Lesson 1: ერთი ღმერთი და ერთი ეკლესია

ჩვენი წელთაღრიცხვის პირველ საუკუნეში ბერძნული ტერმინი ekklesia (ეკლესია) ფართოდ გამოიყენებოდა. როდესაც ქალაქში ცხადდებოდა მოწვევით ხალხის შეკრება შეხვედრისთვის, შეხვედრას ეწოდებოდა ekklesia (ეკლესია).

Ekklesia (ეკლესია) ეკლესია არის სიტყვა, რომელიც გამოიყენება ახალ აღთქმაში ეკლესიის მიმართ. ეს სიტყვა გამოყენებულია 117 ჯერ ახალ აღთქმაში, მაგრამ ეს ნახსენები სიტყვა ყველგან არ აღნიშნავს ეკლესიას. ზოგ ადგილას ის სხვა სახის შეკრებებს ნიშნავს (საქმეები 19:32, 39 და 41).

სახარება შეთავაზებულია ყველა რასის, სოციალური კლასის, ადგილსამყოფელისა და პროფესიის ადამიანისთვის. ისევე, როგორც ქალაქში ყველა იგებდა შეკრების შესახებ მაცნეს განცხადებას, არცერთი კატეგორიის ადამიანი არ გამოირიცხება შეთავაზებული სახარების მიმღებთა რიგებიდან.

ეკლესია არის ადამიანთა ჯგუფი, რომელიც პასუხობს სახარების მოწოდებას. ისინი მოდის ყველა კატეგორიის ხალხიდან, რათა შექმნან ადამიანთა განსაკუთრებული, მრავალფეროვანი ჯგუფი, რომლებიც მიძღვნილნი და ერთგულნი არიან ქრისტესა და მისი ეკლესიისადმი.

სამების პირები - მამა, ძე და სულიწმიდა - განსაკუთრებულად ეპყრობიან მორწმუნეებს ეკლესიაში.

ღმერთი სამუდამოდ განადიდდება იმ საქმეებისთვის, რასაც ის ეკლესიაში აკეთებს.

მას დიდება ეკლესიაში, ქრისტე იესოში და ყველა თაობაში უკუნითი უკუნისამდე, ამინ! (ეფესელთა 3:21).

იმის გამო, რომ ეკლესია არსებობს ღვთის სადიდებლად, მან არაფერი არ უნდა გააკეთოს, რაც ღმერთს შეურაცხყოფს. ეკლესიამ არ უნდა გააკეთოს ისეთი რამ, რაც ხალხში გამოიწვევს გაუგებრობას, თუ როგორია ღმერთი, ან ღმერთის ნაცვლად ყურადღების კონცენტრირებას ადამიანზე გააკეთებს.

ეკლესია არის ღმერთის ოჯახი.

მაშასადამე, სანამ დრო გვაქვს, სიკეთე ვაკეთოთ ყველასთვის, უფრო მეტად კი მათთვის, ვინც რწმენით ჩვენიანია. (გალატელთა 6:10).

თქვენ კი ასე ილოცეთ: მამაო ჩვენო, რომელიც ხარ ცათა შინა, წმიდა იყოს სახელი შენი (მათე 6:9).

იმის გამო, რომ ეკლესია არის ღმერთის ოჯახი, შეუძლებელია ადამიანი იყოს ჭეშმარიტად ეკლესიაში, თუ მას არ აქვს ღმერთის რწმენა და არ აქვს ურთიერთობა მასთან. ადამიანი ეკლესიაში არ შემოდის მხოლოდ ეკლესიის წარმომადგენლების გაცნობით. ის ეკლესიაში შემოდის ღმერთთან ურთიერთობით და შემდეგ იწყებს ურთიერთობას ღვთის ხალხთან.

► რას ნიშნავს ღმერთი იყოს შენი მამა?

[1]იესო არის ის, ვინც აშენებს ეკლესიას. იესო გვპირდება ეკლესიის საბოლოო წარმატებას.

და მე გეუბნები შენ, რომ შენ ხარ პეტრე (კლდე), და ამ კლდეზე ავაშენებ ჩემს ეკლესიას და ჯოჯოხეთის ბჭენი ვერ სძლევენ მას. (მათე 16:18).

იესომ აღგვითქვა, რომ ეკლესიასთან იქნებოდა.

