Lesson 18: Жижиг бүлгийн гарын авлага

Энэ хичээл нь бусад хичээл шиг ангид суралцахаар зохиогдоогүй болно. Та хичээлийг эхнээс нь заагаад явах ба хэлэлцэх олон сэдэв бий. Энэ хичээлийн хувьд нэгээс олон удаа уулзах шаардлага гарч болно.

Ангийнхан цаашид хийх зүйлийнхээ талаар ярилцах цаг гаргах хэрэгтэй. Сайнмэдээ тараах, дагалдуулах тал дээр нутгийн чуулгануудад хэрхэн тусалж болох талаар хамтдаа төлөвлөгөө гаргах ёстой.

Дэлхий даяар жижиг бүлгийн олон төрлийн үйлчлэл байдаг ба зорилгоосоо хамаарсан янз бүрийн жижиг бүлгүүд бий. Жижиг бүлгүүд нь суралцах, сүнслэг хариуцлага хүлээх, үйлчлэх, залбирах, ямар нэг онцгой төсөл хэрэгжүүлэхээр цугладаг.

Зарим чуулганууд гэрт цуглардаг жижиг бүлгүүдэд хуваагддаг ба бүлгүүд нь жижиг чуулган шиг үйл ажиллагаатай байдаг. Шинэ гэрээний чуулганууд ийм байдлаар ажилладаг байжээ.

Энэ хичээлээр бид жижиг бүлгээр дагалдуулахын үр нөлөөг ярилцах болно.

Жон Веслей (18-р зуун, Их Британи) анхны жижиг бүлгүүдийг зохион байгуулсан хүн биш боловч энэхүү системийг маш үр дүнтэй болгож хөгжүүлсэн юм.

Веслей “нийгэмлэг, анги, бүлэг” гэх мэтээр нэрлэгддэг их бага янз бүрийн хэмжээтэй дагалдагч бэлтгэх системийг хөгжүүлсэн[1] юм. Веслейн арга нь эхэндээ бүрэн систем байгаагүй боловч, аажмаар хэрэгцээг хангаж эхэлжээ. Веслейн үйлчлэлээр христитгэлийг хүлээн авсан хүмүүс урам зориг, зөвлөгөө, залбирал хүсэж байлаа. Тэд дэндүү олон байсан учраас Пүрэв гараг бүр уулзалдахаар тохирсон гэдэг.

Ингээд Веслей ба түүний номлогчдоос сайнмэдээ хүлээн авсан хүмүүс тухайн газартаа итгэгчдийн бүлэг байгуулж, тогтмол цугладаг болов. Гэхдээ цуглаан хэт том учраас олон хүн сүнслэг хэрэгцээнийхээ талаар ярих боломжгүйн зэрэгцээ тэдэнд хангалттай анхаарал хандуулж чаддаггүй байлаа. Иймээс “анги” гэж нэрлэдэг жижиг бүлгүүдийг байгуулж, удирдагчид нь гишүүдээ урамшуулан чиглүүлдэг, пасторын үүргийг гүйцэтгэдэг болжээ. Илэрхий нүгэлтэй, өөрчлөгдөөгүй гишүүнийг гишүүнчлэлээс хасаж, цуглаанд оруулдаггүй байв.

Ангиас жижиг бүлгүүд байгуулагдан, гишүүд нь сүнслэг сорилт бэрхшээлээ хуваалцаж, бие биеийнхээ өмнө сүнслэг хариуцлага хүлээх боломжтой болжээ. Энэхүү жижиг бүтцийг бүлэг (хамтлаг) гэж нэрлэдэг байв. Ийм уулзалт дээр удирдагч өөрийн сүнслэг байдлын талаар ярьж, дараа нь бусдынхаа нөхцөл байдал, нүгэл, уруу татлагын талаар асуудаг. Энэ бүлэгт эрэгтэй, эмэгтэйгээрээ тусдаа уулздаг байжээ.

Веслейн амжилт алдарт Жорж Вайтфийлдийг ийнхүү хэлэхэд хүргэсэн юм. “Веслей ах маань ухаалгаар үйлчилж байсан учраас хүмүүс үйлчлэлийнх нь үеэр сүнсээр сэрж, ангиудад нэгдэн хөдөлмөрийнх нь үр жимс болж байлаа. Харин би үүнийг үл тоомсорлож, миний хүмүүс элсийг олсоор хүлэх мэт байдалтай болжээ.” Веслейн арга барилыг Америкийн Методист чуулган анхандаа хэрэгжүүлж байсан боловч дагалдуулах зарчмууд болон онол сургаалуудыг нь орчин үеийн методистууд ойшоодоггүй.

