اس سبق کے اختتام تک، طالبعلم کو چاہیے کہ وہ:

(1) محبت کے پانچ اندازِ بیان کو سمجھے۔

(2) محبت کے ہر اندازِ بیان کے غلط استعمال یا نظرانداز کرنے کے خطرات پر گفتگو کرے۔

(3) اس بات کی وضاحت کرے کہ ایک بچے کا جذباتی ٹینک بھرا ہونے کے کیا فوائد ہیں۔

(4) اپنے قریبی گھرانے کے افراد کی بنیادی محبت کے اندازِ بیان کی نشاندہی کرے۔

(5) ہر محبت کے اندازِ بیان کے مطابق خاندان کے افراد سے محبت کے اظہار کے مخصوص طریقے بیان کرے۔

(6) اپنے گھرانے کے افراد سے ان کی بنیادی محبت کے اندازِ بیان میں محبت کے اظہار کا عہد کرے۔

پچھلے سبق میں، ہم نے خود کو پیش کرنے پر مبنی اور غیر مشروط محبت کے بارے میں سیکھا۔ ہم نے یہ بھی جانا کہ محبت کے اظہار کے کم از کم پانچ مختلف اندازِ بیان ہیں۔ زیادہ تر لوگ فطری طور پر ان میں سے ایک یا دو طریقوں کے ذریعے محبت کو پہچانتے اور ظاہر کرتے ہیں۔

ہم نے تصدیقی الفاظ پر گفتگو کی اور سیکھا کہ ہم اپنے گھرانے کے افراد سے محبت کے اظہار کے لیے ان کا عملی استعمال کیسے کر سکتے ہیں۔ اس سبق میں، ہم محبت کے باقی چار اندازِ بیان کے بارے میں سیکھیں گے اور پھر خاص طور پر بچوں سے محبت کے اظہار کے عملی طریقوں پر غور کریں گے۔

جن لوگوں کی محبت کا بنیادی اندازِ بیان معیاری وقت ہوتا ہے، وہ اس وقت سب سے زیادہ محبت محسوس کرتے ہیں جب دوسرے لوگ شعوری طور پر ان کے ساتھ وقت گزارنے کے لیے وقت مخصوص کرتے ہیں۔ یہ وقت خاص طور پر ایک ساتھ رہنے، ایک دوسرے پر توجہ دینے اور لطف اندوز ہونے کے لیے رکھا جاتا ہے۔

معیاری وقت اتفاقی یا اضافی نہیں ہوتا۔ اگر آپ ٹریفک میں پھنس گئے ہیں یا کسی ملاقات کے انتظار میں ہیں، تو اس وقت کا دانشمندی سے استعمال کرنا اچھا ہے، لیکن عام طور پر یہ وہی معیاری وقت نہیں ہوتا جو کسی کے لیے خاص طور پر رکھا گیا ہو۔ آپ کا شریکِ حیات یا بچہ آپ کے ساتھ کسی منصوبے پر کام کر سکتا ہے، جو قیمتی ہے، لیکن یہ ضروری نہیں کہ وہ وقت ہمیشہ معیاری وقت کی ضرورت کو پورا کرے۔

بغیر کسی خلل کے گفتگو معیاری وقت کی بہترین صورتوں میں سے ایک ہے۔ ایسی گفتگو میں ہر شخص پوری توجہ سے دوسرے کو سنتا ہے۔ ہر فرد پیغامات اور فون کالز جیسی رکاوٹوں کو نظر انداز کرتا ہے تاکہ وہ دوسرے فرد اور گفتگو پر مکمل توجہ دے سکے۔

یہاں کچھ اور طریقے دیے گئے ہیں جن کے ذریعے آپ ظاہر کر سکتے ہیں کہ آپ توجہ سے سن رہے ہیں:

1. آنکھوں میں آنکھیں ڈال کر بات کریں۔

2. فعال انداز میں سنیں۔ اس بات پر ردعمل دیں جو دوسرا شخص کہہ رہا ہے۔ صرف یہ نہ سوچیں کہ آپ آگے کیا کہنا چاہتے ہیں، بلکہ یہ سمجھنے کی کوشش کریں کہ دوسرا شخص کیا سوچ اور محسوس کر رہا ہے۔ آپ اپنی سمجھ کی تصدیق اس طرح کر سکتے ہیں:" اگر میں صحیح سن رہا ہوں، تو آپ یہ محسوس کر رہے ہیں کہ..."

3. بات کاٹنے سے گریز کریں۔ اکثر سننے والا سمجھتا ہے کہ وہ بات کو مکمل طور پر سمجھ چکا ہے اور جلدی سے اپنی رائے دینے کے لیے بول پڑتا ہے، لیکن اس سے بولنے والے کو محسوس ہوتا ہے کہ سننے والے نے پوری توجہ سے بات نہیں سنی۔

4. صرف الفاظ پر نہیں، جذبات پر بھی دھیان دیں۔ جب ہم کسی دوسرے شخص کے نقطۂ نظر کو سمجھنے کی کوشش کرتے ہیں، تو ہم یہ ظاہر کرتے ہیں کہ ہم ان کی قدر کرتے ہیں۔ دل سے سننے کا مطلب ہے کہ ہم ان کے خیالات اور جذبات کو اہمیت دیتے ہیں، اور اس کے ذریعے ہم انہیں بتاتے ہیں کہ وہ خود بھی ہمارے لیے اہم ہیں۔

معیاری وقت کا سب سے بہترین انداز وہ ہے جب آپ صرف ایک دوسرے سے بات کر رہے ہوں، لیکن ایک ساتھ گزارا جانے والا وقت دیگر صورتوں میں بھی قیمتی ہو سکتا ہے۔ مثال کے طور پر، گھرانے کے افراد روزانہ کھانے کے وقت ایک ساتھ بیٹھ کر، ایک دوسرے پر توجہ مرکوز کرتے ہوئے معیاری وقت گزار سکتے ہیں۔

چھوٹے بچوں کو کہانیاں سنانا، ایک ساتھ کھیلنا، یا تفریحی سرگرمیاں کرنا بھی معیاری وقت گزارنے کے طریقے ہیں۔ اگر کوئی سرگرمی محض لطف کے لیے ہو، نہ کہ سکول، کام یا خدمت کے لیے، تو یہ بھی معیاری وقت کے زمرے میں آتی ہے۔

اگر کوئی فرد گھرانے سے دور ہو، تو فون پر بات کرکے بھی معیاری وقت گزارا جا سکتا ہے۔

معیاری وقت کا مطلب ہے ایک دوسرے پر توجہ مرکوز کرنے اور ایک ساتھ وقت گزارنے کے لیے خاص طور پر مخصوص، بے خلل اور اطمینان بخش وقت نکالنا۔ ہر روز اپنے شریکِ حیات اور بچوں کے ساتھ کچھ معیاری وقت گزارنے کے لیے وقت مختص کرنا بہترین عمل ہے۔

جب وقت مخصوص نہ کیا جائے

جب کوئی شوہر یا والد خدمت میں رہنمائی کا کردار ادا کرتا ہے، تو خاندان کے ساتھ معیاری وقت مخصوص کرنا خاص طور پر مشکل ہو سکتا ہے۔ اکثر پادریوں کے بچے یہ محسوس کرتے ہیں کہ کوئی بھی شخص فون کر کے ان کے والد کی توجہ حاصل کر سکتا ہے، لیکن وہ ان کے لیے وقت نکالنے میں مصروف رہتے ہیں۔ ایسا لگتا ہے کہ خاندان کے ساتھ وقت گزارنا اکثر خدمت کی خاطر قربان کر دیا جاتا ہے۔

خدمت میں رہنے والے افراد کے لیے خلل سے مکمل طور پر بچنا ممکن نہیں ہوتا، لیکن انہیں پھر بھی اپنے خاندان کے لیے وقت مخصوص کرنے کی کوشش کرنی چاہیے۔ اگر وہ ایسا کریں گے، تو ان کا خاندان ان کی روزمرہ کی ذمہ داریوں اور ناگزیر رکاوٹوں کو بہتر طریقے سے سمجھ سکے گا۔

