Lesson 8: 1 და 2 თესალონიკელთა წერილები

ამ გაკვეთილის ბოლოს სტუდენტმა უნდა:

(1) იცოდეს სავარაუდო თარიღი და ისტორიული გარემო 1 და 2 თესალონიკელთა წერილის პერიოდში.

(2) გამოკვეთოს 1 და 2 თესალონიკელთა წერილის ძირითადი თემები და მიზანი.

(3) ურწმუნოთა წინააღმდეგობის პირისპირ მყოფმა ერთგულების წახალისება მიიღოს.

(4) აჩვენოს ქრისტეს დაბრუნების დოქტრინის უფრო ღრმა აღქმა (გაგება).

(5) დღევანდელობაში იცხოვროს ქრისტეს დაბრუნების სინათლის ჭრილში.

(6) დაუკავშიროს ამ წიგნების გზავნილი დღევანდელი მსოფლიოს საჭიროებებს.

► წაიკითხეთ: 1 და 2 თესალონიკელთა

► დაიზეპირეთ: 1 თესალონიკელთა 4:23-24

თესალონიკის ეკლესია დევნის პერიოდში დაიბადა. ამ მორწმუნეებმა იცოდნენ რას ნიშნავს ტანჯვა ქრისტეს სახელისთვის. ისინი ქრისტიანები გახდნენ, რადგან ირწმუნეს პავლეს ქადაგების ჭეშმარიტება, რომ: ”ეს ქრისტე სწორედ იესოა, მე რომ გახარებთ” (საქმ. 17:3). ესენი იყვნენ გაბედული ქრისტიანები, რომელთაც სურდათ ეტანჯათ თავიანთი რწმენისთვის.

წინააღმდეგობის გამო, პავლემ მხოლოდ მცირე დრო დაჰყო თესალონიკში. ამის გამო, პავლემ ვერ შეძლო მათი სრულად გარკვევა ქრისტიანულ დოქტრინაში. პავლეს თესალონიკიდან წასვლის შემდეგ გაჩნდა კითხვები ქრისტეს დაბრუნებასთან დაკავშირებით. დევნის ფონზე ამ ახალგაზრდა მორწმუნეებს ჰქონდათ კითხვები მათი მომავალი იმედის შესახებ.

პავლე ამ ორ წერილს წერს, რათა ერთგულებისკენ მოუწოდოს მათ. ის ირწმუნება, რომ იესო კვლავ მოვა და რომ მათ დღეს, მისი დაბრუნების სინათლეში უნდა იცხოვრონ.

ისტორიული ფონი (წინაპირობა)

თესალონიკის ეკლესია დაარსდა პავლეს მეორე მისიონერული მოგზაურობის დროს. ფილიპიდან წასვლის შემდეგ, პავლე ამფიპოლისის და აპოლონიის გავლით თესალონიკში გაემგზავრა, რომელიც ფილიპიდან დაახლოებით 160 კილომეტრის მანძილზე მდებარეობს.

პავლე თესალონიკის სინაგოგაში ასწავლიდა სამი შაბათის განმავლობაში. ზოგი ებრაელი და მრავალი " ღვთისმოშიში ბერძენი " მოაქცია.[1] ამის საპასუხოდ, ურწმუნო იუდეველთა ჯგუფმა აჯანყება დაიწყო და შეუტია იასონის სახლს, სადაც პავლე და სილა ცხოვრობდნენ.

საშიშროების გამო, პავლე და სილა ღამით გაეცალნენ ქალაქს და გაემგზავრნენ ბერეაში, თესალონიკიდან დაახლოებით 80 კილომეტრში. როდესაც თესალონიკში მყოფმა ებრაელებმა შეიტყვეს, რომ პავლე ბერიაში იმყოფებოდა, მას გაჰყვნენ და იქ აჯანყება მოუწყვეს. როგორც ჩანს, წინააღმდეგობა პავლესკენ იყო მიმართული, რადგან შეძლო სილას და ტიმოთეს დატოვება ბერეაში, როდესაც ათენში გაემგზავრა.

