Lesson 11: Христитгэлийн ариун байдал

(1) Суралцагч нь дараах санаануудыг тайлбарлаж чаддаг болсон байна. Үүнд:

• Библи дэх ариун гэх нэр томьёоны хэрэглээ.

• Христитгэлийн ариун байдлын үндэс болох Бурханы ариун чанар.

• Мөргөл хүндэтгэл ба Бурхантай харилцах харилцаан дахь ариун байдлын ач холбогдол.

• Ариусгалын талаарх Библийн жишээ.

• Сүнслэг төлөвшилд хүргэх дасгал сургуулилтууд.

• Ариун байдлын талаарх христэч итгэл үнэмшил.

(2) Суралцагч нь Бурханы нигүүлслээр энэ дэлхий дээр ариун амьдарч чадна гэдэг итгэлийг олж авна.

Ариун байдал, ариусгал гэж орчуулдаг еврей үг Хуучин гэрээнд 600 гаруй удаа гардаг. Ариун гэсэн утгатай еврей болон грек үг хоёулаа үндсэндээ тусгаарлах, ямар нэг зорилгод зориулагдсан гэсэн утгатай. Ариусгасан зүйлийг тусгай шинэ зорилгоор хэрэглэхийн тулд өмнөх хэрэглээнээс нь тусгаарладаг. Хуучин гэрээнд хэд хэдэн тусгай зориулалтын, ариун юмсыг дурдсан байдаг.

• Ариун газар. Бурхан Мосетэй уулзсан газрыг ариун хэмээн онцолсон (Гэтлэл 3:5).

• Ариун асар, Сүм. Тахилчийн өмсгөл (Леви 16:32), тавиг талх (Гэтлэл 29:34), тавилгууд (Гэтлэл 40:9) гэхчлэн маш олон ариун эд юмс Эзэний өргөө, асартай холбоотой хэрэглэгддэг байжээ. Энэ бүхэн Бурханд мөргөл хүндэтгэл өргөхөд зориулагдсан тусгай эд хэрэгсэл байв.

• Ариун өдрүүд. Амралтын өдрийг мөн ариусган тусгаарлажээ (Эхлэл 2:3; Гэтлэл 20:8). Эвлэрүүллийн өдөр гэх мэт еврейчүүдийн баярыг мөн тусгай хэмээн үзсэн (Леви 23:26-29) байдаг. Эдгээр өдрүүдийг амрах, эргэцүүлэн бодох, мөргөн хүндэтгэхэд зориулж тусгаарладаг байжээ.

• Ариун Бурхан. Библи дэх хамгийн агуу ариун байдлын жишээ бол Бурхан Өөрөө юм. Бурханд хамаатай бүх зүйл ариун. Түүний нэр ариун (Леви 22:2), үгс нь ариун (Иеремиа 23:9), арга зам нь ариун (Дуулал 77:13) билээ. Ариун гэдэг нь Бурхан Өөрөө бүхий л нүгэлтэй, цэвэр бус, нийтлэг, жирийн эсвэл Түүний тэнгэрлэг мөн чанар, байр сууринд үл нийцэх юмсаас бүрэн тусгаар гэсэн утгатай.

Шинэ гэрээнд Есүсийг ариун (Иохан 17:19; Үйлс 4:27, 30), мөн нүгэлгүй (2 Коринт 5:21) гэсэн байдаг. Тэнгэрэлч нар (Марк 8:38), элч нар, эш үзүүлэгчдийг бас (Ефес 3:5) ариун хэмээн тодорхойлсон байна. Эдгээр нь бүгд онцгой зорилгын төлөө тусгаарлагджээ.

Библид Бурханы хүмүүсийг ариун гэж дуудсан байдаг (Леви 11:44-45; 1 Коринт 1:2; 1 Петр 1:15-16). Энэ хичээлээр Бурханы хүсдэг ариун байдлын тухай тайлбарлана.

► Дуулал 119:33-40–ийг хамтдаа унших. Итгэгч хүнийг өөрчилдөг Бурханы арга замын талаар эдгээр эшлэлд юу гэж хэлсэн бэ?

Бурхан Өөрийгөө илчилж эхлэх үедээ ямар Бурхан болохоо харуулах нь Түүний анхны зорилго байжээ. Тэрээр юуны өмнө Өөрийгөө “ариун” хэмээн тодорхойлсон. Исаиа номд Бурханыг ихэвчлэн “Израилын Ариун Нэгэн” гэж нэрлэсэн байдаг.

Бурханы ариун байдал нь мөргөл хүндэтгэлийн гол сэдэв юм.

Таны аугаа, сүрдмээр нэрийг тэд магтан дуулаг. Тэр ариун. Бидний Бурхан ЭЗЭНийг өргөмжилж, Түүний хөлийн гишгүүрийн өмнө мөргөгтүн! Тэр ариун (Дуулал 99:3, 5).

