Lesson 10: Ариун Сүнс

(1) Суралцагч нь дараах санаануудыг тайлбарлаж чаддаг болсон байна. Үүнд:

• Ариун Сүнсийг бодгаль гэдгийг харуулах шинж чанарууд.

• Ариун Сүнсний бодгаль ба бурханлаг шинжийн талаарх Библийн нотолгоо.

• Ариун Сүнсний бодгаль ба бурханлаг шинжийн тухай сургаал яагаад чухал вэ?

• Ариун Сүнсний түүхэн болон одоогийн үйл хэрэг.

• Итгэгч хүний ​​Ариун Сүнстэй харилцах харилцааны практик талууд.

• Ариун Сүнсний талаарх христэч итгэл үнэмшил.

(2) Суралцагч нь сүнслэг бэлэг авьяасын зарим зарчмуудыг мэдэж авна.

► Дуулал 139-ийг хамтдаа унших. Энэ дуулалд Бурханы Сүнсний талаар юу өгүүлж байна вэ?

Зарим хүн Ариун Сүнсийг ердөө хүний сэтгэлийг хөдөлгөдөг зүйл, ашиглаж болох хүч, хувь шинж чанаргүй хүч, эсвэл зүгээр л оршихуй гэж боддог. Жишээ нь: Еховагийн гэрчүүд "Ариун сүнс нь бодгаль биш, Гурвалын нэг хэсэг ч биш. Ариун сүнс бол Бурханы хүслээ биелүүлэхийн тулд ашигладаг идэвхтэй хүч юм... Үүнийг ямар нэг байдлаар цахилгаантай зүйрлэж болно”[1] гэж хэлдэг.

► Ариун Сүнсний талаарх Еховагийн гэрчүүдийн ямар ойлголт буруу байна вэ?

Еховагийн гэрчүүд нь Ариун Сүнсийг хувийн зан чанаргүй нэг хүч гэж үздэг. Бурханы тухай Библийн дагуух ойлголт байхгүй учраас тэд Ариун Сүнстэй зөв харилцаатай байж чадахгүй юм.

[2]Бид Ариун Сүнсний тухай бүгдийг ойлгож чадахгүй. Есүс ч Сүнсний ажиллах нь салхитай адил гэсэн юм. Бид салхийг сонсох ч, хаанаас ирээд, хааш явааг нь мэдэх боломжгүй (Иохан 3:8). Гэхдээ Сүнсний талаар мэдэж болох зарим зүйл бий. Тэдгээрийг мэдэх нь бидний Бурхантай харилцах харилцаанд чухал ач холбогдолтой. Ариун Сүнс ба чуулганы харилцааны талаар Үйлс номд хамгийн их дүрслэгддэг. Чуулган анх Ариун Сүнстэй хэрхэн харилцаж байсан загварыг бид тэндээс харж болох [3]юм.

1. Тэд Ариун Сүнсийг Бурхан хэмээн хүндэлсэн (Үйлс 5:3-4, унших).

2. Тэд Ариун Сүнсний оршихуй, удирдамж, үйл ажиллагааны талаар ойлгож байсан (Үйлс 15:28, унших).

3. Тэд Ариун Сүнснээс хамааралтай байж, Түүнтэй харилцах үүрэг хариуцлагаа ухамсарлаж байсан (Үйлс 4:24, 31, унших).

Ариун Сүнстэй ийм харилцаатай байхын тулд бид Түүнийг бодгаль, мөн Бурхан гэдгийг ойлгох ёстой.

