Lesson 16: Жинхэнэ дагалдагч

► Есүсийн дагалдагч байна гэдэг ямар утгатай вэ?

Зарим хүн Христэд итгэгч хүнийг сайн хүн гэж боддог. Зарим нь итгэгч байхыг тодорхой зүйлд итгэдэг гэсэн утгаар хардаг. Гэхдээ иймэрхүү хүмүүсийн олонхийн амьдралд итгэл үнэмшил тийм ч их өөрчлөлт авчирдаггүй.

Өөр заримынх нь хувьд үнэнд арай илүү ойр байна. Тэд хүн Христэд итгэгч болох үед заавал нэгэн өөрчлөлтийн цаг үе байх ёстой гэдгийг мэддэг. Христийг чин үнэнээсээ хүлээн авсан бол юу ч болсон бай, тэнгэрийн улсад очих баталгаатай хэмээн олон хүн итгэдэг аж.

Христийг чин үнэнээсээ хүлээн авах ёстой гэдэг нь үнэн. Итгэлийн хариуд Бурханы өршөөлөөр уучлал ирдэг гэдэг нь ч үнэн. Итгэгч хүн Бурханд дуулгавартай амьдардаг нь ч үнэн юм. Гэвч Есүсийн дагалдагч байна гэдэг нь энэ бүхнээр хязгаарлагдахгүй.

Итгэх нь л Христэд итгэгч байх цорын ганц шалгуур болбол юу болох вэ? Тэгвэл энэ нь итгэгчид Бурханы тушаалуудыг заавал биелүүлэх албагүй гэсэн үзэл буюу антиномианизмд хүргэдэг. Ингээд үнэгүй нигүүлсэл маань нүглийг зөвтгөсөн, дүр эсгэсэн, төсөөллийн нигүүлсэл болж ойлгогддог байна.

Иймэрхүү төсөөллийн нигүүлслийг сурталчилдаг чуулганы гишүүд нь чуулганд хамрагддаг атлаа нүгэл дундаа амьдардаг аж. Тэдний пасторууд болон бусад удирдагчид нь чуулганы хүмүүсээс илүү дээр амьдралтай байж болох ч, нүгэлт зуршилтай байх нь бий. Тэдний хувьд нигүүлслээр аврагдсан учраас Бурханд бүрэн дуулгавартай амьдрах шаардлагагүй ажээ. Тэд хүмүүсийг Христийн дуулгавартай байдалд авчир гэж Есүсийн чуулганд өгсөн үүрэг даалгаврыг умартдаг. Чуулган бол итгэдэггүй хүмүүсийг итгэгч болгож, Бурханы ариун мөргөн хүндлэгч болгох онцгой үүрэгтэй бөгөөд өөр оршин тогтнох шалтгаан чуулганд үгүй юм.

Түүнчлэн Бурханыг дуулгавартай дагах ёстой гэж үздэг чуулгануудад ч өөр алдаа дутагдал байдаг. Тэд өөрсдийнхөө зөв гэж үзсэн шаардлагын дагуу амьдралаа тохируулсан байдаг бөгөөд Христтэй адил сүнс сэтгэл тэдэнд байдаггүй. Тийм хүмүүс хатуу ширүүн, өршөөлгүй байдаг тул даруухан бөгөөд нигүүлсэнгүй сэтгэлээр уучлал гуйж чаддаггүй. Тэд бас бусдыг шүүхдээ гаргууд. Цөөхөн хүнд л итгэдэг. Өөрсдийнхөө зөв гэдэгт хэзээ ч эргэлздэггүй мэт. Түүнчлэн асуулт болгонд хариулдаг бөгөөд өөрсөдтэй нь санал нийлээгүй хүмүүсийг үл хүндэтгэдэг. Тэдэнд алдагдсаныг аврах халуун сэтгэл байхгүй, харин үзэл бодлоо хамгаалах асар их хичээл зүтгэл бий. Тэд өөрсдөдөө сэтгэл ханасан хүмүүс тул өөрчлөлт хийх төлөвлөгөөгүй ажээ.

Ийм хүмүүс Есүсийг үнэхээр мэддэг болов уу? Есүс шиг байхыг хүсдэг болов уу?

