(1) Сабақтың соңында студент түсінуі және түсіндіре білуі қажет:

• Иса Мәсіх деген нені білдіреді.

• «Иеміз Иса Мәсіх» деген тіркестегі сенім ұстанымы.

• Мәсіхтің – адам екендігінің дәлелі мен маңыздылығы.

• Мәсіхтің – Құдай екендігінің дәлелі мен маңыздылығы.

• Күнәларды кешіру үшін Мәсіхтің өлімінің жеткіліктілігі.

• Мәсіхшілік сенім үшін қайта тірілудің маңыздылығы.

• Мәсіх туралы сенім ұстанымы.

(2) Осы сабақтың тәжірибелік мақсаттарының бірі – басқа дін адамдары Мәсіх туралы не айтатынын білу.

► Аян, 5:11-14 бірге оқыңыздар. Осы үзінді бізге Иса туралы не айтады?

Киелі кітапта соңғы күндері жалған мәсіхшілер мен жалған пайғамбарлар келіп, көпшілікті алдайды деп айтылған. Көптеген адамдар оларды құтқара алмайтын, жалған немесе ойдан шығарылған мәсіхтерге сенеді. Өздерін мормондар және иегова куәгерлері деп таныстыратын жалған мәсіхшілердің екі түрі туралы естіген боларсыз.

Мормондардың Исасы

Егер мормонды кездестірсеңіз, ол сізге Люцифердің рухани ағасы болған Иса туралы айтып береді. Бұл Иса – біздің «көктегі әкеміз» бен «көктегі анамыз» осы ғаламға әкелген миллиардтаған сәби-рухтардың бірі. Мормондардың ілімдеріне сәйкес, Иса жер бетінде өмір сүрген кезде, Оның бірнеше әйелі болған, және олардың бірі Мағдалалық Мәриям болған. Иса қайтыс болып, қайта тірілгеннен кейін үндістерге уағыз айту үшін Америкаға барған.

Иегова куәгерлерінің Исасы

Иегова куәгерлері сізге Исаның бас періште Михайл екенін айтады. Ол адамға айналып, айқышта емес, бағанада қайтыс болған алғашқы жаратылыс екенін айтады. Ол рухани тіршілік иесі ретінде тіріліп, денесі буға айналғаннан кейін, қайтадан бас періште Михайлға айналды.

Сіздің бұл жалған тәңірлерге табынушылардың Исасы, Киелі кітаптағы Исадан мүлдем өзгеше екенін біле алатындығыңызға сенімдімін, бірақ сіз Киелі кітаптағы нағыз Исаны сипаттап бере аласыз ба? Көптеген американдықтар сипаттай алмайды. Жақында жүргізілген сауалнама көрсеткендей, американдықтардың 80%-ы Исаны Құдайдың ұлы деп атайды, бірақ тек 40%-ы Оның Құдай екеніне сенеді және тек 40%-ы Оны күнәсіз деп санайды. Бұл миллиондаған адамдар Мәсіх туралы жалған түсінікке ие екенін, олардың құтқарушы Исаға сенбейтіндіктерін көрсетеді.

Өзгелердің өзіңізді алдауына жол бермеу үшін және Мәсіхті бүкіл әлемге дұрыс таныстыруға қабілетті болу үшін – Иса туралы дұрыс сеніміңіздің болуы өте маңызды.

Басқа діндердің Мәсіх туралы не айтатыны туралы толығырақ ақпарат алу үшін «Басқа діндер не дейді» деп аталатын курстың соңындағы тарауды қараңыз.

Иса – Мәсіх

► Мәсіх туралы Киелі кітапта алдын-ала айтылған қандай сөздер бар?

Төрт Ізгі хабар жазбалары да Исаны Исраил күткен Мәсіх ретінде көрсетеді. Мәсіх туралы алдын-ала айтылған бірнеше сөздер болды. Ол Дәуіттің ұрпағы болады, сондықтан патшаның лауазымына сай болады. Ол өз халқын қысымшылық пен құлдықтан құтқарады. Ол өзінің қызметін орындау үшін Құдаймен майланады. Мәсіх сөзі «майланған» дегенді білдіреді.

