اس سبق کے اختتام تک، طالب علم کو چاہیے کہ وہ:

(1) مرد اور عورت کی ضروریات کے بارے میں خدا کے ڈیزائن اور شادی میں خدا کی ہدایات کے درمیان تعلق کو سمجھے۔

(2) بائبلی اصولوں کی پیروی کرتے ہوئے یہ دکھا سکے کہ شوہر اور بیوی ایک دوسرے کی ضروریات کو کس طرح پورا کر سکتے ہیں۔

یہ کوئی راز کی بات نہیں کہ مرد اور عورت کئی طرح سے ایک دوسرے سے مختلف ہوتے ہیں! بہت سے مردوں کو اپنے جذبات کا اظہار کرنا مشکل لگتا ہے، جبکہ بہت سی عورتیں جذبات کے اظہار کو حقیقی گفتگو کا لازمی حصہ سمجھتی ہیں۔ مرد عام طور پر زیادہ خطرہ مول لینے والے ہوتے ہیں، جبکہ خواتین زیادہ تر تحفظ اور سیکیورٹی کے بارے میں فکرمند رہتی ہیں۔ مرد فطری طور پر جسمانی خوبصورتی کی طرف زیادہ مائل ہوتے ہیں، جبکہ زیادہ تر عورتیں جذباتی قربت کو زیادہ اہمیت دیتی ہیں۔ اس طرح کے کئی اور فرق بھی گنوائے جا سکتے ہیں۔

عام صنفی فرق کے علاوہ، شوہر اور بیوی کی شخصیات میں بھی فرق ہوتا ہے۔ ہو سکتا ہے کہ ایک فرد لوگوں کے ساتھ وقت گزارنے کو پسند کرتا ہو، جبکہ دوسرا تنہائی کو ترجیح دیتا ہو۔ کچھ اختلافات معمولی نوعیت کے ہو سکتے ہیں، جیسے کہ گھر میں کتنی روشنی ہونی چاہیے یا کمرے کا درجہ حرارت کیا ہونا چاہیے۔ بہت سی شادیاں اس بات پر اختلاف کی وجہ سے مشکل میں پڑ جاتی ہیں کہ پیسہ کس طرح خرچ کیا جائے۔ یہ اختلافات لازمی طور پر کردار کی کمزوری نہیں ہوتے بلکہ محض شخصیت اور رائے کے فرق ہو سکتے ہیں۔

چونکہ شادی ایک مرد اور عورت کو متحد کرتی ہے، بعض اوقات لوگ سمجھتے ہیں کہ شادی کے بعد یہ اختلافات ختم ہو جانے چاہئیں۔ بعض اوقات ایک شریکِ حیات دوسرے کی عادات، آراء اور ترجیحات کو بدلنے کی مسلسل کوشش کرتا ہے، یہ سوچ کر کہ یہ خامیاں ہیں جنہیں درست کیا جانا چاہیے۔

یہ سچ ہے کہ ہر فرد کو اپنے تعلقات کی بدولت نشوونما پانا اور بہتری کی طرف بڑھنا چاہیے۔ لیکن بعض اوقات کسی کو بدلنے کی ہماری کوشش اس کی انفرادیت پر حملہ ہوتی ہے۔ صحت مند شادی میں، دونوں میاں بیوی ایک دوسرے سے محبت کرنے، عزت دینے، قدر کرنے اور خدمت کرنے کا رویہ اپناتے ہیں۔

◄ مرد اور عورت کے اور کون سے فرق ہوتے ہیں؟ وہ کون سے ذاتی اختلافات ہیں جنہیں لوگوں کو قبول کرنا چاہیے؟

گیری تھامس اپنی کتاب Sacred Marriage میں لکھتے ہیں:

اچھی شادی کوئی ایسی چیز نہیں جو کسی کو اتفاقاً مل جائے، بلکہ یہ وہ چیز ہے جس کے لیے محنت کرنا پڑتی ہے۔ اس میں جدوجہد شامل ہوتی ہے۔ آپ کو اپنی خود غرضی کو مصلوب کرنا ہوگا۔ بعض اوقات آپ کو سامنے آ کر سامنا کرنا پڑے گا، اور بعض اوقات اعتراف کرنا ہوگا۔ معافی کو اپنانا ضروری ہے۔ یہ یقینی طور پر ایک مشکل کام ہے، لیکن آخرکار اس کے مثبت نتائج برآمد ہوتے ہیں۔ یہ آخرکار ایک خوبصورت، قابلِ بھروسا اور ایک دوسرے کا سہارا بننے والا رشتہ تخلیق کرتا ہے۔[1]

گیری تھامس اوٹو پائپر کے حوالے سے مزید لکھتے ہیں:

اگر شادی بہت سے لوگوں کے لیے ایک مایوس کن تجربہ بن جاتی ہے، تو اس کی وجہ ان کے ایمان کی بے حسی میں پائی جاتی ہے۔ لوگ اس حقیقت کو پسند نہیں کرتے کہ خدا کی برکات صرف ان لوگوں کو حاصل ہوتی ہیں جو مستقل مزاجی سے انہیں تلاش کرتے ہیں (متی 7:7؛ لوقا 11: 9)۔ شادی، لہٰذا، ایک تحفہ بھی ہے اور ایک ذمہ داری بھی جسے پورا کیا جانا چاہیے۔[2]

اکثر شادیاں اس لیے کامیاب نہیں ہوتیں کیونکہ شوہر اور بیوی اپنی اپنی ضروریات کے بارے میں سوچ رہے ہوتے ہیں بجائے اس کے کہ وہ ایک دوسرے کی ضروریات کو پورا کریں۔

یہ حقیقت ہے کہ ہم ایک دوسرے کی سب سے گہری ضروریات کو پورا نہیں کر سکتے۔ صرف ہمارا آسمانی باپ ہی ہمارے دل کی گہری خواہشات اور تمناؤں کو مکمل طور پر پورا کر سکتا ہے۔ یہی وجہ ہے کہ یسوع مسیح دنیا میں آئے۔ ان کا مقصد ہمیں نجات دینا، ہمیں اپنی روح سے معمور کرنا اور ہمیں "ابا، باپ" کے ساتھ گہرے اور تسلی بخش تعلق میں لانا ہے (رومیوں 8: 14-15؛ گلتیوں 4: 6)۔

