(1) Суралцагч нь дараах санаануудыг тайлбарлаж чаддаг болсон байна. Үүнд:

• Тэнгэрийн улсын үндсэн үйл хэрэг.

• Тэнгэрийн улсын шинж байдлын талаарх Бичвэрийн илэрхийлэл.

• Мөнхийн шийтгэлийн талаарх Бичвэрийн илэрхийлэл.

• Мөнхийн шийтгэлийг үгүйсгэдэг зарим шашнуудын жишээ.

• Мөнхийн шийтгэл шударга болох нь.

• Мөнхийн шийтгэлийн талаарх христэч итгэл үнэмшил.

(2) Суралцагч нь зарим үйлдэл хэзээ ч өөрчлөгдөшгүй мөнхийн үр дагавартай гэдгийг мэдэж авна.

► Илчлэл 21-р бүлгийг хамтдаа унших. Итгэгчийн ирээдүйн тухай энэ бүлэгт юу өгүүлж байна вэ?

Бүх бүтээл Бурханы алдрын төлөө оршдог бөгөөд тэнгэрийн улс бол орчлон ертөнцийн гол үйл явдал өрнөдөг газар юм. Тэнд Бурханы дүр төрхөөр бүтээгдсэн бүтээлүүд хамтдаа Бурханд хамгийн дээд мөргөл хүндэтгэлийг өргөдөг (Илчлэл 5:11-14, унших). Бурханы алдар тэнгэрт бүрэн дүүрэн илчлэгдэж, тэрхүү дүүрэл нь тэнгэрийн хотын гэрэл байх болно (Илчлэл 21:23). Тэнд л бид Бурханы талаар бүрэн мэдэж, царайг нь харна (Илчлэл 22:4).

Тэнгэрт итгэгчид Бурханыг мөргөн хүндэтгэхдээ бүрэн дүүрэн сэтгэл ханамж, баяр хөөрийг олж авна. Дуулал 16:11-д “Өөрийн тань оршихуйд л баяр хөөр дүүрэн Таны баруун мутарт баяр жаргал үүрд байдаг” гэсэн байна. Баяр хөөр, мөргөл хүндэтгэл холбоотой байх нь зохистой. Бурхан биднийг дүр төрхөөрөө бүтээсэн учраас бид Бурханыг хангалттай таньж, мөргөн хүндэтгэж чадна. Бидний сэтгэл хөдлөл, хайрлах чадвар, оюун ухаан бүхэлдээ Бурханыг мөргөн хүндэтгэхийн төлөө өгөгджээ.

Дагалдагч нартаа хандан Есүс,

“Зүрхээ бүү шаналга, Бурханд итгэ, мөн Надад итгэ. Миний Эцэгийн гэрт орон байр олон бий. Тийм биш байсан бол Би та нарт хэлэх байсан. Би та нарт орон байр бэлдэхээр явна. Би явж, та нарт орон байр бэлдчихвэл, дахин ирж, та нарыг Өөртөө авна. Би хаана байна, та нар мөн тэнд байх болно“ (Иохан 14:1-3) хэмээн өгүүлсэн байдаг.

Есүсийн энэ үг тэнгэрийн улсын талаар зарим зүйлийг илэрхийлдэг. Хамгийн чухал нь тэнгэрийн улс бол Бурханы гэр юм гэсэн чухал үнэнийг хэлжээ. Есүс тэнгэрийн улсыг Эцэг Бурханы гэр хэмээн нэрлэсэн. Тиймээс хэзээ нэгэн цагт бид Бурхантай хамт тэнд амьдарна гэдэг нь өөр нэг чухал баримт билээ.

Тэнгэрийн улсын талаарх амлалт нь дэлхий дээрх бидний амьдралын удирдамж юм. Үүрд мөнхийг үнэт зүйлээ болгосон хүн газар дэлхий дээр хамгийн сайн сайхныг хийж амьдардаг. Тэнгэрлэг шагналыг хүлээж байгаа хүн зовлон зүдгүүрийг даван туулж, Бурханы хүслийг биелүүлж амьдрах урам зоригтой байдаг. Есүс ч хавчлагад өртсөн хүнд, “Тэнгэр дэх шагнал чинь агуу учир баярлацгаа мөн хөөрөн баясацгаа” (Матай 5:12) хэмээн хэлсэн юм.