Көне Келісімдегі Мәсіх туралы кейбір маңызды мәліметтер Жаңа Келісім пайда болғанға дейін нақты түсіндірілмеген. Мәсіхтің басты міндеті – өз халқын күнәдан құтқару болды[1]. Оның патшалығы осы дүниелік емес, ол рухани және көкте болды[2], дегенмен Оның патшалығы бүкіл жерге таралады[3].

Мәсіх деген – еврей сөзінен шыққан. Грекше баламасы – Christos, содан Мәсіх сөзі шыққан. «Иса Мәсіх» тіркесін қолдану – Бұл Исаның Мәсіх екенін мәлімдеу.

Иса – Ие

Ертедегі қауым Ие деген сөзді – Исаның жоғары күш иесі екенін көрсету үшін қолданған. Олар «Иса Иеміз» дегенде, бұл Оның бәрінің Иесі, Жаратушысы және ғаламның Құдайы екенін білдірді. Бұл мәсіхшілерді ерекшелейтін сенім ұстанымдарының ажырамас бөлігі болды, өйткені олар жер бетінде адам болып жүрген Исаның – бәрінің жалғыз Құдайы екендігіне сенді.

«Иеміз Иса Мәсіх» деген – үлкен мәлімдеме, өйткені бұл сөздер Исаның Мәсіх екенін және Оның Құдай екенін білдіреді. Барлық үш сөз Філіпіліктерге арналған хат 2:10-11-де қолданылады. Бұл аяттар бізге уақыты келгенде әлемдегі барлық адамдар Иса Мәсіхті – Иеміз деп мойындайтынын айтады.

Үш ерекше күн

Біздің Иса туралы сенімімізді үш ерекше күнмен байланысты, үш санатқа бөлуге болады.

Туылу күнінде – Исаның пәк қыз Мәриямнан дүниеге келуі атап өтіледі, өйткені Иса Киелі Рухтың дарытқан құдіретімен туылған еді[1]. Иса әйелден туылып адам болғанмен, сонымен қатар Ол Құдай, өмірге келген әлемнің Жаратушысы болды. Бұл танғажайып жағдай, бірақ шындық: Иса нәресте болған кезде, анасы Мәриям өзін Жаратушы Иесін қолында ұстады.

Құдайдың Ұлы деген термин сенушілер мен періштелерге қолданылады[2]. Бірақ Иса – ерекше мағынада Құдайдың Ұлы[3]. Ол толықтай Әкенің болмысын көрсеткен жалғыз адам. Ол – Әке сияқты Құдай, өйткені толықтай Әкенің бейнесін көрсетті[4].

Құдайдың болмысы мен адамның болмысы бірге Исада қосылды. Бұл тәнге айналу деп аталады, яғни Құдай адам бейнесіне еніп, адам болды. Иса ғана біздің Құтқарушымыз бола алды, өйткені Ол әлемдегі жалғыз Құдай және Адам болды.

Иса – Адам

Жаңа Келісімдегі Исаны адам ретінде қабылдау қиын емес. Ол анасының құрсағында бала болып бітті, адам сияқты өсті және дамыды[5]. Ол шаршады, ұйықтады, азғырылды және күнәдан басқа, адамдардың бәрі істейтін істерді жасады. Ол тіпті өлді. Ол адамға айналып[6], шынымен адамзатпен байланыста болды.

► Неліктен Исаның адам екендігі маңызды?

Иса адам болғандықтан:

(1) Ол құрбандық ретінде азап шегіп, өле алды.

(2) Оның әділ өмірі біздің күнәға толы өміріміздің орнын алмастыра алады. Алдымен Адам ата бүкіл адамзаттың өкілі болды. Ол күнә жасап, Құдайдан бөлінді. Бұл барлық адамдарға өлім әкелді. Иса күнәсіз өмір сүріп, Құдайдың талаптарын орындады. Ол Онымен байланыстағылардың барлығына мәңгілік өмір береді. Жазбада Иса – Соңғы Адам деп аталады[7].

