Lesson 10: Ազնվություն

Այս դասի ավարտին ուսանողը պետք է միշտ և բոլոր իրավիճակներում ամբողջությամբ ազնիվ լինելու որոշմանը հանգի։

Աբրահամն աշխատում էր խանութում։ Մի օր նա նկատում է, որ հաճախորդին ճիշտ մանրը չի վերադարձրել, իսկ այդ կինն արդեն հեռացել էր խանութից։ Նա ապրում էր մի քանի մղոն հեռավորությամբ գյուղական մի վայրում, և Աբրահամը գիտեր, որ մոտ ժամանակներում այդ կնեջը հաստատ չէր տեսնելու: Թեև գումարը փոքր էր, նրան մտահոգվում էր այն, որ դա, միգուցե, անհրաժեշտ էր այդ կնոջը։ Նա նաև ցանկանում էր համոզվել, որ այդ կնոջ մոտ չի թողնի այնպիսի տպավորություն՝ իբր ինքը միտումնավոր է պահել նրա գումարը: Երբ օրվա վերջում խանութը փակվեց, Աբրահամը մի քանի մղոն քայլեց՝ գումարը վերադարձնելու համար։ Այդ իրավիճակում և այլ ժամանակներում իր ուշադիր լինելու պատճառով ընկերները նրան կոչում էին՝ «ազնիվ Աբի»։ Հետագայում նա դարձավ իրավաբան, ապա ներգրավվեց պետական կառավարման ոլորտում: Նրա ազնվությունը հարգանքի արժանացավ, և ի վերջո՝ նա զբաղեցրեց Միացյալ Նահանգների նախագահի պաշտոնը:

Աստվածաշունչն ասում է մեզ, որ Աստված չի կարող ստել (Տիտոսի 1.2, Եբրայեցիների 6.18): Նրա էությունը միշտ հետևողական է և անփոփոխ (Հակոբոսի 1.17): Աստված ճշմարտությունը չի ասում միայն այն ժամանակ, երբ այն առավելություն է տալիս։ Նա չի ստում լավ արդյունքների հասնելու համար։ Մենք կարող ենք վստահ լինել, որ Աստծո Խոսքը բացարձակապես ճշմարիտ է ու վստահելի: Նրա ճշմարտությունը մեզ ապահովություն է տալիս (Սաղմոսներ 40.11, Սաղմոսներ 91.4)։

► Եթե չվստահեինք, որ Աստված միշտ ճշմարտությունն է ասում, ինչպե՞ս կազդեր դա Աստծո հետ ձեր հարաբերությունների վրա։

Մտածե՛ք, թե որքանով է ճշմարտությունը կարևոր Աստծո հետ մեր հարաբերությունների ճիշտ կառուցման համար: Աստված կոչ է անում մեզ ամբողջությամբ նվիրվել Իրեն: Մենք չէինք կարող դա անել, եթե լիովին չվստահեինք Նրան։

Աստված ցանկանում է, որ մենք միշտ խոսենք ճշմարտությունը: Սուտ խոսող մարդը Աստծո աչքին արդար չէ (Առակների 12.12)։

Երբեմն մարդիկ ստեր են օգտագործում դատական գործերը շահելու համար: Փող ունեցող մարդիկ կարող են վճարել դատավորին՝ ստերն ընդունելու համար, որպեսզի ուրիշներից գույք խլեն (Հակոբոսի 2.6): Հարուստ մարդիկ խուսափում են արդարադատությունից և դատապարտում անմեղ մարդկանց՝ կաշառք տալով ստի հաստատման համար (Հակոբոս 5.1, 6):

Կեղծ վկայություն տալը մեղք է, նույնիսկ եթե կարծում եք, թե ձեր փաստարկումը ճիշտ է: Աստվածաշունչը դատապարտում է կեղծ վկաներին և թույլ չի տալիս բացառություններ (Ելից 20.16, Առակների 6.16-19, 14.25, 19.5, 9)։ Շատերը կարծում են, թե կարող են ստել, եթե սուտը օգուտ կբերի ու վնաս չի պատճառի, բայց Աստվածաշունչը նման տարբերակ չի տալիս: Սուրբ Գրքում մեզ երբեք չի ասվում, որ լինում են դեպքեր, երբ պետք է ստենք:

