Lesson 2: Итгэлд ирэх талаарх Теологи

Ангийн удирдагчийн тэмдэглэл: Энэ хичээл дээр ашиглах Бичвэрийн хэсгүүдээс гадна зүүлт тайлбарт олон Бичвэрийн эшлэлүүд бий. Ангид хичээлийн үеэр бүх эшлэлийг унших хангалттай цаг гарахгүй байж магадгүй. Та зарим эшлэлийг уншихаар сонгох боломжтой.

Итгэлд ирэх гэдэг нэр томъёо нь хүн аврагдах үед тохиолддог өөрчлөлтийг хэлдэг. Сайнмэдээний зорилго нь үл итгэгчийг итгэлд ирэх туршлага руу хөтлөх явдал юм.

► Нэг суралцагч 1 Тесалоник 1-р бүлгийг ангид уншина. Тесалоникчуудыг итгэлд ирэх үед тохиолдсон өөрчлөлтийн нарийн ширийн зүйлс юу байв?

Хүн яагаад итгэлд ирэх ёстой, мөн хүн итгэлд ирэх үед юу тохиолддогийг ойлгохын тулд итгэлд ирэхээс өмнөх нүгэлтний нөхцөл байдлыг бид ойлгох ёстой болно.

► Хүн итгэлд ирэхээс өмнөх нөхцөл байдлыг та хэрхэн дүрслэх вэ?

Адамын нүглээс болж бүх хүн Бурханаас тусгаарлагдсан мөн чанартай төрдөг болжээ (Ром 5:12). Энэ нь хүн бүр хувиа хичээж, өөр өөрийн замаар явдаг гэсэн үг юм.

Итгэлд ирээгүй нүгэлтнүүдийн дөрвөн шинж байдал

Хүн сонголт хийж эхэлмэгцээ нүгэл үйлдэж эхэлдэг. Хүн бүр олон нүгэлт үйлдлийнхээ улмаас гэм буруутай (Ром 3:23).

Нүгэл бол Бурханы хуулийг зөрчих явдал юм (1 Иохан 3:4, Иаков 2:10-11). Бурхан туйлын шударга учраас нүглийг зүгээр өнгөрүүлэхгүй бөгөөд хүн бүр хийсэн бүхнийхээ төлөө шүүгдэнэ (2 Коринт 5:10, Илчлэл 20:12-13). Ямар ч хүний буруутай эсэх талаар болон түүний хүртэх ёстой шүүлтийн талаар маргах зүйл байхгүй. Нүгэлтэн бүр хэдийн яллагджээ (Иохан 3:18-19).

Итгэлд ирээгүй нүгэлтэн Бурханы дайсан юм (Ром 5:10). Бурханы эсрэг үйлдсэн гэмт хэргээ арилгахгүй л бол нүгэлтэн Бурхантай харилцаатай байх боломжгүй.

Нүгэлтэн хүсэл тачаалдаа ялзарсан (Ефес 2:3) учраас нүгэлтний итгэлд ирэхээс өмнөх нөхцөл байдал нь Бурхантай харилцах ямар ч боломжгүй юм. Мөн тэрээр нүглийн боол учраас өөрийнхөө нөхцөл байдлыг өөрчлөх хүчгүй (Ром 5:20, Ром 7:23) аж.

Тэгвэл итгэлд ирээгүй нүгэлтэнд хэрэгтэй аврал гэж юу вэ? Нүгэлтэн гэм буруутай учраас аврал нь уучлал гэсэн утгатай. Тэр мөн Бурханы дайсан учраас аврал нь эвлэрүүлэл юм. Хүн гажуудаж ялзарсан учраас аврал нь цэвэрлэх гэсэн утгыг ч агуулна. Түүнчлэн хүн хүчгүй учраас аврал нь чөлөөлөлт юм. Эдгээр нь нүгэлт хүнд хэрэгтэй авралын цөөн хэдэн талбар юм.