(3) Ол бізді Құдайға ұсынатын біздің діни қызметкер бола алады. Бізді Құдаймен Келістіруші ретінде Ол біз үшін Құдаймен сөйлесіп қана қоймай, бізді нақты ұсынады. Ол бізді Құдаймен татуластыру үшін, адам болуы керек болды[8]. Оның діни қызметкер ретіндегі рөлі бізге мәңгілік құтқарылуды қамтамасыз етеді[9]. Исаның адам болғаны – Ізгі хабардың ажырамас бөлігі болып табылады[10].

Исаның адам болғаны туралы қосымша Киелі кітаптық дәлелдерді осы сабақтың соңындағы «Исаның адам болғанының Киелі кітаптық дәлелі» бөлімінен қараңыз.

Иса – Құдай

Иса Өзін Құдай деп жариялаған

[11]Киелі кітаптағы Иса – жай ғана адам емес. Ол сонымен бірге ғаламның шексіз Құдайы. Исаның Өзі осындай мәлімдеме жасады. Ол: «Әкем Екеуіміз біртұтаспыз»[12] – деді. Ол мұны айтқан кезде, яһудилер Оны тас лақтырып өлтіргілері келді, өйткені олар Оның Құдайға тең екендігін айтқанын түсінді. Иса оларға: «Жоқ, сендер мені түсінбедіңдер. Шын мәнінде, мен Құдай емеспін» – деді ме? Жоқ, Иса олардың бұл сөздерді түсінуін қабылдады. Ол Құдай Әкеге тең екенін үйретті.

Иса: «Ыбырайым тумастан бұрын да (Мәңгі) БАР БОЛУШЫ МЕНМІН»[13] деп айтқанда, Ол Мысырдан шығу, 3:14-тегі (Мәңгі) БАР БОЛУШЫ, әлемнің Құдайы екенін жариялаған болатын[14]. Осы сөздері үшін яһудилер Оны тас лақтырып өлтіруге тырысты[15].

Иса жер бетінде өмір сүрген кезде Құдайға тән істер жасады

Иса жер бетінде өмір сүрген кезде Құдайға тән істер жасады. Ол мәңгілік өмір берді[16]. Ол күнәларды кешірді[17]. Бұл тек Құдай жасай алатын нәрселер.

Иса сал адамның күнәларын кешіргенде, Ол «жер бетінде күнәларды кешіруге билігінің бар»[18] екенін көрсету үшін оны сауықтырды. Бір әрекет екіншісін дәлелдеді, бұл Исаның бұл кереметті Құдай майлаған пайғамбар ретінде ғана жасамағанын айқын көрсетті. Исаның кешіруге және сауықтырыратын, құдайлық беделі мен билігі болды.

Сондай-ақ, Ол Елазарды «қайта тірілу мен шынайы өмір – Менмін»[19] деген сөздерден кейін қайта тірілтті. Бұл құдайлық жариялаумен жасалған тағы бір Құдайдың кереметі болды. Құдай ғана: «Мен қайта тірілумін» деп жариялауға құқылы, өйткені тек Құдайдың күші біреуді қайта тірілте алады. Иса «өмір беретін – Менмін» деп жариялады, содан кейін Өзін кім деп атаса, Сол екенін дәлелдеп, Елазарға өмір берді. Бұл әрекетінде Иса Өзін Құдайдың күшімен қайта тірілткен басқа пайғамбарлар мен елшілерден нақты ажыратып көрсетті. Олар жай Құдайдың құралдары болды. Жохан, 5:21-де Иса Әкесі сияқты өлімнен қайта тірілтетінін айтты.

[20]Иса керемет істері арқылы «Өзінің ұлылығын көрсетті»[21], «Әкенің жалғыз рухани Ұлының рақымдылық пен шындықа толы, асқан ұлылығын көрсетті»[22]. Бұл ғажайыптар Құдай Ұлының көктегі күшінің көрінісі болды, бұл Оның Құдай екенін көрсетті.

Иса – Жаратушы

Жохан мен Пауыл елшілердің айтуынша, бәрі де Иса арқылы Иса үшін жаратылған, және бүкіл әлем жаратылмай тұрғанда-ақ Ол бар болатын, бәрін аман сақтайтын да – Сол[23]. Сөзсіз тек Құдай туралы осылай айтуға болады.

► Неліктен Исаның Құдай екенін білу маңызды?

