(1) Суралцагч нь дараах санаануудыг тайлбарлаж чаддаг болсон байна. Үүнд:

• Нүглийг ялах итгэгчийн давуу эрх ба ач холбогдол.

• Ялгуусан амьдралыг өгдөг Бурханы нигүүлсэл.

• Христтэй харилцах харилцаанаас ирдэг сүнслэг амьдрал.

• Нигүүлслээ алдах тухай Бичвэрийн сэрэмжлүүлэг.

• Авралын тодорхой асуудлуудын талаарх христэч итгэл үнэмшил

(2) Суралцагч нь нүглийг ялж амьдрах өндөр хүлээлттэй болно.

► Ром 6–р бүлгийг хамтдаа унших. Энэ бүлэгт авралын нөлөөний тухай юу өгүүлж байна вэ?

1 Иохан захидлын гол сэдвүүдийн нэг нь хувь хүний авралын баталгаа юм. Иохан энэхүү захидлаа бичих болсон шалтгаанаа “Та нар мөнх амьтай гэдгээ мэдээсэй гэсэндээ би Бурханы Хүүгийн нэрд итгэдэг та нарт үүнийг бичлээ” (1 Иохан 5:13) хэмээн дурджээ.

► Аврагдсан эсэхдээ эргэлзэж байгаа хүн юу хийх ёстой вэ?

Итгэгч хүнд авралын баталгаа хэрэгтэй болох тийм цаг үе ирнэ гэдгийг Иохан мэдэж байлаа. Тэрээр итгэгч хүн авралын баталгааныхаа тулгуур болсон нотлох баримтыг хайх нь зөв гэдгийг үүгээр харуулсан байна. Энэ захидлын туршид Иохан зарим нотолгоог дурдахдаа “Үүгээр бид үнэнийх болохоо мэдэж”[1] хэмээн хэлсэн байдаг. Энэхүү нотолгоог ашиглан бид зүрх сэтгэлээ тайтгаруулж чадна хэмээн тэр мөн өгүүлжээ (1 Иохан 3:19).

1 Иохан захидлын туршид нүглийг ялан дийлэх итгэгч хүний шинжийг хамгийн их онцолсон байдаг. Тиймээс элч маань “Бяцхан хүүхдүүд минь, та нарыг нүгэл бүү үйлдээсэй хэмээн би эдгээрийн та нарт бичиж байна” (1 Иохан 2:1) хэмээн өгүүлжээ. Энэхүү илэрхийллээр итгэгчдийг санаатайгаар үйлдэх нүглээс[2] ангид амьдрах ёстой гэсэн санааг Иохан хэлж байна. Тэрээр ялалтын амьдралын ач холбогдлыг харуулах гэж энэ захидлаа бичжээ.

… Хэн нэг нь нүгэл үйлдвээс Эцэгийн өмнө бид Өмгөөлөгчтэй агаад тэр бол зөвт Есүс Христ мөн. Тэр Өөрөө бидний нүглийн төлөөх эвлэрүүлэл бөгөөд зөвхөн бидний нүглийн учир төдийгүй, хамаг ертөнцийн нүглийн учир билээ (1 Иохан 2:1-2).

Нүгэл үйлдэх нь тохиолдох боловч тэгэх шаардлагагүй гэдгийг Иохан энд онцолжээ. Хэрэв итгэгч хүн нүгэл үйлдвэл Христийн төлөөс нүглийг нь цайруулж чадна гэдгийг тэр баталж байна. Гэхдээ итгэгч хүн нүгэлдээ буцаж орж, гэмшихгүйгээр шууд уучлагдана гэсэн үг биш. Энэ эшлэлд дэлхий дахины бүх нүглийг өршөөх тахил бий гэдгийг л хэлж байгаа юм. Дэлхий даяараа автоматаар аврагдахгүй гэдгийг бид мэднэ. Тиймээс итгэгч хүн нүгэл үйлдсэн бол Бурхантай харилцах харилцааныхаа төлөө гэмших ёстой.

Санаатайгаар үйлдэх нүглийг ялах нь итгэгчдийн хамгийн том ялгаа гэж 1 Иохан захидлын дараах эшлэлүүдэд хэлсэн байна. Нэмэлт тайлбарыг хаалтад оруулав.

Бид Түүний тушаалуудыг сахивал, үүгээрээ бид Түүнийг таньснаа мэднэ. [Бурханд дуулгаваргүй нэгэнд ийм баталгаа байдаггүй] “Түүнийг би мэднэ” гэж хэлээд, Түүний тушаалуудыг сахидаггүй нь худалч бөгөөд түүнд үнэн алга (1 Иохан 2:3-4).