جس شخص کی محبت کا بنیادی اندازِ بیان معیاری وقت ہو، اسے سب سے زیادہ تکلیف اس وقت ہوتی ہے جب اسے اپنے خاندان کے ساتھ بامقصد اور توجہ سے بھرپور وقت نہیں ملتا۔ وہ تب سب سے زیادہ دکھی محسوس کرتا ہے جب اس کے ساتھ گزارے جانے والے معیاری وقت کو ترجیح نہیں دی جاتی، اور جب یہ وقت کسی مداخلت کی وجہ سے ترک کر دیا جاتا ہے۔ اگر اس کا خاندان اس کے ساتھ وقت گزارنے کے لیے زیادہ مصروف ہو، تو وہ خود کو کم قدر والا محسوس کرتا ہے، خاص طور پر جب اس کے اہلِ خانہ اسے پوری توجہ سے نہ سنیں۔

اگر آپ اپنے شریکِ حیات یا بچوں کو ذاتی توجہ نہیں دے رہے، تو وہ آپ کی محبت کو محسوس نہیں کر سکیں گے، چاہے آپ ان کے لیے بہت کچھ کر رہے ہوں۔ ایک شخص اپنے خاندان کے لیے محنت کر رہا ہو، پھر بھی اس کی بیوی یہ محسوس کر سکتی ہے کہ وہ اس سے محبت نہیں کرتا کیونکہ وہ اس کے ساتھ وقت گزارنے کے لیے دستیاب نہیں ہوتا۔

ایک چھوٹا لڑکا اپنے والد کے پاس آیا تاکہ اسے ایک کہانی سنائے جو اس نے حال ہی میں سنی تھی۔ والد کتاب پڑھ رہے تھے، انہوں نے ایک لمحے کے لیے سننے کے لیے توقف کیا، لیکن پھر کتاب پڑھنے میں مشغول ہو گئے، حالانکہ ان کا بیٹا ابھی اپنی کہانی کے بیچ میں تھا۔ اس لمحے میں جو احساس اس بچے کو ہوا، وہ زندگی بھر اس کے ذہن میں رہا۔

◄ آپ کے خاندان کے لیے معیاری وقت (کوالٹی ٹائم) عام طور پر کیسا ہوتا ہے؟ بامقصد وقت اکٹھے گزارنے کے لیے آپ کو کن مشکلات پر قابو پانا پڑتا ہے؟

جن لوگوں کا بنیادی اندازِ بیان تحفے وصول کرنا ہوتا ہے، وہ اس وقت سب سے زیادہ محبت محسوس کرتے ہیں جب دوسرے انہیں ایسا تحفہ دیتے ہیں جو ظاہر کرے کہ وہ ان کے بارے میں سوچ رہے تھے۔

ایسے تحفے جو کسی کو محبت کا احساس دلاتے ہیں، وہ وہی ہوتے ہیں جو سوچ سمجھ کر دیے جاتے ہیں۔ انہیں وصول کرنے والے کی دلچسپیوں کو مدنظر رکھ کر چُنا جاتا ہے۔ وہ ضروری نہیں کہ عملی یا لازمی ہوں۔ محبت کے تحفے وہ نہیں ہوتے جو صرف اس وجہ سے دیے جائیں کہ دینے والے کو ان کی ضرورت نہیں تھی۔ تحائف کو سوچ بچار کے ساتھ منتخب کرنا یا خود تیار کرنا چاہیے۔

کوئی تحفہ مہنگا ہونا ضروری نہیں تاکہ وہ کسی کو محبت کا احساس دلائے۔ یہ ایک لمحے کی خوشی بھی ہو سکتا ہے، جیسے کوئی خاص کھانے کی چیز یا مٹھائی، یا یہ کوئی ایسی چیز ہو سکتی ہے جو لمبے عرصے تک قائم رہے اور تحفہ دینے والے کے ساتھ تعلق کی یاد دلاتی رہے۔ جن لوگوں کا بنیادی اندازِ بیان تحائف ہوتے ہیں، ان کے لیے سالگرہ، شادی کی سالگرہ، اور دیگر تہوار بہت اہمیت رکھتے ہیں۔ ایسے افراد کے لیے ان دنوں پر خاص طور پر تحفے کا دیا جانا نہایت ضروری ہوتا ہے۔ اگر انہیں ان خاص دنوں پر تحفہ نہ ملے، تو یہ ان کے لیے خاص تکلیف دہ ہو سکتا ہے۔

لیکن تحفے دینا صرف خاص مواقع تک محدود نہیں ہونا چاہیے؛ یہ ایک جاری رہنے والی عادت ہونی چاہیے۔ جس شخص کے شریکِ حیات، والدین، یا بچے کا بنیادی اندازِ بیان تحائف ہوں، انہیں مستقل طور پر ایسے تحائف تلاش کرنے کی عادت ڈالنی چاہیے جو ان کے پیارے کو یہ یاد دلائیں کہ وہ ان کے خیال میں رہتے ہیں اور ان سے محبت کی جاتی ہے۔

اگر کسی بیوی کا بنیادی اندازِ بیان تحائف ہو، تو وہ خود کو بہت غیرمحبوب محسوس کر سکتی ہے اگر اسے لگے کہ اس کا شوہر صرف پیسے بچانے کے لیے ایسا تحفہ دے رہا ہے جو پہلے سے ضروری تھا۔ مثال کے طور پر، اگر اسے نئے جھاڑو کی ضرورت ہو اور اس کا شوہر اسے تحفے کے طور پر نیا جھاڑو لا کر دے، تو یہ اس کے لیے مفید تو ہو سکتا ہے، لیکن اسے یہ تحفہ محبت کا اظہار محسوس نہیں ہوگا۔

تحائف اس وقت اہمیت رکھتے ہیں جب وہ ظاہر کریں کہ دینے والے نے لینے والے کی پسند اور جذبات کا خیال رکھا۔ وہ تب معنی خیز ہوتے ہیں جب وہ لازمی نہ ہوں بلکہ ان میں سوچ، محنت، اور قیمت شامل ہو۔

وہ بچے جن کا بنیادی اندازِ بیان تحفے وصول کرنا ہو، وہ اس وقت زیادہ محبت محسوس کرتے ہیں جب ان کے والد ان کے لیے آئس کریم خرید کر لاتے ہیں، بجائے اس کے کہ وہ ان کی اسکول فیس ادا کریں—حالانکہ اسکول کی فیس زیادہ مہنگی اور زیادہ اہم ہے۔ بجائے اس کے کہ آپ توقع کریں کہ آپ کے اہلِ خانہ آپ کی روزمرہ کی فراہم کردہ چیزوں کی قدر کریں، آپ کو ایسی چیزوں کے ذریعے محبت ظاہر کرنے کے طریقے تلاش کرنے چاہییں جو ان کے لیے خاص ہوں۔

بعض لوگ اپنے بچوں یا شریکِ حیات کو ہر چیز کے لیے ترسانے کی عادت رکھتے ہیں۔ جو شخص کفایت شعار ہو اور خود پر خرچ نہ کرتا ہو، وہ غیر ضروری لگنے والے تحائف دینے میں ہچکچاہٹ محسوس کر سکتا ہے۔ اسے ڈر ہوتا ہے کہ اگر وہ تحائف دینے لگے تو اس کے اہلِ خانہ اس سے تحائف کی توقع کرنے لگیں گے۔ لیکن اگر اس کے کسی قریبی عزیز کا بنیادی اندازِ بیان تحائف ہو، تو اسے اپنی فطری عادت پر قابو پانے کی کوشش کرنی چاہیے۔ اسے تحائف کو اپنے پیاروں کی نظر سے دیکھنا چاہیے—جیسا کہ وہ انہیں دیکھتے ہیں: ایک اہم اور قیمتی چیز کے طور پر۔ جب تحائف دیں، تو خوش دلی اور فراخ دلی سے دیں!