Քրիստոնյաներն առանց բացառության պետք է ասեն ճշմարտությունը: Ճշմարտությունը հիմնարար նշանակություն ունի մեր հարաբերությունների համար (Եփեսացիներին 4.25):

Եփեսացիների 4.15-ում ասվում է, որ ճշմարտությունը խոսելն անհրաժեշտ է հոգևոր հասունության հասնելու համար։

Կողոսացիների 3.9-ն ասում է, որ սուտը մեղավոր կյանքի մի մասն է, որը մի կողմ ենք դրել։

Աստված կդատի և կդատապարտի ստախոսներին: Ստախոսններն ընդգրկված են Աստծո օրենքով դատապարտված սարսափելի մեղավորների ցանկում (Ա Տիմոթեոսի 1.10, Հայտնության 22.15)։ Բոլոր ստախոսները կնետվեն կրակի լիճը (Հայտնության 21.8): Ստախոսները չեն մտնի Աստծո քաղաքը (Հայտնության 21.27):

► Ուսանողը խմբի համար կարդում է Առակների 11.1 խոսքը։

Այս խոսքը կշեռքի մասին է, որն օգտագործվում է քաշով ինչ-որ բան վաճառելու համար, օրինակ՝ միրգ, բանջարեղեն կամ միս: Երբեմն մարդիկ ունենում են կշեռքներ, որոնք նախատեսված են կեղծ կշիռ ցույց տալու՝ լրացուցիչ գումար վերցնելու նպատակով։ Այս խոսքն ասում է, որ Աստված ատում է անազնվությունը:

Սխալ է, որ մարդն ինչ-որ բան է վաճառում` ստելով դրա օգտագործելիության վիճակի մասին կամ թաքցնելով թերությունները: Սխալ է ստել, երբ ինչ-որ մեկին ասում եք, թե որքան եք վճարել ինչ-որ բանի համար, որպեսզի այն վաճառեք ավելի թանկ գնով:

Ճիշտ չէ, որ մարդն իր անունով ստորագրի մի բանի տակ, որը սխալ է, որպեսզի խուսափի գումար վճարելուց։ Ճիշտ չէ, երբ մարդիկ օգնում են իրենք գործատուներին խաբել մարդկանց` շահույթի համար։

► Անազնվության ի՞նչ տարբեր ձևեր եք նկատել:

Աստվածաշունչն ասում է, որ չար մարդիկ պարտք են վերցնում և չեն վերադարձնում (Սաղմոսներ 37.21, Առակների 3.28)։ Ոմանք պարտք են վերցնում, այնուհետև իրենց պարտքը վճարելու պարտավորություն չեն զգում: Աստվածաշունչն ասում է, որ մենք պետք է համոզվենք, որ չենք թերանում ուրիշներին տալ այն, ինչ նրանց պարտք ենք (Հռոմեացիների 13.7-8):

Ազնվություն նշանակում է՝ դուք կատարում եք ձեր խոստումները և պարտավորությունները: Սաղմոսներ 15-ը նկարագրում է այն մարդուն, ով լավ հարաբերությունների մեջ է Աստծո հետ։ Հատկանիշներից մեկն այն է, որ նա խոստում է տալիս և պահում այն, նույնիսկ եթե դա թանկ է նստում իր վրա (Սաղմոսներ 15.4)։

Անազնվություն է, երբ մարդն իրեն վարձած անձի համար այնպես չի աշխատում, ինչպես պետք է (Եփեսացիների 6.5-6):

Սխալ է, որ աշխատողն իր գործատուից իրեր գողանա (Տիտոսի 2.9-10):