Хүмүүнд тавигдах Бурханы шаардлагын үндэс нь Түүний ариун байдал юм. Тэр Өөрөө ариун учраас мөргөн хүндлэгчдийг ариун байхад уриалдаг. Тиймээс “Би ариун тул та нар ариун бай” (Леви 11:44-45, Леви 19:2, Леви 20:26, Леви 21:8) хэмээн хэлжээ.

Израилын Бурхан бусад үндэстний хуурамч бурхдаас өөр байсан төдийгүй, өөр маягаар мөргөл хүндэтгэл өргөхийг шаарддаг байв.

ЭЗЭНий уул өөд хэн авирч болох вэ? Ариун газарт нь хэн зогсож болох вэ? Цэвэр гартай, ариун зүрхтэй, хуурмаг хоосонд сэтгэлээ өргөөгүй, худал тангараг тавиагүй нь буюу (Дуулал 24:3-4).

Эндээс “Бурхан хэний мөргөл хүндэтгэлийг хүлээн авдаг вэ?” гэх асуулт гарч ирж байна. Бурхан хүн бүрийг мөргөн хүндлэгч гэж хүлээн авдаггүй. Тиймээс Түүнийг хүндлэгчид ариун байх ёстой юм.

Бурханы хүсэж буй ариун байдал нь зан үйлийн шинжтэй, дүр эсгэсэн бус, харин жинхэнэ ариун байдал юм. Бурханыг мөргөн хүндлэгчдийн ариун байдлын жишгийг Шинэ гэрээнд олон давтан өгүүлсэн байдаг.

Харин та нарыг дуудсан Ариун Нэгэний адил өөрсдийн бүх л зан байдалдаа бас ариун байгтун. Яагаад гэвэл “Би ариун учраас та нар ариун байгтун” гэж бичигдсэн юм (1 Петр 1:15-16).

Зан байдал гэдэг нь хүний биеэ авч явах байдал амьдралын хэв маягийг бүхэлд нь илэрхийллдэг. Бурхан Өөрт нь мөргөн хүндлэгчийг зөвхөн зан үйлийг дагадаг, эсвэл ариун биш атлаа ариун гэж дуудуулдаг байхыг хүсдэггүй. Харин мөргөн хүндлэгчийг ариун амьдралаар амьдраасай гэж Тэр хүсдэг.

► Ариун байдал мөргөл хүндэтгэлтэй холбогддог ямар ямар шалтгаан байна вэ?

Мөргөн хүндэтгэхэд ариун байдал чухал юм. Учир нь:

1. Бид Бурханыг хайрладаг ба Түүнтэй адил байхыг хүсдэг. Бурханыг мөргөн хүндэтгэх гэдэг нь Бурханыг оршин буй хамгийн гайхамшигтай бодгаль болохыг нь ойлгож, Түүнийг байгаагаар нь бишрэн хүндлэхийг хэлдэг. Мөргөн хүндэтгэх гэдэг нь Түүний мөн чанарыг үнэлж бахдах юм. Бурханы мөн чанар нь үндсэндээ ариун билээ. Тиймд бид үнэнээсээ Бурханы мөн чанарыг биширч байгаа бол нүгэл, ёс бусыг үзэн ядна. Өөрсдөөсөө үүнийг харсан байлаа ч үзэн ядах болно.

2. Бид Бурханыг хайрладаг ба Түүнийг баярлуулахыг хүсдэг. Хэрэв мөргөл хүндэтгэл гэж юу болохыг ойлгодог бол Бурханы шаардлага биднийг гайхшруулахгүй. Бид айснаасаа болоод хүндэтгэл өргөдөг бус, Түүний ерөөлийг хүртсэн учраас ч бус, харин бид Түүнд хайртай учраас Түүнийг мөргөн хүндэтгэдэг.

Библид ариусгал гэдэг үгийг итгэгч бүрийн амьдралд тохиолдсон үйл явдлыг илэрхийлэхэд ашигладаг. Паул “Коринт дахь Бурханы чуулган хийгээд хаа сайгүй Эзэн Есүс Христийн маань нэрийг дуудагчдад болон ариун хүмүүс байхаар дуудагдсан, Христ Есүс дотор ариусгагдсан хүмүүст” (1 Коринт 1:2) гэж бичсэн байдаг. Тэрээр мөн “… Гэвч Эзэн Есүс Христийн нэрээр болон Бурханы маань Сүнс дотор та нар угаагдсан, ариусгагдсан, та нар зөвтгөгдсөн” хэмээн бичжээ (1 Коринт 6:11). Коринтчууд сүнслэг төлөвшилд хүрээгүй, Христ дотор нялх хүүхэд мэт, махбодын хүслээрээ явдаг хүмүүс байсан ч, тэд хэдийн ариусгагдсан байжээ (1 Коринт 3:1).