تاہم، خدا نے شادی کو ایک تربیتی میدان بھی بنایا ہے، جہاں ہم خدمت گزار بننا سیکھتے ہیں؛ وہی خدمت جو ہم یسوع کی زندگی میں دیکھتے ہیں (یوحنا 13: 14)۔ خدا چاہتا ہے کہ ہر شریکِ حیات میں وہ عاجزانہ دل پیدا ہو جو دوسرے کے لیے فکرمند ہو (فلپیوں 2: 3-8)۔

کچھ انتہائی خوشحال اور بابرکت شادیاں اس لیے پروان چڑھتی ہیں کیونکہ کسی ایک شریکِ حیات نے اپنی ذات کو پسِ پشت ڈال کر دوسرے کی خدمت کا فیصلہ کیا—خواہ وہ بیماری، ناکامی، حادثے یا کسی غم میں ہو۔کئی شوہروں نے گواہی دی کہ اگر ان کی بیویوں نے ان کے لیے دعا نہ کی ہوتی، انہیں معاف نہ کیا ہوتا، انہیں جواب دہ نہ ٹھہرایا ہوتا، اور انہیں غیر مشروط محبت نہ دی ہوتی، تو وہ زندگی میں ناکام ہو جاتے۔کئی بیویوں نے تسلیم کیا کہ اگر ان کے شوہروں نے صبر اور سمجھ داری نہ دکھائی ہوتی، تو وہ بچپن میں اپنے باپ کی طرف سے کیے گئے ظلم یا دیگر صدمات سے نہ نکل پاتیں۔ چونکہ ہم ایک گناہ آلود دنیا میں رہتے ہیں، جہاں ساری مخلوق کراہ رہی ہے (رومیوں 8: 22)، اس لیے ہر شادی شدہ شخص زخم اور نشانات لے کر آتا ہے۔ لیکن خدا کا فضل ہمیں یہ موقع دیتا ہے کہ ہم ایک دوسرے کا خیال رکھیں اور ایک دوسرے کے زخموں پر مرہم لگائیں ۔

ہم سب فطری طور پر خود غرض پیدا ہوتے ہیں۔ ہمارا رجحان زیادہ تر اپنی ضروریات پر مرکوز ہوتا ہے۔ لیکن خدا کا نجات بخش اور مقدس کرنے والا فضل ہمیں بدل سکتا ہے۔ جب خدا کی روح ہم میں کام کرتی ہے، تو ہم ایسے لوگ بننے لگتے ہیں جو دوسروں کی ضروریات کو اپنی ضروریات پر مقدم رکھتے ہیں۔ شادی اس وقت ترقی کرتی ہے جب ہر شریکِ حیات دوسرے کی ضروریات اور خواہشات کا خیال رکھتا ہے۔

◄ آپ کے خیال میں، عملی طور پر روزمرہ زندگی میں خدمت کو چننے کا کیا مطلب ہے؟

خدا نے مرد اور عورت کو مختلف ضروریات اور خواہشات کے ساتھ تخلیق کیا ہے۔ اس کا مطلب یہ ہے کہ ایک مرد کو یہ نہیں سمجھنا چاہیے کہ اس کی بیوی وہی چیزیں پسند کرے گی جو اسے خوش کرتی ہیں، اور اسی طرح ایک بیوی کو بھی یہ نہیں سوچنا چاہیے کہ اس کا شوہر اسی سلوک کو پسند کرے گا جو وہ خود چاہتی ہے۔ یقیناً، کچھ معاملات میں نرمی، محبت، اور عزت دونوں کے لیے ضروری ہیں، لیکن مرد اور عورت کی کچھ ضروریات ایک دوسرے سے منفرد ہوتی ہیں۔

اگر ہم مرد اور عورت کی مخصوص ضروریات کو سمجھ لیں، تو ہم بہتر طریقے سے اپنے شریکِ حیات کی ضروریات کو پورا کر سکتے ہیں۔ بدقسمتی سے، بہت سے شوہر اور بیوی اپنی بات چیت اور جھگڑوں میں ایک دوسرے کی ضروریات کو نظر انداز کر دیتے ہیں۔ اس کی وجہ سے دونوں ناراض اور دل برداشتہ ہو سکتے ہیں کیونکہ انہیں لگتا ہے کہ ان کا شریکِ حیات انہیں نہیں سمجھتا۔

تمام انسانوں کو محبت اور عزت کی ضرورت ہوتی ہے، لیکن مرد اور عورت میں ایک اہم فرق ہے۔عورت کی بنیادی ضرورت محبت ہے، جبکہ مرد کی بنیادی ضرورت عزت ہے۔[1]

◄ آپ نے مرد اور عورت کی ان ضروریات کے فرق کو اپنی زندگی میں کیسے محسوس کیا ہے؟

افسیوں 5: 25، 28 کہتی ہے: " اَے شَوہرو! اپنی بِیوِیوں سے مُحبّت رکھّو جَیسے مسِیح نے بھی کلِیسیا سے مُحبّت کر کے اپنے آپ کو اُس کے واسطے مَوت کے حوالہ کر دِیا۔۔۔۔ اِسی طرح شَوہروں کو لازِم ہے کہ اپنی بِیوِیوں سے اپنے بدن کی مانِند مُحبّت رکھّیں۔۔ ۔"

ایک شوہر کو بار بار اپنی بیوی سے کہنا چاہیے کہ وہ اس سے محبت کرتا ہے اور یہ فرض نہیں کرنا چاہیے کہ وہ پہلے سے جانتی ہے۔ اسے صرف الفاظ سے نہیں بلکہ عمل سے بھی اپنی محبت کا اظہار کرنا چاہیے۔ اسے محبت ان طریقوں سے ظاہر کرنی چاہیے جو اس کی بیوی کے لیے اہم ہیں۔ اسے یہ نہیں سوچنا چاہیے کہ وہ جس طرح محبت کا اظہار کرتا ہے، بیوی کو بھی اسی سے خوشی ملے گی۔ اس کی ضروریات مختلف ہو سکتی ہیں۔

(1) شوہر اپنی بیوی سے محبت کا اظہار تحفظ فراہم کرکے کرتا ہے۔[1]

