(1) სტუდენტი შეძლებს განმარტოს:

• მნიშვნელობის დონეები დასკვნითი მოვლენების ჩამონათვალში.

• ქრისტეს დაბრუნება და მისი მნიშვნელობა ქრისტიანული ცხოვრებისათვის.

• ყველა ადამიანის მკვდრეთით აღდგომა და სხეულის ღირებულება (ფასეულობა).

• ყველა ზნეობრივი არსების საბოლოო განსჯა.

• ღმერთის მარადიული სამეფო.

• ქრისტიანული რწმენის მოწმობა დასკვნითი მოვლენების შესახებ.

(2) სტუდენტს ეცოდინება მიწიერი ცხოვრების მარადიულობის პერსპექტივიდან დანახვის მნიშვნელობა.

► წაიკითხეთ დანიელი 7:9-14 ერთად. რას გვეუბნება ეს მუხლები მომავლის შესახებ?

მხეცის ნიშანი, საყვირები, დიდი ჭირი, ანტიქრისტე, 1000 წელი, 7 წელი, დიდი თეთრი ტახტი, ქალაქის დაშვება ზეციდან, ცეცხლის ტბა - ეს არის ბიბლიური წინასწარმეტყველებების თემები.

► რა საკითხებზე ფიქრობთ ბიბლიურ წინასწარმეტყველებებში?

წინასწარმეტყველებების განხილვა ხშირად ფოკუსირდება ძირითადი ჭეშმარიტების ნაცვლად, უმნიშვნელო კითხვებზე. წინასწარმეტყველების თემები არ არის ყველა ერთნაირად მნიშვნელოვანი. ამ კურსში არ შევეცდებით ყველაფერი მოვიცვათ და განვიხილოთ წინასწარმეტყველების შესახებ.

ზოგჯერ ხალხს აინტერესებს, როგორ გამოიყურება მხეცის ნიშანი, რომელი ქვეყნიდან მოვა ანტიქრისტე და ვინ იქნებიან ორი მოწმე. ეს არის კითხვები, რომლებზეც ბიბლია გარკვევით არ პასუხობს და ამაზე კამათი არ ღირს.

არსებობს სხვა თემები, რომლებსაც ბიბლია მეტად განმარტავს. რამდენიმე მაგალითი აქედან: იესო დაბრუნდება დიდი ჭირის დასაწყისში, შუაში, თუ ბოლოს; და არის თუ არა ათასწლეული პირდაპირი გაგებით ათასი წელი. ამასთან, ამ მოძღვრებებს სახარებისათვის არსებითი მნიშვნელობა არ აქვს. არასოდეს უნდა გაწყვიტოთ ურთიერთობა ვინმესთან, ვის აზრსაც არ ეთანხმებით ერთ-ერთ ამ საკითზე.

არსებობს რამდენიმე ძირითადი ჭეშმარიტება ბიბლიურ წინასწარმეტყველებებში. ეს ისეთი ჭეშმარიტებებია, რომლებიც ისე ნათელია, რომ ყველა, ვისაც ბიბლიის სჯერა, იღებს მათ. ეს სწავლებები გავლენას ახდენს ქრისტიანულ ცხოვრებაზე და ქრისტიანული მოძღვრების მთელ სისტემაზე.

მოდით გავეცნოთ ბიბლიურ წინასწარმეტყველებებში გამოვლენილ ოთხ ძირითად ჭეშმარიტებას დასკვნითი მოვლენების შესახებ.

იესო აშკარად, ხილულად დაბრუნდება ამ დედამიწაზე. მიუხედავად იმისა, რომ ის ახლა სულიერად იმყოფება მორწმუნეებთან დედამიწაზე, ის დაბრუნდება თავისი აღმდგარი, განდიდებული სხეულით, მთელი დედამიწის დასანახად. (წაიკითხეთ გამოცხადების 1:7).

