(1) Суралцагч нь дараах санаануудыг тайлбарлаж чаддаг болсон байна. Үүнд:

• Эцсийн үйл явдлын талаарх сэдвийн ач холбогдлыг эрэмбэлэх нь.

• Христийн эргэн ирэлт ба христитгэлийн амьдрал дахь үүний утга учир.

• Бүх хүний амилал ба биеийн үнэ цэн.

• Ёс суртахуунт бүх бүтээлийг шүүх эцсийн шүүлт.

• Бурханы мөнхийн хаанчлал.

• Эцсийн үйл явдлын талаарх христэч итгэл үнэмшил.

(2) Суралцагч нь газар дэлхийн амьдралыг өнө мөнхийн үүднээс харахын ач холбогдлыг мэдэж авна.

► Даниел 7:9-14-ийг хамтдаа унших. Энэ хэсэгт ирээдүйн талаар юу өгүүлж байна вэ?

Библийн эш үзүүллэгийн сэдэвт араатны тэмдэг, бүрээ, агуу гамшиг, антихрист, долоон жил, 1000 жил, цагаан өнгөтэй агуу сэнтий, дээрээс бууж ирэх хот, галт нуур зэрэг сэдвүүд дурдагддаг.

► Библийн эш үзүүллэгүүдийн талаар та юу гэж бодож байна вэ?

Эш үзүүллэгийн талаарх хэлэлцүүлгүүд ихэвчлэн гол сургаал дээр бус туслах чанарын асуултуудад төвлөрдөг. Эш үзүүллэгийн сэдвүүд ач холбогдлоороо бүгд адилхан биш. Тиймээс бид энэ хичээлээр эш үзүүллэгийн талаар нэг бүрчлэн ярихгүй.

Заримдаа хүмүүс араатны тэмдэг ямар харагдах, антихрист ямар улсаас гарч ирэх, хоёр гэрч нь хэн байх гэхчлэн гайхан боддог. Эдгээрийн хариулт Библид тодорхой байдаггүй бөгөөд ийм сэдвээр маргах нь тийм ч ач холбогдолтой зүйл биш.

Гэхдээ Библид зарим сэдвүүдийг илүү тайлбарласан байдаг. Жишээлбэл, Есүс агуу гамшгийн цаг үеийн эхэн, дунд, төгсгөлийн аль үеэр нь буцаж ирэх, мөн мянган жил нь шууд утгаараа мянган жил мөн үү, үгүй ​​юу гэх мэт сэдвүүдийг дурдаж болно. Гэхдээ эдгээр сургаал нь сайнмэдээний үндсэн чухал сургаал биш. Тиймд энэ мэт асуудал дээр санал зөрсний улмаас хэн нэгэнтэй нөхөрлөлийн холбоогоо таслах ёсгүй юм.

Зайлшгүй шаардлагатай зарим үнэнийг Библийн эш үзүүллэгт дурдсан байдаг. Эдгээр үнэн нь Библид итгэдэг хүн бүрийн хүлээн зөвшөөрдөг маш тодорхой сургаал юм. Христитгэлийн амьдрал, христитгэлийн онол сургаалын бүхэл системд эдгээр сургаал нөлөөлдөг. Одоо эцсийн үйл явдлын талаарх Библийн эш үзүүллэгээр илчлэгдсэн дөрвөн чухал үнэнийг авч үзье.

Есүс энэ дэлхийд үзэгдэх байдлаар ирнэ. Хэдийгээр одоо Тэр газар дэлхий дээрх итгэгчдийн дунд сүнслэг байдлаар байгаа ч, бүх дэлхийн өмнө сүр жавхлантай, амилсан биеэрээ эргэн ирнэ (Илчлэл 1:7, унших).

► Есүсийг эргэн ирэхэд юу юу тохиолдох вэ?

Христийн эргэн ирэх нь дэлхийн түүхийн оргил үе байх болно. Тэр цагт дэлхийн хаанчлалууд Христийн хаанчлал болсон байна. Түүнд үнэнч байсан хүмүүс шагнал, хүндэтгэлийг хүртэнэ. Харин Түүнийг эсэргүүцэж байсан хүмүүс дарагдана. Бүх эсэргүүцлийг ялан дийлэх хүч, эрх мэдэл Түүнд байх болно (Матай 26:64, унших). Өвдөг бүр сөгдөж, хэл бүр Есүсийг Эзэн хэмээн өчих болно (Филиппой 2:10-11).

