(1) Суралцагч нь дараах санаануудыг тайлбарлаж чаддаг болсон байна. Үүнд:

• Бурханы талаарх хүний үзэл баримтлал яагаад чухал болох тухай.

• Бурхан Бүтээгч болохын хувьд бусад бүх зүйлээс хэрхэн ялгардаг талаар.

• Бурханы шинж чанарууд гэдэг нь Тэр бодгаль, сүнс, мөнхийн, Гурвал, бүгдийг чаддаг, хаа сайгүй оршдог, өөрчлөгддөггүй, бүхнийг мэддэг, ариун, зөв шударга бөгөөд хайрладаг гэсэн утгатай.

• Бурханы шинж чанар бүр нь Түүнтэй харилцах бидний харилцаанд хэр чухал болох тухай.

• Бурханы хэмжээлшгүй эрх мэдлийн талаарх Библийн үзэл баримтлал.

• Бурханы талаарх христэч итгэл үнэмшил.

(2) Мөргөл хүндэтгэлийн ач холбогдол, тэдгээрийн хэлбэрүүдийн талаарх буруу ойлголтоос зайлсхийх.

► Исаиа 40-р бүлгийг хамтдаа унших. Энэхүү багц эшлэлд Бурханы талаар юу гэж хэлснийг ярилц.

► Хүн Бурханы талаар зөв эсвэл буруу үзэл баримтлалтай эсэх нь яагаад чухал вэ?

Бурхан гэж хэн бэ? А. В. Тозер энэхүү асуултад хариулахдаа “Би онол сургаалд бараг алдаа байхгүй гэж итгэдэг, хэрэв алдаа гарсан бол энэ нь христитгэлийн ёс зүйг хэрэгжүүлэхэд болон эцсийн дүндээ Бурханы талаарх төгс бус, эрээ цээргүй [доромж] бодлуудаас улбаатай” хэмээн ач холбогдлыг нь онцолжээ.[1] Есүс худгийн дэргэд Самари аймгийн эмэгтэйд хандан самаричуудын мөргөл хүндэтгэлийн асуудал нь тэд хэнийг хүндэлж мөргөдгөө мэддэггүйнх хэмээн хэлсэн байдаг. Аливаа хүнийг тодорхойлох хамгийн чухал шинж нь Бурханы талаарх түүний үзэл баримтлал юм. Хүний Бурханы талаарх үзэл баримтлал түүний шашны үндэс суурь болдог. Бурханыг ямар Бурхан болохыг андуурахаас илүү ноцтой алдаа гэж үгүй.

Бурханыг бүрэн тодорхойлохын тулд харьцуулалт хангалтгүй. Учир нь Тэр хязгааргүй бөгөөд биднийг давсан, биднээс дээгүүр оршихуй юм. Библид Бурханы талаарх албан ёсны тодорхойлолтыг бидэнд хэлээгүй ч Түүний оршихуй ба хүч чадлын тухай хаа сайгүй өгүүлсэн байдаг. Эхлэл ном бидэнд Бурхан тэнгэр газрыг хэрхэн бүтээсэн тухай; ургамал; нар, сар, одод; амьтны ертөнц, эцэст нь хүн төрөлхтнийг бүтээсэн талаар өгүүлдэг. Бичвэрийн эхний хичээл нь маш тодорхой бөгөөд Бурхан бол оршин буй бүхний Бүтээгч юм. Иймд Тэрээр Өөрийн бүтээлийн нэг хэсэг биш тул оршин буй бүхнээс ялгаатай.

Библид Бурханы талаар өөр олон зүйлийг өгүүлсэн. Теологичид Библийн мэдээ баримтад үндэслэн Бурханы шинж чанаруудыг сайтар нэгтгэн дүгнэсэн байдаг. Бид өөрсдийн төгс бус ойлголтоороо эдгээрийг хэзээ ч бүрэн дүүрэн эзэмших боломжгүй. Хэдий тийм боловч Бурханы шинж чанаруудыг хүндэтгэн судлах нь үнэ цэнтэй, сүнслэг дасгал юм. Тиймээс бид Бурханы талаар өгүүлсэн дараах зүйлсийг авч үздэг. Эдгээр нь Өөрийнхөө талаар Библид өгүүлсэн Бурханы илчлэлд үндэслэгддэг учраас тэдгээр нь үнэн гэдгийг бид мэддэг.