◄ ایک شاگرد کو 2 کرنتھیوں 9: 6-9 جماعت کے لیے پڑھنا چاہیے ۔ اس حوالے میں پولُس کرنتھیوں کے ایمانداروں کو ترغیب دے رہا ہے کہ وہ اپنے ضرورت مند بھائیوں کے لیے فراخ دلی سےہدیے دیں۔ ان آیات میں سخاوت کے چار یا پانچ بنیادی محرکات تلاش کریں۔ اس حوالے میں موجود اصولوں کا اطلاق ہمارے خاندان میں سخاوت پر کس طرح ہوتا ہے؟

◄ آپ کے خاندان میں تحائف دینے کی کیا اہمیت ہے؟ کیا آپ کو محبت کے اظہار کے لیے تحائف دینے میں کوئی دشواری پیش آتی ہے؟ اگر ہاں، تو وہ مشکلات کیا ہیں، اور آپ انہیں کیسے حل کر سکتے ہیں؟

جن لوگوں کا بنیادی محبت کا اندازِ بیان خدمت کے کام ہوتا ہے، وہ اس وقت سب سے زیادہ محبت محسوس کرتے ہیں جب دوسرے ان کے لیے کچھ کرتے ہیں۔

خدمت کے کام عملی ضروریات کو پورا کرتے ہیں۔ یہ ضروری نہیں کہ وہ ایسے کام ہوں جو وہ خود نہیں کر سکتے تھے۔ یہ کسی کے لیے پانی لانے جتنا سادہ کام بھی ہو سکتا ہے، یا کسی بیمار کی دیکھ بھال کرنا بھی۔ یہ کسی مشکل وقت میں مدد فراہم کرنا بھی ہو سکتا ہے۔

زیادہ تر خاندانوں میں ایسے لمبے عرصے آتے ہیں جب کوئی ایک فرد مسلسل ذاتی دیکھ بھال کا محتاج ہوتا ہے۔ خاندان کے افراد اپنی محبت اور وابستگی کی وجہ سے اس کی مسلسل خدمت کرتے ہیں۔ لیکن اگرچہ خدمت میں بہت سا وقت صرف ہو رہا ہوتا ہے، پھر بھی خاندان کے افراد کو یاد رکھنا چاہیے کہ وہ محبت کے دوسرے، زیادہ مؤثر طریقوں سے بھی اس کا اظہار کریں، خاص طور پر اگر اس شخص کا بنیادی اندازِ بیان خدمت کے کام نہ ہو۔

کچھ خدمات روزمرہ کے معمول کا حصہ ہوتی ہیں اور ان کا ادراک نہیں ہوتا یا انہیں نظرانداز کر دیا جاتا ہے۔ بہت سی خواتین اپنی روزمرہ کی کھانے پکانے اور گھر کی دیکھ بھال کے ذریعے محبت کا اظہار کر رہی ہوتی ہیں۔ اسی طرح ایک مرد اپنے خاندان کی ضروریات پوری کرنے کے لیے کام کر رہا ہوتا ہے۔ اگر آپ پہلے ہی اپنے گھر والوں کی خدمت کر رہے ہیں، تو آپ کو پھر بھی ایسے خاص مواقع تلاش کرنے چاہییں جب آپ خاندان کے اس فرد کے لیے خدمت کر سکیں جس کا بنیادی اندازِ بیان یہی ہے۔

اگر بیوی اپنے شوہر کی چھوٹی ضرورتوں کا خیال نہیں رکھتی، تو وہ خدمت کے ذریعے محبت کا اظہار کرنے میں ناکام ہو رہی ہے۔ شاید وہ سوچے، "وہ خود بھی پانی لے سکتا ہے۔" لیکن اگر وہ اس کے لیے پانی لائے، تو یہ محبت کا خاص اظہار ہوگا۔

اسی طرح شوہر کو بھی اپنی بیوی کا خیال رکھنا چاہیے۔ جب وہ اپنی بیوی کو آرام دینے کے لیے کوئی ایسا کام کر دیتا ہے جو وہ روز کرتی ہے، تو وہ اس کی محنت کی قدر اور اس کے کام کی اہمیت کو تسلیم کر رہا ہوتا ہے۔

ایک شوہر یہ محسوس کر سکتا ہے کہ وہ پہلے ہی کافی محنت کرتا ہے اور گھر کے تمام کام کاج کرنا اس کی بیوی کی ذمہ داری ہے۔ وہ یہاں تک سوچ سکتا ہے کہ اسے پہلے سے زیادہ مؤثر طریقے سے کام کرنا چاہیے۔ اگر وہ یہ فرض کر لے کہ گھریلو کام اس کی عزت کے خلاف ہیں، تو اس کا مطلب ہے کہ وہ عورتوں کو کمتر سمجھتا ہے اور انہیں کم درجے کے کاموں کے لائق سمجھتا ہے۔ لیکن حقیقت یہ ہے کہ عورتیں کمتر نہیں ہیں، اور گھریلو کام کسی بھی طرح باہر کے کاموں سے کم تر نہیں۔۔

ایک مرد یہ محسوس کر سکتا ہے کہ گھر کے کاموں میں مدد کرکے وہ خادم کا کردار اپنا رہا ہے (اپنی بیوی سے کم درجے پر آ رہا ہے)، لیکن یہ حقیقت نہیں ہے۔ اگر وہ خود سے مدد کرنے کا فیصلہ کرتا ہے، تو وہ نہ صرف اس کام کی اہمیت کو ظاہر کرتا ہے بلکہ اس شخص کی قدر بھی کرتا ہے جس کی وہ مدد کر رہا ہے۔ اس کی خدمت اُس فرد کے احترام کو بڑھاتی ہے جو عام طور پر یہ کام انجام دیتا ہے اور اس کے لیے قدردانی کا اظہار کرتی ہے۔ اس کی بیوی اسے ایک خادم کے طور پر نہیں بلکہ ایک زیادہ قابلِ احترام شخص کے طور پر دیکھے گی۔

اگر لوگ ناگواری اور مجبوری کے ساتھ مدد کرتے ہیں، تو اس سے ظاہر ہوتا ہے کہ وہ زبردستی مدد کر رہے ہیں۔ ان کی خدمت کا یہ عمل محبت کا اظہار نہیں کرتا۔ لیکن اگر وہ خوش دلی سے خدمت کرتے ہیں اور اپنی پوری کوشش صرف کرتے ہیں، تو یہ ظاہر کرتا ہے کہ وہ اپنی مرضی سے خدمت کر رہے ہیں، کیونکہ کوئی انہیں اس طرح خدمت کرنے پر مجبور نہیں کر سکتا۔ یہ خوش دلی سے کی گئی خدمت ان کی محبت کو واضح طور پر ظاہر کرتی ہے اور ان کے پیاروں کی نظر میں ان کی عزت میں اضافہ کرتی ہے۔

◄ آپ کے لیے سب سے مشکل وقت کون سا ہوتا ہے جب آپ کو اپنے خاندان کی خدمت کرنا پڑتی ہے؟ جب آپ خدمت کو محبت کے اظہار کے طور پر دیکھتے ہیں، تو آپ کی سوچ میں کیا تبدیلی آتی ہے؟

وہ لوگ جن کا بنیادی محبت کا انداز بیان جسمانی لمس ہے، وہ خود کو سب سے زیادہ تب پیار کیا ہوا محسوس کرتے ہیں جب ان کے خاندان کے افراد انہیں محبت سے چھوتے ہیں۔

محبت کے اظہار کے مختلف طریقے جسمانی لمس کے ذریعے کیے جا سکتے ہیں۔ کچھ مخصوص رشتوں اور حالات میں مناسب ہوتے ہیں، جبکہ دیگر رشتوں اور حالات میں نامناسب ہو سکتے ہیں۔ درج ذیل چند مثالیں ہیں:

• ایک دوسرے کو گلے لگانا

• کسی کے کندھے یا پیٹھ پر بازو رکھنا

• کسی کے کندھوں پر ہاتھ رکھنا

• کسی کی پیٹھ یا کندھے پر تھپکی دینا

• ساتھ بیٹھنا

• ایک دوسرے کا ہاتھ تھامنا

• ایک دوسرے کو بوسہ دینا

• پیٹھ یا کمر کو سہلانا

• بچے کو گود میں لینا

• بچے کے بالوں کو محبت سے سنوارنا یا سہلانا

• بیماری یا جسمانی کمزوری کی حالت میں نرمی اور محبت سے دیکھ بھال کرنا

جسمانی لمس اس وقت بھی خاص طور پر معنی خیز ثابت ہو سکتا ہے جب کوئی شخص مشکل وقت سے گزر رہا ہو۔ غم، تکلیف، تنہائی یا اداسی کے لمحات میں، گلے لگانا ان لوگوں کے لیے زیادہ اہم ہو سکتا ہے جن کا بنیادی محبت کا انداز بیان جسمانی لمس ہو، حتیٰ کہ الفاظ یا خدمت کے کسی عمل سے بھی زیادہ۔