Нас барсан итгэгчид Христтэй хамт хаанчлахаар амилах болно (2 Тимот 2:12). Тэд амьд байгаа итгэгчдийн хамт Эзэнийг гарч ирэх үед Түүнтэй уулзахаар дээш өргөгдөнө (1 Тесалоник 4:16-17).

[1]Есүсийн эргэн ирэлт бол бүх Христэд итгэгчдийн ерөөлт найдвар юм (Тит 2:13, унших). Есүсийн эргэн ирэх нь бидний хувьд ямар утгатай вэ? Энэ бол хавчлага, зовлон зүдгүүр, уй гашуугийн төгсгөл, ариун хүмүүс ба итгэгчид хайртай хүмүүстэйгээ уулзах цаг, бидний итгэл дэмий хоосон байгаагүйн нотолгоо, Есүсийг нүдээр үзэх цаг, тэнгэрийн улсад орж, Бурхантай хамт мөнхөд бүрэн дүүрэн амьдрах амьдрал юм. Эдгээрийн аль нь ч Есүсийн буцаж ирэх цаг хугацаанаас хамаарахгүй боловч, Тэр амласныхаа дагуу эргэн ирнэ гэдэг нь гарцаагүй үнэн билээ.

Есүс хүч ба сүр жавхлан дунд буцаж ирнэ гэж хэлсэн (Матай 24:30). Тэрээр эргэж ирээд ард түмэнтэйгээ амьдарна гэж амласан (Иохан 14:3) юм. Тэнгэрэлч нар ч Есүсийг тэнгэрт дээш одсон шигээ тийнхүү буцаж ирнэ гэж хэлсэн байдаг (Үйлс 1:11). Элч нар энэ ертөнцөд зориулсан Бурханы эцсийн төлөвлөгөөг хэрэгжүүлэхийн тулд Христийн эргэн ирэхийг хүлээх зуураа хүмүүст гэмшлийн тухай сургаж байв (Үйлс 3:19-21, унших). Есүс энэ дэлхий дээр хүч чадал, суу алдраар эргэн ирнэ гэдгийг Шинэ гэрээнд дахин дахин дурдсан байдаг.[2]

Есүсийн хоёр дахь ирэлтийн өмнө зарим шинж тэмдгүүд тохиох боловч бид Түүнийг яг хэзээ эргэж ирэхийг нарийн хэлж чадахгүй. Итгэгчдийн хувьд Түүний эргэн ирэхийг хүсэн хүлээж, үүнийхээ дагуу амьдрах нь сайн хэрэг юм (Марк 13:33-37, унших).

► Есүс яагаад эргэж ирэх вэ?

Ихэнх хүмүүс Бурханыг эсэргүүцэн буй дэлхийд бид амьдарч байна. Бүтээл бүхэлдээ нүглийн хараал доор зовж байна. Дэлхий хэзээ ч улс төрийн үйл хэрэг, нийгмийн шинэчлэл, өндөр чанартай боловсрол, эдийн засгийн хөгжил цэцэглэлтийн хүчээр төгс болохгүй. Харин Есүс энэ бүхнийг засахаар эргэн ирж буй хаан мэтээр бүтээлийн ертөнцдөө эргэн ирэх болно.

Бүх хүн нүгэлтэй боловч хэн Бурханы хаанчлалд сайн дураараа нэгдэнэ, тэр хүн айсуй шүүлтээс мултарч чадна. Гэмшиж, итгэсэн хүмүүсийн дунд Бурханы хаанчлал хэдийн үйл ажиллагаагаа явуулж байгаа (Марк 1:14-15, Марк 9:1). Есүсийг буцаж ирэхэд тэр хаанчлал бүрэн бөгөөд ил тод болон гарч ирнэ.

► Есүсийн эргэн ирэхийг мэдэж байгаа бид хэрхэн амьдрах ёстой вэ?

Бид эртний итгэгчид юуг чухалд тооцож байсныг санах ёстой. Бид итгэлээ сахиж (1 Коринт 16:13), эцэс хүртэл тэвчих (Матай 24:13) учиртай. Таашаал болон энэ ертөнцийн юмсад автаж, Христийн эргэн ирэхийг мартах вий хэмээн бидэнд сэрэмжлүүлсэн байдаг (Лук 21:34-36). Энэ ертөнцийн юмс өнгөрөн одох тул бид мөнхийн үнэт зүйлсэд тэмүүлж амьдарна (2 Петр 3:11-13). Биднийг тэнгэр рүү Түүний төрхийг дэмий ширтэн хүлээх биш, харин сүнслэг байдлаа хамгаалан, Түүнийг ирэхэд бэлтгэлтэй байхыг сануулсан билээ (Марк 13:33-37). Бид Есүс шиг байхыг хүсдэг тул ариун байдлын төлөө залбирч, ариун амьдралаар амьдардаг (1 Иохан 3:3).