Үнэндээ итгэгч байна гэдэг Есүсийн дагалдагч байна гэсэн үг юм.

Дагалдагч байна гэж юу гэсэн үг вэ? Христэд дуулгавартай байна гэсэн үг үү? Хамгийн багаар бодоход тийм гэдэг нь эргэлзээгүй. Есүс Агуу захирамжийг өгөхдөө “газар сайгүй явж, дагалдагч бэлтгэ, шинэ дагалдагчдад Есүсийн тушаасан бүхнийг сахин биелүүлэхийг заа” хэмээн тушаасан юм (Матай 28:19-20). Есүсийн тушаалыг дагах нь дагалдагчийн хийх бүх зүйл биш.

Еврей раббичуудын шавь нар багштайгаа хамт амьдарч, сургаал номлол төдийгүй, амьдралын хэв маягийг нь бас суралцдаг байжээ. Тийнхүү шавь нар хандлага, эрхэм зүйлсээ суралцах явцдаа олдог байв.

Есүс дагалдагчдыг дуудахдаа “ирж, Намайг дага гэлээ”[1] гэж хэлсэн нь ийм утгыг агуулж байсан. Тэрбээр одоо ч дагалдагчдыг сайнмэдээгээр дамжуулан ийнхүү дуудсаар байна.

[2]Тэгвэл яаж дагалдагч болох вэ?

Эхлээд та Есүст итгэх ёстой. Итгэхгүйгээр Есүсийг дагах шалтгаан байхгүй юм.

Та явж буй чиглэлээ өөрчлөх хэрэгтэй. Төрөлхийн Есүсийн дагалдагч гэж байхгүй, харин бид бүгд эхлээд өөр өөрийнхөө замаар явж байсан. Тиймээс та өөрийнхөө замыг бус Есүсийг дагах эсэхээ шийдэх ёстой. Өөрөөр хэлбэл таны замд ямар нэг юм буруу байгааг та өөрөө харсан гэсэн үг. Үүний дараа гэмших ёстой. Та нүгэлдээ харамсахгүйгээр Есүсийг дагах боломжгүй. Хэрэв та нүглээ хаяхын төлөө хангалттай харамсаагүй бол та өөрийнхөө замаар явсаар байгаа гэсэн үг.

Хүн Есүсийн уучлалыг мэдрэхэд Түүнтэй харилцаа үүсгэж эхэлдэг. Ингээд Түүнийг илүү ихээр мэдэж эхлэх ба Түүн шиг байхыг хүсэх болно.

► Нэг суралцагч Матай 16:21-25–г ангид уншина.

Есүс дагалдагчидтайгаа ярилцаж байхдаа айсуй үхлийнхээ тухай дурдаж байна. Петр энэ үгэнд цочирджээ. Петрийн бодлоор Есүст зовлон, үхэл огт тохирохгүй байв. Тиймээс Есүсийн үгийг сөрж, үхлийн тухай бодлыг нь хориглохыг хичээсэн.

Есүс Петрийг зэмлээд, Бурханы юмсыг ойлгохгүй байна гэж хэлсэн юм. Есүсийн дагалдагч байхын тулд хүн өөрийгөө үгүйсгэн загалмайг үүрч, Есүсийг дагах ёстой гэжээ. Энэ бол үхлийг өөртөө хүлээн зөвшөөрөх гэсэн үг. Энэ нь жинхэнэ дагалдагч байхын эсрэг зүйлс болох өөрийгөө хангах, өөрийгөө өргөмжлөх, өөрийгөө хамгаалах хүний төрөлх мөн чанар, төрөлх хандлагын эсрэг зэмлэл байлаа.

► Хүний төрөлх мөн чанар яагаад дагалдагч байхын эсрэг байдаг вэ?

Дагалдагчид зовлон шаналал, үхлийг өөрсдөдөө тохиолдохгүй гэж үзэж байв. Тэд Есүсийг дагах нь ямар утгатай болохыг хараахан ойлгоогүй байсан хэрэг. Уучлал хүртэхийн тулд танаас ямар ч зардал гарахгүй боловч, Христийг дагахын төлөө та бүхнээ зориулах ёстой юм. Есүсийг дагаснаар тасралтгүй Түүнийг эрэлхийлж, зүрх сэтгэлээ даруусгаж, өөрчлөгддөг.

