Lesson 12: Чуулган

(1) Суралцагч нь дараах санаануудыг тайлбарлаж чаддаг болсон байна. Үүнд:

• Чуулганы үүсэл.

• Чуулган бол амьд тогтолцоо юм.

• Чуулган бол нутгийн, амьд бие бүрэлдэхүүн.

• Даяар чуулганы нэгдмэл байдлын үндэс.

• Нутгийн чуулганы нэгдмэл байдлын үндэс.

• Чуулганы ариун ёслолууд.

• Чуулганы зорилго.

• Чуулганы талаарх христэч итгэл үнэмшил.

(2) Суралцагч нь нутгийн чуулганд зориулах үүрэг хариуцлагаа ойлгож мэднэ.

► Ефес 3:3-10-ыг хамтдаа унших. Энэ багц эшлэлд чуулганы тухай юу хэлж байна вэ?

Шинэ гэрээнээс өмнөх олон зууны туршид чуулган бүрэн илчлэгдээгүй, нууц зүйл байлаа. Бурханы нигүүлслийг мэдэрч, Түүнтэй холбоотой амьдарч байсан хүмүүс олон байсан ч (Ром 4:1-8), чуулган тэр үед хараахан байгуулагдаагүй байв.

► Чуулган хэзээнээс эхэлсэн бэ?

Есүсийн амьдрал, үйлчлэлийн үеэс чуулган эхэлж, Есүсийн өгсөн авралаар чуулган байгуулагджээ (Матай 16:16-18). Пэнтекостын өдрөөс чуулганы эрин үе эхэлсэн юм. Тэр өдрөөс эхлэн чуулган шууд бодитоор харагдахгүй боловч Христийн удирдлага дор Ариун Сүнсний хүчээр ажиллах болжээ (Иохан 16:7).

Есүс дагалдагч нартаа Өөрийнхөө сургаалыг дэлхий даяар түгээн дэлгэрүүлж, байгуулах эрх мэдлийг өгсөн (Матай 28:18-20) төдийгүй, Ариун Сүнс тэднийг бүхий л үнэнд хөтөлнө гэж амласан (Иохан 16:13) билээ. Элч нарын сургаал нь чуулганы үндсэн сургаал учраас чуулганыг элчийн хэмээн нэрлэж болно. Чуулганы үндсэн сургаалтай зөрчилддөг аливаа итгэл үнэмшлийг христитгэл гэж нэрлэх ёсгүй юм.

Чуулганы үүсэл нь:

1. Есүсийн үйлчлэл

2. Христийн өгсөн аврал

3. Пэнтекостын өдөр болсон үйл явдал

4. Элч нарын сургаалын хөгжил дээр тулгуурладаг.

Чуулганыг Бурхан Эцэг ба итгэгч ахан дүүсийн нэгэн том гэр бүлтэй зүйрлэдэг (Матай 12:48-50, Колоссай 1:2). Чуулганыг мөн арьс өнгө, угсаа гарал үл хамаарах нэгэн үндэстэн гэж нэрлэдэг (1 Петр 2:9-10). Чуулганыг хүний биетэй зүйрлэж ирсэн бөгөөд Христ энэ биеийн тэргүүн нь юм (Ефес 4:15-16, Ефес 5:30). Чуулганы гишүүд хамтдаа ажиллаж, нэг нэгнээ халамжилдаг (1 Коринт 12:14, 26).

Чуулганы гишүүн нь биеийн нэгэн эрхтний хувьд чуулганаас бие даан холдох ёсгүй. Түүнд бусад гишүүд, бусад гишүүдэд тэр хэрэгтэй (1 Коринт 12:21). Итгэгч хүн чуулганд хамрагдалгүй сүнслэг байдлаараа бие даан амьдрах буруу. Чуулганаас тусгаар байх нь дэлхий дээрх Христийн үйлсээс тусдаа байна гэсэн үг. Чуулганыг хүндэлж, хайрлахгүй байх нь Христийг хүндэлж, хайрлахгүй байгаатай адил.

Даяар чуулганаас гадна орон нутгийн чуулганууд гэж бий. Итгэгчид нэг дор хамтдаа байхгүйгээр Христийн биеийг ажилллуулах боломжгүй. Тиймээс Паул Коринтын итгэгчдэд Христийн биеийн хэсэг гэдгийг нь сануулсан (1 Коринт 12:27) байдаг. Эндээс нутгийн чуулган нь тухайн газартаа Христийн бие юм гэх санааг харж болно.

