Lesson 11: Сайнмэдээний номлол

► Нэг суралцагч 1 Коринт 1:17-25–ыг ангид уншина. Алдагдсан хүмүүсийг аврах Бурханы арга зам юу вэ?

Үндэстнийг нь аварч чадах хүчийг еврейчүүд хайж байлаа. Тиймээс үүнийг батлах эрх мэдлийн тэмдэг болсон хүч чадалтай номлолыг тэд хүсэж байв.

Харин амьдралыг ойлгох мэргэн ухаан болон энэ дэлхийн амжилтыг харь үндэстнүүд хүсэж байлаа. Тиймээс хүссэнээ олж авахад нь туслах аргыг тайлбарласан номлолыг л тэд хүсэж байсан.

Загалмай бол бууж өгөх, золиослох гэсэн санааг илэрхийлдэг. Эрх мэдлийг хүссэн еврейчүүдийн хувьд энэ нь сул дорой байдал байв. Харин энэ дэлхийн мэргэн ухааныг хайсан харь үндэстнүүдийн хувьд энэ нь мунхаглал байлаа. Бодит байдал дээр Бурханы мэргэн ухаан, хүч чадал нь Христийн үхлээр харагдсан юм. Тиймээс загалмай нь Бурханыг мунхаг, сул дорой харагдуулсан боловч үнэндээ хүмүүсийн хамгийн сайн хүчин зүтгэлээс ч агуу үйлс байсан билээ.

Сайнмэдээ нь хүн төрөлхтний төрөлхийн, нүгэлт мөн чанарын эсрэг мэдээ бөгөөд хүмүүсийг гэмшиж, Бурханы өмнө бууж өгөхийг уриалдаг. Гэтэл хүмүүсийн хувьд хүсэж буй зүйлээ хэрхэн олж авч болох аргыг сонсмоор байдаг учраас энэ мэдээ магадгүй тэнэг санаа шиг харагдаж болох юм.

Бурхан сайнмэдээг ашиглан хүмүүсийг аврах сонголтыг хийжээ. Тэрбээр итгэгчдэд харилцаа үүсгэх даалгаврыг өгсөн байна. Номлох гэдэг нь зөвхөн олны өмнө зогсоод юм ярих төдий зүйл биш, харин сайнмэдээг дамжуулж байгаа олон талт харилцаа юм. Мэдээж олон нийтэд номлох нь Бурханы сонгосон арга биш гэж энд хэлэх гэсэнгүй. Харин сайнмэдээ нь Бурханы сонгосон арга гэдгийг хэлж байна.

► Загалмайн тухай номлол нь итгэдэггүй хүмүүсийн хувьд мунхаглал гэсэн эшлэл ямар санааг илэрхийлж байна вэ?

Номлох гэдэг нь Бурханы Үгийг дамжуулах янз бүрийн арга хэлбэрийг хамруулсан өргөн утга санаа юм. Гэхдээ бид энэ хичээлээр номлох гэсэн үгийг ердийн утгаар нь буюу Бурханы Үгийг цугларсан хүмүүст ярих гэсэн утгаар нь хэрэглэнэ.

Цугларсан бүлэг хүмүүст сайнмэдээг танилцуулан ярих нь сайнмэдээний номлол юм. Ийм номлол нь ямар нэгэн сэдэв, Библийн эшлэлийг зөвхөн танилцуулах бус, харин сайнмэдээг номлодог.

Сайнмэдээг номлогч нь ихэвчлэн сонсогчдоо ятгаж, тунхаглаж буй мэдээнд даруй хариу өгүүлэх, улмаар итгэлийн замд оруулахыг хичээдэг. Ийм номлол хүнийг шийдвэр гаргахад нөлөөлөх зорилготой.

Сайнмэдээний номлолоор ярих агуулгыг анхааралтай сонгодог. Мэдээж ийм номлол хөгжүүлж боловсруулах зорилго агуулдаггүй. Сонсож байгаа хүмүүст итгэх шийдвэр гаргах хэрэгтэй гэдгийг ойлгуулсан агуулгыг номлогч дамжуулна. Энэхүү агуулга нь сайнмэдээний суурь ойлголт, хэрхэн шийдвэр гаргах болон уг шийдвэрийн боломжит үр өгөөжийн талаар тайлбарласан номлол байдаг.

Номлол магадгүй чуулганых шиг чимээгүй, цэгцтэй суудалтай орчинд эсвэл ямар нэг зорилгоор цугласан олон хүний өмнө яригдаж болно. Номлолыг нааштай хүлээж авч ч болно, үгүй ч байж болно.

