Lesson 17: Сүнслэг төлөвшлийн зүг

Христийг хүлээж авахад өөрчлөлт тохиолдоно. Итгэгч хүн шинэ хүсэл, шинэ эрхэмлэх зүйлстэй болох тул энэ өөрчлөлт үнэхээр агуу юм. Тиймээс Библид үүнийг шинэ бүтээл хэмээн дүрсэлсэн байна (2 Коринт 5:17).

Гэхдээ зарим зүйлд цаг хугацаа хэрэгтэй. Итгэгч болсон ч христитгэлийн зарчмуудыг амьдралынхаа бүх хэсэгт хэрхэн хэрэгжүүлэхээ хүн даруйхан олоод харчихна гэж байхгүй. Эхлээд зарчмуудыг сурч, дараа нь хэрэгжүүлдэг.

Үүнээс гадна хувь хүний сүнслэг төлөвшлийн үйл явц гэж бий. Шинэ итгэгч нь Христ доторх нялх хүүхэд юм.

► Нэг суралцагч 1 Коринт 3:1-2–г ангид уншина. Эдгээр эшлэлийн дагуу шинэ итгэгчийн онцлог шинж чанар юу вэ?

► Нэг суралцагч Еврей 5:13-14–г ангид уншина. Эдгээр эшлэлд сүү гэж юуг хэлж байна вэ? Бор хоол гэж юуг хэлэв? Сүнслэг төлөвшил ямар шинж чанартай вэ?

Энэ сургалтын эхэнд бид Есүсийн өгсөн Агуу захирамжийн тухай үзсэн. Одоо дахин харцгаая.

► Нэг суралцагч Матай 28:18-20–г ангид уншина. Есүс сайнмэдээ тараахаас гадна өөр ямар үүрэг хариуцлага өгсөн талаар энэ эшлэлд өгүүлж байна вэ? Агуу захирамжийг өгөхөөсөө өмнө Есүс тэнгэр, газар дээр бүрэн эрх мэдэлтэй гэдгээ хэлсэн. Дараа нь чуулганд хандаж хүмүүсийг Өөр рүү нь авчир гэж тушаасан билээ.

Есүс дагалдагч нартаа сайнмэдээг номлоод зогсохгүй Өөрийнх нь тушаасан бүхнийг дагалдагчдад заах ёстой хэмээн тушаасан. Сайнмэдээ тараах нь энэ ажлын зөвхөн эхний хэсэг юм. Шинэ итгэгчдэд Есүсийн бүх тушаалыг дагахыг заах нь дагалдуулах үйлчлэл бөгөөд дагалдуулах үйлчлэл бүтэлгүйтэх нь сайнмэдээг тараах ажил бүтэлгүйтсэнтэй адил ноцтой.

Чуулганы зааж сургах үйлчлэл нь шинэ итгэгчийг сүнслэг төлөвшилд хүргэх зорилготой.

Ефес номд шинэ итгэгчдийг өсгөж, сүнслэг тал дээр хүүхэд хэвээр үлдээхгүйн тулд зарим итгэгчдэд үйлчлэлийн онцгой үүрэг хариуцлага оноосон тухай өгүүлдэг (Ефес 4:11-14). Үүний үр дүнд онол сургаалын хувьд тогтвортой, сүнслэг насанд хүрсэн итгэгч болох учиртай.

Пастор хүн дагалдуулах ажилд онцгой үүрэг хүлээнэ. Паул Тимотод “Бичвэрийн уншлага, ятгалга ба сургаалдаа анхаар” (1 Тимот 4:13) гэсэн байдаг. Тэрээр Тимотыг өөрийн сурах үйл явцыг анхаар гэхээсээ илүүгээр үйлчлэлдээ анхаар гэсэн утгаар хэлсэн. Тимот Бичвэрийг уншиж тайлбарлах, сүнслэг удирдамж өгөх, Христийн сургаалыг заах зэрэг үйлчлэлийг хийж байв. Пастор хүний нэг чухал шалгуур бол зааж сургах чадвар юм (1 Тимот 3:2).

Сурах нь сүнслэг өсөлтийн чухал хэсэг учраас заах нь дагалдагч бэлтгэх ажлын нэг хэсэг болдог. Чуулганд багш нар чухал үүрэгтэй тул чуулган багш нараа хөгжүүлэхийн төлөө үргэлж ажиллах ёстой.