...და, აჰა, მე თქვენთან ვარ მარადჟამს საუკუნის აღსასრულამდე. ამინ. (მათე 28:20).

ვინაიდან, სადაც ორი ან სამია შეკრებილი ჩემი სახელით, მეც იქ ვარ, მათ შორის (მათე 18:20).

ქრისტე არის ეკლესიის თავი. ეკლესია არის მისი სხეული ქვეყნიერებაზე. ქრისტეს ეკლესიასთან პირადი ურთიერთობა უფრო ღრმაა, ვიდრე ჩვენ შეგვიძლია ჩავწვდეთ.

და ყოველივე დაამხო მის ფერხთა ქვეშ და დაუმორჩილა, და ის დაადგინა ყოველივეზე მაღლა, თავად ეკლესიისა, რომელიც მისი სხეულია, სისრულე აღმავსებლისა ყოველივესი ყოველივეში (ეფესელთა 1:22-23).

იმიტომ, რომ მისი სხეულის ასოები ვართ, მისი ხორცთაგანნი და მისი ძვალთაგანნი (ეფესელთა 5:30).

იმის გამო, რომ ეკლესიის წევრი არის ქრისტეს სხეულის ნაწილი, შეუძლებელია ადამიანი მართლაც იყოს ეკლესიის ნაწილი, თუ მან პირადად არ ირწმუნა იესო, როგორც მხსნელი და არ აღიარებს ქრისტეს, როგორც უფლის, ავტორიტეტს.

► როგორ ადამიანს შეიძლება ეწოდოს ქრისტეს სხეულის წევრი?

საქმეების წიგნი გვიჩვენებს, რომ ადრეულმა ეკლესიამ იცოდა სულიწმიდის თანდასწრებისა და ძალის შესახებ. სულიწმიდა შთაგონებას და ძალას აძლევდა ქადაგებისთვის (საქმეები 2:11). მან მოუწოდა ადამიანებს განსაზღვრულ მსახურებაში (საქმეები 13: 2). ის გაუძღვა მათ მსახურებისთვის სწორ ადგილებში (საქმეები 16: 6-10). მან მოაგვარა დოქტრინალური საკითხები (საქმეები 15:28).

სულიწმიდა არის ეკლესიის უდიდესი მმართველი, თავისი მისიის მსოფლიო მასშტაბით შესასრულებლად.

არცერთ ადამიანურ ორგანიზაციას არ შეუძლია მოლოდინი ჰქონდეს, რომ მთელი ამოცანის შესრულებას შეძლებს. ღმერთი მოუწოდებს და აგზავნის მისიონერებს და მან იცის ყველა გეოგრაფიული არეალის მოთხოვნილებები.

ადამიანი შემოდის ეკლესიაში, განიცდის სულიწმიდის მიერ განახლების სასწაულს. ვინაიდან ეს აღდგინება არის ზებუნებრივი გამოცდილება, ევანგელიზაციას ზებუნებრივად ხელმძღვანელობს და აძლიერებს სულიწმიდა. ევანგელიზაციის შედეგები ვერ აიხსნება ბუნებრივი მიზეზებით.

ეკლესიური ცხოვრება არის სულიწმიდაში ცხოვრება.

თაყვანისცემას ადრეულ ეკლესიაში სულიწმიდა უძღვებოდა. ის სხვადასხვა წევრების მეშვეობით ლაპარაკობდა (საქმეები 4:30-31). თაყვანისცემის დაგეგმილი პროგრამა ნებისმიერ დროს შეიძლებოდა შეცვლილიყო სულიწმიდის მიერ.

ეკლესია განსხვავდება ყველა სახის ადამიანური ორგანიზაციისგან. ეკლესიის წევრები ერთმანეთთან მოზიარეობაში არიან, რადგან ისინი ღმერთთან ურთიერთობენ და სულიერი ცხოვრება აქვთ. ადამიანი, რომელიც არ არის მოქცეული, სინამდვილეში არ არის ამ მოზიარეობაში, მაშინაც კი, თუ მას მოსწონს ეკლესია და ეკლესიის წევრების მეგობარია.

