اس سبق کے اختتام پر، طالبعلم کو چاہیے کہ وہ:

(1) خدا کے ساتھ تعلق کی اہمیت کو سمجھے اور اس کی قدر کرے۔

(2) ہر انسان میں خدا کی شبیہ (Image of God) کو پہچانے اور اس کی عزت کرے۔

(3) یہ سمجھے کہ ہم اپنے تعلقات میں کیے گئے انتخاب کے لیے خدا کے سامنے جوابدہ ہیں۔

(4) یہ جانے کہ بائبل مقدس نیک تعلقات کے لیے ہمارا رہنما اصول ہے، اور ہمیں خدا کی مانند اپنے تعلقات میں زندگی گزارنی چاہیے۔

بائبل مقدس ہمیں سکھاتی ہے کہ خدا ایک شخصی (Personal) خدا ہے، جو دوسروں کے ساتھ تعلق رکھتا ہے اور ان سے کلام کرتا ہے (عبرانیوں 1:1-2)۔ کلام مقدس یہ بھی ظاہر کرتا ہے کہ خدا باپ، خدا بیٹا، اور خدا روح القدس ازل سے ایک دوسرے کے ساتھ تعلق میں ہیں۔[1]

خدا نے زمین و آسمان، سمندر اور ان میں موجود ہر چیز کو تخلیق کیا (خروج 20: 11)، لیکن زبور 8: 3-8 ہمیں بتاتی ہے کہ انسان اس کی سب سے بہترین اور قیمتی تخلیق ہے۔ خدا نے انسان کو ایک تعلق رکھنے والی مخلوق کے طور پر بنایا، کیونکہ وہ خود بھی تعلق رکھنے والا خدا ہے۔ پوری بائبل میں خدا ہمیں اپنے ساتھ ایک بامقصد اور زندگی بخش تعلق میں بلاتا ہے۔[2]

یہ کتنا شاندار سچ ہے کہ کائنات کا خالق آپ کے اور میرے ساتھ ذاتی تعلق رکھنا چاہتا ہے!

◄ ایک طالبعلم کو گروپ کے لیے پیدائش 3: 8-9 کی تلاوت کرنی چا ہیے ۔

لمحہ بھر رکیں، اپنی آنکھیں بند کریں اور اس منظر کا تصور کریں جو آپ نے ابھی پڑھا ہے۔ اپنی تخیل کی قوت سے ان آیات کو حقیقت بنتے دیکھیں۔دن کے خوشگوار وقت میں، آپ خود کو ایک نہایت خوبصورت باغ میں کھڑا پاتے ہیں۔ ٹھنڈی اور ہلکی ہوا آپ کے چہرے کو چھو رہی ہے۔ آپ خدا کے قدموں کی آواز سنتے ہیں، جو باغ میں چل رہا ہے۔ لیکن اس کی دو پیاری مخلوق خاموش ہیں۔ پھر خدا کی پُرسوز آواز گونجتی ہے: "تم کہاں ہو؟"

کیا آپ تصور کر سکتے ہیں کہ وہ لمحہ کیسا تھا، جب خدا نے آدم اور حوا کو اپنی رفاقت کے لیے پکارا؟ لمحہ بھر رکیں اور خدا کے دل پر غور کریں۔ خدا چاہتا ہے—اور تلاش کرتا ہے—کہ آدم اور حوا کے ساتھ، آپ کے ساتھ، اور میرے ساتھ رفاقت رکھے!

اگرچہ ہم نے اپنی نافرمانی کے سبب خود کو خدا سے جدا کر لیا ہے (یسعیاہ59: 2)، پھر بھی خدا ہر جیتے جاگتے انسان کے ساتھ تعلق رکھنا چاہتا ہے۔ لوقا 19: 10 ہمیں بتاتی ہے کہ وہ ہر گناہ گار کو ڈھونڈ رہا ہے۔ خدا آج بھی پکار رہا ہے: "تم کہاں ہو؟" چونکہ یسوع نے ہمارے لیے اپنی جان دے دی، ہم خدا کے ساتھ درست تعلق میں واپس آ سکتے ہیں (افسیوں 2: 13، 19)۔ آپ اور میں خدا کے ساتھ تعلق کے لیے تخلیق کیے گئے ہیں!