Սխալ է կեղծ անդորրագրեր տալը, իբր ինչ-որ բան ավելին է արժեցել, քան իրական գինն է։ Սխալ է, երբ աշխատողը կամ գործակալը ստում է ինչ-որ բանի գնի մասին, որպեսզի կարողանա գումարի մի մասն իրեն պահել։

Սխալ է, որ գործատուն աշխատողին չի վճարում խոստացված աշխատավարձը (Հակոբոսի 5.4):

Սխալ է պահել մի բան, որը մեկ ուրիշը պատահաբար սխալ տեղ է դրել: Դուք պետք է այն վերադարձնեք տիրոջը, եթե կարող եք (Բ Օրինաց 22.1):

Եթե կառավարում եք ուրիշի ռեսուրսները (օրինակ՝ գործատուի կամ ծառայության), ապա սխալ է ձեզ համար գումար կամ իրեր օգտագործելը, եթե ձեզ թույլտվություն չի տրվել:

Որոշ համայնքներում մարդիկ ապրում են առաջնորդի հոգածության ներքո։ Ժողովուրդը հավատարիմ է առաջնորդին, իսկ նրանից ակնկալվում է, որ օգնի մարդկանց ամեն կարիքի դեպքում։ Նման համայնքներում մարդկանց գերակշիռ մասն անձնական մեծ ունեցվածք չունի։ Ամենակարևոր ռեսուրսները, օրինակ՝ հողերը, պատկանում են համայնքին։ Ենթադրվում է, որ առաջնորդները պետք է կառավարեն ռեսուրսները՝ ի շահ բոլորի։ Երբ մարդը կարիք է ունենում, նա մտածում է, որ իրավունք ունի վերցնելու այն, ինչ պետք է իրեն համայնքի ռեսուրսներից։

Ջերալդը ծնվել է ջունգլիների մի գյուղում։ Նրա և մյուս ընտանիքները գյուղին պատկանող հողատարածքում ցանք են անում պարենի համար։ Նրանք ռեսուրսներ էին գտել ջունգլիներում: Նրանցից ոչ ոք սեփական հողատարածք չուներ, նույնիսկ այնտեղ, որտեղ իրենց տներն էին: Ընտանիքներն օգնում էին միմյանց, երբ խնդիրներ էին ծագում։ Առաջնորդը հոր նման մեկն էր գյուղի համար։ Մարդիկ սպասում էին, որ նա հոգա իրենց կարիքները։

Երբ Ջերալդը դարձավ չափահաս, աշխատանք գտավ մի ընկերությունում, որը փայտանյութի համար գերաններ էր հատում: Նա հեռացավ գյուղից՝ բնակվելու աշխատավայրին մոտիկ։ Նրան ամեն ամիս աշխատավարձ էին տալիս։ Երբեմն նա բավականաչափ սնունդ չէր ունենում, քանի որ սովոր չէր աշխատավարձը պլանավորված ձևով ծախսելուն։ Նա ակնկալում էր, որ տնօրենը սնունդ կտրամադրի իրեն, և զարմացավ, երբ վերջինս ասաց, որ Ջերալդը պարտավոր է իր աշխատավարձով գնել ամեն ինչ: Երբ Ջերալդի քույրը բժշկի կարիք ուներ, Ջերալդը տնօրենից փող խնդրեց նրա համար: Ջերալդը բարկացավ, երբ տնօրենը չօգնեց՝ կարծելով, թե վերջինս պետք է օգներ իրեն խնդիրների դեպքում։ Տնօրենը, սակայն, ասաց, որ Ջերալդին աշխատավարձ տալն է իր միակ պարտականությունը։ Երբ Ջերալդը թողեց աշխատանքը, նա գողացավ գործիքներից մի քանիսը, որպեսզի տաներ գյուղ, քանի որ մտածում էր, որ տնօրենը բավականաչափ չի օգնել իրեն։

