Ангийн удирдагчийн тэмдэглэл: Энэ хичээлийн эхэнд суралцагчид өмнөх хичээлээр сурсан сайнмэдээ ярих арга туршлагаасаа бие биедээ хуваалцана. Сайнмэдээг сонсогч нь эерэг хариу өгөөгүй байсан ч суралцагч бүр сайнмэдээ хуваалцах чухал зорилгодоо хүрсэн. Тиймээс бие биеэ урамшуулаарай.

Энэ хичээл дээр үзүүлэнд зориулж том цаас, шохойн самбар, цагаан самбар бэлтгээрэй.

Бид үзсэн, сонссоноо та нарт мөн тунхагласнаар та нар бас бидэнтэй нөхөрлөх юм. Үнэхээр бид Эцэг ба Түүний Хүү Есүс Христтэй нөхөрлөнө (1 Иохан 1:3).

► Сайнмэдээ хуваалцах ямар шалтгаан элч нарт өгөгдсөн бэ?

Бурхантай уулзаж, итгэлийн хүн болох, Түүнтэй харилцаж эхлэх нь ямар утга учиртай болохыг бид мэдлээ. Бид Бурхантай холбогдсон бусад хүмүүстэй онцгой харилцаатай болдог. Бид сайнмэдээг үл итгэгчдэд хуваалцахдаа тэднийг ч энэхүү Бурхантай нөхөрлөх нөхөрлөл рүү ирж, Түүнийг мэдээсэй хэмээн урьдаг.

Сайнмэдээний танилцуулга нь суралцагчдад ойлгомжтой, санахад хялбар энгийн зураглалтай байдаг. Танилцуулга хоёр минут явагдах ба хэрвээ сонсогч илүү мэдээлэл авахыг хүсвэл нэмэлт тайлбар, хэлэлцүүлэг багтааж болно.

Та мэргэжлийн зураач байх шаардлагагүй. Зураг энгийн бөгөөд суралцагчдад хялбар, санахуйц хялбаршуулсан зураг байна.

Одоо бид зураг бүрийн үе шат, үүнтэй холбоотой тайлбаруудыг нэг бүрчлэн үзэх болно.

Ангийн удирдагчийн тэмдэглэл: Суралцагчдыг харж байх үед танилцуулгаа үзүүлнэ. Ингэхдээ нэмэлт тайлбарууд оруулах гэж хичээх шаардлагагүй. Учир нь суралцагчдад ойлгоход хялбар, энгийн богино байх хэрэгтэй. Суралцагчид танилцуулгыг эхний удаа үзэхдээ зургийг хуулбарлан зурах шаардлагагүй.

Хоёр дахь удаагаа танилцуулахдаа суралцагчид зургийн үе шат болгоныг ангид харагдахуйцаар таны зурсан шиг том хэмжээтэй зурах ёстой. Танилцуулгадаа нэмэлт тайлбарууд оруулахгүй байхыг хичээгээрэй. Үүний дараа дараагийн хэсгийн өгөгдсөн тайлбаруудыг үргэжлүүлэн судалж, танилцуулгаа эхнээс нь давтаарай.

Хэвлэж болох PDF-ийг эндээс авах боломжтой.

1-р хэсэг

“Бурхан хүнийг Өөртэй нь нөхөрлөж, ерөөгдсөн амьдралаар амьдруулахаар бүтээсэн. Бурхан хүний амьдралыг асуудал, бэрхшээлээр дүүрэн байхаар бүтээгээгүй.”

[“Бурхан” гэж бичээд дараа нь хүнийг зур]

2-р хэсэг

“Нүглээс болж хүн Бурханаас тусгаарлагдсан. Анхны хүн нүгэл үйлдэж түүнээс хойш бүх хүн Бурханы эсрэг нүгэл үйлдсэн.”

[Тусгаарлалт зураад “нүгэл” гэж бичээрэй]

3-р хэсэг

“Бурхан бол шударга Шүүгч бөгөөд үл итгэгчид Бурхантай харилцаа тогтоон, Түүний нигүүлслийг олж авч чадахгүй бол хэзээ нэгэн өдөр мөнхийн тамд үүрд яллагдах болно.”

