Топ жетекшісіне ескерту: Осы сабақта қарастырылған Жазба үзінділерінен басқа, түсіндірмелерде Жазбаларға көптеген сілтемелер бар. Сабақ барысында олардың барлығын тауып оқуға уақыт жеткіліксіз болуы мүмкін. Жетекші олардың кейбірін оқу үшін таңдай алады.

«Сенімге келу» термині адам құтқарылған кезде болатын өзгерісті білдіреді. Ізгі хабардың мақсаты – күнәкарды сенімге келтіру.

► 1 Салониқалықтарға арналған хаттың 1-тарауын оқыңыз. Салониқалықтар сенімге келген кезде олармен қандай өзгерістер болды?

Адамның неліктен сенімге келу керектігін түсіну үшін және адам сенімге келген кезде не болатынын түсіну үшін күнәкардың сенімге келгенге дейінгі жағдайын түсінуіміз керек.

► Адамның құтқарылғанға дейінгі жағдайын қалай сипаттар едіңіз?

Адам атаның күнәсінің кесірінен әрбір адам дүниеге келгенде Құдайдан бөлек болады.[1] Бұл әр адамның өзімшіл екенін және өз жолымен жүретінін білдіреді.

Төмендегі абзацтарда күнәкарға төрт сипаттама берілген.

Адамда таңдау пайда болғаннан бері адам күнә жасай бастайды. Адамдардың бәрі күнә жасады.[2]

Күнә — Құдайдың заңын бұзу.[3] Құдай өте әділ болғандықтан, ол күнәні кешірмейді және әрбір адам істеген ісі үшін сотталады.[4] Әрбір адамның күнәһар немесе сотталуға лайықты екеніне еш күмән жоқ. Әрбір күнәһар қазірдің өзінде сотталған.[5]

Күнәһар адам – Құдайдың жауы.[6] Күнәһар Құдайға қарсы жасаған күнәлары жойылмайынша, Құдаймен қарым-қатынасқа түсе алмайды.

Сондай-ақ күнәһар адам Құдаймен қарым-қатынаста бола алмайды, өйткені ол күнәлі болмысының құмарлықтарына берілген.[7] Күнәнің құлы болғандықтан, күнәһар өз жағдайын өзгертуге қауқарсыз.[8]

Сонда күнәкарға қандай құтқарылу керек? Күнәһар кінәлі болғандықтан, құтқарылу кешірімді білдіреді. Ол Құдайдың жауы болғандықтан, құтқарылу татуласуды білдіреді. Ол бұзылғандықтан, құтқарылу тазаруды білдіреді. Ол дәрменсіз болғандықтан, құтқару азаттықты білдіреді. Бұл күнәһарға қажет құтқарудың бірнеше аспектілері ғана.

Сенімге келгенде күнәһар кешіріліп, Құдаймен татуласып, тазарып, күнәдан азаттық алады. Пауыл көптеген ауыр күнәлары болған Қорынттық сенушілердің бұрынғы күнәкар күйін сипаттады. Сонда ол: «Алайда сендер күнәдан тазардыңдар, Оның қасиетті халқы болып, ақталдыңдар...» деді.[9]

Бірде-бір адам өз күнәсінің құнын төлей алмады. Күнә шексіз Құдайға қарсы бағытталған, ал адамзатта күнәнің құнын өтейтін өтемақы ретінде ұсына алатын мәңгі құнды ешнәрсесі жоқ.

Құтқарылу адамның қолынан келетін нәрсе емес, сондықтан оған бұл мәселеде ешқандай талап қойылған жоқ.[1] Егер адам өз бетімен құтқарыла алса, Исаның айқышта өлуінің қажеті болмас еді.[2]

► Егер Құдай адамзатты кешіргісі келсе, неге Ол айқыш ағашсыз кешірмеді?

Құдай киелі болғандықтан, Ол әділдікпен соттауы керек.[3]

Мәсіхтің құрбандығы болмағанда не болар еді? Елестетіп көріңізші. Егер Құдай күнәларды өтеусіз кешірсе ше?