ათენიდან პავლე გაემგზავრა კორინთოს დასავლეთით, სადაც მსახურობდა თვრამეტი თვის განმავლობაში. მოგვიანებით სილა და ტიმოთე ჩავიდნენ პავლესთან კორინთში და ჩაუტანეს ცნობები თესალონიკის ახალი ეკლესიის შესახებ.

პავლემ დაწერა 1 თესალონიკელთა წერილი სილას და ტიმოთეს მიერ ჩამოტანილი ამბების საპასუხოდ. მან ალბათ ტიმოთე გაგზავნა წერილის თესალონიკში ჩასატანად. რამდენიმე თვის შემდეგ, შემდგომი ამბების საპასუხოდ, მან დაწერა 2 წერილი თესალონიკელთა მიმართ. ეს ორი წერილი თარიღდება პავლეს კორინთოში ყოფნის პერიოდით, ახ. წ. 50 –51 წწ. ისინი მის ადრეულ წერილებს მიეკუთვნება, რომლებზე ადრეც მხოლოდ გალატელები დაიწერა.

მიზანი

როდესაც ტიმოთე კორინთოში ჩავიდა, მასთან მიტანილი ამბები თესალონიკის ეკლესიის შესახებ დადებითი იყო; ეს ახალგაზრდა მორწმუნეები სახარების ერთგულნი დარჩნენ. პავლე წერს, რათა მათი რწმენა წაახალისოს და ასევე უპასუხოს ეკლესიაში წამოჭრილ საკითხებს. ეკლესიის ზოგიერთი წევრი გარდაიცვალა და ამან გამოიწვია კითხვები უფლის დაბრუნების შესახებ. ზოგი ქრისტიანი შიშობს, რომ გარდაცვლილებმა გამოტოვეს ქრისტეს დაბრუნების პირობა. ქრისტიანებისთვის, რომლებიც იდევნებიან, საშინლად დამთრგუნველია ფიქრი, რომ მათი ერთგულება ამაოა. პავლე წერს თესალონიკელებს, რომ შეინარჩუნონ ერთგულება წინააღმდეგობის მიუხედავად და არწმუნებს მათ, რომ ქრისტე დაბრუნდება როგორც რწმენაში გარდაცვლილთათვის, ასევე მათთვის, ვინც ცოცხალი შეეგებება მას, მეორედ მოსვლის დროს.

შინაარსი

► მეორედ მოსვლაზე ფიქრი შიშს გგვრით თუ იმედს? როგორ მოქმედებს დოქტრინა მეორედ მოსვლის შესახებ თქვენს ყოველდღიურ ცხოვრებაზე?

თესალონიკში პავლეს მსახურებიდან მალევე დაწერილი ეს წერილი ძალიან პირადულია. მიუხედავად იმისა, რომ პავლე არ ასახელებს პიროვნებებს, ის თესალონიკში მსახურების დეტალებს აღნიშნავს. ის წერდა მორწმუნეებს, რომლებიც მისი მსახურების შედეგად მოექცნენ; მის წერილში ასახულია მისი ღრმა თანაგრძნობა რწმენისმიერი შვილების მიმართ.

მხარდაჭერა (წახალისება) წინააღმდეგობის პირისპირ

თესალონიკში ქადაგებისას პავლე აფრთხილებდა ეკლესიას, რომ დევნის მოლოდინი ჰქონოდათ (1 თეს 3:3-4). ახლა პავლე წერს, მათ მხარდასაჭერად ამ დევნის წინაშე. მის მისი წერილი მოიცავს:

• დარწმუნებულობა პავლეს ლოცვებში (1:2; 3:17-4:5). მას სურს, რომ იცოდნენ, რომ არ დავიწყებია ისინი. ის განაგრძობს მათთვის ლოცვას, რამდენადაც წინააღმდეგობას აწყდებიან.

