaffe, Yesu Kristo omutuukirivu, n'oyo gwe mutango olw'ebibi byaffe; so si lwa bibi byaffe fekka, era naye n'olw'ensi yonna (1 Yokaana 2:1-2).

Wano Yokaana akkiriza nti ekibi kisobola okubeerawo, wadde nga tekyetaagisa atukakasa nti singa omukkiriza akola ekibi, ssaddaaka ya Kristo esobola okutangirira ekibi ekyo. Ekyo tekitegeeza nti omukkiriza asobola okuddayo mu kibi nasonyiyibwa busonyiyibwa busonyiyibwa awatali kwenenya. Olunyiriri lugamaba bugambi nti ssaddaaka weeri, nga bwe kiri eri ensi yonna n’eri buli kibi kyonna. Tukimanyi nti ensi yonna terokolebwa bulokolebwa. Omukkiriza bwakola ekibi, ateekwa okwenenya olw’enkolagana ye ne Katonda.

Ennyiriri eziddako 1 Yokaana alaga nti enjawulo ennene ey’omukkiriza bwe buwabnguzi ku kibi ekigenderere. Ebigambo ebiri mu bukomera bye binnyonnyola ebyongerwako.

Era ku kino kwe tutegeerera nga tumutegedde, bwe tukwata ebiragiro bye [Omuntu ajeemera Katonda aba talina bukakafu buno]. Ayogera nti, “Mmutegedde,” n'atakwata biragiro bye, ye mulimba, n'amazima tegali mu oyo (1 Yokaana 2:3-4).

Buli muntu yenna akola ekibi, akola n'obujeemu; era ekibi bwe bujeemu. Era mumanyi ng'oyo yalabisibwa era aggyewo ebibi; ne mu ye temuli kibi. Buli muntu yenna abeera mu ye takola kibi; buli muntu yenna akola ekibi nga tamulabangako, so tamutegeera (1 Yokaana 3:4-6).

Abaana abato, omuntu yenna tabakyamyanga; akola obutuukirivu ye mutuukirivu [Omuntu tasobola kubalibwa nga mutuukirivu nga akyagenda mu maaso n’okwonoona], nga ye bw'ali omutuukirivu; akola ekibi wa Setaani; kubanga okuva ku lubereberye Setaani akola ebibi. Omwana wa Katonda kyeyava alabisibwa amalewo ebikolwa bya Setaani (1 Yokaana 3:7-8).

Buli muntu yenna eyazaalibwa Katonda takola kibi, kubanga ensigo ye ebeera mu ye; so tayinza kukola kibi, kubanga yazaalibwa Katonda (1 Yokaana 3:9).

Era akwata ebiragiro bye abeera mu ye, naye mu ye. Era ku kino kwe tutegeerera ng'abeera mu ffe, olw'Omwoyo gwe yatuwa (1 Yokaana 3:24). [Okunyweerera mu Kristo tekikwatagana nakugenda mu maaso nakumenya mateeka ga Katonda.]

Ku ekyo kwe tutegeerera nga twagala abaana ba Katonda, bwe twagala Katonda ne tukola ebiragiro bye. Kubanga kuno kwe kwagala kwa Katonda ffe okukwatanga ebiragiro bye (1 Yokaana 5:2-3). [Okwagala okwa ddala kuleetera okugonda. Obutagonda bulaga obutaba na kwagala.]

Kubanga buli ekyazaalibwa Katonda kiwangula ensi [bibeera bikemo na Mwoyo]; era kuno kwe kuwangula okwawangula ensi, okukkiriza kwaffe (1 Yokaana 5:4).

Tumanyi nga buli muntu yenna eyazaalibwa Katonda takola kibi, naye eyazaalibwa Katonda amukuuma [amukuuma], omubi n'atamukwatako (1 Yokaana 5:18).

► Kiki eky’enjawulo ku mukkiriza ekirabikiraawo mu nnnyiriri zino?