Нүгэл үйлддэг хүн бүр бас ёс бусыг үйлддэг. Нүгэл бол ёс бус юм. Нүглийг зайлуулахын тулд Тэр илчлэгдсэнийг та нар мэднэ. Түүнд ямар ч нүгэл байхгүй. Түүний дотор байгч хэн ч нүгэл үйлддэггүй. Нүгэл үйлддэг хэн ч Түүнийг үзээгүй, мэдээгүй (1 Иохан 3:4-6).

Бяцхан хүүхдүүд ээ, та нарыг хэн ч бүү мэхлэг. Зөвийг үйлдэгч нь Түүний зөвт байгаачлан зөвт юм. Нүгэл үйлддэг нь диаволынх юм. Диавол эхнээсээ нүгэл үйлдсэн. Диаволын үйлсийг устгахын тулд Бурханы Хүү үүнд илчлэгджээ (1 Иохан 3:7-8).

Бурханаас төрөгч бүр нүгэл эс үйлддэг. Учир нь Бурханы үр түүн дотор оршдог. Тэрээр Бурханаас төрсөн тул нүгэл үйлдэж эс чадна (1 Иохан 3:9).

Түүний тушаалуудыг сахигч нь Түүн дотор байж, Тэр ч түүний дотор байна. Бидний дотор Тэр байгааг Түүний бидэнд өгсөн Сүнсээр бид мэддэг (1 Иохан 3:24). [Христийн дотор байгаа бол Бурханы хуулийг зөрчих явдалтай нийцэхгүй]

Бид Бурханыг хайрлаж, тушаалуудыг нь сахихдаа Бурханы хүүхдүүдийг хайрладгаа үүгээр мэднэ. Бурханыг хайрлах нь Түүний тушаалуудыг сахих явдал юм (1 Иохан 5:2-3). [Жинхэнэ хайр дуулгавартай байдлыг төрүүлдэг. Дуулгаваргүй байдал нь хайрлахгүй байгааг харуулна].

Бурханаар төрсөн бүхэн ертөнцийг [үүний сүнс ба уруу татлагыг] ялдаг. Ертөнцийг ялсан ялалт нь бидний итгэл болой (1 Иохан 5:4).

Бурханаар төрсөн хэн боловч нүгэл үйлддэггүйг бид мэднэ. Тэднийг харин Бурханаар төрсөн Тэрээр хамгаалдаг [харгалздаг] бөгөөд ёрын муу нэгэн тэдэнд хүрэхгүй (1 Иохан 5:18).

► Итгэгч хүний ямар онцлог шинж чанар нь эдгээр эшлэлээс тодорхой харагдаж байна вэ?

Бурханд дуулгавартай амьдрах нь итгэгч хүний ялгарах шинж чанар гэдгийг эдгээр эшлэл илэрхий харуулж байна. Санаатайгаар үйлдэх нүглийг ялах нь итгэгч хүний маш том давуу тал юм.

Зарим хүн 1 Иохан 1:8-ын “Бид нүгэлгүй гэж хэлбэл өөрсдийгөө мэхэлж байгаа бөгөөд бидний дотор үнэн алга” гэсэн эшлэлийг эш татаж, итгэгч хүн санаатайгаар үйлдэх нүглийг ялж чадна гэдгийг үгүйсгэдэг. Тэгвэл нүгэл үйлдэх гэж юу вэ? Итгэгчид хүртэл санаатайгаар нүглээ үргэлжлүүлсээр байхыг хэлж байна уу? Тэгж үзвэл дээр дурдсан 1 Иохан 3-р бүлгийн санаатай зөрчилдөнө. Хэрэв Иохан өмнөх 1-р бүлэгтээ “Итгэгчдийг оролцуулаад хүн бүр нүгэл үйлдсээр байна” гэж хэлсэн гэж үзвэл тэр яаж 3-р бүлэгт дурдсан мэдэгдлийг хэлж чадах билээ? Утга авцалдахгүй болно.

Харин хам сэдвээс утга нь харагдаж байна. 1 Иохан 1:7-д нүглээс цэвэрлэнэ гэсэн амлалт байна. Энэхүү амлалт нь гэрлийн дотор явдаг буюу үнэний дагуу амьдарч, Бурханд дуулгавартай байдаг хүмүүст зориулагджээ. Бурханд дуулгавартай амьдардаг хүмүүс өнгөрсөн дэх нүглээс Христийн цусаар цэвэрлэгдсэн юм.

