(1) Omuyizi ajja kuba asobola okunnyonnyola:

• Kye kitegeeza Yesu okubeera Mesiya.

• Ekiwandiiko eky’okukkiriza mu bigambo “Mukama waffe Yesu Kristo.”

• Obukakafu n’omugaso ogw’obw’omuntu bwa Yesu.

• Obukakafu n’omugaso ogw’obwa Katonda bwa Yesu.

• Okufakwa Kristo okuba nga kumala okusonyiwa ebibi.

• Omugaso gw’okuzuukira eri okukkiriza kw’Omukristaayo.

• Ekiwandiiko ky’ebikkiririzibwamu mu Bukristaayo ku Kristo.

(2) Omuyizi ajja kuyiga abantu mu ddiini endala kye bagamba ku Kristo.

► Musomerewamu Okubikkulirwa 5:11-14. Ebyawandiikibwa bino bitugamba ki ku Yesu?

Baibuli eyogera nti mu nnaku ez’oluvannyuma, ba Kristo ab’obulimba ne bannabbi ab’obulimba Bajja kulimba bangi. Abantu bangi bateeka okukkiriza kwabwe obaba Kristo abatebeerezebwa okubaayo abatasobola kubalokola. Osobola okusanga babiri kuba Kristo bano ab’obulimba, abakwanjulirwa aba Momoni ne aba Yakuwa.

Yesu waba Momoni

Owa Momoni bwakonkona ku luggi lwo, ajja ku kuleetera Yesu muganda wa Lusifa aw’omyoyo. Aba Momoni bayigiriza nti Yesu ono ye omu ku buwumbi bwa baana ab’omwoyo “Kitaffe Ow’omuggulu” ne “Nnyaffe Ow’omuggulu” eyaleetebwa mu nsi muno. Okusinziira kuba Momoni, Yesu bwe yali ku nsi, Yalina abakazi abawerako, nga omu kubo yali Maliyamu Mangadalena. Oluvannyuma lw’okufa kwe n’okuzuukira, yagenda mu Amerika okubuulira abantu abaali mu Amerika.

Yesu owa ba Yakuwa

Aba Yakuwa bajja ku kugamba nti ye Mikayiri Malayika omukulu, eyasooka okutondebwa, eyafuuka omuntu nafiira kumpagi mu kifo ky’omusalaba. Yakuzibwa nga ekitonde eky’omwoyo, Nafuuka Mikayiri Malayika omukulu nate, omubiri gwe negubulira mu mikka.

Nkakasa asobola okutegeera nti abayigiriza enjigiriza ey’obulimba balina Yesu ow’enjawulo kuwa Baibuli, naye asobola okunnyonnyola Yesu owa Baibuli owamazima? Obukadde n’obukadde bwa bantu balina endowooza ku Kristo ow’obulimba, oyo atasobola ku balokola.

Kikulu nnyo eri ggwe okwekakasa by’okkiriza ku Yesu okubeera nga tolimbibwa, obeerenga osobola okumwanjula eri abalala.

Omukulembeze w’ekibiina wetegereze: Okufuna ebisingawo ku biki eddiini endala kye ziyigiriza ku Yesu, laba ekitundu kunkomerero yessomo eririko omutwe ogugamba nti “Eddiini Endala Kyezigamba.”

Yesu Masiya

► Biki ebimu ku ebyo Baibuli byeranga ku Masiya?

Enjiri ennya zogera ku Yesu nga Masiya eyali asuubirwa Isiraeri. Ebintu ebiwerako byalangibwa ku Masiya. Yali wa kubeera muzzukulu wa Kabaka Dawudi abeere nga asaanira okubeera Kabaka. Yali wakulokola bantu be okuva mu kunyigirizibwa n’obusibe. Yali wakufukibwako amafuta mu ngeri ey’enjawulo ne Katonda okumaliriza omulimu gwe. Ekigambo Masiya kitegeeza “gwe wafukako amafuta” ekyali erinnya eriyitibwa bakabaka mu Isiraeri.

Ebimu ku bintu ebisinga obukulu ebikwata ku Masiya mu Ndagaano Enkadde tebyannyonnyoka bulungi okutuusa Endagaano Empya bwe yawandiikibwa. Ekikulu kye yakulembeza kwali kulokola bantu be okuva mu bibi. (Soma Matayo 1:21; Lukka 1:74-75.) Obwakabaka bwe tebwali bwa ku nsi, naye bwa mwoyo ate nga bwa muggulu (Soma Yokaana 18:36), wadde nga oluvannyuma obwakabaka bwe bujja kubuutikira ensi yonna (Abafiripi 2:10-11; Okubikkulirwa 19:11-16; Nkakasa Okubikkulirwa 20:6).