جو لوگ خدا کی محبت بھری اور بامقصد تخلیق پر ایمان نہیں رکھتے، وہ اپنی شناخت اور مقصد خود بنانے کی جدوجہد کرتے ہیں۔ خدا کے ساتھ تعلق کے بغیر انسانیت کو صحیح طور پر سمجھنا ناممکن ہے۔ جو شخص دنیاوی حکمت کے مطابق زندگی گزارتا ہے—یعنی انسانی خواہشات پر مبنی خوشی کی تلاش میں رہتا ہے—وہ حقیقت میں زندگی کو سمجھ نہیں سکتا۔

اپنی شناخت (ہم کون ہیں)، اپنے مقصد (ہم کیوں موجود ہیں)، اور اپنی بناوٹ (ہم کیسے تخلیق کیے گئے) کو سمجھنے کے لیے ہمیں اپنے خالق کے منصوبے کو جاننا ضروری ہے، جو ہمیں پاک کلام میں ملتا ہے۔ خدا نے پہلے ہی ہماری شناخت طے کر دی ہے؛ یہ کوئی ایسی چیز نہیں جسے ہم خود ایجاد کریں۔ اس نے ہمیں ایک خاص مقصد کے تحت تخلیق کیا ہے اور جان بوجھ کر ہمارے وجود کا منصوبہ بنایا ہے۔ جب ہم خدا کے ہمارے لیے دیے گئے منصوبے اور تعلقات کو سمجھتے ہیں، تب ہی ہم وہ بن سکتے ہیں جو ہمیں ہونا چاہیے اور اپنے وجود کے مقصد کو پورا کر سکتے ہیں۔

خدا کی صورت پر تخلیق ہونے کا مطلب یہ ہے کہ انسان خاص طور پر تعلقات کے لیے بنایا گیا ہے۔ جس طرح خدا خود تعلق رکھنے والا ہے، اسی طرح اس نے انسان کو بھی تعلق رکھنے والا بنایا ہے۔ خدا نے ہر شخص کی روح، جان، اور جسم کو اس کے ساتھ اور دوسروں کے ساتھ تعلق کے لیے تخلیق کیا ہے۔

انسانی تعلقات کے لیے ہمارا ہدایت نامہ

چونکہ خدا نے ہمیں تعلقات کے لیے تخلیق کیا ہے، اس کا مطلب یہ ہے کہ اس نے ہمارے تعلقات کے لیے کچھ اصول اور ہدایات بھی دی ہیں۔ جیسے کسی چیز کو بنانے والا اس کا استعمالی رہنما (manual) لکھتا ہے تاکہ اس کی بناوٹ اور صحیح استعمال کو سمجھایا جا سکے، اسی طرح خدا نے ہمیں اپنی کتاب، بائبل مقدس ، دی ہے، جو ہماری بناوٹ اور زندگی اور تعلقات کے صحیح طریقے کو واضح کرتی ہے۔

بائبل میں واضح طور پر ان تمام رشتوں کے بارے میں تعلیم دی گئی ہے جنہیں خدا نے انسانوں کے لیے مقرر کیا ہے۔ یہ شوہروں اور بیویوں، والدین اور بچوں، بہن بھائیوں، دادا دادی، دوستوں، دشمنوں، ہمسایوں، حکومت اور شہریوں، اور آجر و ملازمین کے تعلقات پر بات کرتی ہے۔ خدا کے کلام کے اصول ہمیں سکھاتے ہیں کہ ہمیں کسی بھی حالت یا ماحول میں خدا کے مقرر کردہ طریقے پر چلنا چاہیے۔ بائبل ہمیں زندگی کے ہر مرحلے میں خدا کی مرضی سکھاتی ہے۔

ہر معاشرہ اور ثقافت خدا کے منصوبے کی کسی نہ کسی حد تک عکاسی کرتی ہے، لیکن کسی بھی معاشرے یا ثقافت میں خدا کا منصوبہ مکمل طور پر ظاہر نہیں ہوتا۔ ہر ثقافت میں شادی اور بچوں کی پرورش کے اپنے طریقے ہوتے ہیں۔ ہر معاشرہ روایات، ماحول، جینیاتی پس منظر، اور تاریخی واقعات میں مختلف ہوتا ہے، لیکن تمام ثقافتوں میں بنیادی اخلاقی اصول پائے جاتے ہیں۔ مثال کے طور پر، ہر ثقافت میں شادی کا کوئی نہ کوئی تصور ضرور پایا جاتا ہے۔ تاہم، تمام رویوں کو ثقافتی روایات کے بجائے بائبلی اصولوں کے ذریعے پرکھنا ضروری ہے۔ بائبل ہماری حتمی اتھارٹی ہے، ثقافت نہیں (رومیوں 12: 2)۔

