Суралцагчдаас сайнмэдээ танилцуулах “Гүүр” зургийг ашиглан сайнмэдээг танилцуулсан талаар тайланг нь сонсоно.

Паул Ром руу аялахаар төлөвлөсөн ба тэнд сайнмэдээ тарааж (Ром 1:15), итгэгчдийг хүчирхэгжүүлээд зогсохгүй (Ром 1:11-12), Ромын чуулганаас Испани хүрэх сайнмэдээний аялалдаа дэмжлэг хүсжээ (Ром 15:24).

Ромын чуулганд бичсэн захидлын зорилго нь Паул өөрийгөө болон авралын теологийнхоо талаар Ромын итгэгчдэд танилцуулах явдал байлаа. Энэхүү захиандаа авралын теологийг тайлбарласнаар дэлхий даяар хийгдэж буй илгээлтийн ажлын үндэс суурийг харуулжээ.

Тухайн үед Испани нь дэлхийн соёл иргэншлийн төв болсон эртний Ромын колоничлолд байдаг баруун Европын улс байсан бөгөөд Паул Испани руу явах сайнмэдээний анхны аялалдаа Ромын чуулганаас дэмжлэг авахаар төлөвлөж байсан.

Паулын Ром руу явах сайнмэдээний аялал түүний төлөвлөсний дагуу болоогүй юм. Тэр Йерусалимд баривчлагдсан. Тэрээр үүнийг шударга бус гэж үзсэн учраас Цезарьт давж заалдсан. Хөлөг онгоц нь сүйрсэн аюултай аяллын дараа НТ 60 онд Ромд хоригджээ. Хэдийгээр гэрийн хорионд байсан ч түүн дээр ирсэн бүгдийг чөлөөтэйгээр хүлээн авч, хот даяар Бурханы хаанчлалыг тунхаглаж байлаа (Үйлс 28:30-31). Ромд болсон энэ үйл явдал сайнмэдээ хүчтэй дэлгэрэхэд нөлөө үзүүлсэн гэж Паул хэлсэн байдаг (Филиппой 1:12). Цезарийн гэр бүлээс ч Христэд итгэгч болж байсан. Паул хоёр жилийн дараа суллагдсан ч Испани руу явсан эсэх нь тодорхойгүй.

Түүнийг аяллаа үргэжлүүлэхэд Ромын чуулган тусалсан эсэх талаар зарим нэг асуулт гарч ирдэг. Яагаад тэр ганцаараа явах ёстой болов? гэж хэн нэгэн асууж болох юм. Паул сайнмэдээ дэлгэрүүлэхийн тулд дуудагдсан гэдгээ дурдсанаар захидал эхэлдэг (Ром 1:1). Дараа нь тэр харь үндэстнүүдийн төлөөх элчийн онцгой дуудлага болон амжилтаа тайлбарласан (Ром 15:15-20).

Яагаад хүн бүр сайнмэдээг сонсох ёстой вэ? гэсэн өөр нэг асуултыг асууж болох юм. Магадгүй энэ мэдээг газар сайгүй сонсгох шаардлага байх уу? зэрэг асуултад Паул сайнмэдээний хүн төрөлхтөн рүү хандсан хүч чадлыг (Ром 1:14-16, Ром 10:12) тайлбарлаж, мөн сайнмэдээг дэлгэрүүлэх зайлшгүй шаардлагатайг дурджээ (Ром 10:14-15). Сайнмэдээ нь хүн бүрд хамаатай бөгөөд бүх хүн заавал сонсох шаардлагатай гэдгийг Паул хэлсэн юм.

Энэ захидал нь сайнмэдээ дэлгэрүүлэх чухал үндэс болоод зогсохгүй анх бичигдсэн зорилгоо өнөөг хүртэл биелүүлсээр байна. Паул сайнмэдээг яагаад хүн бүр сонсох шаардлагатай, сайнмэдээ гэж юу болох, яагаад хүн бүр зөвхөн энэ сайнмэдээгээр дамжуулан аврагдахын учир утгыг тайлбарласан. Тэрээр нийтлэг тохиолддог эсэргүүцлүүдийг няцаасан. Түүний сайнмэдээний тайлбарууд, сайнмэдээг хамгаалсан номлолууд нь энэ номын талаас илүү хувийг эзлэх бөгөөд үндсэн бүтэц нь болж өгдөг.

