Lesson 8: Есүсийн арга барил

► Нэг суралцагч Матай 19:16-22-ыг ангид уншина. Тэр залууд өгсөн Есүсийн хариултаас чамд юу нь гайхалтай санагдаж байна вэ? Хэрэв таны найз хэрхэн мөнх амьтай болох талаар асуусан хүний асуултад Есүсийн адил хариулт өгсөн бол, та найздаа юу тайлбарлахыг хүсэх байсан бэ?

Та өөрийгөө үнэхээр эрүүл чийрэг гэж боддог нэгэн. Харин нэгэн найз чинь ирээд чиний аминд хүрэх аюултай өвчнийг эдгээх эм чамд авчирлаа гэж бодъё. [1] Тэрээр энэ эмийг чамд зориулан худалдан авахын тулд орон гэрээ мөн өөрийнхөө гэсэн бүхнээ худалдлаа гэж хэлэв.

► Энэ бэлгийг хүлээн авах үедээ та найздаа юу хэлэх вэ?

Түүний өгөөмөр сэтгэлийг талархан хүлээн авах боловч, бэлэг ямар учиртай болохыг ойлгохгүй байж болох юм. Яагаад тэр надад хэрэггүй зүйлийг худалдан авахын тулд өөрт байгаа бүхнээ золиослох болов?

Одоо өөр нэгэн түүхийг төсөөлөөд үз дээ. Та эмчид хандсанаар удахгүй үхэх өвчин туссан гэдгээ мэджээ. Эмчилгээний хөлс асар их үнэтэй учир төлөх ямарч боломж байсангүй. Чи гэртээ харихдаа үхлийн тухай бодон гэр бүлээсээ хагацахаа, амьдралаас найдаж байсан бүхнээ хэзээ ч авахгүй болсноо ухаарна.

Найз чинь тантай уулзаад өөрт байгаа бүхнээрээ таныг эдгээх эм авсан тухай хэлжээ. Танд амьдрал бэлэглэх хамгийн чухал зүйл өгсөнд нь та талархах буй за.

Сайнмэдээг сонсоод хүмүүс ямар хариу үйлдэл үзүүлдэг тухай бодоорой. “Gospel” гэдэг үг нь “сайн мэдээ” гэсэн утгатай. Олон хүн сайнмэдээний утга учрыг ойлгодоггүй.

Жейсон гэдэг хүний тухай төсөөлье. Түүний найз “Чиний нүглийг уучлахын тулд тахил болж Есүс загалмай дээр нас барсан” гэж түүнд хэлжээ.

Жейсон бодохдоо “Би бол муу хүн биш. Би гэр бүл болон найз нөхдөдөө сайн ханддаг. Яагаад миний нүглийн төлөө ийм их хэмжээний золиос хэрэгтэй гэж? Уучлал яагаад чухал гэж?” Магадгүй өөрийг нь уучлахын төлөө Есүс амиа өргөх хэмжээний тийм олиггүй нүгэлтэн гэж найз нь Жейсоныг боддог юм байна хэмээн дургүйцэж ч болох юм.

Загалмай бол хүмүүсийн хувьд мунхаглал гэж Библи хэлдэг. Хүмүүс өөрсдийгөө зөвтгөх арга эрэлхийлдэг бөгөөд Есүсийн өргөсөн тахил тэдэнд хэрэгтэй гэж боддоггүй. Тэдэнд загалмай нь тэнэглэл мэт санагддаг (1 Коринт 1:18).

Аюулт өвчнийг эдгээх эмчилгээ, эмтэй адил яагаад загалмай тэдэнд хэрэгтэй гэдгийг ойлгодоггүй учраас тэд тааламжтай хандахгүй байгаа юм.

Сайнмэдээнд хүмүүсийг бэлтгэх Библийн дагуух арга зам нь тэдэнд яагаад сайнмэдээ хэрэгтэй гэдгийг мэдүүлдэг. Тэд Бурханаар шүүгдэх гэм буруутай гэдгээ ойлгох хэрэгтэй.