Иса – Құдай болғандықтан:

1. Оның айқыштағы құрбандық өлімі шексіз құндылыққа ие, бүкіл әлемнің күнәларын кешіру үшін жеткілікті.

2. Оның бізді құтқара алатын құдіреті бар; Ол – жол, шындық және шынайы өмір.

3. Біз Оған Әкеге сиынғандай, ғибадат етуіміз керек.

Егер біз Исаны Құдай ретінде қабылдамасақ, онда біз Оны Құдай ретінде қадірлемейміз. Ал Ол «бәрі Әкені қалай қадірлесе, Ұлын да солай қадірлесін»[24] деді. Егер біз Ұлын да, Әкені де бірдей қадірлемесек, құтқарыла алмаймыз.

Мәсіхшілік тек Исаның ілімдері мен істеріне ғана емес, сонымен бірге ерекше – Исаның Өзіне де негізделген. Ол құтқару туралы хабардың ұстазы ғана емес. Оның Өзі – Құтқарушы, тек Құдай-адам Құтқарушы бола алды.

Исаның Құдай екенінің Киелі кітаптық дәлелдерін көру үшін осы сабақтың соңындағы «Жазбадағы Исаның – Құдай екенінің дәлелдері» бөлімін қараңыз.

Иса – бір Тұлға

Исаның бойында Құдайдың да барлық сипаты және адамның да барлық сипаты болғанмен, Ол – екі тұлғаның қосындысы емес. Осы екі сипат – бір Тұлғаның бойынан керемет үйлесімділік табады. Иса – жалғыз Құдай-адам, сондықтан Исаның әрбір әрекеті Оның толық адамдығы мен толық құдайлығы аясында түсінілуі керек.

Қауым әрқашан Исаның екі болмысын бір-бірінен ажыратуға болмайды деп үйреткен, алайда олар бірде-біреуі өзінің сипаттамаларын жоғалтпайтын етіп біріктірілген[25].

Исаның сипаты мен Киелі Жазбаның сипатын салыстыру пайдалы болуы мүмкін. Иса сияқты, Киелі кітап та толығымен құдайлық және адамдық. Адамдық кітап бола отырып, ол кез-келген жердегі басқа кітаптың сипаттамаларына ие, бірақ оның ішінде қателіктер жоқ. Құдайлық бола отырып, ол басқа ешбір кітапта жоқ құдайлық сипаттамаларға ие. Сол сияқты, Иса да адамдық және құдайлық қасиеттерді көрсетеді. Киелі кітаптың құдайлық сипаттамаларының бар екендігі – оны жердегі кітаптан кем етпейді. Сондай-ақ, Исаның құдайлық болмысында әрекет етуі – Оның адамдық болмысын кем етпейді. Исаның адамдық болмысында әрекет етуі – Оны құдайлық болмысынан кем етпейді.

Бұл ілімді түсінудегі кең таралған қателіктер

Мәсіх туралы ілімді түсінудегі келесі қателіктер жиі кездеседі:

• Исаның Құдай екенін жоққа шығару.

• Исаның адам екенін жоққа шығару.

• Оның құдайлық немесе адамдық болмысын маңызды емес сияқты төмендету.

• Мәсіхтің тұлғалық бірлігін жоққа шығару.

Осы қателіктердің кез-келгені – бұл тәнге айналуды жоққа шығару. Тәнге айналу біздің құтқарылуымыз үшін қажет болды, сондықтан егер адам Исаның тәнге айналғанын қабылдамаса, ол жалған Ізгі хабарға және құтқарылудың жалған мағынасына сенеді.

Студент төменде берілген материалды түсіндіре алады.

Иегова Куәгерлері Исаның адам болғанын айтады. Олар Оның жер бетінде өмір сүрген ең ұлы адам, бірақ жай ғана адам болғанына сенеді. Сондықтан олар Оның құрбандығы біздің құтқарылуымыз үшін жеткілікті деп сенбейді. Олардың Ізгі хабарлары – істер бойынша құтқарылу. Олар өздерін мәсіхшілерміз деп атайды, бірақ іс жүзінде олар басқа нәрсеге сенеді.

Мормондар Исаны – Люцифердің інісі, бастапқыда Құдай жаратқан рух деп санайды. Ол жер бетіне Иса деген адам болып дүниеге келу үшін жіберілді. Мормондар Исаның Құдай екеніне сенбейді.