Հետագայում Ջերալդը կնոջ և երեխայի հետ տեղափոխվեց քաղաք ու աշխատանք գտավ մի մեծ մթերային խանութում։ Ջերալդը խնդրեց տնօրերին վճարել իր երեխայի դպրոցի վարձը, բայց նա մերժեց: Երբեմն Ջերալդը բավականաչափ գումար չէր ունենում՝ գնելու այն ամենը, ինչ անհրաժեշտ էր իր ընտանիքին։ Քանի որ նա աշխատում էր մի խանութում, որտեղ մթերք էր վաճառվում, նա մտածեց, որ իրեն պետք է թույլ տան խանութից սնունդ տանել իր ընտանիքի համար: Նա գիտեր, որ տնօրենը չի համաձայնի, ուստի գաղտնի վերցնում էր որոշակի սնունդ։

Որոշ աշխատողներ չեն հասկանում իրենց գործատուի ու իրեն պարտավորությունների սահմանները: Նրանք կարծում են, թե գործատուն պատասխանատու է իրենց բոլոր կարիքների համար: Բացի իրենց աշխատանքի դիմաց ստացած վարձատրությունից, նրանք տարբեր տեսակի օգնություն են խնդրում։ Եթե նա չի տալիս նրանց այն, ինչ իրենց պետք է, նրանք իրենց գողությունն արդարացված են համարում, քանի որ մտածում են, թե գործատուն պարտական է իրենց` տրամադրելու անհրաժեշտ օգնությունը։

► Ուսանողը խմբի համար կարդում է Տիտոսի 2.9-14 հատվածը:

Այս խոսքերը մեզ ասում են, որ աշխատողը չպետք է գողանա իր գործատուից: 10-րդ խոսքն ասում է, որ ազնվությունը գեղեցկացնում է Քրիստոսի վարդապետությունը: Հետագա խոսքերը նկարագրում են այն կյանքը, որն ապրում է մարդը, եթե վերափոխվում է շնորհով:

Ազնվությունը միայն փողի և ունեցվածքի պարագայում չէ կարևոր:

Կառլոսը խոստացել էր գործընկերոջը, որ կհանդիպի նրա հետ առավոտյան ժամը 8:00-ին։ Սակայն նա ուշ էր քնել, ուշ վեր կացել ու դանդաղ նախաճաշել, այդ իսկ պատճառով ուշացավ ավելի քան մեկ ժամ։ Նա գործընկերոջն ասաց, որ վարորդն ուշ էր եկել իրեն բերելու։ Գործընկերը չզարմացավ։ Կառլոսի բոլոր ընկերները գիտեն, որ նա երբեք չի կատարում իր հանձնառությունները:

Կառլոսն անազնիվ էր երկու ձևով.

1. Նա չպահեց իր խոստումը։

2. Նա ստեց` ուշանալու համար վերաբերյալ այլ պատճառ բերելով։

Մարդիկ հավատու՞մ են ձեզ, երբ ասում եք, որ գործը կանեք կամ տեղում կլինեք: Դուք ինքներդ հավատու՞մ եք ձեզ, երբ ասում եք դա: Երբ ինչ-որ բան եք խոստանում, դուք նաև խոստանո՞ւմ եք ջանքեր գործադրել այն իրականացնելու համար։ Սխալ է ինչ-որ բան խոստանալ, իսկ հետո այդ խոստումը կատարելու համար ջանք չգործադրել:

Եթե խոստումը չեք կատարել, պետք է ներողություն խնդրեք։ Դուք չպե՛տք է ստեք, թե ինչու եք ձախողվել ձեր պարտականությունը կատարելու մեջ։

Սխալ է ձեր կազմակերպության մեջ սեփական սխալների համար ուրիշներին մեղադրելը: Ձեր թիմը չի վստահի ձեզ, եթե նրանք իմանան, որ ստեր եք հնարելու սխալներն արդարացնելու համար:

Վստահելի ղեկավարը չի ստիպում մարդկանց հետևել իր գաղափարին` նրանց ասելով բաներ, որ ճիշտ չեն: Սթիվեն Քովին գրել է, որ «Առաջնորդության արդյունավետությունն իր ներշնչած վստահության մեջ է»[1]:

Շատերը կարծում են, թե սխալ է ստել ընկերներին կամ հարազատներին, բայց նորմալ է ստել այլ մարդկանց: Ոմանք գումար կամ նյութեր են գողանում իրենց գործատուներից, քանի որ կարծում են, թե արժանի են ավելի բարձր վարձատրության: Ոմանք գողանում են հարուստներից, հատկապես հարուստ օտարերկրացիներից: Որոշ մարդիկ անազնիվ գործարքներ են կատարում այլ ազգային խմբի կամ սոցիալական դասի մարդկանց հետ:

Հիսուսն ասաց, որ պետք է սիրենք մեր դրացուն, ինչպես ինքներս մեզ(Մարկոս 12.31): Հիշո՞ւմ եք այն հարցը, որ օրենսգետը տվեց Հիսուսին: «Իսկ ո՞վ է իմ մերձավորը» (Ղուկաս 10.29): Օրենսգետն ուզում էր, որ Հիսուսը նշի մարդկանց այն կատեգորիան, որին պետք է սիրենք: Հիսուսը պատմեց «Բարի սամարացու» առակը (Ղուկաս 10.30-37)։ Պատմությունը տարբեր ազգությունների երկու մարդկանց մասին է, ովքեր առաջին անգամ են հանդիպում։ Նրանք նախկինում հարաբերություններ չեն ունեցել, և նրանց ազգային խմբերի միջև բախում կա: Սամարացին օգնեց կարիքավորին, թեև նրանց մեջ չկար որևէ հարաբերություն, որ պարտավորեցներ օգնություն ցուցաբերել: Այս պատմության մեջ Հիսուսն ասաց, որ ոչ մի մարդ չպետք մեր սիրո ազդեցության գոտուց դուրս մղվի:

Մենք չպետք է որոշենք, թե ով է արժանի մեր ազնիվ վերաբերմունքին։ Չի կարելի ազնիվ լինել միայն ընտրյալ մարդկանց հետ։ Նույնիսկ եթե կարծում ենք, թե մեր անազնվությունը չի վնասի մարդուն, մենք ցանկանում ենք հաճեցնել Աստծուն՝ ազնիվ լինելով (Գործք Առաքելոց 24.16 Նաև՝, Փիլիպպեցիների 1.10, Բ Կորնթացիների 5.9):

Ինչպիսի՞ անձնավորություն եք ուզում լինել: Ինչպիսի՞ն է Աստված ուզում, որ լինեք:

Ինչ-որ մեկը գուցե արժանի չէ ձեր քաղաքավարի վերբերմունքին, բայց Աստված ցանկանում է, որ քաղաքավարի մարդ լինեք: Ինչ-որ մեկը գուցե արժանի չլինի ձեր ազնվությանը, բայց Աստված ցանկանում է, որ ազնիվ մարդ լինեք: Ինչ-որ մեկը գուցե արժանի չլինի ձեր սիրուն, բայց Աստված սիրեց ձեզ, երբ արժանի չէիք դրան, և Աստված ցանկանում է, որ սիրող անձնավորություն լինեք:

► Ուսանողները խմբի համար կարդում են Ա Պետրոսի 2.21-23 Պետրոսի 3.8-12 հատվածները։

Թույլ մի՛ տվեք, որ ուրիշների բնավորությունն ազդի ձեր բնավորության վրա: Մարդը կարող է ստել ձեզ, բայց դուք չպետք է ստախոս դառնաք։ Մարդը կարող է գողանալ ձեզանից, բայց դուք չպետք է գող դառնաք։ Մարդը կարող է կոպիտ լինել ձեր հանդեպ, բայց դուք պետք է հարգող մարդ լինեք։