بیوی کو یہ یقین ہونا چاہیے کہ اس کا شوہر اسے جسمانی اور جذباتی طور پر محفوظ رکھے گا۔ شوہر کو پڑوسیوں کے ساتھ کسی بھی تنازعے کو خود حل کرنا چاہیے۔ اسے گھر کو ایک محفوظ جگہ بنانا چاہیے۔ اگر بیوی پر دوسروں، یہاں تک کہ رشتہ داروں کی طرف سے بھی تنقید کی جائے تو شوہر کو اس کے حق میں بولنا چاہیے۔شوہر کو کبھی بھی اپنی بیوی پر ہاتھ نہیں اٹھانا چاہیے اور نہ ہی اسے جسمانی طور پر نقصان پہنچا کر اپنی بات منوانی چاہیے۔ اسے اپنی بہترین کوشش کرنی چاہیے کہ وہ اپنے خاندان کی مالی ضروریات کو پورا کرے۔ اگر شوہر مالی معاملات میں لاپرواہی برتتا ہے تو بیوی کو لگتا ہے کہ وہ اپنے خاندان کی ضروریات کا خیال نہیں رکھتا۔

شوہروں کے لیے مالی نکات

شادی میں مالی مسائل تنازعات کی سب سے بڑی وجوہات میں سے ایک ہیں۔ شوہروں کو چاہیے کہ:

• کسی بھی ناجائز یا غیر اخلاقی طریقے سے منافع حاصل کرنے سے انکار کریں؛ یاد رکھیں کہ آپ خدا کے اختیار میں ہیں۔

• اپنے چرچ کو دَہ یکی دیں کیونکہ آپ خدا پر بھروسا کر رہے ہیں کہ وہ آپ کی ضروریات پوری کرے گا۔

• ملازمت کے لیے بہترین موقع تلاش کریں، لیکن فی الحال مشکل یا ناپسندیدہ کام کرنے کے لیے بھی تیار رہیں۔

• چاہے ملازمت ہو یا نہ ہو، ہر روز ایسا کام کریں جو آپ اور دوسروں کے لیے فائدہ مند ہو۔

• آج قرض لے کر کل کے پیسے خرچ نہ کریں۔

• جب تفریح یا خوشی کے لیے پیسہ خرچ کریں تو اپنی بیوی اور بچوں کو بھی شامل کریں۔

• باقاعدگی سے عام اخراجات جیسے گھر کے کرائے کے لیے بچت کریں۔

• دولت کو صرف آرام کے لیے خرچ کرنے کے بجائے اپنی صورتحال کو بہتر بنانے کے لیے سرمایہ کاری کریں۔

(2) شوہر اپنی بیوی کے لیے وفادار رہ کر محبت کا ثبوت دیتا ہے۔

شوہر کو چاہیے کہ وہ اخلاقی پاکیزگی اختیار کرے اور صرف اپنی بیوی سے محبت کرے،پیاری ہرنی اور دِل فریب غزال کی مانِند اُس کی چھاتِیاں تُجھے ہر وقت آسُودہ کریں اور اُس کی مُحبّت تُجھے ہمیشہ فریفتہ رکھّے امثال 5 : 19 ۔ اگر شوہر کسی اور عورت سے غیر مناسب تعلق رکھے یا غیر اخلاقی مواد دیکھے، تو بیوی کو محسوس ہوتا ہے کہ وہ اس سے محبت نہیں کرتا۔

(3) شوہر اپنی بیوی کو سمجھنے کی کوشش کرے۔

شوہر ہمیشہ اپنی بیوی کو سمجھنے میں کامیاب نہیں ہوگا، لیکن اسے چاہیے کہ وہ وقت نکال کر اس کی بات سنے اور اسے سمجھنے کی کوشش کرے۔ کلامِ مقدس شوہروں کو ہدایت دیتا ہے: اَے شَوہرو! تُم بھی بِیوِیوں کے ساتھ عقل مندی سے بسر کرو ۔۔۔۔۔۔ زِندگی کی نِعمت کے وارِث ہیں (1 پطرس 3: 7)۔ اگر کوئی شوہر اپنی بیوی کے جذبات اور خیالات کا مذاق اُڑاتا ہے، تو وہ خود کو غیرمحبوب محسوس کرے گی۔ اُسے ضرورت ہے کہ اُس کا شوہر اُس کے خدشات کو سمجھے، چاہے اُس کی باتیں اُسے غیر منطقی ہی کیوں نہ لگیں۔

چونکہ خدا نے شوہر کو گھر کا سربراہ بنایا ہے (افسیوں 5: 23)، اس لیے گھر کی قیادت کی ذمہ داری اُسی پر ہے (1 تمیتھیس 3: 4-5)۔ تاہم، شوہر اور بیوی کو ہر معاملے میں مشاورت کرنی چاہیے تاکہ وہ زیادہ تر فیصلوں پر متفق ہو سکیں۔ شوہر کو جلد بازی میں کوئی فیصلہ نہیں کرنا چاہیے بلکہ اپنی بیوی کے جذبات اور رائے کو مدنظر رکھنا چاہیے۔ اگر وہ کسی معاملے پر متفق نہ ہو سکیں، تو شوہر کو فیصلہ لینا پڑ سکتا ہے، لیکن اُسے اس بات پر افسوس ہونا چاہیے کہ وہ اتفاقِ رائے تک نہ پہنچ سکے۔ عام طور پر، اتحاد کی کمی شوہر کے لیے ایک انتباہ ہوتی ہے۔ خواتین میں اکثر وہ حکمت اور بصیرت ہوتی ہے جس کی مردوں کو بہتر فیصلے کرنے کے لیے ضرورت ہوتی ہے۔

◄ ایک طالبعلم کو چاہیے کہ وہ افسیوں4: 2 -3، 15-16 جماعت کے لیے پڑھے۔ یہ آیات شوہر اور بیوی کے رشتے پر کیسے لاگو ہوتی ہیں؟

(4) شوہر اپنی بیوی سے محبت کا اظہار اس کی قدر کرکے کرتا ہے۔[2]