Ром ном нь авралын теологийн тайлбар юм. Паулын авралын онол нь иудейн хуульчлах үзлийн эсрэг нотолгоо болдог төдийгүй орчин үеийн авралын онол сургаалуудын гажуудлыг ч залруулдаг.

Вильям Тиндэйл, Ром номын талаар “Паулын зорилго бол Христийн сайнмэдээг заах суурь болон Хуучин гэрээг бүхэлд нь нарийн тодорхой ойлгох суурийг ч тавьсан“ гэжээ.[1]

Түүхийн туршид Бурхан Ром номоор дамжуулан хамгийн чухал мартагдсан үнэнийг ахин дахин сануулсаар ирсэн.

НТ 386 онд Августин Ром 13:13-14-ийг уншсаны дараа өөрийн нүгэлт амьдралаа орхих шийдвэр гаргасан.

Мартин Лютер 1515 онд Ром 1:17 эшлэлийн утгыг ухаарсан юм. Бурханы шүүлтээс хэлтрэх нэгэнд зөвхөн авралын итгэл хэрэгтэй хэмээн тэр ойлгожээ. Энэ нь түүний удаан хугацааны туршид хайж байсан авралын баталгааны үндэс байжээ. Зөвхөн итгэлээр л аврагдах болно гэсэн түүний сургаалын үндэс ийнхүү тавигджээ.

Жон Веслей 1738 онд Библийн дагуу Христийг дагах талаар судлахаар тогтмол цугладаг залуучуудын уулзалтанд оролцож байх үедээ олон жилийн туршид эрж хайж байсан хувь хүний авралын баталгаа юу болохыг олж мэдсэн байна. Залуусын нэг нь Ром номын талаар бичсэн Лютерийн өмнөх үгийг уншиж байх үед түүний зүрх халуу шатахыг мэдэрчээ. Тэрээр гэрчлэлдээ “Би Христэд итгэсэн, зөвхөн Христ л миний аврал. Тэр миний нүглүүдийг уучлан, намайг ч бас, нүглийн болон үхлийн хуулиас чөлөөлж аварсан гэдэг баталгааг би олж авлаа.” [2]

[3]Дээр дурдсан гурван хүн бүгдээрээ Ром номоос сайнмэдээг идэвхтэйгээр дэлгэрүүлэх сэдэл ятгалгыг хүлээн авчээ. Авралын теологийг тайлбарлаж, илгээлтийн үндэс суурь болсноороо энэ ном өнөөг хүртэл бичигдсэн зорилгоо биелүүлсээр байна.

Ром ном бүхэлдээ Ром 1:16-18 эшлэлийг дэлгэрүүлж тайлбарласан тайлбар юм.

Паулын хэлсэн 1-14 эшлэлд байгаа бүх санаа нь “сайнмэдээ хүргэхээр тэсэн ядаж байна” гэж хэлсэн 15-р эшлэл рүү хөтөлж байна. Харин 16-18-р эшлэлд сайнмэдээ гэж юу болох, яагаад бүх хүнд хэрэгтэй гэдгийг товчхон тайлбарласан. Нүгэлтнүүд итгэлээр зөвтгөгдөх гэдэг нь сайнмэдээ юм. Бүгд Бурханы уур хилэнгийн доор байгаа учраас бүх хүнд сайнмэдээ хэрэгтэй байгаа юм.

Ром номын өөр нэг чухал зорилго нь “Хэн итгэнэ, тэр хүн аврагдана, хэн үл итгэнэ, тэр хүн яллагдана” гэсэн Бурханы хуулинд суурилсан сайнмэдээний тайлбар юм.

Ром номын оргил хэсэг Ром 10:13-15-д бичигдсэн бөгөөд сайнмэдээг дамжуулах элч нар яагаад чухал болохыг тайлбарласан. Итгэлээр хүн аврагдах боловч сайнмэдээ сонсохгүйгээр итгэх боломжгүй гэж Паул хэлжээ.

Сайнмэдээг зөвхөн Ром номын эшлэлүүдээр тайлбарлаж болох юм. Үүнийг заримдаа “Ромын зам” гэж нэрлэдэг.

Тайлбар бүрийн эхний өгүүлбэр нь гол түлхүүр утга санааг илэрхийлдэг учраас цээжлэх нь чухал.