Այս բաժնի օրինակները հիմնված են իրական դեպքերի վրա, սակայն անուններն ու մանրամասները փոխված են: Դրանք գողության կամ ստելու օրինակներ են:

Համոզվե՛ք, որ ուսանողները հասկանում են, թե ինչ է տեղի ունեցել յուրաքանչյուր օրինակում: Դիմե՛ք ուսանողներին, որ բացատրեն, թե ինչու է բերված օրինակում նկարագրված գործողությունը սխալ:

1. Ջորջն աշխատում էր գործարանում: Նա հաճախ տուն էր տանում մաքրող պարագաներ, գործիքներ և մանր իրեր, քանի որ գիտեր, որ գործարանը կարող է փոխարինել դրանք:

2. Պեդրոն խոշոր ընկերության բեռնատարի վարորդ էր: Հաճախ, երբ նա վարում էր ընկերության բեռնատարը, ճանապարհի կողքին ցուցանակ էր տեսնում, որտեղ գրված էր՝ «Մենք գնում ենք դիզել»։ Նա երբեմն կանգնեցնում էր մեքենան և բեռնատարի բաքից վաճառում փոքր քանակությամբ դիզվառելիք՝ իմանալով, որ ընկերությունը չի իմանա, որ փոքր քանակություն է հանվել։

3. Թամարային վստահեցին համակարգչային սարքավորումներ գնել այն գրասենյակի համար, որտեղ նա աշխատում էր: Նա կաշառք տվեց խանութի վաճառողին, որպեսզի դուրս գրի անդորրագրեր, որոնք ցույց էին տալիս գնման ավելի բարձր գներ, որպեսզի նա կարողանար գումարի մի մասն իրեն պահել:

4. Մեծ քաղաքի այգում մի մարդ վաճառում է այրված լամպեր: Գնողները գիտեին, որ դրանք չեն աշխատում, բայց գնում էին դրանք իրենց գրասենյակներ տանելու համար, որտեղ լավ լամպերը գողանում էին՝ փոխարինելով դրանք հին լամպերով։

5. Ալեքսը դպրոցի տնօրեն էր: Մի օր նրա մոտ եկավ մի աշակերտի հայր և պահանջեց, որ իր որդին լավ գնահատական ստանա հանրահաշվից։ Նա Ալեքսին փող տվեց։ Ալեքսը կարգադրեց հանրահաշվի ուսուցչին, որ լավ գնահատական դնի աշակերտին:

6. Անջելոն համալսարանի դասախոս էր: Նրա աշխատավարձը ցածր էր։ Նա իր կուրսին ասաց, որ քննությունը շատ դժվար է լինելու, և որ ոչ մի ուսանող չի ստանա արժանի գնահատական՝ առանց պատասխաններն իրենից գումարով գնելու:

7. Ալեքսը պետական դպրոցի տնօրենն էր: Մի օր Վանյան՝ ընկերը, ով աշխատում էր միսիոներական կազմակերպությունում, հարցրեց, թե արդյոք կարող են որոշ սենյակներ վարձակալել դպրոցի շենքում: Ալեքսը գինն ասաց, և Վանյան ամեն ամիս գումարը տալիս էր Ալեքսին։ Ալեքսն այդ գումարը պահեց իրեն և երբեք չհայտնեց այդ եկամուտների մասին:

8. Վանյան աշխատում էր մի միսիոներական կազմակերպության մեջ, որը պետք է որոշ տարածք վարձեր դասասենյակների համար: Վանյան գնաց իր ընկերոջ՝ դպրոցի տնօրեն Ալեքսի մոտ։ Նրանք պայմանավորվեցին վարձակալության գնի շուրջ, այնուհետև Վանյան ավելի բարձր գումար ասաց կազմակերպությանը: Ամեն ամիս Վանյան գումարը տալիս էր Ալեքսին, բայց իրեն էր պահում հավելյալ գումարը:

9. Սերգեյն աշխատում էր մի ծառայության համար, որը նոր շենքի կարիք ուներ: Ծառայությունը Սերգեյին ասել էր, որ իրենց համար շինարարական կազմակերպություն գտնի: Սերգեյը զրուցել էր մի քանի շինարարական ընկերությունների հետ։ Լավագույն գին տվող ընկերություն ընտրելու փոխարեն նա ընտրեց մեկին, ով խոստացավ իրեն տալ ծառայությունից ստացած գումարի մի մասը։

10. Ալբերտոն պետք է արտոնագրեր իր մեքենան, բայց նա գիտեր, որ այն չի անցնի տեխզննումը, քանի որ որոշ լույսեր չէին աշխատում: Նա իր մեքենան տարավ արտոնագրման բաժին և տեսավ մարդկանց երկար հերթը, որ սպասում էին իրենց մեքենաների զննությանն ու արտոնագրմանը: Մուտքի մոտ գտնվող մի տղամարդ նրան ասաց, որ որոշակի գնով կարող է իր համար կարճ ժամանակում արտոնագիր ստանալ՝ առանց ստուգման: Ալբերտոն վճարեց գինը և շուտով, արտոնագիրն ստացած, տուն գնաց:

11. Սիմոնը եկավ իր մեքենան ավտոկայանատեղից վերցնելու։ Ավտոկայանատեղին սպասարկողը նրան ասաց կայանման գինը։ Սիմոնը նրան ավելի քիչ գումար տվեց, բայց թույլ տվեց նրան պահել կայանման տոմսը մեկ այլ հաճախորդի տալու համար, որպեսզի սպասարկողը կարողանար իրեն վերցնել Սիմոնի վճարած գումարը:

12. Աննան բավականաչափ չէր պարապել քննության համար: Երբ նա եկավ դասի, նստեց ընկերոջ մոտ, որը լավ սովորող էր, որպեսզի կարողանար արտագրել ընկերոջ պատասխանները:

13. Իգորը վարում էր տրակտոր, որը գութան էր քաշում մեծ կառավարական ագարակի համար: Նա ցանկանում էր ավելի վաղ ավարտել գործը: Նա բարձրացրեց գութանը, որպեսզի այն խորը չփորի՝ դրանով իսկ կարողանալով ավելի արագ քշել տրակտորը։ Դաշտը կարծես պատրաստ էր, բայց լավ բերք չտվեց, քանի որ այն ճիշտ չէր հերկվել։

14. Հովիվ Պիեռը որպես միսիոներ է մեկնել՝ հովվելու մի եկեղեցի: Իրեն ուղարկող կազմակերպությունը նրան ամսական աշխատավարձ էր ուղարկում։ Քանի որ հովիվ Պիեռը ցանկանում էր, որ եկեղեցին նույնպես վճարի իրեն, նա իր եկեղեցու ժողովրդին ասաց, որ իր կազմակերպությունն իրեն ֆինանսապես չի աջակցում:

15. Գողը մտավ Էլլայի տուն և փող գողացավ: Երբ Էլլան ընկերներին պատմեց այդ մասին, ասաց, որ գողը վերցրել է նաև այլ իրեր, չնայած դա այդպես չէր: Նրա ընկերները կարեկցեցին և գումար տվեցին նրան՝ փոխարինելու այն իրերը, որոնք կարծում էին, թե գողացվել են:

16. Գուլովոն մի փոքրիկ գյուղի ղեկավար էր։ Նա նաև գյուղի եկեղեցու առաջնորդն էր։ Նրա ժողովուրդը պարզունակ էր, անկիրթ և աղքատ, բայց գյուղը շատ հող ուներ։ Քաղաքի գործարարները գյուղատնտեսական ծրագրերի համար դիմեցին հող գնելու հարցով։ Գուլովոն վաճառեց գյուղի ամբողջ հողատարածքը և այդ գումարով իր համար քաղաքում տուն կառուցեց։