► “Христийг дагахад танаас өртөг золиос шаардагдана” гэдэг үгийг тайлбарлана уу.

Загалмайг үүрнэ гэдэг бол Бурхантай мөнхөд хамт байх харилцааны төлөө ямар нэг зүйлийг үхүүлнэ гэсэн утгатай. Энэ бол дотор хүнээ үхүүлэх, бүрэн эрхт байдлаа үхүүлэх явдал бөгөөд зөвхөн гадна байдлаараа хүлцэнгүй байх биш, харин зүрх сэтгэлээрээ бүхлээрээ даруусна гэсэн үг. Ийм дарууслыг Есүсийн хаанчлалд орох шаардлага гэж тодорхойлжээ.

Анхны дагалдагчдын адилаар өнөөдөр ч олон хүн дагалдагч байх гэж ямар утгатайг ойлгоогүй явж байна. Чуулганууд гэмшээгүй хүмүүст нигүүлслийг санал болгож байна. Ингэснээр Христийг хүлээж авч байгаа хүмүүсийг зөв замаар эхлүүлэхгүй, ирж буй зүйлсэд бэлтгэхгүй байна. Энэ бол жинхэнэ итгэгчдийн амьдралаас маш их ялгаатай, өөр зам юм.

Германы пастор Диетрих Бонхоферыг Адольф Гитлерийн тушаалаар цаазаар авчээ. Тэрээр Дагалдагч байхын үнэ өртөг (The Cost of Discipleship) хэмээх номдоо ингэж бичжээ.

Үнэтэй нигүүлсэл бол талбайд нуугдсан эрдэнэ мэт. Үүний төлөө хүн дуртайяа явж, байгаа бүхнээ зарна. Худалдаачин бүх бараагаа зараад худалдан авах тийм агуу үнэтэй сувд мэт. Энэ бол Христийн засаглал хаанчлал бөгөөд хүн үүний төлөө өөрийг нь бүдрүүлдэг нүдээ ухаж хаях зүтгэл, дагалдагч нар загасчилж байсан тороо орхиод Түүнийг дагадаг тийм л дуудлага юм. Биднийг ийнхүү дагахыг уриалдаг учраас энэ нигүүлсэл ийм агуу үнэтэй байгаа юм.

Есүсийг дагана гэдэг нь Есүстэй адил болох юм. Түүнд бүрэн бууж өгсөн учраас өөрийгөө үхүүлнэ гэсэн үг. Зүгээр л зарим зүйлсийг буруу хийхээ болих биш, харин Есүсийн хүссэнээр тэднийг бүрэн орхино гэсэн үг. Есүс цэвэр ариун байдлаараа, өрөвч нинжин сэтгэлээрээ, өршөөлөөрөө юу хийх байсныг бид ч хийхийг эрмэлздэг.

Зүрх сэтгэл маань эсэргүүцээд байхад бид зүгээр л зөвийг хийгээд байж чадахгүй. Тиймээс зүрх сэтгэл маань ч адилхан байгаасай гэж хүсдэг. Есүс хэнийг ч үзэн ядаагүй. Түүнтэй дайсагнах сонголтыг хийсэн хүмүүс байсан хэдий ч Тэр Өөрөө харин хэнтэй ч дайсагнаагүй юм. Загалмай дээр байхдаа ч Тэр өршөөж уучилсан билээ.

Христийн жинхэнэ дагалдагчид хонзогнодоггүй. Тэд муу хандаж байхад хариуд нь сайн ханддаг, хараах үед нь ерөөдөг байсан. Тэд өөрсдийгөө уучлалаар хязгаарлаж байгаагүй. Үүний оронд хувийн эрхээ огоорч, оронд нь үйлчилж байсан юм.

Дагалдагч хүн өөрийгөө огоорч амьдрахаас өөр газаргүй. Амиа аврахыг хичээдэг хүн алдана, амиа өгөх хүн үүнийгээ аварна (Марк 8:35).

► Хүмүүсийг дагалдагч болгон бэлтгэх замаар хэрхэн аврал руу дуудах вэ?