Бурхан нутгийн чуулганыг итгэлийн гэр бүл болгохоор шийдсэн нь дараах зорилготой. Үүнд:

1. Христийн биеийн төлөө сүнслэг бэлгүүдийг ашиглах,

2. Нөхөрлөлд нэгдсэн хүмүүсийн янз бүрийн хэрэгцээг хангах (хувийн болон сүнслэг хэрэгцээ),

3. Бурханы мэргэн ухааныг дэлхийд, амьдралын бүх талбарт харуулах,

4. Үл итгэгчдийг итгэлийн гэр бүлд нэгтгэхээр урих, гэх мэт.

Итгэлийн гэр бүлийнхэн амьдралаа хуваалцаж, бие биенийхээ хэрэгцээнд санаа тавьдаг учраас жинхэнэ нөхөрлөл нь санхүүгийн асуудлыг ч тойрохгүй (Иаков 2:15-16, Иаков 1:27). Хэрэв гишүүд нь чуулганы амьдралд оролцож, чадах чинээгээрээ хариуцлага хүлээж байгаа бол, тэдгээр ахан дүүсийн хэрэгцээ нь чуулганы үүрэх хариуцлага байх юм

Бурхан нутгийн чуулганыг байгуулж, хүчирхэгжүүлэхийн тулд сүнслэг бэлгүүд болон тусгай дуудлага өгдөг (Ефес 4:11-12).

Нутгийн чуулган нутгийнхандаа үйлчилдэг. Сүнслэг байх, сайнмэдээ тараах, бүх асуудал дээр Бурханы үнэнийг тусгах зэрэг нь чуулганы эрхэм зорилго юм. Чуулган нь нийгмийн материаллаг хэрэгцээний төлөө үйлчилдэг ч, чуулганы гишүүдийг анхаарах нь чуулганы нэн тэргүүний ажил мөн (Галат 6:10).

Есүс чуулганыг ариун, өө сэвгүй байлгахын төлөө Өөрийгөө өгсөн билээ (Ефес 5:27). Чуулганыхан бусдыг уучлахад ямагт бэлэн байх ёстой ч, нүгэлтэй эвлэрэх ёсгүй юм. Удирдагчид ариун амьдралын жишээ болох ёстой (1 Тимот 3:2-3). Хэрэв чуулганы гишүүн нүгэл үйлдвэл удирдагч сөрөн зогсож, хэрэв гэмшихгүй байвал чуулганаас хөөх ёстой (1 Коринт 5:11-13).

► Чуулган яагаад төгс биш байна вэ?

Чуулганы хүмүүс олон талаар төгс биш. Яагаад гэвэл чуулганы тараасан сайнмэдээг сонсоод ирсэн хүмүүсийн дунд нүглээ гэмшээгүй хүмүүс ч бий. Аврагдсан хүмүүсийн дунд ч үнэнийг амьдралынхаа бүх нарийн ширийн асуудалд хэрхэн хэрэгжүүлэхээ хараахан ойлгоогүй хүмүүс байдаг тул амьдрал нь зохисгүй хэвээрээ яваа хүмүүс ч байгаа. Тэр ч бүү хэл төлөвшсөн зарим итгэгчдээс ч зохисгүй байдал, буруу хандлага харагдаж болно. Тэд ч бас сүнслэг өсөлтийнхээ нэгэн шатанд яваа шүү дээ. Хүмүүсийг сүнслэг төлөвшилд хүргэхийн төлөө Бурханы Үгийг тасралтгүй зааж, хэрэгжүүлэх нь чуулганы ажлын нэгэн хэсэг юм (Ефес 4:11-16; 2 Тимот 3:16-17).

Даяар чуулган нь бүх цаг үеийн, бүх газар нутгийн бүх итгэгчдээс бүрдэнэ. Энэ чуулганыг захирах эсвэл гишүүдийг нь бүртгэх газар, байгууллага гэж дэлхий дээр байхгүй тул заримдаа даяар чуулганыг үл үзэгдэх чуулган гэдэг.

Нутгийн чуулган бол Христийн биеийн төлөө хамтдаа үйлчилдэг, нэг газарт байгаа итгэгчдийн нэгдэл юм. Хэсэг бүлэг хүмүүс арай хязгаарлагдмал зорилгоор нэгдсэн бол тэднийг чуулган гэж хэлэхгүй.