► რა არის ის, რაც მოხდება იესოს დაბრუნების შემდეგ?

ქრისტეს დაბრუნება იქნება მიწიერი ისტორიის კულმინაცია. მსოფლიოს სამეფოები გადაიქცევიან ქრისტეს სამეფოდ. ვინც მისი ერთგული იქნება, დააჯილდოებენ და პატივს მიაგებენ. ისინი, ვინც მის წინააღმდეგ ამბოხდნენ, განადგურდებიან და მას ექნება ძალა, რომელიც გადალახავს ყველა წინააღმდეგობას. (წაიკითხეთ მათეს 26:64). ყველა მუხლი მოიდრიკება და ყველა ენა აღიარებს, რომ იესო არის უფალი (ფილიპელთა 2:10).

გარდაცვლილი ქრისტიანები აღდგებიან ქრისტეს მმართველობაში (2 ტიმოთეს 2:12) ისინი და ცოცხლად დარჩენილი მორწმუნეები უფალს შეეგებებიან, როდესაც ის გამოჩნდება (1 თესალონიკელთა 4:16-17).

იესოს დაბრუნება ყველა ქრისტიანის ნეტარი იმედია. (წაიკითხეთ ტიტეს 2:13). იფიქრეთ ყველაფერზე, რასაც მისი დაბრუნება ნიშნავს ჩვენთვის: დევნის, ტანჯვისა და მწუხარების დასრულებას; შეერთებას წმინდანებთან და ქრისტესთან, ჩვენთვის საყვარელ ადამიანებთან; იმის დასტურს, რომ ჩვენი რწმენა ამაო არ ყოფილა; თავად იესოს ხილვას; და სამოთხეში შესვლას და ღმერთთან მარადიული სიცოცხლის სისავსეს. ყველაფერი დამოკიდებულია არა მისი დაბრუნების დროზე, არამედ უბრალოდ იმაზე, რომ ის დაბრუნდება დაპირებისამებრ.

იესომ თქვა, რომ ის დიად ძალასა და დიდებაში დაბრუნდებოდა (მათეს 24:30). ის დაგვპირდა, რომ დაბრუნდება და თავის ხალხს წაიყვანს თან (იოანეს 14:3). ანგელოზებმა თქვეს, რომ ის დაბრუნდებოდა იმგვარადვე, როგორც ზეცაში ავიდა (საქმეების 1:11). მოციქულები მონანიებას ქადაგებდნენ, სანამ ქრისტეს დაბრუნებას ელოდებოდნენ, რათა ამქვეყნად ღვთის საბოლოო გეგმა დაემყარებინათ. (წაიკითხეთ საქმეების 3:19-21). ის, რომ იესო კვლავ დაბრუნდება ამ დედამიწაზე ძალაუფლებით და დიდებით, არის მრავალგზის განმეორებული ახალ აღთქმაში.[1]

მიუხედავად იმისა, რომ არსებობს ნიშნები, რომლებიც წინ უსწრებენ მეორედ მოსვლას, ჩვენ ზუსტად არ ვიცით როდის დაბრუნდება ის. მორწმუნეებისთვის სასარგებლოა, ყოველთვის გაითვალისწინონ იესოს მოსვლა და შესაბამისად იცხოვრონ. (წაიკითხეთ მარკოზის 13:33-37).

► რატომ ბრუნდება იესო?

ჩვენ ვცხოვრობთ სამყაროში, სადაც ადამიანთა უმეტესობა აჯანყებულია ღმერთის წინააღმდეგ. მთელი ქმნილება იტანჯება ცოდვის წყევლის გამო. მსოფლიო ვერასოდეს გახდება სრულყოფილი პოლიტიკური ქმედებებით, სოციალური რეფორმებით, განათლების გაუმჯობესებით, ან წარმატებული ეკონომიკით. იესო მოულოდნელად შევა მის ქმნილებაში, როგორც დაბრუნებული მეფე, რათა გამოასწოროს ის.