Ариун Сүнсэнд Есүсийнх шиг махбод байхгүй боловч, Тэрээр хүн шиг бодгаль юм. Хүнд оюун ухаан, хүсэл зориг, сэтгэл хөдлөл гэх мэт шинжүүд бий. Ариун Сүнсэнд хүсэл зориг бий юу? Тэрбээр Христэд итгэгчдэд сүнслэг бэлгүүдийг хүссэнээрээ хуваарилдаг (1 Коринт 12:11). Ариун Сүнсэнд оюун ухаан бий юу? Тэрбээр бүх зүйлийг, тэр байтугай Бурханы гүн юмсыг ч гэсэн нягталдаг бөгөөд тэдгээрийг мэддэг (1 Коринт 2:10). Ариун Сүнсэнд сэтгэл хөдлөл бий юу? Бурханы Ариун Сүнсийг бүү гомдоо (Ефес 4:30) гэж бичигдсэн байдаг. Хэрэв Ариун Сүнс гашууддаг юм бол Түүнд сэтгэл хөдлөл байдаг гэсэн үг. Ариун Сүнсэнд оюун ухаан, хүсэл зориг, сэтгэл хөдлөл байдаг учраас бид Түүнийг бодгаль гэж мэддэг.

► Ариун Сүнсийг бодгаль гэдгийг ойлгох нь яагаад чухал вэ?

Хүнд бусадтай харилцах чадвар бий. Хэрэв Ариун Сүнс нь бодгаль бус зүгээр нэг хүч байсан бол бид Түүнтэй харилцаа тогтоох боломжгүй байх байлаа. Гэхдээ Филиппой 2:1 мөн, 2 Коринт 13:14-д Сүнсийг бидэнтэй нөхөрлөдөг гэж хэлсэн. Тиймээс Тэр бол бодгаль нэгэн мөн.

Ангийн удирдагчийн тэмдэглэл: Ариун Сүнсний бодгаль чанарын талаарх Библийн баримтыг дэлгэрүүлж мэдэхийг хүсвэл энэ хичээлийн төгсгөлд буй “Ариун Сүнсний бодгаль чанарын талаарх Библийн нотолгоо” хэсгийг үзнэ үү.

Ариун Сүнс бол бүхнийг мэддэг, бүгдийг хардаг, хаа сайгүй оршдог Бурхан юм. Ананиа, Сапфира хоёрын түүхийг санаж байна уу? Ананиаг үхэхээс өмнө Петр түүнд, “зүрх чинь яагаад Сатанд автаж... Ариун Сүнсэнд худал хэлэв?… Чи хүнд биш харин Бурханд худал хэллээ гэв” (Үйлс 5:3-4) гэсэн байдаг. Эндээс Ариун Сүнсэнд худал хэлэх нь Бурханд худал хэлэхтэй адил гэдгийг бид харж байна. Тиймээс Ариун Сүнс бол Бурхан мөн.

Ариун Сүнс бүхнийг мэддэг. Бид 1 Коринт 2:10-11–ээс Тэр бол бүхнийг мэддэг Бурхан гэдгийг мэдэж авдаг. Түүнд хязгааргүй оюун ухаан байх учиртай. Тэрбээр Хуучин гэрээний бичвэрүүд болон бүхий л мэдлэг шаардагдах эш үзүүллэгт онгод оруулсан юм (2 Петр 1:21, унших). Бичвэрүүд Бурханы амьсгалаар ирсэн (2 Тимот 3:16). Тиймээс Ариун Сүнс бол Бурхан мөн.

Ариун Сүнс хаа сайгүй оршдог. Дуулал 139:7-10–д Бурханы Сүнсний оршихуйгаас зугтах газар байхгүй гэжээ. Ариун Сүнс итгэдэг хүн бүртэй хамт байдаг. Учир нь хэрэв хүнд Христийн Сүнс байхгүй бол тэр хүн Христийн харьяат биш гэж Библид хэлжээ (Ром 8:9). Хам сэдэв нь Христийн Сүнс бол Ариун Сүнс гэдгийг илэрхийлж байна.