Құдай күнәні өтеусіз кешіргенде, күнә маңызды емес болып көрінетін еді. Құдай әділетсіз, тіпті қасиетті емес сияқты және Құдайдың көз алдында адамның жақсылық жасауы мен жамандық жасауының айырмашылығы шамалы сияқты болып көрінетін еді.

Кешірім өтеусіз болғанда, Құдайды әділ әрі қасиетті Құдай ретінде даңқтау мүмкін болмас еді. Өтеусіз кешіру, сайып келгенде, Құдайды дәріптеудің орнына, Оның абыройын түсіреді.

Бірақ Құдай сүйеді және Ол кешіргісі келеді. Адамзат күнәкар күйде қалуға лайық болғанына қарамастан, Ол адамзатты мәңгілік өлімге қалдырғысы келген жоқ.

Исаның айқыштағы құрбандығы қажет болатын шексіз құнды құрбандықты қамтамасыз етті. Мұны тек Иса ғана жасай алды, өйткені Ол (1) күнәсіз[4] (кемелді және құтқарылуға мұқтаж емес) және Ол (2) Құдай да, адам да болды.

Өтеу кешіруге негіз ретінде қажетті нәрсені береді. Енді Құдай өкініп, Оның уәдесіне сенетін адамды кешіре алады. Айқыштағы құрбандықты түсінетін адам күнә Құдай үшін маңызсыз нәрсе деп ойлай алмайды.

Өтеу Құдайға оның уәдесіне сену арқылы күнәкарды әділ деп санауға мүмкіндік береді: Римдіктерге 3:20-26 бізге өтеудің қалай жұмыс істейтінін түсіндіреді.

Киелі кітап Құдайдың құтқару құралының жалғыз екенін айтады. Егер адам Мәсіхке сену арқылы, яғни рақым арқылы құтқарылудан бас тартса, ол құтқарыла алмайды.[5]

Сондықтан тек сенім арқылы ғана қабылданатын рақым арқылы құтқарылу ілімін білу маңызды. Құтқарылу тек рақым арқылы болады, өйткені біз оны алу немесе оған лайық болу үшін ештеңе істей алмаймыз. Бұл тек сенім арқылы, өйткені біз оған жету үшін ештеңе істей алмаймыз. Біз тек Құдайдың уәдесіне сене аламыз.

► Алдымен не болады: адамның Құдайға жауабы ма әлде Құдайдың адам ішіндегі жұмысы ма?

Құдайдың рақымы күнәкардың жүрегіне еніп, оны күнәлары үшін айыптайды және кешірім алу қалауын туғызады.[1] Күнәкар Құдайдың көмегінсіз күнәларынан айырыла алмайды.[2] Құдай күнәкарға Ізгі хабарға жауап беру қабілетін береді. Егер адам құтқарылмаса, бұл Құдайдың рақымсыздығынан емес. Мұның себебі адам Құдайдың рақымына жауап бермегендігінен.

Иса бүкіл әлемнің күнәлары үшін өлді және Құдай әрбір адамның құтқарылғанын қалайды.[3] Құдайдың рақымы әрбір адамға жауап беруге мүмкіндік береді, бірақ ол ешкімді мәжбүрлемейді. Сондықтан Құдай күнәкарды тәубе етуге және сенуге шақырады.[4]

► Тәубе ету деген не?

Тәубе ету күнәкардың өзін кінәлі және жазаға лайық деп санайтынын және оның күнәларынан бас тартуға дайын екендігін білдіреді.

Ишая кітабындағы бұл аят тәубе етуді сипаттайды:

Азғын адам теріс жолынан қайтып, әділетсіз жан өз ойларынан бас тартсын! Бәрі Жаратқан Иеге бет бұрсын, сонда Иеміз мейірімділік танытады. Олар Құдаймызға қайта оралсын, өйткені Ол жомарттықпен кешіреді.[1]

Тәубе ету күнәкардың өз өмірін өзі түзеп, Жаратқан Ие кешіргенге дейін Құдай алдында әділ болуы керек дегенді білдірмейді. Бұл мүмкін емес, өйткені адам күнәнің құлдығында және ол өз бетінше одан айырыла алмайды. Бірақ күнәкар адам Құдайдың оны күнәлардан босататынына дайын болуы керек.

