(1) Omuyizi ajja kuba asobola okunnyonnyola:

• Emitendera emikulu mu mitwe egikwata ku by’oluvannyuma.

• Okudda kwa Kristo ne kye kitegeeza eri obulamu bw’Omukristaayo.

• Okuzuukira kwa bantu bonna n’omugaso gw’omubiri.

• Okusala omusango ogw’enkomerero eri ebitonde byonna ebimanyi okukola obulungi n’obubi.

• Obwakabaka bwa Katonda obutaggwawo.

• Ekiwandiiko ky’ebikkiririzibwamu mu Bukristaayo ku by’oluvannyuma.

(2) Omuyizi ajja kumanya omugaso gw’okutunuulira obulamu nga eggulu bwe libutunuulira.

► Musomere wamu Danyeri 7:9-14. Ebyawandiikibwa bino bitugamba ki ku by’omu maaso?

Eby’okuyiga mu bunnabbi bwa Baibuli mulimu: akabonero kensolo, amakondeere, ebibonyoobonyo ebyamaanyi, omulabe wa Kristo, emyaka omusanvu, emyaka 1,000 namulondo enjeru, ekibuga okukka wansi, ennyanja ey’omuliro.

► Nsonga ki zosobola okulowooza ku bunnabbi bwa Baibuli?

Ebyogerebwa ku bunnabbi bitera okutunuulira ebibuuzo ebitono mu kifo ky’okutunuulira amazima amakulu. Emitwe mu bunnabbi gyonna tegyenkanankana bukulu. Tetujja kugezaako kwogera ku byonna eby’obunnabbi mu musomo guno.

Ebiseera ebimu abantu bebuuza akabonero kensolo bwe kajja okufaanana, nsi ki omulabe wa Kristo mwajja okuva, era abajulirwa ababiri bagenda kubeera be bani. Bino bye bibuuzo Baibuli bye tayanukula bulungi, era okuwakana mu byo si kyamakulu.

Waliwo emitwe emirala Baibuli gye yongera okunnyonnyola. Eby’okulabirako kwe kuba nti oba Yesu alikomawo ku ntandikwa, wakati w’okuyigganyizibwa, oba ku nkomerero y’okuyigganyizibwa; era oba emyaka 1,000 giriba myaka ddala oba nedda. Wabula, enjigiriza zino si nkulu eri enjiri. Toteekwa kwawukana namuntu olw’obutakkiriziganya naye ku ndowooza ye ku nsonga nga zino.

Waliwo amazima agetaagisa mu bunnabbi bwa Baibuli. Gano gemazima ameerufu buli muntu akkiriza Baibuli gakkiriza. Enjigiriza zino zikyusa engeri gye tubeeramu nga Abakristaayo nenkola yonna ey’enjiigiriza z’Obukristaayo. Leka tutunuulire amazima ag’omugaso ga ngeri nnya agabikkulirwa mu bunnabbi bwa Baibuli nga gakwata ku by’oluvannyuma.

Yesu ajja kudda mu buntu ku nsi. Wadde nga waali mu mwoyo ku nsi kati, ajja kukomawo mu kitiibwa kye yazuukiriramu mu maaso ga bantu bonna ku nsi. (Soma Okubikkulirwa 1:7.)

► Bintu ki ebimu ebigenda okubeerawo Yesu bwalidda?

Okudda kwa Kristo kwe kuliba entikko ye byafaayo byensi. Obwakabaka obw’ensi bulifuuka obwakabaka bwa Kristo. Abo abaali abesigwa eri ye bajja kuweebwa empeera n’okussibwamu ekitiibwa. Abo abamujeemera bajja kuteekebwa wansi, era ajja kubeera namaanyi okuwangula abamuwakanya bonna. (Soma Matayo 26:64.) Buli vviivi lirivunnama, na buli lulimi lulyatula nti Yesu ye Mukama (Abafiripi 2:10-11).

[1]Abakristaayo abaliba nga baafa bajja kuzuukizibwa okufugira awamu ne Kristo (2 Timoseewo 2:12). Bo wamu n’abakkiriza abalamu bazuukira okusisinkana Mukama bwalirabika (1 Abasessaloniika 4:16-17).