[1]სულიწმიდა იძლევა სულიერ ნიჭებს, რომლებიც წევრებმა უნდა გამოიყენონ ერთმანეთის მსახურებისთვის. (1 კორინთელთა 12:4-7). იერუსალიმის ადრეული ეკლესიის პირველ დღეებში, წევრების ერთგულება და ერთობა იმდენად ძლიერი იყო, რომ ეს ძნელი წარმოსადგენია თანამედროვე მორწმუნეებისთვის. ხალხი ყიდიდა ქონებას და ფულს გასცემდა, რათა ეკლესიის წევრებს ერთად, ერთმანეთთან მოზიარეობაში ეცხოვრათ. როდესაც ანანიამ და საფირამ მოიტყუეს, ისინი დაიხოცნენ, რადგან მათმა ცოდვამ შეურაცხჰყო სულიწმიდის დიდებულ მოქმედებას ეკლესიაში (საქმეები 4:32-35, 5:1-4).

ეკლესიის ერთიანობა მიიღწევა სულიერი ცხოვრებით.

ეკლესიას (არა შენობა, არამედ მორწმუნეთა ჯგუფს) უწოდებენ "ღვთის ტაძარს", რადგან სული განსაკუთრებულად ცხოვრობს ეკლესიაში (2 კორინთელთა 6:16). ნებისმიერი ადამიანი, ვინც ზიანს აყენებს სულიერ ტაძარს, რომელშიც ქრისტიანული ერთობა სუფევს, სერიოზულ სასჯელს დაიტეხს (1 კორინთელთა 3:16-17).

► რას ეტყოდით მას, ვინც აცხადებს, რომ შემოსილია სულიწმიდის ძალით, მაგრამ თავს ესხმის და ანაწევრებს ეკლესიას?

ეკლესია ეხმარება ადამიანებს გაიხსენონ ღმერთი, გაამახვილონ ყურადღება ღმერთზე და განიცადონ ღმერთისმიერი ცვლილებები.

ეკლესია დაიგეგმა და შეიქმნა ღმერთის მიერ. დედამიწაზე, ნებისმიერ სხვა ადგილზე მეტად, ყველაზე უფრო შესაფერისი ადგილი არის ეკლესია, სადაც ღვთის ნების აღსრულება ხდება ადამიანების მიერ, რომლებსაც უყვართ ღმერთი. ამგვარად, ეკლესია უჩვენებს ქვეყნიერებას როგორია ღმერთი.

► რა არის ის, რაც ღმერთთან დაკავშირებით უნდა დაინახონ ადამიანებმა, როდესაც ეკლესიას ხედავენ?

ეკლესიის შემხედვარე ადამიანებმა უნდა დაინახონ, რომ ღმერთი მოსიყვარულე და მოწყალეა, ზრუნავს ყველა ადამიანზე, მპატიებელია, მხარს უჭერს ჭეშმარიტებას, ასრულებს ვალდებულებებს, სძულს ცოდვები და ამავდროულად უყვარს ცოდვილები.

► რა შეცდომებს უნდა მოერიდონ ადამიანები იმის გახსენებით, რომ ეკლესია ღმერთთან არის კავშირში?

რადგან ეკლესია არსებობს ღმერთისთვის, ეკლესიის თაყვანისცემა ღმერთზე უნდა იყოს ორიენტირებული. როდესაც თაყვანისცემა ხდება ორიენტირებული ადამიანთა ლიდერებზე ან შემსრულებლებზე, ის ხდება ადამიანზე ორიენტირებული, რაც არის კერპთაყვანისმცემლობა. არასწორი თაყვანისცემა ხდება ხორციელი, აამაღლებს გარკვეულ ადამიანებს და აღძრავს ბუნებრივ სურვილებს. არასწორი თაყვანისცემა შეიძლება დემონურიც კი გახდეს, რადგან თაყვანისმცემლები ემორჩილებიან გრძნობებს და სულებს, რომლებიც არ არიან ღვთისაგან.

► სტუდენტმა უნდა წაიკითხოს ეფესელთა 4:1-6. რა არის ამ მუხლების მთავარი აზრი ეკლესიის შესახებ?

პავლემ მოუწოდა მორწმუნეებს, რომ ყოფილიყვნენ ერთობაში. ერთიანობის მიზეზი ის არის, რომ არსებობს მხოლოდ ერთი ეკლესია, ისევე როგორც მხოლოდ ერთი ღმერთი და ერთი სახარებაა. ყველა ჭეშმარიტი ქრისტიანი ერთ სხეულში არიან. არსებობს ერთი ქრისტიანობა და ერთი ეკლესია, რადგან არსებობს ერთი ღმერთი.

