Lesson 3: Сайнмэдээ тараах яаралтай хэрэгцээ

► Хүн сайнмэдээг сонсохгүйгээр зөвтгөгдөх боломжтой юу? Сайнмэдээ тараах ажил зайлшгүй хэрэгтэй юу?

Бичвэрт Израилтай ч, чуулгантай ч холбогдохгүйгээр Бурханы нигүүлслийг хүлээн авсан хүмүүсийн жишээг дурдсан байдаг. Мосегоос өмнө, мөн Бичвэрийн хуудас бичигдэхээс ч өмнө Иов хэмээх зөв шударга, бузар мууг эсэргүүцэж амьдарсан хүн байлаа. Балаам Бурхантай харилцаатай байж, транс байдалд орохгүйгээр Бурханаас мэдээ хүлээн авдаг үзмэрч гэдгээр нь хүмүүс мэддэг байв. “Энэ газарт Бурханаас айж эмээнэ гэж байхгүй тул” (Эхлэл 20:11) хэмээн бодсон Абрахамаас ч илүү Абимелехийн үйлдэл зөв байсан. Ром 1:21-32 эшлэлд гажуудаж завхарсан харь үндэстнүүдийг дүрсэлдэг. Энэ нь тэд Бурханыг хэзээ ч мэдээгүй учраас биш, харин тэд мэддэг зүйлээсээ татгалзсан учраас тийм байв.[1]

“ЭЗЭНий андлал Өөрөөс нь эмээгчидтэй хамт байдаг. Тэр тэдэнд гэрээгээ мэдүүлнэ” (Дуулал 25:14). Гэрээ нь Бурханы хүнтэй харилцах харилцааны нөхцлүүд юм. Нэгэнт хүн бүр нүгэл үйлддэг учраас гэрээ нь нигүүлслийг хангахыг шаарддаг. Хэрэв хүн Бурханыг бүрэн эмээн хүндэлдэг бол Бурхан түүнд Өөртэйгээ харилцах замыг зааж өгөх болно.

Библид Есүсээс өөр аврах нэр байхгүй гэж хэлдэг (Үйлс 4:12). Гэсэн хэдий ч Хуучин гэрээний цаг үед аврагдсан хүмүүс Есүсийн нэрийг мэддэггүй байв. Тэд золин аврах, уучлах Бурханы амлалтад итгэсэн бөгөөд Бурхан үүнийг Есүсээр дамжуулан өгдөг. Үүний нэгэн адил, Есүсийн нэрийг хараахан сонсож амжаагүй хүмүүс Есүсээр дамжуулан өгдөг авралын төлөө Бурханд итгэж найдаж болох юм.

Тэгвэл аврал өөр ямар ч нэрээр ирэх боломжгүй гэдэг нь юу гэсэн үг вэ? Энэ нь авралын өөр арга зам байхгүй гэсэн утгатай. Хүнийг золин авах өөр ямар нэг авралын төлөвлөгөө байхгүй. Энэ нь мөн Есүсийн тухай мэддэг хүн Түүнээс татгалзах ёсгүй болохыг хэлж байна. Учир нь Түүнийг үгүйсгэх нь авралаас татгалзаж буй, түүнчлэн авралын өөр арга замыг хайж байна гэсэн санаа юм.

“Ертөнцөд ирж хүн бүрийг гэгээрүүлдэг жинхэнэ гэрэл байв” (Иохан 1:9). Ариун Сүнс Есүсийн тухай сонсоогүй хүмүүст ч Түүний гэрлийг авчирдаг.

Олон хүмүүс сайнмэдээг дамжуулах элчгүйгээр тэднийг Бурханы өмнө авчрах үзэгдэл болон онцгой илчлэлийг хүлээн авсан байдаг. Жишээлбэл, орчин цагт олон муслимчууд Бурханаас мэдээ хүлээн авсны дараа итгэлд ирж байна.

► Сайнмэдээг бүрэн ойлгохоосоо өмнө Бурхантай тусгай байдлаар холбогдож байсан хүний талаар та сонсож байсан уу?

[2]Тэгэхээр элчээр дамжуулан сайнмэдээг сонсохгүйгээр хүн Бурханыг олж, тэр ч байтугай аврагдах боломжтой гэдгийг бид харж байна. Гэсэн хэдий ч, Библид сайнмэдээг хүн бүрийн даруй яаралтай сонсох ёстой мэдээ болохыг онцолж бичсэн байдаг.

