Жоел чуулганыхаа эхний хэдэн жилийн талаар ярих дуртай. “Бид цэцэрлэгт хүрээлэнд уулзаж, харсан бүхнээ л урьж байлаа. Хүйтэн болмогц, бид хуучин автобусанд цугладаг байв. Бидэнд угаалгын өрөө гэж байсангүй. Хожим нь бид спорт зааланд хэсэг хугацаанд уулзаж байгаад дараа нь чуулганы хуучин байрыг түрээсэлсэн."

Жоелын чуулган тэр жилүүдэд өсөж байлаа. Тэр чуулганд үнэнч байсан хүмүүс чуулганы барилгад бус, харин тэрхүү хэсэг бүлэг хүмүүст татагдаж байв.

Энэ хичээл дээр бид чуулганыг хэрхэн төлөвлөх талаар ярина. Мэдээж барилга байшингийн тухай ярихгүй. Тэгээд ч олон том чуулганууд хүнд хэцүү нөхцөлд эхэлсэн түүхтэй байдаг.

Зарим чуулганыхан барилга байгууламж нь хангалтгүй учраас хүмүүсийг татаж чадахгүй байна гэдэг. Гэвч тэдэнд барилгаас илүү чухал зүйл дутагдаж байгаа нь үнэн билээ.

Итгэгчид үргэлж л хүмүүсийг чуулгандаа урьж байдаг. Зочдод нь тэдний чуулган таалагдаж, тэднийг үргэлжлүүлэн ирнэ хэмээн тэд найдна. Түүнчлэн зочид нь сайнмэдээнд хариу өгнө гэдэгт найдаж суудаг.

► Та хэн нэгнийг чуулганд урина гэдэг нь ямар утгатай вэ? Та тэр хүнд юуг санал болгож байгаа хэрэг вэ?

Бид хүмүүсийг шашинлаг дасгал сургуулилтад оролцуулах, эсвэл үүргээ биелүүлэх гэсэндээ чуулгандаа урьдаг юм биш. Итгэл байхгүй бол шашны ёс заншлууд үр нөлөөтэй байна гэж үгүй.

Түүнчлэн хүмүүс Христийг хүлээж аваагүй бол Бурханы хүндэтгэх гэдгийг ойлгоно гэж бид бодохгүй байна.

Харин бид хүмүүсийг чуулганы найрсаг байдалд татагдаж, дахин хамт байхыг хүснэ хэмээн найддаг.

Хүмүүсийг сайнмэдээнд хариулна хэмээн бид найдсаар байдаг.

Зарим чуулган сүнслэг зүйлийг сонирхдоггүй хүмүүсийг татах зорилгоор хөтөлбөр хийдэг. Мэдээж хүмүүст уг хөтөлбөр таалагдвал үргэлжлүүлэн оролцоно гэж найдна. Гэхдээ хөтөлбөр үзүүлбэр амжилттай болбол чуулганд сүнслэг бус сонирхол агуулсан хэсэг бүлэг хүмүүс хөтөлбөрт татагдан ирэх асуудал бий. Ингээд чуулган нь мөргөл хүндэтгэл өргөх сонирхолгүй, харин үзүүлбэр үзэж зугаацах гэсэн хүмүүсийг багтаасан холимог бүлэг болж хувирна. Магтаалын удирдагчид нь хөгжимчид, жүжигчид болно. Яваандаа мөргөл хүндэтгэл өргөх сонирхолгүй мөргөл хүндэтгэлийн удирдагчид бий болно. Улмаар мөргөл хүндэтгэл гажиж эхэлдэг.

► Энэ асуултыг дахин бодож үзээрэй. Та хэн нэгнийг чуулганд урихдаа юу санал болгодог вэ? Та юу санал болгох ёстой вэ?

Хүн Христийг хүлээж авахад ямар өөрчлөлт гардаг тухай бодно уу. Хуучин шашнаа орхиж, магадгүй найз нөхөд, гэр бүлээсээ ч салж болно. Нүглээ гэмшиж, баяр цэнгэл олж чадна гэсэн ихэнх зүйлээ орхидог. Тэгээд амьдралынхаа хяналтыг Бурханы гарт даатгадаг.

