Lesson 15: Эртний тунхгууд

(1) Суралцагч нь дараах санаануудыг тайлбарлаж чаддаг болсон байна. Үүнд:

• Итгэл үнэмшлээ тодорхойлох итгэлийн тунхгийн зорилго, хэрэглээ.

• Библи дэх зарим тунхгуудын жишээ.

• Түүхэн гурван тунхгийн үүсэл, агуулга.

• Орчин цагийн итгэгчид яагаад түүхэн христитгэлийг баримтлах ёстой вэ?

• Тунхгийн талаарх христэч итгэл үнэмшил.

(2) Суралцагч нь эртний чуулганы итгэл үнэмшлийн суурь нь христитгэлийн анхдагч онол сургаал гэдгийг үнэлж ойлгоно.

► 2 Иохан захидлыг хамтдаа унших. Энэ хэсэгт чуулганы анхдагч онол сургаалын ач холбогдлыг юу гэж өгүүлж байна вэ?

Тунхгуудын үүсэл

 
Атанасиус[1] (ойр. НТ. 296-373) “Хүмүүн болж ирсэн нь” хэмээх алдартай зохиолыг бичсэн бөгөөд Есүс бүрэн дүүрэн Бурхан, бүрэн дүүрэн хүн байсан нь христэч итгэл үнэмшилд яагаад чухал болохыг уг бүтээлд тайлбарлажээ. Тэрээр Никайн тунхаг гарсан Никайн зөвлөлд нөлөөтэй хүн байв.

Тунхаг нь христэч итгэл үнэмшлийн хураангуй юм. Эртний чуулганыхан Библийн онол сургаалыг хураангуйлах шаардлагатай хэмээн үзжээ.

► Чуулганд яагаад тунхаг хэрэгтэй вэ? Библи байхад хангалттай биш үү?

Библид итгэдэг гэж хэлдэг ч Библитэй зөрчилдсөн сургаал заадаг хүмүүс үргэлж байдаг. Тиймээс чуулганыхан христитгэлийн үнэнийг хуурамч сургаалаас ялган харуулж чадах Библийн онол сургаалын тунхгийг боловсруулжээ.

Онол сургаалын анхны тунхаглал нь “Есүс бол Эзэн” гэсэн тунхаг бөгөөд энэ нь Есүс бол Бурхан мөн гэсэн утгатай. Түүнчлэн Эзэн Есүс Христ гэсэн илэрхийлэл ч тунхаг бөгөөд Есүс бол Мессиа (Христ) гэж хэлэх нь Тэр бол Бурхан мөн гэсэн санааг илэрхийлдэг. Үл итгэгчид Есүс бол Эзэн гэж хэлэхээс татгалзах, эсвэл Эзэн Есүс Христ гэдэг үгийг ашиглахаас татгалздаг байжээ. Хожим нь өөрсдийгөө Христэд итгэгч гэж зүтгэдэг боловч Есүсийг жинхэнэ хүн байсан гэдэгт итгэдэггүй итгэгчид гарч ирсэн байна. Тийм учраас 1 Иохан захидалд “Есүс Христ махбодоор ирснийг хүлээн зөвшөөрөгч сүнс бүр Бурханаас бөгөөд Есүсийг хүлээн зөвшөөрдөггүй сүнс бүр Бурханаас бус” (1 Иохан 4:2-3) хэмээсэн мэдэгдэл бүхий тунхаг бичигдсэн юм. Хэрэв хүн Христийн талаарх үндсэн онол сургаалыг няцааж байгаа бол тэр хүн нүгэл үйлдэж байгаа төдийгүй, Бурханаас биш гэдгийг элч Иохан ийнхүү илэрхийлжээ (2 Иохан 1:9).

Хэд хэдэн тунхаглал агуулсан, хамгийн эртний тунхгийг 1 Тимот 3:16-аас үзье.