Гэхдээ нүгэл үйлдсэн гэдгээ үгүйсгэдэг, цэвэршүүлэг хэрэгтэй хүмүүс бий. Тэд бол өөрсдийгөө нүгэлгүй гэж үздэг, биеэ хуурч буй хүмүүс юм. Тэд хэзээ ч нүгэл үйлдэж байгаагүй, эсвэл Христгүйгээр нүглийн асуудлаа шийдчихсэн гэж хэлдэг.

1 Иохан 1:9-д мөн л уучлал, цэвэршүүлгийн аль алиныг нь амлаж байна. Тиймээс өөрсдийгөө нүгэлгүй гэж хэлдэг хүмүүс Бурханыг няцааж байгаа хэрэг гэдгийг 1 Иохан 1:10–д дурджээ. Христээс ирдэг уучлал, цэвэршүүлэг хэрэггүй, бүр аврал ч хэрэггүй гэж боддог хүмүүсийн алдааг засахын тулд Иохан үүнийг бичсэн юм. Тэрээр итгэгчдийг нүглээ үйлдсээр байна гэж хэлээгүй. Эс бөгөөс энэ нь түүний захидлын гол санаа, шууд хэлж буй илэрхийлэлтэй нь зөрчилдөнө.

Удамшсан завхрал гажуудал, хүмүүний сул талаас болж ялалтын амьдрал амархан байхгүй. Тиймээс санаатайгаар үйлдэх нүглийг хийхгүйгээр амьдрах боломжгүй гэж олон хүн боддог. Гэвч эдгээр асуудлын хариу Бурханы нигүүлсэлд бий.

► Удамшсан завхрал гажуудал гэж юу вэ?

Удамшсан завхрал гажуудал гэдэг нь хүн төрснөөс эхлээд нүгэлд татагддаг ёс суртахууны мөн чанарын гажуудал юм. Итгэснийхээ дараа хүн нүгэлд татагддаг хандлагатайгаа тэмцэлддэг. Харин Бурхан өдөр тутмын ялалтаар зогсохгүй, удамшсан завхрал гажуудлаас ангижрах нигүүлслийг соёрхдог (Үйлс 15:9; 1 Тесалоник 5:23; 1 Иохан 1:7).

Нүгэлт мөн чанар бол насан туршид маань биднийг эзэгнэх нөхцөл байдал биш. Гэхдээ ялж амьдрахын тулд итгэгч хүн зүрх сэтгэлээ Бурханд бүрэн даатгах хэмжээнд бууж өгөх ёстой (Ром 12:1). Ариун Сүнсээр дүүрэх үедээ итгэгч хүн Бурханыг бүрэн хайрлах сэтгэлтэй болдог.

► Хүмүүний сул тал гэж юу вэ?

Хүмүүний сул тал гэдэг нь бие ба оюун санааны хязгаарлагдмал байдал буюу дутагдал юм. Адамын нүглээс хойш хүн төрөлхтөн нүгэл үйлдсээр улам доройтсон тул бид оюун санаа, бие махбод, сэтгэл хөдлөлийн хувьд Бурханы бүтээсэн анхдагч байдлаасаа дорой болжээ.

[1]Сул талуудаасаа болоод бид алдаа гаргадаг. Зарим нь нөхцөл байдалд яаж хариу үйлдэхээ мэддэггүй. Зарим нь хүн ард, угсаатны талаар буруу бодолтой явдаг мэт. Буруу бодол санаа гэдэг аврал авмагц автоматаар засагддаг зүйл биш. Буруу бодол санаа нь буруу үйлдэлд хөтөлдөг учраас хэрэв хүн хийх ёстой юмаа буруу ойлгосон бол буруу л хийнэ. Хүн сул талаасаа болж тэмцэлдэхэд хүрдэг хэд хэдэн шалтгаан бий. Магадгүй Бичвэрийн зарчмуудыг яаж амьдралд хэрэгжүүлэхийг сураагүй байж мэднэ. Эсвэл муу хүслээ хязгаарлах сахилга батыг хөгжүүлээгүй байж болно. Магадгүй өөрийгөө хүчирхэг байлгах өдөр тутмын дадал хэвшилд суралцаагүй байх ч боломжтой. Эсвэл Сүнсээр явахын чухлыг сайн ойлгоогүй байж ч мэднэ.

Бид бусдыг санаатайгаар нүгэл үйлдэж байгаа эсэхийг тэр бүр мэдэхгүй тул бусдыг шүүх гэж яарах ёсгүй юм. Хүмүүс ихэвчлэн мэдлэг дутмаг, оюун санааны төлөвшилгүйгээсээ болж алдаа гаргадаг. Хэнд ч тохиолдож байгаагүй мэт уруу таталт танд учирч байв уу? Үнэхээр нүглийг бүрэн ялж амьдрах боломжтой эсэхэд та эргэлзэж байсан уу? Бурхан бидэнд уруу таталтад ордог сул талыг маань нөхөхөөс илүүтэй нигүүлслээрээ хамгаална гэж амласан юм.