Ариун Сүнсэнд бүхий л хүч бий. Тэрээр зөвхөн Бурханы хийж чадах зүйлийг хийдэг. Тиймээс энэ дэлхийг нүгэл, зөвт байдал хийгээд шүүлтийн (Иохан 16:8) талаар зэмлэдэг юм. Үүнийг хийхийн тулд Тэрбээр хүн бүрийн ухамсарт хүрч, тодорхой үнэнийг оюун санаанд нь хэлж ойлгуулдаг. Тэр бас итгэгчдэд дотоод хүчийг хайрладаг (Ефес 3:16, унших). Сүнс нь энэ дэлхийн хаа сайгүй итгэгчдийн амьдралд сүнслэг үр жимсийг бий болгож байдаг (Галат 5:22-23, унших). Тэнгэрлэг хүчнээс өөр хэн ч ийм зүйлийг хийж чадахгүй.

Ариун Сүнс доромжлолыг мэдэрдэг тухай Бид Лук 12:10-аас харж болно. Бурханыг доромжлох гэдэг үгийг ашиглан хэлсэн байгаа нь Ариун Сүнсийг Бурхан гэдгийг илэрхийлж байна.

Ариун Сүнс бол мөнх (Еврей 9:14).

Бидний бие махбодыг Ариун Сүнс амьдардаг Бурханы сүм (1 Коринт 3:16) гэжээ.

Библийн нотолгооноос бид Ариун Сүнс бол Бурхан, тэнгэрлэг Гурвалын гурав дахь бодгаль гэдгийг бид мэдэж болно.

► Ариун Сүнсийг Бурхан гэж итгэх нь яагаад чухал вэ?

Ариун Сүнсийг Бурхан гэж итгэдэг бол бид Түүнд алдар хүндлэлийг өгч чадна. Ариун Сүнсэнд мөргөл хүндэтгэл өргөхгүй байх нь ноцтой зүйл юм.

Ариун Сүнс нь Эцэг Хүү хоёроос ялгаатай гэж хэлэх нь Тэднийг хүмүүс шиг тусдаа бие даасан гэж хэлж байгаа хэрэг биш. Гурвалын гишүүн бүр бие биедээ орших бөгөөд бүгд нэг ижил Бурхан юм. Гэхдээ хоорондоо ярилцаж, бие биенээ хайрлах, бие биетэйгээ болон бидэнтэй жинхэнэ хувийн харилцаатай байж чадахуйц хангалттай ялгаа Түүнд бий.

Бичвэрт Гурвалын бодгалиудын ялгааны талаар мөн заадаг. Жишээлбэл, Иохан 14-16-р бүлэгт Есүс, Эцэг рүү буцахдаа нэгэн Туслагчийг явуулна гэдгээ дахин дахин дурдсан байдаг (Иохан 14:16-17, 26; Иохан 15:26; Иохан 16:7, 13-15, унших). Энэ Туслагч дагалдагчдыг удирдан чиглүүлж, тэдэнд заах болно гэжээ. Хэрэв Есүс, Ариун Сүнс хоёр нэг бодгаль байсан бол Тэрбээр Ариун Сүнсийг өөр Туслагч гэж хэлэх нь утгагүй юм. Тиймээс Есүс энд өөр нэгэн бодгалийн талаар өгүүлжээ.

Ариун Сүнс Өөрийн эрх мэдлээр ярихгүй, харин Эцэгээс Христийн хүлээн авсан Христийн юмсыг илчилнэ гэж Есүс хэлсэн (Иохан 16:13-15). Хэрэв Есүс, Эцэг хоёр Ариун Сүнстэй адил бодгаль байсан бол ингэж хэлэх нь мөн л утгагүй юм.

Есүсийг баптисм хүртэх үед тэнгэрээс "Хайрт Хүү минь Чи билээ" гэсэн дуу гарч, Ариун Сүнс Есүс дээр тагтаа мэт буув (Марк 1:10-11) гэжээ. Энд Гурвалын гурван гишүүн нэгэн зэрэг, бие биенээсээ ялгаатай байдлаар оролцсон байна.