Okuva mu nnyiriri zino, kirabikirawo nti ekintu ekikulu eky’omukkiriza kiri nti abeerawo omu kugondera Katonda. Obuwanguzi ku kibi ekigendereremukisa gwa maanyi eri omukkiriza.

Ebiseera ebimu abantu abgaana nti omukkiriza asobola okubeera mu bulamu obw’obuwanguzi ku kibi ekigenderere basoma 1 Yokaana 1:8: “Bwe twogera nga tetulina kibi, twekyamya fekka so nga n'amazima tegali mu ffe.” Naye kitegeeza ki okubeera ne kibi? Kitegeeza nti nabakkiriza bagenda mu maaso n’okukola ekibi ekigenderere? Ekyo tekyandikwataganye na sitatiment eziri mu 1 Yokaana 3 ebijuliziddwa waggulu. Yandisobodde atya okwogera kiwandiiko ekiri mu ssuula 3 singa yali amaze okugamba nti, “Buli muntu nga mwotwalidde na buli mukkiriza, agenda mu maaso n’okukola ekibi”? Ekyo tekyandikoze makulu.

Ekinyusi kiraga amakulu. Mu 1 Yokaana 1:7, okunaazaako ekibi kusuubizibwa. Okunaazaako kuno kwabo abatambulira mu musana, ekitegeeza okubeerawo okusinziira kumazima, mu kugondera Katonda. Abo kati abatambulira mu kugondera Katonda banaazibwako ebibi byabwe ebyayita n’omusaayi gwa Kristo.

Naye wasobola okubeerawo abantu abamu abagaana nti bayonoona era betaaga okunaazibwa. Abo be bagamba nti tebalina kibi nga beerimba bokka. Bagamba nti teboonoona nti ekizibu kyabwe eky’ekibi baakimaliriza awatali Kristo.

Nate mu 1 Yokaana 1:9, okusonyiwa n’okunaazibwa bisuubizibwa. Mu 1 Yokaana 1:10 nate agamba nti abo abagamba nti tebakolanga kibi baba bawakanya Katonda kennyini.

Yokaana yali awandiika okutereeza ensobi eyaabo abaali tebalowooza nti betaaga okunaazibwa n’okusonyiyibwa ebiweebwa Kristo—abo abaalowooza nti baali tebetaaga akulokoka. Yali tagamba nti nabakkiriza nabob agenda mu maaso n’okukola ekibi, kuba nga ekyo kyandibadde kiwakanya ekintu ekikulu kye yateekako essira ne kiwandiiko ekirambulukufu mu baluwa eno.

Okubeera mu bulamu obuwanguzi si kyangu bulijjo obubi obusikire n’obunafu bwa bantu. Olwa bino, abantu bangi bakkiriza nti okubeerawo nga tokola kibi kigenderere kiba kizibu. Naye ekisa kya Katonda kirina eby’okuddamu eri byombi.

► Obubi obusikire kye ki?

Obugwenyufu Obusikire bwe bwonoonefu obwempisa z’omuntu mu butonde bwe ekimuleetera okwewunzikira ekibi okuva mu kuzaalibwa. Oluvannyuma lw’okukyuka, omukkiriza alwanagana ne ngeri eno eri ekibi. Naye Katonda ateekawo ekisa si kyabuwanguzi obwa buli lunaku kyokka, naye ne kyobuwanguzi obw’okunaaza obubi obusikire (Ebikolwa by’Abatume 15:9; 1 Abasessaloniika 5:23; 1 Yokaana 1:7).

Obutonde obw’ekibi si mbeera gye tuteekwa okubeera wansi waayo obulamu bwaffe obw’okunsi bwonna. Okubeera mu buwanguzi omukkiriza yetaaga okutuuka watuuka nawaayo omutima gwe eri Katonda obuterekaayo, (Abaruumi 12:1). Omwoyo Omutukuvu bwajjuza omukkiriza, asobozesa omukkiriza okwagalira ddala Katonda.

► Obunafu bwa bantu kye ki?