Та нарт учирсан сорилт нь хүнд тохиолддог л зүйл. Бурхан итгэмжтэй, Тэр та нарыг хэр чинь хэтэртэл соригдохыг зөвшөөрдөггүй, харин дааж гарахын тань тулд сорилттой хамт мөн гарцыг ч буй болгоно (1 Коринт 10:13).

► Энэ эшлэлд бидний мэдэх ямар ямар санаа байна вэ?

Энэ эшлэл бидэнд хэд хэдэн чухал зүйлийг хэлж байна.

1. Бид хүн учраас сорилт бидэнд тохиолддог. Тиймээс ганц та л тэмцэлдээд байгаа юм биш.

2. Бурхан бидний хязгаарыг мэднэ. Биднийг аль хүртэл тэсэхийг Тэр мэднэ. Хэр тэсэхээ бид мэдэхгүй, Тэр л мэднэ.

3. Бурхан бидэнд учирч буй сорилтыг хязгаарладаг. Тэрбээр биднийг ялж амьдраасай гэж хүсдэг юм. Энэ эшлэлд хэлснээр бүх үед ялах боломж бий.

4. Ялалтад хэрэгтэй зүйлсийг маань Бурхан хангадаг. Тэрбээр бидэнд зугтах гарцыг өгдөг. Бурхан биднийг ялж амьдруулах зорилготой бөгөөд ялж амьдрах нигүүлслийг соёрхдог.

► Одоо Ром 8–р бүлэг рүү буцаж, энэ хэсэгт дурдсан эшлэлүүдийг харцгаая.

[1]Ром 8–р бүлэгт итгэгчийн амьдрал дахь Сүнсний гайхалтай ажлыг дүрсэлжээ. Ром 8:26-д бид хэрхэн залбирахаа ч мэддэггүй боловч Ариун Сүнс биднээр дамжуулан залбирдаг гэжээ.

Энэ бүлэг бидэнд хэрхэн ялж амьдрах тухай зааж байна. Бид махбодоо бус, харин Сүнсийг дагаж яваа бол яллагдахгүй (Ром 8:1, 4). Ариун Сүнсний хүч бидний дотор ажиллаж байгаа учраас бид Бурханы хүсэж буй зөвт байдлыг гүйцэлдүүлж чадах юм (Ром 8:4).

Хэрэв хүн нүгэлт мөн чанартаа захирагддаг бол Бурханд таашаагдахгүй (Ром 8:8) бөгөөд яллагдаж (Ром 8:1), Бурханаар шүүгдэнэ (Ром 8:13-д “үхнэ” гэсэн). Харин Ариун Сүнсний хүч ба удирдлагаар бид нүгэлт үйлсүүдээ орхиж чадна (Ром 8:13-14).

Иохан 15:1-10 нь усан үзмийн мод ба мөчрийн тухай алдартай зүйрлэл юм. Энэ зүйрлэл зарим чухал асуултад хариулдаг.

Бид яавал Христ дотор байх вэ? “та нар тушаалыг минь сахивал хайранд минь байх болно” (Иохан 15:10). Христ дотор байхаа болино гэдэг нь Түүнийг дагахаа болино гэсэн үг. Тэгвэл юу болох вэ?

“Хэн нэг нь Миний дотор эс байваас мөчир мэт хаягдаж, хувхайрна. Тэдгээр мөчрийг түүж, галд хаяж шатаана” (Иохан 15:6). Хэрэв хүн дуулгавартай байхаа боливол Христ дотор амьдрахаа больж, гологдоно. Галд хаягдаж буй үзмийн мөчрөөр гологдож байгаа хүнийг дүрсэлж байна.

“Миний дотор байгтун. Би ч та нарын дотор байна. Усан үзмийн модонд холбогдохгүй бол мөчир өөрөөсөө жимс ургуулж чадахгүйн адил та нар Миний дотор байхгүй бол тийм байх болно” (Иохан 15:4). “Миний дотор байгч, жимс ургуулдаггүй мөчир бүрийг Тэр авч хаяна” (Иохан 15:2). Хэрэв бид Христ дотор дуулгавартай явахгүй бол биднээс үр жимс гарахгүй. Үр жимс гаргах гэдэг нь тухайн хүний амьдрал өөрчлөгдөж, ерөөгдөж, Бурханы нигүүлслээр удирдуулахыг хэлж байгаа юм. Хэрэв хүн Бурханд дуулгаваргүй байвал Бурханы хангадаг амийн урсгалаас өөрийгөө салгаж, Бурханы нигүүлсэлд цаашид амьдрах аргагүй болно. Үр жимсгүй хүн гологддог.