[1]Хүн итгэх үед маш том өөрчлөлт болдог учраас нэгдэж байгаа итгэгч хамт олон, орхиж байгаа хуучин зүйлсээ бодолгүйгээр хүн итгэлийн замд орно гэж байхгүй. Хэрэв хүн гэрчлэл эсвэл хэн нэгэн итгэгчид татагдсан бол тухайн итгэгчийн итгэлийн гэр бүлийг харахыг хүсдэг. Итгэл нь үнэхээр хэрхэн амьдруулж байгааг харахыг хүснэ. Түүнчлэн сонсож байгаа сайнмэдээ нь түүний нэгдэх гэж байгаа итгэлийн хамт олныг үүсгэсэн гэдгийг тааварлаж байдаг. Тэрээр “Энэ мэдээнд итгэж, үүгээр амьдардаг хэсэг бүлэг хүмүүс хаана байна? Би тэр хүмүүсийн дунд орвол ямар байх бол?” гэж асууж байгаатай адил юм.

Есүс ихэвчлэн тэнгэрийн хаанчлалын сайнмэдээг номлож байсан. Тэрбээр хүмүүст Бурханы хаанчлал тэдэн дээр ирчихээд байна (Лук 10:9) гэж хэлж байсан. Бурханы хаанчлалд орсон хүмүүс Бурханы захиргааг хүлээн зөвшөөрч, хуулийг нь дагаж, амьдралаа хуваалцдаг. Бурханд үнэнч байдал нь тэднийг итгэлийн хамт олон болгодог.

Хүмүүс сайнмэдээгээр бий болсон итгэлийн хамт олныг харахыг хүсдэг учраас сайнмэдээ нь зөвхөн хувь хүн хувь хүнийг ятгах замаар явагдах боломжгүй. Өөрөөр хэлбэл нутгийн чуулган хэрэгтэй гэсэн үг. Нутгийн чуулган нь итгэлийн хамт олныхоо хувьд бусдыг татдаг байх ёстой.

► Итгэлийн хамт олонтой нэгдэхээсээ өмнө хүн юу харахыг хүсдэг вэ?

Чуулганд Бурханы загварчилсан мөн чанар, Бурханы өгсөн үүрэг даалгавар байдаг. Нутгийн чуулган бүр Бурханы тогтоосон жишгийн дагуу хамгийн сайнаараа байх ёстой. Бид хүмүүсийг татахын тулд чуулганыг өөр ямар нэг газар болгож болохгүй. Бид чуулганыг байх ёстойгоос нь өөр ямар нэг газар мэт харагдуулах гэж оролдох ёсгүй.

Чуулган Бурханы өгсөн үүрэг даалгаврыг биелүүлдэг л бол зөв хүмүүсийг татаж, зориулалт бүхий хамт олныг бий болгоно.

(1) Гишүүд нь Бурхантай харилцах харилцаандаа үнэн голоосоо, сэтгэл хангалуун байгаа эсэхээ харуулж байдаг. Итгэдэггүй хүмүүс Бурхантай харилцаа холбоогүй. Гэхдээ Бурхантай амьдрал ямар байдгийг хараад хүн энэ хэрэгцээгээ мэдэрч эхэлдэг. Чуулганы гишүүд Бурханыг мэдэхийн баяр хөөрийг гэрчилж, тууштай амьдралаараа үүнийг харуулж байдаг. Хэрэв хүн чуулганд явдаг атлаа нүгэл үйлдсээр байгаа бол Бурханд сэтгэл хангалуун бус байгаагаа харуулж буй хэрэг.

(2) Чуулган нь онол сургаалаа үнэн болон Бурхантай харилцах харилцааг үндэслэн зааж сургадаг. Бид онол сургаалыг үнэн учраас номлодог. Зөвхөн үнэн байгаад зогсохгүй, Бурхантай хамт амьдрахыг хүсдэг хүслийнхээ улмаас бид Христийн сургаалаас суралцдаг. Гэрлэлт шиг амлалт дээр холбогдсон Бурхантай харилцах харилцаа маань зориулалт гаргах амлалтыг бас агуулна. Онол сургаал нь хэрхэн амьдрахыг тайлбарладаг юм.