► Сайнмэдээг номлож болох ямар ямар орчныг та мэдэх вэ?

Сайнмэдээг чуулганд номлох болон янз бүрийн хэсэг бүлэг хүмүүсийн дунд номлох нь ялгаатай учраас бид эхлээд чуулганд сайнмэдээг номлох зааврыг өгнө. Энэхүү хичээлийн дараагийн хэсэгт бид чуулганаас гадуур сайнмэдээг номлох талаар удирдамж өгөх болно.

(1) Библийн эшлэлээс тайлбарла.

Бурханы Үг маш хүчирхэг учраас номлогч ашиглах ёстой. Эшлэл заавал урт байх эсвэл номлогч удаан ярьж, үг бүрийг нэг бүрчлэн тайлбарлах албагүй. Харин Библийн сайнмэдээний хэсгээс ярих ёстой юм. Номлогчийн ярианы гол санаа нь Библид суурилсан байх ёстой ба ингэснээр Бурханы Үгийн хүчийг ашиглах боломжтой. Харин эшлэлийг илэрхийлж байгаа утгаас нь өөр утга агуулгаар ашиглахаар сонгох ёсгүй.

(2) Гэмшил ба итгэл гэх нэр томьёог тодорхойл.

Сонсогчид эдгээр нэр томьёоны талаар буруу ойлголттой байж болно. Магадгүй гэмшиж амьдралаа зөв болговол Бурхан хүнийг хүлээн авдаг гэж бодож байж ч болох юм. Тэгвэл гэмшил гэдэг нь нүгэлдээ ихэд харамсаж, нүглээс чөлөөлөгдөхөд бэлэн байхыг хэлж байгаа гэдгийг хүмүүс мэдэх учиртай.

Сонсогчид итгэлийг шашин эсвэл шашны ёслолыг хэрэгжүүлэх гэж ойлгодог. Тиймээс авралын итгэл гэдэг нь Христийн эвлэрүүлэлд бүрэн итгэж найдах гэсэн утгатайг тэд ойлгох ёстой.

(3) Итгэлд ирэх мөчид хүн Христэд итгэгч болдгийг онцол.

Христэд итгэгч байх нь хэн болох, итгэгч болно гэдэг ямар учиртай талаар хүмүүс буруу ойлголттой явдаг. Хүмүүсийн бодлоор номлогчид итгэгчдийг сүсэг бишрэл ихтэй болгох, эсвэл чуулганыхаа нэг гишүүн болгохыг хүсдэг гэж ойлгодог. Номлогчид хүмүүсийг хатуу чанд байдлаар амьдрах ёстой гэж үздэг хэмээн тэд боддог. Гэвч нүгэлтэн гэмшиж, уучлалыг хүлээн авч, Бурхантай хувьчилсан харилцааг эхлэх үедээ л итгэгч болдог гэдгийг онцлон хэлэх ёстой юм.

(4) Хүмүүс өөрсдийгөө Христэд итгэгч гэж хэлдэг буруу шалтгаануудыг няцаа.

Зарим улсын ихэнх хүмүүс өөрсдийгөө Христэд итгэгч гэж үздэг. Тэд өөрсдийгөө чуулганд явдаг, сайн үйлс хийдэг, зарим үзэл ойлголтод итгэдэг эсвэл сүнслэг туршлага хураасан учраас Христэд итгэгч болсон гэж боддог ч байж болох юм. Тиймээс Христэд итгэх болон Бурхантай харилцаж амьдрах, гэмшсэний дараа дуулгавартай байх тухай онцлон ярих нь зүйтэй.

(5) Чуулганд хамрагддаггүй хүмүүст ч ойлгомжтой байхаар ярь.

Зөвхөн итгэгчдийн мэддэг нэр томьёог ашиглахаас зайлсхий. Сонсож байгаа хүмүүсийн тань хувьд ойлгомжгүй байж болох шашны ёс заншлыг бүү дурд.

► Танай хөршүүдийн хувьд ойлгомжгүй, харин чуулганы тань гишүүдэд танил байж болох ямар ямар нэр томьёо байдаг вэ?

(6) Уучлал гуйх, Бурхантай харилцаатай байх тухай болон мөнх амийг санал болгоорой.

Энэ бүхэн дахин төрөхийн хамгийн гол ашиг тус юм. Түүнчлэн үл итгэгчид дээр ирэх шүүлт, мөнхийн шийтгэлийг тайлбарлаж, нүгэлт хүний нөхцөл байдал ямар ноцтой байгааг хэл.