[Сум зураад “там” гэж бичээрэй]

4-р хэсэг

“Сайн үйлс, чуулганд очих, шашны зан үйл, өглөг гэх мэт зүйлээр бид Бурхан руу болон Түүний нигүүлсэл рүү буцаж чадахгүй ...”

[Жагсаалтад хэлэгдсэн зүйлсийг сумтай хамт зур]

5-р хэсэг

“Хэрвээ Бурхан бидэнд Түүн рүү буцан очих зам гаргаж өгөөгүй бол бидний нөхцөл байдал ямар ч найдваргүй байх байсан. Бид уучлалыг авахын тулд Бурханы Хүү Есүс загалмай дээр тахил золиос болон нас барсан. Есүс гурван өдрийн дараа үхлээс амилсан.”

[Загалмай зур]

6-р хэсэг

“Үүнийг зөвхөн мэдэх нь ч хангалттай биш. Бүх хүн аврагдахын тулд хувьчлан сонголт хийж Бурхан руу эргэх хэрэгтэй. Хүн нүглээс эргэхийг чин сэтгэлээс эрмэлзэж, нүглийнхээ төлөө уучлалыг эрэн, Бурханы өмнө гэмших ёстой. Бурханаас хүсэмжлэн залбирвал гэмшдэг хүн өршөөлийг хүлээн авах боломжтой.

[Сум зураад “гэмших”, “хүлээн авах” гэж бичээрэй]

7-р хэсэг

“Та өөрийгөө энэ зурган дээр хаана байна гэж бодож байна вэ? Нүглээ гэмшин Бурханы өршөөлийг хүлээн авч, Түүний төлөө амьдрахаар шийдсэн онцгой мөч амьдралд тань байна уу, эсвэл одоо хүртэл нүглээсээ болж Бурханаас тусгаарлагдсан хэвээр байна уу?”.

[Хариултыг нь хүлээ. Олон хүн Бурханаас тусгаарлагдсан гэдгээ хүлээн зөвшөөрдөг]

“Та гэмших, уучлалыг хүлээн авах, Бурханы төлөө амьдрах гэсэн энэ алхмыг хийхэд бэлэн байна уу? Яг одоо би тантай залбирах болсондоо баяртай байна.”

[Дараах залбирлын дагуу залбираарай]

“Эзэн минь ээ, би мөнхийн шийтгэлийг хүртэх зохистой нүгэлт хүн гэдгээ мэднэ. Нүглийнхээ төлөө би Таниас уучлалыг эрэн бас нүглээсээ салах хүсэлтэй байна. Би Таниас өршөөл хүсэх зохисгүй боловч Та намайг уучлаач. Есүс, Та миний төлөө амиа өргөсөн, Таны намайг аварсан авралын төлөө би талархаж байна. Одооноос эхлэн би Таны төлөө амьдрах болно.”

1-р хэсэг

Эхлээд сонсогчийн нөхцөлд тохируулан өөрчлөлт хийж болно. “Зовлон, бэрхшээлээр дүүрэн амьдрал” гэхийн оронд сайнмэдээ тараагч сонсогчийн туршлагатай илүү холбоотой тодорхой зүйлийг дурдаж болно.

2-р хэсэг

Хүн нүгэлтэй төдийгүй Бурханаас тусгаарлагдсан гэдгийг сонсогч ойлгох нь чухал. Тэр зөвхөн Адамын нүглийн үр дагавраас болоод ийм нөхцөлд байгаа биш гэдгээ ойлгох хэрэгтэй.

3-р хэсэг

Энэ нь үл итгэгчдийн байгаа ноцтой нөхцөл байдлын талаар харуулдаг.

4-р хэсэг

Сонсогч нь аврал авахын тулд буруу зүйлд итгэх ёсгүй гэдгийг харуулах нь энэ хэсгийн зорилго юм. Мөн сонсогчийн хэрэгцээнд тохируулан өөрчлөлт хийх боломжтой. Сайнмэдээ тараагч нь сонсогчийн итгэж байж болзошгүй зүйлсийг нэрлэхийг хичээгээрэй.

5-р хэсэг

Цагаатгалыг тайлбарлах хамгийн энгийн арга нь “Биднийг уучлахын тулд Есүс загалмай дээр тахил золиос болж үхсэн” гэдгийг хэлэх юм. Сонсогч Бурханы бидэнд өгсөн авралд найдах ёстой гэдгийг ойлгуулах нь энэ хэсгийн зорилго юм.