[Бурхан] махбодоор илчлэгдсэн Тэр Сүнс дотор зөвтгөгдсөн. Тэнгэрэлч нарт үзэгдсэн Тэр Харийнханд ч тунхаглагдсан. Ертөнцөд итгэгдсэн Тэр Сүр алдраар дээш авагдсан.

Ямар ямар асуудлыг шийдэхээр 1 Тимот номд энэхүү тунхаг бичигдсэнийг бид нарийн мэдэхгүй. Гэхдээ энэ тунхагт “Бурхан махбодоор илчлэгдсэн” гэж хэлэхдээ Есүсийг хүмүүн бас Бурхан байсныг онцолсон байна.

[2]Итгэл үнэмшилтэй холбоотой эдгээр богино тунхаглалууд нь тодорхой зорилготой байжээ. Эртний итгэгчид Есүст итгэдэг өөр хүнтэй тааралдвал "Та Есүсийг Эзэн гэдэгт итгэдэг үү?", эсвэл "Есүс бол махбодоор ирсэн Бурхан гэдэгт итгэдэг үү?" гэж асуудаг байв. Хэрэв "үгүй" гэж хариулбал энэ хариултаас нь тэд уг хүнийг Есүс болон элч нарын заасан сургаалыг ер мэддэггүй, эсвэл хүлээн зөвшөөрдөггүй хүн байна гэж таньдаг байжээ.

Пэнтекостын дараах эхний хэдэн зууны туршид чуулганыхан Гурвал, Христийн биежилтийн тухай, мөн Ариун Сүнсний мөн чанарын талаар тодорхой тунхаглал гаргах шаардлагатай болохыг ойлгосон байна. Тиймээс тэд гаж сургаалаас хамгаалах үүднээс онол сургаалын жишгийг тогтоожээ. Тунхгууд нь Христэд итгэдэг хүн бүрийн түшиглэх суурь үнэнүүдийг хураангуйлах зорилгоор бичигдсэн юм.

Эдгээр тунхгууд нь бүх асуудлыг хамруулдаггүй хэдий ч эдгээр тунхаглалыг үгүйсгэсэн хүн Христэд итгэгч гэж тооцогддоггүй байжээ. Энэ нь христэч итгэл үнэмшлийг тодорхойлох гэсэн оролдлого байсан юм.

Одоо эртний чуулганы гурван тунхгийг авч үзье.

Элч нарын итгэлийн тунхгийг элч нар өөрсдөө бичээгүй, харин элч нарын онол сургаалыг тодорхой илэрхийлэх зорилгоор НТ II зуунд бичжээ.

Би газар тэнгэрийг бүтээгч аугаа хүчирхэг

Бурхан Эцэгт итгэдэг.

Ариун Сүнсээр бүтээгдэж, онгон Мариас мэндэлсэн,

Понти Пилат захирагчийн үед зовж явсан, цовдлогдон нас барж оршуулагдаад,

гурав хоногийн дотор үхлээс дахин амь орсон, тэгээд тэнгэрт одож, аугаа хүчирхэг Бурхан Эцэгийнхээ баруун гарын хүндэт суудалд заларсан,

дахин ирж үхсэн амьд бүх хүнийг шүүх Түүний цорын ганц хүү бидний Их Эзэн Есүс Христэд би итгэдэг.

Би Ариун Сүнсэнд итгэдэг.

Би Ариун нэгдмэл цуглаан, ариун хүмүүсийн нөхөрлөл, гэмд үзүүлэх уучлал, дахин амилалт болон мөнхийн амьдралд итгэдэг. Амен.

Энэхүү тунхаг нь Есүсийг үнэхээр хүн байсан, онгон эмэгтэйгээс төрсөн гэдгийг үгүйсгэдэг хүмүүсийн алдааг илчлэх зорилготой байжээ. Тэр үед Есүсийн үхсэнийг эсвэл үхэгсдээс биеэр амилсныг үгүйсгэдэг хүмүүс олон байсан.