جس شخص کا بنیادی محبت کا اندازِ بیان جسمانی لمس ہو، اس کے لیے ضروری ہے کہ محبت کا اظہار جسمانی طور پر جاری رکھا جائے، یہاں تک کہ بیماری کی حالت میں بھی، اگر ممکن ہو۔ یاد رکھیں کہ محبت غیر مشروط اور ایثار پر مبنی ہوتی ہے۔ لوقا 15: 20 میں باپ نے اپنے توبہ کرنے والے بیٹے کو گلے لگایا اور چُوما، حالانکہ وہ بدبو دار، گندا اور ہر لحاظ سے ناخوشگوار حالت میں تھا۔

محبت کے اندازِ بیان میں جسمانی لمس لازمی طور پر جنسی تعلق کے بارے میں نہیں ہے۔ جنسی سرگرمی جسمانی لمس کی ایک قسم ہے۔ چھونے اور چھوئے جانے کی خواہش جنسی تعلق کی صورت میں ظاہر ہو سکتی ہے، لیکن محض جنسی تعلق کسی ایسے شخص کے لیے کافی نہیں ہوگا جس کا بنیادی محبت کا اندازِ بیان جسمانی لمس ہو۔

جسمانی لمس کے ذریعے محبت محسوس کرنے کی خواہش کسی شخص کو غیر اخلاقی جنسی سرگرمی کی طرف مائل کر سکتی ہے۔ والدین کے لیے ضروری ہے کہ وہ اپنے بیٹوں اور بیٹیوں کو مناسب، غیر جنسی جسمانی لمس کے کافی اظہار دیں تاکہ ان کے بچوں کی جسمانی لمس کی ضروریات پوری ہوں۔ جو بچہ محبت محسوس کرتا ہے، وہ آزمائش کے خلاف مضبوطی سے کھڑا ہونے کی زیادہ ہمت رکھتا ہے۔

جسمانی لمس کے گناہ

جن لوگوں کا بنیادی محبت کا اندازِ بیان جسمانی لمس ہو، وہ جسمانی سختی سے خاص طور پر مجروح ہوتے ہیں۔ کسی پر غصے میں ہاتھ اٹھانا (گلتیوں 5: 20)، کسی کو ذلیل کرنے کے لیے اس کے چہرے پر تھپڑ مارنا (متی 5: 39)، یا اختیار کے غلط استعمال کے تحت کسی کو مارنا (متی 24: 48-49) گناہ ہے۔ ان آیات کی روشنی میں، ہم جانتے ہیں کہ والدین کو کبھی بھی اپنے بچوں کو تکلیف دینے یا غصے میں مارنے کا حق نہیں ہے۔ اسی طرح خدا کا حکم ہے کہ بچوں کے لیے بھی یہ گناہ ہے کہ وہ اپنے والدین پر ہاتھ اٹھائیں (خروج 21: 15)۔

والدین کی طرف سے نرمی اور ضبط کے ساتھ دی گئی مناسب جسمانی تنبیہ، جو درستگی اور راستبازی کی تعلیم کے مقصد سے ہو (کلسیوں 3: 21)، گناہ نہیں بلکہ خدا کا حکم ہے۔ یہ والدین کو اس قابل بناتا ہے کہ وہ اپنے بچوں کی روحوں کو تباہی سے بچا سکیں (امثال 13: 24، امثال 19: 18، امثال 29: 15، عبرانیوں 12: 5-7)۔

ہر قسم کی جنسی بے راہ روی اور بدسلوکی، بشمول محرمات سے تعلق (احبار 20: 11-12، 14)، ایک سنگین گناہ ہے۔

ہر شخص کو اپنے محبت کے اندازِ بیان کا مکمل شعور نہیں ہوتا۔ بعض اوقات، لوگ اس بات پر غور نہیں کرتے کہ وہ دوسروں سے محبت کے اظہار کے لیے سب سے زیادہ کون سا طریقہ اپناتے ہیں۔ اسی طرح، وہ اس چیز سے بھی ناواقف ہو سکتے ہیں جو دوسروں کی طرف سے انہیں سب سے زیادہ محبت کا احساس دلاتی ہے۔ لہٰذا، ضروری ہے کہ ہم اپنے محبت کے اندازِ بیان کو سمجھنے کے لیے کچھ وقت نکالیں۔

◄آپ سب سے زیادہ قدرتی طور پر اور عام طور پر کس محبت کے اندازِ بیان کے ذریعے دوسروں سے محبت کا اظہار کرتے ہیں؟

◄ آپ کے بنیادی اور ثانوی محبت کے اندازِ بیان کون سے ہیں؟ اگر آپ کو سمجھنے میں دشواری ہو رہی ہے کہ آپ کے لیے کون سا محبت کا اظہار سب سے زیادہ معنی رکھتا ہے، تو یہ سوالات مدد کر سکتے ہیں:

• کون سی چیزیں آپ کو خوشی دیتی ہیں؟

• آپ کی سب سے پسندیدہ یادیں کون سی ہیں؟

• آپ کس چیز کے بارے میں (خواہ خاموشی سے) شکایت کرتے ہیں؟

• آپ کو کس چیز سے سب سے زیادہ تکلیف پہنچتی ہے؟

ہر انسان کو محبت کے پانچوں اندازِ بیان کے ذریعے محبت کے اظہار کی ضرورت ہوتی ہے، لیکن بچوں کے لیے یہ خاص طور پر اہم ہے۔ جذباتی طور پر متوازن اور صحت مند بننے کے لیے، بچوں کو والدین کی طرف سے باقاعدگی اور مسلسل محبت کا احساس دلایا جانا چاہیے۔ جب والدین دن میں کئی بار اپنے بچوں کے ساتھ مختلف انداز میں محبت کا اظہار کرتے ہیں، تو یہ ان کے دلوں کی زمین پر رحمت کی ہلکی بارش کی مانند ہوتا ہے۔

یہ فرض نہ کریں کہ آپ کے بچے پہلے سے ہی جانتے ہیں یا محسوس کرتے ہیں کہ آپ ان سے محبت کرتے ہیں۔ انہیں یہ محبت بار بار اور مستقل مزاجی کے ساتھ دیکھنے اور محسوس کرنے کی ضرورت ہے، خاص طور پر ان کے بنیادی محبت کے اندازِ بیان میں۔

بچے کے بنیادی محبت کے اندازِ بیان کی پہچان

گیری چیپمین اورروز کیمپ بیل کے مطابق، والدین اپنے بچے کے بنیادی محبت کے اندازِ بیان کو پہچاننے کے لیے درج ذیل طریقے اپنا سکتے ہیں:[1]

1. مشاہدہ کریں کہ آپ کا بچہ آپ سے محبت کا اظہار کیسے کرتا ہے۔

2. دیکھیں کہ آپ کا بچہ دوسروں سے محبت کا اظہار کس طرح کرتا ہے۔

3. غور کریں کہ آپ کا بچہ سب سے زیادہ کس چیز کی فرمائش کرتا ہے۔

4. یہ دیکھیں کہ آپ کا بچہ کن چیزوں کے بارے میں سب سے زیادہ شکایت کرتا ہے۔

5. دو مختلف محبت کے اندازِ بیان میں سے کسی ایک کا انتخاب کرنے کا موقع دیں اور دیکھیں کہ بچہ کس کو زیادہ پسند کرتا ہے۔

پانچ سال سے کم عمر کے بچوں کے محبت کے بنیادی اندازِ بیان کی شناخت کرنا مشکل ہو سکتا ہے۔

بچوں کے لیے محبت کے اندازِ بیان پر خصوصی نوٹس

ہم یہاں ہر محبت کے اندازِ بیان کی تفصیل میں نہیں جائیں گے کیونکہ ان پر پہلے ہی بات ہو چکی ہے۔ اس کے بجائے، ہم بچوں سے محبت کے اظہار کے چند خاص پہلوؤں اور طریقوں کا ذکر کریں گے۔

الفاظِ تصدیق

اگرچہ بعض اوقات کسی ایسے شخص کو الفاظ میں تعریف دینا مشکل محسوس ہو سکتا ہے جو زیادہ تر غلطیاں کرتا ہو یا جس کی کارکردگی اچھی نہ ہو، لیکن اگر آپ کسی مثبت بات کو تلاش کر کے اس کی تعریف کریں تو یہ بچے کے لیے بڑی حوصلہ افزائی کا سبب بنے گا اور وہ زیادہ بہتر بننے کی کوشش کرے گا۔