Энд коринтчуудын талаар ярихдаа ариусгах гэдэг үгийг хамгийн ерөнхий утгаар нь ашиглажээ. Коринтчууд нүгэлт амьдрал, ертөнцийн явдал дундаас дуудагдаж, Бурханд тусгаарлагдсан хүмүүс юм. Тэд ариусгалд төлөвшөөгүй байсан нь гарцаагүй боловч, хуучин амьдралаасаа тусгаарлагдаж, Бурханы гэр бүлийн нэг хэсэг болсон байлаа. Бурхантай анх уулзах үед бидний нүгэл Түүнтэй харилцах харилцаанд маань саад тотгор болдог. Тиймээс гэмшиж, уучлагдаж, зүрх сэтгэлээ шинэчлэх хүртлээ бид Бурхантай харилцаж чаддаггүй.

[1]Бурхантай эвлэрэхийн зэрэгцээ бид бас өөрчлөгддөг (Тит 3:5). Сүнслэг байдлын хувьд бид шинэ бүтээл болсон. Бид нүглийн хүчнээс чөлөөлөгдөж, Бурханыг баярлуулах хүсэлтэй болдог. Хүн аврал авах үеэс христитгэлийн ариун байдал эхэлдэг.

Аврал хүнийг ариун амьдрал руу хөтөлдөг гэдгийг Библи бидэнд зааж байна. Авралыг авчирдаг Бурханы нигүүлсэл нь эдүгээ үед биеэ цэнэдэг ба сүсэг бишрэлтэй амьдрахыг бидэнд сургадаг (Тит 2:11-12). Авралын зорилго нь биднийг нүглээс чөлөөлж, ариун болгох явдал бөгөөд ингэснээр бид Бурхантай харилцаатай амьдарч чадах юм (Лук 1:74-75, Ром 6:2, 11-16).

Бид Бурхантай харилцаатай амьдрах тусмаа Бурханы үнэнийг ойлгож, ариун байдалдаа өссөөр байдаг. Бурханы үнэний талаар илүү ихийг мэдэхийн хэрээр Бурханыг үргэлжлүүлэн дуулгавартай дагахыг гэрэлд алхах гэнэ (1 Иохан 1:7). Түүнд юу таалагддаг, юунд дургүйг нь илүү сайн ойлгох тусмаа Түүний үнэн ба Ариун Сүнсний хүчээр бид өөрчлөгддөг.

Бурханыг хайрладаг хүн бүрэн ариун байхыг хүснэ. Тийм хүн үйлдлээ өөрчлөөд зогсохгүй, санаа сэдлээ хүртэл цэвэр ариун байлгахыг хүсдэг. Давид нүглийг бүрэн ялж амьдрахын төлөө залбирч байгаад, улмаар үг хэлээр зогсохгүй зүрх сэтгэлийн бясалгал нь хүртэл Бурханыг баярлуулахын төлөө гуйсан байдаг (Дуулал 19:12-14. Дуулал 119:7, 34, 36, 69, 80, 112).

Сүнслэг төлөвшлийн бүхий л үйл явцыг ариусгал гэнэ. Ариусгал нь нүгэл болон ертөнцийн хүслээс улам бүр салж, Бурханд өөрийгөө зориулах насан туршийн үйл явц юм. Паул энэ ертөнцийн хэв маягт автахаас сэрэмжлүүлж, “харин оюун санааныхаа шинэтгэлээр өөрчлөгдөж байгтун [тасралтгүй]!” (Ром 12:2) хэмээн ятгаж байсан. Дэлхийн явдлаас салж, оюун санаагаараа өөрчлөгдөх нь Христэд итгэгчдийн хувьд хэсэг хугацаанд хийгээд бүрэн болчихдог зүйл биш. Итгэгч хүн Эзэнтэй хамт алхаж л байгаа бол өсөлт хөгжлийг байнга мэдэрнэ. Энэ бүх ойлголт ариусгал гэдэг үгэнд багтсан байдаг.

Удамшсан завхрал гажуудал гэдэг нь хүн төрснөөс эхлээд нүгэлд татагддаг ёс суртахууны мөн чанарын гажуудал юм. Үүнийг заримдаа “анхдагч нүгэл” гэж нэрлэдэг. Энэ нь Адамын нүглийн улмаас бидэнтэй хамт төрдөг нүгэлт мөн чанар юм.