[1]”Олон гэрч нарын өмнө надаас сонссон зүйлсийг бусдад заах чадвартай итгэмжит хүмүүст даатга” (2 Тимот 2:2). Паул энэхүү зааварчилгааг туршлагатай сайнмэдээ тараагч, пастор хүнийхээ хувьд залуу үйлчлэгч Тимотод өгчээ. Зөвхөн номлолоор итгэл цааш дамжихгүй гэдгийг Паул хэлж байна. Тиймд хүмүүсийг онцгой чармайлт гарган сургаж, цаашид бусдыг сургахад бэлтгэх ёстой юм. Ийм сургалтыг цуглаан дээр явуулах боломжгүй бол итгэмжтэй хүмүүсийг тусад нь авч ганцаарчлан, эсвэл бүлгээр сургах хэрэгтэй.

Зааж сургах зүйлс маш их байдаг. Хүн бүр нэг ижил зааврыг хүлээн авахад бэлэн биш байдаг тул бүгдийг хийж амжуулдаг пастор гэж хаа байх вэ? Гэхдээ Ефес 4:11–д “Тэрээр пасторыг өгсөн” (ганц хүн, ганц үүрэг) гэж хэлээгүй. Харин янз бүрийн үүрэг, тэдгээрийг гүйцэтгэх хэд хэдэн хүний тухай дурдсан байна. Бурхан багш нарыг дуудаж, заах чадвар өгч, тэднээр дамжуулан чуулганыг үйлчлэлд бэлтгэж, хүчирхэгжүүлдэг.

Жинхэнэ дагалдуулалт гэдэг мэдээллийг дамжуулахаас илүү зүйл. Үүнд үнэ цэн, эрхэмлэх зүйлс, хандлага, амьдралын хэв маягаа төлөвшүүлэх ч бас багтана. Энэ үйл явц зөвхөн сүнслэг хариуцлага бүхий христитгэлийн хамт олонд (бүлэг) тохиолддог.

Бурхан хүмүүсийг хамт олны дунд амьдруулахыг зорьсон болохыг бид “Адам ганцаараа байх ёсгүй” (Эхлэл 2:18) гэсэн эшлэлээс эхлээд Библийн бүх хэсгээс харж болно.

Хамт олноороо, бүлгээрээ байхын зарим давуу талыг Номлогчийн үгс 4:9-10-д дурджээ.

Ганцаараа байснаас хоёул байх нь илүү дээр билээ. Тэгвэл тэдний зүтгэл сайнаар хариулагдах болно. Хэрэв тэд хамтдаа ойчих аваас нэг нь нөгөөгөө босгоно. Харин ганцаар байгч унахад түүнийг босгох хүн үгүй тул, хөөрхий!

Бурхан Мосед хандаж израилчуудыг тахилчдын хаант улс, ариун үндэстэн (Гэтлэл 19:6) болгоно гэжээ. Энэ өв гэр бүлүүдээр дамжин цааш уламжлагдаж, “Агуу захирамж”–д тусгалаа олжээ (Дэд хууль 6:4-9).

Шинэ гэрээнд чуулганыг эдгээр нэр томьёогоор илэрхийлдэг. Ариун Сүнс Шинэ гэрээний бичигчдийг ийнхүү хөглөжээ (1 Петр 2:9).

Бурхан Өөртэй нь харилцаж байгаа хүмүүсийг өөр хоорондоо харилцаатай байхыг үргэлж хүсдэг. Бурхантай харилцах харилцаа нь биднийг итгэлийн хамт олон болгоно. Түүнчлэн Бурхантай харилцах бидний харилцаа зориулалт шаарддаг шиг Бурханы хүмүүстэй харилцах бидний харилцаа ч бас зориулалт шаарддаг. Хүн өөрийгөө Бурхантай зөв харилцаатай байж чадна гэж боддог атлаа Бурханы ард түмэнтэй харилцахгүй байхаар шийдвэл энэ нь буруу юм.