• პავლეს ტანჯვის მაგალითის შეხსენება (1: 4-2: 12). პავლე მიუთითებს, რომ მის მზაობას - შეუპოვარი ყოფილიყო, ნაყოფიც აქვს - თესალონიკელების მოქცევა. თესალონიკში მისი მსახურებისთვის მას პირადად მოუხდა ფასის გადახდა: მტრების მიერ მასზე ხორციელდებოდა დევნა, ასევე მას ფიზიკური შრომის გაწევა უწევდა თავის გასატანად (საქმ. 17; 1 თეს. 2:2, 9, 16). თუმცა, ჯილდო უღირდა ამ ფასად. ეს ახალმოქცეულები, მისი დიდება და სიხარულია (1 თეს. 2:20). ამან უნდა გაემხნევებინა თესალონიკელი ქრისტიანები, რომ მათ ტანჯვასაც უპასუხებს ღმერთი საზღაურით.

• მადლიერება მათი ერთგულებისთვის (1:6-10; 3:6-10). პავლე შთაგონებული და გახარებულია მიღებული ანგარიშით მათ შესახებ და, თავის მხრივ, ისიც ამხნევებს თესალონიკელებს. მათი მოქცევა და ტანჯვაში ერთგულება მოწმობად და ნიმუშად იქცა "ყველა მორწმუნესათვის მაკედონიასა და აქაიაში” (1 თეს. 1:7).

იესო ქრისტეს დაბრუნება (მეორედ მოსვლა)

პავლე იძულებული გახდა დაეტოვებინა თესალონიკი თავისი სწავლების დასრულებამდე. ამის გამო, ახალმოქცეულებმა სრულად ვერ მიიღეს მითითებები და სწავლება მორწმუნეების სიკვდილის შესახებ. პავლე წერს, რათა განაგრძოს სწავლება ქრისტეს დაბრუნებასთან და ბოლო დღეებთან დაკავშირებით (4:13-5:11).

ქრისტეს დაბრუნების აღთქმა თესალონიკელთა წახალისებაა, მაგრამ ახლა ისინი დამაბნეველი პრობლემის წინაშე დგანან. მათი ზოგიერთი წევრი გარდაიცვალა, მანამ ვიდრე ამ აღთქმულის შესრულებას ნახავდა. პავლე არწმუნებს მათ, რომ განსვენებულნიც (ზოგ თარგმანში-"ჩაძინებულებიც") იხილავენ უფლის დაბრუნებას.

უიმედო გლოვისა და მწუხარების ნაცვლად, ქრისტიანებს უნდა გახსოვდეს, რომ როდესაც უფალი გადმოვა ციდან ბრძანების სიტყვით, "ჯერ ქრისტეში განსვენებულნი აღდგებიან". ისინი კი, ვინც იქნებიან "ცოცხლად დარჩენილები, მათთან ერთად ვიქნებით ატაცებულნი ღრუბლებში" და ჩვენ "ამგვარად, უფალთან ვიქნებით სამარადისოდ” (1 თეს. 4:16-17).

მიუხედავად იმისა, რომ თესალონიკელებს დეტალების ცოდნა სურთ ქრისტეს დაბრუნების "დროზე და ვადებზე", პავლე არწმუნებს, რომ "საჭირო არ არის რაიმე მოგწეროთ" ამ საკითხთან დაკავშირებით. ამის ნაცვლად, ისინი დარწმუნებით უნდა შეეგებონ მომავალს ქრისტეს რწმენის გამო.

როდესაც "უფლის დღე ისე მოვა, როგორც ქურდი ღამით,"განადგურება ღამის, წყვდიადის შვილებზე მოვა. ხოლო "სინათლის შვილებისთვის" უფლის დღე იქნება "ხსნის მისაღებად ჩვენი უფლის იესო ქრისტეს მეშვეობით” (1 თეს. 5:1-5,9). მორწმუნეებისთვის იესოს დაბრუნება არის გამხნევების გზავნილი (უწყება) და არა შიშის.