Okudda kwa Kristo lye ssuubi ery’omukisa eri bakristaayo bonna. (Soma Tito 2:13.) Lowooza ku kudda kwa Kristo kye kutegeeza kyonna gye tuli: enkomerero y’okuyiganyizibwa, okubonaabona, nnaku; okuddamu okubeera awamu nate okwa batukuvu nabaagalwa ba Bakristaayo; obukakafu obulaga nti okukkiriza kwaffe si kwa bwereere; okulaba Yesu Kristo yennyini; n’omulyango oguyingira mu ggulu, okutuukirira kw’obulamu obutaggwawo nga tuli ne Katonda. Tewali na kimu ku bintu bino ekyesigamye ku kiseera eky’okudda kwe, naye ku kuba nti ajja kudda nga bweyasuubiza.

Yesu yagamba nti ajja kukomawo mu maanyi ne kitiibwa (Matayo 24:30). Yasuubiza okudda okutwala abantu be okubeera naye (Yokaana 14:3). Bamaalayika baagamba nti ajja kukomawo mu ngeri yemu nga bwe baamulaba nga agenda mu ggulu (Ebikolwa by’Abatume 1:11). Abatume baabuulira okwenenya nga bwe balindirira Kristo okudda okuteekawo entegeka ya Katonda eyenkomeredde ekwata ku nsi. (Soma Ebikolwa by’Abatume 3:19-21.) Okuba nti Yesu ajja kudda nate ku nsi mu maanyi ne mu kitiibwa kiddiŋŋanibwa mu Ndagaaano Empya.[2]

Wadde nga waliwo obubonero obugenda okukulembera okudda kwa Kristo omulundi ogw’okubiri, tetusobolaumanyiraddala ddi lwagenda kukokmawo. Kirungi abakkiriza okubeera nga buli kiseera basuubira okudda kwa Yesu n’okutambula nga bwe kisaanidde. (Soma Makko 13:33-37.)

► Lwaki Yesu akomawo?

Tubeera mu nsi abantu abasinga obungi nga bali mu bujeemu eri Katonda. Ebitonde byonna bibonaabona olw’ekikolimo kye kibi. Ensi tegenda kutuukirira olw’ebyobufuzi, okuddaabulula embeera zabantu, okulongoosa eby’ensoma, oba eby’enfuna okuyitimuka. Yesu ajja kuyingira ebitonde bye nga talaze nga Kabaka adda okubitereeza.

Abantu bonna bonoonyi, naye bwe begatta ku bwakabaka bwa Katonda kyeyagalire kati, basobola okuwona okusala omusango okugenda okujja. Obwakabaka bwa Katonda we buli bukola mu bantu abeenenya ne bakkiriza (Makko 1:14-15, Makko 9:1). Obwakabaka obwo bujja kujja mu bujjuvu era mu lwatu Yesu lwa likomawo.

► Tulina kubeerawo mu ngeri ki olw’okumanya nti Yesu akomawo?

Tuteekwa okujjukira ebyo Abakristaayo abaasooka bye bakulembezanga. Tuyitibwa okukuuma okukkiriza kwaffe (1 Abakkolinso 16:13) n’okugumiikirizaa okutuusa ku nkomerero (Matayo 24:13). Tulabulwa obutakkiriza masanyu ne bintu by’ensi okutuleetera okwerabira okudda kwa Kristo (Lukka 21:34-36). Tubeerawo okusinziira ku bitugasa ebitaggwawo okuva ebintu by’ensi lwe biriggwawo (2 Peetero 3:11-13). Tugambibwa okutunula, si kutunuulira waggulu okumulaba, naye okusigala nga tutunula mu mwoyo okudda kwe kuleme kutusanga nga tetwetegese (Makko 13:33-37). Tusaba obulongoofu n’okubeera n’obulamu obulongoofu kubanga twagala okumufaanana (1 Yokaana 3:3).