Нутгийн чуулганыг бусад бүлгүүдээс ялгахад тус болох илүү өргөн хүрээтэй тодорхойлолтыг дурдъя. “Чуулган нь мөргөл хүндэтгэл өргөх, сургаалд суралцах, үйлчлэх, нөхөрлөх, сайнмэдээ тараах, сүнслэг удирдлагыг хүлээн авах, Христийн биеийн янз бүрийн бэлэг авьяасаараа нийгмийн бүх хэсэгт үйлчлэхийг хүсэх, ариун ёслолуудыг тогтмол үйлддэг, баптисм хүртсэн итгэгчдийн бүлэг юм.”[1]

Бүх газар, бүх цаг үеийн нэг л чуулган байдаг. Есүс “Би чуулганаа босгох бөгөөд” гэж хэлсэн болохоос “чуулгануудыг” гэж хэлээгүй. Элч Паул ч нэг Эзэн, нэг итгэл, нэг баптисм (Ефес 4:4-6) байдаг шиг нэг бие, нэг Сүнс, нэг найдвар байна гэж хэлжээ.

Анхны үеийн христитгэлийн тунхагт чуулганыг “католик чуулган” гэдэг байв. Энэ нь Ромын Католик чуулганыг хэлж байгаа бус, харин бүх жинхэнэ итгэгчдийг багтаасан даяар чуулганыг хэлж байгаа юм.

[1]Даяар чуулганы нэгдмэл байдал нь нэг байгууллага, нэг төвлөрсөн захиргаанд байдаггүй. Христийг эргэж ирэхээс нааш хэзээ ч тийм зүйл болохгүй. Зарим хүн ийм байгаасай гэж хүсдэг боловч энэ нь Бурханы хүсэл биш. Яагаад гэвэл Есүсийн дагалдагчид бусад хүмүүсийг өөрсдийнх нь бүлгээс тусдаа үйлчлэл хийх ёсгүй гэж үзэх үед Есүс тэдний бодлыг зассан юм (Лук 9:49-50). Хэрэв Есүс даян дэлхийн чуулганыг нэгдсэн төв захиргаатай болгохыг хүссэн бол, Тэр Өөрөө газар дэлхий дээр биеэр үлдэж удирдах ёстой байсан болов уу. Хэрэв Есүс дэлхий дээр биеэр үлдсэн бол дэлхий даяар Ариун Сүнсний хийх янз бүрийн ажил явагдахгүй байх байсан гэдгийг Тэр мэдэж байлаа (Иохан 16:7).

► Даяар чуулганы нэгдмэл тал юунд суурилдаг вэ?

Даяар чуулганы нэгдмэл байдал нь:

1. Элч нарын онол сургаал

2. Хувьсган өөрчилдөг Христтэй харилцах харилцаанд суурилдаг.

Онол сургаалын нэгдмэл байдал нь Христэд итгэгчид бүх зүйл дээр, бүр чухал онол сургаал дээр ч санал нэг байна гэсэн үг биш. Харин Бурхан ба Христийн мөн чанар болон сайнмэдээний үндсэн санаануудыг заасан гол онол сургаал дээр санал нэгддэг байна гэсэн үг юм. Үүнгүйгээр нэг Бурханд мөргөн хүндэтгэж, нигүүлслийг мэдрэх боломжгүй.

[2]Онол сургаал нь христитгэлийн нэгдмэл байдалд шаардлагатай цорын ганц зүйл биш. Христэд итгэгчид хувьсган өөрчилдөг Христтэй харилцах харилцааны ачаар бие биетэйгээ нөхөрлөж холбоотой болдог. Тэд нүглээ гэмшиж, Христэд итгэж, Ариун Сүнстэй болсон учраас өөр хоорондоо онцгой харилцаатай болсон. Итгэгчид олон талаараа ялгаатай ч тэд дэлхий даяар бие биенээ таньдаг.

Христэч итгэл үнэмшлийн гол онол сургаалуудыг баримталдаг, хувьсган өөрчилдөг Христтэй харилцах харилцаанд буй хүнийг бид Христэд итгэгч гэж хүлээн зөвшөөрч болно. Гэхдээ нутгийн чуулгануудын онол сургаалын зөвшилцөл нь илүү нарийвчилсан байх ёстой.

