Lesson 12: Есіктерді ашу

► Біз күнәкарлар үшін дұға етуіміз керек пе? Киелі кітаптың қай жерінде күнәкарлар үшін дұға ету керектігі айтылған?

Киелі кітаптан күнәкарлардың сенімге келуі үшін дұға ету керектігі туралы нақты аят табу оңай емес. Ізгі хабардың тиімді таралуы үшін дұға ету керектігін айтатын көптеген аяттар бар.[1]

Біз Ізгі хабардың сәтті болуы үшін дұға етумен қатар күнәкарлардың сенімге келуі үшін дұға ету керектігін білеміз. Бізге барлығы үшін дұға ету керек, соның ішінде күнәкарлардың сенімге келуі үшін дұға ету керек.[2] Бізге адамдарды тәубеге келтіруге тырысу керектігі айтылған,[3] сондықтан бұл жұмыста Құдайдан көмек сұрап дұға ету орынды болар еді.

Қауым жақсы болған кезде, Ізгі хабар өздігінен және табиғи түрде орын алатын нәрсе сияқты. Елшілердің істері кітабында сипатталған қауымның бірінші ұрпағында барлығы қуанышпен Ізгі хабарды таратқан секілді.

► Студент топқа Елшілердің істері 2:46-47 үзіндісін оқып шықсын.

Қауымдағы қарым-қатынастың күшті және шынайы болғандығы сондай, ол басқа адамдарды өзіне тартты. Бұл бізге егер қауым жаңа адамдарды тартпаса, онда оның қарым-қатынасы жетерліктей күшті емес екенін көрсетеді.

► Студент топқа Елшілердің істері 5:42 үзіндісін оқып шықсын.

Елшілер барлық жерде және барлық уақытта Ізгі хабарды таратуға мүмкіндіктер тапты. Кейбір қауымдар Ізгі хабар таратпайды және олар неден бастау керектігін де білмейді. Олар Ізгі хабар тарату мүмкіндіктерін қалай табуға болатынын білмейді.

► Студент топқа Елшілердің істері 8:1-4 үзіндісін оқып шықсын.

Қуғын-сүргінге байланысты көптеген мәсіхшілер Иерусалимнен басқа жерлерге көшті. Олар барған жерлерінің бәрінде Ізгі хабармен бөлісті. Олар үшін Ізгі хабарды тарату мәсіхшілік өмірдің бір бөлігі болды.

Сенбеушілердің алдында басқа қауымдар туралы даулардан аулақ болуыңыз керек. Ізгі хабарды таратқанда басқа қауымдарды сынамауға тырысыңыз. Сенбеушілер ондай дауларда дұрыс қорытындыға келмейді, өйткені олардың рухани түсінігі жоқ. Әлемдегі көптеген адамдар мәсіхшілікке сенбеуінің себебі қауымдар арасындағы қақтығыстар деп айтады.

Егер біреу доктриналық айырмашылықтар туралы табанды түрде сұрай берсе, Жазбаларға сүйеніп жауап беріңіз, бірақ оны Ізгі хабарға қайтаруға тырысыңыз. «Мұндай нәрселер маңызды, бірақ ең маңыздысы - құтқарылу және Құдаймен қарым-қатынас», - деп айтуыңызға болады. Егер олар сізге өздері білетін мәсіхші, мүмкін туысы немесе бақташы туралы айтса, сол адамның ілімі туралы сын айтпауға тырысыңыз.

Егер сіз өзіңіздің қауымыңыздың басқалардан неге ерекшеленетінін түсіндіруіңіз керек болса, сіз былай деп айта аласыз: «Адамның күнәсына өкініп, кешірімге ие болуы және Құдайға мойынсұнып өмір сүруі маңызды. Біздің қауым бұл басымдыққа баса назар аударады, сондықтан біз басқа нәрсені басымдық ететін қауымдардан ерекшеленеміз».