Abo ababeerawo leero nga okudda kwa Yesu kulinga okutagenda kubeerawo tebajja kuba betegefu mu kudda kwe. Okudda kwa Yesu kujja kuba nga ekimyanso (Matayo 24:27; 1 Abakkolinso 15:52), kwa mangu ddala okuba nga tewali muntu yenna ajja okusobola okukyusa ekintu kyonna oluvannyuma nga Yesu alabise. 1 Abasessaloniika 5:1-6 kiraga nti abo abali mu kizikiza, abo ababeerawo mu nsi, bajja kusoberwa olw’okudda kwa Mukama waffe. Eri bo, okudda kwe kuliba nga okujja kw’omubbi. Eri abakkiriza, okudda kwe tekujja kubeera kwantiisa, naye kujja kuleeta essanyu lingi, nga eribeerawo nga okujja kw’omugole omusajja nga akima omugole we (Yokaana 14:2-3).

Tulindirira okudda kwa Kristo nga

1. Okukuuma bye tukulembeza ebitaggwawo

2. Okutambulira mu bulongoofu

3. Okuba nga twekuuma mu by’omwoyo okuyita mu kusaba

Tumanyi nti omubiri gulina omugaso ogw’olubeerera kubanga Baibuli eyigiriza okuzuukira kwa bantu bonna. Enjigiriza ey’okuzuukira yetaagisa. Kino tukimanyi kubanga omutume Pawulo yatwala 1 Abakkolinso15 nga awolereza enjigiriza eno. Yannyonnyola nti okugaana okuzuukira kuba kugaana njiri. Singa okuzuukira tekuliiyo, awo Yesu yandibadde teyazuukizibwa (1 Abakkolinso 15:13). Singa Yesu teyazuukira mu bafu, enjiri teyandibadde ntuufu, era tewali yandirokoleddwa (1 Abakkolinso 15:17).

Buli muntu ajja kuzuukizibwa, naye si bonna nti balizuukizibwa mu kiseera kye kimu. Mu kudda kwa Yesu, ajja kutwala Abakristaayo bonna, n’okuzuukiza abo bonna abaafa (1 Abasessaloniika 4:16-17; Okubikkulirwa 20:6). Abo abaafiira mu bibi byabwe tebakkirizibwa mu kuzuukira okusooka. Bazuukizibwa oluvannyuma eri omusango (Okubikkulirwa 20:13).

Abakristaayo bajja kuzuukizibwa mu mibiri egy’ekitiibwa nga Yesu (1 Yokaana 3:2). Ababi abatakyukanga bajja kuzuukizibwa mu ngeri endala okubonerezebwa emirembe gyonna (Yokaana 5:28-29).

► Bwoba nga tewakkiriza nti omubiri gujja kuzuukizibwa, ekyo kyandikoze njawulo ki gyoli?

[1]Okukkiriza nti oliunaku olumu tujja kuzuukira kukyusa engeri gye tweyisaamu. Tusobola okulaba okuyigiriza kuno bwe kukyusa ebyo ebiri mu nkola nga tutunuulira eby’okulabirako bya bantu abagaana okuyigiriza kuno. Abantu abamu mu kibiina kya Abakkolinso bagaana nti omubiri gw’omuntu tegujja kuzuukizibwa. Abo abakkiriza ensobi eno bayawulamu engeri za mirundi ebiri.

Abamu baagamaba nti, “Okuva omubiri we gutajja kuzuukira, Omwoyo gwokka kye kintu ekikulu. Ekyo kitegeeza nti ebibi ebikolebwa omubiri si byamaanyi. Tusoobola n’okwenda kubanga omubiri gugenda kusuulibwa.”

Abamu ku Bakkolinso bafaanana okubeera ne njogera, “Eby'okulya bya lubuto, n'olubuto lwa byakulya,” ekitegeeza nti omubiri si gwa kintu kyonna naye ogw’okwegomba obwegombi. Pawulo yabagamba nti abantu bajja kusalirwa omusango olw’okukozesa obubi omubiri (1 Abakkolinso 6:13). Yagamba nti omubiri gwa Mukama, era nti Katonda ajja kuzuukiza emibiri gyaffe ng abwe yazuukiza omubiri gwa Yesu (1 Abakkolinso 6:14).