Ром ном сайнмэдээний яаралтай байдлыг дүрсэлдэг. Элч Паул сайнмэдээ бол авралын төлөөх Бурханы хүч мөн (Ром 1:16) гэжээ. Мөн тэрээр хүн бүрд сайнмэдээг хүргэхийн тулд өөрийгөө өртэй гэж хэлсэн (Ром 1:14). Биднийг уучилна гэсэн Бурханы амлалтад итгэснээрээ бид Бурханы өмнө зөвтгөгддөг хэмээх үнэнийг тэр заасан юм (Ром 3:26, Ром 5:1).

Тэгээд Паул энэхүү яаралтай байдлын талаар “Тэгвэл Түүнд итгээгүй тэд яаж Түүнийг дуудах вэ? Түүнийг сонсоогүй тэд яаж Түүнд итгэх вэ? Тэд тунхаглагчидгүйгээр яаж сонсох вэ?” хэмээжээ (Ром 10:14). Тэр цааш нь “итгэл нь сонсохоос, сонсох нь Христийн үгээр ирдэг” (Ром 10:17) гэж хэлсэн. Сонсогчдын дотор авралын итгэлийг бий болгохын тулд Бурхан сайнмэдээг ашигладаг. Сайнмэдээг номлох нь алдагдсан хүмүүсийг аврах Бурханы ердийн арга хэрэгсэл юм.

Хэрэв хүмүүс элчгүйгээр аврагдаж чадах юм бол элч яагаад тийм чухал байна вэ?

Энэ асуултад илгээлтийн эзэн Стив Хайт:

Энгийн хариулт бол хүмүүс гэрлийг харахдаа түүнээс татгалзсан. Иохан 1:9-д хүн бүрд гэрлийг өгдөг жинхэнэ гэрэл бол Есүс юм гэжээ. Паул, бүтээл нь Бурханыг таниулсан (Ром 1:19-20) бөгөөд тэд Бурханыг мэдсэн атлаа Бурхан гэж Түүнийг алдаршуулсангүй (Ром 1:21). Иохан үүний талаар “тэрхүү яллалт ийм билээ... гэрэл ертөнцөд ирэхэд тэд харанхуйг гэрлээс илүү хайрласан юм” (Иохан 3:19) хэмээн дүгнэсэн байдаг. Хүний гажуудаж завхарсан зүрх сэтгэл харанхуйг илүүд үздэг. Үүний заль мэх, цагаандаа гарсан ёс бус байдлын улмаас нүгэлт зүрх сэтгэл нь Бурханаас эргэж нүүр буруулдаг (Иеремиа 17:9).

Тиймээс илгээлтийн эзэд гэрлийг дахин гартаа өргөх ёстой! Хоёр дахь боломжийг олгодог Бурхан харанхуйгаас гэрэлд хүмүүсийг авчрахын тулд сайнмэдээний бамбартайгаар Өөрийн элчин сайд нарыг илгээдэг (Үйлс 26:18).

Есүс дагалдагч нараа сайнмэдээг тунхаглуулахаар илгээхдээ, хэрэв аль нэг хот тэдний мэдээг хүлээж авахгүй бол хотоос гарахдаа хөлийнхөө тоосыг сэгсрэх хэрэгтэй гэж хэлсэн байдаг. Тэр тоос нь шүүлтийн өдөр тэдний эсрэг гэрч болно хэмээн айлджээ. Тэрхүү хөлийн тоос нь сайнмэдээний элч тэдний хотод очсоны нотолгоо юм. Сайнмэдээнээс татгалзагч хүмүүс үүнийг хэзээ ч сонсож байгаагүй хүмүүсээс долоон дор шүүлтийг амсах болно. Тэд Содомын хүмүүсийн шүүлтээс илүү хатуу шүүгдэнэ хэмээн Есүс айлдсан. Энэ нь сайнмэдээ үүнийг сонсдог хүмүүст асар их ашиг тус авчирдаг гэдгийг бидэнд хэлж байна (Марк 6:11).