بہت سی بیویاں محسوس کرتی ہیں کہ ان کے شوہر ان کی محنت کو سراہتے نہیں۔ ایک شوہر کو چاہیے کہ وہ اپنی بیوی کا شکر گزار ہو۔ اسے تسلیم کرنا چاہیے کہ وہ اپنے خاندان کے لیے کتنی محنت کرتی ہے۔ اسے کبھی بھی اپنی بیوی پر دوسروں کے سامنے تنقید نہیں کرنی چاہیے۔[3] بلکہ اسے اس کے کردار، خوبصورتی اور صلاحیتوں کی تعریف کرنی چاہیے۔ جہاں تک ممکن ہو، اسے اپنی بیوی کے لیے اچھے لباس کا بندوبست کرنا چاہیے۔ ایک بیوی خود کو غیرمحبوب محسوس کرتی ہے جب اسے لگے کہ اس کا شوہر اس کی ظاہری خوبصورتی کا خیال نہیں رکھتا۔

جب کوئی شوہر اپنی بیوی پر تنقید کرتا ہے تو وہ اسے یہ سوچنے پر مجبور کر سکتا ہے کہ وہ ایک ناکافی شخصیت کی حامل ہے اور اسے مایوسی میں ڈال سکتا ہے۔ پولس ایمانداروں کو سکھاتا ہے"کِسی کی بدگوئی نہ کریں۔ تکراری نہ ہوں بلکہ نرم مِزاج ہوں اور سب آدمِیوں کے ساتھ کمال حلِیمی سے پیش آئیں۔" (ططس 3: 2)۔ اگر تنقید ضروری ہو تو شوہر کو بہت محتاط رہنا چاہیے کہ اس کی بیوی کی قدر اس کی تنقید سے زیادہ محسوس ہو۔ اسے دوسری ایسی عورتوں کی مثالیں دینے سے بھی گریز کرنا چاہیے جو کسی خاص خوبی میں اس کی بیوی سے بہتر ہوں۔

(5) شوہر اپنی بیوی سے محبت کا اظہار رشتہ نبھانے کے لیے وقت نکال کر کرتا ہے۔

زندگی کو ایک ساتھ گزارنے کے لیے بات چیت کے لیے وقت نکالنا ضروری ہے۔ الفاظ کے ذریعے تعلقات مضبوط ہوتے ہیں (امثال 16: 24، امثال 20: 5)۔ میاں بیوی کو ایک دوسرے کے ساتھ اپنی روزمرہ کی مصروفیات کے بارے میں بات کرنی چاہیے۔ انہیں اپنی دوستیوں، جذبات، خواہشات اور فکروں پر گفتگو کرنی چاہیے۔ ایک بیوی خود کو محبوب محسوس کرتی ہے جب اس کا شوہر اس کے ساتھ وقت گزارنے اور اس کی بات سننے کے لیے تیار ہوتا ہے۔ جب شوہر تھکا ہوا گھر آتا ہے تو ہو سکتا ہے کہ وہ بات کرنے یا گھر کے مسائل سننے کے موڈ میں نہ ہو، لیکن پھر بھی اسے اس ضرورت کو نظرانداز نہیں کرنا چاہیے۔ اگر ایک شوہر جسمانی قربت چاہتا ہے لیکن جذباتی طور پر دستیاب نہیں ہوتا، تو بیوی خود کو استعمال شدہ اور غیرمحبوب محسوس کرتی ہے۔

(6) شوہر اپنی بیوی سے محبت کا اظہار اس کی کمزوریوں پر صبر کر کے کرتا ہے۔

1 پطرس 3: 7 سکھاتا ہے، "اَے شَوہرو! تُم بھی بِیوِیوں کے ساتھ عقل مندی سے بسر کرو اور عَورت کو نازک ظرف جان کر اُس کی عِزّت کرو..." زیادہ تر عورتیں جسمانی طور پر مردوں جتنی مضبوط نہیں ہوتیں۔ نیز، عورتیں مردوں کے مقابلے میں جذباتی تکلیف اور دباؤ کا زیادہ شکار ہوتی ہیں۔ ایک مرد کو اپنی بیوی کو دلاسہ دینا اور اس کی حوصلہ افزائی کرنی چاہیے۔ اسے سیکھنا چاہیے کہ وہ کس طرح اس کے دباؤ کو کم کر سکتا ہے۔ جب وہ تھکی ہوئی ہو، پریشان ہو یا کسی فکر میں مبتلا ہو تو اسے سخت مطالبات سے گریز کرنا چاہیے۔

(7) شوہر اپنی بیوی سے محبت کا اظہار اس کی عملی ضروریات پوری کر کے کرتا ہے۔

جس طرح ایک مرد اپنے کام کے لیے بہترین اوزار اور ایک اچھا ماحول چاہتا ہے، اسی طرح اسے اپنی بیوی کے لیے بھی ایک اچھا ماحول فراہم کرنا چاہیے۔ اسے گھر کی ضروری مرمت کروانی چاہیے اور بیوی کو وہ سہولتیں دینی چاہئیں جو اس کے آرام اور کام کے لیے ضروری ہیں۔

جب شوہر اپنی بیویوں سے محبت کرتے ہیں تو اس کے نتائج

زیادہ تر شوہر یہ پاتے ہیں کہ جب وہ اپنی بیویوں سے محبت کا اظہار کرتے ہیں تو ان کی بیویاں خوشی اور تعاون کے ساتھ جواب دیتی ہیں۔ عورتیں اس وقت خوشی محسوس کرتی ہیں جب ان کے شوہر ان کے ساتھ وفادار رہتے ہیں اور محبت کا عملی اظہار کرتے ہیں۔ مرد اپنی شادی سے سب سے زیادہ برکت اسی وقت حاصل کرتے ہیں جب وہ اپنی بیویوں سے محبت کرتے ہیں (افسیوں 5: 28)۔ تاہم، مردوں کو ہمیشہ توقع کے مطابق نتائج نہیں ملتے۔ بعض اوقات استثنائی حالات ہوتے ہیں۔ ایک شوہر کو محبت کا اظہار کسی خاص فائدے کے حصول کے لیے نہیں کرنا چاہیے بلکہ خدا کو خوش کرنے اور اپنی بیوی کی ضروریات پوری کرنے کے لیے کرنا چاہیے، نہ کہ اپنی خواہشات کی فکر میں۔