(3) Бурханд мөргөл хүндэтгэл өргөхийн баяр хөөрийг чуулган харуулдаг. Мөргөл хүндэтгэл өргөх баяр хөөр нь зугаа цэнгэлээс таашаал авахаас өөр. Үнэндээ жинхэнэ Бурханыг хүндэлдэггүй хүмүүс Бурханыг мөргөн хүндэтгэхээс ирдэг баяр хөөрийг мэдэрдэггүй. Харин бид мөргөл хүндэтгэл өргөхөөр бүтээгдсэн учраас бидний баяр хөөртэй мөргөл хүндэтгэлийг харсан итгэдэггүй хүн тэрхүү хэрэгцээг мэдрэх болно.

(4) Чуулганы гишүүд өнө мөнхийн хэтийн төлөв бүхий амьдралын зорилгыг харуулдаг. Христийн дагалдагчид өөрсдийнх нь амьдрал хэр чухал байгаа эсэхэд ач холбогдол өгдөггүй. Хүнд хэцүү цагт итгэгчдийн дээр тайтгарал, зоригжуулалт байдаг. Харин итгэдэггүй хүмүүс сэтгэлийг нь хангах амьдралын зорилгыг олохын төлөө тэмцэлддэг бөгөөд үхэл ба үүрд мөнхийг хэрхэн угтахаа мэддэггүй.

(5) Чуулган нь аминч зорилго бус харилцаа чухал гэдгийг харуулдаг. Чуулган нь байгууллагаа босгон байгуулахын тулд зорилго тавин, сайнмэдээ тараадаг газар биш. Дэлхийн хүмүүс харилцааг үл тоомсорлож, эсвэл харилцааг хувиа хичээсэн зорилгодоо ашиглах хүсэлтэй байдаг.

(6) Чуулганы сургаал нь хүний сүнслэг гүн хэрэгцээг хангадаг. Аврагдаагүй хүмүүс сүнслэг өлсгөлөнд автсан байдаг бөгөөд энэ дэлхийн юугаар ч тэр өлсгөлөн дарагдахгүй. Харин чуулганы номлол, сургаал, зөвлөгөө нь хүний жинхэнэ хэрэгцээ рүү чиглэсэн байдаг.

(7) Чуулган бол нэг нэгнээ халамжилдаг итгэлийн гэр бүл юм. Аливаа бүлэг хүмүүс нь гишүүдийнхээ хэрэгцээнд тусалдаг боловч, Христийн дагалдагчид л жинхэнэ христитгэлийн нөхөрлөлийг бий болгож чаддаг.

► Эдгээр шинж чанарыг харуулах ямар ямар онцгой шинж чуулганд байж болох вэ? Чуулган нэн тэргүүнд тавих зүйлсээ сайтар харуулах юу хийж эхлэх ёстой вэ?

Чуулган нь хөтөлбөр, зохион байгуулалтаа сайнмэдээг тараах, дагалдагч бэлтгэх гэсэн үүрэг даалгавраа биелүүлэхэд зориулан төлөвлөх хэрэгтэй. Чуулганы хийж буй бүх үйл ажиллагаа энэхүү тэргүүлэх чиглэлтэй нийцэх ёстой юм.

Зочдыг угтах нь

Чуулган нь зочдыг хүлээн авч, ая тухтай байлгахад бэлтгэх ёстой. Зарим хүнд чуулганы ёс заншил танил бус байдаг. Чуулганд зочлон очих үед юу болох талаар ямар ч мэдлэггүй учраас анх чуулганд ирээд эхний хэдэн минутад ирсэндээ баярлах, эсвэл ирдэггүй байж гэж боддог байна. Тиймээс чуулган шинэ хүмүүсийг хүлээн авах угтагчдыг бэлтгэх ёстой.

Түүнчлэн чуулган ядуусыг хэзээ ч гадуурхаж болохгүй. Чуулганы хүмүүс хувцас хунараараа ядуу хүнийг гадуурхах ёсгүй.