Хамгийн эртний чуулганы барилга ойролцоогоор НТ 250 онд баригдсан байдаг. Эхний хоёр зуунд чуулган өөрийгөө барилга байгууламж, эсвэл байгууллага биш харин хүмүүс гэж үздэг байв. Чуулган нь хамтдаа мөргөн хүндэтгэж, сайнмэдээ түгээж, Библийг дагадаг итгэгчдийн бүлэг байлаа.

Жижиг бүлгүүд нь үр дүнтэй чуулганыг барьж байгуулах үндсэн орц найрлага юм. Жижиг бүлгээр дагалдуулах ажил нь шинэхэн гарч ирээд хэзээ нэгэн цагт хуучирч оддог хөтөлбөр биш. Түүнчлэн зарим газар ажилладаг, зарим газар ажилладаггүй арга барил ч биш. Харин чуулганыг барьж байгуулах барилгын материал юм. Нутгийн чуулганд тулгардаг бэрхшээлүүдийг шийдэхийн тулд жижиг бүлгүүд янз бүрийн аргаар үйл ажиллагаагаа явуулж болно.

Хүмүүсийг нийт чуулганаар нь эсвэл Ням гарагийн сургалтаас илүүтэйгээр хувьчилсан байдлаар тогтмол сургаж, боловсруулахгүй л бол чуулган зорилгодоо хүрэхгүй.

Болгоомжлол

Жижиг бүлгүүдийн сүнслэг байдал нь хамрагдаж байгаа хүмүүсээсээ хамаарна. Хэрэв тэд Бурханд таалагдах, итгэмжит амьдрал, дагалдагчийн амьдрал зэргийг чухалчлахгүй, мөн чуулганы үүргийг гүйцэлдүүлэхгүй бол бүлэг буруу замаар явдаг.

Сүнслэг хариуцлага хүлээх гэдэг нь өөрийнхөө сүнслэг байдал, сүнслэг сахилга батыг хэрэгжүүлэхэд гарсан амжилт, бүтэлгүйтэл, өсөлт хөгжилтийн төлөө хувь хүн эсвэл хэсэг бүлэг хүнтэй холбоотой байж, тайлагнаж явахыг хэлнэ. Хэрэв та буруу юм хийвэл тэд танд сануулна. Та ямар зориулалт гаргахаа хэлж, тэд таныг хэлсэндээ хүрч байгаа эсэхийг асууна.

Эрүүл харилцаатай христитгэлийн бүлэг дотор сүнслэг үүрэг хариуцлага хүлээх тухай Библийн үндэслэлийг өмнөх хэсэгт нарийн тайлбарласан. Сүнслэг хариуцлага үүрэхгүйгээр бид Библийн тушаалуудыг биелүүлж чадахгүй юм. Улмаар Бурханаас биднийг нигүүлсэхээр өгсөн арга хэрэгслүүдийг үл тоомсорлодог болно.

... бие биенийхээ өмнө нүглээ улайж, бие биенийхээ төлөө залбир. Ингэснээр та нар эдгээгдэх болой. Зөвтийн залбирал үр нөлөөтэй бөгөөд ихийг гүйцэлдүүлж чадна (Иаков 5:16).

Дотно харилцаа үүсээгүй бол хүн хувийн нүглээ тийм амархан улайхгүй. Хэрэв хүн алдаа дутагдлынхаа талаар залбирч, гэмшихгүй бол энэхүү хэрэгцээг хангахаар бүтээсэн Бурханы арга замыг үл тоож байгаа хэрэг юм.

Нэг нэгнийхээ ачаанаас үүрэлц. Тийнхүү Христийн хуулийг хэрэгжүүлэгтүн (Галат 6:2).

Бид хэн нэгнийг сайн мэдэхгүй л бол түүний хамгийн хүнд ачаа юу болохыг ойлгохгүй. Тиймээс харилцаа үүсгэж, бие биеэ мэдэлцэхгүйгээр бид Бичвэрийн тушаалыг биелүүлж чадахгүй.

Хайр болон сайн үйлсийг бадраахын төлөө нэг нэгнээ анхаарч… (Еврей 10:24).

Бид хэнд ямар урам зориг, зэмлэл хэрэгтэйг мэдэхийн тулд бие биеэ хайрын сэтгэлээр шалгаж ажиж байх ёстой. Гэхдээ онцгой харилцаа үүсээгүй л бол урамшуулал нь өнгөц болдог бөгөөд хүн зэмлэлийг хүлээж авахгүй байх талтай.