Итгэлд ирэх мөчид нүгэлтэн уучлагдаж, Бурхантай эвлэрч, цэвэрлэгдэн, нүглийн хүчнээс чөлөөлөгддөг. Паул Коринтын итгэгчдийн итгэлд ирэхээс өмнөх нүгэлт нөхцөл байдлыг дүрслэхдээ тэдний олон аймшигтай нүглийг дурдсан байдаг. Тэгээд тэр цааш нь “гэвч... угаагдсан, ариусгагдсан, та нар зөвтгөгдсөн…” (1 Коринт 6:11) гэж бичжээ.

Хэн ч нүглийнхээ төлөөсийг өөрөө төлж чадахгүй. Нүгэл нь хязгааргүй Бурханы эсрэг үйлдсэн гэмт хэрэг бөгөөд үүнийг төлж чадах хязгааргүй үнэ цэнтэй ямар нэг зүйл хүмүүст байхгүй юм.

Хүмүүс энэ хэрэгцээгээ хангах юу ч хийж чадахгүй төдийгүй, авралыг гүйцэлдүүлж чадах ямар ч болзол шаардлагыг тэдэнд зориулан тогтоож өгөх боломжгүй байсан (Галат 3:21). Хэрэв хүмүүс авралыг өөрсдөө олж авах боломжтой байсансан бол Есүс загалмай дээр үхэх ямар ч хэрэггүй байх байв (Галат 2:21).

► Хэрэв Бурхан биднийг уучлахыг хүссэн юм бол загалмайгүйгээр зүгээр л аварч яагаад болоогүй юм бэ?

Бурхан ариун бөгөөд шударга учраас үнэн ба шударга ёсны зарчмын дагуу шүүдэг (Ром 2:5-6).

Христ төлөөсийг төлөөгүй байсан бол гэж төсөөлж үзье. Хэрэв Бурхан золилтгүйгээр нүглийг зүгээр л уучилсан бол юу болох вэ?

Хэрэв Бурхан золилтгүйгээр нүглийг уучилсан бол:

• Нүгэл нь ноцтой зүйл биш байх байсан.

• Бурхан шударга биш, мөн ариун ч биш гэсэн үг.

• Аливаа хүн зөвийг эсвэл бурууг үйлдэж байгаа эсэх нь Бурханы мэлмийд онцын ялгаагүй харагдана гэсэн үг.

Хэрэв золилтгүйгээр уучлал өгөгдсөн бол Бурханыг шударга бөгөөд ариун хэмээн мөргөн хүндлэх боломжгүй болох байлаа. Золилтгүй уучлал гэдэг нь эцсийн дүндээ Бурханыг хүндэтгэх бус харин огтоос үл хүндэтгэсэн хэрэг болох байв.

Гэсэн ч Бурхан хайрладаг бөгөөд уучлахыг хүсдэг Бурхан. Хэдийгээр энэ нь тэдний хүртэх ёстой зүйл байсан ч бүх хүн төрөлхтнийг нүгэлт нөхцөл байдалд нь орхихыг, мөнхөд хаягдаж гээгдэхийг Бурхан хүсээгүй юм.

Загалмай дээр Есүсийн өргөсөн тахил нь нүглээс болж нэхэгдэж байсан хязгааргүй үнэ цэнийг төлсөн. Учир нь Есүс (1) ямар ч нүгэлгүй байснаараа (төгс бөгөөд Түүнд ямар ч аврал хэрэггүй, 2 Коринт 5:21), мөн (2) Бурхан бас хүн, аль аль нь байснаараа шалгуурыг хангажээ.

Түүнчлэн уучлалыг хүртэх үндэс нь золилт байсан юм. Тиймээс гэмшиж, Түүний амлалтад итгэсэн хүнийг Бурхан уучлах боломжтой болжээ. Загалмай дээрх тахил золиосыг ухаарсан хэн ч нүгэл нь Бурханы хувьд ямар ноцтой зүйл гэдгийг ойлгож чадна.

Золилт бол амлалтад нь итгэсэн нүгэлт хүнийг зөвт Бурхан Өөрөө зөвт хэмээн тооцох арга зам юм. Ром 3:20-26-р эшлэлд энэхүү золилт хэрхэн явагдсан талаар логик учир шалтгааныг тайлбарласан байдаг.