Obunafu bwa Bantu kwe kulemwa mu mubiri oba mu kulowooza oba ebibulako. Olwa Adamu okugwa mu kibi, n’okuddirira okw’omuntu okuyita mu kugenda mu maaso n’okukola ekibi, tuli banafu okusinga Katonda bwe yatukola okubeera mu ndowooza, mu mubiri, ne mu birowoozo.

Obunafu bw’omuntu butuleetera okukola ensobi. Tuyinza obutamanya kintu kituufu kya kukola mu mbeera emu. Tuyinza okubeera nebirowoozo eby’ensobi ku kika kya bantu oba abantu abogera olulimi olumu. Endowooza ez’ensobi tezitereezebwa butereezebwa bwezityo omuntu bwalokoka. Endowooza eziri mu nsobi zivaamu ebikolwa ebikyamu kubanga singa omuntu aba mu n nsobi ku kintu kyalina okukola, ajja kukola ekintu ekikyamu.

Obunafu busobola okuleetera omuntu okusitaana olw’ensonga eziwerako. Ayinza okuba nga teyayiga engeri yokuteeka mu nkola ennono z’Ebyawandiikibwa. Oba olyawo teyazimba mpisa mu ye ezandimuyambye okugaana okubuguumirira. Ayinza obutaba nampisa eza buli lunaku ezandiyambye okumukuuma nga wamaanyi. Oba olyawo tategeera mugaso gwa kutambulira mu Mwoyo.

[1]Tetuteekwa kwanguyiriza kusalira balala musango, kubanga tetumanya oba bonoona mu bugenderevu oba nedda. Abantu batera okukooa ensoobi olw’obutamanya n’obutaba bakulu mu mwoyo.

Wali obaddeko ne kikembo kye walowooza nti tewali gwe kyali kituuseeko? Wali obaddeko awo ne webuuza oba ddala kisoboka okubeera mu bulamu obw’obuwanguzi ku kibi? Katonda yasuubiza ekisa ekisoobozesa ekiriwo mu kifo ky’obunafu bwaffe mu kukemebwa:

Tewali kukemebwa okubatuukako okutali kw'abantu; naye Katonda mwesigwa, ataabaganyenga kukemebwa okusinga bwe muyinza; naye awamu n'okukemebwa era anassangawo n'obuddukiro, mulyoke muyinzenga okugumiikiriza (1 Abakkolinso 10:13).

► Bintu ki ebimu bye tusobola okumanya mu lunyiriri luno?

Olunyiriri luno lutubuulira ebintu ebikulu.

1. Okukemebwa kujja olw’okuba tuli bantu. Ekyo kitegeeza nti okusitaana tekuli ku ggwe wekka.

2. Katonda amanyi wetukoma. Amanyi kyenkana wa kye tusobola okugumira. Ffe tetumanyi tusobola kugumira kyenkana wa, Ye amanyi.

3. Katonda ateeka ekkomo ku bikemo ebitujjira. Ayagala tubeere mu bulamu obuwanguzi. Okusinziira ku lunyiriri luno, obuwanguzi ekiseera kyonna busoboka.

4. Katonda atuwa kye twetaaga Olw’okuwangula. Ateekawo ekkubo ey’okuwoneramu. Agenderera ffe tubeere mu bulamu obw’obuwanguzi. Atuwa ekisa eky’okubeera mu bulamu obuwanguzi.

► Okubikkula Abaruumi 8 okutunuulira ennyiriri ezikozesebwa mu kitundu kino.

[1]Abaruumi 8 atuwa okunnyonnyola okwewuunyisa ku mulimu ogw’Omwoyo Omutukuvu mu bulamu bw’omukkiriza. Abaruumi 8:26 atugamba nti n’okumanya tetumanyi kusaba nga bwe kisaanidde, naye Omwoyo Omutukuvu asaba okuyita mu ffe.

Essuula eno etugamba ng abwe tulina okubeera mu bulamu obw’obuwanguzi. Tetulina musango singa tugoberera Omwoyo mu kifo kyokugoberera omubiri (Abaruumi 8:1, 4). Tusobola okutuukiriza obutuukirivu Katonda bwatusuubiramu, kubanga amaanyi ag’Omwoyo gakola mu ffe (Abaruumi 8:4).