დღევანდელობაში ქრისტეს დაბრუნების სინათლის ჭრილში ცხოვრება

პავლეს სწავლება ყოველთვის პრაქტიკული გამოყენებისკენ არის მიმართული. იგივეთი ხელმძღვანელობდა პავლე თავის ესქატოლოგიის სწავლებაშიც.[1] პავლეს არ აინტერესებს ცარიელი სპეკულაციები ქრისტეს დაბრუნების თარიღთან დაკავშირებით.

მას შემდეგ, რაც დაასაბუთა, რომ ქრისტე დაუბრუნდება როგორც ცოცხალთათვის, ასევე გარდაცვლილთათვის, პავლე საუბრობს, რომ მნიშვნელოვანია ქრისტეს მოსვლისთვის მზადყოფნა (4: 1-12 და 5: 1-24პავლე თავის მკითხველებს მოუწოდებს იცხოვრონ როგორც "სინათლის შვილებმა" და არა როგორც სიბნელის შვილებმა. ის გვაძლევს სპეციფიკურ მითითებებს, რომ დღეს მოვემზადოთ ქრისტეს დაბრუნებისთვის ხვალ:

• განაგრძეთ სიარული დიდი სიფრთხილით, გულმოდგინებით და წინდახედულობით, ღმერთს მოსაწონად (4:1-2)

• იცხოვრე სუფთა სექსუალურად ცხოვრებით (4:3-8)

• განაგრძეთ ზრდა ძმურ სიყვარულში (4:9-10)

• აკეთეთ თქვენი საქმე (4:11)

• იმუშავეთ საკუთარი თავის უზრუნველსაყოფად, ურწმუნოთა თვალში სირცხვილის თავიდან ასაცილებლად (4:11-12)

• ვიყოთ მღვიძარენი (ყურადღებიანი, მომლოდინენი) და ვიფხიზლოთ (5:6-8)

• წაახალისეთ და განმტკიცეთ ერთმანეთი უფლის დაბრუნებასთან დაკავშირებით (5:9-11)

• პატივი ეცით მათ, ვისაც ეკლესიაში წინამძღოლობის პასუხისმგებლობა ეკისრება (5:12-13)

• შეინარჩუნეთ მშვიდობა მორწმუნეებს შორის (5:13)

• დაარიგეთ ისინი, ვინც არ ცხოვრობს სწორად: ზარმაცნი, სულმოკლენი და სუსტები (უძლურები) (5:14)

• სიკეთე აკეთეთ, როგორც სხვა მორწმუნეებისთვის, ასევე გარშემომყოფი ხალხისთვის (5:15)

• იცხოვრეთ სიხარულის ცხოვრებით (5:16)

• იცხოვრეთ მუდმივი ლოცვის ცხოვრებით (5:17)

• იცხოვრეთ მადლიერების ცხოვრებით (5:18)

• ნუ ჩაქრობთ სულიწმინდის საქმეს (5:19)

• ნუ უარყოფთ „იმას, რაც უფლის სახელით არის ნათქვამი” (1 თეს. 5:20). არამედ ყველაფერი გამოსცადეთ და კეთილს ჩაეჭიდეთ. (5:20-21)

• ერიდეთ ყოველგვარ ბოროტებას (5:22)

პავლე უფრო მეტს აკეთებს, ვიდრე მხოლოდ მითითებებია; ის ლოცულობს ამ მორწმუნეთათვის, რომლებთანაც გრძნობს ასეთ ახლო კავშირს. 1 თესალონიკელთა წერილში ორი ლოცვა უკავშირდება მის ზრუნვას, რომ მათ სიფრთხილით და გულმოდგინებით იცხოვრონ ქრისტეს მოსვლის აზრში და სინათლეზე. 3: 11-13-ში პავლე ლოცულობს, რომ ამ მორწმუნეებს სიყვარულსა და სიწმინდეში განვითარდნენ იესოს მოსვლისთვის მოსამზადებლად.