Элч нарын итгэлийн тунхагт Ариун Сүнсний тухай маш бага дурддаг. Энэ нь чуулган Ариун Сүнсийг таниагүйгээс болсон хэрэг бус, харин хуурамч сургаалтнууд Ариун Сүнсний мөн чанарын талаарх чуулганы үзэл баримтлалыг хараахан эсэргүүцээгүй байсантай холбоотой.

Католик гэдэг нь "даяар" гэсэн утгатай үг бөгөөд нэг жинхэнэ чуулган байдаг гэсэн санаа юм.

“Нүглийн уучлал” гэдэг нь ажил үйлс, зан үйлээр бус, харин нигүүлслээр өршөөл хүртэн аврагдахыг хэлж байна.

Никайн тунхаг анх НТ 325 онд хуралдсан чуулганы зөвлөлөөс гарчээ. Энэ тунхгийг Христийн Бурхан мөн чанар болон Ариун Сүнсний тухай онол сургаалыг хамгаалах зорилготой гаргасан байна. Улмаар 381 оны зөвлөлөөр өөр хэдэн санааг нэмж оруулсан байдаг. Энэхүү тунхаг нь өмнө нь гарч байгаагүй зарим маргаантай асуудлыг цэгцлэх үүднээс бичигджээ.

Бид тэнгэр, газар, үзэгдэх ба үл үзэгдэх бүхнийг бүтээсэн

Цорын ганц Бурхан, Төгс хүчит Эцэгт итгэдэг.

Бид бүх цаг үеэс өмнө Бурхан Эцэгтэй хамт байсан, Бурханы цорын ганц Хүү, нэг Эзэн Есүс Христэд итгэдэг.

Тэрээр Бурханаас Бурхан, Гэрлээс Гэрэл, жинхэнэ Бурханаас жинхэнэ Бурхан бөгөөд Тэрбээр бүтээгдээгүй, харин Бурхан Эцэгтэй адил мөн чанартай Бурхан мөн.

Түүгээр дамжуулан бүх зүйл бүтээгдсэн. Тэрээр бидний төлөө, биднийг аврахын төлөө тэнгэрээс бууж ирсэн бөгөөд Тэр Ариун Сүнсээр бүрэлдэж, онгон Мариас мэндэлсэн, махбод дотор хүмүүн болж бүтээгдсэн. Тэрбээр бидний төлөө Понти Пилатын дор цовдлогдсон бөгөөд зовлон амсаж, оршуулагдсан. Тэр Бичвэрийн дагуу гурав дахь өдөртөө дахин амилсан бөгөөд тэнгэрт одож, Эцэгийн баруун талд заларсан юм. Тэрээр амьд ба үхэгсдийг шүүхээр сүр жавхлантайгаар эргэж ирнэ. Түүний хаанчлал хэзээ ч төгсөхгүй.

Бид Эзэн бөгөөд Амь өгөгч Ариун Сүнсэнд итгэдэг. Тэрбээр Эцэг ба Хүүтэй хамт байж, Эцэг ба Хүүгийн адил алдар хүндлэлийг хүлээн авагч Нэгэн бөгөөд эш үзүүлэгчдээр дамжуулан ярьсан.

Бид нэг ариун католик чуулган болон элч нарын чуулганд итгэдэг. Бид нүглийн уучлалын төлөө нэг баптисм хүртдэг. Бид үхэгсдийн амилал болон айсуй дэлхий ертөнцөд амьдрахыг тэсэн ядан хүлээдэг.

Амен.

► Элч нарын тунхагт байхгүй ямар санаануудыг та энэ тунхгаас харж байна вэ?

Эндээс бид Гурвалын гурван бодгалийн ​​талаар дэлгэрэнгүй өгүүлснийг харж байна. Есүсийг Бурхан хэмээн итгэдэг атлаа бурхан мөн чанарыг нь үл ойшоодог хүмүүсийн эсрэг Христийн бурхан мөн чанарыг онцгойлон дурдсан байна. Есүс бүх цаг үеэс өмнө байсан, мөнхийн, бүтээгдээгүй, мөн Бурхан Эцэгийн бүхий л мөн чанарыг агуулсан бодгаль гэж хэлсэн байна. Тиймээс Бурханыг Бурхан Эцэг гэж үзэж буйтай адилаар Есүсийг Бурхан хэмээн үзэх ёстой.