Omuntu bwaba afugibwa obutonde obw’ekibi, aba tasobola kusanyusa Katonda (Abaruumi 8:8), omusango guba gumusinze (Abaruumi 8:1), era omusango gumusalirwa Katonda (“okufa” mu Abaruumi 8:13). Naye olwamaanyi n’okuluŋŋamya okw’Omwoyo Omutukuvu, tusobola okukomya ebikolwa by’ekibi (Abaruumi 8:13-14).

Mu Yokaana 15:1-10 mwe muli ekyokulabirako ekimanyiddwa ennyo eky’omuzabbibu namatabi. Kyanyukula ebibuuzo ebimu ebikulu.

Tunywerera tutya mu Kristo? “Bwe mukwata ebiragiro byange, munaabeeranga mu kwagala kwange” (Yokaana 15:10). Okulekera awo okunywerera mu Kristo kyanditegeeza nti omuntu alekedde awo okugondera Katonda. Kati kiki ekibeerawo?

“Omuntu bw'atabeera mu nze, asuulibwa ebweru ng'ettabi, akala; bagakuŋŋaanya, bagasuula mu muliro, ne gaggya” (Yokaana 15:6). Singa omuntu alekera awo okugonda, era naba nga alekera awo okunywerera mu Kristo, agaanibwa. Ekyokulabirako ekyamatabi nga gookebwa kiraga okugaanibwa ddala.

“Mubeere mu nze, nange mu mmwe. Ng'ettabi bwe litayinza kubala bibala lyokka, bwe litabeera ku muzabbibu, bwe kityo nammwe temuyinza, bwemutabeera mu nze” (Yokaana 15:4). “Buli ttabi eriri mu nze eritabala bibala, aliggyawo” (Yokaana 15:2) Singa tetunywerera mu Kristo mu kugonda, tetusobola kubala bibala. Okubala ebibala kitegeeza okubeera mu bulamu obwakyuka, obulimu omukisa, era nga buluŋŋamizibwa ne kisa kya Katonda. Omuntu bwajeemera Katonda, aba yeyawudde yekka okuva ku ntambula y’obulamu Katonda bwa gaba era aba takyasobola kubeera mu bulamu obw’ekisa kya Katonda. Oyo atabala bibala agaanibwa.

Kristo alinga omuzabbibu ogutuwa obulamu (Yokaana 15:6). Obulokozi bufunibwa okuyita mu nkolagana. Okwawukana ku Kristo oba oyawukanye n’obulokozi. Tukuuma enkolagana ey’obulokozi ne Kristo nga twesiga n’okugondera Katonda (Yokaana 15:10).

Ettaala zamasannyalaze namasannyalaze bye by’okulabirako ebyekiseera kino ebyendowooza emu. Ettaala yamasannyalaze erina ekitangaala ate nga amaanyi ga masannyalaze gatambulira mu yo. Ettaala yamasanyalaze tesobola kukuuma kitangaala bwe yawukanyizibwa ku nsibuko yamaanyi gaayo. Mu ngeri yeemu, tulina obulamu obutaggwawo olw’enkolagana yaffe ne Kristo (Yokaana 17:3). Obulamu bwe bukulukutira mu ffe. Tetusobola kukuuma bulamu obwo bwe tumwawukanako.

Abantu abamu bagamba nti tewali ngeri yonna erinnya gye lisobola okujjibwa mu kitabo eky’obulamu nga limaze okuwandiikibwamu. Naye waliwo wakiri engeri emu erinnya gyelisobola okujjibwa mu kitabo kino:

Era omuntu yenna bw'aggyangamu mu bigambo eby'ekitabo eky'obunnabbi buno, Katonda alimuggyako omugabo gwe ku muti ogw'obulamu, ne mu kibuga ekitukuvu, ebiwandiikiddwa mu kitabo kino (Okubikkulirwa 22:19).