Хүн бүр өөртөө төвлөрсөн, нүгэлд татагдах хүсэлтэй төрдөг. Бурхан бидэнд хүсэл, хүчийг өгөхгүй л бол бидний хүсэл зөвийг сонгох боломжгүй юм (Ром 6:16-17). Удамшсан завхрал гажуудал нь бардам зан, атаа жөтөө, үзэн ядалт, үл уучлал зэрэг дотоод нүглийг өдөөдөг. Улмаар энэ нь нүглийн үйлсийг ч өдөөнө.

► Аврагдсаны дараа ч удамшсан завхрал гажуудал арилахгүй хэвээрээ үлдэх үү?

Аврагдсан хүн удамшсан завхрал гажуудлын хяналтанд цаашид байхаа болино. Хэрэв удамшсан завхрал гажуудалдаа захирагдсан хэвээр байсан бол тэр хүн нүгэл дундаа амьдарч, аврал авахгүй байх байсан. Библид махбодын бодол санаанд захирагддаг хүн яллагдана гэж хэлсэн байна (Ром 8:6-8, 13). Аврагдсан хүн удамшсан завхрал гажуудлын хяналтаас гарсан учраас Ариун Сүнсний хүчээр нүглийг ялан дийлж амьдрах боломжтой (Ром 8:1, 9, 13).

Гэхдээ аврагдсан хүн удамшсан завхрал гажуудлаасаа цэвэрлэгдэх хүртлээ нөлөөг нь хадгалсаар байдаг. Паул Коринтын итгэгчдийг аврал авсан хүмүүс боловч махбодын хүслээ дагасан хэвээрээ, энэ дэлхийн хүмүүс шиг хандлагатай хэвээрээ байна гэжээ (1 Коринт 3:1-3, унших). Үүгээр шинэ итгэгчдийг ийм байдалд орох нь байдаг зүйл гэсэн санааг Паул илэрхийлжээ. Махбодын хүслээрээ амьдарч байгаа хүн Христийн дотор нялх хүүхэд адил гэжээ.

Ийм байдалд байгаа итгэгч хүн Бурханыг хайрлах боловч бүх зүрх, сэтгэл, оюун ухаан, хүч чадлаараа Бурханыг хайрлаж чаддаггүй (Матай 22:37). Тийм хүн Паулын адилаар Бурханы дуудлагыг дагах ганц л хүсэл тэмүүлэлтэй гэж хэлж чадахгүй (Филиппой 3:13-15) юм. Түүнчлэн зүрх сэтгэлийнх нь зарим бодол эргэцүүлэл Бурханд таалагдахгүй байгааг өөрөө ч мэддэг (Дуулал 19:14). Бурхан биднийг ийм байдалтай орхихгүй. Бүр эрт дээр үед ч Бурхан нигүүлслээ үзүүлж, израилчуудыг бүх зүрхээрээ Бурханыг хайрлах чадвартай болгоно хэмээн амлаж байв (Дэд хууль 30:6, унших).

[1]Давид уучлалаас ч гүн гүнзгий нигүүлслийн ажлын төлөө залбирсан байдаг. Тэрээр нүгэл үйлдсэнийхээ дараа зүрх сэтгэлийнхээ угт байгаа асуудлаас болж ийм зүйлд орооцолдсон гэдгээ ойлгож байв. Нүгэл өөрийнх нь мөн чанарт байгаа гэдгийг ухаарч байсан ч, Бурхан түүнийг бүрэн ариун байхыг шаарддаг гэдэгт итгэж байв. Тиймээс Давид бүрэн цэвэр ариун болохын төлөө залбирчээ (Дуулал 51:5-10, унших).

Шинэ гэрээний үеийн итгэгчид итгэлд ирснийхээ дараа өөр нэг онцгой үйл явдалд дуудагджээ. Тесалоникийн итгэгчид бол сайнмэдээг хүлээн авч, шүтээнээ орхиж, хавчлагыг тэвчиж, Ариун Сүнсэнд баярлаж, Есүсийн эргэн ирэхийг хүлээж байсан итгэгчдийн гайхалтай жишээ юм (1 Тесалоник 1:6-10). Гэсэн хэдий ч тэдний итгэлд ямар нэг зүйл дутагдаж байв. Энэ дутагдсан зүйл нь удаан хугацааны үйл явц, эсвэл үхлийн дараа гүйцэлдэх зүйл биш, харин Паулыг тэдэн дээр очих үед ч гүйцэлдэж болох зүйл хэмээн тэр хэлсэн байдаг (1 Тесалоник 3:10, унших). Тиймд Паул ийнхүү залбирчээ.

Амар амгалангийн Бурхан Өөрөө та нарыг бүрэн ариусгатугай. Сүнс, сэтгэл, бие тань бүхлээрээ бидний Эзэн Есүс Христийг ирэхэд гэм зэмгүй хэвээр байх болтугай. Та нарыг Дуудагч нь итгэмжит бөгөөд Тэр мөн үүнийг биелүүлэх болно (1 Тесалоник 5:23-24).