შემდეგ 5: 23-24-ში პავლე ლოცულობს, რომ ღმერთმა, რომელმაც შემოირიგა მორწმუნენი ("მშვიდობის ღმერთმა"), "წმიდაგყოთ სრულად და მთლიანად.“ ეს უზრუნველყოფს იმას, რომ მათი მთელი არსება ("სული, მშვინვა და სხეული") მზად იქნება "ჩვენი უფლის იესო ქრისტეს მოსვლისთვის". ბოლო გამხნევებით, პავლე მკითხველს არწმუნებს, რომ ეს განწმენდა ხდება ღვთის მოქმედებით და არა ჩვენი საკუთარი ძალებით. ის, ვინც სიწმინდისკენ მოგვიწოდებს, არის ის, ვინც გვწმენდს..

შინაარსი და მიზანი

[1]1 თესალონიკელთა წერილის გაგზავნიდან მალევე პავლემ შეიტყო მეორედ მოსვლასთან დაკავშირებული დამატებითი კითხვების შესახებ. 2 თესალონიკელებში პავლე პასუხობს ამ კითხვებს და კვლავ მოუწოდებს თესალონიკელებს ერთგულებისკენ, ქრისტეს დაბრუნებისთვის მზადებისკენ. 2 თესალონიკელები კიდევ უფრო განმარტავს პავლეს სწავლებას 1 თესალონიკელებში. პავლე ეხება დაბნეულობას უფლის დაბრუნებისა და მორწმუნეებს შორის არასწორი საქციელის საკითხებს.

უფლის დღის გაგება (აღქმა) (2 თეს. 1-2)

1 თესალონიკელებში პავლე ასწავლიდა, რომ მორწმუნეების სიკვდილის გამო სასოწარკვეთილებას არ უნდა მივეცეთ; ქრისტე დაბრუნდება როგორც ცოცხლებისთვის, ასევე მკვდართათვის. მოკლე მისალმების და მათი მზარდი რწმენისა და სიყვარულისთვის მადლიერების გამოხატვის შემდეგ, 2 თესალონიკელებში პავლე დამატებით მითითებებს იძლევა ქრისტეს დაბრუნების დაკავშირებით. პავლე წერს, რომ მეორედ მოსვლას მოყვება სამსჯავრო და „მარადიულ დაღუპვას“. თუმცა, მორწმუნეებს არ უნდა ეშინოდეთ; განკითხვის დღე ასევე იქნება ის დღე, როდესაც ქრისტე „განდიდდება თავის წმიდანებში” (2 თეს. 1:9-10).

1 თესალონიკელებში პავლე პასუხობს მცდარ აზრს, რომ გარდაცვლილ მორწმუნეებს უფლის დაბრუნება არ შეეხებათ. 2 თესალონიკელში ის პასუხობს მცდარ აზრს, რომ უფალი უკვე დაბრუნდა. 1 თესალონიკელებში პავლე გვასწავლის, რომ ქრისტე დაბრუნდება; 2 თესალონიკელებში პავლე გვასწავლის, რომ ქრისტე ჯერ არ დაბრუნებულა.

ვიღაცამ ტყუილად განაცხადა, რომ უფლის დღე უკვე დამდგარია. პავლემ არ იცის ამ მტკიცების ავტორი: ადამიანი, რომელიც იბრალებს წინასწარმეტყველების ნიჭს („სულს“),იშველიებს ნაქადაგებ სიტყვას ან ყალბ წერილს, რომლის ავტორადაც პავლეს აცხადებს (2 თეს. 2:2). წყაროს მიუხედავად, პავლე მკითხველს არწმუნებს, რომ ეს დღე ჯერ არ დამდგარა. ორი მოვლენა უნდა მოხდეს უფლის დღის დადგომამდე: "განდგომა" და "ურჯულოების კაცის" გამოჩენა” (2 თეს. 2:3-4. ). ეს მოვლენები ჯერ არ მომხდარა. პავლე არწმუნებს მათ, რომ ქრისტეს დაბრუნება ჯერ კიდევ მომავალია და ის გამოთქვავს გაკვირვებას, რომ მათ დაივიწყეს მისი ადრინდელი სწავლება ამ თემაზე (2 თეს. 2:5).