Дараах асуултууд таны амьдралд сүнслэг хариуцлага байгаа эсэхийг тодорхойлоход тусална.

Миний хүлээн зөвшөөрдөг харилцаа холбоо юу вэ?

• Хүнд ачаагаа үүрэхэд минь туслах хүн байна уу?

• Алдаа нүглээ улайх хэн нэгэн байна уу?

• Хэн нэгний хүнд ачааг би үүрэлцдэг үү?

• Миний одоогийн сүнслэг байдалд дүгнэлт хийх хүн байна уу?

Ийм цаг үеүүд байна уу?

• Түшиж тулах хэн ч байхгүй байна уу?

• Миний нөхцөл байдлыг хэн ч мэдэхгүй байгаад би баяртай байдаг уу?

• Залбирал, Библи судлалын цагаар залбирлын сэдвээ хэлэхээс ичдэг үү?

Сүнслэг үүрэг хариуцлага хүлээх тогтолцоог бий болгохгүй л бол олонх чуулган энэ ажлыг хийж чадахгүй. Харин жижиг бүлгийн систем нь олон хүний хувьд энэ бүхнийг хийж болох газар болдог.

Дагалдагч хүнд юу эрхэм чухал болохыг Есүс зааж өгчээ. Үйлчлэлийнхээ эхэн үеэс чуулганыг удирдан чиглүүлэх үүрэг хариуцлагыг хүлээн авах цөөн хэдэн хүнийг Тэрээр сонгосон юм. Есүс Өөрийг нь дагаж байсан олон мянган хүнд номлохын тулд бүх цагаа зарцуулаагүй, харин үүний оронд 12 элчийг сургахын төлөө цаг гаргадаг байсан. Улмаар сургасан элч нараараа дамжуулан үйлчлэлээ өргөжүүлсэн билээ.

[1]Дагалдуулж байгаа хүмүүс дараах зан чанарыг өөртөө шингээсэн байх учиртай. Бүх талаар гаргууд байх албагүй боловч бүх талаа сайжруулахаар хичээдэг байх ёстой юм. Хэрэв эдгээрийн аль нэг нь доголдвол, гарах сайн үр дүн ч багасах болно.

(1) Сүнслэг төлөвшилтэй

Өмнөх хэсэгт дурдагдсан сүнслэг төлөвшлийн зан чанарууд жижиг бүлгийн удирдагчдад байх ёстой. Хэрэв сүнсний хувьд төлөвшөөгүй бол сайн үлгэр дуурайл үзүүлэхгүй, тийм хүнээс мэдлэг туршлага ч гарахгүй.

(2) Боломжтой

Цагийн хуваарь нь дүүрчихсэн, сайн зохицуулах аргагүй байдаг хүн жижиг бүлэгт үйлчлэх боломжгүй. Тиймээс удирдагч хүн нэн тэргүүнд тавих зүйлээ тодорхой болгох ёстой.

(3) Хариуцлагатай

Жижиг бүлгийн удирдагч амлалтаа биелүүлдэг хүн байх ёстой. Өөрөө цугларалтдаа ирдэг, бусад хүмүүсийн амлалт зориулалтыг санаж байдаг хүн байх учиртай.

(4) Өөртөө итгэлтэй

Тэрээр бүлгээ удирдаж сурна гэдэгтээ итгэлтэй байх ёстой. Хэрэв чадвартай атлаа үүндээ итгэж чадахгүй байвал юуны өмнө өөртөө итгэлтэй байдлаа хөгжүүлэх талаар зарим нэг заавар удирдамжийг авах ёстой.

(5) Зөрчилдөөнийг шийдвэрлэх чадвартай

Хүмүүс санал зөрөлдөж, асуудал гарах үед жижиг бүлгийн удирдагчид зөв хандлагатай байх ёстой. Улмаар бусдын дундах зөрчилдөөнийг шийдвэрлэхэд туслах чадвартай байвал зохино.

(6) Заах чадвартай

Хүмүүс түүний тайлбарлан ярьж байгааг ойлгож байна уу? Удирдагч хүн бусдыг төөрөлдүүлэлгүй ярих ёстой.

(7) Бурханы Үгээр өлсөж цангадаг

Бурханы Үгэнд баярлан баясдаг байх ёстой. Тэгвэл бусдыг мөн үүнд уриалж чадна. Түүнчлэн Бурхантай харилцахдаа Библийг чухалчилдаг байх учиртай.