Кейбір мәсіхшілер Ізгі хабармен бөлісуге қорқады, өйткені олар қиын сұрақтардан қорқады. Оқуды жалғастыру жақсы, бірақ мәсіхшілердің көпшілігі барлық қиын сұрақтарға қалай жауап беру керектігін білмейді. Барлық жауаптарды білудің қажеті жоқ.

Егер біреу сіз жауап бере алмайтын сұрақ қойса, сіз былай айта аласыз: “Мен бұл сұрақтың дұрыс жауабын білмеймін. Біздің қауымдағы бір кісі бұл сұраққа жауап бере алады. Бірақ мен Киелі кітапқа сенемін және ең бастысы Құдайды танып және құтқарылу деп есептеймін. Мен сіздің қалай құтқарыла алатыныңызды білемін».

Егер адам: «Мен Киелі кітапқа сенбеймін» немесе «Мен Құдайға сенбеймін» десе, әңгімені екі түрлі бағытта жүргізуге болады. Сіз оның пікірінің себептерін сұрап, оған дәлелдер келтіруге тырыса аласыз. Тағы бір бағыт, сіз былай айта аласыз: “Сіз бұл туралы ойланып, логикалық қорытындыға келуге тырысқан шығарсыз. Бірақ сіз Киелі кітапқа сенбесеңіз де, парасатты адам ретінде Киелі кітаптың негізгі хабарын білгіңіз келуі мүмкін. Оның не екенін айтып берсем болады ма?» Осылайша сіз Ізгі хабарды дауласпай айта аласыз. Құдай бұл хабарды кейінірек оған әсер ету үшін пайдалана алады.

Ізгі хабармен бөліскенде, сіз жай ғана айтысқысы келетін адамды кездестіруіңіз мүмкін. Оған көп уақыт жұмсаудың қажеті жоқ. Сіз бәрін дұрыс айтсаңыз да, ол шындықты қабылдамайтын шығар. Ізгі хабардың негіздерімен бөлісуге тырысыңыз, содан кейін басқа адамға ауысыңыз.

► Титке 1:9—11 оқып шығыңыз. Бұл үзіндіде Ізгі хабарды қорғаудың қандай себептері келтірілген?

Бақташы дамытуы керек қабілеттердің бірі - мәсіхшілік шындықты әлемнің философиясынан қорғау қабілеті. Бұл әртүрлі қауымдардың іліміне қатысты даулар емес, бұл әлемнің Ізгі хабарға қарсылығы туралы.

Шындықты қорғауымыздың себебі – дауласушы адамды өз бетінше қайта бұруға тырысу ғана емес, оның ықпалындағы адамдарға да көмектесу. Көптеген адамдар неге сенетінін әлі шешкен жоқ. Олар мәсіхшілік шындыққа қатысты дәлелдерді естуі керек.

Мәсіхшілердің көбісі мұндай дауға дайын емес. Әрбір мәсіхші мүмкіндігінше көп нәрсені үйренуі керек, бірақ кейбір адамдардың осыған қатысты дарыны бар және олар бұған дайын.

Дау-дамай кезінде мақсатыңызды көрсету маңызды. Сіз жарыста жеңіске жетуге тырыспайсыз. Сіз адаммен жеке жау ретінде күреспейсіз. Сіз шындықтың сіз үшін маңызды екенін көрсетуіңіз керек, өйткені сіз адамдардың қамын ойлайсыз. Егер ол Ізгі хабарға сенбесе, оның жаны өледі. Сондықтан оның ойын өзгерткіңіз келеді. Сіз былай айта аласыз: «Мен сіздің Құдайды танып, құтқарылғаныңызды қалаймын және Құдайға апармайтын нәрселерге сенесіз бе деп қорқамын».

Киелі кітапта Ізгі хабар таратушы Ізгі хабарды таратудың ерекше мүмкіндігін тапқаны туралы бірнеше үзінділер бар.

► Студент топқа Елшілердің істері 8:26-39 үзіндісін оқып шықсын. Басқа студент топқа оқиғаны қорытындылап айтып берсін.