ყველა ადამიანი ცოდვილია, მაგრამ თუ ისინი ახლა ნებით შეუერთდებიან ღვთის სამეფოს, მათ შეეძლებათ თავი დააღწიონ მომავალ განაჩენს. ღვთის სამეფო უკვე მოქმედებს მათში, ვინც მოინანიებს და ირწმუნებს (მარკოზის 1:14-15; 9:1). ეს სამეფო სრულად და ღიად მოვა იესოს დაბრუნებისთანავე.

► როგორ უნდა ვიცხოვროთ, რადგან ვიცით, რომ იესო დაბრუნდება?

უნდა გვახსოვდეს პირველი ქრისტიანების პრიორიტეტები. ჩვენ მოწოდებულნი ვართ შევინარჩუნოთ ჩვენი რწმენა და "მოვითმინოთ ბოლომდე." ჩვენ გაფრთხილებულნი ვართ, რომ სიამოვნებებმა და ქვეყნიურმა რაღაცეებმა არ უნდა დაგვავიწყოს მომავალი (ლუკას 21:34-36). ჩვენ მარადიული ღირებულებების შესაბამისად ვცხოვრობთ, რადგან ამ სამყაროს ყველაფერი გაქრება. ჩვენ გვევალება, რომ „ფხიზლად ვიყოთ“ და არ ვიყუროთ ცაში მისი გამოჩენის მოლოდინში, არამედ სულიერად ვიყოთ ფხიზლად, რომ მისი მოსვლის დროს მოუმზადებლები არ აღმოვჩნდეთ (მარკოზის 13:33-37). ჩვენ ვლოცულობთ სიწმინდისთვის და სუფთა ცხოვრებით ვცხოვრობთ, რადგან გვსურს მას დავემსგავსოთ (1 იოანეს 3:3).

ვინც ცხოვრობს დღეს ისე, თითქოს ის არ დაბრუნდება, მზად არ იქნება მისი დაბრუნებისთვის. 1 თესალონიკელთა 5:1-6 აჩვენებს, რომ ისინი, ვინც სიბნელეში იმყოფებიან და ცხოვრობენ ქვეყნიერებისთვის, შეძრწუნდებიან უფლის დაბრუნებით. ჩვენთვის ის აღარ დაბრუნდება „როგორც ქურდი.” იესოს მოსვლა ელვასავით იქნება, (მათეს 24:27; 1 კორინთელთა 15:52). ისე მოულოდნელად, რომ მისი გამოჩენის შემდეგ ვერავინ შეძლებს რაიმეს შეცვლას.

ჩვენ ველოდებით მის მოსვლას

1. მარადიული პრიორიტეტების დაცვით,

2. სიწმინდეში ცხოვრებით

3. საკუთარი თავის სულიერი დაცვით ლოცვების მეშვეობით.

[1]ჩვენ ვიცით, რომ სხეულს მარადიული ღირებულება აქვს, რადგან ბიბლია ასწავლის ყველა ადამიანის მკვდრეთით აღდგენას. მოძღვრება აღდგომის შესახებ აუცილებელია. ამაზე მეტყველებს ის ფაქტი, რომ პავლემ დაწერა 58 მუხლი (1 კორინთელთა 15), რომელიც იცავდა აღდგომის მოძღვრებას. პავლე მოციქულმა განმარტა, რომ მკვდრეთით აღდგომის უარყოფა სახარების უარყოფას ნიშნავს. თუ მკვდრეთით აღდგომა არ არსებობს, მაშინ იესო ვერ აღდგებოდა (1 კორინთელთა 15:3). თუ იესო მკვდრეთით არ აღდგა, სახარება ვერ იქნება ჭეშმარიტი და არავინ გადარჩენილა (1 კორინთელთა 15:17).