Waliwo abantu batono abalina omusango ogw’okujja ebimuku biri mu kitabo eky’Okubikkulirwa. Wabula, ensonga eyogerwa nti kisoboka erinnya okujjibwa mu kitabo ky’obulamu.

Yesu yawa ekisuubizo n’okulabula bwe yagamba nti, “Bw'atyo awangula alyambazibwa engoye enjeru, era sirisangula n'akatono linnya lye mu kitabo ky'obulamu” (Okubikkulirwa 3:5).

Omulundi ogumu, Pawulo yali mweraliikirivu nti abantu abakyuka mu Ssessaloniika basobola okuba nga baalekayo okukkiriza. Yagamba nti singa kino kyaliwo, omulimu gwe ogw’okubabuulira enjiri gwandibadde gufiiridde bwerere (1 Abasessaloniika 3:5). Kino kiraga nti omukkiriza kisoboka okugwa okuviira ddala mu kukkiriza okubeera nga okukyuka okwasooka tekulina mugaso.

Mu 2 Peetero 2:18-21 tulaba nga waliwo abasomesa ab’obulimba abalimba abakkiriza abamu baadduka okweyonoonyesa mu nsi okuyita mun kumanya Mukama waffe era Omulokozi Yesu Kristo. Abaali abakkiriza bano baali baamanya ekkubo ery’obutuukirivu naye ne baalireka. Ekyawandiikibwa kino kigamba nti kyandibadde kirungi singa bano tebaamanyirako ddala kkubo ery’okukkiriza okusinga okuddayo mu bulamu obw’ekibi. Kino kiraga nti kisoboka omuntu okufiirwa obulokozi bwe nga addayo mun kibi. Singa kyali tekisoboka omuntu okufiirwa obulokozi omuntu yandibadde tasobola kubeera mubi okuusinga bwe yali nga tannalokoka.

Okubeera omwana kisobola okukyusibwa. Lumu twali baana ba Setaani (Yokaana 8:44) era abaana b'obusungu (Abaefeso 2:3), naye okubeera omwana okwo kukyusibwa Katonda bwatufuula abaana (Abaruumi 8:15). Omwana omusaasanya yafiirwa byonna eby’okubeera omwana bwe yayawukana ku kitaawe. Bwe yakomawo, kitaawe yamwogerako nga eyali afudde (Lukka 15:32).

Katonda ayagala abakkiriza okuwulira nga bakuumiddwa wkibaleetera okweteeka mu kabi kannyini, naye si kwesigamya ekyo kyebawulira ku bukakafu obw’obulimba. Tetuteekwa kusuubiza bakkiriza kintu Katonda kyataasuubiza. Tasuubiza nti tujja kukuumibwa obutafiirwa a bulokozi bwaffe si nsonga kiki kye tukola. Tatusuubiza kutulagirira n’okutusobozesa okubeera mu bulamu obw’obuwanguzi ku kibi. Obwo bukakafu obumala ffe obutabeera mu kutya.

Ebiseera ebimu abakkiriza babeera n’okubuusabuusa ku bulokozi bwabwe. Bayinza okubeera abakakafu nti olumu baali balokole, kyokka nga babuusabuusa oba nga bakyali mu nkolagana ey’obulokozi ne Katonda. Baibuli tetuleka mu kubuusabuusa ku kibuuzo kino ekikulu. Kwagala kwa Katonda omukkiriza okubeera nga yekakasa obulokozi bwe asobole okubeera n’obuvumu ku lunaku olw’okusala omusango, (1 Yokaana 4:17) awatali kwewuunya oba anaayita oba taayite kugezesa kwa Katonda.

Omukkiriza bwa beera n’okubuusabuusa, talina kukugaya bugayi kubanga mukakafu nti lumu yalokoka. Kituufu mwekebere mwekka oba nga muli mu kukkiriza (2 Abakkolinso 13:5). Singa omuntu amanya nti yalokoka nga agoberera emitendera gya Baibuli egy’okulokoka, era nga anyweredde mu Kristo nga atambulira mu nkolagana naye ey’okugonda, asobola okuba omukakafu nti alina obulamu obw’omwoyo.

