Lesson 12: Сайнмэдээнд чиглүүлэх нь

► Бид итгэдэггүй хүмүүсийн төлөө залбирах ёстой юу? Итгэдэггүй хүмүүсийн төлөө залбирах тухай Библийн аль хэсэгт өгүүлдэг вэ?

Итгэдэггүй хүмүүсийг итгэлд ирүүлэх залбирлын талаарх эшлэлийг Библиэс олох амаргүй. Гэхдээ сайнмэдээг үр нөлөөтэй тараах тухай маш олон эшлэл Библид байгааг харж болно (2 Тесалоник 3:1, Ефес 6:19, Колоссай 4:4, Үйлс 4:29).

Бид сайнмэдээгээ амжилттай дэлгэрүүлэхийн зэрэгцээ үл итгэгчдийг итгэгч болгохын төлөө залбирах ёстойгоо ч мэддэг. Бүх хүний төлөө залбирна гэдэг нь үл итгэгчид ч бас Христийг хүлээн аваасай гэж залбирна гэсэн үг (1 Тимот 2:1). Бид хүмүүсийг гэмшил рүү уриалах (2 Тимот 2:25), мөн тэрхүү үйлсэд Бурханы тусламжийг гуйх нь зүйтэй.

Чуулган хүчирхэг байх үед сайнмэдээ тараах ажил аяндаа, өөрөө явагддаг байв. Үйлс номд дүрслэгдсэн чуулганы анхны үеийнхэн сайнмэдээг баяр хөөртэй тараадаг байжээ.

► Нэг суралцагч Үйлс 2:46-47–г ангид уншина.

Чуулганы нөхөрлөл маш хүчтэй байсан учраас хүмүүсийг татдаг байсан бололтой. Хэрэв чуулганд шинэ хүн татагдахгүй байвал чуулган доторх нөхөрлөл байх ёстой шигээ тийм хүчтэй биш гэдгийг харуулж байгаа хэрэг.

► Нэг суралцагч Үйлс 5:42–г ангид уншина.

Элч нар болон бусад итгэгчид сайнмэдээ тараах боломжийг үргэлж олж хардаг байлаа. Харин одоо ч зарим чуулганууд сайнмэдээ тараадаггүй бөгөөд хэрхэн эхлэхээ сайн мэдэхгүй сууж байна. Тэд сайнмэдээ тараах боломжийг хэрхэн олж нээхээ мэдэхгүй байгаа юм.

► Нэг суралцагч Үйлс 8:1-4–г ангид уншина.

Хавчлагын улмаас анхны чуулганыхан өөр газар амьдрахаар Йерусалимыг орхин явж байв. Тэд очсон бүх газартаа сайнмэдээг хуваалцдаг байжээ. Тэгэхээр сайнмэдээг хуваалцах нь тэдний христитгэлийн амьдралын нэг хэсэг байсан гэсэн үг.

Та итгэдэггүй хүмүүсийн дэргэд бусад чуулганы талаар маргахаас зайлсхийх ёстой. Сайнмэдээг хуваалцах үедээ бусад чуулгануудыг шүүмжлэхгүй байхыг хичээгээрэй. Итгэдэггүй хүмүүст шашны чанартай маргааныг зөвөөр дүгнэх сүнслэг ойлголт байхгүй шүү дээ. Тэгээд ч дэлхий дээр олон хүн чуулгануудын зөрчлөөс болоод христитгэлд үл итгэх хандлагатай байдаг.

Хэрэв хэн нэгэн хүн онол сургаалын ялгааны талаар асуувал Библийн дагуу хариулт өгөхөөс гадна, гол яриагаа сайнмэдээ рүү чиглүүлэх хэрэгтэй юм. Та зүгээр л “Иймэрхүү асуудлууд чухал боловч аврал авч, Бурхан Эзэнтэй харилцаа холбоотой болох нь хамгийн чухал” гэж хэлээрэй. Хэрэв тэд хэн нэгэн итгэгч, магадгүй хамаатан садан, эсвал пасторынхаа тухай яривал тэдний дагадаг сургаалын талаар шүүмжлэлтэй зүйл хэлэхгүй байсан нь дээр.