(7) Сайнмэдээнд дурдаагүй ямар нэг ашиг тусыг амлахаас зайлсхий.

Хэрэв хүмүүс чуулганаас ирэх материаллаг тусламж, амжилт, өвчнөөс эдгэрэх, амьдралын нөхцөл байдлаа сайжруулах зэрэг ашиг тусыг авралын сайнмэдээтэй холбож бодвол жинхэнэ гэмшилгүйгээр сайнмэдээг хүлээн авах гэж оролдож болох юм.

Тиймээс Бурхан хүний ​​амьдралыг удирдан чиглүүлж, ерөөж, асуудлыг шийдвэрлэхэд нь тусална гэдгийг та тайлбарлаарай. Гэхдээ Христийн дагалдагч болбол тэдний бүх асуудал шийдэгдэнэ гэх мэтээр бид амлах ёсгүй. Зарим хүмүүсийн хувьд хавчлагаас болж амьдрал нь улам хүндэрч ч болно.

(8) Христ дээр ирэхийг нутгийн чуулганы гишүүнчлэлтэй холбож болохгүй.

Хүн үнэхээр Христийг хүлээн авч итгэсэн бол чуулганы гишүүн болж болно. Тиймээс итгэсний дараа чуулганы гишүүнчлэлийн талаар ярих ёстой. Нүглээ гэмших ёстойг тайлбарлаж байхдаа чуулганы гишүүн болох нөхцөл шаардлагыг бүү ярь. Яагаад гэвэл сайнмэдээг тунхаглагч нь сонсож буй хүнээ Бурхантай уулзахад нь чиглүүлэх ёстой.

► Аврал авахтай холбоогүй, чуулганы гишүүнчлэлийн ямар ямар нөхцөл шаардлага байдаг вэ?

(9) Төлөвшсөн хүнээс нэхэгддэг шаардлагуудыг дөнгөж итгэж буй хүнд бүү тавь.

Нүгэл гэж ухамсарлаж байгаа зүйлээ гэмшихийг сонсож буй хүндээ уриал. Итгэгч болоод тодорхой хугацааны дараа мэдэж болох нарийн ширийн зүйлийг хэлэх хэрэггүй. Гэмшил, итгэлийн дуудлага нь өөрөө амаргүй сэдэв юм. Тиймээс сайнмэдээг үгүйсгэхэд хүргэж болох ямарваа хүндрэлийг битгий нэм.

(10) Юу хийхийг уриалж буйгаа тодорхой тайлбарла.

Сонсож буй хүн тань гэмшиж, Бурханаас уучлал гуйхаа мэдэж байгаа гэж битгий бодоорой. Урагш гарч ирээд, өвдөг сөгдөхөө мэдэж байгаа гэж ч бодох хэрэггүй. Тиймээс сонсож буй хүмүүстээ яг юу хийх хэрэгтэй байгааг та уриал. Мөн чуулганы орчинд байгаа бол ичимхий зантай хүмүүсийг яаж хамруулж болох талаар бас бодолцоорой.

Хүмүүс олон шалтгааны улмаас залбирахаар цуглардаг. Заримдаа пастор хүмүүсийг янз бүрийн хэрэгцээний төлөө залбирахыг уриалдаг. Энд жагсаасан удирдамж нь залбирлын бүх тохиолдлыг хамруулах албагүй. Харин сайнмэдээний номлолын дараа уриалгад хариу өгсөн хүмүүстэй хамт залбирахад зориулагдсан юм.

Авралын төлөө залбирагсдад туслах хүмүүс сайтар бэлтгэгдсэн байх ёстой гэдгийг пастор анхаарна. Пасторыг сайнмэдээнд уриалахад эдгээр туслагчид шинэ хүмүүст туслахад бэлэн байх учиртай.

Заримдаа туслах ёстой хүмүүс нь тус биш саад болох нь бий. Тиймээс асуудал гарвал пастор даруй анхаарч, туслахад бэлэн байх ёстой. Хэрэв ухаалаг бус зан авир, буруу зөвлөгөө гэх мэтээр саад болж байвал пастор үүссэн асуудлыг зохицуулж шаардлагатай арга хэмжээг авна.

Бид хүн гэмшиж, итгэж, авралын өөрчлөлтийг тэр даруйд туулж чадна гэж итгэдэг. Энэхүү итгэл үнэмшил маань сайнмэдээг эрэлхийлж буй хүмүүстэй цуг залбирахад чиглүүлдэг.