Ekigambo Masiya kya Lw’Ebbulaniya. Ekyenkanankana ne ky’Oluyonaani christos mwetufuna ekigambo Kristo. Okukozesa ebigambo “Yesu Kristo” oba oyogedde nti Yesu ye Masiya.

[1]Yesu ye Mukama

Ekkanisa eyasooka yakozesa ekigambo Mukama okugamba nti Yesu yaalina obuyinza obusingira ddala omuntu bwalina okugondera. Bwe baagamba nti “Yesu ye Mukama,” baali bagamba nti ye Mukama wa bonna, Omutonzi era Katonda w’ensi. Ekiwandiiko kino eky’okukkiriza kye kyawula Abakristaayo, kubanga Abakristaayo bokka be bakkiriza nti Yesu omuntu eyatambula kunsi era yali Katonda wa byonna.

Ebigambo “Mukama Yesu Kristo” bikola ekiwandiiko ekyamaanyi. Bagamba nti Yesu ye Masiya era nti Katonda. Ebigambo byonna bino ebisatu biri mu Abafiripi 2:10-11. Ennyiriri ezo zitugamba nti ekiseera kirituuka buli muntu yenna mu nsi lwalyatula nti Yesu Kristo ye Mukama.

Ennaku Ssatu Ez’enjawulo

Bye tukkiriza ebikulu ku Yesu bisobola okwawulwamu emiteeko esatu, nga gikwatagana ne nnaku ssatu ez’enjawulo.

Ssekukkulu kujaguza okuuzaalibwa kwa Yesu maama embeerera, Olw’okuba nti yabeera olubuto lwa Yesu kubw’Omwoyo Omutukuvu. (Soma Lukka 1:34-35.) Wadde Yesu yali muntu olw’okuzaalibwa omukazi, era yali Katonda, Omutonzi w’ensi gyeyayingiramu. Kino kyewuunyisa naye kituufu: Yesu ngaakyali muto, nnyina Maliyamu yalera oyo eyamutonda.

Ekigambo abaana ba Katonda kikozesebwa kubakkiriza ne kubamalayika (Yokaana 1:12, Yobu 1:6), naye Yesu mwana wa Katonda mu ngeri etali yabulijjo (Yokaana 3:16). Ye yekka agabanira ddala mu bujjuvu ekikula kya Kitaawe. Ye kye kifaananyi kya Kitaawe ekijjuvu era Katonda nga Kitaawe bwali (Soma Abaebbulaniya 1:2-3.)

Ekikula kya Katonda n’obutonde bw’omuntu byajja okubeera awamu mu muntu Yesu. Kino kiyitibwa okufuuka omuntu, ekitegeeza Katonda okutwala omubiri gw’omuntu, n’afuuka omuntu. Yesu ye yekka eyali ow’okubeera Omulokozi waffe kubanga ye muntu yekka mu nsi ali byombi muntu ate Katonda.

Yesu Muntu

Si kizibu okutegeera Yesu ow’Endagaano Empya nga omuntu ddala. Yabeera mu lubuto lwamaama, n’akula, yayiga, n’akula nga omuntu. (Soma Lukka 2:52.) Yakoowanga, okwebaka, okukemebwa, n’okola kumpi buli kintu abantu kye basobola okukola, okujjako ekibi (Abaebbulaniya 4:14-15). Yafa n’okufa. Yafaananira ddala omuntu nga afuuka omu kuffe. (Soma Yokaana 1:14.)

► Lwaki kyamugaso nnyo Yesu okubeera omuntu?

Kubanga Yesu muntu:

1. Yali asobola okubonaabona n’okufa nga ssaddaaka (Abaefeso 5:2, Abaebbulaniya 7:26-27). Singa yali Katonda nga si muntu, teyandisobodde kubonaabona n’akufa.

2. Obutuukirivu bwe busobola okutufuula abatuukirivu n’okutuwa obulamu. Adamu eyasooka yakiikirira abantu bonna bwe yakola ekibi nayawukana ku Katonda. Kino kyaleeta okufa ku bantu bonna. Yesu yabeera mu bulamu obutaliimu kibi natuukiriza byonna Katonda bye yali yagala. Agaba obulamu obutaggwawo eri abo abamufaanana. Ayitibwa Adamu ow’oluvannyuma mu byawandiikibwa (1 Abakkolinso 15:22, 45-49; Abaruumi 5:17-19).