Ариун Сүнс онцгой бодгалийн ​​хувьд Эцэг Хүү хоёртой өнө мөнхөд хайрын харилцаанд амьдарсаар иржээ. Бурхан биднийг энэхүү харилцаанд оролцуулахаар бүтээсэн юм. Бурхан биднийг Өөртэйгөө харилцаатай байж нөхөрлөхийг хүсдэг (1 Иохан 1:3-4). Гурвалын гишүүн бүр цаг хугацааны эхлэлээс өөр хоорондоо дотно нөхөрлөсөөр иржээ (Иохан 17:22-23, унших).

Бүтээлийн эхнээс л Ариун Сүнс дэлхий дээр идэвхтэй ажилласаар ирсэн. Тэр газар дэлхийг бүтээхэд оролцсон (Эхлэл 1:2, 26). Тэрээр хүмүүст онцгой ажил хийх онцгой чадварыг өгдөг (Гэтлэл 35:30-31; Шүүгчид 3:9-10; Шүүгчид 15:14-15). Тэр бас эш үзүүлэгчдэд үг мэдээг дамжуулсан (Исаиа 61:1). Ариун Сүнс бичвэрүүдэд онгод оруулсан (2 Петр 1:21). Тэрбээр үргэлж хүмүүсийн зүрх сэтгэлд ажиллаж, Бурхан руу эргүүлэхийг хичээдэг (Үйлс 7:51).

Түүнийг амийн Сүнс гэдэг (Ром 8:2, унших). Тэр биднийг бүтээсэн, бидэнд амь өгсөн Сүнс билээ. Хэрэв Тэр энэ дэлхийг орхин одвол амьдрал бүхэлдээ зогсож, хүн төрөлхтөн буцаад шороо болж хувирна (Иов 33:4, Иов 34:14-15.)

Шинэ гэрээнээс Ариун Сүнсний ажлын шинэ мөн чанарыг харж болно. Баптисч Иохан Есүсийг хүмүүст Ариун Сүнсээр баптисм хүртээгч гэж хэлсэн байдаг (Матай 3:11). Есүс ч дагалдагч нартаа Эцэгийн амлалт буюу Пэнтекостын өдөр Ариун Сүнсний баптисм буухыг хүлээх тухай хэлсэн юм (Үйлс 1:4-5, 8).

Есүс дагалдагч нартаа Ариун Сүнс тэдэнтэй хамт байж, Есүсийн заасан зүйлсийг сануулан, үнэний зүг хөтөлнө гэж амласан (Иохан 14:26, Иохан 16:13). Есүс Ариун Сүнсийг өөр нэгэн Туслагч (Иохан 14:16, 26; Иохан 15:26; Иохан 16:7) гэж хэлсэн. Есүсийн ашигласан грек үг нь хамт байж, урамшуулж, тусалдаг нэгнийг заасан үг юм. Энэ үг төлөөлдөг нэгэн гэсэн утгыг ч агуулдаг. Тиймээс Ариун Сүнс Есүсийг төлөөлж, Есүсийн үгсийг бидэнд сануулдаг.[1]

► Ариун Сүнс юу хийдэг вэ?

Дэлхий дээрх Ариун Сүнсний ажлыг бүрэн тайлбарлах боломжгүй ч Түүний зарим үйл хэргийг энд жагсаая.

1. Тэрээр нүглийг буруушаадаг (Иохан 16:8; 1 Коринт 2:4; 1 Тесалоник 1:5). Эс бөгөөс хүн гэмшиж, уучлагдах хэрэгцээгээ ухамсарлах боломжгүй байв.

2. Тэрээр нүгэлд үхсэн хүнд амь өгч, сэргээдэг (Тит 3:5; Ефес 2:1; Иохан 3:5).

3. Тэрээр итгэгчдэд аврагдсан гэдгээ мэдэх хувьчилсан баталгааг өгдөг (Ром 8:16).

4. Тэрээр итгэгч бүрийн дотор оршдог (аврагдсан хүн бүр Ариун Сүнстэй) (Ром 8:9; 1 Коринт 6:19).