ცხოვრება უფლის დღისთვის მზადებაში (2 თეს. 3)

ისევე, როგორც 1 თესალონიკელებში, პავლეს ძირითადი საზრუნავი 2 თესალონიკელებშიც ის არის, თუ როგორ ცხოვრობენ ქრისტიანები დღეს ქრისტეს მომავალი დაბრუნების ფონზე. 1 თესალონიკელებში პავლე ასწავლიდა: ‘რადგანაც ქრისტე მოდის, იცხოვრეთ ასე... 2 თესალონიკელებში პავლე ასწავლის:‘რადგანაც ქრისტე ჯერ არ მოსულა, განაგრძე ცხოვრება ასე...’

რადგან ქრისტეს დაბრუნებას ველოდებით, ჩვენ უნდა:

• მტკიცედ ვიდგეთ რაშიც განვისწავლეთ (2:15)

• მოვერიდოთ სიზარმაცეს (3:6-12)

• მოვერიდოთ სხვების საქმეებში ჩარევას (3:11-12)[2]

• გავნაგრძოთ სხვებისთვის სიკეთის ქმნა (3:13)

• შენიშნული გვყავდეს ისინი, ვინც ჯიუტად უარყოფენ პავლეს მითითებების შესრულებას (3:14-15)

დღეს დიდი ინტერესია ესქატოლოგიისა და იესოს დაბრუნების საკითხისადმი. "წინასწარმეტყველების მასწავლებლები" ცდილობენ განჭვრიტონ უფლის დაბრუნების დრო. წიგნები "ბიბლიურ კოდებზე" ცდილობენ წმინდა წერილებში ამოხსნან საიდუმლო ჭეშმარიტებები. ქრისტიანი ავტორები აქვეყნებენ პოპულარულ რომანებს, რომლებიც ეფუძნება იესოს დაბრუნების მოვლენებს.

1 და 2 თესალონიკელებში საკმაოდ განსხვავებული აქცენტებია გაკეთებული. ამ წერილებში ჩანს, რომ ჩვენ უფრო მეტად უნდა ვიზრუნოთ ქრისტეს დაბრუნებამდე ერთგულად ცხოვრებაზე, ვიდრე მისი დაბრუნების დაფარული დეტალების ამოხსნასა და გამოკვლევაზე. პავლე არ ხარჯავს დროს „დროისა და ვადების“ განხილვაზე. ამის ნაცვლად, ის ამბობს: ‘ქრისტე დაბრუნდება. დარწმუნდით, რომ ისე ცხოვრობთ, როგორც გსურთ, რომ მან გნახოთ მისი დაბრუნებისას.’ ეს უნდა იყოს მაგალითი ჩვენი ქადაგებისთვის უფლის დაბრუნების შესახებ.

1998 წელს ტაივანის სექტამ იწინასწარმეტყველა, რომ იესო დაბრუნდებოდა 31 მარტს. ზოგიერთმა ქრისტიანმა გაყიდა თავიანთი სახლები და დატოვეს სამსახურები. ისინი ერთად შეიკრიბნენ მთაზე, რათა დალოდებოდნენ ქრისტეს დაბრუნებას. ტაივანის გაზეთებმა გამოაქვეყნეს ამბები ამ ჯგუფის შესახებ და პოპულარიზება გაუწიეს მათ სწავლებას. როდესაც იესო მოსალოდნელ დროს არ დაბრუნებულა, ეკლესიები დაცინვის ობიექტებად იქცნენ მათი ურწმუნო მეზობლების მხრიდან.