► Хүмүүс яагаад сайнмэдээг сонсоод баярлах ёстой вэ?

Үл итгэгчдэд сайнмэдээг дуулгах хамгийн гол шалтгаан нь тэд цөм шүүгдэж, шийтгүүлнэ гэдэг баримт юм.

Хүн ганц удаа үхэж, дараа нь шүүгдэхээр товлогдсон… (Еврей 9:27).

Би та нарт хэлье. Бодлогогүй хэлсэн үг бүрийнхээ төлөө хүмүүс шүүлтийн өдөр тайлагнах болно (Матай 12:36).

► Илчлэл 20:12-15-д шүүлтийг хэрхэн дүрсэлснийг уншина уу.

Үл итгэгчдийг шүүх ирээдүйн шүүлт нь үл итгэгч хүн бүрд аврал хэрэгтэй байдгийн гол шалтгаан юм.

Бурхан хүн бүрийг гэмших хэрэгтэй гэж тушаасан тул “ертөнцийг шударгаар шүүх өдрөө Тэр тогтоосон агаад… ” (Үйлс 17:30-31) гэжээ.

Хэрэв хүн өөрийнхөө нүглийн ноцтой гэдгийг ухаарахгүй бол авралыг хүсэх чухал шалтгаангүй болно.

► Нүгэл ноцтой гэдгийг хүнд яаж ойлгуулах вэ?

Өөрсдийн нүглээ ухамсарладаггүй учраас хүмүүс сайнмэдээг ойшоодоггүй. Библид хүмүүс өөрсдийгөө ямагт сайн гэж үздэг талаар дурдсан (Сургаалт үгс 20:6) байна. Хэрвээ хүмүүсээс энэ талаар асуувал тэд сайн байсан ч, үгүй байсан ч “тиймээ би сайн” гээд маргахад бэлэн байдаг. Дийлэнх хүн өөрсдийнхөө нүглийг хорон муу зүйл биш гээд өөрсдийгөө зөвтгөгдөх эрхтэй гэж үздэг. Эдгээр хүмүүст нүглийн уучлал, нигүүлсэл гэдэг утгагүй зүйл юм.

Бурханы нигүүлсэл өөрт нь хэрэгтэй гэдгээ ухаарахын өмнө би бол нүгэлтэн, би нүглийн шийтгэлээ хүртэх ёстой хүн гэдгээ ухаарах ёстой. Бурхан нүглийг илчлэхийн тулд хуулийг өгчээ.

Хууль гэсэн нэр томъёогоор сүмд мөргөл хүндэтгэл өргөх Хуучин гэрээний ёслолын онцгой шаардлагууд юм уу, эсвэл бид өнөөдөр дагаж мөрдөх шаардлагагүй Израилын засаг захиргаатай холбоотой хууль дүрмийг энд бид яриагүй. Харин Бурханы зөвт байдлын хэм хэмжээний тухай ярьж байна. Давид хаан Дуулал 119-д Бурханыг хайрладаг шигээ Бурханы хуулийг хичнээн их хайрладаг гэдгээ бичсэн байна. Учир нь ариун байдал бол Бурханы зан чанар юм.

Бурханы хууль бид хэрхэн амьдрах ёстойг болон бид хуулийг дагахгүй бол Түүний өмнө гэм буруутай гэдгийг заадаг. Хэн ч хуулийг сахиснаар зөвтгөгдөхгүй (Галат 2:16, Ром 3:20). Учир нь бүх хүн нүгэл үйлдсэн. Хэрвээ хуулийг сахиснаар аврагдана гэж үзвэл та хуулийг буруугаар ойлгож байна.

Бурханы хууль бидний амьдралыг чиглүүлдэг (1 Коринт 9:21) болохоос энэ нь аврах арга зам биш. Хүн төрсөн цагаасаа хуулийн шаардлаганд төгс нийцэхгүй учраас хуулиар аврагдах боломжгүй (Ром 8:3, Галат 3:21).