Тэнгэрийн улсын шинж байдал

► Тэнгэрийн улсын талаар бидний мэдэж болох зарим нарийн ширийн зүйлс юу вэ?

[1]Заримдаа хүмүүс бид энэ дэлхий дээр хүссэн байшингаа худалдаж авч чадахгүй байх, эсвэл байшингаа хүссэнээрээ өөрчлөх боломжгүй байдаг. Харин Бурханд хязгааргүй хүч чадал, нөөц баялаг бий тул Түүний орон гэр Бурханы хүсэлд яг нийцсэн байх нь гарцаагүй. Тэнгэрийн улс нь Бурханы мөн чанартай төгс зохицох газар юм.

Тэнгэрт ямар ч нүгэл байхгүй. Тэнгэрэлч, хүн, бусад амьтад гэхчлэн тэнгэрийн бүх бүтээл бүрэн ариун байх болно (Илчлэл 21:8, 27, унших).

Нүглийн үр дагавар болох өвчин, шаналал, тэмцэл, аюулаас тэнгэрийн улс ангид оршино (Илчлэл 21:4, унших). Тэр цагт бүтээл дахин өвчин, хөгшрөл, үхэл зэрэг хараалыг амсахгүй (Илчлэл 22:3, унших).

Тэнгэрийн гоо үзэсгэлэнг дүрслэхийн аргагүй юм. Бид одоогоор хаш чулуун хана, сувдан хаалга, эрдэнийн чулуун суурь, алтаар хийсэн гудамжных нь тухай л мэдэх боломжтой (Илчлэл 21:18-21, унших).

Хэн бас Хэзээ?

Тэнгэрийн улсыг нүглээ гэмшиж, Есүс Христийг Аврагч, Эзэн гэж итгэдэг хүмүүст зориулж бэлтгэжээ (Иохан 3:16). Хэрэв бид мөнхийн юмсыг амьдралынхаа үнэт зүйлс болгож амьдарвал тэнгэрт үүрдийн хөрөнгө оруулалт хийж, найдвартай хөрөнгөө хурааж байгаа хэрэг юм (Матай 6:20, унших). Тэнгэрт сая сая золин аврагдсан хүмүүс, бас тэнгэрэлч нар оршин суух болно (Илчлэл 5:8-11).

Хүн хэзээ тэнгэрт очдог вэ? Есүс загалмай дээр дэргэдэх цовдлуулсан дээрэмчинд хандан түүнийг яг тэр өдөр диваажинд очно гэж хэлсэн байдаг (Лук 23:43). Паул ч Эзэнтэй хамт байхын тулд бие махбодоос хол байх болно гэж хэлжээ (2 Коринт 5:8). Тиймээс итгэгч хүн нас барах үедээ тэнгэрт очдог гэдгийг мэдэж болно. Харин Есүсийг эргэн ирэх үед амьд байх итгэгчид үхлийг үзэлгүйгээр тэнгэрт шууд очих болно (1 Коринт 15:51-52; 1 Тесалоник 4:13-18, унших).

Газар дэлхий дээрх аливаа шийтгэл хэзээ нэгэн цагт дуусгавар болдог. Хэрэв шийтгүүлж буй хүн нь үхвэл шууд л дуусна. Харин Есүс мөнхийн шийтгэлийн талаар ийнхүү хэлжээ.

Тэгээд Тэр зүүн талд байгсдад хандан “Хараагдагсад аа, Надаас зайл. Диавол болоод түүний тэнгэрэлч нарт бэлтгэсэн мөнх галд ор… тэд мөнх шийтгэлд, харин зөвт нь мөнх аминд орох юм гэж айлдлаа (Матай 25:41, 46).