► Құтқарылу рақым арқылы беріледі; Ендеше, құтқарылу үшін тәубе етудің қандай қажеті бар?

Сенім кешірудің бірден-бір шарты болып табылады, бірақ Мәсіхке деген шынайы сенім әрқашан адамды күнәларына өкінуге итермелейді. Мәсіхке бет бұру (сенім) және күнәдан бас тарту (тәубе ету) қатар жүреді, бірақ күнәдан бас тартуды мүмкін ететін сенім. Бұл құтқарушы сенім – Құдайдан келген сый.[2] Егер адам тәубе еткісі келмесе, демек ол күнәдан арылғысы келмейді.

Егер адам тәубе етпесе, ол күнәнің жамандығын мойындамайды. Егер ол күнә жасауды не үшін тоқтату керектігін түсінбесе, онда ол күнәсінің шынымен зұлымдық екенін түсінбейді. Күнәсінің зұлымдық екенін түсінбесе, кешірімге неліктен мұқтаж екенін түсінбейді.

Егер адам өзінің шынымен кінәлі екенін және жазаға лайық екенін түсінбесе, ондай адам шынай тәубе еткен жоқ. Егер ол күнәһар екенін мойындаса, бірақ күнә жасауды жалғастыруға мүмкіндік беретін дінді қаласа, онда ол әлі де тәубе еткен жоқ. Өйткені ол өзін күнәкар ететін нәрсені істеуді жалғастырғысы келеді.

► Құтқарушы сенімнің мәні неде?

(1) Адам өзін ақтап алу үшін ештеңе істей алмайтынын түсінеді.

Себебі Құдайдың рақымымен, Мәсіхке деген сенімдерің арқылы құтқарылдыңдар. Бұл – өздеріңнің жетістіктерің емес, Құдайдан келген сый. Сондықтан игі істерімнің арқасында құтқарылдым деп ешкім мақтанбасын.[1]

Ол қолынан келетін ешнәрсе (істері) оны жартылай болса да құтқаруға лайық етпейтінін түсінеді.

(2) Ол Мәсіхтің құрбандығы оның кешірілуі үшін жеткілікті деп санайды.

Ол өз жанын құрбан етіп, күнәларымыздың құнын өтеді. Өзіміздің ғана емес, сондай-ақ бүкіл адамзаттың да күнәларының құнын өтеді.[2]

Құн өтеу бізді кешіруге мүмкіндік беретін құрбандықты білдіреді.

(3) Ол Құдайдың оны тек бір шартпен кешіретініне сенеді. Бұл шарт – сенім.

Егер де күнәларымызды мойындасақ, Құдай сенімді де әділетті болғандықтан оларды кешіріп, бізді барлық әділетсіздігімізден тазартады.[3]

Егер ол басқа шарттар бар деп ойласа, онда ол толықтай рақым арқылы емес, ішінара істер арқылы құтқарыламын деп ойлайды.

[1]► Студент топқа Елшіл. істері 26:16-18 үзіндісін оқып шықсын. Осы аяттарға сай, Пауылдың қызметі қандай болуы керек еді?

Пауылдың қызметі адамдарды сенімге әкелу болды. 18-ші аятта сенімге келу былай сипатталады: Олар қара түнектен нұрға, әзәзіл шайтанның құлдығынан Құдайға бет бұрулары үшін, сен олардың көздерін аш! Сонда олар Маған сеніп, күнәлары кешіріліп, Құдай халқының арасынан өз орындарын алады.

Күнәкардың сенімге келуі- үлкен өзгеріс. Киелі кітап оны жаңа жаратылыс деп атайды.[2] Ескі өмір кетіп, жаңа өмір пайда болады.