Хууль нь Бурханы төлөвлөгөө, сайнмэдээний эсрэг байдаггүй. Библид хууль нь үл итгэгчдэд аврал хэрэгтэй гэдгийг ойлгуулах зорилготой гэж бичигджээ. Сайнмэдээ нь хуулийг хүчингүй болгохгүй (Матай 5:17) мөн биднээс хамааралгүй болгохгүй. Хууль нь сайнмэдээний төлөөх төгс бэлтгэл бөгөөд зөвхөн Хуучин гэрээнд төдийгүй одоо ч тийм хэвээрээ юм.

Хууль нь Христ рүү биднийг удирддаг багш юм (Галат 3:24). Зарим хүмүүс хуулийн цаг үе төгсгөл болсон, одоо бол нигүүлслийн цаг үе гэж боддог. Хүн нигүүлслийг ухаарахаас өмнө Бурханы хуультай нүүр тулж, түүгээр буруутгагдана гэдгээ ойлгох ёстой. Элч Паул “Гэхдээ хуулиар биш бол би нүглийг мэдэхгүй байхсан” (Ром 7:7) гэжээ.

Хууль нь хүнийг нүгэлтэйг гэдгийг харуулахын тулд өгөгдсөн бөгөөд шалтаг байхгүй юм гэж Паул хэлжээ. Хүмүүс хуулиар дамжуулан өөрсдийнхөө нүгэлтэй гэдгийг мэддэг (Ром 3:19-20). Хүн бүр аврагдах хүртлээ хуулийн дор байж, хуулиар буруутгагдана.

Нүгэл нь ноцтой гэдгээ ухаараагүй хүний хувьд сайнмэдээ нь сайнмэдээ биш. Харин өөрийгөө Бурханы шүүлтийн өмнө зогсох гэм буруутай гэж ухаарагч хүний хувьд сайнмэдээ нь үнэхээр сайн мэдээ юм.

► Нэг суралцагч Лук 18:10-14-ийг ангид уншина. Хэрэв хэн нэг нь фарисай хүнд Бурханы нигүүлслээр чөлөөтэй уучлагдах боломжтой гэж хэлсэн гэж бодъё. Тэр фарисай ямар хариулт өгөх байсан бол?

[1]Өнөө үед олон эвангелийнхэн хүн бүр нүгэлтэй, хүн бүр Бурханы өмнө шүүгдэнэ гэж хэлэх дургүй болжээ.

Хүмүүсийг муу гэж хэлэхийг тэд хүсдэггүй.

Тэд сөрөг зүйлийн оронд эерэг зүйлс ярихыг хүсдэг.

Тэд энэ дэлхийн зүйлсийг анхаардаг хүмүүст хандан ярьдаг учраас мөнх авралаас даруйхан ирэх ашиг тусыг ярихаас биш, мөнхийн ашиг тусын талаар ярихаа больжээ.

Тэд Бурханы хуулийг сайн зүйл биш, харин авралын дайсан, үйлсээр аврагдахыг хүсдэг хүмүүсийн хувьд л чухал гэж хэлдэг. Гэтэл Библид хууль сайн бөгөөд ариун (Ром 7:12-14); Бурханы тааллыг хайдаг хүмүүс нь Бурханы удирдамжийг амьдралынхаа туршид даган мөрдөхийг хичээдэг (Дуулал 119:1-8) гэсэн байна.

Бурханы хэмжүүр нь бидний хувьд биелүүлэх боломжгүй, учир шалтгаангүй зүйл бөгөөд бид нүглийнхээ төлөө өөрийгөө буруутгах хэрэггүй гэж тэд хэлдэг.