3. Asobola okubeera kabona waffe atukiikirira eri Katonda. Nga omutabaganya waffe, tatwogerera bwogerezi, atukiikiririra ddala. Kyali kimwetaagisa ye okubeeera omuntu okututabaganya ne Katonda. (Soma Abaebbulaniya 2:17.) Omulimu gwe nga kabona gutuwa obulokozi obutaggwawo (Abaebbulaniya 5:9, Abaebbulaniya 10:5-7). Obw’omuntu bwa Yesu kitundu kikulu nnyo eky’enjiri. (Soma 1 Yokaana 5:1.)

Omukulembeze w’ekibiina wetegereze: Bwoyagala obukakafu obulala obwa Baibuli obulaga nti Yesu yali muntu, laba “obukakafu obw’ebyawandiikibwa ebikakasa Yesu okuba omuntu” mu kitundu ku nkomerero y’essomo lino.

Yesu ye Katonda

Yesu yegamba okubeera Katonda.

[1]Yesu wa Baibuli muntu naye si muntu kyokka. Era ye Katonda w’ensi ataliiko kkomo (takugirwa) Kino Yesu yakyeyogerako kennyini. Yagamba nti, “Nze ne Kitange tuli omu” (Yokaana 10:30). Bwe yayogera kino, Abayudaaaya ne baagala okumu ku baamayinja kubanga bategeera nti agambye nti yenkanankana ne Katonda. Yesu yabawakanya nti “Nedda, temwantegedde bulungi. Nze siri Katonda ddala!”? Nedda, Yesu yakkiriza engeri gye bavvuunulamu ebigambo bye. Yayigiriza nti yali yenkanankana ne Katonda Kitaawe.

Bwe yagamba nti, “Ibulayimu nga tannaba kuzaalibwa, nze nga wendi,” (Yokaana 8:58) yali agamba nti ye NDI owa Okuva 3:14, Katonda ow’ensi eyebezaawo yekka. Abayudaaya bagezaako okumukuba amayinja olw’okwogera na kino (Yokaana 8:59).

Yesu yakola ebikolwa eby’obwa Katonda nga ali ku nsi

Yesu yakola ebikolwa eby’obwa Katonda nga ali ku nsi. Yagaba obulamu obutaggwawo. (Soma Yokaana 10:28.) Yasonyiwa ebibi (Makko 2:10). Bino bye bintu ebikolebwa Katonda yekka.

Yesu bwe yasonyiwa ebibi by’omuntu eyali akonzibye, yamuwonya okukakasa nti alina obuyinza kunsi okusonyiwa ebibi (Makko 2:5, 10-12). Ekikolwa ekimu kyali kikakasa ekirala, ne kitegeerekeka bulungi nti Yesu teyakola kyamagero eky’okuwonya nga nnabbi eyafukibwako Katonda amafuta kyokka. Yesu Yalina obuyinza obw’obwa Katonda namaanyi okusonyiwa n’okuwonya.

Yesu era yazuukiza Lazaalo, “Nze kuzuukira, n'obulamu” (Yokaana 11:25). Kino kyali kikolwa ekirala eky’obwa Katonda ekyagobererwa kyeyagamba nti Katonda. Katonda yekka ye yasobola okugamba nti ye kuzuukira mu butuufu kubanga amaanyi ga Katonda gokka gegasobola okuzuukiza omuntu yenna mu kufa. Yesu yagamba nti yagaba obulamu era nawa Lazaalo obulamu, ekiraga nti yali ekyo kye yagamba nti kyali. Mu kino ekyabaawo, Yesu yeeraga nga bwali ow’enjawulo ku bannabbi n’Abatume abaazuukiza abantu mu bafu kulwamaanyi ga Katonda.Tewali noomu kubano yagamba nti alina amaanyi kububwe okukola ebyamagero. Baali bubeezi bikozesebwa bya Katonda. Mu Yokaana 5:21, Yesu yagamba nti azuukiza abafu nga Kitaawe bwazuukiza abafu.

Yesu bwe yakola ebyamagero bye, yalaga ekitiibwa kye, (Yokaana 2:11) ekitiibwa nga eky’Omwana omu yekka okuva eri Kitaawe, ajjudde ekisa n’amazima (Yokaana 1:14). Ebyamagero bino byaliKatonda bye yakozesa okulaga amaanyi g’Omwana ag’ekitiibwa, okukakasa nti yali Katonda.

Yesu Mutonzi Era Abeezaawo ebitonde

Okusinziira ku batume Yokaana ne Pawulo, Yesu yatonda buli kintu era byonna yabiwanirira awamu, era buli kintu kibeerawo ku lulwe. (Soma Yokaana 1:3; Abakkolosaayi 1:17.) Mazima kino tekyandisobose kwogerwa ku muntu mulala yenna.