(8) Бурханаас хамааралтай

Зөвхөн Ариун Сүнсний ажлаар л сүнслэг үр дүн гарна гэдгийг удирдагч хүн ойлгох ёстой. Тиймээс Ариун Сүнстэй хамтран ажиллахад бэлэн байна. Түүнчлэн тэрээр Бурханы тосолгоонд найдах ёстой. Өөрийнх нь чадварын ачаар цуглаан нь амжилттай болно гэж итгэх ёсгүй.

(9) Үйлчлэхэд бэлэн

Бусдад үйлчлэх нь үнэ цэнтэй гэдгийг мэдэрдэг байх ёстой. Харин үйлчлүүлэхийг хүсдэг хүн байж болохгүй. Мөн үйлчлэлийг өөрийнхөө авьяасыг харуулах талбар болгохыг хүсэх ёсгүй. Хэрэгцээ шаардлага гарахад сайн дураар үйлчлэхэд бэлэн байх учиртай.

(10) Сүнслэг эрх мэдлийн дор байдаг

Хэн нэгний өмнө сүнслэг хариуцлага хүлээж, сүнслэг удирдагчийнхаа чиглүүлгийг дагах ёстой юм.

(11) Чуулганд итгэмжтэй

Бүлгийн удирдагч нь нутгийн чуулганы тууштай гишүүн байх ёстой. Дагалдуулах үйлчлэл нь хүмүүст чуулганыг үнэлэх, илүү зориулалт гаргахад нөлөө үзүүлдэг.

(12) Амжилтад тэмүүлдэг

Амжилтад хүрэх хүсэлтэй хүн яаран бууж өгөхгүй. Харин нөхцөл байдалд хурдан дасан зохицно. Илүү үр дүнд хүргэх мэдлэг мэдээллийг эрэлхийлж, асуудал эсвэл боломж гарах үед санаачлага гаргана. Бүлгийн удирдагч эрч хүч, урам зоригтой байх ёстой.

(13) Онол сургаалын алдаагүй

Библи ба сайнмэдээний онол сургаалын сайн суурьтай байх ёстой.

(14) Үйлчлэлд сургагдсан

Үйлчлэлийн сургалтыг заавал академик байгууллага хийх албагүй. Сургалтыг ажиглалтаар эхлүүлж болно. Итгэгч хүн эндээс үйлчлэл хэрхэн явагддагийг хардаг. Хүмүүс оролцоотой байж, удирдамжийн дагуу үүрэг даалгавар авах тусам сургалт сайжирдаг. Уншиж судлах сайн материал үнэхээр чухал.

Дагалдагчийн үүрэг хариуцлага, ач холбогдлыг ойлгодог, эв нэгдэлтэй нутгийн чуулган өөрөө дагалдагч бэлтгэх хамгийн сайн арга зам болдог.

Тиймээс эдгээр удирдамж нь бүлгийн удирдагчид болон зориулалт гаргадаг гишүүдэд зориулагдсан болно.

Хэрэв чуулган дагалдагч бэлтгэх тал дээр ахиц дэвшил гаргах ёстойгоо ухаарвал эхлээд Библийг болон энэхүү дагалдагчийн тухай хичээлийн гол санааг сайн судлах ёстой. Удирдагчид материалуудыг зааж, чуулганы оролцох боломжтой, зориулалт гаргасан гишүүд суралцвал зохино. Ингэснээр тэд алсын хараагаа хуваалцаж чадна.

Чуулган юу хийж байгааг ажиглах нь өсөлтийн хоёр дахь хэсэг юм. Ихэнх чуулганууд жижиг бүлгийн хөтөлбөрийг зориудаар эхлүүлээгүй байсан ч аль хэдийн үйл ажиллагаагаа явуулж буй жижиг бүлгүүдтэй болсон байдаг. Жишээлбэл, чуулган дээр байнга уулзалддаг хөгжимчид гэж бий. Хамтдаа дасгал хийдэг найрал дууныхан ч байдаг. Ахлагчдын зөвлөл, хүүхдийн цуглааны хичээл эсвэл хүүхдийн цуглааны багш нарын бүлэг гэж бий. Чуулганы залуучууд хааяа уулзаж болно. Янз бүрийн үүрэг хариуцлага хүлээсэн зөвлөлүүд байж болно. Төсөл дээр хамтран ажилладаг хүмүүсийн албан бусаар байгуулсан бүлэг, эсвэл хааяа хааяа нөхөрлөх зорилгоор цугладаг чуулганы гэр бүлүүдийн бүлэг ч байдаг. Түүнчлэн гэрээр Библийн хичээл хийдэг бүлэг, залбирлын цуглаанууд ч бий.