Мұсылмандар Исаны Құдай жіберген пайғамбар деп санайды. Олар Оның Құдай екеніне және Үшбірлік екеніне сенбейді. Олар Оның айқышқа шегеленуі мен қайта тірілуіне сенбейді.

Үндістер мен буддистер Исаны ғажайып істер жасаған қасиетті адам деп санайды. Иса олардың діні үшін маңызды емес. Олар Жаратушы Ие, Құдайға сенбейді, сондықтан олар Исаның Құдай екеніне де сенбейді.

Жұма күні – Исаның айқышқа шегеленген күні. Осы қорқынышты, әрі керемет күні Иса айқышта біздің күнәларымызды Өз мойнына алды. Ол біздің күнәларымыз үшін құрбандық ретінде Өз жанын берді, сондықтан енді біз құтқарыла аламыз.

Құрбандық қажет болды

Құдай бізді кешіріп, сонымен бірге әділ және қасиетті болып қалуы үшін құрбандық керек болды. Бұл қағида Көне Келісімде үйретілген: Құдай талап еткен құрбандықтар арқылы кешірім алу[1]. Егер Құдай күнәні жай ғана кешіре салса, бұл Оның әділетсіз екенін және күнәнің маңызды емес екенін көрсетер еді. Бірақ ешкім Мәсіхтің айқышқа шегеленіп өлгеніне қарап, күнә маңызды емес деп айта алмайды. Оның құрбандығы кешіруге негіз болды.

Иса ғана лайықты құрбандық бола алды

► Неліктен Иса ғана біздің күнәларымыз үшін құрбандық бола алды?

Құдайдың әділдігі мен күнәнің ауырлығы, кез-келген жаратылысқа қарағанда үлкенірек құрбандықты қажет етті[2]. Біз Мәңгілік Құдайға қарсы күнә жасадық, бұл бізге мәңгілік кінәні жүктеді. Сондықтан тек Иса ғана құрбандық бола алды. Ол Құдай және Адам болғандықтан, лайықты құрбандық болды. Өзінің құдайлығының арқасында Ол күнәсіз болды және Оның құрбандығы шексіз құндылыққа ие болды. Адамдығының арқасында Ол бізді ұсынып, біздің орнымызға өле алды.

Исаның қаны – Оның құрбандық өлімін бейнелейді

Құдай адамдарға құрбандық шалу арқылы тазаруды үйретті. Діни қызметкерлер жануарларды өлтіріп, олардың қанын өлімнің бейнесі ретінде ұсынды. Еврейлерге арналған хатта қансыз күнәлардан тазару мүмкін емес делінген[3].

Құдай қанға ерекше қарауды бұйырды, өйткені ол жаратылыстың жанын бейнелеген[4]. «Қан төгу» өлтіруді білдіреді[5]. Киелі үйде қанды қолдану жануардың өлтірілгенін білдірді.

Мәсіхтің өлімі – барлық адамдар үшін және барлық уақытта құтқарылуды ашық ететін соңғы құрбандық болды[6]. Ол құрбандық өлімін бейнелейтін Өзінің қанын көкте ұсынды[7]. Исаның қаны бізге құтқарылуды қамтамасыз етеді, өйткені Ол құрбандық ретінде өлді, сондықтан біз құтқарыла аламыз.

Неліктен Иса басқаша емес, айқышта өлді? Көне Келісім бойынша ағашқа іліну – Құдай қарғысына ұшырау дегенді білдірді[8]. Елші Пауыл айқыш ағашқа шегеленіп, Иса – Құдайдың қарғысын қабылдағанын көрсеткенін айтады.

Иса – Құдай мен адамды біріктірді

Иса екі бөлінген «партияларды» – Құдай мен адамды татуластыруға келді. Келістіруші ретінде Иса бір уақытта екі партияның өкілі болуы керек болды. Құдай ретінде Ол – Құдайды адамға ұсынды. Адам ретінде Ол – адамды Құдайға ұсынды. Екі жақтың мінсіз өкілі ретінде Иса Құдай мен адамды біріктірді. Ол татуласу үшін әр тарап істеу керек болған нәрсені істеді.

