اس سبق کے اختتام تک، طالب علم کو چاہیے کہ:

(1) سمجھے کہ شادی کو کس طرح تثلیث کے تعلقات کی عکاسی کرنی چاہیے۔

(2) اولاد کے بارے میں خدا کے نظریے کو اپنائے۔

(3) سمجھے کہ گناہ نے شادی اور خاندانی تعلقات کو کیسے متاثر کیا۔

(4) سراہے کہ خدا کے نجات کے منصوبے کو انسانی کمزوریوں کے باوجود کیسے پورا کیا جاتا ہے۔

(5) ادراک کرے کہ خدا کے منصوبے کی فرمانبرداری کسی بھی خاندان کو اس کے فضل اور شفا کا تجربہ کرنے میں کس طرح مدد دے سکتی ہے۔

اس کورس میں، ہم زیادہ تر اس خاندان کے بارے میں سیکھیں گے جو ایک ہی گھر میں اکٹھے رہتا ہے۔ مختلف افراد کے امتزاج سے ایسے گروہ بنتے ہیں جو ایک ساتھ کسی گھر میں رہتے ہیں اور خاندان کہلاتے ہیں۔ کچھ خاندانوں میں ایک ہی والد یا والدہ ہوتی ہے، کچھ طلاق کی وجہ سے تقسیم ہو چکے ہوتے ہیں، کچھ دوسری شادی کے نتیجے میں یکجا ہوتے ہیں، کچھ نے بچوں کو گود لیا ہوتا ہے، کچھ میں کئی نسلیں ایک ساتھ رہتی ہیں، اور کچھ عارضی طور پر اضافی بچوں یا بڑوں کی میزبانی کر رہے ہوتے ہیں۔

ہم میں سے ہر ایک کے ذہن میں خاندان کا ایک مخصوص تصور ہوتا ہے۔ خاندان کے بارے میں گفتگو ہمارے اندر مختلف جذبات پیدا کرتی ہے، جو ہماری ذاتی زندگی کے تجربات پر منحصر ہوتے ہیں۔

بچپن ہمیں کیسے متاثر کرتا ہے

شاید آپ کے بچپن کی یادیں خوشگوار ہوں، یا شاید آپ بچپن کے تجربات کی وجہ سے غصے کا سامنا کرتے ہوں۔ شاید آپ کے خاندان کے افراد ایک دوسرے کی مدد اور حوصلہ افزائی کرتے ہیں، یا شاید وہ ایک دوسرے سے دور رہتے ہیں اور جب بھی ملتے ہیں تو تنازعات پیدا ہوتے ہیں۔ ہو سکتا ہے کہ آپ کو لگے کہ آپ کا خاندان آپ کی زندگی کے لیے ایک مضبوط بنیاد اور سہارا رہا ہے، یا شاید آپ کا گھر ایک قید خانہ یا تکلیف دہ ماحول محسوس ہوا ہو جس سے آپ جلد از جلد نکلنا چاہتے تھے۔ ممکن ہے کہ جب آپ ایسے خاندانوں کو دیکھتے ہیں جو آپ کے خاندان سے بہتر لگتے ہیں، تو آپ کو محسوس ہو کہ آپ کے خاندان نےآپ کو ناکام کر دیا ہے۔

ہمارے خاندان کے بارے میں ہمارا فہم بہت اہم ہے کیونکہ یہ ہمارے زندگی کو سمجھنے کے انداز اور خدا کی شناخت کے بارے میں ہمارے نظریے کو متاثر کرتا ہے۔ بائبل خدا کو اپنے لوگوں کا باپ قرار دیتی ہے۔ ہمارے والدین، خاص طور پر ہمارے باپ کے ساتھ ہمارے تعلقات، ہمارے آسمانی باپ کے تصور کو تشکیل دیتے ہیں۔ اگر ہمارا انسانی باپ غیر حاضر، ظالم، لاپرواہ، حد سے زیادہ سخت، قابو پانے والا، بے عمل، یا کسی بھی طرح نقصان دہ تھا، تو ہمارے ذہن میں خدا کے بطور باپ کا تصور بھی متاثر ہو سکتا ہے۔ جب تک ہم خدا کو اُس کے کلام، یسوع کی زندگی، اور اپنے ذاتی تعلق کے ذریعے جاننے نہ لگیں، ہمیں اُسے ایک اچھے باپ کے طور پر دیکھنے میں دشواری ہو سکتی ہے۔ لیکن حقیقت میں وہ ایک بہترین باپ ہے جو اپنے بچوں کی حفاظت اور کفالت کرتا ہے۔ وہ ان کی سنتا اور ان سے بات کرتا ہے، ان کی رہنمائی کرتا ہے، اور ان کی بھلائی میں خوشی محسوس کرتا ہے۔ جب ہم خدا کو جاننے لگتے ہیں، تو وہ ہماری اس کے بارے میں سمجھ کو درست کر سکتا ہے۔[1]

روحانی اختلافات ہمیں کیسے متاثر کرتے ہیں

ہم میں سے کچھ کو مسیح کی پیروی کرنے کی وجہ سے اپنے خاندانوں کی طرف سے مسترد کیے جانے کا سامنا کرنا پڑا ہے۔ یسوع نے فرمایا کہ ہمیں اُس کے ساتھ وفاداری کی وجہ سے اپنے غیر ایماندار رشتہ داروں کی طرف سے مخالفت کی توقع رکھنی چاہیے۔ بہت سے مقامات پر، ایمانداروں کو اُن کے اپنے خاندان کے افراد دھوکہ دیتے، شرمندہ کرتے، نظر انداز کرتے، ظلم کا نشانہ بناتے، یا یہاں تک کہ قتل کر دیتے ہیں کیونکہ انہوں نے مسیح کو رد کر دیا ہے۔

◄ایک طالب علم متی10: 21-22، 28، 32-39 کو پڑھے۔ ان آیات کے بعد درج ذیل سوالات پر گفتگو کریں:

• اس عبارت کے مطابق، ایمانداروں کو کیا توقع رکھنی چاہیے؟

• یہاں کون سے وعدے دیے گئے ہیں؟

• ایمانداروں کو ظلم و ستم کے بارے میں کیا سوچنا چاہیے؟

ہم میں سے کچھ کو اپنے خاندانوں کی طرف سے ظلم و ستم کا سامنا تو نہیں کرنا پڑتا، لیکن پھر بھی ہمارے ایمان کی وجہ سے تعلقات میں مشکلات پیش آتی ہیں۔ شاید ہمارے خاندانی تعلقات کشیدہ، دور یا محدود ہوں کیونکہ ایک ایماندار کی حیثیت سے ہماری زندگیاں اپنے خاندان کے افراد سے بہت مختلف ہوتی ہیں۔ ہمیں غلط سمجھا جا سکتا ہے یا ہماری بے عزتی کی جا سکتی ہے۔ ہمارے رشتہ دار ہماری خدمت کے کام میں رکاوٹ ڈالنے کی کوشش کر سکتے ہیں۔ حتیٰ کہ یسوع نے بھی ان مشکلات کا سامنا کیا تھا (مرقس 3: 21، یوحنا7: 3، 5)، اس لیے اگر ہمیں بھی ایسا تجربہ ہو تو ہمیں حیران نہیں ہونا چاہیے۔

چند منٹ میں، آپ اپنے ہم جماعتوں سے تعارف کروائیں گے، لیکن آپ صرف اپنا نام نہیں بتائیں گے بلکہ اپنے خاندان کے تناظر میں اپنی شناخت کے بارے میں شیئر کریں گے۔

سب سے پہلے، ان تمام مختلف القابات کے بارے میں سوچیں جو آپ اپنے خاندان میں رکھتے ہیں، جیسے بیٹا یا بیٹی، شوہر یا بیوی، والد یا والدہ، چچا یا پھوپھا، دادا یا نانا، دادی یا نانی۔ کیا آپ مزید القابات سوچ سکتے ہیں؟ آپ کے پاس یقیناً کئی القابات ہوں گے۔

آپ اپنے خاندان میں اور کون سے کردار ادا کرتے ہیں؟ کیا آپ سب سے بڑے یا سب سے چھوٹے ہیں؟ کیا آپ مالی طور پر کفالت کرنے والے ہیں؟ کیا آپ گھر کی دیکھ بھال کرنے والے ہیں؟ کیا آپ کسی بزرگ یا معذور شخص کی دیکھ بھال کرتے ہیں؟ اپنے خاندان میں اپنی دیگر ذمہ داریوں اور کرداروں کے بارے میں سوچیں۔

◄ اپنے ہم جماعتوں سے اپنا تعارف کروائیں، اپنے خاندان میں اپنے کئی القابات اور کرداروں کو بیان کریں۔

◄ اب، ایک لمحے کے لیے سوچیں کہ آپ کے القابات اور کردار (1) آپ کا اپنے بارے میں نظریہ اور (2) آپ کے خاندان کے دیگر افراد کے بارے میں نظریے کو کس طرح متاثر کرتے ہیں۔

چاہے آپ اپنے قریبی یا دور کے خاندان کے افراد کے بارے میں جو بھی محسوس کرتے ہوں، وہ آپ کے خاندان کا حصہ ہیں۔ ہو سکتا ہے کہ آپ کا خاندان ٹوٹا ہوا ہو، تکلیف اور دکھ کی وجہ سے الگ ہوئے ہوں۔ یا شاید لوگ آپ کے خاندان سے حسد کرتے ہوں کیونکہ وہ بظاہر مکمل نظر آتا ہے: ایک اچھی شادی، ذہین اور صحت مند بچے، اور ایسا گھر جو محبت، سکون اور ہنسی سے بھرا ہوا ہو۔

چاہے آپ کا خاندان کمزور نظر آتا ہو یا مضبوط، خدا آپ کے خاندان میں دلچسپی رکھتا ہے اور اُس میں شامل ہے۔ اُس کے پاس آپ کے خاندان کے لیے ایک منصوبہ ہے۔

◄ اپنے خاندان کے افراد کے نام لکھیں (کم از کم 3-4 نسلوں کے افراد کے نام درج کریں)۔ مثال کے طور پر:

• پہلی نسل: آپ کے دادا، دادی، نانا، نانی کے نام

• دوسری نسل: آپ کے والدین کے نام

• تیسری نسل: آپ کا نام اور آپ کے بہن بھائیوں کے نام

• چوتھی نسل: آپ کے بچوں یا بھانجوں ، بھتیجوں کے نام

جس شخص کے ساتھ آپ کا قریبی اور اچھا تعلق ہے، اُس کے نام کے ساتھ ایک ستارہ بنائیں ۔ جس شخص کے ساتھ آپ کا محدود تعلق ہے، اُس کے نام کے ساتھ تکون بنائیں ۔

جس شخص سے آپ کسی بھی وجہ سے کٹے ہوئے ہیں، اُس کے نام کے گرد چوکور بنا ئیں ۔

کیا ایسے لوگ ہیں جنہیں آپ اپنے خاندان کا حصہ سمجھتے ہیں، حالانکہ وہ درحقیقت خون کے رشتے سے جڑے نہیں ہیں؟ ایسے لوگ جو ہر خاندانی اجتماع اور تقریبات میں اس طرح شامل ہوتے ہیں جیسے وہ خاندان کے افراد ہوں؟ ان کے نام لکھیں اور ان کے گرد دائرہ لگا دیں۔

◄ جیسے کہ ہم آدم اور حوا، اور ابراہام اور سارہ کی زندگیوں کا مطالعہ کرتے ہیں، اپنی بائبل کو پیدائش کی کتاب میں کھولے رکھیں۔

پہلی شادی

آدم اور حوا پہلا انسانی خاندان تھے: ایک شوہر اور ایک بیوی، ایک مرد اور ایک عورت، جو نکاح کے بندھن میں جُڑے۔ پہلی شادی کے موقع پر، آدم نے کہا: "یہ تو اب میری ہڈِّیوں میں سے ہڈّی اور میرے گوشت میں سے گوشت ہے اِس لِئے وہ ناری کہلائے گی کیونکہ وہ نر سے نِکالی گئی" (پیدائش 2: 23)۔

اگلی آیت شادی کی بائبلی تعریف بیان کرتی ہے: " اِس واسطے مَرد اپنے ماں باپ کو چھوڑے گا اور اپنی بِیوی سے مِلا رہے گا اور وہ ایک تن ہوں گے۔"(پیدائش 2: 24)۔ یہی الفاظ نئے عہد نامے میں بھی دہرائے گئے ہیں: متی 19: 5 اور افسیوں 5: 31۔ مرد اور عورت کے درمیان ایک جسم ہونے کا اتحاد ایک غیر مشروط عہد ہے، خدا اور انسان کے سامنے ایک ایسا وعدہ جو تمام زندگی قائم رہنا چاہیے۔