Паул чуулганы гишүүдийн харилцааг биеийн эрхтнүүдээр дүрсэлжээ (1 Коринт 12). Ямар ч эрхтэн биеэсээ тусгаар ганцаараа байвал ажиллаж чадахгүй. Тиймээс гишүүд бие биедээ санаа тавих ёстой. Эс бөгөөс бие гэж үгүй. Нэг гишүүн гэмтэхэд бүгд зовно. Нэг гишүүний үйлдэл бүх биед нөлөөлнө. Паул энэ үгийг ёс зүйгүй хэрэг хийсэн хүний нөхцөл байдал дээр хэлсэн боловч, үүндээ талхны тухай зүйрлэлийг дурдсан байдаг. Ингэхдээ, “Зуурсан гурилыг жаахан хөрөнгө бүхэлд нь исгэдгийг та нар мэдэхгүй гэж үү?” (1 Коринт 5:6) гэжээ. Бид өөрсдийгөө христитгэлийн хамт олны салшгүй нэг хэсэг гэж харах учиртай.

Христитгэлийн хамт олонгүйгээр аливаа хүн Шинэ гэрээний тушаалуудыг дагаж мөрдөх боломжгүй. Бурханы тушаалуудыг биелүүлэхийн тулд итгэгчид нэг нэгэндээ зориулалт гаргах ёстой. Өөрөөр хэлбэл христитгэлийн хамт олон сүнслэг хариуцлага хүлээнэ гэсэн үг.

Христитгэлийн хамт олон ба сүнслэг хариуцлагын холбоо хамаарлын талаар Библид олонтоо дурджээ.

Удирдагчдаа дагаж, тэдэнд захирагдагтун. Учир нь тэд тооцоо хийгчид адил сэтгэлийг чинь сэрэмжилдэг. Тэд үүнийг санаа алдалгүйгээр, баяртайгаар хийг. Эс бөгөөс та нарт ямар ч ашиг болохгүй (Еврей 13:17).

Энэ эшлэлд сүнслэг эрх мэдэлтэй хүмүүст захирагдах тухай зааж байна. Сүнслэг удирдагчдын хувьд ч энэ тушаал асар их үүрэг хариуцлага хүлээлгэж байгаа юм. Удирдагчийн хариуцлага бол эрх мэдлээр удирдан чиглүүлэх төдий биш, харин тэдний халамжид байгаа сүнснүүдийг харгалзах явдал. Үүнийг хийхийн тулд удирдагчид хүмүүстэйгээ сайн харилцаатай байж, сүнслэг удирдамж өгөх ба үүнийг хийх боломжтой хүмүүстэй харилцаатай байх хэрэгтэй.

Эдгээр эшлэлд христитгэлийн хамт олон ба сүнслэг хариуцлагын талаар дүрсэлжээ.

► Нэг суралцагч Еврей 10:24-26-г ангид уншина. Эдгээр эшлэлд юу тушаасан бэ?

Бусад итгэгчдийн хэрэгцээг мэдэж, зөв зүйлийг хийхийг урамшуулах ёстойг энд тушаажээ.

► Энэ үүрэг хариуцлагыг биелүүлэхийн тулд итгэгчдийн дунд ямар харилцаа холбоо байх ёстойг тайлбарлаарай.

Бид хүмүүстэй зөв харилцаа тогтоохгүй бол бидний өгч буй урамшуулал үр дүнгүй болно. Бид тэднийг сайн мэдэж, хайр халамжаа харуулах ёстой. Эс бөгөөс хувьчилсан зөвлөгөөнд гомдож мэднэ.

Ах дүү нар аа, та нараас хэн нэг нь ёрын, итгэлгүй зүрхтэй байж, амьд Бурханаас салах вий хэмээн болгоомжлогтун. Харин “өнөөдөр” гэгдэж л байгаа бол бие биенээ өдөр бүр зоригжуулагтун. Эс бөгөөс та нараас хэн нэгэн чинь нүглийн мэхлэлээр хатуурах вий (Еврей 3:12-13).

Бид бие биеийнхээ өмнө хариуцлагатай байхыг уриалж байна. Тиймээс сургах явц чуулганы цагийн хуваариас давсан байх ёстой. Тэгээд ч өдөр бүр ятган сэнхрүүлж байхыг тушаасан шүү дээ. Үүнийг хувьчилсан болон жижиг бүлгийн нөхөрлөлөөр дамжуулан хийнэ. Ингэх нь зөвхөн хамт хооллох, зочлох төдий бус, харин сүнслэг зорилгын төлөө юм. Энэ зорилгыг хэрэгжүүлэхийн тулд бид харилцан яриа, жижиг бүлгийн уулзалт бүхнээ зорилготойгоор төлөвлөн, гол зүйлдээ анхаарах ёстой.