► Бұл оқиғада Құдай Рухы қалай жұмыс істеді? Філіп Ізгі хабарды тарату мүмкіндігін қалай түсінді?

Ізгі хабар таратушының Ізгі хабар тарату мүмкіндігін пайдаланған тағы бір мысалы - Исаның өзі.

► Студент топқа Жохан 4:7-14 үзіндісін оқып шықсын. Басқа студент топқа оқиғаны қорытындылап айтып берсін.

Иса мен самариялық әйел арасындағы әңгіме этникалық қақтығыстар, діни айырмашылықтар және күнделікті өмірлік міндеттер тақырыптарын қамтыды. Иса бұл тақырыптарға көп уақыт бөлмей, әңгімені әйелдің рухани қажеттілігі тақырыбына аударды.

Сіз Ізгі хабармен бөлісуді үйренген сайын, оны адамдармен бөлісу мүмкіндіктерін іздейсіз. Кейде біреу сізден Ізгі хабар туралы сұрауы мүмкін, бірақ мұндай жағдайлар әдетте көп емес.

Кейбір мәсіхшілер Ізгі хабармен бөлісу қиын, өйткені адамдар оны тыңдағысы келмейді деп ойлайды. Оларға дін туралы әңгіме бастау қиынға соғады.

Ізгі хабар адамдарды толғандыратын көптеген мәселелерді қозғайды. Сондықтан әңгімеге Ізгі хабарды қосу қиын емес.

Бұл сабақта біз адамдардың Ізгі хабарға қызығушылық танытуының себептері туралы айтатын боламыз.

Адамдардың құтқарылу ұсынысын қабылдауға әр түрлі себептері болады. Кейде олар дұрыс емес себептер, бірақ дұрыс себептер де көп.

► Ізгі хабарды қабылдауыңызға не себеп болды? Бірнеше студентке өздерінің сенімге келуінің себептерін сипаттауға рұқсат етіңіз.

Адамдардың құтқарылуды қалауының әртүрлі себептері төменде көрсетілген

• Тозаққа емес, жұмаққа бару (немесе соттан қорқу)

• Толыққандық пен мақсатқа ие болу

• Қауіпсіздікті және жан тыныштығын табу, қорқыныштан арылу

• Кешірімге ие болу, кінәлілік сезімінен құтылу (ар-ұждан тазалығы)

• Рухани таза және тұтас болу

• Құдаймен қарым-қатынаста болу (Құдайды тану)

• Мәсіхшілермен қарым-қатынаста болу

• Рухани қалауларды қанағаттандыру (шынайы бақыт)

• Күнәдан арылу

• Шындықты білу

Бұл Құдаймен татуласудың тікелей артықшылықтары. Бұл мәңгілік құндылықтарға қайшы келетін дүниелік уайымдар емес. Құдайдан бөлек болса, адамға осының бәрі жетіспейді.

► Осы тізімге қарап, қайсысы сіз үшін маңызды екенін ойланыңыз. Олардың қайсысы сізді сенімге келмей тұрып қызықтырды? Олардың қайсысы сіз үшін сенімге келгеннен кейін маңызды болды?

Құтқарылмаған адам әңгімелесу барысында қандай артықшылыққа мұқтаж екенін айтуы мүмкін. Ізгі хабар таратушы осы қажеттілікті қанағаттандыру үшін Ізгі хабарды соған сәйкес бейімдей алады. “Адамдарда ______ болмауының себебі - олардың Құдайдан бөлінгендігі. Киелі кітап Құдаймен қарым-қатынасты қалай қалпына келтіру керектігін айтады” деп айтыңыз.