Итгэгчийг сүнслэг төлөвшилд хүргэх сүнслэг өсөлтийн үйл явц[1] гэж бий.

Итгэгч хүн насан туршдаа үргэлжлүүлэн төлөвшсөөр байх ёстой бөгөөд сүнслэг талаасаа насанд хүрсэн гэж болохуйц төлөвшлийн түвшин байдаг. Элч Паул итгэгчдийг цаашид хүүхэд байхаа больж, өөр түвшинд хүрч чадна гэж хэлсэн байна (Ефес 4:14).

Сүнслэг өсөлт нь суралцах явцад зарим талаараа бүрэлддэг. Тиймээс элч Паул төлөвшөөгүй хүмүүсийг ахисан түвшний сургаалыг хүлээн авахад бэлэн бус байдаг гэж хэлжээ (1 Коринт 3:1-2. Мөн Еврей 5:12-14, үз). Түүнчлэн итгэгчдийн төлөвшлийн шинж чанарууд нь онол сургаал дээр үндэслэгддэг хэмээн тэрээр өгүүлсэн. Суралцах нь сүнслэг өсөлтийн нэг хэсэг учраас заах нь дагалдагч бэлтгэх ажлын нэг хэсэг мөн.

Гэхдээ сүнслэг өсөлт нь зөвхөн суралцах замаар бүрэлдэхгүй.

Сүнслэг төлөвшил бол итгэгчид эв нэгдэлтэй байж, Бурханы Хүүгийн тухай мэдлэгтэй болж, Христийн адил болохыг эрмэлзэх явдал (Ефес 4:13) гэж Паул хэлсэн байна. Төлөвшил бол мэдлэгээс илүү бөгөөд дан ганц мэдлэгээс бий болохгүй.

► Нэг суралцагч 2 Петр 1:2-11–г ангид уншина.

Энэ хэсэг сүнслэг хөгжлийн тухай өгүүлж байна. Гол санаануудыг нь анзаараарай.

Эшлэл 3: Биднийг бурханлаг байхад шаардагдах бүх зүйлийг Бурхан хангаж, Христийн давуу чанар руу дууджээ.

Эшлэл 4: Биднийг нүглээс гэтэлгэж, Бурханы мөн чанарыг өгөх өөрчлөлтийн нигүүлслээ Бурхан бидэнд амлажээ.

Эшлэл 5-7: Бид авралын итгэлээ зогсоож болохгүй, харин христитгэлийн зан чанараа хөгжүүлэх ёстой.

Эшлэл 8: Эдгээр чанарууд нь биднийг сүнслэг үр жимстэй болгоно.

Эшлэл 9: Эдгээр чанаруудаа хөгжүүлээгүй хүн бол нүглүүдээсээ салаагүй, хаашаа яваагаа мэдэхгүй хүн юм.

Эшлэл 10-11: Итгэгч хүн христитгэлийн зан чанаруудаа хөгжүүлэхийн төлөө зүтгэлгүйгээр авралын баталгаандаа сэтгэл амарч болохгүй юм. Христитгэлийн зан чанар хүнийг авралд бататгаж, агуу ялалтаар Бурханы мөнхийн хаанчлалд авчрах болно.

2 Петр номын 2-р бүлэгт сүнслэг өсөлтийг үгүйсгэдэг хүмүүсийн тухай дурддаг. Тэд зөвхөн итгэгч гэсэн нэрийг л хүсэж байв. Сүнслэг байдлын хувьд ахихаас татгалздаг учраас нүглийг зөвтгөдөг ажээ. Тэдний хуурамч сургаал шинэ хүмүүсийг нүглийн хүчинд унагаж, авралын нигүүлслийг огт амсаагүй байснаас ч дор байдалд ороход хүргэдэг байна (2 Петр 2:18-22).

Энэ захидал сануулгаар төгсөж байна. Бид хуурамч сургаалд автан нүгэлд төөрөлдөхөөс болгоомжилж, нигүүлсэл дотор өсөхөд анхаарлаа хандуулах ёстой (2 Петр 3:17-18).