Бие биедээ тус дэм болох талаар Сургаалт үгс 27:17-д ийнхүү хэлжээ.

Төмөр төмрийг ирлэдэг. Хүн хүнээ хурцалдаг.

Хүн бусдад сүнслэг удирдамж, урам зориг өгөхөд заавал бусдаас давуу байх шаардлагагүй. Үнэндээ даруугаар өгсөн сүнслэг удирдамжийг хүлээн авах магадлал өндөр.

... бие биенийхээ өмнө нүглээ улайж, бие биенийхээ төлөө залбир. Ингэснээр та нар эдгээгдэх болой. Зөвтийн залбирал үр нөлөөтэй бөгөөд ихийг гүйцэлдүүлж чадна (Иаков 5:16).

Том цуглаан дээр хувийн нүглээ улайх явдал бараг гарахгүй. Тиймээс чуулганы энэ үйлчлэл амархан хэрэгждэггүй. Хам сэдвээс нь энэ тушаалын шалтгааныг харж болно. Гол нь алдаа гаргасан хүмүүсийг сэргээх зорилготой юм.

Нэг нэгнийхээ ачаанаас үүрэлц. Тийнхүү Христийн хуулийг хэрэгжүүлэгтүн (Галат 6:2).

Итгэгчдийн хувьд ихэвчлэн өөрсдийнх нь юу туулж байгааг хэн ч тоодоггүй мэт санагддаг. Христэд итгэгчид бусдын зовлон зүдгүүрийг үнэхээр ойлгож чадвал санаа тавьж чадна. Гэхдээ ихэнхдээ хангалттай сайн ойлгож чадахгүй. Хэрэв бид бусдын ачааг үнэхээр мэдэхгүй бол яаж үүрэлцэх юм бэ?

Чуулган үүссэн анхны үед итгэгчдийн дунд ойр дотно харилцаа хэвийн зүйл байв.

Өдөр бүр тэд нэг сэтгэлээр сүмд цуглаж, талхаа айлуудад хувааж, талархал хийгээд өгөөмөр зүрхээр хооллоцгоон (Үйлс 2:46).

Жон Веслей “бие даасан итгэгч гэж байхгүй” гэж хэлсэн байдаг.

► Веслей энэ үгээрээ юу хэлэхийг хүссэн бэ?

Сүнслэг хариуцлага нь христитгэлийн хамт олны дунд л байна гэсэн утгатай.

Сүнслэг хариуцлагатай байх гэдэг нь өөрсдийн сүнслэг байдал, сүнслэг тал дээрх амжилт ба уналт, цаашид өсөж хөгжихийн төлөө зориулалт гаргах хүн эсвэл бүлэг, хамт олонтой харилцаатай байна гэсэн үг.

Сүнслэг хариуцлага байхгүй бол бид Бичвэрийн бүх тушаалыг биелүүлэхгүй байгаа хэрэг төдийгүй, бидэнд нигүүлслээ өгөхийн тулд Бурханы төлөвлөсөн арга хэрэгслийг үл тоомсорлож байна гэсэн үг.

Сүнслэг төлөвшилтэй байна гэж юу гэсэн үг вэ? Төлөвшсөн итгэгчийг та хэрхэн тодорхойлох вэ?

Төлөвшил нь цаг хугацаа шаарддаг учраас нас ахих тусам төлөвших талтай (Тит 2:1-5). Мэдээж, зарим хүн сүнслэг талаараа төлөвшихгүйгээр хөгширч байхад, гайхалтай сайхан төлөвшсөн залуу хүмүүс ч байдаг.

Төлөвшлийн ихэнх шинжүүд нь нэг мөсөн тогтохгүй, харин аажмаар нэмэгдээд явдаг. Заримдаа сүнслэг туршлага, амьдралын туршлагаас болж огцом нэмэгдэж болно. Хэдийгээр хүн амьдралынхаа туршид үргэлжлүүлэн хөгжих ёстой боловч сүнслэг төлөвшил гэж хэлж болох тийм түвшинд хүрэх боломжтой.