Есүс ч, элч нар ч бидэнд там, галт нуур, мөнхийн шийтгэл байдаг гэдгийг баталсан. Тэрхүү аймшигтай газраас зайлсхийхийг Есүс бидэнд анхааруулдаг. Есүс ба элч нар ийнхүү хэлжээ.

Үеийн төгсгөл ч мөн ийм байх болно. Тэнгэрэлч нар ирж, зөвтийн дундаас ёрын мууг ялгаж, тэднийг галтай зууханд хаяна. Тэнд уйлаан, шүд хавирах нь буй (Матай 13:49-50).

Есүс фарисайчуудад хандаж, “Могойнууд аа, хорт могойн удам аа, тамын шийтгэлээс та нар яаж зугтаах вэ?” (Матай 23:33) гэсэн байдаг.

Нэгэн удаа Есүс нэг фарисай хүнтэй ярьж байгаад Үхэгсдийн оронд очсон хүний тарчлааны тухай ийнхүү дүрслэн ярьжээ.

Тийнхүү тэр Үхэгсдийн оронд тарчлан байхдаа хараагаа дээшлүүлж, тэртээд байгаа Абрахамыг болон Түүний өвөр дэх Лазарыг харав. Тэгээд тэр “Абрахам эцэг ээ, намайг өршөөгөөч. Лазарыг нааш нь явуулаач. Тэр хурууныхаа үзүүрийг усанд дүрээд хэлийг минь сэрүүцүүлэг. Учир нь би энэ галд амь тэмцэн зовж байна” гэж хашхирчээ (Лук 16:23-24).

Элч Паул Есүсийн тухай,

… тэнгэрээс илчлэгдэх... Бурханыг мэддэггүй ба бидний Эзэн Есүсийн сайнмэдээг дагадаггүй хүмүүсээс дүрэлзэх галд өшөө авах аж. Тэд мөнх сүйрлийн төлөөсийг төлж, Эзэний оршихуй ба Түүний хүчний алдраас сална (2 Тесалоник 1:7-9) хэмээн өгүүлсэн.

Петр ч бас,

…хэрэв нүгэл үйлдсэн тэнгэрэлч нарыг Бурхан хэлтрүүлэлгүй, харин тэднийг тамд хаяад, харанхуйн гинжинд тушааж, шийтгэл хүртэл хадгалсан (2 Петр 2:4) гэжээ.

Иохан мөн,

Тэднийг мэхэлсэн диавол хүхэр бүхий галт нуурт хаягдлаа. Тэнд мөн араатан болоод хуурамч эш үзүүлэгч байх агаад тэд үеийн үед өдөр шөнөгүй тарчилна… Мөн амийн номд нэр нь бичигдсэн нь олдоогүй бүхэн галт нуурт хаягдав (Илчлэл 20:10, 15) гэж бичсэн байна.

Энэхүү газрыг дүрслэхдээ “гал, тарчлал, өс хонзон, сүйрэл, харанхуй, гинж, шүүлт, уйлах, шүдээ хавирах” гэх мэт үгсийг хэрэглэсэн байгааг анзаараарай.

Есүс хэлэхдээ,

Баруун нүд чинь чамайг бүдрүүлбэл ухаж аваад хая. Учир нь бүтэн бие чинь тамд хаягдсанаас эрхтний чинь нэг байхгүй нь чамд дээр. Баруун гар чинь чамайг бүдрүүлбэл тастаад хая. Учир нь бүтэн бие чинь тамд хаягдсанаас эрхтний чинь нэг байхгүй нь чамд дээр (Матай 5:29-30).

Хоёр нүд, хоёр гартайгаа тамд хаягдсанаас баруун нүдээ ухаж, баруун гараа тасдсан нь дээр гэж Есүс хэлжээ. Энэ бол биеэ зэрэмдэглэхийг бидэнд уриалж байгаа хэрэг биш, харин дэлхий дээр хичнээн үнэ цэнтэй харагдаж байвч нүгэлд унагаж, тамд хүргэж чадах үйлдлийг зогсоохыг уриалж байгаа хэрэг юм.