► Lwaki kya mugaso gye tuli okumanya nti Yesu Katonda?

Olw’okuba nti Yesu Katonda,

1. Okufa kwe okw’okwewaayo nga ssaddaaka kwa muwendo ogutakoma — kumala olw’okusonyiwa ebibi by’ensi yonna (1 Yokaana 2:2).

2. Alina obuyinza okutulokola; ekkubo, amazima, n’obulamu (Yokaana 14:6).

3. Tuteekwa okumusinza nga bwe tusinza Kitaffe (Soma Yokaana 5:23).

Bwe tulemwa okulaba Yesu nga Katonda, tetujja kumuwa Kitiibwa nga Katonda. Tetusobola kulokolebwa bwe tutassaamu kitiibwa Kitaffe n’Omwna nga Katonda.

Obukristaayo tebwesigamye ku njigiriza ne bikolwa byokka ebya Yesu, naye ku muntu Yesu ow’enjawulo. Si musomesa busomesa ow’obubaka obw’obulokozi. Ye ye mulokozi yennyini, era ye yekka — Katonda-omuntu — ye yandibadde Omulokozi.

Omukulembeze w’ekibiina w’etegereze: Obukakafu obulala obwa Baibuli obulaga nti Yesu Katonda laba ekitundu ekisembayo eky’essomo lino, “Obukakafu bwe byawandiikibwa obulaga nti Yesu Katonda”.

Yesu Muntu Omu

Wadde nga Yesu alina ekikula kya Katonda kyonna ne kikula ky’omuntu kyonna, si bantu babiri abagatiddwa mu muntu omu. Ekikula eky’emirundi ebiri kikola omuntu omu mu ye, nga bikolagana bulungi. Yesu ye Katonda-omuntu, era buli kyakola kirina okutegeerwa mu musana gw’okubeera omuntu mu bujjuvu n’okubeera Katonda mu bujjuvu. Ekkanisa ezze eyigirirza bulijjo ekikula ekyemirundi ebiri ekiri mu Yesu tekisobola kwawukanyizibwa, kyokka tebitabuddwa mu ngeri nti buli kikula okubuza ebisaanyizo byakyo. [2]

Kisobola okuyambako okugeraageranya ekikula kya Yesu ku kikula ky’ebyawandiikibwa, Baibuli ya Katonda mu bujjuvu ate era ya buntu mu bujjuvu. Okubeera ekitabo ky’obuntu, kirina ebisaanyizo bye kitabo ekiralala kyonna ekyabantu, okujjako nti kyo tekiriimu nsobi yonna. Okubeera ekya Katonda, kiraga ebisaanyizo ekitabo ekirala kyonna bye kitalina. Mu ngeri yeemu, Yesu alaga ebisaanyizo ebyemirundi ebiri nga omuntu era nga Katonda. Okuba nti Baibuli eraga ebisaanyizo eby’obwa Katonda tekigifuula kuba nti sikitabo kya buntu. Mu ngeri yeemu, okuba nti Yesu akolea mu bwa Katonda bwe tekimufuula kuba nti si muntu. Era okuba nti Yesu akolera mu bw’omuntu bwe tekimufuula butaba Katonda.

Ensobi Ezitera okulabikira mu Njigiriza

Ensobi ezinga okulabikira mu njigiriza abantu ze bakola nga boogera ku Kristo ze zino:

• Okugaana nti Yesu Katonda

• Okugaana nti Yesu muntu

• Okugaya obwa Katonda oba obw’omuntu okulabika nga ebitali bikulu

• Okugaana obumu obw’omuntu bwa Katonda

Buli kimu ku nsobi zino kiba kugaana nti yafuuka omuntu. Okufuuka omuntu kyali kyetaagisa olw’obulokozi bwaffe, kale singa omuntu agaana okufuuka omuntu okwa Yesu ajja kukkiriza enjiri enkyamu ne kkubo ekyamu ery’obulokozi.

Omukulembeze w’ekibiina wetegereze: memba w’ekibiina kino asobola okunnyonnyola ekitundu kino.

Aba Yakuwa bagamba nti Yesu yali muntu. Bakkiriza nti ye muntu eyali owamaanyi ennyo eyali abaddewo, naye era nga muntu. Eyo yensonga lwaki tebakkiriza nti okufa kwe ssaddaaka emala olw’obulokozi bwaffe. Balina enjiri ey’okulokoka olw’ebikolwa. Bagamba okubeera Abakristaayo, naye nga eno ddiini ndala.