ის ფაქტი, რომ არსებობს ერთი მსოფლიო ეკლესია ხაზგასმულია 1 კორინთელთა 12:13, სადაც პავლემ თქვა, რომ მორწმუნე წარმართები ყველანი ერთ სხეულად მოვინათლეთ.

რწმენის სიმბოლო (რწმენის აღმსარებლობის დოგმატები) არის ძირითადი ქრისტიანული შეხედულებების განცხადება. ადრეული ქრისტიანული რწმენის სიმბოლო სახელწოდებით "მოციქულთა მრწამსი" მოიცავდა განცხადებას "მე მჯერა კათოლიკე ეკლესიის". სიტყვა კათოლიკე, რწმენის სიმბოლოში არ აღნიშნავდა რომის კათოლიკურ ეკლესიას. ის ნიშნავს "მსოფლიო" ან "სრულს". რწმენის სიმბოლო ამბობდა, რომ არსებობს ერთი ეკლესია, რომელიც ყველგან ქრისტიანებით არის წარმოდგენილი.

► სტუდენტმა უნდა წაიკითხოს ეფესელთა 2:20.

ეკლესია აშენებულია ერთ საძირკველზე: მოციქულთა და წინასწარმეტყველთა მიერ გაცხადებული მსახურება და ჭეშმარიტება; და იესო ქრისტეს მსახურება, ქადაგება, გამოსყიდვა და მუდმივი სიცოცხლე. არსებობს ერთი საძირკველი და ერთი ეკლესია.

ჩინეთში არსებობს რელიგია სახელად აღმოსავლური ელვა. მათ სწამთ, რომ იესოს საქმე დასრულებულია და რომ ღმერთმა თანამედროვეობისათვის გამოგზავნა ახალი მესია. ახალი მესია არის ჩინელი ქალი, რომელიც ასწავლის ახალ დოქტრინებს.

► რას უპასუხებდით აღმოსავლური ელვის რელიგიის მიმდევარს?

საყოველთაო ეკლესიის ერთიანობა არ ნიშნავს იმას, რომ ერთი ორგანიზაცია არის მთელი ეკლესია. ვერცერთი ორგანიზაცია ახლოსაც ვერ მივა ღვთის განზრახვის შესრულებასთან ეკლესიისთვის მთელს მსოფლიოში. იესომ თავის მოციქულებს უთხრა, რომ არ ეფიქრათ, თითქოს ყველა ქრისტიანი ერთ ორგანიზაციაში იქნებოდა (მარკოზი 9:38-39).

რომის კათოლიკური ეკლესია აცხადებს, რომ არის ღვთის სრული ეკლესია. მორმონები და იეჰოვას მოწმეებიც იმავეს ამტკიცებენ.

► რას ეტყოდით ადამიანს, რომელიც ირწმუნება, რომ მისი ორგანიზაცია არის ღმერთის სრული ეკლესია დედამიწაზე?

ადგილობრივმა ეკლესიამ არ უნდა მისცეს თავს უფლება დამოუკიდებლად განავითაროს დოქტრინა. ერთ ადგილზე პავლე იძლევა მითითებებს, შემდეგ თქვა, რომ ეს ასეა "ღვთის ყველა ეკლესიაში" (1 კორინთელთა 11:16). მან უთხრა ეკლესიას, რომ მათ უნდა მიეღოთ გარკვეული მსახურები, რადგან ისინი წარმოადგენდნენ სხვა ეკლესიებს (2 კორინთელთა 8:23-24). ის აშკარად გულისხმობდა იმას, რომ ეკლესიის მიერ ყველა სხვა ეკლესიისგან განსხვავებული დოქტრინების დაცვა არასწორი იქნებოდა.

კორინთოს ეკლესია სულიერი ნიჭებით იყო ნაკურთხი. მათ დაიწყეს საკუთარი თავის დამოუკიდებლად მიჩნევა, რომლებსაც არ სჭირდებოდათ სხვისი მოსმენა. პავლემ შეუსწორა მათ აზროვნება და ქმედებები და შეახსენა, რომ ისინი არ იყვნენ ღვთის სიტყვის წყარო; ის მოვიდა მათთან სხვებისგან და არ მისულა მხოლოდ მათთან (1 კორინთელთა 14:36). მან განაგრძო, რათა ეთქვა, რომ ვინც მათ ეკლესიაში იყო სულიერად მგრძნობიარე და გამჭრიახი, აღიარებდა პავლეს მითითებებს, როგორც ღვთის მიერ შთაგონებულს.