Есүсийг ирэхгүй юм шиг амьдарч байгаа хүмүүс Түүнийг эргэн ирэх цагт бэлтгэлгүй сууж байх болно. Яагаад гэвэл Есүсийн ирэлт аянга мэт (Матай 24:27; 1 Коринт 15:52), гэнэтийн байх тул хэн ч Түүнийг үзэгдэх үед ямар нэг зүйлийг өөрчилж амжихгүй. 1 Тесалоник 5:1-6-д харанхуйд байгсад, энэ дэлхийн юмсыг хөөж амьдрагсад Эзэнийг ирэх цагт гүн цочролд орно гэж хэлж байна. Тэдний хувьд Христийн эргэн ирэлт нь хулгайчийн гэнэтийн ирэлттэй адил байх болно. Итгэгчдийн хувьд Христийн эргэн ирэлт нь айдас бус харин сүйт бүсгүй рүүгээ сүйт залуу ирж буй мэт тийм их баяр хөөрийг авчирна (Иохан 14:2-3).

Бид Есүсийн ирэхийг,

1. Мөнхийн үнэ цэнтэй зүйлсээ хадгалж,

2. Цэвэр ариун амьдарч,

3. Залбирч, өөрсдийгөө сүнслэгээр хамгаалж хүлээдэг.

Библид бүх хүн амилна гэж заадаг учраас бидний бие үнэ цэнтэйг бид ойлгодог. Амиллын сургаал үнэхээр хэрэгтэй сургаал юм. Яагаад гэвэл Элч Паул 1 Коринт 15–р бүлгийг бүхэлд нь энэ сургаалыг өмгөөлөхөд зориулжээ. Тэрээр амиллыг үгүйсгэх нь сайнмэдээг үгүйсгэнэ гэсэн үг хэмээн тайлбарласан юм. Хэрэв амилал гэж байхгүй бол Есүс Христ амилаагүй гэсэн үг болно (1 Коринт 15:13). Хэрэв Есүс үхлээс амилаагүй юм бол сайнмэдээ үнэн биш, бас хэн ч аврагдахгүй болж таарна (1 Коринт 15:17).

Бүх хүн амилах боловч бүгдээрээ нэгэн зэрэг амилахгүй. Есүс эргэж ирээд нас барсан итгэгчдийг босгож, бүх итгэгчдийг Өөртөө авна (1 Тесалоник 4:16-17; Илчлэл 20:6). Нүгэлтэйгээ үхсэн хүмүүс анхны амиллаар босгогдохгүй. Харин хожим шүүлт болох цагт тэднийг амилуулна (Илчлэл 20:13).

Христэд итгэгчид Есүсийнх шиг сүр жавхлантай биеэр амилна (1 Иохан 3:2). Үл итгэгч нүгэлтнүүдийг мөнхийн шийтгэл хүртэх өөр биеэр амилуулна (Иохан 5:28-29).

► Хэрэв та биеэр амилна гэдэгт итгэдэггүй бол амилал танд ямар хамаатай вэ?

[1]Хэзээ нэгэн цагт дахин амилах болно гэсэн итгэл бидний амьдралын хэв маягт нөлөөлдөг. Энэхүү сургаалыг үгүйсгэдэг хүмүүсийн жишээнээс бид энэ сургаалын бодит үр нөлөөг харж болно. Коринт чуулганы зарим итгэгчид биеийн амиллыг үгүйсгэсэн. Энэхүү алдаатай үзэлд итгэсэн хүмүүс хоёрдмол байр суурьтай болсон байна.

Зарим нь бүр, “Нэгэнт бие хэзээ ч амилахгүйгээс хойш, сүнс л хамгийн чухал. Тиймээс биеэрээ хийсэн нүгэл ноцтой зүйл биш гэсэн үг. Энэ бие нэгэнт муудаж ялзраад дуусахаас хойш энэ биеэрээ садар самууныг ч үйлдсэн болно” гэж хэлдэг байжээ.

Зарим коринтчууд “Хоол нь ходоодонд, ходоод нь хоолонд зориулагджээ” гэсэн уриатай байсан бололтой. Энэ үгэнд хүслээ дур зоргоор нь тавина гэхээс өөр утга алга. Паул тэдний тухайд, биеэ буруугаар ашигласан хүмүүс шүүгдэнэ гэж хэлсэн (1 Коринт 6:13). Бие нь Эзэнийх бөгөөд Бурхан Есүсийн биеийг амилуулсан шигээ бидний биеийг амилуулна гэж Паул хэлсэн байдаг (1 Коринт 6:14).