Гэтэл хүн үнэхээр гэм буруугүй бол үнэнээсээ гэмшиж чадахгүй шүү дээ. Тэр буруу зүйл хийсэн гэдгээ мэдэхгүй бол хийсэн зүйлийнхээ төлөө харамсахгүй. Хэрвээ хүн өршөөл хүсэх үедээ өөрийгөө үнэхээр гэм буруутай гэж хүлээн зөвшөөрөхгүй байгаа бол зүгээр л алдаа гаргасныхаа төлөө Бурханаар хүлээн зөвшөөрүүлэхийг оролдож буй хэрэг юм.

Үл итгэгчид төрөхдөө нүгэлт мөн чанартай төрснийхөө төлөө буруутгагдахгүй, харин Бурханы эсрэг тэрслүү хандлага, санаатай нүглүүдийнхээ улмаас шүүгдэнэ (Иуда 15).

Бурхан бол хайр, өршөөлийн Бурхан гэж олон хүн итгэдэг. Гэхдээ Бурхан шударга шүүгч гэдгийг тэд мартчихдаг. Хэзээ нэг өдөр Бурхантай уулзвал, гэмшээгүй байсан ч Бурхан өөрсдийг нь өршөөнө гэж санадаг. Хагас дутуу ойлгож сонссон сайнмэдээ нь тэдэнд нүглээ илүү тухтай үргэлжлүүлэх хөшүүрэг болдог.

Орчин үед олон эвангелийнхэн хэрвээ та итгэвэл амьдрал чинь өмнөхөөсөө илүү аз жаргалтай байх болно гэж онцолдог болжээ. Нүгэлдээ сэтгэл ханадаггүй мөртлөө Бурханд хангалуун байгаа гэж тэд хэлдэг. Хүн хайр, амар тайван, баяр хөөрийг амсах болно, хүн бүрийн төлөөх гайхалтай төлөвлөгөө Бурханд бий, хэрвээ та Түүнийг дагавал тэр төлөвлөгөө амьдралд тань биеллээ олно гэх мэтээр ярьцгаадаг.

Эдгээр амлалтууд буруугаар ойлгогдож болох юм. Бурхан хайр, амар тайвныг өгдөг боловч итгэгчид болон Бурханыг эсэргүүцэгчдийн хооронд зөрчилдөөн үүсч болно (Матай 10:34-36). Бурхан баяр хөөр өгдөг гэхдээ хавчлага ч үүнтэй зэрэгцэн өгөгдөж болох юм (1 Тесалоник 1:6). Түүнд хүн бүрд зориулсан гайхалтай төлөвлөгөө байдаг ч зарим хүн хүнд хэцүү зовлон бэрхшээлийг туулж ч болох юм (2 Коринт 11:24-27). Хэрвээ хэн нэгэн Түүнд итгэхдээ амьдралын минь нөхцөл байдал өмнөхөөсөө сайжирна гэж бодсон бол магадгүй тэр сэтгэлээр унаж ч болно. Христэд итгээд зарим хүмүүс хатуу ширүүн зовлон дундуур туучдаг.

Христийн дагалдагчийн хувьд бид хэцүү бэрхийг тууллаа ч Бурхантай хамт амьдрах нь гайхалтай гэдгийг ойлгох хэрэгтэй. Бурханд үйлчлэх нь гайхалтай амьдрал гэж бид хэлдэг. Хэдий тийм боловч ихэнх үл итгэгчдэд гайхалтай амьдрал гэгч яг юу болох талаар зөв ойлголт байдаггүй. Хэрвээ та тэднээс гайхамшигтай амьдралыг төсөөлөөд хэлээч гэвэл тэд эд хөрөнгө, мөнгө, эрх чөлөө, амар тайван бусад сайн сайхан зүйлсүүдийг хэлэх байх. Тэд Христийн дагалдагчдын өртсөн хавчлага, дарамт нь гайхалтай амьдрал байдаг гэж ойлгохгүй. Тиймээс та үл итгэгч хүнд Христийг дагавал гайхалтай амьдрах болно гэвэл магадгүй тэр таны юу амлаж байгааг ойлгохгүй байх.