معیاری وقت

یہ بہت فائدہ مند ہے کہ خاندان کے افراد دن میں کم از کم ایک کھانے پر اکٹھے بیٹھیں اور اس وقت ایک دوسرے کے ساتھ گفتگو پر توجہ دیں۔

ایسے خاندانوں میں جہاں بہت سارے بچے ہوں، کسی ایک بچے کے ساتھ معیاری وقت گزارنا آسانی سے نظرانداز ہو سکتا ہے۔ تاہم، مخصوص وقت نکال کر کسی ایک بچے کے ساتھ کچھ خاص کرنا انہیں یہ محسوس کرنے میں مدد دے گا کہ آپ ان سے محبت کرتے ہیں۔ تنہائی میں گزارا گیا وقت انہیں ایک محفوظ موقع فراہم کرتا ہے کہ وہ اپنے ذاتی خیالات کا اظہار کر سکیں، جو وہ اپنے بہن بھائیوں یا دیگر خاندان کے افراد کے سامنے شیئر کرنے میں ہچکچاتے ہوں۔

اکثر اوقات، بچے اچانک اپنے والدین میں سے کسی ایک کے ساتھ تنہائی میں معیاری وقت گزارنے کی خواہش کا اظہار کرتے ہیں۔ بعض اوقات، سونے کے وقت بچہ اپنے دل کی بات کہنے کے لیے کھل جاتا ہے اور کسی ایسی بات پر بات کرنا چاہتا ہے جو اس کے دل پر بوجھ بنی ہوئی ہو۔ والدین کے لیے ان لمحات میں اپنے بچوں کی بات سننے کے لیے وقت نکالنا بے حد ضروری ہے۔ کئی بار، بچہ کسی روحانی معاملے سے نبرد آزما ہوتا ہے، اور جب وہ اپنی ماں یا باپ کے پاس تنہائی میں آتا ہے تو درحقیقت وہ روحانی مدد چاہ رہا ہوتا ہے۔ ان مواقع پر والدین کو اپنے بچوں کی رہنمائی یسوع کی طرف کرنے کا خاص موقع ملتا ہے۔

اپنے بچوں کے ساتھ معیاری وقت گزارتے ہوئے، اُن سے ایسے سوالات کرنا سیکھیں جو کھلے اختیارات رکھتے ہوں، تاکہ آپ یہ سمجھ سکیں کہ وہ کس طرح سوچ رہے ہیں اور کیا محسوس کر رہے ہیں۔ کھلے اختیارات والے سوالات کا جواب محض "ہاں" یا "نہیں" میں نہیں دیا جا سکتا۔ ان سوالات کا کوئی خاص، متعین جواب نہیں ہوتا۔ عام طور پر، ایسے سوالات "کیوں..."، "کیسے..." یا "کیا..." جیسے الفاظ سے شروع ہوتے ہیں۔ اسی طرح، گفتگو شروع کرنے کے لیے آپ "مجھے بتائیں کہ..." یا "آپ کا اس بارے میں کیا خیال ہے..." جیسے جملے استعمال کر سکتے ہیں۔

جب آپ کا بچہ آپ کے سوال کا جواب دے، تو دھیان سے سنیں اور مناسب انداز میں ردِ عمل دیں۔ بعض اوقات، آپ مزید وضاحت کے لیے ایک اضافی سوال پوچھنا چاہیں گے۔ کسی موقع پر، آپ یہ تصدیق کرنا چاہیں گے کہ آپ ان کی بات کو صحیح طرح سمجھ رہے ہیں۔ کبھی کبھار، آپ کو ان کے خیالات اور احساسات کو تسلیم کرنا چاہیے۔ یہ ضروری ہے کہ بچہ یہ محسوس نہ کرے کہ اس کا انٹرویو لیا جا رہا ہے، بلکہ گفتگو قدرتی انداز میں ہو۔ آپ کی توجہ بچے کو یہ احساس دلائے گی کہ اسے سنا جا رہا ہے، اس کی قدر کی جا رہی ہے، اور اسے پیار کیا جا رہا ہے۔

بچے کی کہانی کو غور سے سننے کے لیے وقت نکالنا بھی ان سے محبت کے اظہار کا ایک مؤثر طریقہ ہے۔ اسی طرح، بچوں کو کہانیاں سنانا یا ان کے ساتھ کتابیں پڑھنا بھی معیاری وقت گزارنے کا ایک بہترین ذریعہ ہے۔

بچوں کے ساتھ کھیل کھیلنا یا کسی دلچسپ منصوبے پر مل کر کام کرنا بھی معیاری وقت گزارنے کے بہترین طریقے ہیں۔

کچھ والدین اپنے بچوں کو مناسب معیاری وقت نہیں دیتے۔ وہ اس کمی کو پورا کرنے کے لیے انہیں تحائف دیتے ہیں۔ لیکن تحائف کبھی بھی معیاری وقت کی جگہ نہیں لے سکتے۔ بچوں کو اپنے والدین کے ساتھ بھرپور معیاری وقت گزارنے کی ضرورت ہوتی ہے، چاہے ان کا بنیادی محبت کا انداز بیان کوئی بھی ہو۔ کسی بھی تعداد میں تحائف والدین کے ساتھ گزارے گئے وقت کا متبادل نہیں بن سکتے۔

تحائف

بہت سے والدین شاذ و نادر ہی اپنے بچے کے لیے کوئی کھلونا یا دلچسپ کتاب خریدتے ہیں، کیونکہ وہ انہیں ضروری نہیں سمجھتے۔ لیکن یہ چیزیں نہ صرف محبت کے اظہار کا ذریعہ ہیں بلکہ بچے کی نشوونما کے لیے بھی مفید ثابت ہو سکتی ہیں۔

خدمت کے کام

بچوں سے محبت کے اظہار کے چند عملی طریقے:

• ان کی سالگرہ پر ان کا پسندیدہ کھانا تیار کریں۔

• بیماری کی حالت میں ان کا نرمی اور محبت سے خیال رکھیں۔

• اسکول کے کسی پروجیکٹ میں ان کی مدد کریں۔

• گھر کے کاموں میں ان کے ساتھ شریک ہوں اور ان کی محنت کی قدر کریں۔

• کسی ایسے شخص کی مدد کرنے میں اپنے بچے کو شامل کریں جو آپ کے گھرانے کا حصہ نہ ہو۔

جسمانی لمس

تمام چھوٹے بچے جسمانی لمس کے ذریعے محبت کے اظہار کے محتاج ہوتے ہیں۔ نومولود بچوں کی بنیادی ضروریات ہوتی ہیں، جیسے کھلایا جانا اور ڈائپر بدلا جانا، لیکن اس کے ساتھ ساتھ انہیں گود میں لینا، پیار سے لپٹانا، نرمی سے سہلانا اور بوسہ دینا بھی ضروری ہے۔ یہ محبت بھرا نرم لمس ان کے لیے محسوس کیے جانے والے پیار کا اظہار ہے اور ان کی جذباتی اور ذہنی صحت کے لیے نہایت اہم ہے۔

والد کا اپنے بیٹوں کے ساتھ ہلکی پھلکی کشتی کرنا بھی محبت کے اظہار کا ایک طریقہ ہو سکتا ہے۔ تاہم، یہ مقابلہ تکلیف دہ، حاوی ہونے والا، بے قابو یا غصہ پیدا کرنے والا نہیں ہونا چاہیے۔

والدین کے الفاظ اور اعمال کے طویل مدتی اثرات

والدین کو اپنے بچوں کے ساتھ معاملات میں خدا کی مثال کی پیروی کرنی چاہیے۔ وہ ہمیشہ اپنی اولاد کے ساتھ کامل،قربانی پر مبنی اور غیر مشروط محبت کا برتاؤ کرتا ہے۔ وہ اپنے بچوں کی محبت میں انہیں تربیت دیتا، درست کرتا اور نظم و ضبط سکھاتا ہے (عبرانیوں 12: 5-7)۔ ایک باپ اور بچے کے رشتے کے تناظر میں، خدا ایمان داروں کی زندگیوں میں کام کرتا ہے تاکہ وہ اس کی مانند بن جائیں (عبرانیوں 12: 10-11)۔