Хүмүүсийг Христэд дуулгавартай байхад дагуулах нь дагалдагчийн хийх ажил гэдгийг Есүс Агуу захирамждаа хэлсэн билээ. Мэдээж суралцаж байгаа хүн сурч байгаа зүйлдээ дуулгавартай байх ёстой, эс бөгөөс урагш ахихгүй. Бурханыг баярлуулж, зан чанараа хөгжүүлэхэд чиглүүлэх нь мэдлэгийн зорилго юм. Хэрэв хүн суралцсаар байх атлаа дуулгавартай дагахгүй байвал дагалдагч биш гэсэн үг. Шашны мэдлэг ихтэй боловч төлөвшсөн итгэгчийн амьдралыг харуулж чаддаггүй хүмүүс чуулгануудад маш их байдаг.

► Нэг суралцагч Филиппой 1:9-11–г ангид уншина.

Филиппой хотын чуулганыхан гайхалтай итгэгчид байсан бөгөөд тэдэнд хандсан Паулын захидал баяр хөөрөөр дүүрэн уур амьсгалтай бичигджээ.

Эдгээр эшлэлд Паул филиппойчуудын сүнслэг өсөлтийг дурджээ. Энэ дүрслэл бол мэдлэг, ялгах чадвар, хайр, биеэ авч явах байдалтай холбогддог учраас их ач холбогдолтой.

Паул тэдний хайрыг улам нэмэгдээсэй, хайр нь алив сайныг ялган таниулаасай гэж залбирсан бөгөөд ингэснээр филиппойчууд хамгийн сайн хандлага, зан чанарыг сонгож чадна гэжээ. Ийм амьдрал Есүсийг буцаж ирэхэд Бурханы өмнө гэм зэмгүй байх амьдрал юм. Тийм хүмүүсийн амьдрал Бурханыг алдаршуулах сүнслэг үр жимсээр дүүрэн байдаг.

► Бидний судалсан ойлголт дээр үндэслэн Есүсийн дагалдагч гэж хэн болохыг хэлнэ үү?

Сурсан үнэндээ дуулгавартай амьдарч, Бурханы хүслийг илүү сайн ойлгохыг чин сэтгэлээсээ хүсдэг, итгэгч хүний зан чанар, зан төлөвөө хөгжүүлэхийн төлөө Бурханы хүч чадалд түшин амьдардаг хүнийг Есүсийн дагалдагч гэнэ.

► Одоо бид сүнслэг өсөлтийн талаар мэддэг боллоо. Та бусдыг дагалдуулдаг хүнийг хэрхэн тодорхойлох вэ?

Дагалдуулдаг хүн бол Библийн үнэнийг заадаг, Есүст дуулгавартай байхын үлгэр дуурайл болсон хүн бөгөөд бусад итгэгчдийн сурах, дагах явцыг урамшуулж, Бурханы ажил явагдсаар байхыг зөвшөөрдөг хүн юм.

Өмнөх хэсэгт бид 2 Петр 1:2-11-ийг судалсан. Энэ хэсгээс Бурхан биднийг нүгэлт хүслийн хүчнээс ангижруулж, ариун мөн чанарыг өгдөг нигүүлслийг амласан гэдгийг мэдэж авдаг бөгөөд ийм мэдлэг бидний сүнслэг өсөлтийг удирддаг юм.

Зарим хүн Бурханы тушаалыг огт зөрчихгүйгээр амьдрах боломжгүй гэж үздэг. Тэд хүнд цэвэр ариун зүрх сэтгэл байхгүй гэж боддог бөгөөд эдгээр санаа бодлууд нь тэдний дагалдагч байх амьдралд нөлөөлдөг.

Дагалдагч гэдэг бол Христийн тушаалуудыг сурч, дуулгавартай дагана гэсэн үг. Хэрэв бид бүрэн дуулгавартай байх боломжтой гэдэгт итгэж чадахгүй бол сүнслэг байдлыг арай өөрөөр үнэлэх аргыг хайхад хүрнэ.

Жон Веслей нигүүлслийг хүртэхгүй л бол хүн Бурханы тушаалуудыг бүрэн биелүүлж чадахгүй гэж үздэг байсан. Гэхдээ нигүүлслийг олох боломж хүн бүрд өгөгдсөн байна. Веслейн үзлээр нүгэлт хүн бүр нигүүлслийн ачаар авралын сайнмэдээнд хариу өгөх чадвартай болдог. Түүнчлэн Христийн дагалдагч бүр Бурханд бүрэн дуулгавартай амьдрах нигүүлслээр хангагддаг гэж тэрээр үзсэн юм.