5. Тэрээр Бурханы үнэнийг ойлгуулдаг (1 Коринт 2:9-10, 13-14; 2 Коринт 3:14-17; Ефес 6:17).

6. Тэрээр хүмүүсийг онцгой үйлчлэлд дуудаж, үйлчлэлийн шийдвэрт дагуулдаг (Үйлс 13:2-4, Үйлс 15:28, Үйлс 16:6-10).

7. Тэрээр итгэгчийг ариусгаж, түүнийг ариун байлгахын тулд зүрх сэтгэлийг нь цэвэрлэдэг (Үйлс 15:8-9; 1 Петр 1:2).

8. Тэрээр нүглийг ялж амьдрах хүчийг өгдөг (Ром 8:1, 5, 13; Галат 5:16).

9. Тэрээр итгэгчийн амьдралд сүнслэг үр жимсийг ургуулдаг (Галат 5:22-23).

10. Тэрээр үйлчлэх бэлэг авьяас өгдөг (1 Коринт 12:4-10, 28-30; Ром 12:6-8; 1 Петр 4:10-11).

11. Тэрээр үйлчлэх онцгой тосолгоо өгдөг (Үйлс 1:8, Үйлс 13:9; Галат 3:5; 1 Петр 1:12).

12. Тэрээр итгэгч хүнд Бурханы хүслийн дагуу залбирахад нь тусалдаг (Ром 8:26-27; Ефес 6:18).

13. Тэр чуулганд эв нэгдэл, нөхөрлөлийг өгдөг (Ефес 4:3; Филиппой 2:1).

Ангийн удирдагчийн тэмдэглэл: Ангийн нэг гишүүн энэхүү хэсгийг тайлбарлана уу.

1. Сүнс нь ялгаатай бэлэг авьяас, үйл ажиллагаа, удирдлагаар дамжуулан ажилладаг (1 Коринт 12:4-6).

2. Сүнслэг бэлэг авьяас нь сүнслэг байдлын дагуу бус, харин Бурханы хүслийн дагуу хуваарилагддаг (1 Коринт 12:11, 1 Коринт 4:7).

3. Хүн бүрд Сүнсний ямар нэг бэлэг авьяас өгөгдсөн байдаг (1 Коринт 12:7).

4. Итгэгч бүрийг адилхан бэлэг авьяастай гэж бодож болохгүй (1 Коринт 12:8-11, 14-30).

5. Бэлэг авьяас нь Бурханы алдрын төлөө бусдад үйлчлэхэд ашиглагдах ёстой (1 Коринт 12:21-22, 25; 1 Петр 4:10-11).

Христэд итгэгч хүмүүс хэлүүдээр ярих бэлэг авьяасын талаар тэр бүр санал нэгтэй байдаггүй. Зарим нь итгэгч хүн бүр Ариун Сүнсийг хүлээн авахдаа ер бусын хэлүүдээр ярьдаг гэж итгэдэг.

Бусад нь хэлний бэлэг авьяасыг өөр хэлээр ярьдаг хүмүүстэй харилцах зорилгоор зарим хүнд өгөгддөг гэж үздэг. Үүнийг Пэнтекостын өдөр итгэгчдийг олон янзын хэлээр ярих үед тэнд байсан хүмүүс ойлгож байсантай холбож тайлбарладаг (Үйлс 2:6). Бурхан энэхүү бэлэг авьяасыг төдийгүй бусад сүнслэг билгүүдийг хүссэн хүндээ өгдөг гэж тэд үздэг (1 Коринт 12:4-11). Итгэгч бүрд байх ёстой адилхан бэлэг авьяас гэж байхгүй (1 Коринт 12:29-30). Тиймээс итгэгч хүн бүр Ариун Сүнстэй (Ром 8:9) хэдий ч бэлэг авьяас нь итгэгч хүнийг баталгаажуулах ямар нэг зүйл биш (1 Коринт 14:22) гэж тэд итгэдэг.