Ром 3:23

“Бүгд нүгэл үйлдсэн тул Бурханы алдар сууд хүрдэггүй”

Хүн бүр буруу гэж мэддэг зүйлээ хийснээр нүгэл үйлдсэн.

Энэ эшлэл нь хүмүүст тулгардаг бодит асуудлыг илэрхийлдэг. Хүмүүс Бурханыг дагаагүй, зориудаар Бурханд дуулгаваргүй хандсан юм. Дуулгаваргүй байдал нь бүх хүнд хамаатай. Хүн байнга зөв зүйл хийлээ ч Бурхан зөвт гэж хүлээн зөвшөөрөх боломжгүй юм.

Дээрх эшлэлийг илүү сайн ойлгохын тулд дараах эшлэлүүдийг ашиглаж болно.

Ром 3:10 (“Зөвт хүн алга, ганц ч алга”)

Ром 5:12 (“бүгд нүгэл үйлдсэнээр үхэл нь бүх хүнд иржээ”). Ром 6:23 “Учир нь нүглийн хөлс нь үхэл, харин Бурханы бэлэг бол бидний Эзэн Христ Есүс доторх мөнх амь мөн.”

Нүгэлтнүүд мөнхийн үхлийг хүртэх ёстой бол харин Бурхан Есүсээр дамжуулан мөнхийн амийг бэлэг болгон өгсөн.

Энэ эшлэлд нүгэл яагаад ноцтой вэ? гэдгийг хэлж байна. Нүглийн улмаас хүн бүрд үхлийн шийтгэл ирдэг. Бурханы шийтгэл, мөнхийн үхэл нь нүгэлтнүүдэд зориулагджээ.

Бидний хүртэх ёстой зүйл нь үхэл байсан ч харин бидний хүртэх зохисгүй зүйл буюу амийн бэлгийг Бурхан бидэнд өгч байна.

Ром 5:8

“Гэтэл биднийг нүгэлтнүүд байхын л Христ бидний төлөө үхсэнээр Бурхан биднийг хайрлах хайраа харуулсан”

Бурханы бэлэг нь Христийн үхлээр дамжуулан бидэнд өгөгдсөн.

Бидний хүртэх ёстой шийтгэлээр Бурхан биднийг шийтгэхийг хүсээгүй юм. Учир нь Тэр биднийг хайрлаж нигүүлслийг хүлээн авах боломж өгсөн. Биднийг өршөөхийн тулд Есүс нүглийн тахил золиос болж үхсэн. Аврагдахын тулд ямар нэг зүйл хийхийг Бурхан биднээс шаардаагүй бөгөөд биднийг нүгэлтнүүд байхад Бурхан бидэнд авралыг өгсөн юм. Аврал нь сайн хүний төлөө бус, харин нүгэлтнүүдийн төлөө зориулагджээ.

Ром 10:9

“Хэрэв та хүлээн зөвшөөрч... итгэвэл... аврагдах болно.”

Авралын цорын ганц шаардлага нь нүгэлтэн нүглээ хүлээн зөвшөөрч, Есүсийн үхэл ба амиллаар ирэх Бурханы өршөөлд итгэх явдал юм.

Гэмшил гэж юу вэ? Хэрэв хүн бурууг үйлдсэнээ хүлээн зөвшөөрч, өршөөлийг хүлээн авахыг хүсвэл нүгэлт замаасаа эргэхэд бэлэн гэдгээ илэрхийлж буй хэрэг юм.

Ром 10:13

“Эзэний нэрийг дууддаг бүхэн аврагдах болно.”

Хүн бүр аврал авах боломжтой.

Бүх хүнд хамаатай, өөр шалгуур гэж байхгүй.

Ром 5:1

“Тиймээс бид итгэлээр зөвтгөгдсөн тул... Бурхантай эвлэрсэн.”

Бурханы амлалтад итгэснээр бид нүгэлтэн гэж тооцогдохгүй, харин Түүний анд нөхөр болдог.

Бурхантай найрамдах гэдэг нь бид Түүний дайснууд бус харин Түүнтэй эвлэрсэн гэсэн утгатай. Биднийг Бурханаас тусгаарладаг нүглээс ангижирсан. Зөвтгөгдсөн гэдэг нь бид гэм буруутай гэж тооцогдохгүй гэсэн утгатай. Итгэлээр зөвтгөгдсөн гэдэг нь бид уучлал авахад шаардлагатай Бурханы амлалтад итгэхийг хэлнэ.