ადგილობრივი ეკლესია უნდა იყოს თვითმმართველი და თვით უზრუნველმყოფელი; მაგრამ მას სჭირდება ურთიერთობა მსოფლიო ეკლესიასთან დოქტრინალური სტაბილურობისთვის და სასწავლო რესურსებისა და მსოფლიო მისიის პერსპექტივისათვის.

დღეს არსებობს მრავალი სახის ეკლესია და მრავალფეროვანი მოძღვრებები, მიუხედავად იმისა, რომ ისინი ამტკიცებენ, რომ ბიბლიას მისდევენ. ეკლესიის ანგარიშვალდებულება მსოფლიო ეკლესიის წინაშე არ ნიშნავს იმას, რომ ის უნდა ეცადოს იყოს მის გარშემო არსებული ყველა სხვა ეკლესიის მსაგვსი. ის უნდა იცავდეს ქრისტიანულ მოძღვრებებს, რომლებიც მნიშვნელოვანი იყო ახალი აღთქმის ეკლესიის დასაწყისში. ის ასევე უნდა იყოს იმ ეკლესიათა ასოციაციის ნაწილი, რომლებიც ანგარიშვალდებულნი არიან ერთმანეთის წინაშე.

დოქტრინალური სტაბილურობისთვის ადგილობრივ ეკლესიას უნდა ჰქონდეს სამი რამ:

1. დარწმუნებულობა, რომ ბიბლია არის აბსოლუტური ავტორიტეტი

2. ისტორიული ქრისტიანობის ძირითადი დოქტრინები

3. კარგი თეოლოგიის მქონე ეკლესიების გაერთიანებაში მოზიარეობა

ამ გაკვეთილზე ჩვენ ვსწავლობთ სიის მეორე პუნქტს. ეკლესიის გაერთიანებებზე სხვა გაკვეთილზე ვისაუბრებთ.

ადგილობრივმა ეკლესიამ არ უნდა მისცეს თავს უფლება მიიღოს მოძღვრებები, რომლებიც ეწინააღმდეგება ადრეული ეკლესიის ძირითად ქრისტიანულ დოქტრინებს. ეს დოქტრინები განსაზღვრულია ადრეულ რწმენის სიმბოლოებში. მოციქულთა მრწამსი, ნიკეისა და ქალკედონიის რწმენის სიმბოლო აცხადებს მოძღვრებებს, რომლებიც ქრისტიანობისათვის არსებითი იყო თავიდანვე. მათ შორისაა სამების დოქტრინები და მოძღვრებები ქრისტეს და სულიწმიდის ღვთაებრიობის შესახებ. თუ ეკლესია უარყოფს ამ მრწამსის (სიმბოლოების) დოქტრინებს, ის არ უნდა უწოდებდეს თავს ქრისტიანულს, რადგან ეს სხვა რელიგიაა.

„მწამს მამა ღმერთი, ყოვლისშემძლე, შემომქმედი ცისა და მიწისა და ყოველი ხილულისა და უხილავისა.

და ერთი უფალი იესო ქრისტე, მხოლოდშობილი ძე ღვთისა; მხოლოდშობილი მამისაგან საუკუნეთა უწინ, ღმერთი ღმერთისგან, სინათლე სინათლისგან, ჭეშმარიტი ღმერთი ჭეშმარიტი ღმერთისგან, დაბადებული არა შექმნილი; მამასთან თანაარსი; ვისგანაც წარმოიშვა ყოველივე; ვინც ჩვენთვის და ჩვენი ხსნისათვის ჩამოვიდა ზეციდან, ხორცი შეისხა სულიწმიდისაგან და ქალწულ მარიამისაგან და გახდა კაცი; პონტოელი პილატეს დროს იქნა ჯვარცმული ჩვენი გულისათვის; იტანჯა და დამარხული იქნა; მესამე დღეს ის აღდგა წერილის მიხედვით; და ამაღლდა ზეცაში; ის ზის მამის მარჯვნივ; და მოვა კვლავ დიდებით, რათა გაასამართლოს ცოცხლები და მკვდრები; მის მეფობას არ ექნება დასასრული.