شادی تین جہتی معجزہ ہے:حیاتیاتی معجزہ: جس میں دو لوگ حقیقت میں ایک جسم ہو جاتے ہیں۔ سماجی معجزہ: جس کے ذریعے دو خاندان آپس میں جُڑ جاتے ہیں۔ روحانی معجزہ: کیونکہ شادی کا رشتہ مسیح اور اُس کی دلہن، یعنی کلیسیا، کے اتحاد کی تصویر پیش کرتا ہے۔[1]

شادی تثلیث کے تعلقات کی عکاسی کرتی ہے

شادی کو خدا کے کردار اور اُس کے تعلقات کی عکاسی کے لیے بنایا گیا ہے۔ خدا باپ، خدا بیٹا، اور خدا روح القدس ہمیشہ سے ایک دوسرے کے ساتھ تعلق میں رہے ہیں اور ہمیشہ رہیں گے۔ ہر ایک اپنی حیثیت میں [2]منفرد ہے، لیکن تثلیث کے تمام اقنوم ہمیشہ کے لیے ایک ہیں اور ایک ہی ذات کے حامل ہیں۔ تثلیث کے تعلق میں ہمیں اتحاد، قربت، وفاداری، اور اٹل محبت نظر آتی ہے۔ بائبلی شادی اسی حیرت انگیز تعلق کی پیروی کرتی ہے۔ خدا کا منصوبہ ہے کہ ہر شوہر اور بیوی اپنی محبت میں پاکیزہ ہوں اور زندگی بھر ایک دوسرے کے ساتھ وفادار اور وابستہ رہیں۔

انسانی ازدواجی رشتہ تثلیث کے تعلقات کی عکاسی ان طریقوں سے کرنا چاہیے:

1. شادی غیر مشروط اور خصوصی وابستگی ہونی چاہیے۔

2. شادی ایک ایسا رشتہ ہونا چاہیے جو خود کو قربان کرنے والی محبت پر مبنی ہو۔

3. شادی ایک بابرکت اور ثمر آور رشتہ ہونا چاہیے۔

پہلا حکم

پہلی شادی، جسے خود خدا نے انجام دیا، کے دوران

خُدا نے اُن کو برکت دی اور کہا کہ پَھلو اور بڑھو اور زمِین کو معمُور و محکُوم کرو اور سمُندر کی مچھلیوں اور ہوا کے پرِندوں اور کُل جانوروں پر جو زمِین پر چلتے ہیں اِختیار رکھّو۔ (پیدائش 1: 28)۔

پھلنے اور بڑھنے کا حکم بائبل میں خدا کی طرف سے دیا گیا پہلا حکم ہے۔ شادی کو ایک بابرکت اور خود کو قربان کرنے والی محبت کا رشتہ بنایا گیا ہے۔ نکاح کے اندر تولیدی عمل خالق کی تمجید کرتا ہے، کیونکہ شوہر اور بیوی مل کر خدا کے تخلیقی کام کو آگے بڑھاتے ہیں اور مزید لوگوں کو خاندانی رشتے میں شامل کرتے ہیں۔ یہ کتنی بڑی سعادت اور ذمہ داری ہے!

◄ ایک طالب علم کو زبور 127: 3-5 جماعت میں پڑھناچاہیے۔ یہ حوالہ بچوں کو بیان کرنے کے لیے تصویری الفاظ استعمال کرتا ہے۔ وہ تصویری الفاظ کیا ہیں؟ ان الفاظ کی بنیاد پر، ہمیں اپنے بچوں کے بارے میں کیسا سوچنا چاہیے؟

بائبل ہمیں سکھاتی ہے کہ بچے ایک نعمت اور قیمتی ملکیت ہیں۔ انہیں محض ازدواجی تعلق کا نتیجہ نہیں سمجھنا چاہیے۔ خواہ بچے کے حمل ٹھہرنے کے حالات پسندیدہ یا راستبازی پر مبنی ہوں یا نہ ہوں، زندگی دینے والا خدا ہر بچے کے حمل ٹھہرنے اور پیدائش میں ایک خاص منصوبہ رکھتا ہے، بشمول آپ اور میرے۔ خدا ہر انسان کے لیے ایک مقصد رکھتا ہے، قطع نظر اس کے کہ اس کی پیدائش کے حالات کیسے ہوں۔

ہاں، بچے خدا کی طرف سے ایک نعمت ہیں، لیکن وہ والدین کی طرف سے خدا کے لیے بھی ایک تحفہ ہیں۔

اور کیا اُس نے ایک ہی کو پَیدا نہیں کیا باوُجُودیکہ اُس کے پاس اَور ارواح مَوجُود تھِیں؟ پِھر کیوں ایک ہی کو پَیدا کِیا؟ اِس لِئے کہ خُدا ترس نسل پَیدا ہو۔ پس تُم اپنے نفس سے خبردار رہو اور کوئی اپنی جوانی کی بِیوی سے بیوفائی نہ کرے۔ (ملاکی 2: 15)

بچے ایک مقدس امانت ہیں ۔ خدا والدین سے توقع کرتا ہے کہ وہ اپنے بچوں کو اس کے مقاصد کو پورا کرنے کے لیے پرورش کریں۔ خدا ہمارے بچوں کو اپنی بادشاہی کو آگے بڑھانے کے لیے استعمال کرنا چاہتا ہے (پیدائش 18:19)۔ خدا نے ہمیں ذمہ داری سونپی ہے کہ ہم اپنے بچوں کو خدا کی خدمت کے لیے تیار کریں (استثنا 6: 2)۔ ہمیں ان کی پرورش اس لیے نہیں کرنی کہ وہ ہماری خدمت کریں یا ہمارے خواب پورے کریں، بلکہ ہمیں انہیں ایسے تیر سمجھنا چاہیے جو خدا کے دیے ہوئے نشانے پر لگیں۔

گناہ کا اثر اور انسانی خاندان کی ٹوٹ پھوٹ

پیدائش 3 میں، دنیا کا واحد کامل خاندان گناہ میں گر کر ٹوٹ پھوٹ کا شکار ہو گیا اور نجات دہندہ کا محتاج ہو گیا۔ آدم اور حوا نے گناہ کیا، اور موت کی لعنت تمام انسانوں پر آ گئی۔ آدم اور حوا کے باہمی تعلقات مستقل طور پر متاثر ہوئے، اور وہ خدا سے جدا ہو گئے۔

