(1) სტუდენტი შეძლებს განმარტოს:

• ზეცის პირველხარისხოვანი მოქმედება.

• ზეცის მახასიათებლები, რომლებიც წმინდა წერილებშია გამოვლენილი.

• მარადიული სასჯელის მახასიათებლები, რომლებიც წმინდა წერილებშია გამოვლენილი.

• რელიგიების რამდენიმე მაგალითი, რომლებიც უარყოფენ მარადიული სასჯელის ფაქტს.

• მარადიული სასჯელის სამართლიანობა.

• ქრისტიანული მრწამსის აღიარება მარადიული ხვედრის შესახებ.

(2) სტუდენტი დაიმახსოვრებს, რომ ზოგიერთ მოქმედებას აქვს მარადიული შედეგები, რომელიც არასოდეს შეიცვლება.

► წაიკითხეთ გამოცხადება 21 თავი ერთად. რას გვეუბნება ეს მუხლები მორწმუნეთა მომავლის შესახებ?

მთელი ქმნილება არსებობს ღვთის სადიდებლად, მაგრამ ზეცა სამყაროს ცენტრალური სცენაა, სადაც ღმერთს უმაღლეს დონეზე სცემენ თაყვანს მის მიერ შექმნილი ქმნილებები. (წაიკითხეთ გამოცხადების 5:11-14). ღვთის დიდება ზეცაში ისეთი სისრულით გამოვლინდება, რომ ეს იქნება ქალაქის ლამპარი (გამოცხადების 21:23). ეს ის ადგილია, სადაც ღმერთს ისე შევიცნობთ, რომ „მის სახეს ვიხილავთ” (გამოცხადების 22:4).

თაყვანისცემა ზეცის საქმიანობაა. სიხარული თაყვანისცემის მეორე მხარეა. მეფსალმუნემ თქვა: „სიხარულის სისავსეა შენი სახის წინაშე, შენს მარჯვნივ ყოფნა ნეტარებაა უკუნისამდე” (ფსალმუნის 15:11). შესაბამისია, რომ სიხარული და თაყვანისცემა ერთმანეთთან არის დაკავშირებული. ღმერთმა შეგვქმნა საკუთარი ხატებით, რომ ისე შეგვეძლოს მისი ბუნების გაგება, რომ თაყვანი ვცეთ და ვემსახუროთ მას, იმის გამო როგორიც ის არის. ჩვენი ემოციები, სიყვარულის უნარი და ინტელექტი მოცემულია იმისთვის, რომ უმაღლესი ხარისხით შევძლოთ ღმერთის თაყვანისცემა.

ეს სიტყვები იესომ თავის მოწაფეებს განუცხადა:

„ნუ შეკრთება თქვენი გული. იწამეთ ღმერთი და მიწამეთ მე. მამაჩემის სახლში ბევრი სავანეა; ასე რომ არ ყოფილიყო გეტყოდით. როცა წავალ და ადგილს მოგიმზადებთ, ისევ მოვალ და ჩემთან წაგიყვანთ, რათა, სადაც მე ვარ, თქვენც იქ იყოთ” (იოანეს 14:1-3)

იესოს სიტყვები მოგვითხრობს ზეცის შესახებ. ყველაზე მნიშვნელოვანი რაც ვიცით არის ის, რომ ზეცა ღმერთის სახლია. იესომ მას თავისი მამის სახლი უწოდა. კიდევ ერთი მნიშვნელოვანი ფაქტი ისაა, რომ ერთ დროს შეგვეძლება ღმერთთან ერთად ვიცხოვროთ იქ.

ზეცის დაპირებამ უნდა განსაზღვროს ჩვენი ცხოვრების წესი დედამიწაზე. ადამიანი, რომელიც მარადიული ღირებულებებით ცხოვრობს, ყველაზე უკეთესს გააკეთებს დედამიწაზე. ადამიანს, რომელსაც ზეციური ჯილდო ელოდება, აქვს სტიმული, რომ გაუძლოს გაჭირვებას და ისწრაფოს შეასრულოს ღვთის ნება. იესო სიმართლისთვის დევნილს ეუბნება: „იხარეთ და იმხიარულეთ, რადგან დიდია თქვენი საზღაური ცაში” (მათეს 5:12).