کچھ بیویاں ماضی کے تجربات کی وجہ سے جذباتی طور پر مجروح ہو چکی ہوتی ہیں، اور وہ فوری طور پر اپنے شوہروں کی محبت کا جواب نہیں دے پاتیں۔ محبت کا یہ اظہار کوئی ایسا طریقہ نہیں جو صرف چند دنوں کے لیے آزمایا جائے بلکہ یہ ایک مستقل رویہ ہونا چاہیے۔ ایک شوہر کو ہمیشہ محبت کا مظاہرہ کرتے رہنا چاہیے کیونکہ اس کے دل میں خدا اور اپنی بیوی کے لیے حقیقی محبت ہونی چاہیے۔ مسیح نے کلیسیا سے اسی طرح وفاداری اور قربانی کی محبت کی ہے۔

افسیوں 5: 33میں حکم دیا گیا ہے، " بہر حال تُم میں سے بھی ہر ایک اپنی بِیوی سے اپنی مانِند مُحبّت رکھّے اور بِیوی اِس بات کا خیال رکھّے کہ اپنے شَوہر سے ڈرتی رہے۔"

مرد کو عزت کی ضرورت ہوتی ہے۔ زیادہ تر مرد عزت کو ترجیح دیتے ہیں، یہاں تک کہ اگر لوگ انہیں پسند نہ بھی کریں۔ خدا نے مردوں کو خاندان کی حفاظت، پرورش، اور قیادت کے لیے بنایا ہے۔ باپ اور شوہر کی حیثیت خود عزت کی مستحق ہے، چاہے اس نے کچھ کمایا ہو یا نہیں۔ ایک بیوی کو اپنے شوہر کے ساتھ عزت سے پیش آنا چاہیے، چاہے اس کے اعمال درست نہ ہوں۔ اسے اپنے شوہر کو ایک ایسے شخص کے طور پر دیکھنا چاہیے جو خدا کی صورت پر بنایا گیا ہے اور جو اپنی خامیوں کے باوجود اہم ہے (افسیوں 5: 23)۔ اس کا یہ مطلب نہیں کہ وہ اس کی کسی بات سے اختلاف نہیں کر سکتی، لیکن اسے کبھی بھی بے ادبی کا مظاہرہ نہیں کرنا چاہیے۔

جب ایک بیوی اپنے شوہر کی عزت کرتے ہوئے خوشی سے اس کی قیادت کو قبول کرتی ہے، تو وہ یسوع کے لیے اپنی محبت کا اظہار کرتی ہے (افسیوں 5: 22, 31-33)۔

کچھ بیویاں یہ سمجھتی ہیں کہ وہ اپنے شوہروں سے محبت کرتی ہیں، حالانکہ وہ ان کے ساتھ بے ادبی کرتی ہیں—انہیں دوسروں کے سامنے تنقید کا نشانہ بناتی ہیں، ان سے چھپ کر کام کرتی ہیں، اور تلخ الفاظ استعمال کرتی ہیں۔ انہیں سمجھنا چاہیے کہ محبت کا کوئی بھی اظہار بے عزتی کی تلافی نہیں کر سکتا۔

زیادہ تر عورتوں میں بچوں کی دیکھ بھال کی فطری خواہش ہوتی ہے۔ تصور کریں کہ اگر کسی عورت سے کہا جائے، "تم بچے کی دیکھ بھال کے قابل نہیں ہو،" تو وہ کیسا محسوس کرے گی؟ اسی طرح، مردوں میں اپنے خاندان کی حفاظت، پرورش، اور قیادت کرنے کی فطری صلاحیت ہوتی ہے۔ جب ایک بیوی اپنے شوہر سے کہتی ہے کہ وہ ان چیزوں میں ناکام ہے، تو وہ خود کو ناکام محسوس کرتا ہے۔

بیوی کو سمجھنا چاہیے کہ دنیا میں ایسے مرد موجود ہوں گے جو اس کے شوہر سے زیادہ مضبوط شخصیت کے مالک، زیادہ کمائی کرنے والے، یا اعلیٰ عہدے پر فائز ہوں گے۔ اسے کبھی بھی اپنے شوہر کا ان سے موازنہ کر کے اسے کمتر محسوس نہیں کرانا چاہیے۔ افسیوں 5: 21-33 ہمیں سکھاتا ہے کہ بیوی اور شوہر ایک دوسرے کے ساتھ جُڑے ہوتے ہیں۔ جب ایک بیوی اپنے شوہر پر تنقید کرتی ہے یا اس کا موازنہ دوسروں سے کرتی ہے، تو وہ نہ صرف اپنے شوہر بلکہ اپنے رشتے کو بھی نقصان پہنچاتی ہے۔

◄ ایک طالب علم کو امثال 31: 11-12، 26 پڑھنی چاہیے۔ یہ آیات ہمیں کیا سکھاتی ہیں کہ ایک نیک بیوی اپنے شوہر کے ساتھ کیسا برتاؤ کرتی ہے۔

(1) بیوی اپنے شوہر کی عزت تعریفی الفاظ کے ذریعے کرتی ہے۔

بیوی کو چاہیے کہ وہ اپنے شوہر کی صلاحیتوں کو سراہے۔ عزت اس کے الفاظ میں جھلکنی چاہیے جو وہ اپنے شوہر سے کچھ کہتی ہے۔ الفاظ کا مردوں پر گہرا اثر ہوتا ہے۔ یہ یا تو تعمیر کرتے ہیں یا گرا دیتے ہیں (امثال14: 1)، یا تو حوصلہ دیتے ہیں یا کمزور کرتے ہیں، یا تو اعتماد بڑھاتے ہیں یا دل توڑ دیتے ہیں (امثال 18: 21)۔ ایک مرد ہر کام میں کامیاب نہیں ہو سکتا، لیکن بیوی کو اس کی کوششوں کی تعریف کرنی چاہیے، خاص طور پر جب وہ اپنے خاندان کے لیے گھر اور تحفظ فراہم کرنے کی کوشش کرتا ہے۔ اسے چاہیے کہ وہ شوہر کو نئے خیالات آزمانے اور چیلنجز قبول کرنے سے نہ روکے۔

◄ طلبہ کو امثال 15: 4 اور امثال 16: 24 پڑھنی چاہیے۔

(2) بیوی اپنے شوہر کی عزت تابعداری کے ذریعے کرتی ہے (1 پطرس 3: 5)