Abalala baagamba, “Okuva omubiri lwe gutagenda kuzuukira, gulina okuba nga tegugasa era ogw’ekibi. Tuteekwa okunyigiriza okwegomba kw’omubiri kwonna, obutalya ku kintu kyonna ekisanyusa oba okunyumirwa obufumbo.”

Ensobi zino zombi zava mu kugaana okuzuukira. Okugaana okuzuukira kumalamu ekitiibwa omubiri. Naye enjigiriza y’Obukristaayo ey’okuzuukira ewa ekitiibwa omubiri.

► Soma 1 Abakkolinso 6:14, 15, 19-20.

Ennyiriri zino ziraga ntiemibiri gya Bakristaayogya muwendo kubanga

• Gyanunulibwa

• Yeekaalu z’Omwoyo Omutukuvu

• Bameba ba Kristo

• Gijja kuzuukizibwa n’okugulumizibwa

Enjigiriza y’okuzuukira yetaagisa kubanga etegeeza nti

• Yesu yazuukira okuva mu bafu.

• Abantu bonna balizuukizibwa.

• Omubiri gulina omugaso ogw’olubeerera.

• Enjiri yamazima.

Olunaku olw’okusala omusango yenkomerero eyamazima eri abo bonna amannya gaabwe nga tegalabikira mu kitabo eky’obulamu. Si yenkomerero y’okubeerawo kwabwe, naye yenkomerero y’omukisa gwe balina okwesalirawo. Mu butaggwawo obuddako, abantu bajja kusisinkana ebiva mu bye basalawo ebitakoma, ebitasobola kuzzibwa mabega.

Okusala omusango kuwa byetusalawo omugaso ogusinga ku bivaamu amangu ago. Abantu abamu balowooza kasita babeera nga basobola okufuga ebiva mu bye bakola, tewali kintu kirala kye balina kweraliikirirako. Baagala kukkiriza nti ekibi kyabwe si kibi bwe kiba tekikola kabi konna. Ebya ddala, ebibi byonna birina obuzibu. Naye wadde nga tekireese buzibu mu bulamu buno, ekibi kizibu olw’okusala omusango. Ekigambo kya Katonda kigamba nti abantu ba Katonda bajja kusalirwa omusango ogw’ebikolwa byabwe. (Soma 2 Abakkolinso 5:10; Abaruumi 2:6-11.)

Mu kusala omusango, abamu bajja kusindikibwa mu kibonerezo ekitaggwawo ate abalala eri empeera ey’olubeerera. Ebyawanndiikibwa binnyonnyola ku kusala omusango ogwa bonoonyi abataakyuka abazuukizibwa okusingisibwa omusango olw’ebikolwa bye bibi byabwe. (Laba Okubikkulirwa 20:11-15.) Waliwo okusala omusango okulalaokwa Bakristaayo, gye bajja okuweebwa empeera ey’ebikolwa ebyo ebirina ebivaamu ebisaanidde, eby’olubeerera. (Soma 1 Abakkolinso 3:14-15.)

Okusala omusango kitegeeza nti olunaku lumu ekibi kiriba kikomye okubeerawo. Kizibu okuteebereza ensi etaliimu kibi, naye olunaku lumu obujeemu bwonna bujja kukomezebwa.

Katonda tagenderera kutubeeza mu kutya okw’olubeerera, oba nti okutya kubeere ekituleetera okutambulira mu kituufu. Wabula, okutegeera nti eriyo omusango mu maaso kituwa okufaayo ku kuwa embalirira eruŋŋamya obulamu bwaffe.

Tuteekwa okumanya ebikwata ku kusala omusango okutegeera

1. Obukulu bwe kibi

2. Okuvunaanyizibwa kwaffe eri Katonda

3. Omugaso gw’okusalawo kwaffe

4. Enkomerero y’ebibi byonna

Okusinziira ku bufilosoofi namadiini, ebiseera byonna okwetoloola, awatali ntandikwa wadde enkomwero, era tewali bibeerawo ebikyusa ebintu emirembe gyonna. Naye okusinziira ku Baibuli, ebiseera birina entandikwa ne bintu ebizze bibaawo ne bituuka ku nkomerero. Baibuli ennyonnyola obutonzi, era nakabenje k’okugwa kw’omuntu, ate enteekateeka y’obulokozi Katonda gyakoleddemu okuyita mu byasa ebyebyafaayo by’omuntu.