Бидний авч үзэх Бурханы шинж чанарууд нь бүрэн жагсаалт биш бөгөөд харин бидний мэдэх ёстой хамгийн чухал зүйлс юм.

► Та Бурханы ямар шинж чанаруудыг жагсааж чадах вэ?

Бурхан бол бодгаль

Энэ нь оюун ухаан, мэдрэмж, хүсэл эрмэлзэлтэй жинхэнэ, амьд хүн гэсэн үг юм.[1] Тэр байгалийн хуулиудын нийлбэр, эсвэл цахилгаан, таталцал адил зүгээр нэг хүч биш. Тэрээр бүтээдэг, үйлддэг, мэддэг, хүсдэг, төлөвлөдөг мөн ярьдаг.

► Хэрэв Бурхан бодгаль биш байсан бол биднээс хэрхэн ялгагдах бол?

Тэр бодгаль гэдэг нь бид Түүнтэй харилцах боломжийг олгодог. Хэрэв Тэр бодгаль биш байсан бол бид Түүнд залбирч чадахгүй. Хэрэв Тэр бодгаль биш байсан бол Түүнийг баярлуулах эсвэл Түүнд нийцүүлэхгүй байх зэрэг нь боломжгүй байх байв.

Бурхан бол Сүнс

“Бурхан бол сүнс, Түүнд мөргөгчид нь сүнсээрээ, үнэнээр мөргөх ёстой гэж айлдлаа” (Иохан 4:24).

Тэр Сүнс гэдэг нь бид Түүнтэй сүнслэг байдлаар харилцах, Түүнийг мөргөн хүндэтгэх үндэс суурь болдог. Залбирал ба мөргөл хүндэтгэл нь материаллаг зүйлс, бие махбодын тодорхой байрлал, төлөвлөсөн хөтөлбөр, барилга байгууламж зэргээс хамаардаггүй. Эдгээр зүйлс нь мөргөл хүндэтгэлд анхаарлаа төвлөрүүлэхэд тусалж болох ч мөргөл хүндэтгэл нь тэдгээрээс шалтгаалдаггүй.

Бурхан Сүнс гэдэг нь Түүнийг ямар нэгэн биет дүр төрх хэлбэрээр дүрслэн харуулахыг хориглосны нэг шалтгаан юм (Гэтлэл 20:4-6, унших). Бурхан Сүнс учраас нүдэнд үл үзэгдэх (1 Тимот 1:17) бөгөөд Тэр үзэгдэх хэлбэрийг сонгосон тохиолдлууд бий ( Эхлэл 18:1; Исаиа 6:1, унших). Бурханы талаарх бидний ойлголт хязгаарлагдмал учраас хэдий Тэр үзэгдэх хэлбэрээр харагдсан ч бидний хэн нь ч Бурханыг бүрэн байдлаар хараагүй гэж хэлэх нь үнэн зөв юм (Гэтлэл 33:20; Иохан 1:18; Иохан 6:46).

Бурхан бол мөнхийн

Бурхан оршин байгаагүй цаг хугацаа гэж хэзээ ч байсангүй. Мөн Тэр оршин байхгүй байх цаг хугацаа ч гэж хэзээ ч үгүй. Бурханд эхлэл, төгсгөл гэж үгүй. Бурхан Өөрийгөө «Би байгаа» юм гэсэн нэрээр илчилсэн байдаг (Гэтлэл 3:14). Иохан Түүнийг Байгаа, байсан, мөн хожим ирэх Төгс хүчит Эзэн (Илчлэл 1:8) хэмээн тодорхойлсон. Өнө мөнхөөс өнө мөнх хүртэл Тэр бол Бурхан юм (Дуулал 90:2). Зарим шашинд бурхад нь хэзээ төрсөн талаар домог яриа байдаг ч жинхэнэ Бурхан бол мөнхийн юм.