Aba Mamoni bakkiriza nti Yesu okusooka yali mwoyo ogwatondebwa Katonda, nga muganda wa Lusifa. Yasindikibwa okuzaalibwa ku nsi nga omuntu Yesu. Aba Mamoni tebakkiriza nti Yesu Katonda.

Abasiraamu bakkiriza nti Yesu yali nnabbi eyasindikibwa Katonda.Tebakkiriza nti Katonda oba nti ali mu Busatu. Tebakkiriza nti yakomererwa ku musalaba oba nti yazuukira mu bafu.

Aba Hindu n’aba Budda bakkiriza nti Yesu yali muntu mutukuvu eyakolanga ebyamagero. Si mukulu mu ddiini zaaabwe. Tebakkiririza mu Katonda Omutonzi era Mukama, kale tebakkiriza nti Yesu ye Katonda mu mubiri.

Olw’okutaano olutukuvu lwe lunaku Yesu lwe lyakomererwa ku musalaba. Ku lunaku luno olw’entiisa ate olwekitalo, Yesu yatwala ebibi byaffe ku musalaba. Yafa nga ssaddaakka ey’ebibi byaffe tusobole okusonyiyibwa.

Ssaddaaka yali yetaagisa

Ssaddaaka yalina okuweebwayo Katonda okusobola okutusonyiwa nasigala nga mwenkanya era Omutukuvu. Ennono eno yayigirizibwa mu Ndagaano Enkadde ne biweebwayo Katonda bye yayagalanga (Abaebbulaniya 9:22). Singa Katonda yasonyiwa busonyiyi bibi awatali kwa sinziira kyali kijja kulaga nti si mwenkanya era nti ekibi si kintu. Naye tewali muntu yenna ayandirabye kukomererwa kwa Yesu ku musalaba nagamba nti ekibi si kibi. Ssaddaaka ye yasobozesa okusonyiyibwa kwaffe.

Yesu Yekka ye Yali Asobola okubeera Ssaddaaka yaffe Emala

► Lwaki Yesu ye yekka eyali asobola okubeera ssaddaaka ey’ebibi?

Obwenkanya bwa Katonda n’obubi bwe kibi byali byetaaga ssaddaaka eyamaanyi esinga ku kintu kyonna ekitonde. (Soma Abaebbulaniya 10:4.) Twayonoona Katonda ataggwawo, ekituleetako omusango ogutakoma. Eyo ye nsonga lwaki Yesu ye yali asobola okubeera ssaddaaka. Yali asaanidde kubanga Katonda era kubanga muntu. Olw’okuba nga Katonda, yali taliiko kyakunenyezebwa, era ssaddaaka ye ye erina omuwendo ogutakoma. Olw’okuba muntu, yali asobola okufa mu kifo kyaffe.

Omusaayi gwa Yesu guliwo mu kifo ky’okufa kwe nga Ssaddaaka

Katonda yayigiriza abantu ku kutangirira nga ateekawo ssaddaaka. Bakabona battanga ebisolo mu kifo ky’okufa kwabwe. Ekitabo ky’Abaebbulaniya kigamba nti era awatali kuyiwa musaayi tewabaawo kusonyiyibwa (Abaebbulaniya 9:18-22).

Katonda yalagira abantu okutwala omusaayi mu ngeri ey’enjawulo kubanga guli mu kifo ky’obulamu bwe bitonde (Eby’Abaleevi 17:11, 14). Okuyiwa omusaayi kyali kitegeeza kutta (Olubereberye 9:5-6). Omusaayi okukozesebwa mu Yeekaalu gwategeeza nti ekisolo kitiddwa.

Okufa kwa Kristo kwali ssaddaaka esembayo eyasobozesa okubeerawo kw’obulokozi eri buli muntu ekiseera kyonna. (Soma Abaebbulaniya 10:4, 12.) Yayanjulayo omusaayi gwe mu ggulu nga guli mu kifo kya ssaaddaaka ey’okufa kwe. (Soma Abaebbulaniya 9:12, 24.) Omusaayi gwa Yesu, guli mu kifo ky’okufa kwe, gutuwa obulokozi kubanga yafa nga ssaddaaka ffe okusobola okulokolebwa.

Lwaki Yesu yafa ku musalaba mu kifo ky’engeri endala yonna? Mu biseera by’Endagaano Enkadde, omuntu okuwanikibwa ku mutikaali kabonero ka kikolimo kya Katonda (Ekyamateeka Olwokubiri 21:23). Omutume Pawulo atugamba nti Yesu yatwala ekikolimo kya Katonda ku ye nga akomererwa ku muti (Abaggalatiya 3:13).