Хэрэв танай чуулган яагаад бусад чуулганаас ялгаатай байгааг тайлбарлах шаардлага гарвал “Хүн нүглээ гэмшиж, уучлал хүртэж, Бурханд дуулгавартай амьдрах нь чухал. Манай чуулган үүнийг чухалчилдаг учраас бид бусад чуулганаас өөр байгаа юм” гэж хэлж болно.

Зарим итгэгчид хэцүү асуултаас айгаад сайнмэдээ тараадаггүй. Суралцсаар байх нь сайн хэрэг боловч олонх итгэгчид хэцүү асуултад яаж хариулахаа мэддэггүй. Үнэндээ та бүх асуултын хариуг мэддэг байх албагүй юм.

Хэрэв хэн нэг нь хариулахад бэрх асуулт асуувал “Би энэ асуултын хамгийн сайн хариултыг мэдэхгүй байна. Чуулган дээр үүнд хариулж чадах хүн бий. Гэхдээ би Библид итгэдэг, энэ нь Бурханыг мэдэж, аврагдах хамгийн чухал зүйл гэдэгт итгэдэг. Таныг хэрхэн аврагдаж болохыг би мэднэ” гэж хариулах боломжтой.

Хэрэв хэн нэг нь “Би Библид итгэдэггүй” эсвэл “Би Бурханд итгэдэггүй” гэж хэлж болно. Тэгвэл ийм хариултыг залж болох хоёр өөр чиглэл бий. Нэг бол та тухайн хүнээс үзэл бодлынх нь шалтгааныг асууж, ямар нэг нотлох баримт өгөхийг хичээж болно. Эсвэл та “Та энэ талаар бодож үзсэн учраас ийм дүгнэлтэд хүрсэн байх. Гэхдээ та Библид итгэдэггүй ч ухаалаг хүний хувьд Библийн үндсэн санааг мэдэхийг хүсэж байгаа байх. Би танд үүнийг ярьж болох уу?” гэж хэлээрэй. Ингэснээр та сайнмэдээг маргаан гаргалгүйгээр тарааж чадна. Бурхан хожим нь таны ярьсан мэдээг ашиглаж болно шүү дээ.

Та сайнмэдээ тарааж байхдаа зүгээр л маргахыг хүсдэг хүнтэй тааралдаж болно. Тийм хүнтэй цаг барах хэрэггүй. Хэдийгээр та бүх зүйлийг зөв зүйтэй хэлсэн ч, тэр хүн үнэнийг хүлээж авахгүй байж болох юм. Тиймд сайнмэдээний гол санааг хуваалцаад, өөр хүн рүү явсан нь дээр.

► Нэг суралцагч Тит 1:9-11–г ангид уншина. Сайнмэдээг хамгаалах шалтгаануудын талаар эдгээр эшлэлд юу өгүүлж байна вэ?

Христийн үнэнийг энэ дэлхийн гүн ухааны үзэл ойлголтоос хамгаалж сурах нь пасторын эзэмших чадваруудын нэг юм. Энд өөр өөр чуулганы ялгаатай онол сургаалыг бус, харин сайнмэдээг эсэргүүцдэг энэ дэлхийн эсэргүүцлийн талаар хэлж байна.

Бид өөдөөс маргаж буй хүнийг итгэгч болгоод зогсохгүй, тэр хүний нөлөөнд орсон хүмүүст туслахын тулд сайнмэдээг хамгаалж ярьдаг. Ер нь олон хүн юунд итгэхээ хараахан шийдээгүй байдаг. Тэд Христийн үнэнийг хамгаалсан үгсийг сонсох хэрэгтэй.