Сүнслэг төлөвшлийн шинж чанарыг Бичвэрийн хэд хэдэн хэсэгт тодорхойлсон байна.

► Хэд хэдэн суралцагч Ефес 4:11-14, Еврей 5:12-6:1, 1 Коринт 3:1-2, болон 1 Иохан 2:12-14 эшлэлийг ангид тус тус уншина.

Сүнслэг төлөвшлийн тэмдэг болох шинж чанаруудын жагсаалтыг доор харуулж байна. Энэ жагсаалт бүрэн биш бөгөөд жагсаалтын зарим санааг бусдаас нь бүрэн ялгах боломжгүй юм.

Төлөвшсөн итгэгч хүн эдгээр бүх шинж чанаруудыг бүрэн харуулж чадахгүй байлаа ч өссөөр л байдаг. Зарим алдаагаа ухаарахгүй байж болох ч, зүрх сэтгэл дэх Ариун Сүнсний тасралтгүй ажилд хариу үйлдсээр байдаг юм.

(1) Хүсэл сэдэл, хандлага, үйлдлээрээ Христийн адил

Христийг танин мэдэхийг чин сэтгэлээсээ хүсэж, Христийн үхэл, амиллыг өөрсдийнхөө амьдралд сүнслэг байдлаар мэдрэхийг хүсэх эрмэлзлээс Христтэй адил байх нь хамаардаг (Филиппой 3:10). Үүнд хавчлага дунд Түүний зовлон шаналлыг хуваалцах нь ч багтана. Христийг ийнхүү хайрладаг хүн Христтэй адил болж өөрчлөгддөг.

Христтэй адил байх нь аминч үзэл, бардам зангаар бус, харин хайраар тэтгэгддэг. Тиймээс Христийн дагалдагч хүн Христтэй адил байхыг хүсдэг бөгөөд хэлсэн үг, хийсэн үйлдлээрээ Христтэй адилгүй байгаагаа ухаарах бүрдээ гуниглаж харуусдаг.

(2) Бурхантай дотно харилцаатай

Хүн Бурхантай харилцах харилцаагаа улам ойртуулах ёстой. Бурханы оршихуйгаас таашаал авах, Бурханы Үгийг хайрлах, залбиралд цаг зарцуулах нь Бурхантай сайн харилцаатай байгаагийн илрэл юм.

(3) Ариун Сүнсний үр жимс харагддаг

Ариун Сүнс итгэгчийн амьдралд хайр, баяр баясгалан, тэвчээр, өөрийгөө хянах чадвар зэрэг үр жимсийг бий болгодог. Амьдралд нь Ариун Сүнс ажиллаж байгаа итгэгч хүний зан чанар илүү тууштай, эелдэг зөөлөн байдаг.

(4) Дотоод болон гадаад нүглийг ялдаг

Итгэгч хүн уруу татлагыг даван туулахын тулд Бурханд хэрхэн найдахад суралцдаг. Зүрх сэтгэлээ ариусгахын тулд Бурханы цэвэрлэгээнд сэтгэлээ нээдэг бөгөөд тууштай ялж амьдрахад тусалдаг дадал зуршил, сахилга батыг өөртөө хөгжүүлдэг.

Хэрэв сорилтод унавал Бурханы өмнө улайж, уучлал ба хүч чадлыг олохын төлөө залбирдаг. Түүнчлэн өөрийнх нь төлөө залбирдаг итгэгч дотны найзуудтайгаа алдаа дутагдлаа хуваалцах ёстой юм (Иаков 5:16).

(5) Сүнслэг сахилга баттай

Бурхантай харилцах харилцаагаа нэн тэргүүнд тавих нь сүнслэг сахилга бат юм. Тогтмол залбирдаггүй, Библи уншдаггүй, чуулганд хамрагддаггүй хүн төлөвшсөн итгэгч биш.

(6) Христитгэлийн зан чанарыг хөгжүүлсэн

Христийн дагалдагч хүн шударга, итгэмжтэй, үнэнч байх зарчмуудыг амьдралынхаа хэв загвар болгохын төлөө суралцдаг.