Пастор Эрик Химелик “Илгээлтийн эзэд яагаад хэрэгтэй вэ?” гэсэн асуултад:

Сайнмэдээ нь харилцаагаар дамжин хамгийн үр дүнтэй хүрдэг учраас бид илгээлтийн эздийг илгээдэг. Сайнмэдээний үнэн бол Бурханы талаарх эзэн биегүй баримтуудын цуглуулга юм уу, хаа нэг сонирхдог шашны итгэл үнэмшлийн хайрцаг биш. Энэ нь Есүс Христ хэмээх бодгаль дотор биеллээ олсон юм. Илгээлтийн эзэд бол Христийн төлөө, Түүний сургаал ба эвлэрлийн үйлчлэлийн төлөөх (2 Коринт 5:20) элчин сайд нар билээ.

Сайнмэдээ нь шууд, харилцаагаар дамжин хүрэхгүй л бол ихэнх хүмүүс алдагдах болно. Тийм учраас илгээлтийн эзэд хэрэгтэй. Хүмүүс бидний идэвхигүй, үйлдэлгүй байдлаас болж алдагдаж байгаа гэдэгт бид итгэхийг хүсдэггүй. Харин Ром 10:13-15-д “Тэд тунхаглагчидгүйгээр яаж сонсох вэ?” гэж бичигджээ. Харамсалтай нь тэд сонсох боломжгүй юм. Илгээлтийн эздийг илгээж, дэмжих нь зайлшгүй хийх зүйл мөн. Биднийг дуудсан ажлаа Бурхан бидний төлөө хийнэ гэж найдах нь шийдэл биш юм. Бурхан бидэнд Агуу захирамжийг өгсөн. Хэнд ихийг өгнө, түүнээс ихийг шаардах болно. Бид Бурханы нигүүлслийн хариуд болон Бурхан Өөрийн агуу зүрх сэтгэл рүү хүмүүсийг татах ажлаа хийсээр байгаа гэдэгт итгэлтэй байж, илгээлтийн эздийг илгээдэг.

[1]Сайнмэдээ нь алдагдсан хүмүүсийг аврахын тулд Бурханы бүтээсэн үр дүнтэй арга хэрэгсэл юм. Хүнийг ч аврах Бурханы хүч мөн (Ром 1:16). “Хэрэв хүн сайнмэдээг сонсохгүйгээр аврагдах боломжтой юм бол бид яагаад илгээлтийн эздийг илгээх ёстой гэж? гэсэн асуултыг дахин авч үзье. Үүнтэй төстэй зарим асуултуудыг ч асуух нь зөв юм. Хэрэв хүн миний залбиралгүйгээр аврагдах боломжтой бол би яагаад түүний төлөө залбирах ёстой гэж? Хэрэв хүн сайнмэдээг нэгээс олон удаа сонсохгүйгээр аврагдах боломжтой бол бид яагаад түүнд дахин хэлэх ёстой гэж? Хэрэв хүн чуулгангүйгээр аврагдах боломжтой юм бол бид яагаад чуулгантай байх ёстой гэж? Эдгээрийн хариулт нь мэдээж, “Тийм ээ, тухайн хүн аврагдах боломжтой, гэхдээ энэ нь маш бага тохиолдоно.” Эдгээр нь хүмүүсийг аврахын тулд Бурханы бүтээсэн арга хэрэгсэл юм.

Бурханы Үг бол үл итгэгчдийг Бурханд авчрахын тулд Ариун Сүнсний ашигладаг багаж зэмсэг юм. Хүмүүс Бурханы Үгээр дахин төрдөг хэмээн Библид хүртэл бичсэн байдаг (1 Петр 1:23, 25).

Сайнмэдээг сонсолгүйгээр аврагдсан бараг ямар ч хүнтэй илгээлтийн эзэд таардаггүй. Бурхан зөв сэтгэлтэй хүнийг сайнмэдээгүйгээр ч аврах болно гэж үзэх нь Түүний шударга зөв байдлыг харуулж болох ч, энэ нь Түүний бүтээсэн энгийн арга замыг үл тоомсорлох бидний хандлагыг зөвтгөхгүй. Ер нь бол сайнмэдээг сонсдоггүй хүмүүс алдагдах болно. “Учир нь би сайнмэдээг эс тунхаглаваас золгүй еэ!” (1 Коринт 9:16).

► Нэг суралцагч Матай 9:35-38-ыг ангид уншина.

Есүс хүмүүсийн хэрэгцээг харахдаа маш ихээр энэрч өрөвддөг байсан. Тэрээр номлож заахдаа ч, эмчилж анагаахдаа ч завгүй нэгэн байсан.