Ариун Сүнсийг Эцэг, Хүү хоёрын адил мөргөн хүндэтгэх зохистой. Энэ санаа нь Тэр ч мөн Бурхан гэдгийг батлан харуулж байна.

Калседоны тунхаг нь НТ 451 онд бичигдсэн бөгөөд Христийн биежилтийн талаарх онол сургаалыг хамгаалах зорилгоор бичигджээ. Энэ тунхгийг бичигчид Христийг бүрэн дүүрэн Бурхан, бас бүрэн дүүрэн хүмүүн байсныг батлах онол сургаалыг хамгаалахад гол санаагаа чиглүүлжээ. Яагаад гэвэл Христийн энэ хоёр шинжийн аль нэгийг нь багасгаж үзэх нь Христийн тухай сургаалыг бүхэлд нь утгагүй болгож байгаа хэрэг юм.

Төгсгөлд нь бичигчид эдгээр онол сургаалыг Библи болон чуулганы уламжлалын аль алин дээр нь суурилсан гэдгийг илэрхийлжээ. Тэд шинэ санаа дэвшүүлээгүй, харин чуулганы үргэлж итгэж ирсэн итгэл үнэмшлийг хамгаалсан юм.

Тиймээс, ариун эцгүүдийн сургасанчлан нэг бөгөөд адил Хүү бидний Эзэн Есүс Христийг хүлээн зөвшөөрсөн сургаал дээрээ бид бүгд нэгдэж байна.

Тэрбээр Бурханы нэгэн бодгаль ба төгс хүмүүн, төгс Бурхан ба оюун ухаан, бие махбодтой жинхэнэ хүн байсан. Бурхан чанарынхаа хувьд Тэрбээр Бурхантай яг адилхан шинж чанартай, хүмүүн чанарынхаа хувьд нүглээс бусдаар бүх талаараа бидэнтэй яг адилхан байсан.

Бурханы хувьд Тэрээр цаг хугацаанаас өмнө Эцэгтэй хамт байсан.

Эцсийн өдрүүдэд Тэрбээр бидний төлөө, биднийг аврахын төлөө хүмүүн болж, хүмүүний хувьд Бурханы эх болсон онгон Мариагаас мэндэлсэн юм.

Тэрээр нэг Христ, Хүү, Эзэн, Эцэгтэй хамт байсан цорын ганц Нэгэн. Түүнд хоёр мөн чанар байдаг бөгөөд тэдгээрийг хооронд нь хольж андуурах ёсгүй. Яагаад гэвэл тэдгээр мөн чанар өөрчлөгдөшгүй, хуваагдашгүй, бас салшгүй.

Түүний хоёр мөн чанар нэгдмэл боловч, тэдгээр нь хоорондоо ялгаатай. Мөн чанар бүрийн шинжүүд нь тус бүртээ хадгалагдаж, нэг бодгаль дотор нэгэн зэрэг оршдог бөгөөд хоёр тусдаа салаагүй, хоёр бодгаль болж хуваагдаагүй юм. Харин Тэрээр цорын ганц Хүү бөгөөд Бурхантай хамт байсан, Үг Бурхан, Эзэн Есүс Христ мөн.

Эш үзүүлэгчид Түүний талаар анхнаасаа ийн ярьж байсан, мөн Есүс Христ ч Өөрөө бидэнд ийнхүү зааж сургасан, чуулганы эцгүүдийн зөвлөл бидэнд энэхүү итгэлийг дамжуулж өгсөн билээ.

► Энэ тунхагт онцлон дурдсан ямар ямар санаануудыг та анзаарсан бэ?