Omukulembeze w’ekibiina wetegereze: Bamemba babiri ab’ekibiina basobola okunnyonnyola ekitundu kino nekyo ekiddako.

Obuwanguzi ku kibi bulabika nga obutasoboka eri abantu olw’ebintu bibiri: obunafu bw’omuntu n’obubi obusikire. Tuteekwa okujjukira nti Katonda tatusalira musango olwokubeera n’okulemwa okwa bantu. Katonda agaba amaanyi ku bw’Omwyo we tusobole okutuukiriza okwagala kwe. Si kibi okubeera n’obunafu, era tewali muntu alina okwonoona olw’obunafu bwalina.

Obubi obusikire kye bukola kigenda mu maaso oluvannyuma lw’okukyu, naye Katonda agaba ekisa ekyokunaaza. Tetuvunaanibwa olw’okuzaalibwa n’obubi obusikire, naye musango gwaffe bwe tugenda mun maaso n’okukyusibwa n’obubi obusikire. Kale obunafu bw’omuntu wadde obubi obusikire tewali kirina kutufiiriza ssuubi ery’okubeera mubuwanguzi.

Okuyita mu kukkiriza mu Kristo, tugattiddwa wamu naye. Tufaanana mu kufa kwe ne mukuzuukira kwe, era eri ffe kino kitegeeza okufa ku kibi n’okuzuukirira obulamu obuggya (Abaruumi 6:3-11). Ali mu ffe, naffe tuli mu ye. Obulamu Obukristaayo tebuli nti tugezaako okugoberera eky’okulabirako kye kyokka, nga tukola kye tusobola. Obulamu Obukristaayo tubulina lwa Kristo ali mu ffe. Yawangula ekibi bwe yali akyatambula ku nsi, era akyabeerawo mu buwanguzi mu ffe.

Ngatudde ku mabbali g’oluguudo mu kibuga ekinene yali mukazi omwavu ngayambadde ebiziina. Enviiri ze zaali zisansuse nga zezinze zinze. Olususu lwe nga lukyafu lukongedde. Ngatudde nga talina ssuubi mu kusoberwa. Amangu ago, ne wabaawo oluyogaano olwa maanyi era oluguudo nga weruwetera Omulangira ow’obwakabaka obwo owamaanyi yali ku ggaali ngajja ne basajja be. Omulangira nga mubalagavu, wamaanyi, ate wakisa! eggaali ye bwe yali eyisa ekifo omukazi omukyafu we yali atudde, omulangira yayita omugoba weggaali ye, “Yimirira!”

Egaali bwe yayimirira, omulangira yagamba abaddu be, “Omukazi oyo atudde ku mabbali g’oluguudo gwe njagala okuwasa!”

Kati ebyaliwo bikyuka. Tutunuulira mu lubiri ku lunaku olw’embaga. Tulaba ki? Omukazi omukyafu nga akyayambadde ebiziina bye ne nviiri ezisansuse nga zezinze zinze. Nga yetooloddwa abayambi be, Nga bakwatiridde ekyambalo ky’obugole, ssabbuuni, nebya kaloosa, naye omugole tali ku byakweteekerateekera lunaku olw’embaga ye. Omu ku bakazi nabuuza, “Nnyabo wange, toyagala kwetegekera mbaga yo?” Omugole nayanukula, “Eno yengeri gyennali ntunulamu bwe yandaba nayagala okumpasa, kale ndowooza si kikulu.”

Tusobola okwewuunya endowooza eyo. Olw’okuba nga omulangira omwagala, tayagala mukazi ono kusigala mu mbeera ye. Olw’okuba nga omulangira amwagala, bwe yali nga tasikiriza kutunuulira, yandibadde ayagala okufaanana mu ngeri esingako obulungi ku lulwe.