Орон нутгийн чуулган гэдэг нь хамтдаа Бурханыг мөргөн хүндэтгэж, сайнмэдээг түгээдэг, залуусыг болон итгэлд ирэгсдийг дагалдуулдаг, орон нутагтаа үйлчилдэг, христитгэлийн амьдралын практик нарийн ширийн зүйлсийг зааж сургахад өөрсдийгөө зориулдаг бүлэг хүмүүс юм. Эдгээр хүмүүс хамтдаа энэхүү зорилгоо биелүүлэхийн тулд онол сургаалын олон нарийн ширийн зүйлс дээр тохиролцох ёстой болдог.

Жишээлбэл, нутгийн чуулганы нэг гишүүн чуулганыхаа бүх залууст, бас шинэ хүмүүст хэлүүдээр ярих бэлэг авьяасыг гуйх ёстой гэж хэлдэг байсан байж болно. Гэтэл тус чуулганы бусад удирдагчид хэлүүдээр ярих бэлэг авьяасыг хүн бүрд өгөгдөх зүйл биш гэж үздэг байв. Тиймээс Бурханы хүсэл биш зүйлийг хүмүүс амсаж мэдрэхээр оролдох нь сүнслэг төөрөгдөлд хүргэнэ хэмээн тэдний санаа зовдог болжээ. Мэдээж ийм нөхцөлд нутгийн чуулганд хамтдаа үйлчлэх хэцүү. Тиймээс удирдагчид тухайн хүнийг итгэгч гэж хүлээн зөвшөөрч байгаа ч, чуулганд төөрөгдөл үүсгэж болзошгүй тийм сургаал заахыг тэр хүнд зөвшөөрөх ёсгүй юм.

Нутгийн чуулганыхан амьдралаа хуваалцаж, хамтдаа үйлчлэх замд нь нөлөөлж мэдэх онол сургаалын талаар зөвшилцөх хэрэгтэй. Чуулганууд баримталдаг онол сургаалынхаа талаар бичгээр тунхаглал гаргах нь зүйтэй. Энэ тунхаглал нь хэн нэгэн хүний итгэгч мөн эсэхийг тодорхойлоход ашиглагдахгүй. Харин энэ нь ойр дотно нөхөрлөж, байнга мөргөл хүндэтгэл, үйлчлэл хийдэг хэсэг бүлэг итгэгчдийг ямар онол сургаал нэгтгэж байгааг харуулахад тустай.

Есүс чуулганд хоёр ариун ёслолыг өгсөн юм. Тэдгээрийг ёс заншил эсвэл тусгай ёслол гэж нэрлэдэг.

Баптисм нь Христийн үхэл, амиллыг бэлгэддэг (Ром 6:3-4). Баптисм бол Христтэй холбогдсон итгэгч хүн нүглийн хувьд үхэж, Христийн дотор шинэ амьдрал эхэлж байгааг илэрхийлсэн гэрчлэл юм. Баптисм хүнийг аврахгүй, харин баптисм хүртэгчийг итгэгч болсныг олон түмэнд гэрчилж буй үйл явдал (Иохан 3:7-8).

Эзэний зоог барихыг Есүс загалмайд цовдлогдохоос өмнө дагалдагчидтайгаа сүүлчийн зоог барих үедээ тогтоож өгсөн юм (1 Коринт 11:23-25). Талх, дарс нь бидний авралын төлөө Өөрийгөө тахил[1] болгон өргөсөн Есүсийн бие ба цусыг төлөөлнө. Амьд явахын тулд бид махбодоо хооллодог шиг, сүнслэг амийнхаа төлөө Есүсийн тахил золиост түшдэг (Иохан 6:53-58).

Ариун ёслолуудыг "нигүүлслийн арга зам" гэж нэрлэх боломжтой. Итгэлгүй, дуулгаваргүй атлаа ариун ёслолыг үйлдвэл нигүүлсэл ирэхгүй. Эдгээр ёслолууд нь Бурханаас бидэнд өгсөн дасгал бөгөөд хэрэв бид итгэлтэйгээр ёслолыг үйлдвэл, эдгээр нь бидний хувьд Бурханаас нигүүлслийг хүлээн авах арга зам болдог.

► Чуулганы бусад зорилго юу вэ?