► Тамын талаар буруу онол сургаалтай ямар шашнууд байдаг вэ?

Библи бидэнд үхэл хүний сорилтыг эцэслүүлдэг бөгөөд там бол (1) мөнхийн, (2) буцах замгүй, (3) зовлонтой газар хэмээн заадаг. Библийн энэхүү үнэнийг үхлийн дараа юу ч байхгүй гэж үздэг үл итгэгчид, там байгүй гэж үздэг Еховагийн гэрчүүд, Мормончууд болон Универсалистууд үгүйсгэдэг юм. Ромын Католик чуулган үхлийн дараа хүний нөхцөл байдлыг засах боломжтой гэж үздэг учраас үхлээр хүний хугацаа дуусгавар болно гэдгийг үгүйсгэдэг.

Там орших нь шударга бус зүйл гэж үзээд, үүнийг үгүйсгэдэг хүмүүс байдаг. Тэдний бодлоор хэрэв нүгэл цаг хугацааны хязгаарлагдмал орон зайд тохиолдсон юм бол үүнд мөнхийн шийтгэл оноох нь шударга бус хэрэг гэж үздэг. Гэгээн Августин энэхүү эсэргүүцэлд эрүүгийн хуулийн жишээг ашиглан хариулт өгсөн байдаг. Хэдхэн минутын дотор дээрмийн хэрэг гарвал хэдхэн минутын дотор л шийтгэх ёстой юу? Агшин зуурын аллага нь нөхөж баршгүй хохирол учруулдаг. Тиймээс Библид мөнхийн, хязгааргүй Бурханы эсрэг нүгэл үйлдэх нь түр зуурын цаг хугацааны дотор үйлдэгдсэн байлаа ч, мөнхийн шийтгэл дагуулдаг гэжээ.

► Там яагаад мөнх байдаг вэ?

Яагаад гэвэл,

1. Нүгэл бол хязгааргүй Бурханы эсрэг тэрслэл.

2. Гэмшээгүй нүгэлтнүүд Бурханд мөнхөд үйлчлэх өртэй гэдгээ үгүйсгэдэг.

3. Бид мөнхийн бүтээл учраас хэрэв Бурханаас салахыг сонговол бидэнд өөр очих газар байхгүй.

Газар дэлхий дээр бид шийдвэрээ өөрчлөх дуртай боломжтой байдаг. Гэвч сонголт мөнхийн үр дагаварт хүргэж болзошгүй байгаа нь хэтэрхий хатуу санагдах байх. Бид зориудын сонголт хийх үедээ ирээдүйд хоёр дахь боломж гарч ирнэ гэж бодох дуртай. Гэвч Бурхан бидний сорилтын хугацааг энэ амьдралаар хязгаарлаж байгаа нь үндэслэлгүй зүйл биш.

[1]Зарим хүн Библид Бурханыг хайраар дүүрэн гэж дүрсэлсэн байтал Бурхан хүнийг яаж тийм аймшигтай газар илгээж чадах юм бэ? хэмээн гайхаж, тамд итгэхээс татгалздаг. Бурхан хэнийг ч төөрөлдүүлэхийг хүсдэггүй бөгөөд хүн бүрийг гэмшиж, аврагдаасай гэж хүсдэгийг бид санаж байх ёстой. Үүнийг Библид хэд хэдэн газар дурджээ (2 Петр 3:9; 1 Тимот 2:4; Үйлс 17:30, унших). Тамд очих хүмүүс тэр аймшигт газар очих сонголтоо өөрсдөө хийсэн. Хэн ч там руу санамсаргүйгээр бүдрэхгүй. Тийшээ явж буй хүмүүс Бурханыг болон зөвт байдал, авралыг үгүйсгэж, тэр газрыг сонгосон хэрэг.