Веслейн теологиос “Амлалтын зарчим” гэж нэрлэгддэг Бичвэрийг хөрвүүлэх зарчим үүсжээ. Веслейн үзлийг баримтлагчид “Бурхан юу ч тушаасан бай, биелүүлэх боломжийг хүмүүстээ олгодог” гэж итгэдэг байна. Ингэхээр Библийн тушаал бүрийг “нигүүлслийн амлалт” гэж харах боломжтой.

Дараах хэсэгт энэхүү зарчмыг[1] тайлбарласан Веслейн тайлбарыг оруулав.

Хамгийн түгээмэл үгүйсгэлийн нэг нь “Христэд итгэгч хүнийг төгс болгоно гэсэн амлалт Бурханы Үгэнд байхгүй” гэх үгүйсгэл юм. Гэхдээ бид Бурхан Эзэнээ бүх зүрх сэтгэлээрээ хайрлах болно гэсэн маш тодорхой амлалт байна. Үүнийг “ЭЗЭН Бурхан чинь чамайг өөрийн Бурхан ЭЗЭНийг бүх зүрх, бүх сэтгэлээрээ хайрладаг болгохын тулд чиний зүрхийг болоод чиний үр удмын зүрхийг хозолно” (Дэд хууль 30:6) гэж хэлжээ. Бидний Эзэний үг хэдийгээр тушаал хэлбэрээр байгаа ч амлалт мэт харагдаж байгааг “Чи Бурхан Эзэнээ бүх зүрх, бүх сэтгэл, бүх оюун ухаанаараа хайрла” (Матай 22:37) гэснээс харж болно. Үүнээс илүү хүчтэй үг, үүнээс илүү тодорхой амлалт гэж байхгүй. Мөн түүнчлэн “Чи хөршөө өөрийн адил хайрла” (Матай 22:39) гэсэн нь тушаал хэлбэртэй амлалт байна.

Энэхүү хязгааргүй амлалт нь сайнмэдээний бүхий л үед захирч, “Би хуулиудаа санаанд нь оруулж, зүрхэнд нь бичнэ” (Еврей 8:10) гэсэн бөгөөд “Өөр хоорондоо Христ Есүст байсан тийм бодолтой бай” (Филиппой 2:5) гэх амлалтыг оролцуулаад бүхий л тушаалыг амлалт болгосон юм. Энэ тушаал нь амлалттай дүйцэх бөгөөд Тэрбээр биднээс шаардаж байгаа зүйлийнхээ төлөө бидний дотор ажиллана гэдэгт найдах үндэслэл болж байна.

Гэгээн Петрээр дамжуулан өгөгдсөн Бурханы тушаалд “Харин та нарыг дуудсан Ариун Нэгэний адил өөрсдийн бүх л зан байдалдаа бас ариун байгтун” (1 Петр 1:15) гэсэн нь хэрэв бид хүсэж л байгаа бол биднийг ариун байлгана гэсэн амлалтыг агуулж байна. Бурханы талаас дутагдах зүйл гэж байхгүй. Тэрбээр биднийг ариунаар дуудсан, үүнийгээ эргэлзээгүй хүсэж байгаа тул энэхүү ариун чанараа бидний дотор ажиллуулна. Учир нь Тэрбээр дорой бүтээлүүдээ басамжилдаггүй, мөн бидэнд өгөхийг зориогүй зүйлийг нь хүлээн авахаар Тэр дуудахгүй. Тэрбээр биднийг ариун байдалд дууддаг нь маргаангүй бөгөөд хэрэв бид тэнгэрлэг дуудлагад дуулгавартай байх юм бол Тэр үүнийгээ өгөх л болно.

“Гэхдээ биднийг махбод дотроо байхад нүглээс аварна гэж Тэр амласан уу?” Гарцаагүй амласан. Учир нь “Чи Бурхан Эзэнээ бүх зүрх, бүх сэтгэл, бүх оюун ухаанаараа хайрла” (Матай 22:37) гэх амлалт нь Бурханы бүх тушаалыг агуулж байгаа юм.