Паул итгэгчдийг ариусгал дундуур явсаар байхын төлөө залбирсан. Ариусгалын үр дүнд итгэгчид Эзэнийг эргэн ирэх үед бие, сэтгэл, сүнсээрээ гэм зэмгүй байх юм. Пэнтекостын баяраар Есүсийн дагалдагчид онцгой нигүүлслийг хүлээн авчээ. Тэд түүнээс өмнө аль хэдийн аврагдсан байсныг бид мэднэ. Есүс ч тэднийг энэ дэлхийнх биш болж, Өөрт нь болон Эцэгт харьяалагддаг, нэрс нь тэнгэрт бичигдсэн хүмүүс болсон гэж хэлж байсан (Иохан 15:3, Иохан 17:14, 9-10; Лук 10:20). Гэвч тэд өөртөө төвлөрсөн, Бурханд чухал зүйлсийг ойлгож өөрийн болгоогүй хэвээрээ байв. Есүс тэдний нүгэлт хандлагыг дахин дахин залруулж өгдөг байлаа (Марк 9:33-34; Марк 10:35-41; Лук 9:54-55, унших).

[2]Есүс амилсныхаа дараа тэнгэрт одохоос өмнөхөн дагалдагчдыгаа энэ дэлхий дэх Түүний гэрч нар болно гэж хэлсэн юм. Гэхдээ үүнээс өмнө дагалдагчид эхлээд Ариун Сүнсээр баптисм хүртэх ёстой байв (Лук 24:49; Иохан 20:22; Үйлс 1:2-5, 8, унших). Тэрээр Ариун Сүнсний үйл ажлын тухай тэдэнд олон удаа ярьсан бөгөөд энэ тухай Иохан 14-16-р бүлэгт онцгойлон өгүүлдэг.

Дагалдагчид Пэнтекостын өдөр Ариун Сүнсээр дүүрсэн (Үйлс 2:4). Энэ дүүрэлт тэдний хүсэл эрмэлзэл, эрхэмлэх зүйлс, үйлдлийг өөрчилсөн. Шинэ гэрээний үйл явдлын туршид дагалдагчид буруу ойлголттой явж, алдаа гаргаж байсан ч, Христтэй адил хандлага, эрхэмлэх зүйлтэй болсноо харуулж байв. Петр, Иохан нарын бичсэн захидалд Христийн үг сургаал, зүрх сэтгэл тусгалаа олсон байна. Ариун Сүнсээр дүүрсэн учраас тэд Бурхан Эзэнээ бүх зүрх, сэтгэл, оюун ухаан, хүч чадлаараа хайрлаж, хөршүүдээ өөр шигээ хайрлаж чадсан билээ (Матай 22:37-39). Тэд Ариун Сүнснээс бүрэн хамааралтай байсан учраас Ариун Сүнс Христээр дамжин амьдарсан шигээ тэднээр дамжин амьдарсан билээ (Лук 4:1, 14, 18; Үйлс 2:22).

Зарим итгэгч багш нар ариусгалын үйл явцад төвлөрдөг бол зарим нь хямралын үйл явдалд анхаарлаа хандуулдаг. Пэнтекостын баяраар болсон Ариун Сүнсний баптисм нь ариусгалын тодорхой үйл явдлыг мэдэрсэн хүмүүсийн жишээ юм. Аливаа зүйл бүрэн гүйцэд болох эсвэл бага багаар туршигдсаар байх гэдэг нь тухайн цаг хугацаанд хийгдсэн гэдгийг харуулдаг. Бид итгэлийн нэг хоромд ч бай эсвэл Бурханы өмнө бүрэн дүүрэн бууж өгсөн үедээ ч сайнмэдээний хийж чадах зүйлийг хязгаарлахгүй байх нь чухал (Ром 12:1-2) юм. Тэгвэл Есүсийн үхэл ба амиллаараа дамжуулж өгсөн бүхнийг хүлээн авах боломжтой хүмүүс нь:

1. Өөрсдийгөө нүглийн хувьд Есүстэй хамт үхсэн гэж тооцдог (Ром 6:11)

2. Нүгэл бие махбодыг нь захирахыг зөвшөөрдөггүй (Ром 6:12)

3. Бие махбодоо зөвт байдлын зэвсэг болгодог (Ром 6:13) тэдгээр хүмүүс юм.