گناہ کے نتیجے میں مرد اور عورت نے اضافی لعنتوں کا سامنا کیا:

• بچوں کی پیدائش تکلیف دہ ہو گئی۔

• شوہر اپنی طاقت اور اختیار کا غلط استعمال کریں گے۔

• بیویاں سرکش اور بے احترام ہو جائیں گی۔

• کام مایوس کن اور مشکل ہو جائے گا[3]

خدا کے خاندان کے لیے کامل منصوبے کو شیطان کے جھوٹ قبول کرنے کی وجہ سے بگاڑ دیا گیا۔

پیدائش 4 میں گناہ زدہ انسانی خاندان کی ٹوٹ پھوٹ مزید ظاہر ہوتی ہے۔

پیدائش 4: 1 میں پہلی حمل اور پیدائش کا ذکر ملتا ہے۔ یہ آیت نو مہینے کی مدت کا احاطہ کرتی ہے—وہ وقت جو ایک بچے کے حمل ٹھہرنے اور پیدائش کے درمیان ہوتا ہے۔ ذرا تصور کریں کہ حوا کے لیے یہ نو مہینے کیسے ہوں گے؟ وہ اپنے ڈر اور خوشی آدم کے ساتھ شیئر کر رہی ہوگی۔ کوئی بھی مشورہ دینے والا یا سوالوں کے جواب دینے والا موجود نہ تھا۔ اس کا بڑھتا ہوا پیٹ، بچے کی حرکتیں، پیدائش کی تکلیف اور درد—یہ سب کسی بھی ماں کے لیے پہلی بار کے تجربات تھے۔ یہی وجہ ہے کہ حوا نے قائن کی پیدائش پر کہا، " مُجھے خُداوند سے ایک مَرد مِلا۔" (پیدائش 4: 1)۔

وقت گزرنے کے ساتھ، ایک اور حمل اور پیدائش کا ذکر ہوتا ہے، اور آدم و حوا چار افراد کا خاندان بن جاتے ہیں۔ اسی آیت کے دوسرے نصف میں ان کے بیٹوں کے پیشوں کا خلاصہ ہے۔ آیت 3 سے، لڑکے بالغ آدمی ہیں، اور اگلی آیات میں ہم پہلے قتل کی المناک کہانی پڑھتے ہیں۔ آدم اور حوا کے سب سے بڑے بیٹے نے غصے اور حسد میں اپنے بھائی کو قتل کر دیا۔ کیا آپ صدمے، دکھ، سوالات، چوٹ اور درد کا تصور کر سکتے ہیں؟

ان سوالوں کا آپ کا جواب ہو سکتا ہے، "ہاں! میں اس کا تصور کر سکتا ہوں۔ درحقیقت، میں نے کچھ ایسا ہی تجربہ کیا ہے!" میں آپ کی حوصلہ افزائی کرتا ہوں: آپ اکیلے نہیں ہیں۔ آپ کا خاندان قابل تلافی ہے! ہر خاندان کے لیے خوشخبری ہے۔

گورڈن وینہم لکھتے ہیں،

…پیغام پیدائش… انسانی گناہ کے باوجود فضل کی فتح کی کہانی ہے، گناہ سے ٹوٹے ہوئے خاندانوں میں بھی فضل کی فتح کی کہانی ہے۔ کتاب ایک اعلیٰ طور پر شروع ہوتی ہے جس میں دنیا کی تخلیق خدا کی شبیہ میں بنی نوع انسان کی تخلیق کے ساتھ عروج پر ہوتی ہے اور خدا نے اعلان کیا کہ اس نے جو کچھ بنایا تھا وہ بہت اچھا تھا…. یہ صرف باب 3 میں ہے کہ چیزیں غلط ہونے لگتی ہیں، نافرمانی، [تصادم]، اور فرمانبرداری ، ہم آہنگی اور زندگی کی جگہ موت۔ باب 4 میں حالات بدتر ہوتے جاتے ہیں… اور اپنے [کم ترین مقام پر] باب 6 تک پہنچ جاتے ہیں، جہاں کہا جاتا ہے کہ زمین ظلم و ستم سے بھر گئی (پیدائش 6: 11، 13)۔[4]

پیدائش کی کتاب میں آگے چل کر ہم ابرہام کے بارے میں پڑھتے ہیں، جو عبرانی قوم کے باپ تھے (پیدائش11: 27-25: 11)۔ [1] خدا نے ابرہام کے خاندان کے ذریعے نجات دہندہ کو انسانی خاندان میں بھیجنے کا وعدہ کیا تھا۔

بانجھ پن[2]

پیدائش 11 میں ابرام کا نسب نامہ درج ہے، جو نوح کے بیٹے سام کی نسل میں سے تھے۔ پیدائش 11: 30 میں بتایا گیا ہے کہ ابرام کی بیوی ساری اولاد پیدا کرنے کے قابل نہ تھی۔ یہ آیت بہت سے لوگوں کے لیے آنسو، دکھ، درد، مایوسی، بے بسی، غصے اور رنج و غم کا باعث ہے۔ اگر آپ اپنا نام ساری کے نام کی جگہ رکھ کر پڑھیں تو یقین جانیں، آپ اکیلے نہیں ہیں۔

جو لوگ اولاد کی خواہش رکھتے ہیں لیکن بانجھ پن کا سامنا کر رہے ہیں، ان کے لیے پیدائش 1: 28 اور زبور 127: 3-5 جیسے حوالے پڑھنا گہرے دکھ اور تکلیف کا باعث بن سکتا ہے۔ یہ فطری ہے کہ بے اولادی کو سزا یا لعنت سمجھا جائے۔

حقیقت یہ ہے کہ اگر آپ کے ہاں اولاد نہیں تو بھی آپ خدا کے نزدیک کم اہم نہیں ہیں۔ آپ کو بھلایا نہیں گیا۔ آپ کی بے اولادی کا مطلب یہ نہیں کہ آپ کا خاندان ناقص ہے۔ دوسرے بھی اسی گہرے دکھ سے گزر چکے ہیں۔