Түүнчлэн чуулганд эцэг эхгүйгээр ирсэн хүүхдүүдэд үйлчлэхэд бэлэн байх хэрэгтэй. Чуулганд ирсэн хүүхдүүдэд санаа тавьж, хариуцах хүмүүсийг чуулган заавал томилдог. Зочдыг асуулт тавьж, ярилцаж болохуйц жижиг бүлэг эсвэл цугларалтад хамруулахаар урьдаг.

Чуулганы гадна байгаа хүмүүст хүрэх нь

Үнэнч гишүүддээ анхаарал халамж тавих нь чуулганы хамгийн эхний үүрэг. Гэсэн хэдий ч чуулган эргэн тойрныхоо хүмүүс рүү үргэлж очдог байх ёстой. Чуулганы гадна байгаа хүмүүс чуулганы үйл ажиллагааг харж, сайнмэдээг сонсож байгаа эсэхийг баталгаажуулах үйл ажиллагааг чуулган заавал зохион байгуулна. Эдгээр үйл ажиллагааны зарим нь аяндаа бий болно. Харин удирдагчид бусад үйл ажиллагааг мөн зохион байгуулах хэрэгтэй юм. Чуулган чадварлаг гишүүдээ урьж, иймэрхүү үйл ажиллагаанд сургах хэрэгтэй.

Түүнчлэн чуулган эргэн тойрныхоо хэрэгцээг хангах арга замыг хайх ёстой юм. Бурханы хайрыг харуулах, Библийн зарчмуудыг танилцуулах нь ямагт хамгийн эрхэм чухал үүрэг байх ёстой.

Жижиг бүлгийн үйлчлэл

Аврагдсан хүн зөвхөн мөргөл хүндэтгэлд л оролцоод явж болохгүй. Харин шинэ хүнийг даруйхан дагалдагч болгох хөтөлбөрүүдэд хамруулах нь зүйтэй. Мэдээж пастортой биечлэн уулзахаас эхэлж болно. Түүнчлэн долоо хоног бүр цугладаг жижиг бүлэгт хамруулахаар урьж болох юм.

Эрүүл чуулганд сүнслэг амьдралыг тогтвортой хангаж байдаг жижиг бүлгүүд бий. Эдгээр бүлэгт гэр чуулган, хүүхдийн цуглаан болон бусад жижиг бүлгүүд багтана. Сүнслэг хариуцлага, амьдралын янз бүрийн өөрчлөлтийг ихэвчлэн жижиг бүлгээрээ хуваалцдаг. Тиймээс чуулганы удирдагч эдгээр жижиг бүлгүүдийг амьд оршиж байгаа эсэх болон эдгээр зорилгын дагуу цуглаж байгаа эсэхийг шалгаж байх ёстой. Хэрэв чуулганы одоогийн бүтэц сүнслэг амьдралыг бий болгож чадахгүй байгаа бол өөрчлөлт хийх шаардлагатай.

Тодорхой гишүүнчлэл

Чуулганы үйлчлэлд оролцож байгаа хүмүүс зориулалт гаргах гэж ямар утгатайг сайтар ойлгосон байвал зохино. Зарим чуулганууд гишүүнчлэлийн зохион байгуулалтгүй гэж хэлдэг ч, аливаа чуулган гишүүдээ мэдэх өөрийн арга замтай байдаг. Чуулганыг бүрдүүлж буй хүмүүс хэн бэ гэдгийг хүмүүс мэдэх ёстой шүү дээ.

Гишүүн хүн ямар зориулалт гаргах хэрэгтэй талаар бүгд мэдэх ёстой. Гишүүн болоход тавигдах шаардлага, үйл явцын талаар тодорхой бичиж хэвлэсэн байвал зохино.

Чуулганд зориулалт гаргахад бэлэн итгэгч чуулганд шуурхай туслах чадвартай байх учиртай. Энэ бол албан тушаал, удирдах үүрэг хариуцлага хүлээлгэнэ гэсэн үг биш. Харин уг итгэгч чуулганы нэг хэсэг гэдгээ мэдрэх нь чухал гэсэн үг.