Христийн бурхан мөн чанар нь Есүсийг газар дээр байхад байгаагүй харин зөвхөн тэнгэрт байхад нь байсан зүйл биш ээ. Анхны итгэгчид Есүсийг хүмүүний махбодод оршсон жинхэнэ Бурхан хэмээн итгэдэг байсан юм. Тэрээр газар дэлхий дээр амьдарч байхдаа Бурхан ба хүний шинж чанарын аль алиныг Өөртөө хадгалсан байв. Тэд Христийн энэхүү мөн чанарыг Аврагч мөн гэдгийг батлах онцгой шалгуур хэмээн үздэг байжээ.

Чуулган үүссэнээс хойш олон зуун жил өнгөрчээ. Дэлхий олон талаараа өөрчлөгдөж, шашны олон янзын итгэл үнэмшлүүд бий болсоор байна.

Зарим хүн ямар ч сургаал нэг хэвээрээ үлдэх ёсгүй хэмээн үздэг. Тэд хүссэн зүйлдээ чөлөөтэй итгэхийг хүсдэг боловч, өөрсдийгөө Христэд итгэгч гэж нэрлэсэн хэвээр байна.

► Бид анхны чуулганы итгэлийн тунхагт итгэх шаардлагатай юу?

Эртний тунхагт дурдаж буй Библийн Бурхан өөрчлөгдөөгүй. Түүнд итгэсэн итгэлийнх нь хариуд Бурхан тэднийг аварсан гэдгийг анхны итгэгчид мэддэг байсан. Бурханы мөн чанар ба авралын арга замын тухай өгүүлсэн эдгээр тунхгууд нь анхнаасаа христэч итгэл үнэмшлийн суурь үнэн байжээ.

[1]Эдгээр онол сургаалыг бүгдийг нь зөв ойлгож мэдэхгүй байлаа ч хүн аврагдах боломжтой. Эдгээр онол сургаал нь бүгд сайнмэдээнд шаардлагатай биш. Итгэсэн хүн үнэн гэж ойлгож мэдсэн сургаалаа үгүйсгэсэн атлаа өөрийгөө Христэд итгэгч хэвээрээ гэж хэлж чадахгүй шүү дээ. Гэхдээ хүн зарим зүйл дээр андуурч алдаж болно.

Энэхүү хичээлд яригдаж буй эртний тунхгууд нь христитгэлийн үндсэн онол сургаалыг л тодотгодог. Хэрэв ямар нэг чуулган Бурханы тухай эдгээр ойлголтоос өөр үзэл санааг гаргаж ирж байгаа бол тэд өөр сайнмэдээ буюу авралын өөр арга замыг мөн зохиож олох ёстой болно. Хэрэв ийм байдалд хүрсэн бол тэд шинэ шашин үүсгэж байгаа учраас өөрсдийгөө Христэд итгэгч гэж хэлэх ёсгүй юм.

Мэдээж, хүн бүр хүссэн зүйлээ бодох эрх чөлөөтэй боловч христэч итгэл үнэмшил байхгүй бол тэр хүн Есүсийн жинхэнэ дагалдагч байж чадахгүй.

Чуулганы эхний хэдэн зууны турш одоогийнх шиг урсгал чиглэл гэж байсангүй. Харин нэг л чуулган байв. Тиймээс итгэлийн тунхаг нь нийт чуулганыг төлөөлдөг тунхаглал байжээ. Өнөөдөр чуулганууд олон асуудлаар санал зөрөлддөг ч эдгээр тунхгийн итгэл үнэмшлийн суурь болсон Библийн эрх мэдлийг хүндэтгэдэг.

Бурхантай харилцах харилцаа хамгийн чухал гэдгийг анхны чуулганыхан мэддэг байжээ. Тэд Бурхантай харилцах харилцаагаараа аврагдсан гэдгээ мэдэж байлаа. Учир нь ямар Бурханд итгэдгээ мэдэх нь тэдний хувьд маш чухал зүйл байв.