Құтқарылу мейрамын тойлаудың көптеген дәстүрлі тәсілдері бар, бірақ көптеген адамдар өздерінің істерінің мәнін және Мәсіхтің қайта тірілуінің маңыздылығын түсінбеуі мүмкін. Иса Құтқарылу мейрамы күні таңертең, айқышқа шегеленгеннен кейін үшінші күні қайта тірілді. Ол күнә, өлім және шайтаннан күшті екенін көрсетті. Ол біздің өлімімізді қабылдап қана қоймай, оны өмірмен жеңді. Оның жеңгенінің арқасында, біз де өлімді жеңе аламыз.

Иса денесімен қайта тірілді

Бір күні Иса яһудилерге: «Мына киелі үйді бұзыңдар, Мен оны үш күнде қайта тұрғызамын» – дейді. Яһудилер Оны Ирод салған киелі үй туралы айтты деп ойлағанмен, Жохан жазған Ізгі хабар Оның денесі туралы айтқанын түсіндіреді[1]. Барлық Ізгі хабар жазбаларында Исаның қабірі жерленгеннен соң, үш күннен кейін бос болғандығы жазылған. Иса қайта тірілгеннен кейін шәкірттеріне келіп: «Қол-аяғыма қараңдар: бұл – Менің Өзім. Маған қол тигізіп денемнің шынайы екеніне көз жеткізіңдер! Елестің еті мен сүйегі болмайды ғой», – деді[2]. Ол физикалық тұрғыдан қайта тірілгенін дәлелдеді.

► Егер Иса қайта тірілмесе не болар еді?

1. Исаның қайта тірілуі – Оның күнә мен өлімді толық жеңгенін көрсетті[3].

2. Исаның денесімен қайта тірілуі – Оның Өзін Кіммін деп атаса, Сол екенін дәлелдеді[4]. Бұл да Ізгі хабардың дәлелі болды. Исаның қайта тірілуін қабылдамайтын адамдар, Ізгі хабарды да қабылдамайды[5].

3. Исаның қайта тірілуі – бізге де өлімнен қайта тірілетінімізге сенімділік береді. Иса өлгендерді қайта тірілтуге уәде берді, бірақ егер Ол Өзі қайта тірілмесе, бұған сену қиын болар еді[6]. Біз қайта тіріліп, Исаның жаңарған денесі сияқты денеміз болады[7].

Иса – әлі де адам

Қайта тірілу бізге тәнге айналудың тұрақтылығын көрсетеді. Иса әрқашан адам болады және әрқашан Құдай болады. Өзінің жаратылысымен сүйіспеншілік қарым-қатынасын қалпына келтіру үшін Құдай адамдық болмысын Өзінің болмысына мәңгілікке қосты. Иса әлі күнге дейін Құдай-адам, Ол біз үшін Әкенің алдында өтініш етеді[8], және бір күні бізді көкке апару үшін қайта келеді[9].

Сенушілер ретінде біз Мәсіхпен күнделікті қарым-қатынаста өмір сүреміз. Ол тарихтағы адам ғана емес, көктегі Құдай ғана емес, Ол – үнемі бізбен бірге болушы. Ол әрқашан Өз шәкірттерімен бірге болуға уәде берді[1].

Ол – ерекше түрде қауымда бар. Ол – қауымның Басы. Қауым – Оның денесі[2]. Ол қауымды басқарады, оны бірге ұстайды және оны барлық қажеттіліктермен қамтамасыз етеді[3].

Адам ақиқатты қабылдаған кезде, біз оған Исаның осы ақиқатты сеніммен және мойынсұнушылықпен қабылдағанымызды қалайтынын түсіндіруіміз керек. Біз адамдарға төменде көрсетілгендей дұға арқылы сенуші болуларына көмектесе аламыз.

«Әке, мені сондай қатты сүйгендіктен, Ұлын Исаны мен үшін осы әлемге жібергеніне алғыс айтамын. Менің күнәларымның кешіріліп, Сенімен қарым-қатынаста болуым үшін Исаның өліп, қайта тірілген – күнәсіз Құдай-адам екеніне сенемін. Мен жасаған барлық күнәларым үшін қатты өкінемін. Менің күнәларым Исаны айқышқа шегелегенін білемін. Дәл қазір мен барлық қате істерден бас тартып, Исаны өзімнің Ием және Құтқарушым ретінде қабылдаймын. Мені одан әрі жетелей гөр. Мен Сен үшін мәңгі өмір сүремін. Мені кешіргенің үшін рахмет. Мен сені жақсы көремін. Аумин.»