بیوی کی تابعداری کا مطلب یہ نہیں کہ وہ اپنے شوہر سے کمتر ہے، بلکہ اس کا مطلب یہ ہے کہ ان کے کردار مختلف ہیں۔ حتیٰ کہ تثلیث میں بھی بیٹا باپ کے تابع ہوتا ہے، حالانکہ وہ قدرت، ذات یا کسی بھی صفت میں باپ سے کمتر نہیں ہے۔

یہ اصول بعض بیویوں کے لیے آسان نہیں ہوتا، خاص طور پر اگر ان کا شوہر خدا کے کلام پر عمل نہیں کرتا یا ان کے ساتھ نرمی سے پیش نہیں آتا۔ بعض بیویوں کو لگتا ہے کہ وہ اپنے یا اپنے خاندان کے لیے شوہر سے بہتر فیصلے کر سکتی ہیں۔ بعض اوقات بیوی کا فیصلہ درست اور شوہر کا غلط ہوتا ہے۔ لیکن اگر بیوی صرف اسی وقت تابعداری کرتی ہے جب وہ شوہر کے فیصلے سے متفق ہوتی ہے، تو درحقیقت وہ خود اختیار لے رہی ہے اور تابعداری نہیں کر رہی۔ تابعداری کا مطلب ہے کہ فیصلہ کرنے کا اختیار دوسرے کو دینا۔

پطرس بیویوں کو ہدایت دیتا ہے:

اَے بِیوِیو! تُم بھی اپنے اپنے شَوہر کے تابِع رہو۔ اِس لِئے کہ اگر بعض اُن میں سے کلام کو نہ مانتے ہوں تَو بھی تُمہارے پاکِیزہ چال چلن اور خَوف کو دیکھ کر بغَیر کلام کے اپنی اپنی بِیوی کے چال چلن سے خُدا کی طرف کِھنچ جائیں۔ اور تُمہارا سِنگار ظاہِری نہ ہو یعنی سر گُوندھنا اور سونے کے زیور اور طرح طرح کے کپڑے پہننا۔ بلکہ تُمہاری باطِنی اور پوشِیدہ اِنسانیّت حِلم اور مِزاج کی غُربت کی غَیرفانی آرایش سے آراستہ رہے کیونکہ خُدا کے نزدِیک اِس کی بڑی قدر ہے۔ ( 1 پطرس 3: 1-4)

بہت سی بیویاں پوچھتی ہیں، "اگر میرا شوہر مجھ سے ______ کرنے کے لیے کہے تو کیا مجھے کرنا ہوگا؟" اس سبق میں ہر ممکنہ صورتحال کا احاطہ نہیں کیا جا سکتا۔ لیکن اکثر تابعداری کا مسئلہ یہ نہیں ہوتا کہ شوہر بیوی سے کوئی ناجائز کام کروانا چاہتا ہے، بلکہ یہ ہوتا ہے کہ بیوی کو لگتا ہے کہ شوہر غیر معقول فیصلہ کرے گا۔ شاید شوہر محبت کرنے والا اور مہربان نہیں ہے۔ بیوی کو اپنی آزادی چھوڑنے کا خوف ہو سکتا ہے۔ وہ شوہر کی غلطیوں اور کوتاہیوں کو اس کی مجموعی قیادت مسترد کرنے کے بہانے کے طور پر استعمال کر سکتی ہے، جو خدا کے احکام کی نافرمانی ہے۔

بائبل ہمیں سکھاتی ہے کہ ایک نیک اور تابعدار بیوی اپنے شوہر کو خدا کی طرف مائل کر سکتی ہے۔ اگرچہ اس بات کی ضمانت نہیں ہے کہ ایک شوہر ایمان لے آئے گا، لیکن اگر اس کی مسیحی بیوی ضِدی اور نافرمان ہو تو اس کے ایمان لانے کے امکانات بہت کم ہو جاتے ہیں۔ ایک بیوی اپنے شوہر کی عزت کر کے اس کی محبت جیت سکتی ہے، لیکن یہ بنیادی وجہ نہیں ہونی چاہیے۔ اسے اپنے شوہر کی عزت کرنی چاہیے کیونکہ وہ اس کا حقدار ہے اور کیونکہ وہ خدا کو خوش کرنا چاہتی ہے۔

امثال 12: 4 بیان کرتی ہے کہ ، "نیک عَورت اپنے شَوہر کے لِئے تاج ہے لیکن ندامت لانے والی اُس کی ہڈّیوں میں بوسِیدگی کی مانِند ہے۔" اگر ایک بیوی اپنے شوہر کے دوستوں کے سامنے اس کی بے عزتی کرتی ہے، تو وہ اس کی عزت چھین لیتی ہے، جو شاید کبھی بحال نہ ہو سکے۔ مرد ان مردوں کی عزت کرتے ہیں جن کی بیویاں ان کی وفادار ہوتی ہیں، اور وہ ان مردوں پر ترس کھاتے ہیں جن کی بیویاں ان کی عزت نہیں کرتیں۔

(3) بیوی اپنے شوہر کی عزت اس کی ضروریات کا خیال رکھ کر کرتی ہے (امثال 31: 15, 21, 25, 27)

جب ایک بیوی کھانے پکانے اور گھر کی دیکھ بھال کے ایسے طریقے سیکھتی ہے جو اس کے شوہر کو پسند ہوں، تو شوہر خود کو معزز محسوس کرتا ہے۔ اگر وہ اس کی خوشی کے لیے اپنے معمولات میں تبدیلی کرنے سے انکار کرتی ہے، تو وہ محسوس کرتا ہے کہ وہ اس کے لیے غیر اہم ہے۔

اگر ایک بیوی کام، دوستوں، کلیسیا یا تفریح میں اس قدر مصروف ہو جاتی ہے کہ اپنے شوہر کی ضروریات کو محسوس نہیں کرتی یا اس سے بات کرنے کے لیے وقت نہیں نکالتی، تو شوہر محسوس کرتا ہے کہ وہ اس کے لیے غیر اہم ہے۔

پیدائش 2: 18 سکھاتی ہے،" اور خُداوند خُدا نے کہا کہ آدمؔ کا اکیلا رہنا اچھّا نہیں۔ مَیں اُس کے لِئے ایک مددگار اُس کی مانِند بناؤں گا"