Эдгээр бүлгүүд нь дагалдуулах, эсвэл сүнслэг үүрэг хариуцлага хүлээх зорилгоор байгуулагдаагүй байж болох ч, ийм зорилготой үйлчлэлд тусалж болдог. Сүнслэг амьдралтай аливаа чуулганд сүнслэг амьдралыг дэмжих зарим бүлгүүд байнга үйл ажиллагаагаа явуулж байдаг. Хэрэв танай чуулган дагалдагч бэлтгэх хөтөлбөрөө сайжруулахаар шийдсэн бол одоо байгаа бүлгүүдээ судалж, юу болж байгааг олж тодруулаад, дараа нь зорилгодоо яаж илүү сайн хүрч болох талаар бодолцоорой.

Шинэ бүлгүүд байгуулах хэрэгтэй байж ч мэднэ. Олон төрлийн бүлгүүд эхлүүлэх шаардлага ч тулгарч болно. Үйлчлэлийн талаар практик сургалт ордог бүлэг, Библи судлалыг голчилдог, эсвэл залбирдаг бүлэг ч байж болно. Сүнслэг хариуцлагыг чухалд авч үздэг жижиг бүлэг байх ч боломжтой.

Бүлгийн зорилго нь хэнийг хамруулах, бүлэг хэрхэн ажиллах ёстойг тодорхойлдог. Жишээ нь, сүнслэг хариуцлагыг чухалчлах багт арваас цөөн хүн байх ёстой. Хэрэв бүлэг том бол нууцлал багасч, хуваалцах нь гүехэн болж, илүү их хяналт шаардагдах ба хүмүүсийн оролцоо багасч, ирц дордох хандлагатай. Эрэгтэй, эмэгтэй хүмүүс холилдож орсон тохиолдолд хувийн хуваалцах зүйл ч хязгаарлагдмал болдог.

Шинэ гишүүдэд нээлттэй байх эсэхийг бүлгийн зорилго нь тодорхойлно. Хэрэв сүнслэг хариуцлага үүрэлцэх зорилготой бүлэг бол хэдэн удаа цугласаны дараа шинэ гишүүд нэмэхээ болино. Мөн хүмүүс аюулгүй байдлыг мэдрээгүй бол бусад хүмүүст сүнслэг байдлынхаа талаар хуваалцахгүй. Хэрэв цуврал хичээлүүдийг судлах зорилготой бүлэг бол цуврал уулзалтын явцад хүмүүс нэмж оруулж болно.

Шинэ итгэгчдэд зориулсан бүлэг байж болно.[1] Гол нь шинэ хүн энэ бүлэгт элсэхийн тулд хэдэн долоо хоног хүлээхгүй байх нь чухал. Тиймээс энэ бүлэгт шинэ хүмүүс хэзээ ч элсэх боломжтой болгож, хичээл нь дахин давтан заагддаг цуврал байх хэрэгтэй. Зарим шинэ итгэгчид сургалтыг орхино гэдгийг удирдагчид ойлгоорой. Зарим хүмүүс бүлгээсээ гарч байгаа нь бүлгийн үйл ажиллагаа муу байна гэсэн үг биш. Хэдийгээр зарим нь орхиж байсан ч шинэ итгэгчийн бүлэг үргэлж шинэ хүмүүст нээлттэй байх ёстой.

Хэрэв үйлчлэлийн сургалт эсвэл гүн гүнзгий сүнслэг хөгжилд зориулагдсан бүлэг байгуулбал, сүнслэг байдлын хувьд өсөх хүсэлтэй, бүлгийн зорилгодоо тууштай хандахад бэлэн хүмүүсийг бүлгийн гишүүн болгох ёстой. Гишүүдийн зарим нь тууштай ажиллахгүй бол бүлэг зорилгодоо хүрч чадахгүй.

Ихэнх гишүүдийг хувьчилсан байдлаар урьж элсүүлнэ. Хүмүүсийг өөрсдөө нэгдэж ирэхийг хүлээх хэрэггүй.

Чуулганы бүх хүн жижиг бүлгийн хөтөлбөрт хамрагдах албагүй. Хэрэв та чуулганы удирдагч бол хүмүүсийг жижиг бүлэгт ороогүй гэж шүүмжлэх, хөөх ёсгүй. Харин бүлгийн үйлчлэлийн ач тусыг тайлбарлаж сурталчлах ёстой.