والدین کی اپنے بچوں سے محبت کو ان کے رویے پر منحصر نہیں ہونا چاہیے۔ یقیناً، مثبت انعامات یا منفی نتائج تربیت کا ایک مناسب حصہ ہیں، لیکن محبت کے اظہار کو کسی رویے کی بنیاد پر دینا یا روکنا درست نہیں۔

اگر کوئی بچہ اپنے والدین کی غیر مشروط محبت کو مسلسل محسوس کرتا ہے، تو وہ خدا کی محبت کو زیادہ آسانی سے سمجھ سکے گا اور اس پر بھروسا کرے گا۔ تاہم، وہ بچے جو بچپن میں بدسلوکی یا نظرانداز کیے جانے کا شکار رہے ہوں، ان کے لیے ایک محبت کرنے والے آسمانی باپ پر بھروسا کرنا، حتیٰ کہ بڑے ہونے کے بعد بھی، زیادہ مشکل ہو سکتا ہے۔

بچوں کی اپنی ذات کے بارے میں سمجھ—خصوصاً ان کی انفرادی حیثیت میں اپنی قدر—زیادہ تر اس پر منحصر ہوتی ہے جو وہ دوسروں سے سنتے اور محسوس کرتے ہیں۔ ان کے والدین کے اعمال اور الفاظ سب سے زیادہ اثر انداز ہوتے ہیں، لیکن رشتہ دار اور دوست بھی اہم کردار ادا کرتے ہیں۔ بچے اپنی ضروری محبت کے اظہار حاصل کرتے ہیں یا نہیں، یہ ان کی خودی کی تصویر تشکیل دینے میں مدد دیتا ہے۔ جب بچوں سے محبت کا اظہار روکا جاتا ہے، یا وہ جذباتی یا جسمانی بدسلوکی کا شکار ہوتے ہیں، تو اس سے ان کی خودی اور خود قدری کا تصور متاثر ہوتا ہے، جو ان کی پوری زندگی پر اثر انداز ہو سکتا ہے۔

والدین کے الفاظ بچوں کی اپنی ذات کے بارے میں سمجھ پر اثر انداز ہوتے ہیں۔ مثال کے طور پر:

• تصدیقی الفاظ: "میں تم پر فخر کرتا ہوں کہ تم اتنی محنت کر رہے ہو! میں جانتا ہوں کہ تم یہ کر سکتے ہو!" یہ بچوں کو بتاتا ہے کہ محنت کرنا قابل قدر ہے، اور یہ کہ آپ ان کی کامیابی پر یقین رکھتے ہیں۔

• تباہ کن الفاظ: "تم بہت سست ہو۔ میں تم پر کسی چیز کے لیے بھروسہ نہیں کر سکتا!" یہ ایک بچے کو یہ یقین دلا سکتا ہے کہ وہ خود کو بدلنے کے قابل نہیں ہیں؛ اس کے لیے کوشش کرنے یا والدین کا احترام حاصل کرنے کی کوئی وجہ نہیں کیونکہ والدین پہلے ہی ان سے مایوس ہو چکے ہیں۔ اس سے بچے کو یہ محسوس ہو سکتا ہے کہ والدین نے انہیں مسترد کر دیا ہے۔

• تصدیقی الفاظ: " کوئی بات نہیں۔ ہم سب کبھی نہ کبھی غلطی کرتے ہیں، اور پھر ہم سیکھتے ہیں کہ اگلی بار بہتر کیسے کریں۔" یہ بچوں کو یہ یقین دلاتا ہے کہ غلطی کرنا محفوظ ہے—آپ کی محبت ان کی مکمل کارکردگی پر منحصر نہیں ہے۔ یہ انہیں یہ بھی سکھاتا ہے کہ وہ ترقی کر سکتے ہیں، اور مسلسل سیکھنے اور کوشش کرنے کی اہمیت ہے۔

• تباہ کن الفاظ: "تم بہت بے وقوف ہو۔ تم ہمیشہ سب کچھ خراب کر دیتے ہو۔" یہ ایک بچے کو یہ یقین دلا سکتا ہے کہ کوشش کرنا بیکار ہے۔ یہ آسانی سے انہیں یہ سمجھا سکتا ہے کہ ان کی قدر صرف اس وقت ہے جب وہ ہر کام مکمل طور پر درست کریں، اور چونکہ وہ ہمیشہ غلطی کرتے ہیں، وہ کبھی بھی کسی کے لیے قابل قدر نہیں ہو سکتے۔ وہ کبھی بھی والدین یا کسی اور کی محبت کے مستحق نہیں ہوں گے۔

بچے کی اپنے بارے میں سمجھ اس محبت سے تشکیل پاتی ہے جو اسے دی جاتی ہے یا اس سے روکی جاتی ہے۔ دوسروں کے ساتھ صحت مند تعلقات قائم کرنے کی اس کی صلاحیت والدین کے ساتھ اس کے تعلق سے یا تو فروغ پاتی ہے یا متاثر ہوتی ہے۔ جو بچہ محبت سے پالا جاتا ہے، وہ دوسروں سے بے غرض اور غیر مشروط محبت کرنا سیکھ سکتا ہے۔ اس کے پاس محبت کا ایک ایسا ذخیرہ بھی ہوتا ہے جس سے وہ دوسروں کو محبت دے سکتا ہے۔

سچی محبت بچوں کے لیے وہی جذباتی توانائی ہے جو بڑوں کے لیے ہوتی ہے۔

بھرے ہوئے جذباتی ٹینک کے فوائد

بچوں کے جذباتی ایندھن کے ٹینک بھرے ہونے کے بہت سے فوائد ہیں۔ جب بچوں کو یہ علم ہوتا ہے کہ ان سے محبت کی جاتی ہے تو ان میں وہ قوت اور استحکام پیدا ہوتا ہے جو انہیں مشکلات کا سامنا کرنے اور صحیح طور پر نشوونما پانے کے لیے درکار ہوتا ہے۔۔

جو بچے غیر مشروط محبت کے یقین میں پروان چڑھتے ہیں، وہ جذباتی طور پر محفوظ ہوتے ہیں۔ اسی وجہ سے وہ اپنے والدین کی طرف سے دی جانے والی تربیت، اصلاح اور رہنمائی کو زیادہ آسانی سے قبول کر سکتے ہیں۔ وہ ہم عمر ساتھیوں کے دباؤ سے پیدا ہونے والے فتنوں کا بھی زیادہ بہتر مقابلہ کر سکتے ہیں کیونکہ وہ اپنی پہچان میں پُراعتماد ہوتے ہیں اور دوسروں کے سامنے اپنی حیثیت ثابت کرنے کی ضرورت محسوس نہیں کرتے۔

ایک ایسی لڑکی جو عام طور پر لڑکوں کے ساتھ چھیڑ چھاڑ کرنے کا رویہ رکھتی ہے، شاید اس خوف کے باعث ایسا کرتی ہو کہ اگر وہ ایسا نہ کرے تو لڑکے اس میں دلچسپی نہیں لیں گے۔ اسی طرح، ایک شرمیلی لڑکی اس خوف میں مبتلا ہو سکتی ہے کہ اگر وہ اپنی حقیقی شخصیت کا اظہار کرے گی تو لوگ اسے ناپسند کریں گے۔ وہ بیٹیاں جو اپنے والد کی طرف سے توجہ، محبت اور اعتماد حاصل کرتی ہیں، عام طور پر لڑکوں سے صحت مند انداز میں تعلقات قائم کر سکتی ہیں، نہ کہ ضرورت سے زیادہ چھیڑ چھاڑ یا غیر ضروری شرم و حیاء کے ساتھ۔ وہ اپنے والد کی محبت کی وجہ سے اپنی شناخت میں خود کو محفوظ سمجھتی ہیں۔

والدین کی طرف سے بار بار اور پانچوں محبت کے انداز میں ظاہر کی جانے والی سچی اور غیر مشروط محبت بچوں کو بہت سے نقصانات سے محفوظ رکھتی ہے۔ جن بچوں کو حقیقی محبت میسر ہوتی ہے، وہ عام طور پر ان لوگوں سے محبت اور تحفظ کی تلاش میں نہیں جاتے جو ان کا استحصال کرنا چاہتے ہیں یا انہیں نقصان پہنچانے کے درپے ہوتے ہیں۔