Студенттер сенім ұстанымын кем дегенде екі рет бірге оқулары керек.

Иса – Мәсіх және бәрінің Иесі, Адам ретінде пәк қыздан туған, бойында адамдық болмысы мен құдайлық болмысы бар, Құдайдың Ұлы. Ол күнәсіз өмір сүріп, біздің күнәларымыз кешірілу үшін құрбандық ретінде өлді. Ол өлімнен қайта тірілді, қайтып келгенде сенушілерді де қайта тірілтеді. Оның бүкіл әлемдегі патшалығы шексіз.

Ақпараттың келесі екі бөлімі міндетті емес. Егер топ осы тармақтарға қосымша Киелі кітаптық дәлелдер алғысы келсе, оларды өтсе болады.

Иса – Хауаның ұрпағы (Жаратыл. баст., 3:15), Ыбырайымның ұрпағы болды (Жаратыл. баст., 22:18 Елшіл. істері, 3:25-пен салыстырыңыздар), әйелден туған (Ғалатт. хат, 4:4), Мәриямнан туған (Матай, 1:21-25), Адам Ұлы деп аталған (Матай, 13:37), кәдімгідей өскен (Луки, 2:40, 52).

Ол өзінің өскен жеріне келгенде, адамдардың таңданғандықтары – Оның балалық шағы қарапайым болғанын көрсетеді (Матай, 13:54-56).

Оның адам сияқты мойынсұнуы үшін денесі болды (Еврейл. хат, 10:5-9); Ол – ет пен сүйектен тұратын тәнді қабылдады (Еврейл. хат, 2:14); Ол – біз сияқты жаратылды және біз сияқты азап шекті (Еврейл. хат, 2:10-18); Ол шынымен азап шекті (Еврейл. хат, 2:9-10); Ол адам сияқты азғырылды (Еврейл. хат, 4:15).

Ол адамның болмысын қабылдады (Філіпіл. хат, 2:6-8).

Ол – Құдайдың мәңгілік Сөзі болды, адамға айналды және жерде өмір сүрді (Жохан, 1:14).

Исаның адам екендігі – мәсіхшілік сенімнің ажырамас бөлігі болып табылады (Жоханның 1-хаты, 4:2-3).

Иса Өзінің – Құдай екенін үш жолмен дәлелдеді:

1. Ол – Құдай деп аталды.

2. Ол – Құдайдың қасиеттеріне ие болды.

3. Ол – Құдайдың рөлдеріне ие болды.

Иса – Құдай деп аталды

• Жохан, 1:1, 14-те – Мәңгілік Сөз – Құдай болған деп айтылады.

• Жохан, 12:41-де – Ишая Исаны көрген деп айтылады.

• Елшіл. істері, 20:28-де – Мәсіхтің қауымы Оның қанымен иемделген.

• Римд. хат, 9:5 – Мәңгілікке жарылқанған Мәсіх келді.

• Титке хат, 2:13 Ол – Құдай және Құтқарушы Иса Мәсіх деп айтылады.

• Ишая, 7:14 – Оның аты «Құдай бізбен бірге» дегенді білдіреді.

• Ишая, 9:6 – Оның аты – Құдіретті Құдай болады.

• Тімотеге 1-хат, 3:16 Құдайдың адам болып дүниеге келгенін, халықтарға жарияланғанын және ұлылықпен көкке көтерілгенін айтады.

• Жохан, 10:30, 33 Иса – Әке екеуі біртұтас екенін айтты.

• Жохан, 5:17-18 Яһудилер Исаның Өзін Әкемен теңестіргенін білгендерін көрсетеді.

• Жохан, 14:9 Ол: «Кім Мені көрсе, соның Әкені де көргені» – деді.

• Жохан, 20:28 Тома Оның жараларын көріп: «Ием менің, Құдайым менің!» деді, ал Иса сенгендерге батасын берді.