(7) Тууштай итгэлийн амьдралтай

Итгэгч хүн христитгэлийн зарчмуудыг амьдралдаа хэрэгжүүлж сурдаг. Төлөвшсөн итгэгч хүн хандлага болон биеэ авч явах байдлаараа үргэлж Христийн дагалдагч адил байхыг хүсдэг. Тэрээр хэлсэн үг, хийсэн зүйл нь зүрхэн дэх хайртай нь нийцэхгүй байгааг ойлгох тусам, өөрчилж өгдөг Бурханы хүч чадлыг түшдэг.

(8) Эрүүл харилцаа холбоотой

Төлөвшсөн итгэгч бусад итгэгчидтэй дотно нөхөрлөлийг үүсгэдэг. Тэрээр үнэнч шударга, тэвчээртэй, өршөөнгүй байдлаа харуулж харилцаагаа хадгалдаг бөгөөд даруухан, алдаагаа хүлээн зөвшөөрсөн хандлагатай байдаг. Нөхцөл байдлаас болоод буруу ойлгогдох үед тэвчээр алдаж мэдэх боловч, алдаагаа даруй зөвшөөрч, нөгөө хүнийхээ зөв санаа бодлыг хүлээн авдаг.

(9) Өөрийн үйлчлэлтэй

Итгэгч хүн өөрийн сүнслэг бэлгүүдийг тодорхойлох ёстой. Тэрээр бусдад ерөөл болохын тулд чуулганыхаа байх ёстой талбарт зогсдог. Итгэгч хүн бусдад сайнмэдээг тарааж, христитгэлийн амьдралд дагалдуулах замаар бусдад тусалж, чуулганд үйлчилж чадна.

(10) Хүнд нөхцөлд тэсвэртэй

Итгэгч хүн муу зүйл тохиолдоход Бурханд найдаж сурах ёстой юм. Хүнд хэцүү үед Бурханд л найдах ёстой. Төлөвшсөн итгэгч хүн өөрт нь муу зүйл яагаад тохиолдож байгааг ойлгохгүй байсан ч, итгэлээ алддаггүй.

Сүнслэг төлөвшлийн шинжүүд нь төрөлх авьяас чадвараас хамаарахгүй.

Түүнчлэн үйлчлэлийн ур чадвартай ч адилгүй.

Сүнслэг төлөвшил нь удирдах чадвартай холбоогүй. Удирдагч хүн сүнслэг төлөвшилд хүрсэн бол сайн хэрэг. Гэхдээ зарим хүн сүнсээр төлөвшөөгүй боловч, өөрийн авьяас чадварынхаа ачаар удирдагч болох нь бий. Зарим нь сүнслэг төлөвшилд хүрсэн боловч удирдах чадваргүй байх нь ч бий.

Зарим хүн төрөлхөөсөө тэвчээртэй, эелдэг зан чанартай байдаг. Гэхдээ хувь хүний бодгаль чанар нь сүнслэг төлөвшлийн шинж чанартай адилгүй. Бурхан бидний бодгаль чанар дээр ажилладаг бөгөөд аливаа зүйлд хандах хандлагыг маань тэнцвэртэй болгоход тусалдаг билээ. Бид хувь хүнийхээ талаас шинжилж үзлээ ч, тухайн хүний төрөлхийн зан чанар болон сүнслэг өсөлтийн шинж чанарыг нь нарийн сайн ялгаж чадахгүй.

Эрүүл мэндийн асуудал нь хүний ​​ялгаж салгах чадвар, хариу үйлдэлд нөлөө үзүүлдэг. Тиймээс бид бусдыг шүүх гэж яарах ёсгүй юм.

(1) Сүнслэг төлөвшлийн 10 шинж байдлаар өөрийгөө шалгаарай. Аль нь танд хамгийн их дутагдаж байгааг залбирч тунгаан бод. Залбирах, судлах, бусдаас зөвлөгөө авах, Бурханы тусламжид найдах зэргээр өөрийгөө хэрхэн зориудаар хөгжүүлэхээ төлөвлө.

(2) Чуулган зааж сургах болон сүнслэг хариуцлага хүлээх үүргээ хэрхэн зорилготойгоор биелүүлж чадах вэ? Чуулганы үйл ажиллагааны төлөвлөгөөг тодорхойлон хоёр хуудас бичнэ үү.