Бидний хувьд Христ амь өгөгч үзмийн мод (Иохан 15:6) юм. Авралыг харилцаагаар олж эзэмшинэ. Тэгвэл Христээс тусгаарлагдах нь авралаас тусгаарлагдана гэсэн үг. Бид Христтэй харилцах авралын харилцаагаа Бурханд итгэж, дуулгавартай дагах замаар хадгалдаг (Иохан 15:10).

Энэ санааг орчин үеийн гэрлийн чийдэн ба цахилгаанаар дүрсэлж болно. Цахилгаан гүйдэл урсаж байх үед чийдэн асаж байдаг. Хэрэв чийдэнг тэжээлийн үүсгэврээс салгавал гэрэл унтарна. Үүн шиг бид Христтэй харилцах харилцаагаараа мөнх амьтай болно (Иохан 17:3). Түүний амь бидэн рүү урсдаг бөгөөд хэрэв бид өөрсдийгөө Христээс тусгаарлавал амиа хадгалж чадахгүй.

Зарим хүн амийн номд нэр нь нэгэнт бичигдсэн бол арилгах боломжгүй гэж үздэг. Гэхдээ нэр арилж болох ядаж нэг шалтгаан бий.

Хэн нэгэн нь энэхүү эш үзүүллэгийн номын үгсээс хасах аваас Бурхан энэхүү номд бичигдсэн амийн модноос болон ариун хотоос хувийг нь хасах болно (Илчлэл 22:19).

Шууд утгаараа Илчлэл номын хэсгээс хассан гэм буруутай хүн маш цөөхөн. Гэхдээ хүний нэр амийн номоос хасагдах боломжтой гэдгийг эндээс харж болно.

Есүс амлалт ба сануулгаа өгч, “Энэ мэт ялагч нь цагаан хувцас өмсөнө. Би түүний нэрийг амийн номоос баллахгүй” (Илчлэл 3:5) гэж хэлжээ.

Нэгэнтээ Паул ч Тесалоник хотын итгэгчид итгэлээсээ урвасан байх вий хэмээн санаа зовж байв. Хэрэв тэгсэн бол сайнмэдээ тараасан түүний хөдөлмөр дэмий хоосон болно (1 Тесалоник 3:5) гэж тэр хэлж байсан юм. Тэгэхээр итгэлээ бүрмөсөн хаясан итгэгч хүний анхны итгэл нь дэмий хоосон зүйл болно гэдгийг бид эндээс харж байна.

Бид 2 Петр 2:18-21–ээс хуурамч багш нар бидний Эзэн, Аврагч Есүс Христийг таньсан мэдлэгээр дамжуулан дэлхийн бузар булайгаас мултарсан зарим итгэгчдийг хууран мэхэлдэг байсан тухай уншдаг. Эдгээр итгэгчид зөвт байдлын замыг мэдсэн атлаа түүнийгээ орхижээ. Энэ хэсэгт тэднийг нүгэлт амьдралын хэв маяг руу буцсанаас анхнаасаа энэ замыг мэдээгүй байсан нь дээр гэж байна. Иймээс хүн нүгэл рүүгээ буцвал авралаа алдах боломжтой юм. Хэрэв хүн авралаа алдах боломжгүй байсан бол, аврагдахаас өмнөх байдлаасаа хэзээ ч дордохгүй байх байсан.

Хүүгийн эрх өөрчлөгдөж болно. Нэгэнтээ бид диаволын хүүхдүүд байсан (Иохан 8:44) бөгөөд бусдын адил уур хилэнг нь хүртэх хүүхдүүд (Ефес 2:3) байв. Гэвч Бурхан биднийг үрчилж авснаар бид Эцэгтэй болсон (Ром 8:15) юм. Харин төөрөлдсөн хүү эцгээсээ салж явахдаа хүүгийн эрхийг нь дагалдах бүх сайн сайхнаа алдсан байдаг. Буцаж ирэхэд нь эцэг нь түүнийг үхсэнд тооцсон байв (Лук 15:32).

Бурхан итгэгчдийг аюулгүй байдлаа мэдрээсэй гэж хүсдэг. Гэхдээ өөрсдийгөө бодит аюулд оруулах хуурамч мэдрэмжид бүү тулгуурлаасай гэж хүсдэг. Бид Бурханы амлаагүй зүйлийг итгэгчдэд амлах ёсгүй. Биднийг юу ч хийсэн бай, Бурхан бидний авралыг хамгаална гэж амлаагүй. Харин биднийг удирдан чиглүүлж, нүглийг ялж амьдрах боломжийг олгоно гэж амласан. Энэ нь биднийг айдсаас ангид байлгах хангалттай баталгаа юм.