Бурханаас өгөгдсөн авралыг авах цорын ганц арга зам бий гэдгийг Библи бидэнд заадаг. Хэрэв хүн Христэд итгэх нигүүлслээр ирдэг авралыг үгүйсгэвээс аврагдаж чадахгүй (Марк 16:15-16, Үйлс 4:12, Еврей 2:3).

Тийм учраас аврал зөвхөн нигүүлслээр ирэх бөгөөд үүнийг итгэлээр хүлээн авах тухай сургаалыг ойлгох нь маш чухал юм. Аврал зөвхөн нигүүлслээр л ирнэ. Яагаад гэвэл авралыг олж авах, хүртэж болох өөр юу ч байхгүй. Үүнийг зөвхөн итгэлээр хүлээж авна. Учир нь бидний хувьд Бурханы амлалтад итгэхээс өөр хийж чадах зүйл үнэндээ байхгүй билээ.

► Аль нь эхэнд тохиолддог вэ: Хүний доторх Бурханы ажил уу? Бурханд хандсан хүний хариу үйлдэл үү?

Бурханы нигүүлсэл үл итгэгчийн зүрх сэтгэлд хүрч, нүглийг нь ялладаг учраас хүн уучлагдахыг хүсдэг (Тит 2:11, Иохан 1:9, Ром 1:20). Нүгэлтэн Бурханы тусламжгүйгээр нүглээ хаяж чадахгүй. Үл итгэгч хүнд сайнмэдээнд хариу үйлдэх чадварыг өгдөг нь Бурхан юм (Иохан 6:44). Хэрэв хүн аврагдаагүй бол нигүүлсэл дутсаных бус, харин Бурханы түүнд өгсөн нигүүлсэлд тухайн хүн хариу үйлдээгүйгээс болсон байдаг.

Есүс бүх дэлхий ертөнцийн нүглүүдийн төлөө амиа өргөсөн бөгөөд Бурхан хүн бүрийг аврахыг хүсдэг (2 Петр 3:9, 1 Иохан 2:2, 1 Тимот 4:10). Бурханы нигүүлслээр сайнмэдээнд хариу үйлдэх чадвар бүх хүнд өгөгдсөн байдаг боловч Тэрбээр хэнийг ч албаддаггүй. Тиймээс Бурхан үл итгэгчийг дуудаж, гэмших ба итгэх сонголтыг өгдөг (Марк 1:15).

► Гэмшил гэж юу вэ?

Гэмшил гэдэг нь нүгэлтэн өөрийнхөө гэм буруутай, шийтгэл хүртвэл зохих байдлыг ухамсарлаж, нүглүүдээ орхиход бэлэн гэсэн утгатай.

Исаиа номын энэхүү эшлэлд гэмшлийн талаар:

Хорон муу нь замаа, буруу нэгэн нь бодол санаануудаа орхиг. Өөрийг нь өрөвдөх ЭЗЭН өөд эргэг, өгөөмрөөр уучлах Бурханд маань эргэг (Исаиа 55:7).

Гэмшил гэдэг бол нүгэлт хүн Бурханы уучлалыг хүртэхээс өмнө зам мөрөө засан, Бурханы өмнө өөрийгөө зөвт болгоно гэсэн үг биш. Тэгэх ч боломжгүй. Учир нь хүн нүглийн боолчлолд байгаа бөгөөд өөрийгөө чөлөөлж чадахгүй. Харин нүгэлтэн өөрийг нь нүглүүдээс нь чөлөөлж аврахыг Бурханаас хүсэх ёстой юм.

► Аврал зөвхөн нигүүлслээр өгөгдөх юм бол гэмшил ямар хэрэгтэй юм бэ?

Итгэл нь уучлагдах цорын ганц шаардлага хэдий ч Христэд итгэх жинхэнэ итгэл нь хүн нүглүүдээ гэмших гэмшилд үргэлж хөтөлдөг. Христ рүү эргэх (итгэх) болон нүглээс буцах (гэмшил) нь нэгэн зэрэг тохиолддог боловч нүглээс буцах боломжтой болгож буй нь итгэл юм. Энэхүү авралын итгэл нь Бурханы бэлэг билээ (Ефес 2:8-9). Хэрэв хүн гэмшихийг хүсэхгүй байгаа бол тэр хүн нүглээс аврагдахыг ч хүсэхгүй байна гэсэн үг.