Бид Бурханы зан чанарын талаарх бодол дээрээ тулгуурлан Бурханы нигүүлслийг хүлээх ёстой. Бурханы тушаалуудыг биелүүлэх боломжтой бөгөөд Тэрбээр чин сэтгэлээсээ хүсэж байгаа учраас үүнийгээ ямар нэг аргаар бидэн дээр биелүүлж чадна.

Бид Библийг бүхэлд нь нухацтай авч үзэх ёстой. Библийн эшлэлүүдийн энгийн утгыг бид хэзээ ч гуйвуулах ёсгүй. Бурхан итгэгчдийг ариун байгаасай гэж хүсдэг төдийгүй ариун болоход нь туслах хүч чадалтай учраас энэхүү Амлалтын зарчим нь Бурханыг өргөмжилж байна. Библи дээрх сануулга, амлалт, залбирлыг үл ойшоож болохгүй. Сайн теологи нь Библийг хэрхэн ашиглаж байгаагаар батлагддаг.

Төгс Хүчит Бурхан хүний сүнсийг биедээ байх үед нь ариусгаж яагаад болохгүй билээ? Тэрбээр таныг байшинд ч бай, гадаа ч бай, ариусгаж чадах уу? Тоосго эсвэл чулуун хана Түүнд саад болох уу? Тэгвэл мах, цусаар бүрдсэн эдгээр хана нь таныг бүхэлд нь ариусгах үйл явцад нэг хором ч саад болохгүй. Тэрбээр таныг биедээ ч бай, биеэсээ гадуур ч бай, амархан аварч чадна. “Тэрбээр биднийг махан биедээ байх үед нүглээс аварна гэж Тэр амласан уу? Гарцаагүй тэгж амласан. Учир нь “Чи Бурхан Эзэнээ бүх зүрх, бүх сэтгэл, бүх оюун ухаанаараа хайрла” [1](Матай 22:37) гэх энэ тушаалыг оролцуулаад Бурханы бүх тушаалд амлалт агуулагддаг. Энэ ч бай, бусад тушаалууд ч бай, бүгдээрээ үхэгсдэд биш, харин амьд хүмүүст өгөгдсөн тушаалууд юм. Дээр өгүүлсэн эшлэлд байгаа энэ үгээр бид “үүрд Түүний өмнө... ариун” алхах ёстой юм (Лук 1:73-75).[2]

Олон хүн итгэгч байхад мэргэшдэг боловч нүглийн уруу татлагыг огт ялдаггүй. Тэд мэдлэг, үйлчлэх ур чадвар дотор өсдөг боловч хамгийн чухал зүйл дээрээ өсдөггүй аж.

Нүглийг ялж, ариун зүрхтэй болох нь итгэгч хүнд тавигддаг Бурханы жишиг юм гэдгийг Библид тодорхой зааж байна (Тит 2:11-12, Үйлс 15:9, 1 Иохан 3:2-10, 1 Иохан 5:1-4). Хэрэв итгэгч хүн өөрийгөө Бурханы хүссэн хүн шиг биш байна гэдгийг ойлговол даруйхан, тун нухацтайгаар Бурханы Сүнсний өөрчлөгч, бас хүчирхэгжүүлэгч ажлыг эрэлхийлээрэй.

Дагалдагчдыг бэлтгэх үйлчлэлд байгаа хүн хамгийн эрхэм чиглэлээ тодорхой байлгах ёстой. Нүглийг ялах нь нэн тэргүүний зорилт мөн. Хэрэв хүн нүгэлд унасан бол дагалдуулагч нь ямар нэг юм болохоос өмнө түүнийг гэмшил, ялалт руу дуудах ёстой.

Дараах асуулт бүр дээр цогцолбор бич.

• Хэрэв хүн Есүсийн дагалдагч болохыг хүсвэл юунд найдах ёстой вэ?

• Сүнслэг өсөлтийн талаар Петрийн хэлсэн гол үнэнийг та хэрхэн тайлбарлах вэ?

• “Амлалтын зарчим” гэж юу вэ?

Та нийтдээ хоёр хуудас бичих ёстой.