Бүлгийн эхний уулзалт дээр хүн бүр тус бүлгийн ач холбогдлыг ойлгож байгаа эсэхийг шалга. Дагалдагч байхын ач холбогдлыг дурдсан Библийн эшлэл, сургаалыг хуваалц.

Ирцээ бүрэн байлгахын тулд зарим жижиг бүлгийг тодорхой хэдэн долоо хоногийн хугацаатай байхаар төлөвлөж болно. Бүлэг тодорхой цуврал хичээлүүдийг үзэх ёстой талаар тайлбарлаж, сургалт хэзээ дуусахыг хэлж байгаарай. Ингэснээр гишүүн бүр ямар зориулалт гаргах ёстойгоо яг таг мэдэх юм. Ийм сургалтад бүрэн ирц чухал гэдгийг онцлоорой. Мэдээж хугацаа дуусахад цааш үргэлжлүүлэх хүсэлтэй хүмүүс дахиад бүлэг эхлүүлж болно.

Андрей итгэгч болоод хэдэн жил болжээ. Тэрээр чуулганы гишүүн бөгөөд чуулгандаа тусалдаг. Чуулганд нь дагалдагч бэлтгэх төлөвлөгөө байхгүй байгаад тэр санаа зовдог. Андрей жижиг бүлэг байгуулъя гэж боддог ч, удирдагчид нь жижиг бүлгүүд байгуулах сонирхолгүй байна.

► Андрей юу хийх ёстой вэ?

Андрей чуулганы удирдагчидтай уулзаж, жижиг бүлгийг удирдах зөвшөөрөл авах хэрэгтэй. Харин чуулганы үйлчлэлийг шүүмжлэлгүйгээр, жижиг бүлэг байгуулбал ирэх ашиг тусыг тайлбарлах нь зөв. Хэрэв бүлэг сайн ажиллавал чуулган ийм төрлийн үйлчлэлийн ач тусыг ойлгож эхэлнэ.

Бүлэг эхлэхэд сэтгэлийн хөөрөл, хүлээлт их. Олон хүн юу хүлээж байгаагаа мэдэхгүй боловч бүлгээс ирэх ач тусад найдаж байдаг. Тиймээс бүлгийг үр дүнтэй ажиллуулах зорилгодоо хүрэхэд танд дараах чиглэлүүд тусална. Жижиг бүлгүүдийн үйл ажиллагаанд чухал зарчмууд гэж бий. Удирдагч бүлгийнхэндээ эдгээр зарчмуудыг дагахад тусалбал бухимдал, урам хугарах явдал бага гарна.

Анхны цуглаанаар бүлэг хэрхэн явагдах талаар ярих учраас бусад цугларалтаас ялгаатай байж болно. Гэхдээ эхний уулзалт нь дараагийн уулзалтуудын хэв маягийг тодорхойлдог. Хэрэв хүн эхний уулзалтад юм ярихгүй байвал ирээдүйд ч чимээгүй байна гэж бодож болно. Харин эхний уулзалт дээр голчилж яриад байгаа хүн цаашид ч голчилж ярих хандлагатай гэсэн үг. Уулзалт эмх замбараагүй болбол цаашдаа ч бас тийм байх магадлалтай. Хэрэв бүлгийн уулзалт оролцоо багатай, анги шиг байвал цаашид ч бас тийм хэв маягтай байна.

Бүлэг нь хүлээлтээс өөр байгаагаас болж зарим гишүүд хэд хэдэн уулзалтын дараа бүлгээс гарч магадгүй. Тиймээс зөв хүлээлттэй, гишүүдийн урмыг хугалахгүйн тулд уулзалтаа зөв явуулах нь чухал.

(1) Боломжтой бол жижиг бүлгээрээ долоо хоног бүр цуглах төлөвлөгөө гарга. Зарим хүнд хүүхэд харах хүн олох шаардлага гарч болно шүү дээ.

(2) Уулзалт нь (а) Библи судлалын цаг, тэгээд (б) хувийн залбирлын хэрэгцээгээ хуваалцах, дараа нь (в) залбирал гэсэн хэсэгтэй байна.

Хэрэв бүлэг судлалд зориулагдсан бол, суралцах хугацаа урт, бусад хэсэг нь богино байж болно. Гэхдээ дээрх гурван хэсгийг заавал оруулах ёстой. Хэрэв сүнслэг үүрэг хариуцлага нь бүлгийн зорилго бол судлалын цаг богино байж болно. Гэхдээ заавал ном материалтай байх ёстой.