Түүхийн туршид Жон Бунян, Хадсон Тейлор, Дуайт Л. Мүүди, Сэмми Моррис, Освальд Чемберс, Френсис Ридли Хавергал, Эми Кармайкл[3] гэх мэт агуу итгэгчид Сүнсээр дүүрэн амьдарч, Бурхантай илүү гүнзгий харилцаатай байснаа гэрчилсээр иржээ. Бурхан хормын дотор хийж чадах зүйлийг бид хязгаарлахгүй байх ёстой. Үүнчлэн үйл явц бүхий Ариун Сүнсний ажлыг ч мартахгүй байх нь чухал. Ийм төрлийн ариусгалыг заримдаа бүрэн гүйцэд гэж үзэж болох боловч, тодорхой түвшинд хүрлээ гэдэг нь цааш хөгжих ёсгүй гэсэн үг биш. Жишээлбэл, франц хэлээр ярьж сурлаа гээд франц хэлээр бүр сайн ярьж сурах шаардлагагүй гэвэл өрөөсгөл болно. Ариусгалд өссөөр байгаа хүмүүс нэгэн цагт өмнө нь хүрч амсаж байгаагүй тодорхой түвшинд хүрсэн байх болно. Гэхдээ энэ нь туйлын төгс болчихсон гэсэн үг биш юм. Тиймээс итгэгч хүн ариун амьдралаа үргэлжлүүлэн хөгжүүлсээр байх ёстой.

Библид төлөвшсөн итгэгчийн амьдралыг харуулдаг. Христитгэлийн зан чанарыг хөгжүүлэхийн тулд Ариун Сүнс итгэгчдийн амьдралд ажилласаар байдаг ба итгэгчийг цэвэршүүлэх, тосолгоо өгөх онцгой мөчүүд болон алгуур үйл явц бүхий ажлууд нь бүгд Сүнсний үйл хэрэг юм. Тиймээс Библид дүрсэлсэн төлөвшсөн итгэгчийн хэмжээнд хүртлээ итгэгч хүн сүнслэг амьдралдаа сэтгэл ханаж болохгүй.

Еврей захидлыг бичсэн хүн зарим итгэгчдийг балчир хүүхэд шиг байна гэжээ (Еврей 5:12). Тиймээс тэрээр Христийн тухай балчир ойлголтыг орхиж, төлөвшилд (Еврей 6:1) тэмүүлэхийг ятгасан байдаг юм.

Итгэгчдийн төлөө залбирсан элч нарын залбирал ч бидэнд Бурханы хүслийг сануулж байна.

Хайр

Паул “Эзэн та нарыг бие биенээ болон бүгдийг гэсэн хайранд өсгөн бялхуулах болтугай…” (1 Тесалоник 3:12-13) хэмээн залбирчээ. Тэрээр бас ефесчүүдийн төлөө залбирахдаа:

…та нар хайр дотор үндэслэгдэн суурилагдаад,тэр хайрын ямар өргөн, урт, өндөр хийгээд гүн болохыг бүх ариун хүний хамт ойлгох болтугай. Мэдлэгийг давдаг Христийн хайрыг мэдсэнээр та нар Бурханы бүх дүүрлээр бялхах болтугай (Ефес 3:17-19) гэжээ.

Паул эдгээр итгэгчдийг хайранд өсгөн бялхуулах гэсэндээ тийнхүү залбирсан байна. Тэрээр мөн төлөвшсөн итгэгчийн хайр ямар байх ёстойг 1 Коринт 13-р бүлэгт тодорхойлжээ. Энгийнээр хэлэхэд Бурханыг бүх зүрх, сэтгэл, оюун ухаан, хүч чадлаараа хайрлаж, хөршөө өөр шигээ хайрлахыг ариусгалын амьдрал гэнэ (Лук 10:27). Ариун хүмүүсийн Бурхантай бас бусадтай харилцах харилцаа ийм байх ёстой.

Гэм зэмгүй байх

Паул тесалоникчуудын төлөө залбирахдаа Бурхан тэдний зүрхийг ариун чанар дор гэм зэмгүй (1 Тесалоник 3:12-13) байлгаасай хэмээн залбирчээ. Хоёр бүлгийн дараа тэрээр тесалоникчуудыг бүрэн ариусгагдаж, сүнс, сэтгэл, бие тань бүхлээрээ бидний Эзэн Есүс Христийг ирэхэд гэм зэмгүй хэвээр (1 Тесалоник 5:23) байх болтугай хэмээн дахин залбирсан байна. Гэм зэмгүй байх гэдэг нь бүх талаар төгс байна гэсэн үг биш. Итгэгчид алдаж болох хэдий ч, зан чанар ба биеэ авч явах байдлын хувьд гэм зэмгүй байх ёстой юм.