ეს პირველი შემთხვევა არ იყო, როდესაც იესოს დაბრუნების ცრუ პროგნოზებმა შეარცხვინა ეკლესია. ამერიკაში, წიგნი, რომელიც პროგნოზირებდა იესოს დაბრუნებას 1988 წელს, თითქმის 5 მილიონიანი ტირაჟით გაიყიდა. ზოგიერთი რელიგიური რადიო და სატელევიზიო სადგურები სპეციალურ მითითებებს იძლეოდნენ გადაცემებში ატაცებისთვის მომზადების თაობაზე.

სულ ახლახან, ჰაროლდ კემპინგმა იწინასწარმეტყველა ატაცება 2011 წელს. პროგნოზი ცრუ აღმოჩნდა. ურწმუნოებმა კვლავ დასცინეს ქრისტიანებს, რომ მათ დაიჯერეს ეს წინასწარმეტყველება.

ხალხი კვლავ და კვლავ აკეთებს ატაცების პროგნოზებს - და არაერთხელ დასტურდება, რომ პროგნოზები მცდარია. თავად იესო აფრთხილებდა მისი დაბრუნების თარიღის დადგენის მცდელობის წინააღმდეგ (მათეს სახარება 24:36). იმის ნაცვლად, რომ ვცადოთ იესოს დაბრუნების თარიღის პროგნოზირება, ჩვენ უნდა ვიყოთ დაკავებულნი ჩვენი ბატონის დავალებული საქმით. თესალონიკის მორწმუნეების მსგავსად, ჩვენც უნდა მივუძღვნათ თავი ისეთ ცხოვრებას, რომ ნებისმიერ დროს მზად ვიყოთ იესოს დაბრუნებისთვის.

წარმოაჩინეთ თქვენ მიერ ამ გაკვეთილის აღქმა (გაგება) შემდეგი დავალებების დახმარებით:

(1) აირჩიეთ ქვემოთმოყვანილი დავალებებიდან ერთერთი:

• 1 და 2 თესალონიკელთა წერილის წაკითხვის შემდეგ, დაწერეთ ერთგვერდიანი ესე თემაზე “დღევანდელობაში ქრისტეს დაბრუნების სინათლის ჭრილში ცხოვრება.” ეს უნდა იყოს პრაქტიკული ესე, რომელიც აჩვენებს, თუ როგორ მოქმედებს ქრისტეს დაბრუნება ჩვენს დღევანდელ ცხოვრებაზე.

• მოამზადეთ ქადაგება ან ბიბლიური გაკვეთილი მეორე მოსვლის შესახებ 1 და 2 თესალონიკელთა წერილზე დაყრდნობით. ეს სეიძლება იყოს 5-6 გვერდიანი ხელნაწერი ან ქადაგების ან ბიბლიური გაკვეთილის ჩანაწერი.

(2) გაიარეთ ტესტი ამ გაკვეთილის მასალაზე დაყრდნობით. ტესტი მოიცავს საზეპირო მუხლებს წმინდა წერილიდან.

(1) აღწერეთ გარემო, რომლის დროსაც დააფუძნეს ეკლესია თესალონიკში.

(2) ჩამოთვალეთ სამი რამ, რითიც ამხნევებს პავლე თესალონიკის ეკლესიას წინააღმდეგობის პირობებში.

(3) რას ეუბნება პავლე თესალონიკელებს ქრისტეს დაბრუნების დროისა და წინაპირობის შესახებ?

(4) პავლე ამ ქრისტიანებს კონკრეტულ გამხნევებას უგზავნის განწმენდის შესახებ. რას ეუბნება მათ?

(5) თუ 1 თესალონიკელთა ძირითადი გზავნილია "ქრისტე დაბრუნდება", რა არის მეორე თესალონიკელთა ძირითადი აზრი?

(6) თუ მივყვებით პავლეს მაგალითს, რაზე გავამახვილებთ ყურადღებას მეორედ მოსვლის შესახებ ქადაგებისას?