და მწამს სულიწმიდა, უფალი მაცოცხლებელი, გამომავალი მამისაგან და ძისაგან; მამასთან და ძესთან ერთად ის ღირსია თაყვანისცემისა და ქება-დიდებისა; ის ლაპარაკობს წინასწარმეტყველების მეშვეობით; და მწამს მხოლოდ ერთი წმიდა, კათოლიკე, სამოციქულო ეკლესია; ვაღიარებ ერთ ნათლობას ცოდვების მისატევებლად; ველოდები მკვდრეთით აღდგომას და საუკუნო სიცოცხლის დადგომას. ამინ.

რა მოხდება, თუ ადამიანი გადაწყვეტს, რომ ის არ ეთანხმება ნიკეის რწმენის სიმბოლოს ერთ -ერთ დებულებას? იმის გამო, რომ ეკლესია ამ დოქტრინებს თავიდანვე იცავდა, თუ ის უარყოფს მათ, ის ამით აცხადებს, რომ აქვს ჭეშმარიტების აღქმა, რომელიც ეკლესიას არ ჰქონია 2000 წლის განმავლობაში. თუ ეკლესია ან ინდივიდი არ იცავს მოციქულთა მრწამსის, ნიკეისა და ქალკედონიის რწმენის სიმბოლოების მოძღვრებებს, მისი დოქტრინა არ უნდა იყოს სანდოდ მიჩნეული. რწმენის სიმბოლოების მოძღვრება მხარს უჭერს სახარებას. თუ ადამიანი უარყოფს რწმენის სიმბოლოების მოძღვრებას, ის შეიძლება ეწინააღმდეგებოდეს სახარებას.

► რას ეტყოდით ადამიანს, ვინც ამბობს, რომ ის ქრისტიანია, მაგრამ არ ეთანხმება ნიკეის რწმენის სიმბოლოს დებულებებს?

1. ადგილობრივი ეკლესია არის მორწმუნეთა ჯგუფი, რომლებიც ერთად იღებენ ვალდებულებას იყვნენ ეკლესია კონკრეტულ ადგილას.

2. ეკლესია ქვეყნიერებას აჩვენებს ღვთის ბუნებას.

3. სულიწმიდის სიცოცხლე არის ეკლესიის სიცოცხლე და ერთიანობა.

4. ეკლესიის წევრობა ემყარება ღმერთთან ურთიერთობას და მორწმუნეთა ჯგუფისადმი ერთგულებას.

5. არსებობს ერთი მსოფლიო ეკლესია ერთი ქრისტიანობის მიმდევარი, რადგან ეკლესია ერთ ღმერთს ეკუთვნის.

6. არცერთი ადამიანური ორგანიზაცია არ წარმოადგენს ღვთის მთელს ეკლესიას დედამიწაზე.

7. ადგილობრივ ეკლესიას უნდა ჰქონდეს მსოფლიო ეკლესიის ძირითადი, ისტორიული დოქტრინები.

1. დაიმახსოვრეთ 1-ლი გაკვეთილის შვიდი შემაჯამებელი დებულება. დაწერეთ ერთი აბზაცი, რომელიც განუმარტავს შვიდი შემაჯამებელი განცხადებიდან თითოეულის აზრს და მნიშვნელობას (სულ შვიდი აბზაცი) ვინმეს, ვინც არ არის ამ კლასის სტუდენტი. ჩააბარეთ ის კლასის ხელმძღვანელს შემდეგი გაკვეთილის დაწყებამდე. მზად იყავით გაუზიაროთ თქვენი აბზაცი ჯგუფს, თუ კლასის ხელმძღვანელი ამას გთხოვთ დისკუსიის დროს. ჩამოწერეთ ზეპირად ნასწავლი შვიდი შემაჯამებელი დებულება.

2. ამ კურსის განმავლობაში, თქვენ უნდა ასწავლოთ გაკვეთილი, ან გაკვეთილის ნაწილი ინდივიდს ან ჯგუფს, რომელიც არ წარმოადგენს კლასის ნაწილს. თქვენ შეგიძლიათ აირჩიოთ რომელი მასალა ასწავლოთ. თქვენ უნდა გააკეთოთ ეს სამჯერ, სხვადასხვა მასალის გამოყენებით. დაგეგმეთ თქვენი სწავლების შესაძლებლობები და შეატყობინეთ კლასის ხელმძღვანელს, როდესაც ასწავლით.