Өөр нэг асуудал бол сайнмэдээны талаарх буруу ойлголт юм. Өөрийгөө шийтгүүлэх нүгэлтэн гэж ойлгоогүй хүн сайнмэдээг хүлээн авах боломжтой. Нүгэл нь маш ноцтой гэдгийг ухаараагүй учраас тэр хүн үнэнээсээ гэмшдэггүй. Тийм хүний хувьд нүглээс чөлөөлөгдөх авралыг бус өөр төрлийн ашгийг эрж хайдаг. Тэр өөрийгөө аврагдсан гэж бодож болох ч үнэндээ аврагдаагүй юм.

Иймэрхүү хүмүүс жинхэнээсээ итгээгүй байдаг учраас авралын ашиг тусыг амьдралдаа хүртэхгүй. Тиймээс богино хугацаанд итгэлээр амьдраад урам хугарч бууж өгдөг.

Хуурамч сайнмэдээний хамгийн муу үр дагавар нь тухайн хүн урам хугарахаас гадна ирээдүйд сайнмэдээг бараг дахиж хүлээн авдаггүй.

Илүү сайхан амьдрал амладаг сайнмэдээний асуудлыг дүгнэж хэлбэл:

1. Бурхан амлаагүй зүйлсийг амладаг.

2. Үл итгэгчдэд буруу ойлголт өгдөг.

3. Сонссон хүн нь жинхэнээсээ итгээгүй байдаг.

4. Хүсэн хүлээсэн ашиг тусаа хүртдэггүй.

5. Ирээдүйд сайнмэдээг хүлээн авах магадлал тун бага.

► Нэг суралцагч Үйлс 14:21-23-ыг ангид уншина. Элч нар шинэ итгэгчдэд юуг туулна гэж хэлсэн бэ?

Есүс Христэд итгэсэн итгэлийн чинь улмаас та нарыг хүмүүс үзэн ядах болно мөн төгсгөл хүртэл тэвчихгүй бол аврагдахгүй гэж дагалдагч нартаа анхааруулсан бөгөөд үүнийг сайнмэдээний гурван бичээч тэмдэглэн үлдээжээ (Матай 10:22, Марк 13:13, Лук 21:17). Тиймдээ ч Христийн арван нэгэн дагалдагч алагдсан түүхтэй.

Сая сая Христэд итгэгчид итгэлийнхээ улмаас амиа алдсаар байна. Энэ нь зөвхөн эрт үед л хамаатай асуудал биш. Итгэлийнхээ төлөө амиа алдсан Христэд итгэгчдийн тал хувь нь 20-р зуунд тохиожээ.

Хэрвээ хүн амар амгалангийн төлөө бус авралын амлалтаас болоод христитгэлийг хүлээж авсан бол хүнд хэцүү амьдралд бууж өгөхгүй. Тэрээр мөнхийн авралын төлөө сорилт бэрхшээлийг тэвчихэд бэлэн байна. Сорилт бэрхшээл нь авралыг илүү үнэ цэнтэй болгодог.

► Христийн дагалдагчид яагаад сорилтыг тэвчдэг вэ?

► Нэг суралцагч 2 Тимот 2:24-26-г ангид уншина. Сайнмэдээг тунхаглагч хүний хандлагын талаар эдгээр эшлэлд юу гэж хэлсэн бэ?

Сайнмэдээг тунхаглагч хүн сайнмэдээг тараахдаа хүмүүстэй тэмцэлдэх ёсгүй. Сатан бол дайсан, харин үл итгэгчид сатаны хоригдлууд юм. Бид үнэнийг дөлгөөн байдал дотор тайлбарлах ёстой. Маргаан мэтгэлцээнээр тэднийг ялах бус, тэдэнд туслах нь бидний зорилго шүү дээ. Дээрх эшлэлд эелдэг зөөлөн, дөлгөөн, тэвчээртэй байдал гэх мэт үгсийг ашигласан байна.