ایک جوڑا بانجھ پن کے مسئلے کو کس طرح، مل کر اور انفرادی طور پر، سنبھالتا ہے، یہ بہت اہم ہے۔ غیر دانشمندانہ فیصلے مزید مسائل کو جنم دے سکتے ہیں، جیسا کہ ہم ابرام اور ساری کی زندگی میں دیکھیں گے۔

وعدے کا انتظار

اپنے والد کی وفات کے بعد، ابرام اپنے خاندان کا سربراہ بن گیا۔ خدا نے ابرام سے وعدہ کیا کہ وہ اسے ایک بڑی قوم بنائے گا (پیدائش 12: 2) اور اس کی نسل کو کنعان کی زمین دے گا (پیدائش 12: 7)۔ اس وقت ابرام کی عمر 75 سال تھی (پیدائش 12: 4) اور ساری اس سے دس سال چھوٹی تھی (پیدائش 17:17)۔ ساری ایک غیر معمولی طور پر خوبصورت 65 سالہ خاتون تھی (پیدائش 12: 11)، لیکن اب بھی بانجھ تھی اور معمول کے بچہ پیدا کرنے کے سالوں سے آگے جا چکی تھی۔

[3] سال گزرتے گئے، لیکن اب بھی کوئی اولاد نہ ہوئی، حالانکہ خدا کے وعدے کو پیدائش 13: 14-17 میں واضح طور پر دہرایا گیا تھا۔ ایسا معلوم ہوتا ہے کہ ابرام نے اپنی اولاد ہونے کی امید چھوڑ دی تھی، کیونکہ پیدائش 15: 2-3 میں وہ خدا سے کہتا ہے کہ اس کا خادم اس کا وارث ہوگا۔ لیکن خداوند نے جواب دیا، ’’یہ تیرا وارِث نہ ہو گا بلکہ وہ جو تیرے صُلب سے پَیدا ہو گا وُہی تیرا وارِث ہو گا ‘‘ (پیدائش 15: 4)۔ پھر، خدا نے ابرام کو ایک دوسرا تصویری وعدہ دیا کہ اس کی نسل بے شمار ہوگی، اور ابرام نے خداوند پر ایمان رکھا (پیدائش 15: 6)۔.

ذرا سوچیں کہ یہ سال انتظار کے ساری کے لیے کیسے رہے ہوں گے:

جتنا تکلیف دہ دوسروں کا فیصلہ ہوسکتا تھا، اس سے کہیں زیادہ ساری کے لیے اس کی اپنی شدید مایوسی تھی جو اسے تکلیف دیتی تھی۔ وہ نہ صرف ماں بننے کی خوشی بلکہ اس عزت اور احترام کی بھی خواہش رکھتی ہوگی جو ایک ایسے معاشرے میں ماؤں کو ملتا تھا جہاں عورتوں کی زیادہ حیثیت نہیں تھی۔ آج ہم جانتے ہیں کہ بعض اوقات بانجھ پن کی وجہ مرد بھی ہوسکتے ہیں، لیکن ساری کے دور میں ایسا کوئی حیاتیاتی علم موجود نہیں تھا۔ اس کے لیے ایک عورت کی حیثیت، اس کی قدر و قیمت، بچوں کو جنم دینے اور پالنے سے جڑی تھی۔ وہ مردوں کی نظر میں ایک راست باز اور وفادار انسان ہونے کے باعث نہیں، بلکہ اپنے شوہر کے لیے بیٹے پیدا کرنے سے عزت پاتی تھی۔ ایک خالی رحم کا مطلب خالی زندگی ہے۔[4]

انسانی حل اور تکلیف دہ نتائج

[5]جب ابرام 85 سال کا تھا، ساری کے ذہن میں ایک خیال آیا—ایک ایسا حل جس سے ابرام کو اولاد مل سکتی تھی۔ ساری کی خادمہ ان کے بچے کی ماں بن سکتی تھی! (پیدائش 16: 1-4) لیکن جو حل انہیں مکمل اور درست معلوم ہو رہا تھا، وہ اس وقت ان کے گھر کے امن و سکون کو تباہ کر گیا جب ہاجرہ حاملہ ہوگئی۔ جو چیز انہیں صحیح لگ رہی تھی، وہ درحقیقت غلط تھی۔ خدا کے وعدے کو پورا کرنے میں خود سے مدد کرنے کی کوشش نے صرف تنازعات اور اختلافات کو جنم دیا۔ جب لوگ خدا کے منصوبے اور وقت پر بھروسہ نہیں کرتے، تو اس کے فطری نتائج ٹوٹے ہوئے تعلقات اور دلوں کی تکلیف کی صورت میں نکلتے ہیں۔

اگلے برسوں میں، تناؤ، تکلیف، غلط فہمیاں، بات چیت کے مسائل، غصہ، ترک کیا جانا، اور مایوسی بڑھتی گئیں (پیدائش 16-21)۔ یہ صرف ابرام اور سارہ کے گھر تک محدود نہ رہا، بلکہ ان کے بھتیجے لوط کے خاندان میں بھی یہی حالات پیدا ہوئے۔

ناکامیوں سے بھرا خاندان

ابرام کو خدا نے ایک عظیم قوم کا باپ بننے کے لیے چُنا تھا، وہ نسل جس میں سے یسوع مسیح پیدا ہونے والے تھے! لیکن ایسا لگ رہا تھا جیسے ابرام اور اس کے خاندان کے دیگر افراد خدا کے منصوبے کو بگاڑ رہے تھے! ان کا خاندان ایک کمزور اور عیب دار خاندان کی واضح مثال تھا۔

پیدائش 49: 33 تک پہنچتے پہنچتے، ابرہام اور سارہ، اضحاق اور رِبقہ، یعقوب اور اس کی بیویاں سب وفات پا چکے تھے۔ یعقوب کے بچوں سمیت یہ سب ایک ایسے خاندان کا حصہ تھے جو ناکامیوں اور کمزوریوں سے بھرا ہوا تھا۔ ان کے درمیان لڑائیاں، بحث و تکرار، جانبداری، دھوکہ دہی، ترک کرنا، بہن بھائیوں کے درمیان رقابت، زیادتی اور ناجائز تعلقات جیسے سنگین مسائل موجود تھے۔ ان میں سے کوئی بھی چیز ایک کامیاب اور پُرسکون خاندان کی علامت نہیں تھی!