ყოველი ადამიანი აღდგება, მაგრამ ერთდროულად არა. იესო დაბრუნების შემდეგ ყველა ცოცხლად დარჩენილ ქრისტიანს თან წაიყვანს და მკვდრეთით აღადგენს მკვდრებს (1 თესალონიკელთა 4:16-17; გამოცხადების 20:6).

ისინი, ვინც თავიანთ ცოდვებში დაიღუპნენ, არ მიიღებიან პირველ აღდგომაში. ისინი მოგვიანებით აღდგებიან განსჯისთვის (გამოცხადების 20:13).

ქრისტიანები იესოსავით განდიდებულ სხეულებში აღდგებიან (1 იოანეს 3:2). ცოდვილები მარადიული სასჯელისთვის სხვა ფორმით აღდგებიან (იოანეს 5:28-29).

► თუ არ ირწმუნეთ, რომ სხეული აღდგება, რა სარგებელია თქვენთვის?

იმის რწმენა, რომ ოდესმე აღვდგებით, გავლენას ახდენს ჩვენი ცხოვრების წესზე. ამ სწავლების პრაქტიკული ეფექტის დანახვა შეგვიძლია იმ ადამიანების მაგალითებზე, რომლებიც უარყოფენ მას. კორინთელთა კრებიდან (კონგრეგაციიდან) ზოგიერთმა ადამიანმა უარყო, რომ ადამიანის სხეული აღდგება. ისინი, ვისაც სჯეროდა ამ შეცდომის, გაიყვნენ ორ პოზიციად. ზოგიერთმა თქვა: „რადგან სხეული არ აღდგება, სულია მხოლოდ მნიშვნელოვანი. ეს გულისხმობს, რომ ცოდვები, რომლებსაც სხეული სჩადის, არ არის სერიოზული. ჩვენ შეგვიძლია ვიმრუშოთ კიდეც, რადგან სხეული მაინც განადგურდება.” იხილეთ 1 კორინთელთა 6:13-14.

სხვებმა თქვეს: „რადგან სხეული არ აღდგება, ის უნდა იყოს უსარგებლო და ბოროტი. ჩვენ უნდა დავთრგუნოთ სხეულის ყველა სურვილი, არ უნდა ვჭამოთ არაფერი სასიამოვნო და გემრიელი და არ უნდა ვიქორწინოთ.”

ორივე ეს შეცდომა გამოიწვია მკვდრეთით აღდგომის უარყოფამ. აღდგომის შესახებ ქრისტიანული სწავლება ფასეულად მიიჩნევს სხეულს. ღირებულება ნაჩვენებია იმით, რომ ქრისტიანთა სხეულები გამოსყიდულია, ისინი არიან სულიწმიდის ტაძრები, არიან ქრისტეს ნაწილები და აღდგებიან და განდიდდებიან. (წაიკითხეთ 1 კორინთელთა 6:14, 15, 19, 20).

მკვდრეთით აღდგომის სწავლება აუცილებელია, რადგან ეს ნიშნავს, რომ

• იესო მკვდრეთით აღდგა,

• ყველა ადამიანი აღდგება,

• სხეულს აქვს მარადიული ღირებულება და

• სახარება მართალია

სამსჯავრო ნამდვილად დასასრულია მათთვის, ვისი სახელებიც არ არის ჩაწერილი სიცოცხლის წიგნში. ეს მათი არსებობის დასასრული არ არის, მაგრამ ეს მათი არჩევანის გაკეთების დასასრულია. მთელი შემდგომი მარადისობა იქნება უსასრულო შედეგები იმ გადაწყვეტილების, რომელთა შეცვლაც შეუძლებელია.