Хэлүүдээр ярих бэлэг авьяастай холбоотой олон ялгаатай үзэл бодол нь үйлчлэлд хамтран ажиллахад саад болж мэдэх ч, итгэгчид энэ асуудал дээр бие биенийхээ үзэл бодлыг шүүмжилж болохгүй.

Хэрэв та Бурхантай харилцдаг бол Ариун Сүнстэй ч мөн харилцдаг. Гурвалаас ганц бодгалийг л мэддэг, харин бусдыг нь мэдэхгүй байх боломжгүй юм (Ефес 2:18; Иохан 6:44, унших).

Хүн аврагдахаасаа өмнө Ариун Сүнсний тухай онол сургаалыг сайн ойлгохгүй байж болох юм. Дагалдагчид ч Сүнсний талаар сайн мэддэггүй байв. Харин Есүс тэдэнд тэд Сүнсийг мэдсэн, бас тэр Сүнс аль хэдийн тэдэнтэй хамт байсан гэдгийг хэлсэн юм (Иохан 14:17, унших).

Ариун Сүнсний тухай зөв онол сургаалыг мэдэх нь Түүнтэй зөв арга замаар харилцахад тусалдаг бөгөөд бидний амьдралд илүү ихийг хийх боломжийг Сүнсэнд олгодог. Тэр бодгаль нэгэн гэдгийг мэдсэнээр Түүнтэй харилцах боломжтой гэдгээ бид ойлгодог. Түүнтэй яривал Тэр бидэнтэй ярина. Тэрбээр ихэвчлэн сонсогдохуйц бус дуу хоолойгоор ярьдаг ч, Тэр бидэнд Бурханы хүсэл болон хайрыг ойлгоход тусалдаг. Хэрэв бид Бурханы хүслийг биелүүлэхийг хүсвэл, ихэвчлэн ингэж мэдэрдэггүй ч гэсэн Ариун Сүнс биднийг удирдан чиглүүлэх болно.

Түүнийг бодгаль гэдгийг мэдсэнээр бид Түүнтэй зүгээр нэг хүч, эсвэл мэдрэмж юм шиг хандахгүй гэсэн үг. Бид Бурханд мөргөл хүндэтгэл өргөхдөө оюун бодолгүй зөвхөн мэдрэмжээсээ таашаал авах бус, харин Түүнийг хэн болох, ямархуу зан чанартай гэдгийг эргэцүүлж тунгаадаг. Бид залбирах үедээ ухаанаар ярьж, Түүний харуулахыг хүсэж байгаа зүйлийг ойлгохыг хичээдэг болохоос бусад шашны хүмүүс шиг хувьчилсан яриагүй, ид шидийн төдий байдлаар ханддаггүй.

Ариун Сүнсийг Бурхан гэдгийг нь мэдсэнээр бид Түүнд хүндлэл бишрэлтэй ханддаг. Бид залбирч, Түүний удирдамжийг мэдрэх үедээ Ариун Сүнс биднийг хайрладаг, биднийг бүрэн мэддэг, ирээдүйг маань ч мэддэг Бурхан гэдгийг санах учиртай. Тэр туйлын эрх мэдэлтэй Нэгэн учраас бид Түүнд дуулгавартай байх ёстой юм.

Тэр бидэнтэй үргэлж хамт байдаг. Бичвэрт биднийг Сүнс дотор амьдарч, Сүнс дотор явах ёстой гэж заасан (Галат 5:25) билээ. Бид түүний оршихуйд байгаа мэт амьдрах ёстой бөгөөд зөвхөн чуулган дээр л Сүнсний оршихуй ирдэг гэж бодох ёсгүй юм. Тэрээр бидэнтэй хамт байгаад зогсохгүй бидний дотор амьдардаг билээ. Энэ л шалтгааны улмаас бид цэвэр ариун амьдрах ёстой юм (1 Коринт 6:19, унших).