Бүлэг цуглаад хувийн асуудлаа хуваалцаж, залбирч байгаа боловч ямар нэг судлах хичээлийн материал байхгүй бол эмх замбараагүй болно. Дээр нь зарим гишүүдийн давамгай оролцоо ихсэх талтай. Тиймээс хичээлийн материалтай байх нь бүлгийнхний оюун санаанд байгаа зүйлээс илүү бодит хариу олоход тусална.

(3) Уулзалтын эхлэх ба дуусах цаг.

Хэрэв уулзалтаа оройтож эхэлж, оройтож дуусгавал цаг заваа эрхэмлэдэг хүмүүс оройтож ирнэ, эсвэл зарим уулзалтыг алгасна.

(4) Жижиг бүлгийн хугацааг товло.

Гишүүд хэр хугацаанд зориулалт гаргахаа мэдэх хэрэгтэй юм. Бүлэг шинэ итгэгчдэд зориулсан, хичээл нь дахин давтагддаг бүлэг биш л бол, хэдэн уулзалтын дараагаас эхлээд шинэ хүн элсүүлэхгүй байх нь зөв. Хэрэв бүлэг цуврал хичээл судалж байгаа бол, хичээлийн тоогоор уулзалтын тоог тогтооно. Хэрэв сүнслэг хариуцлага хүлээх бүлэг бол ядаж 6 сарын хугацаа товлох хэрэгтэй. Цуврал хичээлээ дуусгаад дахин зохион байгуулж ч болно. Хугацаа дуусахад зарим гишүүд гарч, бүлэгт өөр гишүүдийг нэмэх талаар ярилцаж болно.

(5) Суралцахдаа өөрийнхөө төлөө мэдлэг олж авахаас илүүгээр амьдралыг өөрчлөх зорилго тавь.

Суралцаж байхдаа гишүүд хувийн, онцгой хэрэгжүүлэлт гаргаж чадвал, тухайн бүлгийн цугларалт үнэ цэнтэй санагдах болно.

(6) Зориулалтыг нь шалга.

Хэрэв хэн нэг нь асуудал бэрхшээлээ хуваалцаж, тодорхой алхам хийнэ хэмээн зөвшөөрсөн бол дараагийн уулзалт дээр өнөө хүнээс амлалт өгсөн зүйлээ хийсэн эсэхийг нь асуугаарай.

(7) Гишүүн бүртэй хувьчлан уулзаж, сүнслэг удирдамж өгч бай.

Бусад гишүүд ч бас бие биедээ урам зориг өгөхийн тулд цуглаанаас өөр үед уулзалдаж болно.

(8) Уулзалт хийх сайн газар сонго.

Уулзалт хийх газар гэрийнх шиг уур амьсгалтай, албан бус газар байвал зохино. Суудал аль болох дугуй хэлбэртэй байвал гишүүн бүр бусдынхаа царайг харах боломжтой. Ингэж байрлуулах нь бүх хүнд оролцох боломж олгоно. Тасалдуулахгүй, анхаарал сарниулахгүй газар уулзаарай.

(9) Сайн сонсогч байх дадалтай бол.

Сайн сонсогч нь нүдээрээ харилцах, нүүрний хувирал үзүүлэх, анхаарал сарниулах зүйлийг үл тоомсорлох, ярьж буй хүний хошигнол болон бусад сэтгэл хөдлөлд хариу үзүүлэх байдлаар харилцдаг.

(10) Бүх гишүүдийг яриулахыг хичээ.

Юм ярихгүй байгаа хүн байвал шууд асуулт асуугаарай. Жишээ нь: Калеб, та энэ талаар юу гэж бодож байна? гэх мэт.

(11) Хувийн асуудлаа хуваалцахыг бүү шах.

Үүнийхээ оронд чөлөөтэй ярих уур амьсгалыг бүрдүүлээрэй. Нүдээрээ харилцаж, ярьж байгаа зүйлийг нь дэмжих маягаар гишүүддээ итгэлтэй ярих боломж бүрдүүлээрэй.

(12) Өөртөө итгэлтэй болгох асуулт асуу.

Хэрэв хэн нэг нь буруу хариулт хэлбэл шүүмжлэхээсээ өмнө хариултад байгаа ямар нэг сайн талыг дурдаж дэмжээрэй.

(13) Хариулт бүрийг шүүмжлэлгүй, харин ямар нэг байдлаар хүлээн авахыг хичээ.

(14) Хэн нэг нь хэт ярих хандлагатай бол тэр хүнийг хязгаарлах зорилгоор бусдаас нь бүх асуултыг асуу.