Mu Olubereberye 3 tusanga entandikwa yekibi. Mu Okubikkulirwa ekibi tkiri mu kibuga kya Katonda eky’olubeerera (Okubikkulirwa 21:27). Mu Olubereberye tulaba okufiirwa omuti ogw’obulamu n’okusalirwa okufa (Olubereberye 3:22-24). Mu Okubikkulirwa tulaba okuzzaawo okw’omuti ogw’obulamu, amannya mu kitabo eky’obulamu, n’okuyitibwa ku mugga ogwa mazzi ag’obulamu (Okubikkulirwa 22:1-2, 19).

Okujja kw’obwa kabaka obujjuvu obutaggwawo obwa Katonda kujja kutuukiriza entegeka ya Katonda. Katonda ekiseera kyonna yabadde Kabaka w’ensi ze zonna, naye okuva omuntu lwe yagwa, abantu abasinga babadde mu bujeemu eri obwakabaka bwa Katonda. Obujeemu bujja kukoma mangu ddala, era Katonda ajja kufuga ekiseera kyonna awatali amulwanyisa. Ensi ejja kuba nga etuukiridde nga Katonda bwagyagala, nga era eggulu bwe liri.

Waliwo empisa yabantu okubeera mu bula bw’ensi nga bulinga obubeerawo emirembe gyonna. Tugezaako okutereeza embeera zaffe, okumalawo ebizibu byaffe, n’okuteekawo embeera etuleetera okuba abamativu. Twetaaga okubeera nga Ibulayimu eyali asuubira amaka agataggwawo nga akyasula mu weema ate nga asengukasenguka (Abaebbulaniya 11:8-10, 14-16). Twetaaga okujjukira nti ebintu bye tuzimba, ebintu bye tulina, ne mbeeera ze tuteekawo byonna bya kiseera. Tuteekwa okukolerera ebintu ebirina omuwendo ogutaggwawo.

► Musomere wamu Ekiwandiiko ky’ebikkiririzibwamu wakiri emirundi ebiri.

Yesu ajja kudda nga bewe yasuubiza, ngazuukiza abakkiriza abedda, n’okutwala abakkiriza bonna okufugamu bwakabaka bwe. Buli muntu ajja kuzuukizibwa mu bafu okusalirwa omusango ogw’ebikolwa bye. Ajja kuweebwa empeera etaggwawo oba okuweebwa ekibonerezo eky’olubeerera. Obwakabaka bwa Katonda bujja kujja mu bujjuvu, era Katonda ajja kufuga emirembe gyonna.

(1) Ebyawandiikibwa Ebiweereddwa Okusoma: Buli muyizi ajja kuweebwa ekimu ku byawandiikibwa bino wammanga. Nga okuyiga okuddako tekunnabaawo, oteekwa okusoma ebyawandiikibwa era owaandiike ku kyebyogera ku ky’okuyiga ku ssomo lino.

• Danyeri 2:31-45

• Matayo 25:31-46

• 1 Abakkolinso 15:51-58

• 2 Peetero 3:1-14

• Okubikkulirwa 20:11-15

(2) Ekigezo: Ojja kutandika okusoma okuddako n’okugezesebwa kussomo 14. Yiga n’obwegendereza ebibuuzo eby’ekigezo nga weteekateeka.

(3) Ebiweereddwa Okuyigiriza: Jjukira okutegeka n’okuwa lipoota ku byoyigiriza wabweru w’ekibiina.

(1) Mazima ki egemirundi ena agali mu bunnabbi bwa Baibuli egetaagisa ku by’oluvannyuma?

(2) Kiki ekigenda okutuuka ku Bakristaayo Yesu bwalikomawo?

(3) Tulina kulindirira tutya okujja kwa Yesu?

(4) Lwaki enjigiriza y’okuzuukira yetaagisa?

(5) Tuteekwa okumanya ku kusala omusango tutegeere bintu ki ebina?