Заримдаа итгэгчид авралдаа эргэлздэг. Тэд аврагдах үедээ итгэлтэй байсан ч, Бурхантай авралын харилцаатай гэдэгтээ эргэлзсэн хэвээр байх нь бий. Библи чухал асуултыг эргэлзээтэй хэвээр орхидоггүй. Итгэгч хүн Бурханы шалгалтыг давах эсэхдээ эргэлзэхгүйгээр Шүүлтийн өдөр итгэлтэй зогсож чадах (1 Иохан 4:17) авралын баталгаатай байх нь Бурханы хүсэл юм.

Итгэгч хүн аврагдсан гэдэгтээ итгэлтэй байхын тулд эргэлзэх үедээ үүнийг үл тоомсорлож болохгүй. Тиймээс та нар итгэлд байгаа эсэхээ шалга, өөрсдийгөө судал (2 Коринт 13:5) гэсэн байна.

Хэрэв хүн Бичвэрт заасны дагуу авралд хүргэх сүнслэг алхмуудыг дагаснаар аврагдсан гэдгээ мэдэж байвал, бас Христтэй дуулгавартай харилцаатай байснаараа Түүний дотор үлдэж байгаа гэдгээ мэддэг бол өөрийгөө сүнслэг амьдралтай гэдэгт итгэлтэй байж болно.

Ангийн удирдагчийн тэмдэглэл: Ангиас хоёр хүн энэ болон дараагийн хэсгийг тайлбарлана уу.

Хүмүүст нүглийг ялах боломжгүй мэт санагдуулдаг хоёр зүйл байдаг нь хүмүүний сул тал, удамшсан завхрал гажуудал юм. Бурхан биднийг хүний хязгаарлагдмал чанартай хэмээн буруутгадаггүйг санаарай. Бурхан хүслээ биелүүлэхийн тулд бидэнд Сүнсээрээ хүчийг өгдөг. Сул талтай байгаа нь нүгэлтэй гэсэн үг биш бөгөөд, хүн сул талаасаа болж нүгэл хийх ёсгүй.

Биднийг итгэсний дараа ч удамшсан завхрал гажуудлын нөлөө үргэлжилсээр байх болно. Гэвч Бурхан цэвэршүүлэх нигүүлслийг өгдөг. Бид удамшсан завхрал гажуудалтай төрсөндөө буруутгагдаагүй, гэхдээ бид үүнийхээ нөлөөнд автсан хэвээр байвал энэ нь бидний буруу болно. Тиймээс хүний ​​сул тал ч, удамшсан завхрал гажуудал ч бидний ялалтын амьдралын итгэл найдварыг хөсөрдүүлэх ёсгүй.

Христэд итгэх итгэлээр бид Түүнтэй нэгддэг. Бид Түүний үхэл ба амиллаар Түүнтэй холбогддог бөгөөд бид нүглийн хувьд үхэж, шинэ амьдралд амилсан (Ром 6:3-11). Тэр бидний дотор, бид Түүний дотор. Христэд итгэгчдийн амьдрал нь Христийн жишээг дагахыг хичээх төдий бус, харин хамгийн ихээр хичээх явдал юм. Христ бидний дотор амьдарснаар бид христитгэлийн амьдралаар амьдардаг. Тэр дэлхий дээр амьдарч байхдаа нүглийг ялсан шигээ, одоо ч бидний дотор ялалтаар амьдардаг.

Их хотын гудамжны хажуугийн хашлага дээр ноорхой хувцас өмссөн хөөрхий эмэгтэй сууж байв. Үс нь ширэлдэж бохирдсон, арьс нь хиртэй, заваан. Тэр найдваргүй, цөхрөлд автжээ. Гэнэт хүмүүс бужигналдаж, хаант улсын агуу ханхүү язгууртнуудтайгаа гудамжны булан тойрон гарч ирэв. Ханхүү царайлаг, хүчирхэг бас эелдэг хүн аж. Түүний сүйх тэрэг өнөө эмэгтэйн сууж буй газрыг дайран өнгөрөх үед ханхүү жолоочдоо "Зогс!" гэлээ.

Сүйх тэргийг зогсоход ханхүү зарц нартаа "Тэр хашлага дээр сууж буй эмэгтэй миний гэрлэхийг хүссэн хүн байна!" гэв.