ზეცის მახასიათებლები

► რა დეტალები ვიცით ზეცის შესახებ?

[1]ზოგჯერ დედამიწაზე ადამიანები ვერ ყიდულობენ მათთვის სასურველ სახლს ან შესაძლოა ვერ შეძლონ თავიანთი სახლის მოწყობა ისე, როგორც მათ სურთ. მაგრამ ღმერთს აქვს უსაზღვრო ძალა და რესურსები, ამიტომ ვიცით, რომ მისი სახლი არის ზუსტად ისეთი, როგორიც მას სურს რომ იყოს. ამიტომ, ზეცა შესანიშნავად შეესაბამება ღმერთის ბუნებას.

ცოდვა ზეცაში არ იქნება. ყველა არსება ზეცაში, ანგელოზები თუ ადამიანები, თუ სხვა ქმნილებები, სრულიად წმინდა იქნება. (წაიკითხეთ გამოცხადების 21:8, 27).

ზეცა განთავისუფლდება ცოდვის ყველა შედეგისგან, ტკივილის, მწუხარების, კონფლიქტებისა და საფრთხის ჩათვლით. (წაიკითხეთ გამოცხადების 21:4). აღარ იქნება არანაირი წყევლა ქმნილებაზე, მათ შორის ავადმყოფობა, დაბერება და სიკვდილი. (წაიკითხეთ გამოცხადების 22:3).

ზეცის სილამაზე აღუწერელია. ჩვენთვის მოწოდებული დეტალები მოიცავს იასპის კედლებს, მარგალიტის კარიბჭეს, იშვიათი ძვირფასი ქვების საძირკვლებსა და ოქროს ქუჩებს. (წაიკითხეთ გამოცხადების 21:18-21).

ვინ და როდის?

ზეცა გამზადებულია მათთვის, ვინც ცოდვას მოინანიებს და ირწმუნებს იესო ქრისტეს, როგორც მხსნელსა და უფალს (იოანეს 3:16). ბიბლია გვეუბნება, რომ თუ ჩვენ მარადიული ღირებულებებით ვცხოვრობთ, ჩვენ შეგვიძლია დავიუნჯოთ ზეცაში მარადიული და უსაფრთხო საუნჯე. (წაიკითხეთ მათეს 6:20). ზეცა დასახლებულია მილიონობით გამოსყიდული ადამიანითა და ანგელოზებით (გამოცხადების 5:8-11).

როდის ხვდება ადამიანი ზეცაში? იესომ ჯვარზე მომაკვდავ ავაზაკს უთხრა, რომ ისინი ერთად იქნებოდნენ სამოთხეში იმავე დღეს (ლუკას 23:43). პავლემ თქვა, რომ სხეულთან განშორება უფალთან დაბინავებაა (2 კორინთელთა 5:8). ამიტომ, ჩვენ ვიცით, რომ მორწმუნე ზეცაში მიდის სიკვდილის შემდეგ. მორწმუნეები, რომლებიც ჯერ კიდევ ცოცხლები არიან იესოს დაბრუნებისთანავე, ზეცაში მიდიან სიკვდილის გარეშე. (წაიკითხეთ 1 კორინთელთა 15:51-52).

სასჯელები დედამიწაზე ყოველთვის როდისმე მთავრდება, მაშინაც კი, თუ ის დგება დასჯილის სიკვდილის შემდეგ. მაგრამ იესომ აღწერა მარადიული სასჯელი. მან თქვა:

„წადით ჩემგან, წყეულნო, საუკუნო ცეცხლში, რომელიც გამზადებულია ეშმაკისა და მისი ანგელოზებისთვის.… და წავლენ ისინი საუკუნო სატანჯველში, ხოლო მართალნი - საუკუნო სიცოცხლეში” (მათეს 25:41, 46)

იესომ და მოციქულებმა დაადასტურეს, რომ ჯოჯოხეთი, ცეცხლოვანი ტბა და მარადიული სასჯელი არსებობს. სინამდვილეში, იესომ ზეცაზე მეტჯერ ჯოჯოხეთი ახსენა. მან გაგვაფრთხილა, რომ თავიდან ავიცილოთ ეს საშინელი ადგილი. აქ მოყვანილია იესოს და მის მოციქულთა ზოგიერთ მოწმობა.