Бурхан бол Гурвал

Библид нэг Бурхан байдаг гэж өгүүлдэг ч гурван тусдаа бодгалийг нэг Бурхан гэж үздэг. Цорын ганц Бурхан байгаа ч мөн чанарынхаа хувьд Тэрээр гурван бодгалиар оршдог. Хэдийгээр бид Гурвалыг бүрэн ойлгож чадахгүй ч энэ нь учир зүйгүй, зөрчилдөх зүйл биш юм. Учир нь бид яг адилхан нэг зүйл ба гурван зүйл байгаа гэж хэлээгүй, харин гурван бодгалиар оршдог нэг Бурхан байгаа гэж итгэдэг. Эцэг, Хүү, Ариун Сүнс нь бүх бурханлаг шинж чанарыг хамтад нь эзэмшдэг тул Тэднийг тус бүрд нь Бурхан гэж зүй ёсоор нэрлэж, Бурхан хэмээн мөргөн хүндэтгэх боломжтой (дараагийн хичээл дээр Гурвалын талаар илүү ихийг ярилцах болно).

Бурхан бүгдийг чаддаг

Тэр хүссэн бүхнээ хийх чадвартай. “Бурхан маань тэнгэрт байдаг. Тэр хүссэн бүхнээ үйлддэг” (Дуулал 115:3). Тэрээр ариун мөн чанартаа харшлах зүйлийг үйлддэггүй гэдгээс өөр хязгаар үгүй бөгөөд Тэр амласан зүйлээ үргэлж биелүүлдэг. Бурханы хувьд амаргүй, хэцүү зүйл гэж үгүй. “Төгс хүчит Эзэн Бурхан маань хаанчилж байна” (Илчлэл 19:6).

► Бурхан бүгдийг чаддаг гэдгийг мэдэх нь бидэнд ямар ялгаа заагийг харуулдаг вэ?

Бэрхшээл, тэмцлийн дунд “… ажилладаг хүчний дагуу гуйх буюу бодох бүхнээс минь илүү хэмжээлшгүй бялхлаар үйлдэх чадвартай” (Ефес 3:20) гэдгийг мэдэх нь бидэнд урам зоригийг өгдөг. Бүх зүйл хяналтаас гадуур мэт санагдаж байсан ч Бурханы агуу төлөвлөгөө биелнэ гэдгийг бид мэддэг. Бурхан ямар ч нөхцөл байдалд хөндлөнгөөс оролцох чадвартай гэдэгт бид итгэлтэйгээр залбирч чадна.

Бурхан хаа саагүй оршдог

[2]Тэр байхгүй газар гэж үгүй. Түүний хараагүй зүйл гэж байдаггүй. “ЭЗЭН үүнийг айлдаж байна. Тэнгэр болбоос Миний сэнтий, газар болбоос Миний хөлийн гишгүүр билээ” (Исаиа 66:1). Тэрээр орчлон ертөнцийн Бурхан бөгөөд Түүний хүч чадал аль ч бүс нутгаар хязгаарлагдахгүй. “Надад харагдахгүй байхаар хүн далд газруудад нуугдаж чадах уу? гэж ЭЗЭН тунхаглаж байна. Би тэнгэрс хийгээд газрыг дүүргэдэггүй гэж үү?” (Иеремиа 23:24). Энэ нь Бурхан бидний нөхцөл байдал, асуудал бэрхшээлийг мэддэг гэдгийг баталдаг. Мөн энэ нь хэн ч Бурханаас нуугдаж, эсвэл харж чадахгүй газар нүгэл үйлдэх боломжгүй гэдгийг бидэнд хэлдэг. Бүх зүйл Түүний мэлмийн өмнө нүцгэн бөгөөд ил юм (Еврей 4:13, унших).