► Нэг суралцагч Тит 3:2-5-г ангид уншина. Сайнмэдээг тунхаглагч хүний зан чанарын тухай энэ эшлэл юу хэлж байна вэ?

Бурханы нигүүлсэл байгаагүй бол бид дэлхийн хүмүүсээс ялгарах зүйлгүй гэдгээ санах ёстой. Бурхан энэ дэлхийд ирэхдээ шүүлтийг бус энэрэл, хайрыг бидэнд авчирсан.

Сайнмэдээг тунхаглагч хүн үл итгэгчдэд уурлах бус Сатан болон нүгэлд уурлах ёстой. Тэр хатуу ширүүн аашлах ёсгүй. Тэр тэдний алдаанд баярлах бус харин тэдний авралд санаа тавих хэрэгтэй.

Бид энэ хичээлээр Бурханы амлаагүй зүйлсийг үл итгэгчдэд амласнаараа тэднийг хайрлаж байгаа гэсэн үг биш гэдгийг суралцсан. Тэдний амьдралын асуудлуудыг мөнхийн хувь тавилангаас илүү чухал мэт үзсэнээрээ тэднийг өрөвдөж байгаа хэрэг огт биш.

Мессиа бол хүчирхийлэгч биш, харин дөлгөөн нэгэн бөгөөд нүглээс болж аль хэдийн шархадсан хүмүүсийг гэмтээхгүй хэмээх эртний эш үзүүллэгийг Есүс биелүүлсэн юм (Матай 12:19-20).

► Сайнмэдээ тараах үед Бурханы хайрыг илэрхийлж болох ямар аргууд байдаг вэ?

Сайнмэдээг хүлээн авахад хүмүүсийг бэлтгэхийн тулд Бурханы хуулийг хэрэглэхийг Библийн дагуу сайнмэдээ тараах гэдэг. Үл итгэгч хүн уучлалыг хүлээн авахгүй бол шүүгдэх болно гэдгийг хууль хэлдэг.

Баптисч Иохан Эзэний ирэхэд бэлтгэж, шүүлтээс хэлтрэхийн тулд гэмших ёстой гэж номлож байсан (Матай 3:1-12).

Есүс маш олон удаа там ба шүүлтийн тухай сургаал зааж байсан. Нүглээ хүлээн зөвшөөрч гэмшсэн хүмүүсийг Тэрээр нигүүлсэх болно гэж хэлсэн байдаг.

► Нэг суралцагч Лук 7:36-50-ыг ангид уншина. Ямар хүн уучлалыг хүлээн авдаг вэ?

Нүглээ гэмшээгүй нэгэнд Есүс өршөөл үзүүлсэн тухай Түүний үйлчлэлээс бид олж харахгүй. Шүүлтийн талаар Тэрээр хүмүүст анхааруулдаг байсан. Гамшиг сүйрэл тохиож, олон хүн үрэгдсэний дараа Есүс хурсан олонд хандан, гэмшихгүй бол бүгд мөхнө гэдгийг хэлж байсан (Лук 13:1-5).

Фарисай хүн, татвар хураагч хоёрын хэрхэн залбирсан тухай түүхийг Есүс өгүүлж байсан. Татвар хураагч гэмшээд өршөөлийг хүлээн авсан бол фарисай өөрийгөө зөвтгөсөн. Фарисай хүн өршөөл түүнд хэрэгтэй гэдэгт итгээгүй учраас өршөөгдөөгүй аж.

Элч Петр номлолдоо мөнх амийн амлалтын талаар номлож, гэмшил ба уучлал руу ирэхийг хүмүүст уриалсан байдаг (Үйлс 2:38, Үйлс 3:19, Үйлс 5:31).