Чуулганд анх хүрсэн тэрхүү жинхэнэ итгэлийг бид хамгаалах ёстой хэмээн Иуда захидал бидэнд анхааруулдаг (Иуда 3). Биднийг сайнмэдээ итгэмжтэйгээр тарааж, итгэгчдийг дагалдуулан, үйлчлэлд дуудагдсан хүмүүсийг сургах үед Бурхан Өөрийнхөө үнэнээр бидний үйлчлэлийг тослох болтугай.

Нэг байгууллагад нэгдсэн хэсэг бүлэг чуулгануудыг урсгал чиглэл гэнэ. Өөрсдийгөө Христийн шашинд хамруулж үздэг олон мянган урсгал байдаг. Түүнчлэн ямар ч урсгалд харьяалагддаггүй олон мянган бие даасан чуулган бий.

Заримдаа шашны урсгалууд сайнмэдээг түгээх ажлаас үүссэн байдаг. Ямар нэг бүс нутагт олон хүн итгэгч болж, тэдэнд анхаарал тавих урсгал чиглэл байхгүй бол шинэ урсгал үүсэж болно. Түүнчлэн ямар нэг илгээлтийн байгууллагын ажлаас үүдэн урсгал чиглэл бий болох боломжтой.

Зарим чуулганууд чухал онол сургаалыг үгүйсгэх эсвэл үл ойшоох үед тухайн чуулганы зарим хүмүүс шинэ бүлэг үүсгэн тусгаарласнаар урсгал чиглэл үүсэх тал ч бий. Тэд шинэ урсгалаа зөв онол сургаал дээр суурилан хөгжүүлэх сэтгэлээр эхэлдэг. Цаг хугацаа өнгөрөхийн хэрээр тэд нөгөө онол сургаалаа улам хөгжүүлнэ. Тэд Библийн зарим хэсгийг бусад христитгэлийн бүлгүүдээс өөрөөр ойлгож байгаа учраас тэдний зарим онол сургаал нь бусад урсгалынхаас өөр байдаг.

Урсгал чиглэлүүд нь мөргөл хүндэтгэлийн зөв хэв маяг, христитгэлт амьдралын нарийн ширийн зүйлийн талаарх уламжлалыг хөгжүүлдэг. Тиймээс тэд уламжлалаараа бие биенээсээ ялгардаг.

Христитгэлийн ихэнх урсгал чиглэлүүд өөрсдийгөө цорын ганц жинхэнэ чуулган гэж хэлдэггүй. Хэрэв тухайн байгууллага дангаараа дэлхий даяарх Бурханы чуулганыг төлөөлдөг гэж хэлвэл түүнд итгэх ёсгүй.

Үл итгэгчид христитгэлийг хуваагдал, олон янз байдлаас нь болж эсэргүүцдэг. Тэд христитгэлийн янз бүрийн бүлгүүд нь бүгд хоорондоо зөрчилддөг гэж боддог ажээ. Дэлхий дээр маш олон хүн Христэд итгэгчдийн дунд эв нэгдэл бага байдаг гэж боддог.

Итгэлийн эртний тунхагт буй онол сургаалд итгэдэг урсгал чиглэл, чуулганууд л жинхэнэ христитгэлт хүмүүс юм. Энэ нь мөн христитгэлт бүх байгууллагуудыг нэгтгэдэг онол сургаал юм. Харин онол сургаалын талаарх жижиг асуудал, уламжлалаасаа шалтгаалан чуулганууд олон янз байдаг тул бид жижиг сажиг ялгаанаас болж бусад чуулгануудыг Христийнх биш гэж үзэх ёсгүй.

Итгэгч хүн Бурхантай харилцаж амьдрах явцдаа Библийн үнэнүүдийн талаарх хувийн ойлголтоо хөгжүүлж байдаг. Тиймээс бусдынхтай адил дүгнэлтэд хүрэхгүй байж болно. Хүн өдөр тутмын амьдралдаа Библийн үнэнийг хэрэгжүүлэх явцдаа бусад итгэгчдийн хийдгээс өөр зарчим, дүрмийг өөртөө бий болгож болох юм.