Сенімге келген адам жалған тәңірлерді және Құдайға толық берілгендікке қайшы келетін кез келген діни әрекеттерді тастайды.[3]

Мұндай өзгеріс әдетте басқаларды таң қалдырады.[4] Олар адамның неге соншалықты өзгеретінін түсінбейді. Адамның жақын достары мен туыстары оны қудалауы мүмкін.[5]

Сенімге келген адам енді осы дүниенің қалаулары мен басымдықтарына ортақтаспайды. Бұл - оның өзгергенінің бір белгісі.[6] Сенімге келген адам басқа сенушілерді жақсы көреді және олармен қарым-қатынасты қалайды.[7]

Сенімге келген кезде адамның қалаулары да өзгереді. Ода әлі де азғырулар болады, бірақ ол азғыруға қарсы тұра алады, өйткені ол енді күнәкар құмарлықтарына бағынбайды. Ол Құдайдың рақымын сезінгендіктен, Құдай Сөзіне құштар болады.[8]

Сенімге келген адам Құдайды сүйіп, Оған ұнамды болғысы келеді. Ол Құдайдың өсиеттерін қиын не ауыр деп санамайды.[9]

Сенімге келген адам Құдаймен жеке қарым-қатынаста, әсіресе дұғада болады.[10]

► Өз сөзіңізбен сенімге келген адамның бойындағы өзгерістер туралы айтып беріңіз.

Киелі кітапта адам жоғарыдан туылғанда, бәрі жаңадан болады делінген. Оларға мыналар кіреді:

• Жаңа болмыс – құдайлық болмыс[1]

• Жаңа Ұстаз – Киелі Рух арқылы Мәсіх[2]

• Құдай Сөзіне құштарлық[3]

• Сүйіспеншілікке деген жаңа көзқарас[4]

• Құдаймен ұлы не қызы ретінде жаңа қарым-қатынас[5]

• Жаңа Көмекші – Киелі Рух[6]

• Егер күнә жасап қойсақ, Қорғаушымыз – Иса Мәсіх[7]

• Мәңгілік өмірге деген жаңа және тірі үміт[8]

► Қандай дұрыс емес себептер адамның өзін мәсіхшімін деп ойлауына себеп болуы мүмкін?

Адам өзін мәсіхшімін деп ойлауы мүмкін, өйткені

• Ол шомылдыру рәсімінен өтті.

• Ол қауым мүшесі.

• Ол белгілі бір мәсіхшілік ілімдерге сенеді.

• Ол белгілі бір діни әдет-ғұрыптарды ұстанады.

• Оның жүріс-тұрысы дұрыс.

• Оның рухани тәжірибесі бар.

• Ол шешім қабылдады және мәсіхшілікті ұстанады.

Киелі кітапқа сәйкес, бұл белгілердің ешқайсысы адамды оның мәсіхші екеніне сендіру үшін жеткіліксіз.

Киелі кітап бізге құтқарылғанымызды анық білуге ​​болатынын айтады. Құдайдың бізді қабылдағанына сенімді бола аламыз . Бізге қорқынышпен өмір сүрудің қажеті жоқ, өйткені Құдайдың Рухы біздің Құдайдың рухани балалары екенімізді растайды.[1]

Бұл сондай нық сенімділік, бізге тіпті қиямет күнінен қорқудың қажеті жоқ.[2] Кейбір адамдар жұмаққа баруға үміттенемін дейді, бірақ біз оған сенімді бола аламыз. Адамзатта құтқарылу бар екеніне сену жеткіліксіз; адам өзінің құтқарылғанын білуі керек.

► Адам өзінің құтқарылғанына қалай сенімді бола алады?

Кейбір адамдар өз сезімдеріне сенеді, бірақ сезімдер құбылмалы және олар жаңылыстыруы мүмкін.

Өзгерген өмір - адамның құтқарылғанының дәлелі, бірақ бұл бастапқыда көрінбейді. Құтқарылғандықтың нәтижесі әлі көрінбейді, сондықтан өзгерген өмір сенімділіктің негізі емес.

Сенуші адам Жазбада көрсетілген құтқарылу жолымен жүріп келгенін біле отырып, сенімді бола алады. Егер адам шын жүректен тәубе етіп, сенімге келсе, Құдайдың оны кешіргеніне сенімді бола алады. Содан кейін Құдай оған оның Құдайдың ұлы (немесе қызы) болғанын растайтын Рухты береді.

Егер адам шынайы тәубе етпей құтқарылғанын сезінуге тырысса, ол шатасып, өзін-өзі алдауы мүмкін.