Yesu yaleeta wamu Katonda n’omuntu

Yesu yajja okutabaganya ebiwayi bibiri ebyayawukana — Katonda n’omuntu. Nga omutabaganya, Yesu Yalina okukiikirira ebiwayi byombi mu kiseera kye kimu. Nga Katonda, yaliwo mu kifo kya Katonda ku lw’omuntu. Nga omuntu, yaliwo mu kifo ky’omuntu ku lwa Katonda. Nga akiikirira ebiwayi byombi mu bujjuvu, Yesu yaleeta n’omuntu ne Katonda wamu. Yakola buli ludda kye lwandikoze okuleetawo okutabagana.

Waliwo engeri nnyingi ez’obuwangwa nnyingi ez’okujaguzaamu Paasika, naye abantu bangi tebategeera makulu ga bintu bye bakola, era bayinza n’obutamanya kiki ekikulu ku kuzuukira kwa Yesu. Yesu yazuukira mu ntana ku Paasika ku makya, olunaku olw’okusatu okuva lwe yakomererwa ku musalaba. Yalaga nti Yalina obuyinza ku kibi, okufa, ne Setaani. Teyatwala kufa kwaffe kwokka, naye era yakuwangula n’obulamu. Olw’okuba nti yali muwanguzi, naffe tusobola okubeera!

Yesu Yazuukira mu Mubiri

Yesu olumu yagamba Abayudaaya nti, “Mumenye Yeekaalu eno, nange ndigizimbira ennaku ssatu.” Wadde nga Abayudaaya baalowooza nti yali ategeeza yeekaalu Kerode gye yazimba, Enjiri ya Yokaana ennyonnyola nti Yesu yali ategeeza mubiri gwe (Yokaana 2:19-21). Enjiri zonna ziwandiika ku kuba nti entana yali njereere oluvannyuma lwennaku ssatu nga aziikiddwa mu yo. Yesu yalabikira abayigirizwa be oluvannyuma lw’okuzuukira, nagamba, “Munkwateko mulabe; kubanga omuzimu tegulina nnyama namagumba, nga bwe mulaba nze bwendi nabyo” (Lukka 24:39). Yali akakasa nti yazuukira mu mu bafu mu mubiri.

► Njawulo ki eyandibaddewo singa Yesu teyazuukira mu bafu?

1. Okuzuukira kwa Yesu okw’omubiri kwali kulaga obuwanguzi obujjuvu ku kibi n’okufa. (Soma Abakkolosaayi 2:12-15; Okubikkulirwa 1:17-18.)

2. Okuzuukira kwa Yesu okw’omubiri kwalaga nti yalli ekyo kye yagamba nti kyali (Matayo 17:22-23, Yokaana 2:16-22). Bwe kityo, era kyakakasa enjiri. Abantu abagaana nti Yesu yazuukira mu bafu era tebakkiriza njiri (Soma 1 Abakkolinso 15:17.)

3. Okuzuukira kwa Yesu mu mubiri kutukakasa nti naffe tulizuukizibwa mu bafu. Yesu yasuubiza nti ajja kuzuukiza abafu. Ekisuubizo ekyo kyandibadde tekikkirizikika okujjako ye kennyini ngamaze okuzuukira (Yokaana 5:28-29). Tujja kuzuukizibwa tubeere ne mibiri nga ogwa Yesu ogw’ekitiibwa. (Soma 1 Yokaana 3:2.)

Yesu Akyali Muntu

Okuzuukira kutulaga nti okufuuka omuntu kwa lubeerera. Yesu bulijjo ajja kubeera muntu ate era Katonda. Yesu, akyali Katonda-omuntu, kati atwegayiririra eri Kitaffe (Abaruumi 8:34), era olunaku lumu ajja kudda okututwala mu ggulu (1 Abasessaloniika 4:16-17).

Nga abakkiriza, tubeera mu nkolagana bulijjo ne Kristo. Si muntu eyaliwo mu byafaayo, era si Katonda ali mu ggulu kyokka, naye ali naffe. Yasuubiza okubeera n’Abayigirizwa be bulijjo (Matayo 28:20).

Waali mu ngeri ey’enjawulo mu kkanisa. Ye gwe mutwe gw’ekkanisa, era kkanisa eyitibwa mu biri gwe (Abaefeso 1:22-23). Aluŋŋamya ekkanisa, agikuumira wamu, era nagigabirira. (Soma Abakkolosaayi 2:19.)