(1) Пасторын уриалгыг хүлээн авч буй хүмүүстэй ядаж нэг төлөвшсөн итгэгч хамт залбирах хэрэгтэй.

Шинэ хүнийг ганцааранг нь залбируулахаар орхиж болохгүй. Бид сайнмэдээнд хариу өгч буй хүмүүсийг ялаасай гэж хүсдэг шүү дээ.

(2) Уриалгыг хүлээн авагчаас яагаад залбирч байгааг нь асуу.

Шинэ хүн шууд авралын төлөө залбирна гэж бодох хэрэгггүй. Сайнмэдээний номлолын дараа ч хүмүүс янз бүрийн шалтгаанаар залбирахаар гарч ирж болно. Тиймээс туслахаар очсон итгэгчид залбирч байгаа хүнийг шууд тасалдуулах хэрэггүй боловч, тухайн хүнээс боломжийг ашиглан “Та Бурханаас юу хүсэж байна вэ?” гэж асуугаад үзэх хэрэгтэй. Тэгээд тэр хүний хэрэгцээний төлөө хамт залбираарай.

(3) Гэмшихийг хүсэж буй хүнийг урамшуулаарай.

“Та гэмшихийг хүсэж байна уу? Бурхан нүглээс тань чөлөөлөхийг та хүсэж байна уу?” гэж асуугаарай. Тэгээд Бурханд хандан гэмшин залбирахад нь урамшуул. Тухайн хүн пастор эсвэл хэн нэгэн хүнд онцгой буруу юм хийгээгүй л бол нүглээ заавал пасторт, эсвэл хэн нэгэнд наманчлах шаардлагагүй.

(4) Бурхан уучилдаг гэдгийг баттай хэлж өгөөрэй.

Бурханаас уучлал гуйж, уучилна гэсэн Бурханы амлалтад итгэх учиртайг хэлж өгөөрэй. Хэрэв тухайн хүн эргэлзээд байвал Библи дээрх амлалтуудыг үзүүлээрэй (1 Иохан 1:9, Иохан 3:16, Ром 5:8).

Хэрэв хүн өөрийнхөө үгээр залбирч чадахгүй байвал туслахаар очсон итгэгч залбирал хэлж, дагуулах маягаар ийнхүү залбирч болно.

“Эзэн минь, би мөнхийн шийтгэл хүртвэл зохих нүгэлтэй хүн гэдгээ мэдэж байна. Нүглийг минь уучлаач. Би одоо бүгдийг нь орхихийг хүсэж байна. Та намайг авраач. Би аврагдах зохистой учраас биш, харин Есүс миний төлөө үхсэн учраас намайг авраач. Таны авралд баярлалаа. Энэ цагаас эхлэн би Таны төлөө амьдрах болно.”

Дөнгөж ирсэн хүний хувьд ялалтын залбирлаар залбирах нь ихэнхдээ амаргүй байдаг. Мөн тухайн хүнд орхихыг хүсэхгүй байгаа нүгэл ч байж болно. Чин үнэнээсээ гэмшихээс нааш тийм хүн авралын итгэлтэй болж чадахгүй.

(5) Итгэлд ирсэн хүнээс гэрчлэл байгаа эсэхийг нь асуугаарай.

Хэрэв Христийг хүлээн авагч нь ялалтын залбирал хийж чадсан бол түүнээс “Бурхан таны төлөө юу хийсэн бэ?” гэж асуугаад тодорхой гэрчлэн ярих урам зоригийг өгөөрэй. Магадгүй тэр хүн чуулганд гэрчлэл хийж ч болно. Ямартай ч ядаж л хамт залбирсан хүндээ гэрчлэлээ хуваалцах нь чухал юм.

(6) Авралын талаар тайлбарласан хэвлэмэл материалыг өг.

Залбиралд тусалж байгаа хүн авчирсан хэвлэмэл материалаа тухайн шинэ хүнд өгөх хэрэгтэй. Иймэрхүү материалууд түүнд авралын тухай мэдэхэд нь болон бусдад тайлбарлан ярихад нь тусална.

(7) Дагалдагч болох эхний алхмаа хийхэд нь туслаарай.

Пастор юм уу, төлөвшсөн итгэгчтэй уулзах нь дагалдагч болох эхний алхам байдаг. Залбирлаар шинэ итгэгч юу болж байгааг сайн ойлгосон байх ёстой. Үүний дараа жижиг бүлэгт хамрагдах, эсвэл хэн нэгэнтэй байнга уулзаж ярилцдаг болж болно.