Егер адам (1) шынайы тәубе етсе, (2) Құдайдың Жазбадағы уәдесіне сенсе және (3) Рухтың куәлігін қабылдаса, ол алданбайды. Бұл сенімділік Құдай Сөзіне негізделгендіктен берік болып табылады. Құдай әрқашан уәделерін орындайды.

Татуласу: Бұл сөз жау болғандардың қайта бітімге келгенін білдіреді. Құтқарылу арқылы біз Құдаймен татуласамыз.[1]

Өтеу: Бұл сөз жазбаның жойылғанын білдіреді. Құтқарылудан кейін күнәларымыз туралы жазба жойылады.[2]

Құрбандық: Бұл сөз біреудің қаһарын қайтару үшін берілген нәрсені білдіреді. Құтқарылу арқылы Исаның құрбандығы Құдайдың қаһарын бізден қайтарады.[3]

Тәуелділіктен босату: Бұл сөз біреудің басқа күштің ықпалынан құтылуын білдіреді. Құтқарылу арқылы біз шайтанның күші мен күнәдан азат болдық.[4]

Төлем: Бұл сөз біреуді босату үшін құн төленгенін білдіреді. Құтқарылу арқылы Исаның өлімі күнәнің құлдығы мен жазасынан құтылуымыздың бағасы болып табылады.[5]

Ақтау: Бұл сөз біреудің әділ немесе кінәсіз деп жариялануын білдіреді. Құтқарылу арқылы күнәкар әділ деп саналады, өйткені Иса оның орнына азап шекті.[6]

Қасиеттілік: Бұл сөз біреудің қасиетті болғанын білдіреді. Құтқарылғаннан кейін күнәкар Құдайдың қасиетті баласына айналады.[7]

Асырап алу: Бұл сөз біреудің басқа біреудің заңды баласы болғанын білдіреді. Құтқарылу арқылы біз Құдайдың балаларына айналамыз.[8]

Қайта туылу/жаңа жаратылыс: Бұл сөз біреудің өмірді жаңадан бастағанын білдіреді. Құтқарылғаннан кейін сенуші жаңа өмір бастайды.[9]

Белгілеу: Бұл сөз біреудің біреуге тиесілі екенін көрсету үшін ерекше түрде белгіленетінін білдіреді. Құтқарылғаннан кейін Киелі Рух бізде өмір сүреді және Ол – біздің Құдайдың меншігі екендігіміздің белгісі.[10]

Кейбір адамдар рақым бойынша, сенім арқылы құтқарылуға болатынын естігенде құтқарылдым деп ойлайды. Олар шын мәнінде тәубеге келмеді, өйткені олар мұның қажеттілігін түсінбеді. Олар ешқашан өздерін Құдайдың үкіміне лайық күнәкарлар деп таныған емес. Олар үшін рақым өздігінше өмір сүруді білдіреді. Олар шындықты қабылдағандықтан, өздерін сенуші деп санайды, бірақ олардың өмірлері өзгермейді. Олар әлі күнге дейін өз еркін орындап, Құдайға бағынбайды. Иемізді өмірдің белгілі бір бөлігі ретінде қабылдап, көп жағдайда өз еркіне сай өмір сүреді. Мұндай қарым-қатынас Жазбада сипатталған Құдаймен қарым-қатынасқа сәйкес келмейді.

(1) Бұл сабақта біз құтқарудың әртүрлі аспектілеріне қатысты 10 сөз зерттедік. Бірнеше абзацта Құдаймен қарым-қатынасыңызда олардың қайсысы сізге маңызды болып көрінетінін түсіндіріңіз. Көбірек ойлануыңыз қажет нәрселер бар ма?

(2) Еліңіздегі, әсіресе сіздің аймағыңыздағы христиан дінінің түрлеріне сүйене отырып, адамдар үшін мәсіхші болу нені білдіретінін жазыңыз. 2-3 бетте адамдардың бірнеше түрін және олардың мәсіхшілік туралы түсініктерін сипаттаңыз. Олардың тәубе ету, сенім және басқа да ілімдер туралы түсінігінде не дұрыс емес екенін түсіндіріңіз.