Стефан иудейн удирдагчдад хандан номлохдоо нигүүлслийг санал болгоогүй, харин тэд Бурханыг эсэргүүцэж, Түүний хуулийг зөрчснийх нь төлөө тэднийг буруутгасан (Үйлс 7:51-53).

Гэмшихгүй бол Бурханы уучлалыг авахгүй гэдгийг Паул ч бас тунхагласан (Үйлс 17:30-31).

Христийн дагалдагч болоход ирдэг баяр хөөр, ерөөлийг ярих нь буруу биш боловч Библи дэх сайнмэдээ нь нүглийн шийтгэл, гэмшил, шүүлтээс авралын сайнмэдээ рүү хэрхэн хүрч болох талаар тунхагладаг юм.

► Нэг суралцагч 2 Коринт 5:11-ийг ангид уншина. Элч Паул юу гэж ятгасан бэ?

► Нэг суралцагч Үйлс 24:25-ыг ангид уншина. Паул Феликст юуны талаар ярьсан бэ? Феликс хэрхэн хүлээн авсан бэ?

Андрей Жейсонтой таарах үедээ хүмүүсийг чуулганд ирэхийг урьсан урилга тарааж байлаа.

Жейсон: Надад чуулганд явах шаардлага байхгүй шүү.

Андрей: Үйлдсэн нүглийнхээ төлөө бүх хүн Бурханы шүүлтийн өмнө зогсох болно гэж Библид бичигдсэн байдаг. Бурхан чамайг байгаагаар чинь хүлээн авна гэж чи бодож байна уу?

Жейсон: Тиймээ, тэгж бодож байна.

Андрей: Чи сайн хүн мөн үү?

Жейсон: Тиймээ, би бол сайн хүн.

Андрей: Чи өөрийгөө олон хүнтэй харьцуулбал магадгүй сайн хүн байж болох юм. Найз нөхөд гэр бүлийнхэндээ ч сайныг үйлддэг байж болно. Тэгвэл чи Бурханы хэрэглэдэг жишиг хэмжүүр юу болох талаар мэдэх үү? Библид Бурхан зөв бурууг хэрхэн шүүдэг тухай бичсэн байдаг. Жишээ нь, Түүний тушаалууд болох Арван хуулийг мэдэх үү?

Жейсон: Заримыг нь л мэднэ.

Андрей: “Худал бүү гэрчил” гэж арван тушаалд хэлсэн. Чи худал хэлж байсан уу?

Жейсон: Мэдээж шүү дээ, бүгд л зарим үед худлаа ярьдаг.

Андрей: Худлаа яривал Бурханы хуулийг зөрчсөнд тооцогдоно. Өөр нэг тушаал нь “Бүү хулгай хий” гэсэн байдаг. Чи ямар нэг зүйл хулгайлж байсан уу?

Жейсон: Жижиг сажиг юм авч байсан. Тэглээ гээд би хүмүүсийг тэгтлээ хохироож зовоож байгаагүй.

Андрей: Бурхан биднийг хулгай хийхийг зөвшөөрөөгүй. Түүний тушаалд “Бүү хулгайл” гэж хэлсэн. Үүнээс гадна Бурханы нэрийг хий хоосон дуудах, хүндэтгэлгүй хараалын үг болгон ашиглахыг мөн хориглосон байдаг.

[Бүх хуулийг хэрэглэж болно гэхдээ бүгдийг нь яриандаа ашиглаж болохгүй. Дараах жишээг харна уу]

• Бурхан бидэнд “Бүү завхайр” гэсэн бөгөөд эмэгтэй хүнийг тачаадан харах хүн бүр зүрхэндээ түүнтэй аль хэдийн завхайрсан хэрэг хэмээн Есүс хэлсэн юм.

• Бурхан “Хүн бүү ал” гэсэн. Харин Есүс “Нэгнээ зүрхэндээ үзэн ядах нь түүнийг алсантай адил юм” гэжээ.

• Бурхан “Эзэний өдрийг ариунаар сахь” гэсэн. Долоо хоног бүр Эзэний өдрийг ариунаар сахидаг уу?