Бурхан өөрчлөгддөггүй

Тэр Бурхан болсон цаг үе гэж хэзээ ч байгаагүй бөгөөд Тэрээр хэзээ ч Бурхан байхаа болихгүй (Иаков 1:17, унших). Хөгжлийн үйл явцыг туулж Бурхан бий болсон гэх шашны үзэл байдаг ч Бурхан оршихуй ба мөн чанар, зорилго ба шинж чанарынхаа хувьд хэзээ ч өөрчлөгддөггүй гэж Библи заадаг (Малахи 3:6, унших). Тэр үргэлж зөвийг хайрлаж, бурууг үзэн яддаг. Мосед Өөрийгөө “БИ байгаа” гэж илчилсэн мөнхийн Бурхан бол өнөөдрийн “БИ байгаа” юм. Тэрээр Өөрийн оршихуй, мэргэн ухаан, хүч чадал, ариун байдал, шударга ёс, сайн сайхан, үнэн зөвийн хувьд хязгааргүй, мөнхийн бөгөөд хувиршгүй билээ. Тэр үргэлж хэвээрээ бөгөөд Түүний он жилүүдэд төгсгөл үгүй (Дуулал 102:27).

Бурхан бүхнийг мэддэг

“Оюун ухаан нь хязгааргүй” (Дуулал 147:5). Бурханд суралцах үйл явц гэж байхгүй, учир нь Тэр бүхнийг мэддэг. Бурхан хэзээ ч хэнээр ч заалгаагүй бөгөөд Түүнд зөвлөгөө өгөх хүн байхгүй (Исаиа 40:13-14, унших). Бурхан ирээдүйг мэддэг учраас юу ч тохиолдсон хэзээ ч гайхаж, бэлэн бус ханддаггүй (Дуулал 139:4).

► Бурхан бүхнийг мэддэг гэдгийг ойлгох нь бидэнд ямар ялгаа заагийг харуулдаг вэ?

Бурханы мэдлэгтэй холбоотой мэргэн ухаан нь бүтээлд, ялангуяа авралын төлөвлөгөөнд нь илэрдэг (Дуулал 104:24; Ром 11:33, унших). Тэр бүхнийг мэддэг, ойлгодог учраас зөвийг үйлдэхийг үргэлж мэддэг. Тэрээр нөхцөл байдал бүрийг бүрэн ойлгож, үйлдэл бүрийн үр дүн юу болохыг мэддэг учраас Бурханы хүсэл бидний хувьд үргэлж хамгийн сайн нь юм.

Бурхан бол ариун

Бурхан Өөрийгөө юуны түрүүнд ариун гэж тодорхойлсон. Эш үзүүлэгч Исаиа Бурханыг “Израилийн Ариун Нэгэн...” гэж дахин дахин дурджээ. Тэнгэрэлч нар Түүний өмнө “Ариун, ариун, ариун” хэмээн үргэлж хүндэлдэг (Илчлэл 4:8, Исаиа 6:3). Бурханы ариун байдал нь мөргөл хүндэтгэлийн сэдэв байсаар ирсэн “Таны аугаа, сүрдмээр нэрийг тэд магтан дуулаг. Тэр ариун” (Дуулал 99:3). Тэр бол бүх ёс суртахууны туйлын төгс жишиг мөн. Тэрээр бузар мууг үйлддэггүй, харин үйлс нь үргэлж сайн сайхан бөгөөд үүнээс өөрөөр байх боломжгүй юм. Бурханы ариун байдал нь хүн эхлээд нигүүлслээр хувьсан өөрчлөгдөхөөс нааш, Түүнийг мөргөн хүндэлж, Түүний үйлчлэлд тэнцэхгүй гэдгийг харуулдаг (Исаиа 6:5, унших). Бурхан биднийг Өөртэйгээ адил ариун байхыг хүсдэг. “Харин та нарыг дуудсан Ариун Нэгэний адил өөрсдийн бүх л зан байдалдаа бас ариун байгтун. Яагаад гэвэл “Би ариун учраас та нар ариун байгтун” гэж бичигдсэн юм” (1 Петр 1:15-16).

Бурхан бол зөв шударга

Бурханы үйлс нь үргэлж зөв шударга юм. Түүний үйл хэрэг ариун мөн чанараас нь ундран гардаг (Дэд хууль 32:4, унших). Түүний мөн чанар нь юу зөв гэдгийн жишиг юм. Тэр үргэлж хэлсэн үгэндээ хүрдэг бөгөөд хэзээ ч худал ярьдаггүй (Тооллого 23:19; 2 Самуел 7:28).