ثقافتی روایات ہمیشہ غیر جانبدار نہیں ہوتیں، اور ہمیں انہیں ایسا سمجھنے کی توقع بھی نہیں کرنی چاہیے (افسیوں 2:2)۔ تمام معاشرے گناہ آلود انسانوں نے بنائے ہیں، جو اپنی نفس پرستی اور غلط خواہشات کے زیر اثر ہوتے ہیں۔ کسی بھی معاشرے میں کچھ بائبلی سچائیاں موجود ہو سکتی ہیں، لیکن کوئی بھی معاشرہ خدا کے معیار کے مطابق مکمل طور پر نہیں چلتا۔ کسی بھی چیز کو صرف اس بنیاد پر درست نہیں سمجھا جا سکتا کہ وہ ثقافتی طور پر عام ہے۔ صرف بائبل ہی ہمیں خدا کے کامل معیار کو دکھاتی ہے (زبور 19: 7-11)۔

اگر آپ لیبیا جیسے ملک میں جائیں اور دیکھیں کہ وہاں کے لوگ ٹریفک قوانین کی پرواہ کیے بغیر گاڑیاں چلا رہے ہیں، تو آپ سوچ سکتے ہیں، "یہ تو ان کی ثقافت ہے، ان کا اپنا انداز ہوگا!" یہ سچ ہے کہ انہوں نے اپنا ایک الگ ڈرائیونگ کلچر بنا لیا ہے، لیکن حقیقت یہ ہے کہ لیبیا میں دنیا میں سب سے زیادہ ٹریفک حادثات ہوتے ہیں۔ ان کی حادثاتی شرح دوسرے سب سے زیادہ حادثات والے ملک سے دو گنا زیادہ ہے۔ یہ واضح ہے کہ ان کی ثقافت نے ایک صحیح طریقہ نہیں اپنایا۔

خدا جانتا ہے کہ زندگی کو کیسے چلنا چاہیے، اور اس نے ہمیں اس کے اصول دیے ہیں۔ ہمیں محض تجربے اور آزمائش کے ذریعے زندگی گزارنے کی اجازت نہیں دی گئی، نہ ہی ہمیں صرف اپنی خواہشات کے مطابق خوشی تلاش کرنے کا حکم دیا گیا ہے۔ ہمیں خدا کے منصوبے کے مطابق اپنے تعلقات کو استوار کرنا ہے۔

سب سے خوبصورت بات یہ ہے کہ خدا کی ہدایت پر چلنا ہمارے لیے فائدہ مند ہے۔ خدا نے ہمیں اپنے احکام ہماری بھلائی کے لیے دیے ہیں (استثنا 6: 24)۔ جب ہم ان پر عمل کرتے ہیں، تو ہم برکت پاتے ہیں اور کئی برے نتائج سے محفوظ رہتے ہیں۔ ہمارا خالق جانتا ہے کہ ہمارے لیے کیا بہتر ہے، اور جب ہم اس کے منصوبے پر چلتے ہیں، تو ہم خوشحال ہوتے ہیں۔

تعلقات میں خدا کے سامنے جوابدہی

◄ہمارا دوسروں کے ساتھ برتاؤ ہمارے خدا کے ساتھ تعلقات کو کیسے متاثر کرتا ہے؟

◄طالب علموں کو درج ذیل آیات کو جماعت کے لیے پڑھنا چاہیے۔ مختصر طور پر اس بات پر تبادلہ خیال کریں کہ خدا انسانی تعلقات میں ہم سے کیا چاہتا ہے، اور اس کے احکام کی پیروی کیسے ہمارے خدا کے ساتھ تعلق کو مضبوط کرتی ہے۔ اگر ہم خدا کے احکام کو نظرانداز کریں تو اس کا ہمارے خدا کے ساتھ تعلق پر کیا اثر پڑے گا؟