• Бурхан бидэнд шунахайрч болохгүй, бусдад байгаа зүйл бидэнд байгаасай гэж хүсэх, Бурханаас өөр зүйлс биднийг аз жаргалтай болгож чадна гэж бүү бод гэж хэлсэн.

• Бурхан бидэнд Түүнээс өөр бурхадтай байж болохгүй, Бурханаас илүү чухал зүйлтэй байх ёсгүй, мөн Бурханд өргөх ёстой хүндлэлийг нь өгч, дуулгавартай байхаас биднийг тусгаарлах ямар ч зүйлийг бүү хүлээн зөвшөөр гэж хэлсэн.

[Тухайн хүнийг нүгэлтэй гэдгийг нь мэдүүлэхийн тулд эдгээр хуулиудаас дурдаад төгсгөл хэсэг рүү орно]

Андрей: Өнөөдөр чи Бурханы шүүлтийн өмнө зогсож байна. Харин чи шүүлтээс мултарч чадахгүй. Бурханы хэм хэмжээний дагуу чи бол нүгэлтэй хүн. Бурханаар шүүгдэхгүйн тулд хэрхэн өршөөл хүртэх талаар чи мэдмээр байна уу?

[Сайнмэдээг хуваалцсаны дараа тухайн хүнийг залбиралд урина]

► Хоёр суралцагч сайнмэдээг тараахад арван тушаалыг ашиглан, сайнмэдээ тарааж үзүүлнэ. Бүлгээрээ тэдний танилцуулгыг хэлэлцэж болно. Суралцагчид хоёр хоёроороо хуваагдан сайнмэдээ ярих дадлага хийгээрэй.

► Сайнмэдээ амжилттай тараасан гэдгийг хэрхэн яаж мэдэх вэ?

Хэрвээ хүн сайнмэдээг сонсоод үнэнээсээ гэмшиж, Христийн дагалдагч болохоор шийдсэн бол тэр хүнд сайнмэдээ амжилттай хүрчээ гэж ойлгодог. Гэвч энэ бол амжилтын цорын ганц хэмжүүр биш. Сонсогчийн зүрхэнд үнэнийг бат оруулж чадах нэгэн бол Бурхан юм. Хэрэв та сайнмэдээг хэн нэгэнд ойлгомжтой хүргэж чадсан бол хэзээ ч үр дүнг нь харахгүй байсан ч та чухал зүйлийг гүйцэлдүүлжээ. Хэрэв тэр хүн таны өөрт нь туслах гэсэн хүсэл зоригийг мэдэрсэн бол энэ ч мөн сайн зүйл юм. Хэрвээ тэр таныг шоолж, эсвэл уурлаж, ялангуяа үнэний үгийг сонсоод уурласан байлаа гэхэд энэ нь та бүтэлгүйтлээ гэсэн үг биш. Сайнмэдээгээр дамжуулан Бурхан өргөмжлөгддөг бөгөөд та сайнмэдээг хүнд хүргэсэн бол чухал зүйлийг амжилттай хийж чадсан гэсэн үг юм.

Энэ бол сайнмэдээг үр дүнтэй танилцуулах арга юм. Суралцагчид энэ аргыг хэрэглэж сурах нь маш чухал. Дараагийн ангийн цагаараа энэ аргаар сайнмэдээ хуваалцсан талаараа ярих, бие биеэ урамшуулж зөвлөх цагийг гаргаарай. Дараагийн хичээл рүү шилжих хүртэл ийм маягаар хэсэг явах нь үр дүнтэй.

Энэ хичээлд сайнмэдээг Андрейд хэрхэн тараасан тэр маягаар гурван хүнд сайнмэдээ тараа. Гурван хүн тус бүрийнхээ талаар цогцолбор бич. Дараагийн хичээл дээр энэ талаар ярихаар бэлтгээрэй.