► Бурхан зөв шударга байгаа нь яагаад бидний хувьд чухал вэ?

Бурханы зөвт байдал нь Түүний хуулийн үндэс бөгөөд Түүний болон бусдын өмнө хүлээсэн бидний үүрэг хариуцлагын төгс жишиг юм. Тэрээр Өөрийн хуулийг шударгаар хэрэгжүүлж, үүнийг дуулгавартай дагадаг хүмүүсийг шагнаж, зөрчигчдийг шийтгэдэг. Энэ нь зовж зүдэрсэн, дарлагдсан хүмүүсийг тайвшруулдаг бөгөөд мөн буруу зүйлийг хийсэн хэн ч үүнээс мултрахгүй гэдгийг бидэнд сануулдаг. “ЭЗЭНий шүүлтүүд үнэн Бүгд зөв шударга” (Дуулал 19:9). Тэр хүн бүрд хийсэн үйлсийнх нь дагуу хариу өгнө (Ром 2:6). “Бид бүгдээрээ Бурханы шүүх суудлын өмнө зогсох болно шүү дээ” (Ром 14:10).

Бурхан бол хайр

Энэхүү шинж чанар нь туйлын чухал юм. Бурхан биднийг хайрлаагүй бол Түүний бүхнийг мэддэг, бүгдийг чаддаг чанар нь ямар аймшигтай байх байсныг төсөөлөөд үз дээ! Хэрэв Тэр ариун бөгөөд зөв шударга байсан ч биднийг хайрлаагүй бол ямар байх байсан бол? Өөрийн туйлын хүч чадал, ариун байдлын зэрэгцээ Бурхан биднийг хайрладаг (Ром 5:8, унших). Бурхан бүтээлээ ерөнхий байдлаар ерөөдөг (Эхлэл 1:22, 28). Тэр газар дэлхийг хүмүүсийн баяр хөөртэй амьдрах газар байхаар бүтээж, хүн төрөлхтнийг амьдралын сайн сайхан зүйлсээр онцгойлон ерөөжээ.[3] Түүнийг хайрлаж, Түүнд үйлчилдэг хүмүүсийн хувьд Бурхан амьдралынх нь бүх нарийн ширийн зүйлсийг ерөөл болгон эргүүлдэг (Ром 8:28). Түүний нигүүлсэл, өршөөл, тэвчээр, амар тайван нь Түүний хайрын улмаас биднийг ивээж ерөөдөг (Гэтлэл 34:6; Ефес 1:7, Ефес 2:4-5, унших).

[4]“Бурхан ертөнцийг үнэхээр хайрласандаа цорын ганц Хүүгээ өгсөн тул Хүүд итгэдэг бүхэн мөхөхгүй харин мөнх амьтай байх болно” (Иохан 3:16). Бид нүгэлтэй, тэрслүү байсан хэдий ч Тэр бидний нүглийн төлөөх тахил золиос болох Есүсээр дамжуулан Өөр рүү нь ирэхийг урьж, бидэнд өршөөнгүй хандсан билээ (1 Иохан 2:2). Бурхан биднийг хэрхэн хайрлаж, өрөвдөн өршөөсөн Түүний зүрх сэтгэлийг загалмай харуулдаг. “Бид Бурханыг хайрласан бус, харин Тэр биднийг хайрлаж, бидний нүглийн улмаас Хүүгээ эвлэрүүлэл болгон илгээсэнд л хайр байгаа юм” (1 Иохан 4:10). Бурхан бүх хүмүүсийг угсаа гарал, төрөлх чадвар, нийгмийн байр суурь зэргээс нь үл хамааран хайрладаг бөгөөд бүх хүнд өршөөлийг соёрхдог (Ром 2:11; Иаков 2:1-5, унших). Тиймээс Бурхан биднийг бүх хүнийг хайрлаж, бидэнд буруу зүйл хийсэн хэнийг ч болов уучлахад бэлэн байгаасай гэж хүсдэг. Хайр ба уучлал нь Бурханы хүүхдүүдийг таних шинж тэмдэг юм (Матай 5:43-45, унших).