Өөр зарим нь “Амилахгүй учраас энэ бие үнэ цэнгүй, бузар муу зүйл байж таарна. Бид бие махбодын бүх хүслийг дарж, тааламжтай амтыг амсуулахгүй, гэрлэлтийн таашаалыг эдлүүлэхгүй байх ёстой” гэж үздэг байв.

Амиллыг үгүйсгэсэн учраас дээрх хоёр алдаа гарчээ. Ер нь амиллыг үгүйсгэх нь бие махбодыг үнэгүйдүүлдэг. Харин амиллын талаарх христитгэлийн онол сургаал нь бие махбодыг үнэ цэнтэй болгодог.

► 1 Коринт 6:14, 15, 19-20-ийг унших.

Эдгээр эшлэлд итгэгчийн бие үнэ цэнтэй болохыг өгүүлсэн. Учир нь,

• Золин аварсан

• Ариун Сүнсний сүм болсон

• Христийн биеийн эрхтэн болсон

• Амилуулагдаж, алдарших учраас үнэ цэнтэй

Амиллын талаарх онол сургаал үнэ цэнтэй. Учир нь:

• Есүс үхлээс амилсан.

• Бүх хүнийг амилуулна.

• Бие махбод мөнхийн үнэ цэнтэй.

• Сайнмэдээ үнэн юм.

Амийн номд нэр нь байхгүй хүмүүсийн хувьд шүүлтийн өдөр үнэхээр төгсгөл байх болно. Энэ нь зөвхөн оршин байхын төгсгөл биш, харин сонголт хийх боломжийнх нь хувьд төгсгөл юм. Үүний араас залгах өнө мөнхөд хүмүүс хэзээ ч буцааж болохгүй шийдвэрийнхээ үр дагаврыг амсах болно.

Зөвхөн шууд харагдах үр дүнгээсээ гадна бидний сонголт шүүлтэд чухал ач холбогдолтой байх болно. Зарим хүн үйлдлийнхээ үр дүнг хянаж л чадвал өөр санаа зовох зүйл юу ч байхгүй гэж боддог. Тэд сүртэй хор хөнөөл учруулахгүй л бол нүгэл нь нүгэл биш гэж бодохыг хүсдэг. Энэ амьдралд хор хөнөөл учруулахгүй байлаа ч, шүүлт байгаа учраас нүгэл нь ноцтой зүйл юм. Хүмүүс үйлсээрээ шүүгдэнэ гэж Бурханы Үгэнд хэлж байна (2 Коринт 5:10; Ром 2:6-11, унших).

Шүүлтийн үеэр зарим нь мөнхийн шийтгэл рүү, зарим нь мөнхийн шагнал руу илгээгдэх болно. Бичвэрт нүгэлт үйлсийнхээ төлөө яллагдахаар амилсан, гэмшээгүй нүгэлтнүүдийн шүүлтийг дүрсэлсэн хэсэг бий (Илчлэл 20:11-15, үз). Христэд итгэгчдийн хувьд өөр нэг шүүлт байгаа. Тэр үед итгэгчид үнэ цэнтэй, удаан хугацааны үр дүнгийн төлөөх хийсэн ажилдаа шагнал хүртэнэ (1 Коринт 3:14-15, унших).

Шүүлт байгаа нь хэзээ нэгэн цагт нүгэл байхгүй болно гэсэн утгатай. Нүгэлгүй ертөнцийг төсөөлөхөд бэрх боловч хэзээ нэгэн цагт Бурханы эсрэг бүх тэрслэлд төгсгөл ирнэ.

Бурхан биднийг байнгын айдастай, эсвэл айдас нь зөв амьдрах сэдэл төрүүлдэг тийм амьдралаар амьдруулахыг хүсдэггүй. Гэсэн хэдий ч, бидний өмнө байгаа шүүлтийг ухамсарлах нь бидэнд хариуцлагатай амьдрахыг ойлгуулдаг.

Бид шүүлтийн талаар мэдсэнээр,

1. Нүглийн үр дагавар

2. Бурханы өмнө хүлээх бидний хариуцлага

3. Бидний сонголтын ач холбогдол

4. Бүх нүгэл төгсгөлтэй гэдгийг ойлгодог.