Omuntu akkiriza amazima agakwata ku Yesu alina okuddamu n’okukkiriza n’okugonda. Osobola okuyamba abalala okufuuka abakkiriza n’okusaba nga kuno wammanga.

Kitaffe, nkwebaza olw’okunjagala ekimala n’osindika Omwana wo mu nsi ku lwange. Nzikiriza nti Yesu ye Katonda-omuntu atalina kibi kyonna eyafa nazuukira nate nze okuba nga nsonyiyibwa ebibi byange n’okuzzibwa obuggya mu nkolagana naawe. Nneetondera ddala olw’ebibi byonna bye nnakola. Mmanyi nti ebibi byange bye byakomereza Yesu ku musalaba. Kati, ndekayo buli kintu kyonna kyemmanyi nti kikyamu, era nzikiriza Yesu nga Mukama era Omulokozi. Nkulembera okuva kati okweyongerayo. Ŋŋenda kubeera wuwo emirembe gyonna! Webale olw’okunsonyiwa Nkwagala. Amiina.

► Musomere wamu Ekiwandiiko ky’ebikkiririzibwamu wakiri emirundi ebiri.

Yesu ye Masiya era Mukama wa bonna, Omwana wa Katonda eyazaalibwa embeerera, alina ekikula ky’omuntu kyonna ne kikukla kya Katonda kyonna mu muntu omu. Yabeerawo mu bulamu obutaliimu kibi era nafa nga ssaddaaka ebibi byaffe bisobole okusonyiyibwa. Yazuukira mu bafu era ajja kuzuukiza abakkiriza bonna bwalikomawo. Obwakabaka bwe bubuna wonna era tebukoma.

Omukulembeze w’ekibiina wetegereze: Ekitundu kino ne kiddako byombi si byabuwaze. Ekibiina kisobola okubisoma bwe kiba kyagala obukakakfu obusingawo ku nsonga zino.

Yesu yali muzukkulu wa Kaawa (Olubereberye 3:15), ensigo ya Ibulayimu (Olubereberye 22:18 – geraageranya ne Ebikolwa by’Abatume 3:25), eyazaalibwa okuva mu mukazi (Abaggalatiya 4:4), eyazaalibwa Maliyamu (Matayo 1:21-25), nayitibwa omwana w’omuntu (Matayo 13:37), nayita mu kukula okwabulijjo (Lukka 2:40, 52).

Bwe yakomawo okukyala mu kibuga kye waabwe, enneeyisa yabantu gyali yalaga nti okubeera kwe omwana kwali kwa bulijjo (Matayo 13:54-56).

Yalina omubiri okusobola okugonda nga omuntu bwe yandibadde (Abaebbulaniya 10:5-9); yafuuka omubiri n’omusaayi (Abaebbulaniya 2:14); yakolebwa nga ffe asobole okubonaabona nga ffe (Abaebbulaniya 2:10-18); yatuukirira okuyita mu kubonaabona (Abaebbulaniya 2:9-10); era naye yakemebwa (Abaebbulaniya 4:15).

Yafuuka omuntu (Abafiripi 2:6-8).

Yali Kigambo kya Katonda ekitaggwawo nafuuka omuntu nabeera ku nsi (Yokaana 1:14).

Yesu okubeera omuntu kiwandiiko kikulu nnyo eky’okukkiriza mu Bukristaayo (Yokaana 1:14; 1 Yokaana 4:2-3).

Waliwo engeri ssatu Yesu mwakakasibwa okubeera Katonda:

1. Ayitibwa Katonda.

2. Alagibwa okubeera nembala za Katonda.

3. Alabikira mu mirimu egikolebwa Katonda.

Yesu Ayitibwa Katonda

• Yokaana 1:1, 14, agamaba nti Ekigambo ekitaggwawo kyali Katonda.

• Yokaana 12:41 atugamaba nti Isaaya yalaba Yesu.

• Ebikolwa by’Abatume 20:28 watugamba nti ekkanisa ya Katonda yagulibwa na musaayi gwe.

• Abaruumi 9:5 yagamba nti Kristo yajja, eyali Katonda ow’omukisa emirembe gyonna.

• Tito 2:13 amwogerako nga Katonda omukulu era Omulokozi waffe Yesu Kristo.

• Matayo 1:23 (ajuliza Isaaya 7:14) agamba nti erinnya lye litegeeza “Katonda alinaffe.”

• Isaaya 9:6 agamba nti erinnya ajja kuyitibwa Katonda ow'amaanyi.

• 1 Timoseewo 3:16 agamba nti katonda yalabikira mu mubiri, nabuulirwa mu mawanga, nayanirizibwa mu kitiibwa.