Ром 8:1

“Иймд эдүгээ Христ Есүс дор байгаа хүмүүст ямар ч ял үгүй.”

Бид Бурхантай нэгдсэн учраас биднийг буруутгадаг нүглийн буруутгалаас чөлөөлөгдсөн.

Христ нүгэлгүй амьдралаар амьдарсан ба загалмай дээрх Түүний үхэл шударга ёсны шаардлагуудыг биелүүлсэн юм. Итгэлээр бид Түүнтэй нэгдэж, Бурхан Эцэг биднийг хүлээн авсан. Биднийг хэзээ ч нүгэл үйлдээгүй мэт Бурхан бидэнд тийнхүү хандсан юм.

Дүгнэлт

Үл итгэгч хүн Бурханд хандан залбирч, нүгэл үйлдсэн гэдгээ хүлээн зөвшөөрч, Есүсийн үхэл, амиллын золилтын үндсэн дээр өршөөлийг гуйснаар аврагдах боломжтой болсон юм.

Сурснаа хэрэгжүүлэх хамгийн сайн арга бол эхлээд Ром номд байгаа хэрэглэгдэх эшлэл бүрийг Библи дээрээ дугуйлж, доогуур зурж тэмдэглэх арга юм. Дараа нь эшлэлүүдийг ашиглах дарааллыг харуулсан тоог эшлэл тус бүрийн хажууд тавина. Жишээ нь, эхлээд хэрэглэх эшлэлийнхээ хажууд 1-ийн тоог бичнэ гэх мэт.

Сайнмэдээ тараах дадлага хий. Эшлэл бүрийг уншаад холбоотой тайлбар бич. Эшлэл бүрийн дарааллаар эхний өгүүлбэрт байгаа ойлголтуудыг оруулаарай. Дараа нь шаардлагатай бүх тайлбарыг нэмж, шаардлагатай бол өөр өгүүлбэрүүдийг ашиглаарай. Энэ хичээлд заасан эшлэлүүдийг бүгдийг заавал ашиглах шаардлагагүй. Библиэс харахгүйгээр хийж чадах хүртлээ дадлага хийгээрэй.

Ангийн удирдагчийн тэмдэглэл: Хоёр эсвэл гурван суралцагч “Ромын зам”-ыг ашиглан ангид сайнмэдээ яриарай. Суралцагчид сайнмэдээг сонсоод хэрхэн сайжруулах арга замуудыг хэлэлцэх ёстой. Дараа нь суралцагчид хоёр хоёроороо дадлага хийж, хүн тус бүр өөр өөр сонсогчдод хоёр удаа ярьж өгөөрэй.

(1) “Ромын зам” сайнмэдээний танилцуулгыг ашиглан хоёр эсвэл гурван хүнд сайнмэдээ яриарай. Ярилцлага бүрд 2-3 мөр тэмдэглэл хөтлөөд дараагийн уулзалтад ирэхдээ ярихад бэлэн байгаарай.

(2) Дараагийн хичээлийн эхэнд зөвхөн Библиэ ашиглан “Ромын зам” танилцуулгаас сурсан эшлэлүүдийг нэг өгүүлбэрээр тайлбарлан бичихэд бэлтгээрэй.

(3) Дараагийн хичээл нь сайнмэдээг номлох тухай хичээл юм. Энэ хичээлд бэлтгэхдээ заасан, сонссон эсвэл илүү дэлгэрүүлж заахыг хүсэж байгаа сайнмэдээний сургаал эшлэлүүдийг хураангуйлан тойм болгож бичээд, дараагийн хичээлд авч ирээрэй.

“Ромын зам” сайнмэдээний танилцуулгад Бичвэрээс ашигласан эшлэлүүдийн эшлэлүүдийг бичнэ үү. Дор дурдсан эшлэлүүдийн тайлбарыг хамгийн багадаа нэг өгүүлбэрээр бичээрэй. Эшлэлүүдийг бичих шаардлагагүй.

Хэвлэж болох PDF-ийг эндээс авах боломжтой.

(1) Ром ______

(2) Ром ______

(3) Ром ______

(4) Ром ______

(5) Ром ______

(6) Ром ______

(7) Ром ______