„თუ მარჯვენა თვალი გაცდუნებს, ამოითხარე და გადააგდე, რადგან უმჯობესია, ერთი ასოთაგანი დაკარგო, ვიდრე მთელი შენი სხეული ჩავარდეს გეენაში. თუ მარჯვენა ხელი გაცდუნებს, მოიკვეთე და გადააგდე, რადგან უმჯობესია, ერთი ასოთაგანი დაკარგო, ვიდრე მთელი შენი სხეული ჩავარდეს გეენაში” (მათეს 5:29-30)

„ასევე იქნება წუთისოფლის აღსასრულის დროს: გამოვლენ ანგელოზები და გამოაცალკევებენ ბოროტებს მართლებისგან. ჩაყრიან მათ ცეცხლის ქურაში: და იქნება იქ ტირილი და კბილთა ღრჭენა” (მათეს 13:49-50)

ფარისევლების მისამართით იესომ თქვა: „იქედნეთა ნაშობო გველებო! გეენის მსჯავრს როგორ გაექცევით?” (მათეს 23:33)

„და ჯოჯოხეთში, ტანჯვა-წამებაში მყოფმა, აღაპყრო თვალები და დაინახა შორიდან აბრაჰამი და ლაზარეც მის წიაღში. შესძახა: მამაო აბრაჰამ, შემიწყალე და მომივლინე ლაზარე, რომ თითის წვერი დაისველოს წყალში და ენა გამიგრილოს, რადგან ვიტანჯები ამ ალში.’” (ლუკას 16:23-24)

პავლე მოციქული წერს, რომ იესო „გამოცხადდება ციდან, თავის ძლიერ ანგელოზებთან ერთად, და ცეცხლის ალით იძიებს შურს მათზე, ვინც არ იცნობს ღმერთს და არ ემორჩილება უფალ იესოს სახარებას, რომლებიც მარადიულ დაღუპვას მიიღებენ სასჯელად უფლის პირისა და მისი სიძლიერის დიდებისგან” (2 თესალონიკელთა 1:7-9)

„რადგან ღმერთმა ის ანგელოზებიც არ დაინდო, რომელთაც შესცოდეს, არამედ წყვდიადის ბორკილებს გადასცა და ტარტაროზში ჩაყარა სამსჯავროსთვის შესანახად” (2 პეტრეს 2:4)

“ხოლო ეშმაკი, მათი მაცდუნებელი, ჩაგდებულ იქნა ცეცხლისა და გოგირდის ტბაში, სადაც მხეცი და ცრუწინასწარმეტყველი იმყოფებიან, და იტანჯებიან დღე და ღამე უკუნითი უკუნისამდე… ვინც არ აღმოჩნდა სიცოცხლის წიგნში ჩაწერილი, ცეცხლის ტბაში იქნა ჩაგდებული” (გამოცხადების 20:10, 15)

ყურადღება მიაქციეთ, როგორი სიტყვებია გამოყენებული ამ ადგილის აღსაწერად: ცეცხლი, ტანჯვა, შურისგება, განადგურება, სიბნელე, ბორკილები, განსჯა, ტირილი, მოთქმა და კბილთა ღრჭენა.

იესომ თქვა, რომ უმჯობესი იქნება ამოითხარო შენი მარჯვენა თვალი და მოიჭრა შენი მარჯვენა ხელი, ვიდრე ჯოჯოხეთში ჩაგაგდონ ორივე თვალით და ორივე ხელით. იესო არ ახალისებდა სხეულის დასახიჩრებას, მაგრამ აჩერებდა ნებისმიერ საქმიანობას, რამაც შეიძლება ცოდვაში და ჯოჯოხეთში მიგვიყვანოს, რაც არ უნდა ღირებული ჩანდეს იგი დედამიწაზე.

► რომელი რელიგიები ცდება ჯოჯოხეთის შესახებ თავიანთ მოძღვრებაში?