Ариун Сүнс бидэнд нүглийг ялах ялалтыг өгч, цэвэр ариун зүрх сэтгэлтэй болгох нь Түүний нэн тэргүүний зорилго юм (Ром 8:13; Галат 5:16; Үйлс 15:8-9). Биднээр дамжуулан чухал зорилгоо биелүүлэхийг бид Сүнсэнд зөвшөөрч чадахгүй байгаа бол бусад зүйлийг ч гуйх ёсгүй. Бид итгэлээр залбирч, Тэр биднийг бүрэн ариусгана гэдэгт итгэх ёстой (1 Тесалоник 5:23, унших).

Амьдралын хүнд хэцүү үед Тэр бидэнд дотоод хүчийг өгдөг (Ефес 3:16). Тэр биднийг ойлгож, бидний нөхцөл байдлыг мэддэг учраас яг хэрэгтэй зүйлийг маань Тэр өгч чадна.

Үйлчлэх үедээ бид Түүнд болон удирдамжид нь түшиглэж, Үгээрээ хүч өгч, бусдын зүрх сэтгэлд сүнслэг үр дүнг гаргаасай хэмээн найдан үйлчлэх ёстой.

Та хэдийн Сүнсээр дүүрсэн байлаа ч, Түүнтэй харилцсаар байх ёстойгоо мартаж болохгүй. Сүнсээр дүүр гэсэн тушаал нь тасралтгүй Сүнсээр дүүрэн байна гэсэн үг юм (Ефес 5:18, унших). Бид тасралтгүй дүүрсээр байх хэрэгтэй бөгөөд энэ нь Түүнтэй харилцах харилцаагаар тэтгэгдэж байдаг.

► Итгэлээ шалгах хэсгийг хамгийн багадаа хоёр удаа хамтдаа уншаарай.

Ариун Сүнс бол Эцэг ба Хүүгийн адил бүрэн дүүрэн Бурхан бөгөөд Гурвалын нэг бодгаль юм. Тэр нүглийг буруушааж, итгэгчийг дахин төрүүлж, түүний дотор амьдардаг. Тэрээр итгэгч хүн бүрд нүглийг ялах ялалтыг соёрхон, зүрх сэтгэлийг нь цэвэршүүлдэг. Тэрбээр Сүнсний үр жимс, сүнслэг бэлэг авьяасаар үйлчлэлийг ерөөгч бөгөөд чуулганы нэгдмэл амь билээ.

Ангийн удирдагчийн тэмдэглэл: Энэ хэсгийг сонгон суралцах боломжтой. Хэрэв гишүүдэд энэ сэдвээр Библийн илүү их нотолгоо хэрэгтэй бол хамт судалж болно.

Зарим хүн Сүнсний бодгаль чанарыг үгүйсгэж, татах хүч эсвэл цахилгаантай адил, хувийн зан чанаргүй, зүгээр нэг хүч мэтээр үздэг. Гэвч Библид Ариун Сүнсийг дүрсэлсэн шиг тийм байдлаар зүгээр нэг хүчийг дүрслэх боломжгүй. Цахилгаан ярьдаггүй, учирладаггүй, татах хүчинд хүн худлаа хэлэх шаардлагагүй. Оюун ухаангүй хүч хэрхэн Бурханы хүслийг ойлгох билээ?

Зарим хүн бичвэрүүдийг хүншүүлэл гэж үздэг учраас бодгаль биш зүйлийг хүн мэтээр дүрслэн илэрхийлсэн гэж хэлдэг. Гэхдээ Сүнсийг Өөрийнхөө үг хэллэгээр ярьж, хүмүүс ч Түүнтэй бодгалийнх нь хувьд хариу өгч ярьсан тухай Бичвэрт өгүүлдэг шүү дээ. Библийн хэд хэдэн хэсэгт Сүнсийг шингэн зүйл мэтээр шилжсэн утгаар дүрслэхдээ асгаран буусан хэмээжээ (Үйлс 2:17). Библид Сүнсийг Өөрийн зан чанартай бодгаль гэж хэлдэг учраас эдгээр дүрслэлийг шилжсэн утгаар ойлгох хэрэгтэй.