Шууд тодорхой хүнд хандаж асуулт асуух нь их ярьдаг хүнийг хязгаарлах арга юм. Эсвэл та “За бусад нь юу гэж бодож байна?” гэж асуусан ч болно. Хэлэлцүүлгийн үеэр “Одоо энэ талаар саналаа хэлээгүй хүний ярихыг сонсоцгооё” гэж хэлж ч болно.

Хэрэв хэн нэг нь хэт их яриад байвал удирдагч тухайн хүнтэй уулзалтын дараа ярилцаж болно. Жишээлбэл ийм маягаар яривал зүгээр. “Калеб аа, та хурдан сэтгэдэг, хэлэлцүүлэгт хурдан хариу өгдөг хүн юм. Гэхдээ бид түрүүлээд хариуг нь хэлчихээд байхаар бусад хүмүүст оролцох боломж гарахгүй байна. Би үүнд санаа зовж байгаа болохоор та бүх хүнийг оролцуулахад надад тусалж болох уу?” гэх мэт.

(15) Бүлгийн хоёр юм уу, гурван гишүүн хороондоо яриад бусдыгаа үл тоох байдал гаргахаас сэргийл.

Хэн нэг нь ямар нэг зүйлийн талаар удаан маргалдах хүсэлтэй байвал тухайн хүнд хандаж уулзалтаас гадуур хэлэлцүүлгээ дуусгах ёстой гэдгийг хэлээрэй.

(16) Бусдын яриаг тасалдуулахыг бүү зөвшөөр.

Яриа тасалдуулагчийг гараа өргөж зогсоогоод, ярьж байгаа хүнийг үргэлжлүүлэн ярих боломж гарга. Эс бөгөөс хэлэлцүүлэг дээр дураараа зантай хүмүүс давамгайлсаар дуусаж мэднэ. Өөртөө итгэл муутай хүмүүс үгээ дуусгаж чадаагүй бол дургүйцэж бухимддаг.

(17) Гомдол гаргагчийг сонс.

Аливаа гомдол нь засах боломжтой асуудлыг хөндсөн байж болно. Хүмүүс сэтгэл дундуур байгаа бол үүнийг тоохгүй орхиж болохгүй. Бүлгийн зорилгыг сайн ойлгоогүй хүн бүлгийн уулзалтад сэтгэл ханамжгүй байж болно. Эсвэл үнэхээр үндэслэлтэй гомдол байж ч болно.

(18) Бүлгийн зорилгыг ойлгоогүй хүн байнга дайсагнасан, үймүүлсэн, маргасан, уйдсан үйлдэл гаргах тал бий.

Магадгүй бүлэг тухайн хүний хүсэж хүлээж байснаас өөр байж болно. Тиймээс тэр хүнд бүлгийнхээ зорилгыг ойлгуулж, ганцаарчлан ярилцаарай.

(19) Удирдагч хүн асуудал болгонд хариу өгөх албагүй.

Удирдагч хүн бүх зүйлд хариу өгөх гэж биш, харин бүлгийнхээ залбирлыг чиглүүлэх зорилгоор үйлчилдэг.

(20) Уулзалт тасалдах үед уян хатан, тэвчээрэй ханд.

Амьдралд тохиолдож байгаа асуудлууд маань биднийг хөгжүүлж буй Бурханы ажлын нэг хэсэг гэдгийг санаарай. Асуудал бол боломж юм.

(21) Уулзалт бүрийг өөрийнхөө хэрэгцээг хуваалцах цаг болгох гэдэг гишүүн байвал тухайн хүнд тусдаа зөвлөгөө өгөх цаг гаргахыг санал болго.

Эс бөгөөс бусад гишүүдэд цагийг нь хумслаад байгаа мэт санагдана. Бүлгийн зорилгыг өөрчлөх тал дээр гишүүд бүгд санал нэгдээгүй л бол бүлгийнхээ зорилгыг алдагдуулж болохгүй.

(22) Хэлэлцүүлгийг хорлох оролдлогыг бүү зөвшөөр.

Жижиг бүлэг нь нутгийн чуулган ба чуулганы удирдагчдыг шүүмжилдэг хэлэлцүүлэг болж болохгүй.

(23) Бүлгийн үр нөлөөтэй байдал үүний дунд ажиллаж байгаа Бурханы хүч чадлаас хамаарна гэдгийг санаарай.

Бичвэрийн дагуух Бурханы ашиглаж буй цорын ганц бүтэц нь жижиг бүлэг юм.