Katonda atwagala nga tuli bonoonyi, naye ekyo tekitegeeza nti ekibi si kintu. Olw’okuba nga atwagala, ayagala tukyuse embeera yaffe. Olw’okuba nga atwagala, tulina okwagala okutwala ekifaananyi ne mbala ebimusanyusa.

Okwetoloola ensi amazima ga Bakristaayo gagenda gatabulwa n’obulombolombo. Abamu bayigiriza obuwanguzi ku kibi okuyita mu kuddiŋŋana okusaba, okuyita mu kwewaayo mu birowoozo, okuboggolera emyoyo emibi (egirowoozebwa okubeera ensibuko y’ebibi ebimu), okweleetako obulumi, okwambala ensiriba, okuteeka obubonero obw’eddogo okwetoloola amaka, oba okusiiga omubiri n’amafuta ag’enjawulo. Eba nsobi okusuubira obuwanguzi okuyitamu busamize!

Abamu nabo bayigiriza obuwanguzi ku kibi mu ngeri ennyangu. Bagamba nti byoyitamu mu bulokozi n’okujjuzibwa Omwoyo bijja kuzikiriza amaanyi g’ekibi lubeerera. Balemwa okukkaatiriza obwetaavu bw’okukula mu Mwoyo, empisa, n’okutunula bulijjo.

Abo abalemwa okuwangula buli kiseera ensi n’ekibi balina okwebuuza bokka mu bwesimbu ebibuuzo bino wammanga:

1. Ddala nazaalibwa omulundi ogw’okubiri? N’afa ku bulamu bwange obukadde; neenenya nendeka emabega obulamu obukadde? Nina obulamu obuggya mu Kristo—endowooza empya, byenjagala ebipya, engeri empya gye njagalamu ebya Katonda (2 Abakkolinso 5:17)? Kristo yajja okutuula mu mutima gwange okuyita mu Mwoyo Omutukuvu? Ngezaako mu maanyi gange ag’obuntu okuwangula ekibi, oba nesigamye ku maanyi ga Katonda abeera mu nze (Abaggalatiya 2:20)?

2. Ntereka Ekigambo kya Katonda mu mutima gwange? Omuwandiisi wa Zabbuli yajulira nti, “Ntadde ekigambo kyo mu mutima gwange, Nneme okwonoona mu maaso go” (Zabbuli 119:11). Tuteekwa okulya Ekigambo kya Katonda nga baana abawere bwe bayonka amabere ga bannyabwe (1 Peetero 2:2).

3. Nnerowozaako ddala nga nnafa ku kibi era ndi mulamun ku lwa Katonda? “Bwe mutyo nammwe mwerowoozenga okubeera abafa ku kibi, naye abalamu eri Katonda mu Kristo Yesu” (Abaruumi 6:11). Ŋŋaana okukemebwan’obuvumunti tekulina maanyi ku nze?

4. Nesigamye ku Katonda olw’obuwanguzi? Omutume Yokaana yalangirira nti omuntu azaaliddwa mu maka ga Katonda awangula ensi. “Era kuno kwe kuwangula okwawangula ensi, okukkiriza kwaffe” (1 Yokaana 5:4). Omutume Pawulo yagamba nti tajja kuteeka bwesige mu kintu kyonna okujjako omusalaba gwa Yesu, kubanga okuyita mu musalaba ebintu by’ensi bibuza amaanyi okutusikiriza n’okutufuga (Abaggalatiya 6:14). Tekisoboka ffe okubeera mu bulamu obuteredde obw’obuwanguzi bwe twerabira ensibuko y’obutuukirivu bwonna, Yesu.

5. Mbeera ne Yesu buli lunaku olw’okukkiriza era ne sikkiriza kibi kyonna mu bulamu bwange? Si nsonga tuli luddawa mu lugendo lwaffe olw’Obukristaayo, obuwanguzi tebujja buzzi. Nteekwa okusalawo okutwala endowooza ya Kristo ku kibi n’okugoberera eky’okulabirako kye (Abaruumi 13:14; Abaefeso 4:24)

6. Nyambadde eby’okulwanyisa bya Katondda eby’omwoyo? Mu ddwaniro ery’obulamu abakkiriza bangi bateekebwako ebiwundu obusaale bwa Setaani lwakuba nti tebafaayo eri obukuumi bwabwe obw’omoyo (Abaefeso 6:11).