ہم اخلاقی مخلوق ہیں، جس کا مطلب ہے کہ ہم یہ سمجھتے ہیں کہ کچھ اعمال غلط اور کچھ درست ہیں، اور ہم اپنے انتخاب کے لیے خدا کے حضور جوابدہ ہیں۔ یہ سمجھ ہمیں بڑی صلاحیت اور بڑی ذمہ داری عطا کرتی ہے۔ ہمارے انتخاب ہمارے خدا کے ساتھ تعلق کو متاثر کرتے ہیں۔ تعلقات کے بارے میں خدا کی ہدایات پر عمل کرنا صرف عملی فائدے اور خوشحالی حاصل کرنے کا ذریعہ نہیں ہے، بلکہ یہ ایک بڑی ذمہ داری ہے کیونکہ ہم اپنے فیصلوں اور رویے کے لیے خدا کے سامنے جوابدہ ہیں (رومیوں 14: 10، 12)۔

خدا ہمیں حکم دیتا ہے کہ ہم دوسروں کے ساتھ عدل سے پیش آئیں اور محبت اور رحم کا برتاؤ کریں (میکاہ 6: 8)۔ لیکن مسئلہ یہ ہے کہ آدم کے گناہ کی وجہ سے، اس کی تمام اولاد ایک گناہ آلودہ فطرت کے ساتھ پیدا ہوتی ہے (رومیوں 5: 12، 19)۔ اس لیے ہم مستقل طور پر محبت، رحم اور انصاف کے اصولوں پر عمل نہیں کر سکتے (رومیوں 7: 15-24)۔ لیکن جب ہم نئے سرے سے پیدا ہوتے ہیں، تو خدا کا فضل ہمیں تبدیل کر دیتا ہے۔ روح القدس ہمیں خدا کی مرضی پر عمل کرنے کے قابل بناتا ہے (رومیوں 8: 3-4)۔

ہر انسان کی قدر

◄ طلبہ یسعیاہ 44: 24، زبور139: 13-16، پیدائش 9: 6، اور یعقوب3: 9 کو جماعت کے لیے پڑھیں۔ یہ آیات ہمیں ہر زندگی کی قدر کے بارے میں کیا بتاتی ہیں؟ کسی انسان کی اصل قدر کا کیا معیار ہے؟

دوسروں کے ساتھ صحت مند تعلقات قائم رکھنے کے لیے، ضروری ہے کہ ہم ہر انسان کی وہی قدر کریں جو خدا کرتا ہے۔ خُدا نے اِنسان کو اپنی صُورت پر بنایا ہے۔، اور اسی بنیاد پر اس کی قدر ہے۔ ہر انسان خدا کی منفرد تخلیق ہے، خواہ وہ مرد ہو یا عورت، صحت مند ہو یا بیمار، مکمل ہو یا کسی جسمانی معذوری کا شکار، جوان ہو یا بوڑھا، امیر ہو یا غریب (امثال 14: 31)، دنیا میں پیدا ہو چکا ہو یا ابھی ماں کے رحم میں ہو، اس کی جلد کی رنگت کچھ بھی ہو، اور اس کی ذہنی یا جسمانی صلاحیتیں جیسی بھی ہوں (خروج 4: 11)۔

بہت سی ثقافتوں میں بزرگوں کو فراموش کر دیا جاتا ہے، خواتین کو مردوں سے کم تر سمجھا جاتا ہے، اور بچوں کو بوجھ تصور کیا جاتا ہے۔ کچھ معاشروں میں جسمانی معذوروں کو منحوس سمجھ کر نظرانداز یا مسترد کر دیا جاتا ہے۔ دنیا بھر میں نسل پرستی عام ہے، جہاں ایک قبیلہ یا قوم خود کو دوسروں سے برتر سمجھتی ہے اور دوسرے کو حقارت سے دیکھتی ہے۔ یہ سب رویے انسان کی توہین کرتے ہیں، حالانکہ انسان خدا کی سب سے قیمتی تخلیق ہے۔ اگر ہم صحت مند اور خدا کو جلال دینے والے تعلقات قائم کرنا چاہتے ہیں، تو سب سے پہلے ہمیں ہر انسان کو خدا کے صورت بردار کے طور پر دیکھنا ہوگا۔