6-р хэсэг

Сайнмэдээ тараагч нь сонсогчийг шийдвэр гаргах үе рүү хөтлөх мөч. Сонсогч хувьчлан шийдвэр гаргах ёстой гэдгээ ойлгох хэрэгтэй. Тэрээр гэмшлийн талаар зөв тодорхойлолттой байх ёстой ба гэмшил бол олон арван харамсал, уучлаач гэж хэлэхээс илүү зүйл гэдгийг ойлгосон байх ёстой. Уучлал авахын тулд Бурханд хандан залбирах хэрэгтэй гэдгийг тэр хүн мэдэх хэрэгтэй.

7-р хэсэг

Энэ үед сайнмэдээ тараагч нь сонсогчид аврал хэрэгтэй гэдгийг хүлээн зөвшөөрүүлэх гэж оролдох хэрэгтэй. Танилцуулга нь аврагдаагүй хүнд аврагдах хэрэгцээ бий гэдгээ ойлгоход нь чиглэгдсэн байна. Асуулт тавихдаа анхааралтай байна. Олон хүн өдөр бүр уучлал гуйгаад нүглээ үргэлжүүлэн хийсээр амьдарч болно гэж боддог. Уучлагдан, шинэ амьдралаар амьдарч эхлэх онцгой мөчийн тухай асуулт асуугаарай. Тэр хүн итгэлд ирэхээс нааш Бурханаас нүглийнхээ улмаас одоо ч тусгаарлагдсан хэвээр байгаа гэдгээ ухаарах хэрэгтэй. Сайнмэдээ тараагч нь түүний авралын төлөө залбирах хүсэлтэй байгаагаа илэрхийлээрэй.

Хэрвээ сонсогч өөрийнхөө хэрэгцээг ухаарахгүй, эсвэл гэмшилд бэлэн бус байвал сайнмэдээ тараагч түүнийг залбир гэж хүчилж болохгүй. Хэрвээ тэр үнэнээсээ гэмшиж, итгэлд ирээгүй атлаа зүгээр л залбирвал түүнд авралын хуурамч баталгаа бий болох, эсвэл итгэлд ирэх нь түүнд тохиолдохгүй гэж итгэх ч боломжтой. Аль ч тохиолдолд ирээдүйд тэрээр Бурханыг хайх хүсэлгүй болох талтай.

Зургийг хурдан танилцуулж болно. Хэрэв танд сайнмэдээг хуваалцах боломж байгаа бол та энгийнээр “Танд аврагдсан гэдгээ баттай мэдэх арга замыг Библид юу гэж хэлснийг харуулсан зургийг үзүүлэхэд хоёр минут зарцуулж болох уу?” гэж асууж болно. Энэ нь тухайн хүнд та их цаг зарцуулахгүй гэдгийг ойлгуулна. Хэрэв тэр сонирхож, энэ тухай ярихыг хүсэж байвал та илүү их цаг гаргаж болно. Ихэвчлэн хүмүүс зурж байгаа зургийг сонирхдог. Сайнмэдээ тарааж дууссаны дараа ч зураг зурж өгөхийг хүсдэг.

Танилцуулгыг дахин хэд хэдэн удаа үзүүлээрэй. Хэрвээ танилцуулга богинохон байвал суралцагчид хялбархан тогтоож цээжлэх учраас танилцуулгадаа илүү тайлбар нэмэхээс зайлсхий. Хэд хэдэн удаа үзүүлсний дараа, янз бүрийн сурагчид ээлжлэн сайн мэдээний танилцуулгыг бүлэгт толилуулж болох ба энэ үеэр бүлгийн гишүүд тэдэнд нарийн ширийн зүйлийг санахад нь тусална. Дараа нь суралцагчид хоёр хоёроороо болж хуваагдаад, бие биедээ танилцуулгаа үзүүлж дадлага хийнэ.

(1) Сайнмэдээг танилцуулах “Гүүр” зургаар хамгийн багадаа гурван хүнд сайнмэдээ яриарай. Ярилцлага бүр дээрээ тэмдэглэл хөтөлж, дараагийн хичээлийн цагаар ярихад бэлтгээрэй.

(2) Дараагийн хичээлд бэлтгэн, Ром 1-3, 5, 10-р бүлгүүдийг уншиж тунгаагаарай.