Дотоод хүч

Паул ефесчүүдийн доторх хүнийг Сүнснийхээ хүчээр хүчирхэгжүүлж өгөх болтугай хэмээн (Ефес 3:15-16) залбиралдаа дурджээ. Итгэлээр өсөх тусам дотоод зан чанар хүчирхэг болдог. Зөв сонголт хийж, буруу шийдвэрийг няцааж чадах чадварыг дотоод хүч гэнэ.

Христ бидний дотор нутаглах нь

Паул ефесчүүдийн төлөөх залбирлаа үргэлжлүүлж, Христ тэдний зүрхэнд нутаглах болтугай (Ефес 3:17) гэж хэлсэн байна. Энд дурдсан “нутаглах” гэдэг үг нь хаа нэгтээ түр байх бус харин байнга оршин суух гэсэн утгатай. Есүс бидэн дээр зөвхөн зочлоод зогсохгүй бидэнтэй хамт амьдрахыг хүсдэг. Есүс тогтвортой сүнслэг амьдралаар амьдардаг хүмүүсээс тухтай, нийцтэй байдлыг мэдэрдэг юм.

Бурханы дүүрэл

Паул ефесчүүдийн төлөөх залбирлынхаа хүсэлтийн хэсгийг Бурханы бүх дүүрлээр бялхах болтугай (Ефес 3:14-19) хэмээх үгээр төгсгөжээ. Энэ бол сүнслэг байдлыг илэрхийлэхийн тулд бодит юмсыг ашиглан дүрсэлж буй хэрэг. Бурхан бидний оюун ухаан, хүсэл эрмэлзэл, сэтгэл хөдлөл, үйл хэрэг, хандлага, дур хүсэл, хариу үйлдэл гээд бүх зүйлийг маань бүрэн захирахыг хүсдэг. Бурханлаг бус юм өчүүхэн ч байхгүй, бүрэн дүүрэн бурханлаг байдлыг дүрсэлсэн учраас энэ хэсэг бол Библид дурдсан ариун амьдралын тухай бүх дүрслэлээс хамгийн агуу нь биз ээ. Дараагийн хоёр эшлэлд уг залбирлыг ийнхүү дүгнэжээ.

[1]Эдүгээ, дотор маань ажилладаг хүчний дагуу гуйх буюу бодох бүхнээс минь илүү хэмжээлшгүй бялхлаар үйлдэх чадвартай Түүнд алдар нь чуулган дотор, бүх үеийнхэнд Христ Есүс дотор үеийн үед байх болтугай. Амен. (Ефес 3:20-21).

Энэхүү ерөөл нь Бурхан бидний гуйж, бодож байгаагаас илүү ихийг хийх чадалтай гэдгийг илэрхийлж байна. Паул санхүүгийн элбэг дэлбэг байдлын тухай биш, харин сүнслэг дүүрэн байдлын тухай энд ярьж байна. Бидний дотор ажиллаж, өсөхөд тусалдаг ариун байдал, төлөвшлийн зэргийг бид дутуу үнэлж болохгүй.

Ариун байдал, төлөвшилд ахиж дэвших арга замыг Шинэ гэрээнд заасан байдаг.

Сайн мөс чанараа сахь. Паул Тимотод хандаж, сайн тэмцлээр тэмцэгтүн (Христитгэлээр ялж амьдрахыг хэлж байна) гээд, итгэл, сайн мөс чанараа сахь (1 Тимот 1:18-19)[1] гэж уриалжээ. Паул мөн, “Иймээс би Бурхан ба хүмүүсийн өмнө сайн мөс чанартай байхыг үргэлж хичээдэг билээ” (Үйлс 24:16) хэмээн дурдсан байна. Мөс чанараа сонсох нь биднийг гэмших, хохирлоо барагдуулах, эвлэрэх эсвэл биеэ авч явах байдлаа өөрчлөхөд хүргэж болох юм. Мөс чанар сайтай байна гэдэг нь хүн буруу зүйл хийснээ ухаарах бүртээ гэмшин эргэнэ гэсэн үг.

Өөрийгөө Бурханд зориул. Ром 12:1-д Паулын, “Иймд ах дүү нар аа, Бурханы өрөвч сэтгэлээр та нараас хичээнгүйлэн хүсье. Өөрсдийн биеийг Бурханд тааламжтай, амьд, ариун тахил болгож өргө. Энэ нь та нарын сүнслэг мөргөл мөн” хэмээсэн хүчирхэг ятгалга бий. Ромын чуулганыхан итгэгч болмогцоо өөрсдийгөө Бурханд зориулсан хүмүүс болсон байв. Гэсэн ч Паул тэдэнд хандаж, өөрсдийгөө Бурханд бүр ихээр зориулахыг уриалжээ.