• Жохан, 8:58 Ол Өзін – (Мәңгі) Бар Болушы Менмін деп атады, ал яһудилер бұл жариялаудың Құдай болу дегенді білдіретінін білді.

• Аян, 1:8, 11, 17-18 Ол Өзі туралы «Алғашқы да, Соңғы да Менмін!» деп жариялаған және Ишая 44:6 бұл терминнің Құдайға қатысты екенін көрсетеді.

• Еврейл. хат, 1:2-3 Ол – «Құдайдың болмысының дәлме-дәл сипаты» деп айтылады.

• Еврейл. хат, 1:8 Оған Құдай сияқты қарайды.

Иса – Құдайдың қасиеттеріне ие

Барлық жерде бар. Матай, 18:20-да Иса: «Өйткені екі-үш адам Менің атымнан жиналса, Мен де сол жерде араларында боламын» деді. Матай, 28:20-да Ол әрқашан сенушілермен бірге болатынын уәде етті.

Құдіреті шексіз. Еврейл. хат, 1:3-те «Ол бүкіл әлемді Өзінің құдіретті күшімен ұстап тұр» дейді. Філіпіл. хат, 3:21-де Оның барлығын Өзіне бағындыратындығы айтылады.

Мәңгілік. Еврейл, хат 13:8-де Оның мәңгілік өзгермейтіні айтылады. Сондай-ақ, Еврейл. хат, 1:12 және Забур жырлары, 101:25-27-дегі Құдайды сипаттайтын үзінді де Оның мәңгі өзгермейтінін айтады.

Бәрін білетін. Жохан, 2:24-25 Ол барлық адамдарды және олардың жүректеріндегіні де білетінін айтады. Жохан, 10:15-те Иса – Оның Әкені, Әкенің Оны білетінін жариялады.

Иса – Құдайдың рөлдеріне ие

• Иса – Жаратушы (Қолост. хат, 1:16; Еврейл. хат, 1:10).

• Иса – күнәларды кешірді (Лұқа, 5:20-24; Марқа, 2:10; 7:48).

• Иса – соңғы сотта үкім шығарады (Матай, 25:31-46; Қорынтт. 2-хат, 5:10).

• Исаға Әкеге сияқты табынады (Жохан, 5:22-23; Еврейл. хат, 1:6; Аян, 5:12-13).

(1) Оқу және жазу tапсырма: Әрбір студентке төменде көрсетілген үзінділердің бірі тағайындалады. Келесі сабақтың алдында үзіндіні оқып, осы сабақтың тақырыбы туралы не айтылғаны туралы абзац жазу керек.

• Марқа,1:1-12;

• Жохан,5:19-26;

• Жохан,6:44-51;

• Жохан,8:51-59;

• Аян,1:12-18;

• Елшілердің істері,2:22-36.

(2) Тест: Келесі сабақты 7-сабақ бойынша тесттен бастайсыз. Дайындық кезінде тест сұрақтарын мұқият зерттеңіз.

(3) Оқыту тапсырмасы: Студент осы курсты өту кезінде кем дегенде жеті рет, курсқа қатыспайтын адамдарға осы сабақты немесе сабақтың бір бөлігін үйретуі керек. Бұл сабақ қауым тобында, үй тобының кездесуінде немесе басқа ортада өтілуі мүмкін. Сіз бұл мүмкіндіктерді жасауға және сынып жетекшіңізге есеп беруге жауаптысыз.

(4) Келесі сабаққа дайындалу үшін әрқашан келесі сабақты оқуды ұмытпаңыз.

(1) Мәсіхтің басты мақсаты не болды?

(2) Ертедегі қауым «Иеміз Иса» деп не айтқысы келді?

(3) Иса қандай ерекше мағынада Құдайдың Ұлы?

(4) Исаның тәнге айналуы нені білдіреді?

(5) Неліктен біз үшін Исаның – адам екені маңызды? (Үш себеп)

(6) Неліктен бізге Исаның – Құдай екенін түсіну маңызды?

(7) Құрбандық не үшін қажет болды?

(8) Неліктен Иса басқа жолмен емес, айқышта өлді?

(9) Исаның қайта тірілуінің мәні неде?