مکاشفہ 4: 11 ہمیں بتاتی ہے کہ خدا نے سب چیزیں اپنے لیے پیدا کیں، اور اس میں یقیناً انسان بھی شامل ہے۔ ہم خدا کی طرف سے، خدا کے لیے پیدا کیے گئے ہیں۔ جو کچھ ہم کرتے ہیں، وہ ہمیں خدا کے جلال کے لیے کرنا چاہیے (1 کرنتھیوں10: 31 ، 1 پطرس 2: 12)۔ ہمیں دوسرے لوگوں کے فائدے کے لیے بھی پیدا کیا گیا ہے۔

ہمیں دوسروں کے ساتھ مل کر خدا کے مقاصد کو پورا کرنے کے لیے پیدا کیا گیا ہے۔ شادی اس بات کی ایک مثال ہے کہ خدا نے انسانوں کو ایک دوسرے کے ساتھ کام کرنے کے لیے بنایا ہے۔ جب خدا نے پہلا انسان پیدا کیا تو فوراً کہا، " آدمؔ کا اکیلا رہنا اچھّا نہیں۔ مَیں اُس کے لِئے ایک مددگار اُس کی مانِند بناؤں گا۔" (پیدائش 2: 18)۔ عورت اہم پہلوؤں میں مرد کے مشابہ ہے، لیکن کچھ دوسرے پہلوؤں میں مختلف بھی ہے۔ وہ مل کر اپنی موجودگی کے لیے خدا کے مقاصد کو پورا کر سکتے ہیں۔ خدا نے ان دونوں کو ایک ساتھ وہ کام سونپا جو انہیں کرنا تھا (پیدائش 1: 26-28)۔

کلیسیا بھی اس بات کی ایک اور مثال ہے کہ خدا نے انسانوں کو مل کر کام کرنے کے لیے پیدا کیا۔ رسول پولوس نے بدن کے مختلف اعضا کی مثال دی (1 کرنتھیوں 12:12-26)۔ کوئی شخص یہ نہ سمجھے کہ وہ اکیلا خدا کے مقصد کو پورا کر سکتا ہے یا اسے دوسروں کی ضرورت نہیں۔ شادی اور کلیسیا صرف دو مثالیں ہیں کہ خدا نے انسانوں کو مل کر کام کرنے کے لیے پیدا کیا ہے۔

ہمیں دوسروں کی خدمت کے لیے پیدا کیا گیا ہے (گلتیوں 5: 13-14)۔ ہمیں دوسروں کے ساتھ محبت بھرے تعلقات کے لیے پیدا کیا گیا ہے، جہاں ہم اپنی ذات کو دوسروں کے فائدے کے لیے پیش کریں۔

◄ طالب علموں کوامثال 17:17، گلتیوں 6: 2، اور فلپیوں 2: 4 کو جماعت کے لیے پڑھنا چاہیے۔

ہم خدا کے لیے اور دوسروں کے لیے پیدا کیے گئے ہیں۔ خدا کے کلام میں ہم سے جو بھی مطالبہ کیا گیا ہے، وہ یا تو ہمارے اور خدا کے تعلق سے متعلق ہے، یا ہمارے اور دوسروں کے تعلق سے، یا دونوں سے۔ درحقیقت، یسوع نے کہا کہ خدا ہم سے جو کچھ بھی چاہتا ہے، وہ ان احکام میں خلاصہ کیا جا سکتا ہے کہ ہم خدا سے اپنی پوری ہستی کے ساتھ محبت کریں اور دوسروں سے ایسے محبت کریں جیسے ہم خود سے کرتے ہیں۔

◄ ایک طالب علم متی 22: 36-39 جماعت کے لیے پڑھے۔

ہم خدا کے لیے پیدا کیے گئے ہیں، اور ہم دوسروں کے لیے پیدا کیے گئے ہیں؛ یہ دونوں حقیقتیں آپس میں گہرا تعلق رکھتی ہیں۔ خدا کو جلال دینے اور اس کی شبیہہ کو منعکس کرنے کے بڑے طریقوں میں سے ایک ہمارا دوسروں کے ساتھ تعلق ہے۔ خدا کی فطرت اور اعمال ہمیں اس جیسا بننے کا پابند کرتے ہیں (1 پطرس 1: 16، متی 5: 48)۔ تمام لوگ خدا کی صورت پر بنائے گئے ہیں، لیکن جب ہم خدا کی طرح عمل کرتے ہیں، تب ہم اس کی فطرت اور کردار کو منعکس کرتے ہیں۔