ბიბლია გვეუბნება, რომ სიკვდილი ამთავრებს ადამიანის გამოსაცდელ ვადას და რომ ჯოჯოხეთი არის (1) მარადიული, (2) შეუქცევადი და (3) მტანჯველი. ამ ბიბლიურ ჭეშმარიტებას უარყოფენ ათეისტები, რომლებიც ამბობენ, რომ სიკვდილის შემდეგ აღარაფერია და იეჰოვას მოწმეები, მორმონები და უნივერსალისტები, რომლებიც ამბობენ, რომ ჯოჯოხეთი არ არსებობს. ის, რომ სიკვდილი ამთავრებს ადამიანის გამოსაცდელ ვადას, უარყოფენ რომის კათოლიკეები, რომლებიც თვლიან, რომ ადამიანის მდგომარეობა შეიძლება გამოსწორდეს სიკვდილის შემდეგ.

არიან ისეთებიც, რომლებიც უარყოფენ ჯოჯოხეთის არსებობას, რადგან ისინი მას უსამართლოდ თვლიან. ისინი ამბობენ, რომ თუ ცოდვა დროით შემოფარგლულ სამყაროში ხდება, არ იქნება სამართლიანი, რომ სასჯელი მარადიული იყოს. წმიდა ავგუსტინე პასუხობდა ამ წინააღმდეგობას სისხლის სამართლის მაგალითზე. თუ ძარცვა რამდენიმე წუთში მოხდა, მხოლოდ რამდენიმე წუთიანი სასჯელი უნდა დაეკისროს? მკვლელობა, რომელსაც მხოლოდ ერთი წუთი სჭირდება, გამოუსწორებელ ზიანს იწვევს. წმინდა წერილში ვხედავთ, რომ საუკუნო და უსასრულო ღმერთის წინააღმდეგ ცოდვა იწვევს სამუდამო სასჯელს, მიუხედავად იმისა, რომ იგი ჩადენილია დროში ცხოვრებისას.

► რატომ არის ჯოჯოხეთი მარადიული?

ჯოჯოხეთი მარადიულია, რადგან

1. ცოდვა დანაშაულია უსასრულო ღმერთის წინააღმდეგ.

2. ცოდვილი უარყოფს ღმერთისადმი მარადიულ მსახურებას.

3. ჩვენ ვართ მარადიული არსებები, რომლებსაც წასასვლელი არსად გვაქვს, თუკი ღმერთთან განშორებას ვირჩევთ.

დედამიწაზე ჩვენ მოგვწონს, რომ გვაქვს შესაძლებლობა ჩვენი გადაწყვეტილებები შევცვალოთ. ძალიან მკაცრი ჩანს, რომ არჩევანს შეიძლება ჰქონდეს მარადიული შედეგები. გვსურს ვიფიქროთ, რომ მომავალში გვექნება მეორე შანსი, თუნდაც ახლა გავაკეთოთ გააზრებული, წინასწარ განზრახული არჩევანი. მაგრამ სავსებით გონივრულია, რომ ღმერთმა განსაზღვრა ჩვენი გამოსაცდელი ვადა მთელი ცხოვრებით.

[1]ზოგი უარს ამბობს დაიჯეროს ჯოჯოხეთის არსებობა, რადგან ეჭვი შეაქვს იმაში, თუ როგორ შეიძლება მოსიყვარულე ღმერთმა ვინმე გაუშვას ისეთ საშინელ ადგილზე, როგორსაც ეს მუხლები აღწერს. უნდა გვახსოვდეს, რომ ღმერთს სურს, რომ არავინ დაიღუპოს, არამედ ყველამ მოინანიოს და მიიღოს ხსნა. ამას ბიბლია რამდენიმე ადგილას ამბობს. (წაიკითხეთ 1 ტიმოთეს 2:4; 2 პეტრეს 2:9; საქმეების 17:30). მათ, ვინც ჯოჯოხეთში მიდის, გააკეთეს საკუთარი არჩევანი, რომელიც მათ ამ საშინელ ადგილას ახვედრებს. შემთხვევით არავინ ხვდება ჯოჯოხეთში. ის, ვინც იქ ხვდება, თვითონ აირჩია ადგილი ღმერთის, სიმართლისა და ხსნის უარყოფით.