Мәсіхші болатындарға жердегі бақытты уәде етпейтінімізге көз жеткізу маңызды. Өйткені солай істеу арқылы мәсіхші болуды таңдаған адам күнәлары үшін шынайы өкінбейді, сондықтан құтқарылудың игіліктертерін ала алмайды. Жердегі бақытқа уәде бермеуіміздің тағы бір себебі, Киелі кітап мәсіхшілер үшін жақсы жағдайларды уәде етпейді; керісінше, қуғын болатынын айтады.[1]

Адамның мәсіхші болуының ең маңызды себебі - өз кінәсін түсіну және болашақтағы сот. Жоғарыдағы тізімдегі басқа нәрселерді адамға Құдайдан бөлек екенін түсінуге көмектесу үшін пайдалануға болады.

► Ізгі хабармен бөлісу мүмкіндігіне ие болу үшін қандай мүмкіндіктерді пайдаландыңыз?

► Араларыңызда Ізгі хабармен бөлісу мүмкіндігін алу қиын болып көрінген кездер болды ма? Мұның себебі неде деп ойлайсыз?

Кейде мүмкіндік оңай келеді. Мұндай жағдайларда сіз жай ғана Ізгі хабарды түсіндіріп бастай аласыз. Егер сіз оларға Жазбаны көрсеткіңіз келсе, сіз: «Киелі кітапта мәсіхші болу туралы не айтылғанын көрсету үшін маған бірнеше минут уақытыңызды бөле аласыз ба?» деп сұрай аласыз. Көпірдің сызбасын көрсеткіңіз келсе, сіз: «Сізге Киелі кітапта құтқарылғаныңызға қалай сенімді бола алатындығыңызды көрсететін суретті көрсетуге екі минут уақыт бөле аласыз ба?» деп сұрай аласыз.

Ашылулар әртүрлі тақырыптардағы әңгімелерде пайда болады. Мұнда сипатталған сөйлесудегі кез келген ашылулар көпір сызбасын немесе Римдік жол сияқты Жазбалардағы Ізгі хабарды ұсыну үшін пайдаланылуы мүмкін.

► Адамдар өмірлеріндегі қиындықтарын айтып, шағымданғанын естідіңіз бе?

Кейде адамдар өміріндегі қиын жағдайларға шағымданады. Олардан: «Өмір неге соншалықты қиын?» - деп сұраңыз. Олар жауап бергеннен кейін: «Мен сізге өмірдің неліктен қиын екенін көрсететін суретті көрсетсем болады ма?» - деп айтыңыз. Құдай бізді Өзімен қарым-қатынаста өмір сүруді қалағанын және өмірдің мұндай болғанын қаламайтынын айтудан бастаңыз. Әлем күнәнің кесірінен бүлінді. Әрі қарай сызбаны ұсыныңыз.

«Римдік жол» сияқты Жазбалардан алынған презентацияны пайдалану үшін былай айтсаңыз болады: «Киелі кітап бәрі күнә жасағандықтан өмірдің қиын екенін түсіндіреді. Күнә дүниені қарғысқа ұшыратты». «Римдік жол» презентациясын айтуды жалғастырыңыз.

Егер адам діндар болып көрінсе, сіз одан оның ең маңызды сенімі қандай екенін немесе «Адам өзінің жұмаққа баратынын қайдан біледі деп ойлайсыз?» - деп сұрай аласыз. Оның жауабын тыңдап болған соң: «Киелі кітапта адамның көкке қалай бара алатыны туралы не айтылғанын көрсететін суретті көрсетуім үшін маған екі минут уақыт бөле аласыз ба?» — деп сұраңыз.

► Адамдардың әлемнің жағдайы нашар немесе ұлттық мәселелер туралы айтқанын естідіңіз бе? Мұны Ізгі хабармен бөлісу мүмкіндігі ретінде қалай пайдаланар едіңіз?

Егер адам ұлттық мәселелер, ашаршылық, кедейлік немесе соғыс қаупі туралы айтып жатса, «Мен сізге дүниенің неге осындай екенін түсіндіретін Жазбаны көрсете аламын ба?» деп сұраңыз.