Есүс хүмүүсийн сүнслэг хэрэгцээнд хамгийн их анхаарал тавьдаг байв. Хүмүүс гэмшиж, Бурханыг мэдээсэй хэмээн Тэр хүсэж байсан. Энэхүү эшлэлээс Есүс цугласан олныг хараад, тэдний сүнслэг хэрэгцээний төлөө асар ихээр өр нь өвдөж байсныг бид уншиж байна. Тэр тэднийг хоньчингүй хонь мэт байхыг харжээ. Мөн Тэрээр ургац хураалтыг үйлчлэлтэй зүйрлэж, ажилчид цөөн байгаад харамсаж байлаа.

Улмаар Есүс дагалдагчиддаа залбирахыг сануулсан. Бурхан ажилчдыг ургац хураалтад илгээхийн төлөө залбирахыг Тэрээр хүсжээ.

► Есүс дагалдагч нартаа яагаад энэ залбирлаар залбирахыг хэлсэн бэ? Бид залбирсан ч бай, үгүй ч бай Бурхан үүнийг хийхийг лавтайяа хүсдэг, тийм биш гэж үү?

Бурханаас ажилчдыг илгээхийн төлөө залбирах нь Бурханы хүслийн дагуух залбирал юм. Үүний улмаас Бурхан бидний залбиралд хариулна гэдгийг бид мэддэг.

Итгэгч хүмүүс энэ залбирлаар залбирах өөр нэг шалтгаан бий. Есүс дагалдагч нараа Түүн шиг өр нимгэн сэтгэлтэй байж, сайнмэдээг түгээх үүрэг даалгаврыг нь хуваалцахыг хүссэн. Хэрэв тэд энэ залбирлаар байнга залбирвал ургац хураалтын талаар маш их санаа тавьж эхлэх байв. Ингэснээр тэд энэхүү ажилд оролцохыг хүсэж, бусдыг ятгаж чадна.

Бид Есүсийн санаа тавьдаг байсан зүйлд санаа тавих учиртай. Түүний дагалдагч нараасаа асуусан залбирлаар бид залбирах үед энэ нь бидэнд ч үр нөлөөг авчрах юм.

Илгээлтийн эзэд баг болон шоронд номлохоор явцгаажээ. Тэнд олон мянган хоригдол хоригдож байсан бөгөөд ихэнх нь алуурчид, террористууд байв. Илгээлтийн эзэд гадаа бэлтгэсэн тавцан дээр номлож байлаа. Тэрхүү тавцангийн эргэн тойронд илгээлтийн эздийг хамгаалахын тулд буутай харуулууд зогсдог байв. Сайнмэдээний номлолын төгсгөлд номлогч хоригдлуудаас хэн нэг нь урагшаа гарч ирэн Шинэ гэрээг авмаар байна уу гэж асууж. 30 хүн урд гарч ирэв.

Хэдэн долоо хоногийн дараа илгээлтийн эзэд тус шоронд дахин очив. Цуглааны өмнө харгалзагчдын ахлагч тэдэнд хандан, Шинэ гэрээг авсан 30 хүн бусад хоригдлуудын гарт алагдсан гэж хэлжээ. Илгээлтийн эзэд сайнмэдээг дахин номлоод төгсгөлд нь урд гарч ирсэн хүн бүрд Шинэ гэрээ өгөхийг дахин санал болгов. Энэ удаа 300 хүн урагш гарч ирэв. Тэд өмнө нь 30 эрчүүд сайнмэдээг хүлээн авсныхаа төлөө амиа алдсан гэдгийг мэдэж байсан ч сайнмэдээ тэдний хувьд үнэ цэнтэй байсан тул амь насаа эрсдэлд оруулахад бэлэн байв. Тэд сонссон номлол сургаалынхаа үнэ цэнийг сайтар ухамсарлажээ.

(1) Дараах хоёр асуултад хэдэн өгүүлбэрээр хариулж бичнэ үү. Сайнмэдээг хэзээ ч сонсоогүй хүнд аврагдах боломж бий юу? Бид яагаад илгээлтийн эзэд болон сайнмэдээг тунхаглагчдыг илгээх ёстой вэ?

(2) Иона номыг уншина уу. Сайнмэдээг дамжуулах нэгэн яаралтай хэрэгцээтэй байгааг анзаарч байна уу? Энэхүү түүхэнд Бурхан юунд санаа тавьж байна вэ? Иона юунд санаа тавьсан бэ? Өөрийн ажиглалтуудаа 1-2 хуудаст багтаан бичнэ үү.