Гэмшихгүй байгаа хүн нүглийн хорон муу чанарыг хүлээн зөвшөөрөхгүй байна гэсэн үг. Хэрэв хүн нүглээс яагаад эргэх ёстойгоо ойлгохгүй байгаа бол түүний нүгэл үнэхээр хорон муу гэдгийг харж чадахгүй байна. Түүнчлэн хүн нүглийг хорон муу гэж харахгүй байгаа бол яагаад түүнд уучлал хэрэгтэйг ч сайн ойлгохгүй.

Хэрэв хүн өөрийгөө гэм буруутай, шийтгэл хүртэх зохистой гэж үзэхгүй л байгаа бол тэр хүн ерөөсөө гэмшээгүй байгаа хэрэг. Мөн тэрээр өөрийгөө нүгэлтэн гэж хүлээн зөвшөөрсөн ч, нүгэл үйлдэхийг нь зөвшөөрөх шашинтай байхыг хүсэж байгаа бол тэр хүн мөн л гэмшээгүй гэсэн үг. Учир нь түүнийг гэм буруутай болгодог зүйлийг тэр үргэлжлүүлэн хийхийг хүсэж байна.

► Авралын итгэлтэй хүн юунд итгэдэг вэ?

(1) Өөрийгөө зөвтгөх юуг ч хийж чадахгүй.

Нигүүлслийн учир итгэлээрээ аврагдсан нь та нараас бус харин Бурханы бэлэг бөгөөд үйлсээр чинь биш тул хэн ч үл сайрхах болно (Ефес 2:8-9).

Аврагдахын тулд хийж чадах юм (үйлс) байхгүй, бүр өчүүхэн ч байхгүй гэдгийг тэр ухаарсан байдаг.

(2) Христийн тахил золиос түүнийг уучлахад хангалттай.

Тэр Өөрөө бидний нүглийн төлөөх эвлэрүүлэл бөгөөд зөвхөн бидний нүглийн учир төдийгүй, хамаг ертөнцийн нүглийн учир билээ (1 Иохан 2:2).

Тайвшруулал гэдэг нь биднийг уучлал хүртэх боломжтой болгож буй тахил золиос гэсэн утгатай.

(3) Бурхан түүнийг итгэлийнх нь үндсэн дээр л уучилсан.

Бид нүглээ улайвал итгэмжит, зөвт Тэрээр нүглийг маань уучилж, бүхий л зүй бусаас биднийг цэвэрлэнэ (1 Иохан 1:9).

Аврал авахад нэмэлт шаардлага бий гэж үзэх юм бол, хүн зөвхөн нигүүлслээр биш харин үйлсийн оролцоотой аврагдана гэж бодоход хүрнэ.

► Нэг суралцагч Үйлс 26:16-18-ыг ангид уншина. Паулын үйлчлэлийн талаар эдгээр эшлэлд юу гэж хэлсэн бэ?

Паулын үйлчлэл нь хүмүүсийг итгэлд ирэхэд нь дагуулах байв. 18-р эшлэлд итгэлд ирэх талаар өгүүлжээ. Үүнд харанхуйгаас гэрэл рүү, Сатаны эрх мэдлээс Бурхан руу эргэх, уучлалыг хүлээн авах, ариусгагдсан хүмүүсийн өвийг хүлээн авах зэрэг нь багтдаг. Энэ нь Христэд итгэх итгэлээр боломжтой болдог.

Үл итгэгчээс итгэгч болох нь агуу хувьсан өөрчлөлт юм. Библид үүнийг шинэ бүтээл (2 Коринт 5:17) гэж хэлсэн бөгөөд хуучин зүйлс нь өнгөрөн одож, бүх зүйл шинэ болжээ.

[1]Итгэлд ирсэн хүн Бурханд бүрэн үнэнч байхтай зөрчилдөх аливаа шашны зан үйл болон шүтээнүүдийг орхидог (1 Тесалоник 1:9).