مختصراً یہ کہ ایک بچے کے طور پر جذباتی ایندھن کا ٹینک بھرا ہونے کے بہت سے فوائد ہیں:

• اپنی قدر و قیمت اور اس کے حقیقی ماخذ کی درست پہچان

• کوشش، غلطیوں، نشوونما اور غیر مشروط محبت کی صحیح سمجھ

• دوسروں سے محبت کرنا سیکھنے کی صلاحیت

• مشکلات کا سامنا کرنے اور مناسب نشوونما کے لیے مضبوطی اور استحکام

• جذباتی تحفظ

• نظم و ضبط، اصلاح اور رہنمائی کو قبول کرنے کی صلاحیت

• ہم عمر ساتھیوں کے منفی اثرات کو رد کرنے کی صلاحیت

• مستقبل میں بدسلوکی کا شکار ہونے کے امکانات کم ہونا

◄ آپ نے اور کون سے فوائد دیکھے ہیں جو محبت بھرے ماحول میں پرورش پانے والے بچوں کو حاصل ہوتے ہیں؟

خالی جذباتی ٹینک کے نقصانات

وہ بچے جو محبت محسوس نہیں کرتے وہ رہنمائی کی مزاحمت کر سکتے ہیں کیونکہ ان کے اندر اپنے ماں یا باپ کو خوش کرنے کا جذبہ نہیں ہوتا۔ جذباتی ایندھن کے بھرے ہوئے ٹینک کے بغیر بہت سے بچوں میں اس والدین کے ساتھ وفاداری کا مضبوط اور مثبت تعلق قائم نہیں ہو پاتا جو ان کی رہنمائی کرنے کی کوشش کر رہا ہوتا ہے۔

جن بچوں کے جذباتی ایندھن کے ٹینک خالی ہوتے ہیں وہ ان بچوں کی نسبت کہیں زیادہ بدسلوکی یا استحصال کا شکار ہو سکتے ہیں جو اپنے خاندان کے افراد کے ساتھ صحت مند اور پُر محبت رشتوں میں بندھے ہوتے ہیں۔ چونکہ وہ خود کو محبوب محسوس نہیں کرتے اس لیے وہ ایسے لوگوں سے محبت تلاش کر سکتے ہیں جو انہیں استعمال کرنا چاہتے ہیں یا انہیں نقصان پہنچانا چاہتے ہیں۔

ان اسباق میں ہم نے محبت کے پانچ بنیادی اندازِ بیان کے بارے میں سیکھا ہے۔ اگرچہ عام طور پر ہر فرد کی ایک یا دو بنیادی محبت کی زبانیں ہوتی ہیں، لیکن ہر شخص کو پانچوں طریقوں سے محبت کا اظہار باقاعدگی سے ملنا چاہیے۔ ایک صحت مند خاندان وہ ہوتا ہے جہاں ہر فرد جان بوجھ کر دوسروں کے ساتھ تعلقات کو پروان چڑھاتا ہے—تصدیقی الفاظ کہہ کر، معیاری وقت گزار کر، خدمت کر کے، اور محبت بھرے لمس کے ذریعے۔ تحفے دینا روزمرہ کا معمول نہ ہو، لیکن پھر بھی یہ خاندان کے اندر صحت مند تعلقات کا ایک اہم حصہ ہے۔

◄ آپ کے خاندان میں محبت کا اظہار زیادہ تر کس طرح کیا جاتا ہے؟ کیا محبت کے تمام پانچ اندازِ بیان میں اس کا اظہار ہوتا ہے؟ کتنی بار محبت کے اظہار کیے جاتے ہیں؟

ایک غیر مذہبی 25 سالہ تحقیق، جس میں 14,000 خاندانوں کا مطالعہ کیا گیا، سے معلوم ہوا کہ مختلف ثقافتی پس منظر رکھنے والے کئی مضبوط، کامیاب، اور متوازن خاندانوں میں چھ مشترکہ خصوصیات پائی جاتی ہیں۔[1] ان میں سے کچھ خصوصیات مختلف محبت کی زبانوں سے براہ راست جُڑی ہوئی ہیں، جو مختلف طریقوں سے محبت کے اظہار کی اہمیت کو مزید واضح کرتی ہیں۔ اسٹِنِٹ اور بیم نے ان چھ خصوصیات کو درج ذیل طریقے سے بیان کیا ہے:

1. عزم – مضبوط خاندانوں کے افراد ایک دوسرے کی بھلائی اور خوشی کو فروغ دینے کے لیے پرعزم ہوتے ہیں۔ وہ خاندان کے اتحاد کو اہمیت دیتے ہیں۔

2. تعریف اور محبت – مضبوط خاندانوں کے افراد ایک دوسرے کی قدر کرتے ہیں اور اکثر محبت کا اظہار کرتے ہیں۔ وہ محسوس کر سکتے ہیں کہ ان کا خاندان اچھا ہے۔

3. مثبت گفتگو – اچھے خاندانوں کے افراد میں عمدہ گفتگو کی مہارت ہوتی ہے، اور وہ ایک دوسرے سے بات کرنے میں کافی وقت صرف کرتے ہیں۔

4. وقت کا ساتھ گزارنا – مضبوط خاندان ایک دوسرے کے ساتھ معیاری وقت گزارتے ہیں، اور بڑی مقدار میں ایک دوسرے کے ساتھ رہنے کو ترجیح دیتے ہیں۔

5. روحانی بھلائی – چاہے وہ مذہبی عبادات میں شریک ہوں یا نہ ہوں، مضبوط خاندانوں میں زندگی میں ایک بڑی بھلائی یا قوت کا احساس پایا جاتا ہے۔ یہ عقیدہ انہیں طاقت اور مقصد فراہم کرتا ہے۔

6. دباؤ اور بحرانوں سے نمٹنے کی صلاحیت – مضبوط خاندانوں کے افراد دباؤ یا بحران کو سیکھنے اور بڑھنے کے مواقع کے طور پر دیکھنے کے قابل ہوتے ہیں۔

ان دو اسباق میں ہم نے کئی پہلوؤں پر غور کیا ہے۔ ہم نے خالص محبت پر گفتگو سے آغاز کیا، پھر ان پانچ انداز بیان کو پہچانا جن میں عام طور پر محبت کا اظہار کیا جاتا ہے۔ ہم نے جذباتی ایندھن کے فیول ٹینک کے بارے میں سیکھا اور یہ بھی جانا کہ ہمارے خاندان کے افراد کو ہماری محبت کا تجربہ کرنے کی ضرورت ہوتی ہے، خاص طور پر ان کی بنیادی محبت کے انداز بیان میں۔ ہم نے یہ بھی دیکھا کہ خاندان کے اندر شخصیت کے فرق ہمیں محبت میں بڑھنے میں کس طرح مدد دیتے ہیں۔

اس کے بعد، ہم نے پانچوں محبت کے انداز بیان کا تفصیل سے جائزہ لیا، ہر ایک کی مثالیں دیکھیں اور یہ بھی سمجھا کہ اگر ان میں سے کسی کو نظرانداز یا غلط طریقے سے برتا جائے تو اس سے کیا نقصان ہوسکتا ہے۔ ہم نے سیکھا کہ بچے مکمل جذباتی ایندھن کے فیول ٹینک سے کیسے فائدہ اٹھاتے ہیں اور جب یہ فیول ٹینک خالی ہوتے ہیں تو انہیں کس طرح نقصان پہنچتا ہے۔ ہم نے بچوں کے لیے اپنی محبت کے اظہار پر مزید تفصیل سے گفتگو کی۔ پھر، ہم نے دیکھا کہ محبت کے پانچ انداز بیان پر عمل کرنے کا تعلق کس طرح مضبوط خاندانوں کی چھ عام خصوصیات سے ہے۔

اب جب کہ ہم ان اسباق کو مکمل کر رہے ہیں، ہم آپ کی ذاتی ذمہ داری پر غور کریں گے—آپ کیا کر سکتے ہیں اور جو کچھ آپ نے سیکھا ہے، اس کے مطابق آپ کو کیا کرنا چاہیے۔