Ихэнх итгэгчид энэ төрлийн маргаанд бүрэн бэлтгэгдээгүй байдаг. Гэхдээ итгэгч бүр чадах чинээгээрээ суралцах ёстой юм. Мэдээж зарим нь үүнд авьяастай, ийм ажилд бэлтгэгдсэн байдаг.

Мэтгэлцэх үедээ зорилгоо харуулах нь чухал. Та тэмцээнд ялах гэж байгаа, эсвэл тэр хүнтэй хувийн дайсан мэт тулалдах гэж байгаа хэрэг бус. Харин хүмүүст санаа тавьдаг учраас үнэн таны хувьд маш чухал гэдгийг харуулах хэрэгтэй. Хэрэв тэр хүн сайнмэдээнд итгэхгүй бол сүнс нь мөхнө. Тиймээс та тэр хүний бодлыг өөрчлөхийг хүсээд байгаа юм. Та түүнд “Та Бурханыг мэдэж, аврагдаасай” эсвэл “Таныг Бурханы үнэнд хүргэхгүй ямар нэг зүйлд итгэх вий хэмээн би айж байна” гэх мэтээр хэлж болно.

Сайнмэдээ тараах онцгой боломж олдсон элчийн тухай өгүүлсэн нэгэн хэсэг Библид бий.

► Нэг суралцагч Үйлс 8:26-39–г ангид уншина. Өөр нэг суралцагч уг үйл явдлыг дүгнэн ярина уу. Энэ үйл явдалд Ариун Сүнс ямар үүрэгтэй оролцсон бэ? Филип сайнмэдээ тараах боломжийг хэрхэн таньсан бэ?

Сайнмэдээг тунхаглах боломжийг олж харсан хүний өөр нэг жишээ бол Есүс Өөрөө юм.

► Нэг суралцагч Иохан 4:7-14–г ангид уншина. Өөр нэг суралцагч уг үйл явдлыг тоймлон ярина уу.

Есүс самари эмэгтэй хоёрын дундах энэ яриа нь угсаатны мөргөлдөөн, шашны маргаан, амьдралын энгийн үүргүүдийн талаарх сэдвийг хөндсөн яриа байлаа. Есүс эдгээр сэдэвт тийм ч их цаг зарцуулалгүйгээр яриагаа тухайн эмэгтэйн сүнслэг хэрэгцээ рүү чиглүүлсэн байна.

Та сайнмэдээний танилцуулгыг хийх аргад суралцсаны дараа үүнийгээ хүмүүстэй хуваалцах боломжийг эрэн хайх болно. Хааяа сайнмэдээг сонсох хүсэлтэй хүн гарч ирж болох хэдий ч, ихэнхдээ боломж тийм тодорхой харагдахгүй.

Хүмүүс огт сонирхохгүй учраас сайнмэдээг хуваалцах хэцүү гэж зарим итгэгчид боддог. Мөн шашны тухай яриа үүсгэх амаргүй гэж тэд үздэг.

Сайнмэдээ нь хүмүүсийн санааг зовоодог олон асуудлыг хөнддөг учраас сайнмэдээг яриандаа оруулж ирэх нь тийм ч хэцүү зүйл биш.

Энэхүү хичээлээр бид хүмүүс яагаад сайнмэдээг сонирхдог шалтгааныг ярих болно.

Авралын мэдээнд хариу өгөхдөө хүмүүс янз бүрийн сэдэл агуулж болох юм. Заримдаа буруу сэдэл агуулсан байж болох ч ихэнх нь зөв сэдэлтэй байдаг.

► Сайнмэдээг хүлээн авах таны сэдэл юу байсан бэ? Хэд хэдэн суралцагч яагаад сайнмэдээг хүлээн авах болсон шалтгаанаа тайлбарлана.

Хүмүүсийг аврал авахыг хүсэхэд хүргэдэг янз бүрийн шалтгааныг энд дурдъя.