Энэхүү өөрчлөлт нь ихэвчлэн бусдыг гайхшруулдаг (1 Петр 4:3-4). Хүн яаж ингэж их өөрчлөгдөж болдгийг хүмүүс ойлгодоггүй. Магадгүй тухайн хүний хамгийн дотны найз нөхөд, хамаатан садан нь түүнийг хавчин гадуурхаж ч болох (Матай 10:34-36).

Итгэлд ирсэн хүн дэлхий ертөнцийн хүсэл таашаал, эрхэмлэх зүйлсийг орхидог. Энэхүү ялгаатай байдал нь түүний итгэлд ирсний нэг нотолгоо болдог (1 Иохан 2:15). Хүн итгэгч болохдоо бусад итгэгчдийг хайрлаж, тэдэнтэй нөхөрлөхийг хүсдэг (1 Иохан 3:14).

Итгэгч болох үед хүний хүсэл өөрчлөгддөг. Гэсэн хэдий ч түүнийг сорих уруу татлагууд байсаар байдаг. Харин тэрээр нүгэлт хүсэлдээ захирагдахаа больсон тул нүгэл үйлдэх уруу татлагыг эсэргүүцэх чадвартай болдог. Мөн тэрээр Бурханы нигүүлслийг амсаж мэдсэн учраас Бурханы Үгийг хүсэмжилдэг (1 Петр 2:2-3).

Хүн итгэлд ирээд Бурханыг хайрлаж, Түүнийг баярлуулахыг хүсдэг. Түүний хувьд Бурханы тушаалууд нь хатуу чанд, тааламжгүй санагддаггүй (1 Иохан 5:2-4).

Итгэлд ирсэн хүн Бурхантай харилцах хувийн харилцаагаа анхаарах бөгөөд энэ нь түүний залбирлаар илэрхийлэгддэг (1 Коринт 1:2).

► Хүн итгэгч болох үед ямар өөрчлөлтүүд бий болдог талаар өөрийн бодлыг хуваалцана уу?

Библид хүн дахин төрөх үед бүх зүйлс шинэ болдог гэж хэлдэг. Тэдгээр шинэ зүйлс нь:

• Шинэ мөн чанар—тэнгэрлэг мөн чанар (2 Петр 1:4)

• Шинэ Мастер/Эзэн—Христ, Ариун Сүнсээр дамжуулан (Матай 23:10, Ром 8:14)

• Бурханы Үгийг хүсэмжлэх шинэ дуршил (1 Петр 2:2)

• Хайрын шинэ хандлага (Ром 5:5, 1 Иохан 4:7-8)

• Бурханы хүү, охин байх шинэ харилцаа (Иохан 1:12)

• Ариун Сүнс дотор шинэ Туслагч (Иохан 14:16, Ром 8:26-27)

• Есүс Христийн дотор шинэ өмгөөлөл, хэрэв бид нүгэлд унах аваас (1 Иохан 2:1)

• Мөнх амийн шинэ, амьд найдвар (Иохан 3:15, 1 Петр 1:3)

► Хэн нэгнийг итгэгч гэж бодоход хүргэдэг ямар буруу шалтгаан байж болох вэ?

Хүн өөрийгөө дараах шалтгааны улмаас итгэгч гэж бодож болох юм. Учир нь:

• Баптисм хүртсэн.

• Чуулганд хамрагддаг гишүүн.

• Христитгэлийн тодорхой хэдэн онол сургаалд итгэдэг.

• Шашны тодорхой зан үйлийг дагадаг.

• Зөвийг үйлдэх хэм хэмжээг дагадаг.

• Сүнслэг туршлагууд байсан.

• Итгэлээ тунхаглаж, шийдвэр гаргасан.

Библийн дагуу эдгээрийн аль нь ч хүнийг итгэгч гэдгийг батлахад хангалтгүй юм.