(4) بیوی اپنے شوہر کی عزت جسمانی محبت کے ذریعے کرتی ہے۔

جنسی اطمینان زیادہ تر مردوں کے لیے زیادہ اہم ہوتا ہے جتنا کہ کچھ عورتوں کے لیے ہوتا ہے۔ عورت کو اس وقت زیادہ دلچسپی محسوس نہیں ہوتی جب تک کہ اس کے جذبات اور موڈ اس کے مطابق نہ ہوں، جبکہ مرد کی خواہش عام طور پر زیادہ ہوتی ہے۔ اس کا مطلب ہے کہ اکثر شوہر عدم اطمینان کا شکار ہوتا ہے، جبکہ بیوی اس ضرورت کو سمجھ نہیں پاتی۔ بعض عورتیں مردوں کی جنسی خواہش کو ناپسند کرتی ہیں، خاص طور پر اگر انہیں یا کسی اور کو ماضی میں زیادتی کا سامنا رہا ہو۔ شوہر کو چاہیے کہ وہ صبر اور سمجھداری سے کام لے، لیکن بیوی کو بھی یہ سمجھنا چاہیے کہ اس کا شوہر کی جسمانی ضروریات کا خیال رکھنا اچھا ہے، چاہے بعض اوقات وہ خود اس کی خواہش محسوس نہ کرے۔ اگر ایک شوہر اپنی بیوی کا وفادار ہے اور کسی اور عورت کے ساتھ تعلق نہیں رکھتا، تو وہ بیوی کی بے رخی پر دل میں رنج محسوس کر سکتا ہے۔ ایک شوہر کی وفاداری اس کی جسمانی تسکین پر منحصر نہیں ہونی چاہیے، لیکن اپنے شوہر کی جنسی ضروریات کی طرف بیوی کی توجہ اسے آزمائش کے خلاف جدوجہد میں مدد دے سکتی ہے ۔

غزل الغزلات میں لکھا ہے، "میرا محبُوب میرا ہے اور مَیں اُس کی ہُوں۔... اَے میرے محبُوب! چل ہم کھیتوں میں سَیر کریں اور گاؤں میں رات کاٹیں ... وہاں مَیں تُجھے اپنی مُحبّت دِکھاؤُں گی۔" (غزل الغزلات2: 16؛ 7: 11-12؛ نیز دیکھیں 1 کرنتھیوں 7: 3-5)۔

یہ وضاحتیں ہر ازدواجی تنازعے پر لاگو نہیں ہوتیں، لیکن یہ عام ہیں۔ یہ فطری رویوں کے سبب اور اثر کے چکر کو ظاہر کرتی ہیں جو اس وقت پیدا ہوتے ہیں جب میاں بیوی اپنی جذباتی کیفیت کا روحانی طریقے سے سامنا کرنے کے بجائے غیر روحانی ردِ عمل دیتے ہیں۔ وہ ایسا کرنے کے بجائے (1) اپنی محسوسات کو پہچانیں، (2) خدا کی سچائی اور اس کی مرضی کو یاد رکھیں، اور (3) روح القدس پر انحصار کریں تاکہ بائبلی طریقے سے ردِ عمل دے سکیں۔

اگر ایک بیوی روح میں نہیں چل رہی اور خدا کی محبت کو اپنے ذریعے کام نہیں کرنے دے رہی، تو وہ قدرتی طور پر ایسے ردِ عمل دے سکتی ہے جو اس کے ازدواجی تعلق کو نقصان پہنچائیں۔ اگر بیوی کو محبت محسوس نہیں ہوتی، تو وہ خود کو غیر محفوظ سمجھنے لگتی ہے۔ وہ خود کو مضبوط ظاہر کرتی ہے اور شوہر کے اختیار کی مخالفت کرتی ہے کیونکہ اسے یقین نہیں ہوتا کہ اس کا شوہر اس کی پرواہ کرتا ہے۔ جب وہ ایسا کرتی ہے تو شوہر خود کو بے عزت محسوس کرتا ہے۔ اگر شوہر اپنی اتھارٹی جتانے کی کوشش کرتا ہے اور عزت کا مطالبہ کرتا ہے، تو بیوی کو مزید محسوس ہوتا ہے کہ وہ اس سے محبت نہیں کرتا۔

اگر شوہر روح میں نہیں چل رہا اور خدا کی محبت کو اپنے ذریعے کام نہیں کرنے دے رہا، تو وہ اپنی شادی کو مضبوط بنانے والے رویے اختیار کرنے میں ناکام ہو سکتا ہے۔ جب شوہر خود کو بے عزت محسوس کرتا ہے، تو وہ تکلیف اور غصہ محسوس کرتا ہے۔ وہ بیوی سے سخت باتیں کہہ سکتا ہے۔ اگر وہ اپنے جذبات پر قابو پانے کی کوشش کر رہا ہو، تو وہ خاموش ہو جاتا ہے۔ وہ اپنی بیوی کے قریب نہیں جانا چاہتا یا اس کے ساتھ اپنا دل نہیں کھولنا چاہتا، کیونکہ وہ محسوس کرتا ہے کہ بیوی اس کی حمایتی نہیں ہے۔ جب وہ ایسا کرتا ہے تو بیوی کو سمجھ نہیں آتی کہ ایسا کیوں ہو رہا ہے۔ شاید اس نے شوہر کے ساتھ بے عزتی سے اس لیے برتاؤ کیا تھا تاکہ اسے احساس ہو کہ وہ خوش نہیں ہے اور اسے بدلنا چاہیے۔ جب شوہر غصہ کرتا ہے یا پیچھے ہٹتا ہے، تو بیوی سوچتی ہے کہ وہ اس کی جذباتی کیفیت کی پرواہ نہیں کرتا، اور وہ مزید بے عزتی کرنے لگتی ہے۔