• Тамд биш тэнгэрийн улсад очих (эсвэл шүүлтээс айх)

• Амьдралдаа сэтгэл хангалуун, зорилготой болох

• Аюулгүй байдал, сэтгэлийн амар амгалан, айдсаас ангид байх

• Уучлагдах, ичгүүрээс чөлөөлөгдөх эрх чөлөө (мөс чанараа цэвэрлэх)

• Сүнслэг тал дээр цэвэр, бүрэн бүтэн байх

• Бурхантай харилцаатай байх (Бурханыг мэдэх)

• Христийн дагалдагчидтай нөхөрлөх

• Сүнслэг хүслээ хангах (жинхэнэ аз жаргалыг олох)

• Нүглээс чөлөөлөгдөх

• Үнэнийг мэдэх

Энэ бүхэн Бурхантай эвлэрэхийн ашиг тус бөгөөд энэ дэлхийн санаа зовнилтой зөрчилдөж байдаг мөнхийн үнэ цэн юм. Хэрэв хүн Бурханаас тусгаарлагдвал эдгээрээр дутагдах болно.

► Энэ жагсаалтыг хараад аль нь танд чухал байгааг анзаарна уу. Итгэгч болохоос тань өмнө эдгээрийн аль нь таныг татаж байсан бэ? Итгэгч болсны дараа аль нь танд чухал болсон бэ?

Ярилцаж байх үед авралын эдгээр ач тусын аль нэгийг хүртэх хэрэгтэй байгаагаа итгэдэггүй хүмүүс илэрхийлж болно. Сайнмэдээ тараагч нь тэр хэрэгцээ рүү анхаарч, сайнмэдээ тараах арга барилаа өөрчилж болох юм. “Хүмүүс Бурханаас тусгаарлагдсан учраас тэдэнд ______ байдаггүй юм. Харин Библид Бурхантай хэрхэн холбоо харилцаа тогтоох талаар өгүүлдэг” гэж хэлж болно.

Христэд итгэхийг хүсэж буй ямар ч хүнд бид энэ дэлхийн аз жаргалыг амлах ёсгүй. Дэлхийн аз жаргалыг амлах нь сонсож буй хүнийг төөрөгдүүлж, нүглээ гэмшихгүй амьдрахад хүргэж болно. Тэгвэл авралын жинхэнэ үр шимийг хүртэж чадахгүйд хүрэх магадлалтай. Дэлхийн аз жаргалыг амлаж болохгүй бас нэг шалтгаан бол Библи итгэгчдэд сайн сайхан нөхцөл байдлыг амладаггүй, харин хавчлагын талаар урьдаас сануулсан байдаг (2 Тимот 3:12).

Хүн гэм буруугаа ухамсарлаж, айсуй шүүлтийг ойлгох нь Христийн дагалдагч болох хамгийн чухал шалтгаан юм. Харин тухайн хүн Бурханаас тусгаарлагдсан байгааг ойлгуулахын тулд дээрх жагсаалтыг ашиглаж болно.

► Сайнмэдээ тараах боломжийг олж авахын тулд та хэрхэн яриа өдөж байсан бэ?

► Сайнмэдээ хуваалцах боломж олох нь танд хэцүү санагдаж байсан уу? Шалтгаан нь юу гэж бодож байна?

Заримдаа боломж их амархан ирнэ. Тийм тохиолдолд та сайнмэдээг зүгээр л тайлбарлаж эхэлдэг. Хэрэв Библийн эшлэлүүдийг үзүүлэхийг хүсвэл “Христэд итгэгч болохын тулд яах ёстой талаар Библи дээр юу гэж бичсэн байгааг би танд хэдхэн минутад үзүүлж болох уу?” гэж асууж болно. Магадгүй гүүрээр тайлбарласан дүрслэл бүхий зураг үзүүлэх бол “Хүн аврагдсан гэдгээ баттай мэдэж болох Библийн арга замыг харуулсан зургийг би танд үзүүлбэл та хоёрхон минут гаргаж чадах уу?” гэж асууж ч болох юм.