Чуулган дараах үйл ажиллагааг хийх ёстой. Үүнд:

1. Сайнмэдээ тараах (Матай 28:18-20)

[1]2. Чуулганаараа мөргөл хүндэтгэл өргөх (1 Коринт 14:26)

3. Сургаалаа сахих (1 Тимот 3:15; Иуда 1:3)

4. Пасторыг санхүүгээр дэмжих (1 Тимот 5:17-18)

5. Илгээлтийн эздийг дэмжих, илгээх (Үйлс 13:2-4; Ром 15:24)

6. Тусламж хэрэгтэй гишүүдэд туслах (Ром 12:13; 1 Тимот 5:3)

7. Нүгэлд унасан итгэгчдийг сахилгажуулах (1 Коринт 5:9-13)

8. Баптисм, Эзэний зоогийн ёслолыг үйлдэх (Матай 28:19; 1 Коринт 11:23-26)

9. Дагалдагчдыг төлөвшилд сургах (Ефес 4:12-13)

10. Орон нутгийнхаа хэрэгцээнд үйлчлэх (Галат 6:10; Ефес 4:28; Еврей 13:16)

Эдгээр ажлын ихэнхийг хүн ганцаараа бие даан хийж чадахгүй. Харин итгэгчдийн бүлэг, удирдлагын бүтэц, хамтын ажиллагааг түшиглэн эдгээр зорилго хэрэгжих боломжтой.

Бурхан итгэгч бүрийг нутгийн чуулганд зориулалт гаргаж, тухайн чуулганыг энэ дэлхий дээрх зорилгоо биелүүлэхэд нь туслахыг уриалдаг. Гишүүд чуулгандаа үйлчлэхээс нааш Христийн биеийн гишүүн болсон зорилгоо биелүүлж чадахгүй юм.

Ангийн удирдагчийн тэмдэглэл: Ангийн нэг гишүүн энэхүү хэсгийг тайлбарлана уу.

Зарим хүн нутгийн чуулганы нэг хэсэг болох зориулалт гаргадаггүй. Тэд Ням гарагт хүссэн чуулгандаа очдог бөгөөд чуулган тэдэнд түшиглэх аргагүй байдаг учраас тэд чуулганы ямар ч үйлчлэлд тусалдаггүй. Тэдэнд сүнслэг нөхөрлөл үүсгэж, хариуцлага хүлээх боломжийг олгодог харилцаа холбоо байдаггүй. Хэрэв бүх итгэгчид ийм болбол чуулган гэж байхгүй болох биз.

► Итгэлээ шалгах хэсгийг хамгийн багадаа хоёр удаа хамтдаа уншаарай.

Өөрийн бие болох нутгийн чуулгануудаар дамжин харагддаг даян дэлхийн, ариун, нэг чуулганыг Христ байгуулсан билээ. Энэ чуулган элч нарын онол сургаалыг баримталж, бүхий л үнэнийг хамгаалдаг. Чуулган бол Бурханы гэр бүл, бүхий л хэрэгцээнд үйлчилдэг нөхөрлөл юм. Чуулган Бурханыг мөргөн хүндэтгэж, дэлхийд сайнмэдээ тараан, итгэгчдийг дагалдуулдаг.

(1) Эшлэл унших: Суралцагч тус бүр дараах эшлэлүүдээс нэгийг сонгоно. Дараагийн хичээл эхлэхээс өмнө эшлэлийг уншиж, энэхүү хичээлийн сэдвийн талаар тус эшлэлд юу гэж хэлснийг багцлан бичнэ.

• 1 Коринт 5:1-13

• 1 Коринт 6:1-8

• 1 Коринт 12:14-31

• Ефес 4:11-16

• Иаков 2:1-9

(2) Сорил: Дараагийн хичээлийг 12-р хичээлийн сорилоор эхэлнэ. Сорилд бэлтгэж, асуултыг сайн судлаарай.

(3) Бусдад заах: Ангиас гадуур заах хуваарь гаргаж, тайлагнахаа мартуузай.

(1) Чуулганы эрин үе хэзээ эхэлсэн бэ?

(2) Чуулганыг яагаад элчийн гэж нэрлэдэг вэ?

(3) Чуулганы үүссэн 4 шалтгаан юу вэ?

(4) Даяар чуулган гэж юу вэ?

(5) Нутгийн чуулган гэж юу вэ?

(6) Католик чуулган гэдэг нь анх ямар утгатай байсан бэ?

(7) Даяар чуулган ямар хоёр зүйлээрээ нэгдмэл вэ?

(8) Чуулганууд онол сургаалынхаа талаар бичгээр тунхаглал гаргах нь яагаад зүйтэй вэ?

(9) Нутгийн чуулганы зорилгуудаас зургааг жагсааж бичнэ үү (Аль ч зургаа байж болно).