جب کوئی شخص ضرورت مندوں پر رحم کرتا ہے، تو اس کی شفقت خدا کی شفقت کا عکس ہوتی ہے، اور اس کا رحمدلانہ عمل خدا کے کام کی نقل ہوتی ہے۔ یہ بات سچ ہے چاہے رحم کرنے والا ایماندار ہو یا بے ایمان۔ تاہم، ہم خدا کی سب سے بہترین نقل تب کرتے ہیں جب ہم اس کے ساتھ صلح کر لیتے ہیں اور اس کا روح ہمارے اندر کام کر رہاہوتا ہے۔

◄ایک طالب علم 2 پطرس 1: 2-11 جما عت کے لیے پڑھے۔

یہ حوالہ مسیح کے ہر پیروکار کے لیے خدا کے حیرت انگیز منصوبے کی وضاحت کرتا ہے۔ اس حوالے سے ہم سیکھتے ہیں کہ:

1. جلال اور نیکی سے، یسوع نے ہمیں بلایا ہے اور ہمیں شاندار وعدے دیے ہیں (آیات 3-4)۔

2. ان وعدوں کے ذریعے، جو مسیح کو جانتے ہیں، وہ خدا کی الٰہی فطرت میں شریک ہو سکتے ہیں (آیت 4)۔

3. خدا باپ اور یسوع مسیح کے ساتھ تعلق کے ذریعے، ہمیں زندگی اور دینداری کے لیے ہر چیز حاصل ہے (آیت 3)۔

4. ان باتوں کی بنیاد پر، ہم یسوع کی مانند زندگی گزار سکتے ہیں اور ویسے جی سکتے ہیں جیسے خدا نے ہمیں بلایا ہے (آیات 5-8)۔

◄یہ کیسے ممکن ہے کہ ہم اپنے تعلقات میں خدا کے کردار اور فطرت کو منعکس کریں؟

◄ایک شاگرد 2 کرنتھیوں 4:4 گروپ کے لیے پڑھے۔ خدا کی کامل صورت کون ہے؟

◄ایک شاگرد 2 کرنتھیوں 3: 18 جماعت کے لیے پڑھے۔

روح القدس ایمانداروں کو تبدیل کرتا ہے تاکہ وہ بڑھتے ہوئے خداوند کے جلال کو منعکس کریں۔ یسوع کو دیکھ کر، ہم اپنے رویوں اور برتاؤ میں اس کے جیسے بنتے جاتے ہیں۔ یہی انجیل کی خوبصورتی ہے۔ خدا باپ، یسوع اور روح القدس کی قدرت کے ذریعے، ہم خدا کے کردار کو منعکس اور اس کی تقلید کر سکتے ہیں۔

ہمارے دوسروں کے ساتھ تعلقات میں، خدا ہمیں اس کی تقلید کرنے کے لیے بلاتا ہے (افسیوں 5: 1)۔ جیسے ایک بچہ اپنے والدین یا بڑے بہن بھائی کو دیکھ کر اس کی نقل کرتا ہے، ہمیں یسوع کی مثال کو دیکھنا اور پھر اس کے رویے، نقطہ نظر اور اعمال کی نقل کرنا ہے جب ہم دوسروں کے ساتھ تعلق رکھتے ہیں (فلپیوں 2: 5-7، افسیوں 5: 2)۔

⏴شاگرد درج ذیل حوالہ جات کو جماعت کے لیے پڑھیں۔ ان میں سے ہر ایک میں (1) خدا کے کردار یا کام اور (2) خدا کی ہم سے توقعات ۔ (پہلے دو حوالہ جات کے نوٹس مثال کے طور پر پہلے ہی لکھے جا چکے ہیں۔ اس سبق کے آخر میں، اس مطالعے کا تسلسل اسائنمنٹ 2 میں ہے۔)

ہم میں سے کوئی بھی فطری طور پر خدا کی محبت کا اظہار نہیں کرتا کیونکہ ہم خود غرض فطرت کے ساتھ پیدا ہوتے ہیں۔ خدا ہمیں اپنے اصل منصوبے پر بحال کرنے کے لیے فضل فراہم کرتا ہے۔ عاجزی سے کی گئی سپردگی کی دعا ہمیں اس تبدیلی کے عمل سے گزار سکتی ہے۔