Библид бид дахин төрсөн гэдгээ баттай мэдэж чадна гэж хэлдэг. Бурхан биднийг хүлээж авсан гэдэгт бид итгэлтэй байж болно. Бид айдастай амьдрах шаардлагагүй, учир нь биднийг Бурханы хүүхдүүд болгон үрчлэн авсан гэдгийг Бурханы Сүнс баталдаг (Ром 8:15-16).

Энэхүү баталгаа нь үнэхээр бүрэн дүүрэн бөгөөд бид Шүүлтийн өдрөөс айх шаардлагагүй юм (1 Иохан 4:17). Тэнгэрийн улс намайг хүлээн авна гэж найдаж байна гэж хэлдэг хүмүүсээс ч илүү найдвартай баталгаа бидэнд бий. Аврал нь хүн төрөлхтөнд ерөнхий байдлаар өгөгдсөн гэж итгэх нь хангалтгүй юм. Харин хүн өөрөө уучлагдсан гэдгээ мэддэг байх ёстой.

► Хүн өөрийгөө зөвтгөгдсөн гэдгээ яаж мэдэх вэ?

Зарим хүн өөрийнхөө мэдрэмжид найдаж болох ч мэдрэмж нь өөрчлөгддөг бөгөөд төөрөгдүүлдэг.

Өөрчлөгдсөн амьдрал нь хүнийг итгэлд ирсэн гэдгийн нотолгоо боловч энэ нь итгэлд ирэх эхний мөчид харагддаггүй. Авралын үр дүн хараахан харагдах болоогүй байдаг. Тиймээс өөрчлөгдсөн амьдрал нь авралын баталгааны үндэс биш юм.

Итгэгч хүн авралд хүргэх Бичвэрийн замыг дагаж буйгаа мэдсэнээр авралдаа итгэлтэй байж чадна. Хэрэв хүн үнэн сэтгэлээсээ гэмшиж, Библид заасны дагуу итгэсэн бол Бурхан түүнийг уучилсан гэдэгт эргэлзэх хэрэггүй юм. Хүн гэмшиж, итгэх мөчид Бурханы хүүхэд болсон гэдгийг Тэр Сүнсээрээ гэрчилдэг.

Хүн үнэн сэтгэлээсээ гэмшээгүй атлаа өөрийгөө Бурханаас төрсөн гэж мэдрэхийг оролдвол тэрээр эргэлзэж, өөрийгөө хуурч болох юм.

Хэрэв хүн (1) үнэн сэтгэлээсээ гэмшиж, (2) Бичвэр дэх Бурханы амлалтад итгэн, (3) Сүнсний гэрчлэлийг хүлээн авбал тэр хүн хууртагдахгүй. Энэхүү баталгаа нь туйлын найдвартай бөгөөд Бурханы Үгэнд үндэслэсэн юм. Бурхан амлалтаа үргэлж сахидаг.

Эвлэрэл: Энэ үг өмнө нь дайснууд байсан бол одоо эв найрамдалтай болсон гэсэн санааг агуулдаг. Авралаар Бурхан биднийг Өөртэйгөө эвлэрүүлж, бид Түүнтэй эв найрамдалтай болсон (2 Коринт 5:19, Ром 5:1).

Цагаатгал: Энэ үг тэмдэглэгээг арилгасан гэсэн утгатай. Авралаар бидний нүглийн бүртгэл устаж арилсан юм (Еврей 8:12).

Эвлэрүүлэл: Энэ үг хэн нэгний уурыг намжаахын тулд ямар нэг юмыг өгсөн гэсэн утгатай. Аврал дахь Есүсийн өргөсөн тахил нь бидний эсрэг чиглэсэн Бурханы зөвт байдлын уур хилэнг намжаасан юм (1 Иохан 2:2).

Аврал: Энэ үг нь хүн өөр хэн нэгний эрхшээлээс аврагдсан гэсэн утгатай. Авралаар бид Сатаны эрхшээл, нүглийн хүчээс чөлөөлөгдсөн юм (Лук 1:74, Ром 6:6, 12-18).

Золилт: Энэ үг хэн нэгнийг эрх чөлөөтэй болгохын тулд үнийг төлж авах гэсэн утгыг агуулдаг. Авралаар биднийг нүглийн боолчлол ба шийтгэлээс чөлөөлөх үнэ төлөөсийг Есүс үхлээрээ төлсөн юм (Ефес 1:7, Тит 2:14).