სამსჯავრო ჰმატებს ჩვენს არჩევანს მნიშვნელობას, რომელიც სცილდება მის უშუალო შედეგებს. ზოგი ფიქრობს, რომ სანამ შეძლებენ გააკონტროლონ თავიანთი მოქმედებების შედეგები, საშიში არაფერია. მათ სურთ დაიჯერონ, რომ მათი ცოდვა არ არის ბოროტი, თუ მას ზიანი არ მოაქვს. სინამდვილეში, ყველა ცოდვას მოაქვს ზიანი, მაგრამ ამ ცხოვრებაშიც რომ არ მოიტანოს ზიანი, ცოდვა მაინც საყურადღებოა სამსჯავროს გამო. ღვთის სიტყვაში ნათქვამია, რომ ადამიანები წარდგებიან ქრისტეს სამსჯავროზე და პასუხი აგებენ თავიანთი საქციელის გამო. (წაიკითხეთ 2 კორინთელთა 5:10; რომაელთა 2:6-11).

სამსჯავროზე ზოგი მარადიულად დასასჯელად გაიგზავნება, სხვები კი მარადიულ ჯილდოს მიიღებენ. წერილებში აღწერილია განკითხვის ერთი სცენა ცოდვილთათვის, რომლებიც მკვდრეთით აღმდგარნი არიან თავიანთი ცოდვილი საქმეების გამო, განაჩენის მისაღებად (იხილეთ გამოცხადების 20:11-15) ქრისტიანებისთვის კიდევ ერთი სამსჯავრო არსებობს, სადაც ისინი დაჯილდოვდებიან იმ შრომისთვის, რომელმაც ღირებული და ხანგრძლივი შედეგი გამოიღო. (წაიკითხეთ 1 კორინთელთა 3:14-15).

სამსჯავრო ნიშნავს, რომ ოდესმე ცოდვა დასრულდება. ძნელი წარმოსადგენია სამყარო ცოდვის გარეშე, მაგრამ ოდესმე ღმერთის წინააღმდეგ ყოველგვარი აჯანყება დასრულდება.

ღმერთი არ აპირებს, რომ ჩვენ მუდმივ შიშში ვიცხოვროთ და ეს შიში იყოს ჩვენი სწორად ცხოვრების მოტივი. ამასთან, მომავალი სამსჯავროს გააზრება გვაძლევს პასუხისმგებლობის გრძნობას, რომელიც წარმართავს ჩვენს ცხოვრებას.

ჩვენ უნდა ვიცოდეთ სამსჯავროს შესახებ, რომ გავიგოთ (1) ცოდვის მნიშვნელობა, (2) ჩვენი პასუხისმგებლობა ღმერთის წინაშე, (3) ჩვენი არჩევანის მნიშვნელობა და (4) ყველა ცოდვის დასასრული.

ზოგიერთი ფილოსოფიისა და რელიგიის თანახმად, დრო სამუდამოდ გრძელდება ციკლებში, დასაწყისისა და დასასრული გარეშე და არ არსებობს მოვლენები, რომლებიც სამუდამოდ შეცვლის რამეს. მაგრამ ბიბლიის თანახმად, დროს აქვს დასაწყისი და მოვლენათა წყება რომელიც დასასრულისკენ მიდის. ბიბლია აღწერს სამყაროს შექმნას, შემდეგ ადამიანის ტრაგიკულ დაცემას, შემდეგ კი ხსნის გეგმას, რომელსაც ღმერთი ანვითარებდა კაცობრიობის ისტორიის განმავლობაში.

დაბადების წიგნში ცოდვის დასაწყისს ვხვდებით. გამოცხადებაში ცოდვა გამორიცხულია ღვთის მარადიულ ქალაქში (გამოცხადების 21:27). დაბადებაში ჩვენ ვხედავთ სიცოცხლის ხის დაკარგვას და სიკვდილით დასჯის განაჩენს. გამოცხადებაში ჩვენ ვხედავთ სიცოცხლის ხის აღდგენას, სიცოცხლის წიგნში ჩაწერილ სახელებს და სიცოცხლის წყლის მდინარესთან მიწვევას (გამოცხადების 22:1, 2, 19).