• Mu Yokaana 10:30, 33, Yesu yagagamba nti yali omu ne Kitaawe.

• Mu Yokaana 5:17-18, Abayudaaya baakimanya nti yagamba nti yali yenkanankana ne Katonda.

• Mu Yokaana 14:9 yagamba nti, “Alabye ku nze, ng'alabye ku Kitange.”

• Mu Yokaana 20:28-29, Tomasi yalaba ebiwundu bye n’agamba nti, “Ggwe Mukama wange, era Katonda wange,” Yesu naawa omukisa abo abakkiriza.

• Mu Yokaana 8:58, yeyita NDI, Abayudaaya baamanya nti yali agamba nti Katonda.

• Mu Okubikkulirwa 1:17, Okubikkulirwa 2:8, ne Okubikkulirwa 22:13, yeyogerako nga Asooka era Owenkomerero, ne Isaaya 44:6 alaga nti ekigambo kino kitegeeza Katonda.

• Abaebbulaniya 1:2-3 atugamba nti kye kifaananyi kya Kitaawe ekituukiridde.

• Mu Abaebbulaniya 1:8, ayogerwako nga Katonda.

Yesu Alina Embala ya Katonda

Ali Buli Wantu Wonna. Mu Matayo 18:20, Yesu yagamba nti yali buli abakkiriza ababiri oba basatu we bakuŋŋaanira. Mu Matayo 28:20, yasuubiza okubeera nabakkiriza bulijjo.

Nannyini Buyinza Bwonna. Abaebbulaniya 1:3 agamba nti awanirira ebintu byonna mu buyinza bwe. Abafiripi 3:21 agamba nti ebintu byonna abiteeka wansi we.

Taggwawo Abaebbulaniya 13:8 atugamba nti y’omu lubeerera. Abaebbulaniya 1:12 naye agamba nti y’omu emirembe gyonna. Olunyiriri luno kujuliza okwa Zabbuli 102:25-27 nga lwogera ku Katonda.

Amanyi Byonna Yokaana 2:24-25 atugamba nti abantu bonna yabamanya, era nga amanyi ebiri mu mitima gyabwe. Mu Yokaana 10:15, yagamaba nti amanyi Kitaawe nga era Kitaawe bwa mumanyi.

Yesu Alina Emirimu nga Katonda

• Yesu ye Mutonzi (Abakkolosaayi 1:16; Abaebbulaniya 1:10).

• Yesu Yasonyiwa Ebibi (Lukka 5:20-24, Lukka 7:48).

• Yesu Ajja kubeera Mulamuzi ku Kusala Omusango Okwenkomerero (Matayo 25:31-46; 2 Abakkolinso 5:10).

• Yesu asinzibwa nga Kitaawe (Yokaana 5:22-23; Abaebbulaniya 1:6; Okubikkulirwa 5:12-13).

(1) Ebyawandiikibwa Ebiweereddwa Okusoma. Buli muyizi ajja kuweebwa ekimu ku byawandiikibwa bino wammanga. Nga okuyiga okuddako tekunnabaawo, oteekwa okusoma ebyawandiikibwa era owaandiike ku kyebyogera ku ky’okuyiga ku ssomo lino.

• Makko 1:1-12

• Yokaana 5:19-26

• Yokaana 6:44-51

• Yokaana 8:51-59

• Ebikolwa by’Abatume 2:22-36

• Okubikkulirwa 1:12-18

(2) Ekigezo: Ojja kutandika okusoma okuddako n’okugezesebwa kussomo 7. Yiga n’obwegendereza ebibuuzo eby’ekigezo nga weteekateeka.

(3) Ebiweereddwa Okuyigiriza: Jjukira okutegeka n’okuwa lipoota ku byoyigiriza wabweru w’ekibiina.

(1) Kiki Mesiya kye yakulembeza?

(2) Ekkanisa eyasooka yategeeeza ki bwe baagamba nti “Yesu ye Mukama”?

(3) Yesu Mwana wa Katonda mu ngeri ey’enjawulo mu ngeri ki?

(4) Okufuuka omuntu kye ki?

(5) Kola olukalala lwansonga ssatu lwaki kikulu Yesu okubeera omuntu.

(6) Kola olukalala lwabintu bisatu ebikulu ebitumanyisa Yesu Katonda.

(7) Nsonga ki ebbiri lwaki ssadaaka yali yetaagisa?

(8) Lwaki Yesu yafa ku musalaba mu kifo ky’engeri endala yonna?

(9) Kola olukalalalwa nsonga ssatu lwaki okuzuukira kwa Yesu okw’omubiri kwali kwa mugaso.