بدقسمتی سے، بائبل میں اور دنیا کی تاریخ میں یہ کہانی بار بار دہرائی جاتی رہی ہے۔ تاہم، ان ہی خاندانوں میں خوشی کے لمحات، محبت کی خوبصورت کہانیاں، اور چند راست باز لوگ بھی دیکھے جا سکتے ہیں۔

ان سب کے باوجود، خدا نے کبھی بھی انسانیت کو نجات دینے کے اپنے منصوبے کو ترک نہیں کیا، اور نہ ہی خاندان کے لیے اپنی مرضی کو بدلا۔ اگر آپ پرانے عہدنامے کا مطالعہ جاری رکھیں، تو آپ ایک شاندار موضوع دریافت کریں گے—نجات کی ایک خوبصورت کہانی، جو عبرانی خاندان کے حالات میں نمایاں ہے۔ بہت سے واقعات یسوع مسیح کی آمد کی طرف اشارہ کرتے ہیں۔ مثلاً: ابرہام کا اضحاق کو قربان کرنا، فسح کا تہوار اور بنی اسرائیل کی غلامی سے رہائی، راحب کا عدالت سے بچایا جانا اور خدا کے لوگوں میں شامل ہونا، اور بہت سے دوسرے واقعات، جو واضح طور پر اُس وعدے کی جھلک پیش کرتے ہیں کہ ایک نجات دہندہ آئے گا اور انسانیت کو بچائے گا۔

افسیوں 5 باب ہمیں بتاتا ہے کہ خدا نے شادی کو مسیح اور اُس کی دلہن، کلیسیا، کے رشتے کی عکاسی کے طور پر ترتیب دیا ہے۔ جیسے مسیح کلیسیا کے لیے اپنا آپ دے دیتا ہے، اسی طرح ہر شوہر کو اپنی بیوی کے لیے اپنے آپ کو دینا چاہیے۔ اسی طرح، ہر بیوی کو کلیسیا کی مثال پر عمل کرنا چاہیے۔ جیسے کلیسیا مسیح کے تابع ہوتی ہے، ویسے ہی ہر بیوی کو اپنے شوہر کے تابع ہونا چاہیے۔

انسانیت کے گناہ میں گرنے سے خدا کے انسانی خاندان کے لیے اصل منصوبے کو بگاڑ دیا گیا اور شادی کے رشتے پر نقصان دہ اثرات مرتب ہوئے۔ ہر خاندان کو انسانی گناہ کے نتائج کا سامنا کرنا پڑتا ہے۔ تاہم،

یسوع تمام چیزوں کو نجات دینے آیا، بشمول شادی۔ وہ ہر اُس چیز کو بحال کرنے اور درست کرنے آیا جسے گناہ نے بگاڑ دیا تھا۔ جہاں ہم خدا کے منصوبے کے مطابق شادی میں کامیاب نہ ہو سکے، وہاں یسوع نے کامل طور پر خدا کے معیار کو پورا کیا۔ یسوع نے کلیسیا سے اس قدر محبت کی کہ اُس کے لیے جان دی۔ اُس نے مکمل طور پر خدا باپ کے منصوبے کے تابع ہو کر دکھایا کہ سچی محبت اور فرمانبرداری کیسی ہوتی ہے۔ وہ خدا کے اس منصوبے کی کامل تکمیل ہے جسے ہماری شادیاں اپنی کمزوری کے باعث پورا کرنے میں ناکام رہتی ہیں۔[1]

◄ یسوع اس رویے کی ایک مثال کیسے ہیں جو ایک شادی شدہ شخص کا ہونا چاہیے؟

یسوع نہ صرف خود مکمل طور پر خدا کی مرضی کے تابع اور اُس کی محبت میں کامل تھا، بلکہ وہ شوہروں اور بیویوں کو بھی طاقت بخشتا ہے تاکہ وہ اپنی گناہ آلود فطرت کی خرابیوں پر قابو پا سکیں۔ اُس کے فضل کے ذریعے، شوہر اور بیویاں خدا کے روح القدس کی قوت میں جیتے ہوئے شادی کو خدا کے منصوبے کے مطابق گزار سکتے ہیں (افسیوں 5: 18)۔

کوئی بھی خاندان کامل نہیں ہے، لیکن خدا ہر خاندان کو نجات دینا چاہتا ہے۔ خدا کا فضل خاندانوں میں کام کر سکتا ہے اور افراد کو وہ بننے کے قابل بنا سکتا ہے جو خدا نے اصل میں اُن کے لیے چاہا تھا۔ جب خاندان کے افراد خدا کی ہدایات پر عمل کرتے ہیں، تو وہ اپنی زندگیوں میں موجود کمزوریوں اور کمیوں پر قابو پانے میں کامیاب ہوتے ہیں۔ جب ہم خدا کی مرضی کے تابع ہو جاتے ہیں تو گناہ کے نتائج، جو انسانی تعلقات کو نقصان پہنچاتے ہیں، کم ہو جاتے ہیں۔

مثال کے طور پر، جب ایک دیندار شوہر افسیوں 5 میں دی گئی خدا کی ہدایات پر عمل کرتا ہے، تو وہ اپنی فطری خودغرضی پر قابو پا کر اپنی بیوی پر غیر ضروری اختیار جتانے کی بجائے محبت سے اُس کی رہنمائی کرتا ہے۔ اُس کی خدا کے لیے فرمانبرداری اُس کے خاندان میں شفا لاتی ہے اور گناہ کے اثرات کو کم کرتی ہے۔ اُس کی یہ فرمانبرداری ممکنہ طور پر اُس کی بیوی کو بھی تحریک دے سکتی ہے کہ وہ شوہر کی سربراہی کو قبول کرے۔

اسی طرح، جب ایک بیوی خدا کی ہدایت کے مطابق اپنے شوہر کے تابع ہوتی ہے (افسیوں 5: 24)، تو وہ اپنے گناہ آلود رجحان پر قابو پا کر شوہر کے اختیار کی مخالفت کرنے کے بجائے اُسے عزت دیتی ہے۔ اُس کی خدا کے لیے فرمانبرداری اُس کے ازدواجی رشتے کو بحال کرنے کا سبب بنتی ہے اور شادی کو اُس کے اصل خدائی مقصد کے قریب لے جاتی ہے (1 کرنتھیوں 11: 3، 1 پطرس 3: 1-7)۔

خاندانی تعلقات خدا کے نزدیک بہت اہم ہیں۔ یہی وجہ ہے کہ خدا نے خاندانوں کے لیے ایسی ہدایات دی ہیں جو شفا اور بحالی کا سبب بنتی ہیں۔