Итгэгч хүний хувийн итгэл үнэмшил нь эртний христитгэлийн үндсэн онол сургаалаас гадуур байх ёсгүй. Христэд итгэгч байхаа болих шийдвэр гаргаагүй л бол, үндсэн сургаалаас татгалзах эрх чөлөө гэж байхгүй.

Христэд итгэгч хүн чуулганыхаа тогтож хэвшсэн сургаалд итгэх чадвартай байх ёстой. Хэрэв тухайн хүн чуулганыхаа сургаалыг буруу гэж бодож байгаа бол чуулганы гишүүний хувьд чуулгандаа үнэнчээр зориулалт гаргахад хэцүү байх болно.

Христэд итгэгч хувь хүн чуулганыхаа сургаалаар удирдуулах боловч чуулганы бусад гишүүдээс ялгаатай хувийн үзэл бодолтой байж болно. Хувийн итгэл үнэмшил гэдэг нь Библид шууд заасан зүйл биш, харин Библийн аливаа үнэнийг тодорхой асуудал дээр хэрэгжүүлэх гэсэн хувь хүний оролдлого юм.

Итгэгч хүн бүр Библийн үнэнийг нөхцөл байдалдаа шударгаар хэрэгжүүлэх ёстой боловч өөрийнхөө дүгнэлтэд түшиглэн бусдыг яаран шүүх ёсгүй. Бүх итгэгчдийг эртний тунхагт өгүүлж буй онол сургаалыг баримтлах ёстой гэсэн хүлээлттэй байх нь зөв. Түүнчлэн чуулганыхаа гишүүдийг чуулганыхаа онол сургаалыг дагах ёстой гэж бодох нь ч зөв юм. Гэхдээ бусдыг өөрийнхөө итгэл үнэмшилтэй санал нийлэх ёстой гэж бодож болохгүй.

► Итгэлээ шалгах хэсгийг хамгийн багадаа хоёр удаа хамтдаа уншаарай.

Библи бидэнд христитгэлийн анхдагч онол сургаалыг баримталж, хамгаалахыг даалгажээ. Анхны үеийн итгэгчид сайнмэдээ болон Бурхантай харилцах харилцааны талаарх чухал итгэл үнэмшлийг тунхаглажээ. Эдгээр тунхгууд нь христитгэлийн үндэс байсан хэвээр байна.

(1) Эшлэл унших: Суралцагч тус бүр дараах эшлэлүүдээс нэгийг сонгоно. Дараагийн хичээл эхлэхээс өмнө эшлэлийг уншиж, энэхүү хичээлийн сэдвийн талаар тус эшлэлд юу гэж хэлснийг багцлан бичнэ.

• 1 Тимот 3:16

• 1 Тимот 4:1-7

• Тит 1:7-14

• 1 Иохан 4:1-3, 14-15; 1 Иохан 5:12

• Иуда 1:3-13

(2) Сорил: Дараагийн хичээлийг 15-р хичээлийн сорилоор эхэлнэ. Сорилд бэлтгэж, асуултыг сайн судлаарай.

(3) Бусдад заах: Ангиас гадуур заах хуваарь гаргаж, тайлагнахаа мартуузай.

(1) Тунхаг гэж юу вэ?

(2) Есүсийн талаарх анхны хоёр тунхаглалыг нэрлэнэ үү.

(3) Хэд хэдэн тунхаглал агуулсан, хамгийн эртний тунхаг Библийн аль хэсэгт байдаг вэ?

(4) Элч нарын итгэлийн тунхаг ямар зорилгоор бичигдсэн бэ?

(5) Никайн тунхаг ямар зорилгоор бичигдсэн бэ?

(6) Калседоны тунхаг ямар зорилгоор бичигдсэн бэ?