Мөн хэн нэг нь тухайн хүний гэрт зочилж, Христийг хүлээж авсан талаар гэрийнхэн нь мэдсэн эсэхийг лавлаж, тэднийг чуулганд урьж болно. Магадгүй тэдэнд сайнмэдээ тараах боломж ч гарч болох юм.

► Танай чуулганд шинэ хүнтэй залбирах ямар арга барил байдаг вэ? Дээр жагсаасан санаанууд дээр нэмэх юу байна вэ?

Гадаа номлол хийх нь чуулганд ирдэггүй хүмүүст хүрэх зорилготой юм. Гэхдээ сонсож байгаа хүмүүсийн зорилго өөр байдаг учраас анхаарал тавихгүй байх магадлал их. Тиймээс гадаа номлох их хэцүү. Магадгүй чимээ шуугиан, саад ихтэй байна. Чуулганд байдаг шиг мөргөл хүндэтгэлийн аятай уур амьсгал мэдээж тэнд байхгүй.

Гадаа номлох үед номлогч нь хүмүүст сонсогдохуйц хангалттай чанга, тодорхой дуу хоолойтой байх, эсвэл ямар нэг өсгөгч ашиглах шаардлагатай болдог.

Хүмүүсийн анхаарлыг татах нь гадаа номлол хийх үйлчлэлийн эхний бэрхшээл юм. Тэр хавиар явж байсан хүмүүс сонсох эсэхээ тэр даруй шийддэг. Зарим нь хэдэн минут сонсож болох юм. Олонх нь цааш сонирхох эсэхээ шийдэхээс өмнө хэдэн өгүүлбэрийг л сонсож амждаг.

Номлогч богино өгүүлбэрээр ярьж, өгүүлбэр бүрдээ тодорхой санаа, мэдэгдлийг хийх хэрэгтэй. Номлогчийн хэлж буй өгүүлбэр болгон олон хүний хувьд сонссон эхний өгүүлбэр нь байх боломжтой гэдгийг анхаарах ёстой. Тиймээс өгүүлбэр бүрдээ тодорхой санааг хэлэх нь анхаарал татна. Хэрэв амжилттай болж хэсэг хүмүүс сонсож эхэлбэл богино дүрслэл ярьж, гол санаагаа тайлбарлаарай.

Боломжтой бол номлогч хэсэг итгэгчдийг дагуулах хэрэгтэй. Хажуугаар нь өнгөрч байгаа хүмүүс бусдыг сонсож байгааг харвал зогсоод сонсох магадлал өндөр байдаг. Хэрэв хөгжимчин байвал номлолын өмнө хөгжим тоглох нь хүмүүсийг цуглуулахад тустай.

Тэгээд номлогч сонсогчдод хандан, урагш гарч ирээд аврал авахын төлөө залбирахыг уриалах ёстой.

Мэдээж хэвлэмэл материалаа тухайн газар байгаа хүмүүст тараана.

► Танай гэрийн ойролцоо гадаа номлол хийх ямар боломж байгаа вэ?

Суралцагч бүр бэлтгэсэн сайнмэдээнийхээ номлолыг харна. Сайнмэдээг номлох 10 удирдамжаа хэрхэн биелүүлэх талаар эргэцүүлж бодно. Тэгээд үүнийгээ хэрхэн засаж сайжруулах төлөвлөгөө гаргана.

Суралцагч бүрийн номлолыг анги дээр ярих цаг байхгүй байж болох ч, жишээ болгох үүднээс хэд хэдэн хүний номлолыг сонсох хэрэгтэй.

Дараагийн хичээл дээр энэ хичээлийг дахин үзэхгүй. Харин суралцагчид сайнмэдээний номлолоо хийж, хамтдаа үүнийгээ хэлэлцэх юм. Суралцагчид бүтэн номлол ярих шаардлагагүй, харин тус бүр 5-7 минутын танилцуулга болгон хураангуйлж ярих хэрэгтэй. Дадлага хийсний дараа дараагийн төлөвлөсөн хичээлийн цаг дээр 12-р хичээлийг үзнэ.

Энэ хичээл дээр заасан удирдамжийн дагуу сайнмэдээний номлол боловсруул. Бүтэн номлол бичих албагүй ч гол санааг бичсэн байх ёстой. Үүнийгээ дараагийн хичээл дээр авчирч, хэлэлцүүлнэ.