بائبل ظاہر کرتی ہے کہ خدا نے محبت کے ساتھ انسانوں کو تعلقات کے لیے تخلیق کیا: خدا کے ساتھ تعلق اور دوسروں کے ساتھ تعلقات۔

چونکہ خدا انسان کا خالق اور تعلقات کا معمار ہے، اس لیے ہمیں:

1. انسانی تعلقات کے بارے میں اس کا نقطۂ نظر حاصل کرنا چاہیے۔

2. یہ سمجھنا چاہیے کہ ہم اپنے تعلقات میں کیے گئے فیصلوں کے لیے اس کے سامنے جوابدہ ہیں۔

3. اس کے منصوبے کو قبول کرنا اور اس پر عمل کرنا چاہیے۔

یہ مطالعہ آپ کو ان چیزوں کو سمجھنے میں مدد دے گا اور آپ کو اس قابل بنائے گا کہ آپ دوسروں کو انسانی تعلقات کے بارے میں خدا کی مرضی سکھا سکیں۔

◄ثقافت انسانی تعلقات کے لیے ایک ناکافی راہنما کیوں ہے؟

◄اس سبق میں آپ کے لیے کون سا تصور نیا تھا؟ یہ کیوں اہم ہے؟ اس کو سمجھنے سے آپ کے تعلقات پر کیا اثر پڑے گا؟ یہ آپ کی خدمت (منسٹری) کو کیسے متاثر کرے گا؟

◄آپ اس کورس کے مطالعے سے کیسے ترقی کی امید رکھتے ہیں؟

آسمانی باپ،

تیرا شکر ہو کہ تُو نے مجھے اپنی شبیہ پر ایک مقصد کے ساتھ پیدا کیا۔

تیرا شکر ہو کہ تُو نے مجھے اپنے ساتھ تعلق کے لیے بنایا اور یسوع کی میرے گناہوں کے لیے موت کے ذریعے اسے ممکن بنایا۔

تیرا شکر ہو تیرے کلام کے خزانے کے لیے، جو مجھے سکھاتا ہے کہ میں تجھ سے کیسے تعلق رکھوں اور دوسروں کے ساتھ اپنے تعلقات میں تیرا جلال کیسے ظاہر کروں۔

اپنے کلام اور اپنی روح کے ذریعے، مجھے وہ زندگی اپنانا سکھا جو تُو نے میرے لیے مقرر کی ہے۔

مجھے اس قابل بنا کہ میں اپنے اردگرد کے ہر شخص کے سامنے تیرا درست عکس پیش کر سکوں، تاکہ وہ تجھے جان سکیں۔

آمین۔

(1) وضاحت کریں کہ خدا کی شبیہ میں تخلیق کی سچائی ہر شخص کو قدر کیسے دیتی ہے اور تخلیق کے انکار سے انسانی قدر کیسے چھن جاتی ہے۔

(2) نیچے دی گئی جدول میں ہر ایک کتابِ مقدس کی عبارت کو پڑھیں۔ درج ذیل نکات نوٹ کریں:

(1) خدا کی صفات یا اس کا کام

(2) ہمارے لیے خدا کی توقع

(3) اسائنمنٹ 2 کے ٹیبل اور سبق کے آخر میں دیے گئے ٹیبل کو دیکھتے ہوئے، اپنی زندگی کا جائزہ لیں:

• کیا آپ اس وقت خدا کی شبیہ کو ایسے منعکس کر رہے ہیں جو اُس کی تعظیم اور جلال کا سبب بنے؟

• کیا کوئی ایسی نافرمانی ہے جس کا اعتراف ضروری ہے تاکہ آپ کی زندگی زیادہ واضح اور مؤثر طور پر خدا کے مقصد سے ہم آہنگ ہو؟

• خدا آپ سے کیا قدم اٹھانے کا چاہتا ہے تاکہ آپ یسوع کے مزید مشابہ ہو سکیں؟

اس مطالعہ کے جواب میں ایک دعا لکھیں۔ (آپ کو یہ تحریر اپنی جماعت کے لیڈر کے ساتھ شیئر کرنے کی ضرورت نہیں ہے، بس اتنا بتا دیں کہ آپ نے اسائنمنٹ مکمل کر لی ہے۔)