والدین اور دادا دادی / نانا نانی کی ذمہ داریاں

کتابِ مقدس میں کئی مقامات پر والدین اور دادا دادی ک/ نانا نانی و نصیحت کی گئی ہے کہ وہ اپنی اولاد اور پوتے پوتیوں/نواسے نواسیوں کو خدا کے راستے سکھائیں۔ ہم یہاں تین حوالوں پر مختصر غور کریں گے۔

◄ ایک طالب علم افسیوں 6: 4 کو گروپ کے لیے پڑھے۔ یہ آیت کیا مطلب رکھتی ہے؟

یہ خدا کی مرضی ہے کہ والدین اپنی اولاد کو خدا کو جاننے اور اس کی فرمانبرداری کرنے کی تعلیم دیں۔ والدین جس طرح اپنی اولاد کی رہنمائی، تربیت، اصلاح اور راہنمائی کرتے ہیں، اس سے خدا کے اپنے فرزندوں کے ساتھ سلوک کی عکاسی ہونی چاہیے۔

◄ ایک طالب علم زبور 78: 1-8 کو جماعت کے لیے پڑھے اور درج ذیل سوالات کے جوابات دے:

• اس حوالہ میں کتنی نسلوں کا ذکر کیا گیا ہے؟

• ہر نسل کی کیا ذمہ داری ہے؟

• بڑی نسلوں کو چھوٹی نسلوں کو کیا سکھانا چاہیے؟

زبور 78 خدا کے بے پایاں فضل اور رحمت سے بھرا ہوا ہے۔ یہ بنی اسرائیل کے خاندان میں خدا کے کام کو بیان کرتا ہے، جب وہ مصر سے نکلے اور بادشاہ داؤد کی حکومت تک پہنچے۔ یہ زبور قارئین کو ان کے خاندانی حالات کے لیے امید فراہم کرتا ہے۔

◄ ایک طالب علم استثنا 6: 1-9 کو جماعت کے لیے پڑھے۔ اس حوالہ کو دیکھتے ہوئے، ہمیں خدا کے لوگ ہونے کے ناطے کیا کرنے کی ضرورت ہے؟

یہ حوالہ موسیٰ کی وہ تقریر ہے جو انہوں نے بنی اسرائیل سے کی جب وہ خدا کے دیے ہوئے وعدہ شدہ ملک میں داخل ہونے والے تھے۔ وہ سیکھ رہے تھے کہ خدا کے لوگ کیسے بننا ہے اور اس کے ساتھ تعلق میں کیسے رہنا ہے۔ ان آیات میں دی گئی سچائیاں آج بھی خدا کے لوگوں کے لیے بنیادی اصول ہیں۔

خدا ہمیں حکم دیتا ہے کہ ہم اس کے کلام کو سنیں اور اس پر عمل کریں! (آیات 3-4)۔

ہم پر لازم ہے کہ:

1. خداوند سے اپنے پورے دل، جان اور طاقت سے محبت کریں (آیت 5)۔

2. خدا کے کلام کو اپنے دل میں رکھیں (آیت 6)۔

3. اپنی اولاد کو خدا کے کلام کی پیروی کرنے کی مکمل تعلیم دیں (آیت 7)۔

4. خدا کے کلام کو اپنے ذہن میں اور ہمیشہ اپنے سامنے رکھیں (آیات 8-9)۔

غور کریں کہ یہ احکام ہر نسل کے لیے ہیں (آیت 2)۔ خدا والدین اور دادا دادی/ نانا نانی کو ذمہ دار ٹھہراتا ہے کہ وہ اپنی اولاد اور پوتے پوتیوں/نواسے نواسیوں کو خدا کے لیے جینے کی تعلیم دیں۔ کب تک؟ ان کی پوری زندگی کے دوران (آیت 2)۔ خدا فرماتا ہے کہ والدین کو اپنی اولاد کو ہر دن، ہر جگہ، اور ہر کام میں اس کی راہیں سکھانی ہیں (آیات 7-9)۔

بچوں کی روحانی تعلیم والدین کی ذمہ داری تھی۔ یہ تعلیم روزمرہ زندگی میں والدین کے نمونے اور شریعت کی بار بار دہرائی کے ذریعے دی جاتی تھی۔ اس حکم کی اہمیت والدین کی محنت میں ظاہر ہوتی ہے، جو اپنے بچوں کو محض شریعت کے اصول نہیں سکھاتے تھے بلکہ ان اصولوں کو اپنی روزمرہ زندگی میں عملی طور پر اپناتے تھے۔ والدین کو روزمرہ کے گھریلو کاموں کے دوران بھی خدا کے احکام سکھانے کے تخلیقی طریقے اپنانے کی ضرورت تھی۔[1]

والدین کو صرف اپنے بچوں کے ذہنوں کو نہیں بلکہ ان کے دلوں کو بھی سکھانا ہے۔ انہیں اپنے بچوں کو صرف خدا کے بارے میں حقائق نہیں بلکہ خدا کے ساتھ تعلق اور اس کی فرمانبرداری میں جینے کے عملی اصول بھی سکھانے ہیں۔ والدین اپنے بچوں کو زبانی تعلیم اور عملی نمونے کے ذریعے سکھاتے ہیں، اور دونوں طریقے ضروری ہیں۔

یہ حوالہ بظاہر سادہ لگ سکتا ہے، لیکن یہ نہایت اہم ہے۔ یہ سچائیاں اور احکام افراد اور خاندانوں کے لیے مقصد اور راہنمائی فراہم کرتے ہیں۔ جیسے جیسے والدین خدا کو زیادہ جاننے اور اس کی مکمل فرمانبرداری کرنے کی جستجو کرتے ہیں، وہ اپنی اولاد کو بھی یہی سکھاتے ہیں۔ والدین کو سیکھنے اور فرمانبرداری کرنے کا مستقل رویہ رکھنا چاہیے، جو ان کے بچوں کے لیے ایک مثال بنے اور انہیں خدا کے لیے پیاسا کرے۔

◄وہ کون سے عملی طریقے ہیں جن کے ذریعے والدین روزانہ اپنے بچوں کی شاگردسازی کر سکتے ہیں؟