7. Neefuga? Si nsonga oba tuli bakulu kyenkana wa mu kukkiriza kwaffe wajja kubeerawo bulijjo obwetaavu obw’okwefuga. Ntendeka omubiri gwange ne ngukwasisa empisa? Okwagala kwa Katonda okuli mu butonde, (nga okwagala okulya emmere, okwebaka, oba okwegadanga) biteekwa okufugibwa, okusobola okuweereza ebigendererwa by’omwoyo gwange ogwa kazaalibwa. Olw’okuba nga omubiri gwange gwayonoonebwa ekibi, bye gwagala tebyenkanankana. Omubiri teguteekwa kukkirizibwa kufuga; guteekwa okuweereza Omwoyo. Pawulo yagamba nti yafuganga omubiri gwe naguleetera okumugondera, asobole obutabeera aboolebwa mu mwoyo (1 Abakkolinso 9:25-27). Empisa zetaagisa eri buli Mukristaayo.

8. Mbeerawo mu kugonda? “Tambulira mu musana” kwe kuwabula kwa Omutummme Yokaana (1 Yokaana 1:7). Kubanga waliwo obutego bungi, emiziziko, ne bifo eby’obulabe mu kkubo erigenda mu ggulu tuteekwa okutambula bulijjo mu musana gw’Ekigambo kya Katonda (Zabbuli 119:105) n’okubeerawo okw’Omwoyo Omutukuvu (Yokaana 14:26). Okugonda Kulina ekisuubizo nti omusaayi gwa Yesu gujja kutukuuma nga tutukula. Okutambula mu kizikiza kuleetera okwekoona n’okugwa era n’oluvannyuma okufa abo abagaana okukomawomukkubo ery’omusana.

► Musomere wamu Ekiwandiiko ky’ebikkiririzibwamu wakiri emirundi ebiri.

Mukisa era mulimu gwa buli mukkiriza okubeera mu bulamu Obukristaayo obw’obuwanguzi. Omukkiriza alina obulamu okuvamu nkolagana gyalina ne Kristo. Omukkiriza agaana okwagala kwa Katonda naddayo mu kibi anafuya era nasaanyizaawo ddala okukkiriza, okutugatta ku Katonda. Katonda atuwa ekisa ekituwa amaanyi, kale omukkiriza asobola okuwangula ebikemo.

(1) Ebyawandiikibwa Ebiweereddwa Okusoma. Buli muyizi ajja kuweebwa ekimu ku byawandiikibwa bino wammanga. Nga okuyiga okuddako tekunnabaawo, oteekwa okusoma ebyawandiikibwa era owaandiike ku kyebyogera ku ky’okuyiga ku ssomo lino.

• Matayo 13:18-23

• Abaebbulaniya 10:23-39

• Yakobo 1:21-27

• 2 Peetero 1:1-11

• Okubikkulirwa 3:14-22

(2) Ekigezo: Ojja kutandika okusoma okuddako n’okugezesebwa kussomo 9. Yiga n’obwegendereza ebibuuzo eby’ekigezo nga weteekateeka.

(3) Ebiweereddwa Okuyigiriza: Jjukira okutegeka n’okuwa lipoota ku byoyigiriza wabweru w’ekibiina.

(1) Ogumu ku miramwa emikulu oguli mu 1 Yokaana gwe guliwa?

(2) Kisaanyizo ki eky’omukkiriza 1 Yokaana kyasimbako nnyo essira?

(3) Bintu ki ebina byetumanyiokuva mu 1 Abakkolinso 10:13?

(4) Omukkiriza yeyongera atya okubeera mu Kristo?

(5) Tukuumira tutya enkolagana ey’obulokozi ne Kristo?