[5]Бурхан биднийг Өөрийн дүр төрхөөр бүтээсэн. Хэдийгээр бид хязгаарлагдмал, Тэр хязгааргүй ч, бид Түүний бүтээлүүд дотроос илүү Түүнтэй адил юм. Бурханыг мэдэж, хүндэлж, хайрлахын тулд Тэр биднийг бүтээжээ. Тэрээр биднийг Өөртөө зориулж бүтээсэн бөгөөд Августин бидэнд сануулж хэлсэнчлэн “Түүний дотор амралтыг олтлоо бид хэзээ ч амарч чадахгүй.” Бурхантай харьцуулбал дэлхий дээрх бүх зүйл чухал биш бөгөөд зөвхөн Тэр л дангаараа бидний бүрэн дүүрэн, чин бишрэл хүндлэлийг авах зохистой Нэгэн. Байнгын сэтгэл хангалуун байдлыг бид Бурханаас өөр хаанаас ч олох боломжгүй. Бурханы нигүүлслээр бид золин аврагдаж, бүх зүйлээс дээгүүр Түүнийг мөргөн хүндэтгэж, Тэнгэрлэг Эцэгийн хувьд Түүнд итгэж, амьдралынхаа бүх талбарт Түүний хүслийг биелүүлж чадна.

Ангийн удирдагчийн тэмдэглэл: Ангийн нэг гишүүн энэ хэсгийг тайлбарлана уу.

Бурханд туйлын хүч чадал ба эрх мэдэл аль аль нь бий. Орчлон ертөнцийн захирагчийн хувьд Тэрээр хүссэн бүхнээ хийх чадвартай (Дуулал 115:3, Дуулал 135:5-6).

Тэр Өөрийн хүслийн дагуу бүхнийг хийхдээ хэн нэгэнд нийцүүлэх, захирагдах шаардлага Түүнд байхгүй (Ефес 1:11). Түүний хийхээр шийдсэн бүхэн биелэх нь гарцаагүй, учир нь Түүнийг зогсоож чадах хэн ч, ямар ч нөхцөл байдал байхгүй (Исаиа 46:9-11, унших). Тэрээр хүссэн үедээ дэлхийн удирдагчдын үйлдэлд хяналт тавьдаг (Эхлэл 50:20; Үйлс 4:27-28).

Гэсэн хэдий ч Бурхан хүмүүст сонголт хийх чадварыг өгсөн. Хүмүүс сайн зүйлсээс сонголт хийдэг төдийгүй сайн муугийн аль нэгийг ч сонгож чаддаг. Тэд Бурханыг дуулгавартай дагах, эс дагахаа сонгодог. Түүний бүтээсэн хамгийн анхны хүмүүс нүгэл үйлдэх сонголтыг хийсэн. Түүнээс хойш хүн бүр сонголт хийсэн бөгөөд хэдий зарим нь сайн сонголт гаргасан ч бүгд нүгэл үйлдэцгээжээ.

Хэрэв Бурхан бүхний Эзэн бол тэрбум тэрбумаар тоологдох бүтээл, амьтад тус тусын сонголтоо хийж байгаа энэ дэлхий ертөнцөд Тэр Өөрийн хүслээ хэрхэн биелүүлэх вэ?

Түүний бүтээлүүд жинхэнэ сонголт гаргах нь Бурханы хүсэл юм. Энэ нь Тэр тэдний төлөө бүх сонголтыг хийхгүй гэсэн үг. Түүнчлэн энэ нь тэдний хийж байгаа зүйлд бодит үр дагавар байх ёстойг хэлж байна. Хэрэв тийм биш байсан бол тэдний сонголт жинхэнэ байх боломжгүй болно. Хэрэв Бурхан ямар нэгэн байдлаар хүний үйлдлийн үр дүнг удирддаг бол ямар ч бузар муу үр дагавар бий болохгүй. Улмаар бузар мууг сонгох боломж ч хүнд байхгүй байж таарна.

Бурханы шударга ёс нь хүмүүсийг сайн дурын үйлдлийнх нь төлөө шүүх учраас жинхэнэ шударга ёс юм (Илчлэл 20:12-13, унших). Хэрэв Бурхан бүх үйлдлийг хянаж удирддаг байсан бол шагнаж, шийтгэх нь ч Түүнд утга учиргүй байх болно.