Зөвтгөл: Энэ үг нь хэн нэгнийг зөвт, гэм буруугүй гэж зарласан гэсэн утгыг агуулдаг. Авралаар гэм буруутай нүгэлтний оронд Есүс зовж шаналсан учраас нүгэлтэн зөвт тооцогддог (2 Коринт 5:19, Ром 5:1).

Ариусгал: Энэ үг нь хэн нэгнийг ариун болгох гэсэн утгатай. Авралаар гэм буруутай нүгэлтэн Бурханы хүүхэд болж өөрчлөгддөг. Шинэ гэрээний олон захидалд итгэгчдийг “ариун хүмүүс” хэмээн нэрлэсэн байдаг (Ефес 1:1, Колоссай 1:1, Филиппой 1:1).

Үрчлэл: Энэ үг нь хэн нэгэн хүн өөр хүний хууль ёсны хүүхэд болно гэсэн утгатай. Авралаар бид Бурханы хүүхдүүд болсон (Иохан 1:12, Ром 8:15).

Дээрээс төрөх / Шинээр төрөх: Энэ үг нь хэн нэгэн амийг дахин эхлүүлэх гэсэн утгыг агуулдаг. Авралаар итгэгчийн шинэ амьдрал эхэлдэг (Ефес 2:1, Иохан 7:38-39, Галат 4:29, Иохан 3:5).

Тамгалах: Энэ үг нь алив зүйлийг хэн өмчилж байгааг илэрхийлэх тэмдэглэгээ гэсэн утгатай. Авралаар бидний доторх Ариун Сүнс биднийг Бурханд хамаатай болсныг тодорхойлж өгдөг (Ефес 1:13).

Аврал нь итгэлээр дамжуулан нигүүлслээр ирдэг гэдгийг сонсоод өөрийгөө аврагдсан гэж амарханаар боддог хүмүүс байдаг. Гэмших хэрэгтэй гэдгийг ойлгоогүй учраас тийм хүн жинхэнээсээ гэмшээгүй байдаг ба өөрийгөө Бурханы шийтгэл хүртэх ёстой нүгэлтэн гэдгээ огт олж хараагүй байдаг аж. Тийм хүн нигүүлслийг өөрийнхөө замаар явах гэж ойлгодог. Христитгэлийн үнэнийг хүлээн зөвшөөрсөн учраас тэр өөрийгөө Христэд итгэгч болсон гэж боддог боловч үнэндээ ямар ч өөрчлөлт байдаггүй. Тийм хүн хэзээ ч өөрийн хүслээсээ татгалздаггүй. Харин Бурханыг амьдралынхаа нэг хэсэг болгон хүлээн зөвшөөрсөн атлаа ихэвчлэн өөрийнхөө хүслийг дагаж амьдардаг. Бичвэрт заасан Бурхантай харилцах авралын харилцааны эхлэл ийм байдаггүй.

(1) Энэ хичээлээр бид авралын шинж чанарыг агуулсан 10 үгсийн талаар сурсан. Эдгээрээс аль нь таны Бурхантай харилцах харилцаанд хамгийн чухал санагдаж байгаа талаар хэд хэдэн догол мөрөнд тайлбарлан бичнэ үү. Өөр илүү бодож үзэх хэрэгтэй санагдсан зүйл байсан уу?

(2) Танай улс оронд, ялангуяа таны амьдардаг газарт хүмүүс Христэд итгэгч байх гэдгийг юу гэж ойлгодог вэ? (христитгэлийн хэлбэр, уламжлалд үндэслэн) Хэд хэдэн төрлийн бүлэг хүмүүсийн өмнөөс, тэд Христэд итгэгч хүний талаар ингэж хэлэх байсан гэж 2-3 хуудас төсөөлж бичнэ үү. Итгэгчдийн гэмшил, авралын итгэл болон бусад онол сургаалын тал дээр тэдэнд ямар алдаатай ойлголт, үзэл баримтлал байгааг тайлбарлаарай.