ღმერთის სრულყოფილი და მარადიული სამეფოს დამყარება დაასრულებს ღვთის გეგმას. ღმერთი ყოველთვის იყო მისი სამყაროს მეფე, მაგრამ ადამის დაცემის შემდეგ კაცობრიობის უმეტესობა აჯანყდა ღმერთის სამეფოს წინააღმდეგ. ეს მალე დასრულდება და ღმერთი მარადიულად იმეფებს მოცილეს გარეშე. სამყარო სრულყოფილი იქნება, როგორც ღმერთს სურს, ისეთივე როგორც ზეცაა.

არსებობს ადამიანური ტენდენცია იცხოვროს ისე, თითქოს ამქვეყნიური ცხოვრება სამუდამოდ გაგრძელდება. ჩვენ ვცდილობთ გავაუმჯობესოთ ჩვენი პირობები, მოვაგვაროთ ჩვენი პრობლემები და შევქმნათ ისეთი გარემო, რომელიც გვახარებს. ჩვენ უნდა დავემსგავსოთ აბრაამს, რომელიც მარადიულ სახლს ელოდა, როდესაც ის კარვებში ცხოვრობდა და ხშირად გადადიოდა ერთი ადგილიდან მეორეში (ებრაელთა 11: 8-10, 14-16). უნდა გვახსოვდეს, რომ ის, რასაც ვაშენებთ, რასაც ვფლობთ და ის პირობები, რასაც ჩვენ ვქმნით, ყველაფერი დროებითია. ჩვენ უნდა ვიმუშაოთ იმისთვის, რასაც მარადიული ღირებულება აქვს.

► კლასმა ორჯერ მაინც უნდა წაიკითხოს „მრწამსის აღიარება.”

იესო დაბრუნდება, დაპირებისამებრ, გააცოცხლებს წარსულის მორწმუნეებს და წაიყვანს ყველა მორწმუნეს თავის სამეფოში. ყველა ადამიანი მკვდრეთით აღდგება, რათა წარსდგეს სამსჯავროზე. მას ან მარადიული ჯილდო მიენიჭება, ან სამუდამო სასჯელს მიუსჯიან. ღმერთის სამეფო სრულყოფილად მოვა და ღმერთი მარადიულად იმეფებს.

(1) წმიდა წერილის შესასწავლი ადგილების დავალება: თითოეულ სტუდენტს უნდა დაევალოს ქვემოთ ჩამოთვლილთაგან ერთ–ერთი ადგილი. შემდეგი გაკვეთილის წინ მან კლასში უნდა წაიკითხოს ეს ადგილი და დაწეროს აბზაცი იმის შესახებ, თუ რას ამბობს ის, ამ გაკვეთილში მთავარი განხილვის საგანთან დაკავშირებით

• მათეს 25:31-46
• 2 პეტრეს 3:1-14
• 1 კორინთელების 15:51-58
• გამოცხადების 20:11-15
• დანიელის 2:31-45

(2) ტესტი: შემდეგ მეცადინეობას დაიწყებთ მე-10 გაკვეთილის ტესტით. მოსამზადებლად კარგად შეისწავლეთ ტესტის საკითხები.

(3) სწავლების დავალება: არ დაგავიწყდეთ, რომ დაგეგმოთ და აცნობოთ თქვენი კლასის გარეთ ჩატარებული გაკვეთილების დრო.

(1) რა არის ოთხი აუცილებელი ჭეშმარიტება ბიბლიურ წინასწარმეტყველებებში?

(2) რა დაემართება ქრისტიანებს, როდესაც იესო დაბრუნდება?

(3) როგორ უნდა დაველოდოთ იესოს მოსვლას?

(4) რატომ არის აღდგომაზე სწავლება აუცილებელი?

(5) რატომ არის ჩვენთვის მნიშვნელოვანი ვიცოდეთ სამსჯავროს შესახებ?