Одоо үзэгдэл өөрчлөгдөж байна. Хуримын өдөр ордны байдал харагдана. Гэтэл юу харагдах нь тэр вэ? Нөгөө халтар эмэгтэй ноорхой хувцас, ширэлдсэн үстэй хэвээрээ. Түүний эргэн тойронд хуримын даашинз, саван, үнэртэй ус барьсан үйлчлэгч нар байгаа ч, сүйт бүсгүй хуримдаа бэлдэх сонирхолгүй сууна. Нэг хатагтай “Эзэгтэй минь, та хуримдаа бэлдэхгүй юм уу?” гэхэд сүйт бүсгүй "Тэр надтай гэрлэхийг хүсэх үед би ийм царайтай байсан. Тиймээс тэр чигээрээ байхад зүгээр гэж бодож байна" гэж хариулав.

Бид ийм хандлагад шууд цочирдоно. Ханхүү түүнд хайртай учраас ийм байдалтай байлгахыг хүсэхгүй шүү дээ. Эмэгтэйг дур булаам биш байхад нь ханхүү хайрласан бол, одоо эмэгтэй түүнд хамгийн сайхнаараа харагдахыг эрмэлзэх ёстой.

Биднийг нүгэлтнүүд байхад Бурхан биднийг хайрласан. Энэ нь нүгэл хамаагүй болсон гэсэн үг биш. Тэр бидэнд хайртай учраас нөхцөл байдлыг маань өөрчлөхийг хүсдэг. Тэр бидэнд хайртай учраас бид Түүнд таалагдах дүр төрх, зан чанарыг хүсэх ёстой.

Дэлхий даяар Христийн үнэнийг мухар сүсэгтэй хольж хутгаж байна. Зарим нь нүглийг ялах арга бол залбирал унших, сэтгэл хөдлөлийн мэдрэмж, муу сүнснүүдийг зэмлэх (зарим нүглийн шалтгаан болдог гэж үздэг хүмүүс), биеэ зовоох, ямар нэг сахиус зүүх, гэр орондоо сүнслэг бэлгэдлийн юмс байрлуулах, тусгай тосоор биеийг тослох гэх мэтээр зааж байна. Сүнслэг ид шидээс ялалт хүлээх нь алдаа юм.

Зарим нь нүглийг ялах талаар хэтэрхий хялбаршуулж заана. Аврал авч, Сүнсээр дүүрэх нь нүглийн хүчийг үүрд устгана гэцгээнэ. Тэд сүнслэг өсөлт, сахилга бат, байнгын сэрэмжтэй байх хэрэгцээг онцолдоггүй. Дэлхийг болон нүглийг тууштай ялж чадахгүй байгаа хүмүүс дараах асуултуудыг өөрөөсөө чин үнэнээр асуух хэрэгтэй.

1. Би үнэхээр дээрээс төрсөн үү? Би хуучин амьдралаа үхүүлсэн үү? Би гэмшиж, нүглээ ардаа орхисон уу? Христ доторх шинэ амьдрал буюу Бурханы юмсыг гэх шинэ хандлага, шинэ хүсэл, шинэ дур сонирхол, надад байна уу (2 Коринт 5:17)? Христ Ариун Сүнсээр миний дотор оршихоор ирсэн үү? Би нүглийг ялан дийлэх гэсэн хүслээрээ хичээж байна уу, эсвэл миний дотор оршдог Бурханы хүчинд түшиглэж байна уу (Галат 2:20)?

2. Би Бурханы хүслийг зүрхэндээ хадгалсан уу? Дууллыг бичигч, “Таны эсрэг нүгэл хийхгүйн тулд Үгийг тань зүрхэндээ би хадгалав” (Дуулал 119:11) хэмээн гэрчилсэн байдаг. Шинээр төрсөн хүүхэд эхийнхээ сүүгээр ​​хооллодог шиг бид Бурханы Үгээр хооллох ёстой (1 Петр 2:2).

3. Би өөрийгөө үнэхээр нүглийн хувьд үхсэн, Бурханы өмнө амьд гэж бодож байна уу? “Түүнчлэн та нар өөрсдийгөө нүгэлд үхсэн боловч Бурханд Христ Есүсээр амьд байгаагаа тооц” (Ром 6:11). Би сорилтыг намайг эрхшээх хүчгүй хэмээн итгэлтэйгээр үгүйсгэж байна уу?

4. Би Бурханы ялалтад түшиглэж байна уу? Бурханы гэр бүлд төрсөн хүн ертөнцийг ялна гэж Элч Иохан тунхагласан. “Ертөнцийг ялсан ялалт нь бидний итгэл болой” (1 Иохан 5:4). Ертөнцийн зүйлс биднийг татах, удирдах хүчээ загалмайгаас болж алдсан учраас Есүсийн загалмайгаас өөр зүйлд огт найдахгүй гэж Элч Паул хэлсэн (Галат 6:14) байна. Хэрэв бид бүх зөвт байдлын эх сурвалж болох Есүсийг мартвал байнга ялалтын амьдралаар амьдрах боломжгүй.