Янз бүрийн сэдвээр яриа өрнүүлэх үед сайнмэдээ ярих оршил тавигддаг. Сайнмэдээний оршил гэдэг нь дээр өгүүлсэн шиг “Гүүр” зурагт дүрслэл, эсвэл “Ромын зам” зэрэг Бичвэрийн сайнмэдээний танилцуулгыг хэлж байгаа юм.

► Хүнд хэцүү амьдралынхаа талаар гомдоллох хүмүүстэй хэр олон таарч байсан бэ?

Заримдаа хүмүүс хүнд хэцүү амьдралынхаа талаар ярьдаг. “Амьдрал яагаад ийм хэцүү байдаг вэ?” гэж тэднээс асуугаарай. Тэднийг хариу өгсний дараа “Амьдрал яагаад ийм хэцүү байдгийг дүрслэн харуулсан зураг үзүүлж болох уу?” гэж асуу. Бурхан хүмүүсийг Өөртэй нь харилцаж амьдраасай гэж хүсдэг болохоос ийм хэцүү амьдрал туулаг гэж хүсдэггүй. Харин нүглийн улмаас дэлхий дээрх бүх юм доголдож орвонгоороо эргэсэн” гэж хэлээд цааш зурагт дүрслэлээ үзүүлээрэй.

“Ромын зам” зэрэг Бичвэрийн сайнмэдээний танилцуулгыг ашиглах бол “Бүх хүн нүгэл үйлдсэн учраас амьдрал хүнд байдаг гэж Библид хэлж байна. Нүгэл манай дэлхийд хараалыг авчирсан” гэж хэлээд үргэлжлүүлэн “Ромын зам” танилцуулгаа үзүүлж болно.

Хэрэв шашин шүтлэгтэй хүн мэт санагдвал, та тэр хүнээс хамгийн чухал итгэл үнэмшил юу болох талаар асуугаарай. Эсвэл “Хүн тэнгэрийн улсад очно гэдгээ мэдэж болох ямар арга байдаг вэ” гэж асууж болно. Тухайн хүний хариултыг сонссоны дараа “Хүн хэрхэн тэнгэрийн улсад очиж болох талаар Библид хэлснийг танд зургаар үзүүлбэл та хоёр минут гаргаж чадах уу?” гэж асууж болох юм.

► Хүмүүс дэлхий дахины хурцадмал байдал, улс орны хүнд хэцүү асуудлын талаар яриа дэлгэж байхыг та үзсэн үү? Тийм нөхцлийг сайнмэдээ дамжуулах боломж болгон хэрхэн ашиглах вэ?

Хэрэв хүн улс үндэстний асуудал, дэлхийн өлсгөлөн ядуурал, дайн дажингийн тухай асуувал “Дэлхий яагаад ийм болсон шалтгааныг тайлбарласан Библийн эшлэлүүдийг танд үзүүлж болох уу? гэж хэлээрэй.

Хүмүүс Бурханаас тусгаарлагдсан учраас дэлхийн нөхцөл байдал ийм болсныг харуул. Гэхдээ аврал энэ бүх асуудал бэрхшээлийг даруй төгсгөнө гэх ойлголтыг өгч болохгүй. Харин хувь хүний аврал нь Бурханы шийдлийг авчирдаг гэдгийг хэлээрэй. Хэзээ нэгэн цагт шинэ тэнгэр шинэ газар бий болж, Бурхантай эвлэрсэн хүмүүсийн хувьд одоо энэ дэлхийд байгаа эдгээр асуудлууд дахиж үгүй болно гэдгийг хэлж өгөөрэй.

Сайнмэдээ рүү хөтлөх асуултуудыг ашиглавал сайнмэдээ ярих боломж нээгддэг.