Бурхан хүмүүсийг зөвийг сонгоосой гэж хүсдэг ч хамгийн гол нь тэд жинхэнэ сонголт гаргахыг хүсдэг. Тийм ч учраас дэлхий ертөнц байгаагаараа байгаа билээ. Энэ дэлхий бол Бурханы сайн сайхан зүйлс, хүний сайн үйлсийн үр дүн төдийгүй хүний муу үйлсийн үр дагавар, энэхүү хүний муу үйлсээс Бурханы эргүүлж авчирдаг сайн сайхан бүгд цогцолсон газар юм.

Бид авралын төлөвлөгөөнөөс нь Бурханы хувьд юу чухал болохыг хардаг. Тэр бүх хүнд авралыг санал болгож, бүх хүн аврагдахыг хүсдэг (1 Тимот 2:3-4). Тэрээр хүн бүрд сайнмэдээнд хариу үйлдэл үзүүлэх хүчийг өгдөг ч хариу үйлдэл үзүүлэхийг албаддаггүй. Тийм ч учраас Бичвэрт урилга, ятгалгыг өргөн ашиглажээ.[1] Бурхан хүмүүст сонголт хийх боломжийг санал болгож, үр дагаварыг нь тодорхойлж өгдөг.

Хүн бүр аврагдаж чадна гэсэн бүрэн итгэлтэйгээр бид сайнмэдээг номлодог. Бидний үүрэг даалгавар нь Ариун Сүнстэй хамтарч, хүмүүс Бурханд захирагдахыг ятгах нь юм (2 Коринт 5:11, унших).

► Итгэлээ шалгах хэсгийг хамгийн багадаа хоёр удаа хамтдаа уншаарай.

Орчлон ертөнцийг бүтээсэн, бүхний Эзэн нэг Бурхан байдаг. Тэр бол мөнхийн, хувиршгүй Сүнс билээ. Тэрээр бүгдийг чаддаг, бүхнийг мэддэг бөгөөд хаа сайгүй оршдог. Тэрбээр зан чанараараа туйлын ариун бөгөөд үйлс бүр нь зөв шударга юм. Бурхан бүтээлээ ерөөж, хүн бүрийг хайрладаг бөгөөд Өөртэйгээ харилцах харилцаа ба уучлалыг санал болгодог.

(1) Эшлэл унших: Суралцагч тус бүр дараах эшлэлүүдээс нэгийг сонгоно. Дараагийн хичээл эхлэхээс өмнө эшлэлийг уншиж, энэхүү хичээлийн сэдвийн талаар тус эшлэлд юу гэж хэлснийг багцлан бичнэ.

• Дуулал 139:1-4

• Сургаалт үгс 9:10

• Исаиа 46-р бүлэг

• Илчлэл 4:9-11

(2) Сорил: Дараагийн хичээлийг 2-р хичээлийн сорилоор эхэлнэ. Сорилд бэлтгэж, асуултыг сайн судлаарай.

(3) Бусдад заах: Ангиас гадуур заах хуваарь гаргаж, тайлагнахаа мартуузай.

(1) Хүнийг тодорхойлох хамгийн чухал шинж юу вэ?

(2) Бичвэрийн эхний хичээл юу вэ?

(3) Дараах өгүүлбэрт тохирох Бурханы шинж чанаруудыг нэрлэнэ үү:

• Бурхан ямар харагддагийг бид дүрслэх боломжгүй

• Бурхан үргэлж оршсоор байгаа

• Бурхан оюун ухаан, мэдрэмж, хүсэл эрмэлзэлтэй

• Бурхан үргэлж хэвээрээ

• Бурхан сонгосон бүхнээ хийх чадвартай

• Бурхан бүхнийг хардаг

• Бурхан Хүүгээ илгээсэн учраас бид өршөөлийг хүртсэн

• Бурхан мөн чанарынхаа хувьд гурван бодгалиар оршдог

• Бурхан туйлын төгс ёс суртахуунтай

• Бурхан хэнээр ч заалгахгүй

• Бурханы үйлс нь үргэлж зөв шударга юм