რადგან ყველა სიკეთე ღმერთისგან მოდის, ღმერთზე უარის თქმა, საბოლოო ჯამში, ნიშნავს ყველა სიკეთეზე უარის თქმას. სიმშვიდე, შიშისგან და ტკივილისგან დაცვა და კომფორტული ადგილი სიკეთეა, რაც მხოლოდ ღმერთს შეუძლია მოგვცეს. ღმერთთან სრული განშორება ნიშნავს ყველაფრის ნაკლებობას, რაც კარგია, რაც სიკეთეა და ეს არის ჯოჯოხეთი.

მადლობა ღმერთს, რომ იესო ქრისტეს გამომსყიდველი მსხვერპლით, მისმა სიყვარულმა შესაძლებლობა მოგვცა, რომ „თავიდან ავიცილოთ რისხვა.” ჯოჯოხეთის აგონიის ნაცვლად, ჩვენ შეგვიძლია გავიზიაროთ ხსნის სიხარული და ზეცის საოცრება. ჩვენ ჩვენი ბედისთვის ვირჩევთ ზეცას, როდესაც ვირჩევთ "ღვთის წინაშე მონანიებას და ჩვენი უფლის იესო ქრისტეს რწმენას” (საქმეების 20:21).

მიწიერ ცხოვრებაში ბევრი გადაწყვეტილება არ გამოიყურება საბოლოოდ. დროთა განმავლობაში მრავალი შეცდომის გამოსწორება შეიძლება. უნდა გვახსოვდეს, რომ ბევრ გადაწყვეტილებას აქვს მარადიული შედეგები. სიკვდილის შემდეგ ჩვენ ვერ შევცვლით იმ მოქმედებებს, რომლებიც გავლენას ახდენდა ჩვენს მარადიულ ბედზე ან მოქმედებებს, რომლებმაც გავლენა მოახდინეს სხვებზე მათ გადაწყვეტილებებში.

► კლასმა ორჯერ მაინც უნდა წაიკითხოს „მრწამსის აღიარება.”

ყველა ადამიანი მარადიულად იარსებებს ან სამოთხეში ან ჯოჯოხეთში. ზეცა ღმერთის სახლია, სადაც მორწმუნეები იცხოვრებენ ღმერთთან და სიხარულით ეთაყვანებიან მას. ზეცაში არ არის ცოდვა და არც რაიმე ტანჯვა, რომელიც მისი შედეგია. ჯოჯოხეთი მარადიული, შეუქცევადი და მტანჯველი სასჯელის ადგილია ყველასათვის, ვინც არ იქნა დახსნილი ცოდვებისგან ქრისტესმიერი მსხვერპლით. ჯოჯოხეთი არის სამართლიანი სასჯელი უსასრულო ღმერთის მიმართ განზრახ ცოდვისთვის.

(1) წმიდა წერილის შესასწავლი ადგილების დავალება: თითოეულ სტუდენტს უნდა დაევალოს ქვემოთ ჩამოთვლილთაგან ერთ–ერთი ადგილი. შემდეგი გაკვეთილის წინ მან კლასში უნდა წაიკითხოს ეს ადგილი და დაწეროს აბზაცი იმის შესახებ, თუ რას ამბობს ის, ამ გაკვეთილში მთავარი განხილვის საგანთან დაკავშირებით.

• გამოცხადების 22:1-5
• გამოცხადების 22:10-17
• ლუკა16:19-31
• ესაია 5:11-16
• მათე 5:27-30

(2) ტესტი: შემდეგ მეცადინეობას დაიწყებთ მე-13 გაკვეთილის ტესტით. მოსამზადებლად კარგად შეისწავლეთ ტესტის საკითხები.

(3) სწავლების დავალება: არ დაგავიწყდეთ, რომ დაგეგმოთ და აცნობოთ თქვენი კლასის გარეთ ჩატარებული გაკვეთილების დრო.

(1) რა არის ზეცის პირველხარისხოვანი აქტივობა?

(2) რა არის ის რამდენიმე რამ, რაც ზეცაში არ იქნება?

(3) ვინ მოხვდება ზეცაში?

(4) როდის ხვდებიან მორწმუნეები სამოთხეში?

(5) რა სამ რამეს გვეუბნება ბიბლია ჯოჯოხეთის შესახებ?

(6) რას გულისხმობდა იესო, როდესაც თქვა, რომ ადამიანმა ხელი უნდა მოიკვეთოს?

(7) რატომ არის ჯოჯოხეთი მარადიული?