خاندان—دوسروں سے محبت سیکھنے کی تربیت گاہ

◄ ایک طالب علم 1 یوحنا 4: 7-13، 19 کو جماعت کے لیے پڑھے۔

اس حوالہ کا مرکزی موضوع محبت ہے۔ خدا کو اس کی حقیقی ذات میں جاننے کے لیے ضروری ہے کہ ہم ایک دوسرے سے محبت کریں، اور "ایک دوسرے" میں ہمارا خاندان بھی شامل ہے۔ خدا نے ہمیں خاندان دیا تاکہ ہم دوسروں سے محبت کرنا سیکھیں۔ جب ہم اپنے خاندان کے افراد سے محبت کا اظہار کرتے ہیں (چاہے مشکل ہی کیوں نہ ہو)، تو ہم خدا کی مانند بنتے ہیں—کیونکہ خدا محبت ہے! (آیت 8)۔

جب خاندان کے افراد—چاہے جسمانی ہوں یا روحانی—ایک دوسرے سے محبت کرتے ہیں، تو وہ ثابت کرتے ہیں کہ وہ خدا سے پیدا ہوئے ہیں (آیت 7)۔ اور جب وہ ایک دوسرے سے محبت کرتے ہیں، تو خدا کی محبت ان میں کامل ہو جاتی ہے (آیت 12)۔

خدا ہم سے صرف دوسروں سے محبت کرنے کا مطالبہ نہیں کرتا، بلکہ اس نے ہم سے پہلے محبت کی (آیات 9-11، 19)۔ اس نے ہمیں یسوع مسیح کو بھیج کر محبت کی، تاکہ وہ ہمارے گناہوں کا کفارہ بنے (آیت 10)۔ خدا کی محبت ہمارے لیے، دوسروں سے محبت کرنے کی ترغیب ہے (آیت 11)۔

اپنے خاندان سے محبت کرنا بعض کے لیے آسان ہو سکتا ہے اور بعض کے لیے نہایت مشکل، لیکن ہم سب کے پاس خدا کے حکم کی فرمانبرداری کے لیے ضروری مدد موجود ہے—یعنی خدا کا ہمارے اندر بسیرا کرنا، روح القدس کے وسیلہ سے (آیات 12-13)۔

خدا ہمیں ایک دوسرے سے محبت کرنے کے لیے بلاتا ہے، جن میں ہمارے والدین، شریک حیات، اور بچے بھی شامل ہیں۔ اپنے خاندان سے محبت کرنے کا مطلب یہ نہیں کہ ہم برائی یا غلطی کو قبول کریں، اور نہ ہی اس کا مطلب یہ ہے کہ ہم جوابدہی کا تقاضا نہ کریں۔ اس کا مطلب یہ ہے کہ ہم اپنے خاندان کے افراد کی بہتری چاہتے ہیں اور ان کی بھلائی کے لیے خود کو دینے کے لیے تیار ہیں۔

◄اپنے الفاظ میں بیان کریں کہ شادی کس طرح تثلیث کے تعلقات کی عکاسی کرتی ہے۔

◄بیان کریں کہ خدا نے کس طرح ایک ایسی شادی کو بحال کیا جو گناہ کے باعث متاثر ہوئی تھی۔

◄وضاحت کریں کہ خدا کی فرمانبرداری کس طرح گناہ سے بگڑے ہوئے تعلقات کو شفا اور بحالی دیتی ہے۔

ایک لمحہ نکال کر دعا کریں اور اپنے خاندان کے لیے خدا کا شکر ادا کریں۔ اپنے خاندان کے لیے دعا کریں۔ اپنے دکھوں اور ناکامیوں، خوشیوں اور کامیابیوں کے بارے میں دعا کریں۔

استثنا 6: 4-9 کے الفاظ کو ذاتی بنائیں اور انہیں فرمانبرداری اور التجا کی دعا میں ڈھالیں۔

(1) استثنا 6: 4-9 کو زبانی یاد کریں۔ اگلی جماعت کے آغاز میں، یہ حوالہ زبانی سنائیں یا لکھیں۔

(2) استثنا 6: 1-9 میں، خدا ہم سے چار چیزوں کا تقاضا کرتا ہے۔ دعا کے ساتھ اور ایمانداری سے ان چاروں پہلوؤں میں اپنا جائزہ لیں:

ہم سے تقاضا کیا گیا ہے:

• خداوند سے اپنے سارے دل، جان، اور طاقت کے ساتھ محبت کرنا (آیت 5)۔

• خدا کے کلام کو اپنے دل میں محفوظ رکھنا (آیت 6)۔

• اپنے بچوں کو خدا کے کلام کی پیروی کرنے کی پوری کوشش سے تعلیم دینا (آیت 7)۔

• خدا کے کلام کو اپنے ذہن میں اور اپنے سامنے ہمیشہ رکھنا (آیات 8-9)۔

ہر نکتے پر ایک ذاتی دعا تحریر کریں۔ (یہ تحریر کلاس لیڈر کے ساتھ شیئر کرنا ضروری نہیں، لیکن آپ کو رپورٹ کرنا ہوگا کہ آپ نے یہ کام مکمل کر لیا ہے۔)

(3) ابرہام اور سارہ کی زندگی سے ہم انتظار کے طویل اوقات کے بارے میں سیکھتے ہیں۔ ان سوالات پر غور کریں:

• کب آپ کو خدا کے وقت کا انتظار کرنا پڑا؟ آپ نے اس انتظار کے دوران کیا سیکھا؟

• آپ خدا کے وعدوں پر کس حد تک بھروسا کرتے ہیں؟ کیا آپ اس وقت کسی وعدے کے حوالے سے جدوجہد کر رہے ہیں؟ کیا یہ جدوجہد آپ کے خاندان پر اثر انداز ہو رہی ہے؟ کیسے؟

• کیا آپ نے کبھی اپنی زندگی یا اپنے خاندان کے لیے خدا پر بھروسہ کیے بغیر کسی معاملے کو خود حل کرنے کی کوشش کی؟ اس کے نتائج کیا نکلے؟

• بےصبری اور ایمان کی کمی خاندانوں کو کس طرح منفی طور پر متاثر کرتی ہے؟

ان سوالات پر غور کرتے ہوئے تین پیراگراف تحریر کریں۔ (یہ تحریر کلاس لیڈر کے ساتھ شیئر کرنا ضروری نہیں، لیکن آپ کو رپورٹ کرنا ہوگا کہ آپ نے یہ کام مکمل کر لیا ہے۔)