Бүх сайн зүйл Бурханаас ирдэг тул Бурханыг үгүйсгэх нь сайн бүхнээс татгалзана гэсэн үг. Тайван байдал, айдас, өвдөлтөөс хамгаалагдсан, тав тухтай газрыг зөвхөн Бурхан өгч чадна. Бурханаас бүрмөсөн сална гэдэг нь сайн сайхан бүхнээс сална гэсэн үг. Энэ нь там юм.

Есүс Христийн гаргасан золиосын ачаар Бурханы хайрыг хүртэж, ирэх уур хилэнгээс (1 Тесалоник 1:10) зугтах боломжийг бидэнд өгсөн Бурханд талархъя. Бид тамын зовлонгийн оронд авралын баяр баясгалан, тэнгэрийн улсын гайхамшгийг амсах болно. Бид Бурханы өмнө гэмшиж, Эзэн Есүс Христэд итгэх итгэлийг сонгох үедээ тэнгэрийн улсыг өөрсдийнхөө хувь тавилан болгон сонгодог билээ (Филиппой 3:20, Үйлс 20:21).

Газар дэлхий дээрх амьдрал дунд олон шийдвэр эцсийнх биш юм шиг санагдана. Хангалттай цаг хугацаа байвал олон алдааг засах боломжтой мэт. Гэхдээ олон шийдвэр мөнхийн үр дагавартай байдгийг бид санаж явах ёстой. Бид хэзээ үхэх, түр хугацаа маань хэзээ дуусахыг мэдэхгүй. Нэгэнт үхвэл мөнхийн хувь тавиландаа нөлөөлсөн үйлдлүүд болон бусдын шийдвэрт нөлөөлсөн үйлдлүүдээ өөрчлөх ямар ч боломж бидэнд гарахгүй.

► Итгэлээ шалгах хэсгийг хамгийн багадаа хоёр удаа хамтдаа уншаарай.

Хүн бүр тэнгэрийн улс эсвэл тамын аль нэгэнд мөнхөд оршино. Итгэгчид Бурхантай хамт амьдарч, Бурханыг баяр хөөртэйгээр мөргөн хүндэтгэх газар бол Бурханы гэр, тэнгэрийн улс билээ. Тэнгэрт ямар ч нүгэл, үүнээс үүдэлтэй зовлон зүдгүүр байхгүй. Харин там нь нүглээ Христээр уучлуулаагүй, аврагдаагүй хүмүүст зориулагдсан мөнхийн, эргэлт буцалтгүй, зовлонт шийтгэлийн газар юм. Хязгааргүй Бурханы эсрэг санаатайгаар нүгэл үйлдсэний шударга шийтгэл нь там байх болно.

(1) Эшлэл унших: Суралцагч тус бүр дараах эшлэлүүдээс нэгийг сонгоно. Дараагийн хичээл эхлэхээс өмнө эшлэлийг уншиж, энэхүү хичээлийн сэдвийн талаар тус эшлэлд юу гэж хэлснийг багцлан бичнэ.

• Исаиа 5:11-16

• Матай 5:27-30

• Лук 16:19-31

• Илчлэл 22:1-5

• Илчлэл 22:10-17

(2) Сорил: Дараагийн хичээлийг 13-р хичээлийн сорилоор эхэлнэ. Сорилд бэлтгэж, асуултыг сайн судлаарай.

(3) Бусдад заах: Ангиас гадуур заах хуваарь гаргаж, тайлагнахаа мартуузай.

(1) Тэнгэрийн улсын үндсэн үйл хэрэг юу вэ?

(2) Тэнгэрийн улсад байхгүй дөрвөн зүйлийг нэрлэнэ үү (аль ч дөрөв байж болно).

(3) Тэнгэрийн улсыг хэнд зориулж бэлтгэсэн бэ?

(4) Хүн хэзээ тэнгэрт очдог вэ?

(5) Гараа тасд гэж хэлсэн Есүсийн үг ямар утгатай вэ? (Матай 5:30).

(6) Тамын талаар Библид дурдсан гурван зүйл?

(7) Там мөнх байдаг гурван шалтгааныг нэрлэнэ үү.