Энэ үеийн явдалд бүү нийц (Ром 12:2). Дэлхийтэй нийцнэ гэдэг нь үл итгэгч нийгмийн үзэл санааг дуурайж, үнэт зүйлсийг нь хүлээн авч, итгэдэггүй хүмүүс шиг авирлаж биеэ авч явахыг хэлнэ. Дэлхийн хүмүүс хувиа хичээсэн зангаа зөвтгөж, махбодын нүгэлт хүслээ гүйцэлдүүлж болох үндэслэлийг гаргаж ирдэг. Итгэгч хүн ийм байдаггүй (2 Коринт 10:3-4).

Оюун санаагаа шинэчил. Паул ромчуудад хандсан ятгалгаа үргэлжлүүлж,

… харин оюун санааныхаа шинэтгэлээр өөрчлөгдөж байгтун! Тэгвэл Бурханы сайн, тааламжит, төгс төгөлдөр таалал юу болохыг таних болно (Ром 12:2) гэсэн байна.

Хүн хэдий чинээ дэлхийлэг хүмүүс шиг бодохоос татгалзаж, Бурханы бодол оюуныг хүлээн авна, төдий чинээ их өөрчлөгддөг.

Гэрлийн дотор яв. Иохан бас “Харин Тэр Өөрөө гэрлийн дотор байдагчлан бид гэрлийн дотор явбал, бид бие биентэйгээ нөхөрлөж, Түүний Хүү Есүсийн цус биднийг бүх нүглээс цэвэрлэдэг ажээ” (1 Иохан 1:7) гэж бичжээ. Гэрэл гэх үг нь үнэнийг дүрслэн илэрхийлсэн үг юм. Тиймээс гэрэлд алхана гэдэг нь үнэнийг үргэлжлүүлэн сурч, дагана гэсэн үг.

Зовлонг итгэлээр тэвч. Петр 1 Петр 5:10-д бичсэн ерөөлийн залбиралдаа шинэчлэгдсэн, хүчтэй, тогтвортой итгэгч байх гайхамшигтай зорилго байгааг зааж өгсөн боловч түүнд хүрэхийн тулд тийм ч таатай биш замыг туулна гэсэн байна. Уг эшлэлд “бүх нигүүлслийн Бурхан Өөрөө, түр зуур зовсны чинь дараа та нарыг төгс болгож, бататгаж, бэхжүүлэн байгуулах болно” (1 Петр 5:10) гэжээ. Зовлон нь бидний хандлагыг ариусгаж, зан төлвийг засдаг. Тиймээс Бурхан биднийг хөгжүүлэхийн тулд зовлон зүдгүүрийг зөвшөөрч байгаа юм. Бид үүнийг хүлээн зөвшөөрч, Бурханы зааж буй зүйлийг сурахаар хичээх ёстой (2 Коринт 12:7-10).

► Итгэлээ шалгах хэсгийг хамгийн багадаа хоёр удаа хамтдаа уншаарай.

Хүн нүглээ гэмшиж, Бурханы нигүүлслээр өөрчлөгдөх үед христитгэлийн ариун байдал эхэлнэ. Итгэгч хүн Бурханы хүслийг таньж, дагах тусмаа сүнсээр өсдөг. Ариусгал бол итгэгчийг цэвэршүүлж, ариун зан чанар, ариун амьдралтай болгож буй Бурханы ажил юм.

(1) Эшлэл унших: Суралцагч тус бүр дараах эшлэлүүдээс нэгийг сонгоно. Дараагийн хичээл эхлэхээс өмнө эшлэлийг уншиж, энэхүү хичээлийн сэдвийн талаар тус эшлэлд юу гэж хэлснийг багцлан бичнэ.

• Исаиа 6:1-8

• Үйлс 2:1-18

• 1 Коринт 10:1-13

• 1 Тесалоник 5:14-24

• Тит 2:11-14

(2) Сорил: Дараагийн хичээлийг 11-р хичээлийн сорилоор эхэлнэ. Сорилд бэлтгэж, асуултыг сайн судлаарай.

(3) Бусдад заах: Ангиас гадуур заах хуваарь гаргаж, тайлагнахаа мартуузай.

(1) Ариун гэх нэр томьёоны утга юу вэ?

(2) Бурханы хувьд ариун байдал гэж ямар утгатай вэ?

(3) Мөргөн хүндэтгэхэд ариун байдал яагаад чухал вэ?

(4) Христитгэлийн ариун байдал хэзээ эхэлдэг вэ?

(5) Гэрэлд алхах гэж ямар утгатай вэ?

(6) Насан туршийн ариусгалын үйл явцын дунд итгэгч хүн ямар болдог вэ?

(7) Удамшсан завхрал гажуудал гэж юу вэ?

(8) Итгэгч хүн яаж Эзэнийг ирэх хүртэл бие, сэтгэл, сүнсээрээ гэм зэмгүй байх вэ?