Зарим гүн ухаан, шашин шүтлэгийн дагуу цаг хугацааг эхлэл төгсгөл, үүрдийн өөрчлөлт авчрах ямар ч үйл явдалгүй, мөнхөд эргэлдэх тойрог хэмээн үздэг. Харин Библийн дагуу цаг хугацаа нь эхлэлтэй, төгсгөл хүртэл үргэлжилдэг цуврал үйл явдлуудтай. Библид бүтээлийн үе, дараа нь хүмүүний ​​эмгэнэлт уналт, тэгээд хүн төрөлхтний түүхэнд олон зуун жилийн туршид хэрэгжүүлж буй Бурханы авралын төлөвлөгөөний талаар өгүүлдэг.

Эхлэл 3–р бүлгээс бид нүгэл эхэлсэн тухай уншдаг. Илчлэл номд Бурханы мөнхийн хотод нүгэл үгүй болсныг харж болно (Илчлэл 21:27). Түүнчлэн Эхлэл номоос бид амийн модноос холдсон хийгээд үхлийн ялыг авсан тухай уншдаг бол (Эхлэл 3:22-24), харин Илчлэл номоос амийн мод, амийн номд бичигдсэн нэрс, амийн ус руу очих урилгын талаар уншдаг (Илчлэл 22:1-2, 19).

Бурханы бүрэн дүүрэн байдал, мөнхийн хаанчлал ирж, Бурханы төлөвлөгөө гүйцэлдэнэ. Хэдийгээр Бурхан үргэлж орчлон ертөнцийн хаан байсаар ирсэн ч хүн төрөлхтний уналтаас хойш хүмүүсийн олонх нь Бурханы хаанчлалын эсрэг тэрсэлсээр байгаа юм. Тэрхүү тэрслэл агшин зуурт дуусгавар болж, Бурхан сөргөлдөгчгүйгээр мөнхөд захирна. Дэлхий ертөнц Бурханы хүссэнчлэн, тэнгэр мэт төгс байх болно.

Хүн ер нь амьдрал мөнхөд үргэлжлэх юм шиг хандлагатай амьдардаг. Нөхцлөө сайжруулж, асуудлаа шийдэж, сэтгэл хангалуун байх орчинг бүрдүүлэхийг хичээнэ. Майханд сууж, байнга нүүж амьдрах зуураа мөнхийн улсыг хүлээж байсан Абрахам шиг тийм хандлагатай хүн болохыг бид хичээх учиртай юм (Еврей 11:8-10, 14-16). Барьж буй байшин, эдэлж буй эд юмс, амьдарч буй нөхцөл бүгд түр зуурынх гэдгийг санаж явах хэрэгтэй. Тиймд хүн мөнхийн үнэ цэнийг авчрах зүйлийн төлөө хөдөлмөрлөх ёстой.

► Итгэлээ шалгах хэсгийг хамгийн багадаа хоёр удаа хамтдаа уншаарай.

Есүс амласан ёсоороо эргэн ирж, өнгөрсөн үеийн итгэгчдийг амилуулан, Өөрийн хаанчлалдаа бүх итгэгчдийг оруулан Тэрээр захирна. Хүн бүрийг хийсэн үйлийнх нь дагуу шүүхийн тулд үхэгсдээс амилууна. Тэгээд нэг бол мөнхийн шагнал, эсвэл мөнхийн шийтгэлийг хүртээнэ. Бурханы хаанчлал бүрэн дүүрнээр ирж, Бурхан мөнхөд хаанчлах болно.

(1) Эшлэл унших: Суралцагч тус бүр дараах эшлэлүүдээс нэгийг сонгоно. Дараагийн хичээл эхлэхээс өмнө эшлэлийг уншиж, энэхүү хичээлийн сэдвийн талаар тус эшлэлд юу гэж хэлснийг багцлан бичнэ.

• Даниел 2:31-45

• Матай 25:31-46

• 1 Коринт 15:51-58

• 2 Петр 3:1-14

• Илчлэл 20:11-15

(2) Сорил: Дараагийн хичээлийг 14-р хичээлийн сорилоор эхэлнэ. Сорилд бэлтгэж, асуултыг сайн судлаарай.

(3) Бусдад заах: Ангиас гадуур заах хуваарь гаргаж, тайлагнахаа мартуузай.

(1) Библийн эш үзүүллэгийн дагуу, эцсийн үйл явдлын тухай дөрвөн үнэн юу вэ?

(2) Есүсийг эргэн ирэхэд юу юу тохиолдох вэ?

(3) Есүсийн эргэн ирэхийг бид хэрхэн хүлээх вэ?

(4) Амиллын талаарх онол сургаал яагаад үнэ цэнтэй вэ?

(5) Шүүлтийн талаар бидний мэдэх ёстой дөрвөн зүйл юу вэ?