Хамгийн амархан асуулт бол “Та Христэд итгэгч үү?” гэх асуулт юм. Энэ асуултад хүмүүс нэг их гомдоод байдаггүй. Хэрэв хүн “Үгүй” гэж хариулбал та “Библид хүн яаж Христэд итгэгч болдог талаар юу гэж хэлснийг танд ярьж болох уу?” гэж асууж болох юм.

Хэрэв “Тийм” гэж хариулбал та “Үнэхээр сайн хэрэг. Та яаж итгэгч болсон бэ?” гэж асууж болно. Хэрэв хариулт буруу эсвэл тухайн хүн будилсан мэт санагдвал, та тухайн хүний хэрхэн Христэд итгэгч болох талаар Библид юу гэж хэлдгийг тайлбарлахыг санал болгож болно.

Дээр дурдсан асуултуудыг ашиглан яриагаа өөр сэдэв рүү чиглүүлэх асуулт болгон ашиглаж болно. Энд өөр хэд хэдэн асуултуудыг орууллаа.

“Таны бодлоор амьдралын зорилго юу вэ?” гэж асуугаад ярилцагч хүндээ саналаа хэлэх боломж олго. Түүний хэлсэн үгийн сайн талуудтай санал нийлээрэй. Тэгээд “Бидний амьдралын хамгийн гол зорилго нь Бурханыг мэдэх явдал юм. Бурхан биднийг Өөртэй нь харилцаатай байхаар бүтээсэн. Бурхантай харилцаа тогтоох талаар Библид юу гэж бичигдсэнийг би танд ярьж өгч болох уу?” гэж асууж болно.

“Таны бодлоор аз жаргалын түлхүүр юу вэ?” гэж асуугаад тэд юу ч гэсэн хэлсэн бай, та “Үүнийг олж авсан хүмүүс тийм ч удаан аз жаргалтай байдаггүй бололтой. Библи бидэнд баяр хөөр Бурханаас ирдэг гэж хэлдэг (Дуулал 16:11). Би танд хүн хэрхэн Бурхантай харилцаа тогтоож болохыг харуулсан зураг үзүүлж болох уу?” гэж хэлээрэй.

“Та үхлийн дараах амьдралд итгэдэг үү? Та үүнийг ямар гэж бодож байна?” гэж асуугаад “Хүн бүр диваажинд эсвэл тамд очно гэж Библи хэлсэн байна. Би танд диваажинд яаж хүрэх талаар Библид юу гэж бичсэнийг үзүүлж болох уу?” гэж асуугаарай. Мөн “Та Библийн үндсэн санаа нь юу гэдгийг мэдэх үү?” гэж асуувал энэ нь танд 9-р хичээл дээр үзсэн зургийг тухайн хүнд харуулах боломжийг олгоно.

► Эдгээрийн аль нэгтэй нь адил аргыг хэрэглэж үзсэн үү? Хэр үр дүнтэй байсан бэ?

Энэхүү хичээлд тайлбарласан аргууд суралцагч бүрийн нөхцөл байдалд нийцэх албагүй юм. Ямар нэгэн арга бүх соёлд зохимжтой байж чадахгүй ч байж болно.

Суралцагчдад сайнмэдээ тараах өөрсдийн арга барилаа хөгжүүлэхэд туслах нь энэхүү хичээлийн гол зорилго билээ.

Дараагийн хичээлээр сайнмэдээний товхимлуудыг тараах тухай үзнэ. Суралцагчид зарим товхимлыг хаанаас авах талаар мэдэх хэрэгтэй. Боломжтой бол дараагийн хичээлд сайнмэдээний товхимлоо бэлдэж ирээрэй.

Энэ долоо хоногт ч сайнмэдээ үргэлжлүүлэн тараахдаа та дээрх чиглүүлэх асуултуудыг турших юм уу, өөрийн гэсэн асуултуудыг боловсруулаарай. Хэр үр дүнтэй байгааг ажиглаж, үүнийгээ бичиж тэмдэглэ. Дараагийн хичээл дээр туршлагаасаа хуваалцахад бэлтгээрэй.