Күнәкарлар Құдайдан бөлінгендіктен, бұл дүниенің жағдайы осындай екенін көрсетіңіз. Құтқарылу барлық мәселелерді бірден шешеді деп айтпаңыз, бірақ жеке құтқарылу Құдайдың шешуінің бастамасы екенін түсіндіріңіз. Бір күні жаңа аспан мен жер пайда болады және қазір Құдаймен татуласқандар үшін бұл мәселелер болмайды.

Сұрақтар арқылы әңгіме бастауға болады, әңгіме арқылы Ізгі хабар айтуға мүмкіндік ашылады.

Ең қарапайым сұрақ: «Сіз мәсіхшісіз бе?» Бұл сұраққа адамдардң көбісі ренжімейді. Егер адам «Жоқ» деп жауап берсе, сіз: «Киелі кітапта адамның қалай мәсіхші болатыны туралы не айтылғанын айтсам болады ма?» деп сұрай аласыз.

Егер адам: «Иә, мен мәсіхшімін» десе, сіз: «Бұл керемет. Сіз қалай мәсіхші болдыңыз?» деп айта аласыз. Жауап дұрыс болмаса немесе адам абдырап қалса, сіз оны Киелі кітапта адамның қалай мәсіхші болатыны туралы не айтылғанын түсіндіруге шақыра аласыз.

Жоғарыдағы берілген сұрақтарды әңгіме барысында басқа да кіріспе сұрақтар ретінде пайдалануға болады. Төменде тағы бірнеше сұрақ бар.

«Өмірдің мәні неде деп ойлайсыз?» Адамның өз пікірін айтуына жол беріңіз. Оның айтқан барлық дұрыс нәрселерімен келісіңіз. Сосын: “Мақсатымыздың ең маңызды бөлігі - Құдайды тану. Ол бізді Өзімен қарым-қатынаста болу үшін жаратты. Мен сізге Киелі кітапта Құдаймен қарым-қатынас орнату туралы не айтылғанын көрсетсем болады ма?”

«Бақыттың кілті неде деп ойлайсыз?». Олар не айтса да, сіз былай айта аласыз: «Осыған ие болған көптеген адамдардың қуанышы ұзаққа созылмайды. Киелі кітап қуаныш Құдайдан келетіні туралы айтады.[1] Мен сізге адамның Құдаймен қарым-қатынасқа түсу жолын көрсететін суретті көрсетсем болады ма?».

“Өлімнен кейін өмір бар екеніне сенесіз бе? Қалай ойлайсыз, ол неге ұқсайды?” Содан кейін: “Киелі кітапта әрбір адам жұмаққа немесе тозаққа барады делінген. Киелі кітапта жұмаққа қалай жетуге болатыны туралы не айтылғанын көрсетсем болады ма?”

«Киелі кітаптың негізгі идеясы не деп ойлайсыз?» Бұл 9-сабақтағы суретті көрсетуге мүмкіндік береді.

► Араларыңызда осы әдістердің біріне ұқсас әдісті қолданғандар бар ма? Бұл қалай жұмыс істеді?

Бұл әдістер барлық студенттерге қолайлы болмауы мүмкін. Белгілі бір мәдениетке бір немесе басқа әдіс келмеуі мүмкін.

Сабақтың мақсаты – студенттің өзіндік әдісін қалыптастыруға көмектесу.

Келесі сабақ Ізгі хабар кітапшаларын таратуға арналған нұсқауларды қамтиды. Студенттер тарату үшін кітапшаларды қайдан алуға болатынын білуі керек. Мүмкін болса, келесі сабаққа кітапшаларды әкеліңіз.

Осы аптада Ізгі хабармен бөлісуді жалғастыра отырып, осы кіріспе сұрақтардың кейбірін қолданып көріңіз немесе өзіңіздің әдісіңізді дайындаңыз. Олардың қалай жұмыс істейтінін бақылаңыз. Олардың қалай өткенін жазыңыз және ол туралы келесі сабақта айтуға дайын болыңыз.