(1) آپ اپنے خاندان سے محبت کرنے کے ذمہ دار ہیں۔

آپ کو تیار ہونا چاہیے کہ اگر ضرورت پڑے تو خود کو بدلنے کے لیے تیار ہوں، بغیر اس کے کہ آپ کے خاندان کے افراد پہلے آپ سے محبت کا اظہار کریں۔ حقیقی محبت اس وقت تک انتظار نہیں کرتی جب تک دوسرا شخص محبت کا مظاہرہ نہ کرے۔ یہ خود کو اس وقت بھی ظاہر کرتی ہے جب دوسرا شخص کم مستحق معلوم ہو، کیونکہ محبت کسی کی اہلیت پر مبنی نہیں ہوتی۔

(2) آپ ذمہ دار ہیں کہ اپنی محبت کو اپنے خاندان کے لیے ان طریقوں سے ظاہر کریں جو ان کے لیے سب سے زیادہ معنی رکھتے ہیں۔

ممکن ہے کہ آپ کو اپنی محبت کے اظہار میں زیادہ محنت کرنی پڑے، خاص طور پر ان محبت کے اندازِ بیان میں جو آپ کے لیے فطری نہیں ہیں۔ شروع میں، محبت کے کچھ انداز غیر فطری، عجیب، یا بے معنی محسوس ہو سکتے ہیں۔

اپنے خاندان کے افراد کے لیے محبت کے مواقع کو پہچاننا سیکھیں۔ اس بات پر دھیان دیں کہ کسی خاص لمحے میں انہیں کس چیز کی ضرورت ہو سکتی ہے۔ یہاں ہر محبت کے اندازِ بیان کے لیے کچھ مثالیں دی گئی ہیں:

• الفاظِ تصدیق: سوچیں، ’’________ شاید اس بات کو لے کر غیر یقینی محسوس کر رہا ہے، لیکن وہ جو کہہ رہا ہے وہ بالکل درست ہے۔ مجھے کچھ مثبت الفاظ کہنے چاہئیں۔‘‘

• معیاری وقت: پوچھیں، ’’کیا آپ اس بارے میں بات کرنا چاہیں گے؟‘‘ پھر جو کچھ آپ کر رہے ہیں، اسے روک دیں، اپنی مکمل توجہ دیں، اور اپنے جسمانی اشاروں سے ظاہر کریں کہ آپ واقعی سن رہے ہیں۔

• تحائف: جب آپ انہیں تحفہ دیں، تو کہیں، ’’میں نے یہ دیکھا اور مجھے آپ کی یاد آئی۔‘‘

• خدمت کے کام : فوراً پوچھیں، ’’کیا میں آپ کے لیے یہ کام کر سکتا ہوں؟‘‘ یا ’’کیا میں اس میں آپ کی مدد کر سکتا ہوں؟‘‘

• جسمانی لمس: ان کے پاس جا کر کہیں، ’’لگتا ہے کہ آپ کو ایک مرتبہ گلے لگانے کی ضرورت ہے۔‘‘ پھر انہیں محبت سے گلے لگائیں۔

(3) آپ اپنے جذبات کے ذمہ دار ہیں۔

خدا نے آپ کو اس طرح تخلیق کیا ہے کہ آپ کو دوسروں کے ساتھ صحت مند تعلقات کی ضرورت ہے۔ لیکن چاہے یہ ممکن ہو یا نہ ہو، خدا ہی آپ کا اصل ذریعہ اور تسلی ہے۔ آپ کی جذباتی خوشحالی کا اصل انحصار آپ کے خاندان پر نہیں بلکہ خدا کی محبت پر ہے۔ خدا آپ سے کامل محبت کرتا ہے، جو کوئی دوسرا کبھی نہیں کر سکتا۔ اگر آپ اس کی محبت میں قائم رہیں تو وہ آپ کی ہر کمی کو پورا کر سکتا ہے (یوحنا 15: 9-11)۔

ہو سکتا ہے کہ آپ کے خاندان کے افراد آپ کے بنیادی محبت کے اندازِ بیان کے مطابق محبت کا اظہار نہ کریں۔ شاید وہ آپ کے بنیادی محبت کے انداز بیان اور جذباتی ضروریات سے بے خبر ہیں۔ ہو سکتا ہے کہ انہیں اس انداز میں محبت کا اظہار کرنے کی تحریک نہ ہو جو آپ کے لیے سب سے زیادہ معنی رکھتا ہو۔ آپ انہیں یہ سمجھانے کی کوشش کر سکتے ہیں کہ آپ کس طرح سب سے زیادہ محبت محسوس کرتے ہیں، لیکن آپ انہیں مجبور نہیں کر سکتے کہ وہ اسی طریقے سے محبت کا اظہار کریں۔

ممکن ہے کہ آپ کے خاندان کے افراد دوسرے طریقوں سے اپنی محبت کا اظہار کر رہے ہوں۔ جب آپ محبت کے اندازِ بیان کے بارے میں جان جائیں گے، تو آپ ان طریقوں کو پہچاننا شروع کریں گے جن کے ذریعے آپ کا خاندان پہلے ہی آپ سے محبت کر رہا ہے۔ اگرچہ آپ انہیں تبدیل نہیں کر سکتے، لیکن آپ ان کی محبت کے اظہار کو قبول کرنے اور اس محبت کے لیے ان کا شکریہ ادا کرنے کا انتخاب کر سکتے ہیں۔

آسمانی باپ،

تیرا شکر ہو کہ تُو نے مجھے میرا خاندان بخشا۔ میری مدد کر کہ میں ہر ایک کی قدر کروں اور ہر ایک کے ساتھ اچھے تعلقات قائم رکھوں۔

تُو نے مجھے یہ موقع دیا کہ میں سوچوں کہ اپنے خاندان سے محبت کے اظہار کے لیے کون سے طریقے اپنا سکتا ہوں۔ مجھے سکھا کہ میں یسوع کی مانند بنوں—اپنا وقت، جذباتی اور جسمانی توانائی، اور وسائل دے کر اپنے خاندان کے لیے برکت اور حوصلہ افزائی کا سبب بنوں۔ مجھے فروتنی عطا کر تاکہ میں دوسروں کی ضروریات کو اپنی ضروریات پر فوقیت دوں۔ مجھے ہوشیار بنا کہ میں ان مواقع کو پہچان سکوں جہاں میں اپنے خاندان کے ہر فرد کے لیے محبت کا اظہار کر سکتا ہوں۔

تُو نے مجھے سکھایا کہ حقیقی محبت کیا ہے۔ تُو چاہتا ہے کہ میں اپنے خاندان کے لیے وہی محبت کا عہد کروں جو تُو نے مجھ سے کیا ہے۔ میں انتخاب کرتا ہوں کہ میں اپنے شریکِ حیات اور بچوں سے بے لوث، غیر مشروط محبت کروں۔ میری کوتاہیوں کے لیے مجھے اپنا فضل اور رحم عطا کر، اور مجھے توفیق دے کہ میں ان سے ویسی محبت کر سکوں جیسی کرنی چاہیے۔

آمین۔

(1) اپنے شریکِ حیات اور بچوں کے ممکنہ بنیادی محبت کے اندازِ بیان کے بارے میں سوچیں۔ اپنے خاندان کے افراد کے نام لکھیں، پھر ہر ایک کے بنیادی ایک یا دو محبت کے اندازِ بیان لکھیں۔

(2) کن محبت کے اظہار کے لیے آپ کو اضافی محنت کرنی پڑے گی؟ ان کو نشان زد کریں۔ کچھ خیالات لکھیں کہ آپ ان طریقوں سے اپنے خاندان کے لیے محبت کے اظہار کو کس طرح جان بوجھ کر عملی جامہ پہنائیں گے۔

(3) اپنی ثقافت، خاص طور پر اپنے سماجی گروہ کا جائزہ لیں۔ محبت کے پانچ اندازِ بیان کی فہرست بنائیں۔ آپ کی ثقافت میں ہر محبت کے اندازِ بیان کو کس طرح ظاہر کیا جاتا ہے؟ کیا ان میں سے کوئی ایسا انداز ہے جسے عام طور پر نظر انداز کیا جاتا ہے؟ آپ کے سماجی گروہ میں لوگ محبت کو بہتر طریقے سے کیسے ظاہر کر سکتے ہیں؟ ان سوالات کے جوابات میں کئی پیراگراف لکھیں۔