Ариун Сүнсний бодгаль чанарын талаарх Библийн нотолгоо:

• Матай 28:19-д биднийг Эцэг, Хүү, Ариун Сүнсний нэрээр баптисм хүрт гэсэн байна. Эндээс гурвуулаа эрх мэдэлтэй гэсэн санааг харж болно.

• 2 Коринт 13:14-д Ариун Сүнсний нөхөрлөлийн тухай дурдсан нь Түүний ухаалаг харилцаа холбоог илтгэдэг.

• Марк 13:11-д хавчлагын үед Ариун Сүнс итгэгчдээр дамжуулан ярих болно гэж амлажээ.

• Иохан 14:17, 26-д Ариун Сүнсийг зааж сургадаг, сануулдаг үнэний Сүнс гэж нэрлэжээ.

• Иохан 16:7-11-д Ариун Сүнс энэ дэлхийг нүгэл, шударга ёс, шүүлтийн улмаас зэмлэнэ гэж Есүс хэлсэн. Энэ бүхэнд ухаалаг харилцаа холбоо шаардлагатай.

• Иохан 16:13-15–д Ариун Сүнс Өөрийнхөө эрх мэдлээр ярихгүй, харин Христийн юмсыг тунхаглана гэжээ.

• Мөн 1 Коринт 12:11-д Ариун Сүнс сүнслэг бэлэг авьяасыг хэрхэн өгөхөө сонгодог тухай өгүүлсэн.

• Тэрээр биднийг Бурханы хүүхдүүд гэдгийг (Ром 8:16) бидний сүнстэй хамт гэрчилдэг.

• Тэрбээр Эцэгийн өмнө бидний төлөө зуучлан гуйдаг бөгөөд Бурханы хүслийг ойлгох оюун ухаан Түүнд бий (Ром 8:26-27).

• Ефес 4:30-д Түүнийг гашууддаг гэсэн байгаа нь Тэр бидний өгч буй хариу үйлдлийг ойлгодог, сэтгэл хөдлөлтэй гэдгийг харуулж байна.

• Түүнд худал хэлж байгаа үйл явдал нь Тэр харилцааг ойлгодог гэдгийг харуулдаг (Үйлс 5:3).

• Тэр ярьдаг, зааварчилдаг, хүмүүст хүслээ илэрхийлдэг (Үйлс 13:2-4).

• Тэрбээр элч нарыг сайнмэдээний аянд удирдан чиглүүлж, зарим газар руу явахгүй байхыг сануулж байсан (Үйлс 16:6).

(1) Эшлэл унших: Суралцагч тус бүр дараах эшлэлүүдээс нэгийг сонгоно. Дараагийн хичээл эхлэхээс өмнө эшлэлийг уншиж, энэхүү хичээлийн сэдвийн талаар тус эшлэлд юу гэж хэлснийг багцлан бичнэ.

• Үйлс 1:4-8

• Ром 8:1-14

• 1 Коринт 2:9-16

• 1 Коринт 12:1-13

• Галат 5:22-26

(2) Сорил: Дараагийн хичээлийг 10-р хичээлийн сорилоор эхэлнэ. Сорилд бэлтгэж, асуултыг сайн судлаарай.

(3) Бусдад заах: Ангиас гадуур заах хуваарь гаргаж, тайлагнахаа мартуузай.

(1) Чуулган анх Ариун Сүнстэй харилцаж байсан гурван загварыг энд нэрлэнэ үү.

(2) Ариун Сүнсийг бодгаль гэдгийг бид хэрхэн мэдэх вэ?

(3) Ариун Сүнсийг Бурхан гэдгийг мэдэж болох таван арга зам юу вэ?

(4) Ариун Сүнсний үйл хэргээс есийг жагсааж бичнэ үү (Аль нь ч байж болно).

(5) Бидний амьдрал дахь Ариун Сүнсний нэн тэргүүний зорилго юу вэ?