جب ازدواجی تعلق متاثر ہوتا ہے، تو آدمی اور عورت دونوں آزمائش میں زیادہ مبتلا ہو جاتے ہیں۔ بیوی کو شوہر کی رہنمائی کو مزید مسترد کرنے کی آزمائش ہو سکتی ہے۔ وہ شوہر کے بارے میں دوسروں سے بے عزتی سے بات کرنے کی آزمائش میں پڑ سکتی ہے۔ وہ کسی اور مرد کی توجہ سے لطف اندوز ہونے کی آزمائش میں آ سکتی ہے جو اسے زیادہ سراہتا ہو۔ شوہر اپنی بیوی سے دور رہنے کی آزمائش میں پڑ سکتا ہے کیونکہ اس کا رویہ اسے تکلیف دیتا ہے۔ وہ بیوی کے ساتھ محبت بھرا سلوک کرنے کو تیار نہیں ہوتا۔ وہ کسی ایسی عورت کی توجہ حاصل کرنے کی آزمائش میں پڑ سکتا ہے جو اس کی تعریف کرتی ہو۔

ہر شخص اپنے فیصلوں کے لیے خدا کے سامنے جواب دہ ہے۔ خدا کسی شخص کے گناہ کو اس بنیاد پر معاف نہیں کرے گا کہ اس کے شریک حیات نے کیا کیا۔ خدا ہمیں اس قابل بنانے کا وعدہ کرتا ہے کہ ہم وہ زندگی گزار سکیں جو ہمیں گزارنی چاہیے۔ اس معلومات کا مقصد یہ نہیں کہ کوئی شخص اپنے شریک حیات سے مطالبہ کرے یا اپنی غلطیوں کا الزام اپنے شریک حیات پر ڈالے۔ اس کا مقصد یہ ہے کہ ہر شخص اپنی ذمہ داری کو پہچانے، خدا کو راضی کرنے کی کوشش کرے، اور اپنے شریک حیات کو وہ دے جو اسے درکار ہے۔

کبھی کبھی ایک شخص اپنی زندگی کو آسان بنانے کے طریقے تلاش کرتا ہے۔ شوہر چاہتا ہے کہ اس کی بیوی بدل جائے تاکہ اس کی زندگی آسان ہو جائے۔ اسی طرح، بیوی یہ سوچ سکتی ہے کہ اگر اس کا شوہر بدل جائے تو اس کی زندگی بہتر ہو جائے گی۔ ایک شخص مشیر، پادری، یا دوستوں سے پوچھتا ہے کہ دوسرے کو کیسے بدلا جائے۔ لیکن اپنے شریک حیات کو بدلنا درست مقصد نہیں ہے۔ جو شخص تعلقات میں بہتری کے طریقے محض اپنی زندگی کو آسان بنانے کے لیے استعمال کرتا ہے، وہ خدا یا دوسرے شخص کی محبت کی وجہ سے ایسا نہیں کر رہا۔

کبھی کبھی ایک شخص سالوں تک دوسرے کی غلطیوں کو درست کرنے کی کوشش کرتا ہے۔ وہ بار بار ایک ہی غلطی پر تنقید کرتا ہے۔ اگرچہ ہر انسان میں حقیقی خامیاں ہوتی ہیں، لیکن ہر شریک حیات کو بالآخر دوسرے کو انہی خامیوں کے ساتھ قبول کرنا سیکھنا چاہیے۔ یہ خامیاں شخصیت، کردار، یا روحانی کمزوریوں (حتیٰ کہ گناہ) پر مشتمل ہو سکتی ہیں۔ ازدواجی تعلق دوسرے شخص کی تبدیلی پر منحصر نہیں ہونا چاہیے۔ ہوسکتا ہے کہ وہ شخص خود کو بدلنے کے قابل نہ سمجھے۔ جو بھی وجہ ہو، ہر شریک حیات کو محبت اور احترام دکھانا چاہیے اور اپنے ساتھی کی قدر کرنی چاہیے، چاہے اس میں خامیاں موجود ہوں۔

خدا نے مرد اور عورت کی فطرت کو تخلیق کیا اور شادی کو انسانی ضروریات پوری کرنے کے لیے بنایا۔ تاہم، ہم ایک ایسے دنیا میں رہتے ہیں جہاں شادیاں اور خاندان گناہ کے سبب بہت متاثر ہوئے ہیں۔ ہم میں سے ہر کوئی نہ صرف اپنے گناہوں بلکہ دوسروں کے گناہوں سے بھی نقصان اٹھاتا ہے۔ ہم خدا کے فضل کے بغیر شادی کو اس کی اصل روح کے مطابق نہیں گزار سکتے۔ ہمیں خدا کے روح کی پاکیزگی کی ضرورت ہے تاکہ ہمارے ارادے خالص ہوں، ہماری محبت مضبوط ہو، اور ہماری عاجزی ہمیں دوسروں کی خدمت کے لیے تیار کرے۔

◄ اس سبق میں کون سے خیالات آپ کے لیے نئے ہیں؟ آپ اپنے رویے اور سوچ میں کیسے تبدیلی لانے کا ارادہ رکھتے ہیں؟

◄ کلیسیا ازدواجی تعلقات کو مضبوط بنانے کے لیے کیا کر سکتی ہے؟

اے آسمانی باپ،

شادی کے رشتے کو بہت سی خاص ضروریات پوری کرنے کے لیے تخلیق کرنے پر تیرا شکر ہو۔ ہمیں شادی کے لیے اپنی ہدایات دینے کے لیے تیرا شکر ہو۔

ہمیں وہ محبت اور سمجھ عطا کر جو ہمیں ایک دوسرے کا خیال رکھنے کے قابل بنائے۔ ہمیں ایسے خاندان عطا کر جو دنیا میں تیری محبت کی عکاسی کریں۔

ہم تیرے اس فضل کے لیے شکر گزار ہیں جو ہمیں تیری طرح محبت کرنا سکھاتا ہے۔

آمین۔

(1) 1- کرنتھیوں 13: 4-8 کو یاد کریں۔ اگلی کلاس کے شروع میں زبانی تحریر کریں یا سنائیں۔

(2) دو صفحات پر مشتمل کاغذ لکھیں جس میں شوہر یا بیوی دونوں کی ضروریات بیان کی جائیں۔ شریک حیات کے رویے کی مثالیں دیں جو ان ضروریات کو پورا کرنے میں مدد کرتا ہے۔ آپ جس ضرورت پر بات کرتے ہیں ان میں سے ہر ایک کی حمایت کے لیے حوالے استعمال کریں۔.