Шинэ итгэгчтэй даруй холбогдох нь

Дагалдагч болох нь Христийг хүлээн авахаас эхэлнэ. Шинэхэн итгэлд ирсэн хүнд хэд хэдэн яаралтай хэрэгцээ бий. Бурхантай харилцах харилцаа нь дөнгөж эхэлж буй тул, энэхүү харилцаагаа үргэлжлүүлэхийн тулд залбирах, Библи унших талаар суралцах ёстой юм. Мэдээж хуучин найз нөхдөө алдах учраас шинэ найз нөхдийн хүрээлэл хэрэгтэй. Үүнээс гадна шинэ итгэгчид амьдралын хэв маягтай холбоотой олон асуудлаар чиглүүлэг хэрэгтэй байдаг.

Хүн Христийг хүлээн авмагц чуулган тэр хүнийг даруйхан дагалдагч болгох ёстой юм. Даруйхан гэдэг нь дараагийн Ням гараг гэсэн үг биш. Тухайн хүн аврал авахаар гараа өргөсөн учраас тэр хүнтэй ядаж эхний долоо хоногийн өдөр бүр холбоо барих хэн нэгэн итгэгчтэй уулзуулах ёстой. Чуулганы хэд хэдэн хүн шинэ хүнтэй уулзах ёстой. Өөрөөр хэлбэл түүнд тохиолдож байгаа өөрчлөлтүүдийн талаар ярилцаж, асуултад нь хариулж өгөх учиртай.

Түүнчлэн шинэ итгэгчийг асуулт асууж, урам зориг авч болох жижиг бүлэгт урьж болно. Боломжтой бол жижиг бүлгийн цуглаанаас өмнө тус бүлгийн хэд хэдэн хүнтэй танилцуулбал зүгээр. Хэд хэдэн гишүүн урьдчилан холбоо барьж, танилцан, бүлэгтээ угтан аваарай. Ингэснээр шинэ хүн жижиг бүлгийн нэг хэсэг болох мэдрэмж үүсэж эхэлдэг.

Шинэ итгэгч дараагийн уулзалтаас шинэ итгэгчийн бүлэгт хамрагдах ёстой. Энэ бүлгийн хичээлүүдийг давталттайгаар ээлжлэн явуулбал шинэ хүмүүс нэмэгдэж, хамрагдах боломжтой болдог. Ийм маягаар шинэ итгэгчид дэмжих бүлэгт хамрагддаг бөгөөд гишүүд бүх хичээлээ дуусгасны дараа шинэ итгэгчийн ангийг дүүргэдэг.

Хэрэгцээг анхаарах нь

Чуулган цуглааныхаа хүмүүсийн санхүүгийн хэрэгцээг анхаарах ёстой. Ихэнх хэрэгцээг чуулганы удирдагчийн оролцоогүйгээр хүмүүс бие биедээ туслах замаар хангах нь зөв. Хэрэв гишүүдийн олонх нь бусдад туслах үүргээ ухамсарладаггүй бол тухайн чуулган хараахан төлөвшөөгүй байна гэсэн үг.

Үүнээс гадна чуулганы хэрэгцээнүүдэд анхаарал тавьдаг туслагчид (диакон) байх хэрэгтэй. Энэ зорилгоор томилогдсон чуулганы анхны туслагчдын тухай Үйлс номд өгүүлдэг.

Хэрэгцээг анхаарах нь сайнмэдээг тараахад зайлшгүй шаардлагатай юм. Чуулган бол бие биедээ санаа тавьдаг, итгэлийн гэр бүл гэдгээ хүмүүст харуулах учиртай.

Энэ хичээлд дурдагдсан бүх шинж чанарыг агуулсан чуулган байна гээд төсөөлж үзээрэй. Чуулганд очиж, Христийг хүлээн авч, чуулганы гишүүн болох шийдвэр гаргаж буй хүнийг төсөөлье. Энэ бүхэн хэрхэн биеллээ олж байгааг дүрслээрэй.