5. Би өдөр бүр Эзэн Есүсийг итгэлээр өмсөж, нүглийг үл зөвшөөрч байна уу? Бид итгэлийн ямар ч түвшинд хүрсэн бай, ялалт хэзээ ч автоматаар ирэхгүй. Би нүгэлд хандах Есүсийн хандлагыг ухамсартайгаар хүлээн авч, Түүнийг үлгэрлэн дуурайх ёстой (Ром 13:14; Ефес 4:24).

6. Би Бурханы сүнслэг хуяг дуулгыг өмсөж байна уу? Амьдралын тулааны талбарт олон итгэгч сүнслэг хамгаалалтдаа хайхрамжгүй хандсанаас болж Сатаны галт суманд шархаддаг (Ефес 6:11).

7. Би сахилга батаа дасгалжуулж байна уу? Бид итгэлдээ хэчнээн төлөвшсөн бай, сахилга батаа үргэлж хөгжүүлэх хэрэгтэй. Бид биеэ барьж, сахилга баттай байна уу? Бурханаас заяасан, төрөлх дур хүслүүдийг (идэх, унтах, бэлгийн харьцаанд орох гэх мэт) захирч, ингэснээр тэдгээр нь миний шинээр төрсөн сүнсний зорилгод үйлчлэх ёстой. Бие маань нүгэлд автсан учраас хүсэл минь тэнцвэргүй болдог. Бие махбод удирдлагыг авах бус, харин сүнс сэтгэлд минь үйлчлэх ёстой. Паул биеэ сахилгажуулж, дуулгавартай болговол сүнслэг уналтад орохгүй гэж хэлсэн (1 Коринт 9:25-27). Сахилга бат итгэгч бүрд хэрэгтэй.

8. Би дуулгавартай амьдарч байна уу? “Бид гэрлийн дотор явбал” гэж элч Иохан сануулжээ (1 Иохан 1:7). Мөнхийн улсад хүрэх замд урхи, бүдрэх чулуу, аюултай газар олон байдаг тул бид үргэлж Бурханы Үгийн гэрэл (Дуулал 119:105) болон Ариун Сүнсний оршихуйд явах ёстой (Иохан 14:26). Дуулгавартай байх нь Есүсийн цус биднийг цэвэр байлгана гэсэн амлалтыг агуулдаг. Гэрлийн зам руу буцахаас татгалзсан хүмүүс харанхуйд алхсаар нүгэлд бүдэрч, эцэст нь үхэлд хүрдэг.

► Итгэлээ шалгах хэсгийг хамгийн багадаа хоёр удаа хамтдаа уншаарай.

Христэч ялалтын амьдралаар амьдрах нь итгэгч бүрийн үүрэг юм. Итгэгч хүн Христтэй харилцах харилцаагаараа амьтай болж байдаг. Бурханы хүслийг үгүйсгэж, нүгэл рүүгээ буцсан итгэгч хүн Бурхантай холбогдох холбоос болох итгэлээ сүйрүүлэх магадлалтай. Бурханы нигүүлсэл хүчтэй тул итгэгч хүн бүх сорилтыг даван туулж чадна.

(1) Эшлэл унших: Суралцагч тус бүр дараах эшлэлүүдээс нэгийг сонгоно. Дараагийн хичээл эхлэхээс өмнө эшлэлийг уншиж, энэхүү хичээлийн сэдвийн талаар тус эшлэлд юу гэж хэлснийг багцлан бичнэ.

• Матай 13:18-23

• Еврей 10:23-39

• Иаков 1:21-27

• 2 Петр 1:1-11

• Илчлэл 3:14-22

(2) Сорил: Дараагийн хичээлийг 9-р хичээлийн сорилоор эхэлнэ. Сорилд бэлтгэж, асуултыг сайн судлаарай.

(3) Бусдад заах: Ангиас гадуур заах хуваарь гаргаж, тайлагнахаа мартуузай.

(1) 1 Иохан номын гол сэдэв юу вэ?

(2) 1 Иохан захидалд итгэгч хүний ямар шинжийг хамгийн их онцолсон бэ?

(3) 1 Коринт 10:13-р эшлэлээс бидний мэдсэн дөрвөн зүйл юу вэ?

(4) Итгэгч хүн яавал Христ дотор байх вэ?

(5) Бид Христтэй харилцах авралын харилцаагаа хэрхэн хадгалах вэ?