17. Ամեն տարի Ֆեյրֆիլդի համայնքային եկեղեցին ընտրում էր մի մայրիկի, որը պետք է պատվի արժանանար՝ որպես «Տարվա մայր»: Նրանք ընտրեցին Վիլմային ոչ թե այն պատճառով, որ նա լավ մոր օրինակ էր, այլ որովհետև գիտեին, որ նա նվիրատվություն կանի եկեղեցուն: Այն բանից հետո, երբ նրանք պատվեցին նրան, Վիլման գումար նվիրաբերեց եկեղեցուն՝ նոր դարպասներ գնելու համար: Հաջորդ տարի եկեղեցին որոշեց կրկին ընտրել Վիլմային՝ որպես «Տարվա մայր», թեև նա տեղափոխվել էր մեկ այլ քաղաք։

18. Բարնին եկեղեցու ծառայության վարորդն էր: Ամեն երեկո նա ծառայության մեքենան տանում էր ապահով մի վայրում կայանելու։ Երբեմն մեքենան կայանելուց առաջ նա ուղևորներ կամ բեռներ էր տեղափոխում սեփական շահի համար:

Այս պատմությունը հորինված է, բայց նկարագրում է այն, ինչ տեղի է ունեցել շատ վայրերում:

Բորոլ քաղաքի քրիստոնյաները պարզեցին, որ կողքի մարզում մարդկանց մի մեծ համայնք կա, որ ապրում է աղքատության մեջ: Այդ մարզի մարդիկ իբանացի կոչվող ազգային խմբից էին։ Սերունդներ շարունակ իբանացիներն ապրել էին պարզունակ տներում՝ առանց բժշկական ծավալուն օգնության կամ կրթության հասանելիության: Շատերը բավարար սնունդ չունեին, իսկ ոմանք սովամահ էին լինում։

Բորոլի քրիստոնյաները սկսեցին գումար տալ իբանացիներին օգնելու համար։ Նրանք ներկայացուցիչներ ուղարկեցին այլ շրջանների եկեղեցիներ՝ ներդրումների խնդրանքով:

Բորոլի քրիստոնյաները սկսեցին բեռնատարներով սնունդ ուղարկել իբանացիներին: Նրանք վստահում էին իբանացիների եկեղեցու առաջնորդներին՝ սնունդը բաշխելու առումով:

Իբանացիների առաջնորդները շուկաներ հիմնեցին՝ մթերքը իրենց ժողովրդին վաճառելու համար: Միայն փող ունեցողները կարող էին գնել այն, ուստի դրանից ոչինչ չհասավ սովատանջ մարդկանց։ Եկեղեցու առաջնորդներն ու նրանց ընկերները շահույթը վերցնում էին իրենց։ Սննդի մի մասն ուղարկվեց՝ վաճառելու մեկ այլ մարզում, որտեղ մարդիկ ի վիճակի էին ավելի շատ վճարելու:

Բորոլի քրիստոնյաները պնդեցին, որ սնունդը անվճար տրվի այն մարդկանց, ովքեր դրա կարիքն ավելի շատ ունեն: Իբանացիների եկեղեցու առաջնորդները բաշխման համար բյուջե մշակեցին, որը ներառում էր վարորդներով բեռնատարներ վարձելն ու օգնող մարդկանց վճարելը: Նրանք սովորականից ավելի բարձր գներ սահմանեցին, իսկ հավելյալ գումարը պահեցին իրենց։ Երբ Բորոլի քրիստոնյաները պահանջեցին ծախսերի մասին հաշվետվություններ, իբանացիները կեղծ զեկույցներ գրեցին:

Ամեն անգամ, երբ Բորոլի քրիստոնյաները անազնիվ արարքներ էին հայտնաբերում, նրանք հիասթափվում էին և հուսահատվում: Նրանք փորձեցին գտնել այլ իբանացի առաջնորդների՝ օգնելու իրենց, բայց նույն խնդիրներն ունեցան: Բորոլի շատ քրիստոնյաներ դադարեցին այդ նպատակով ընծաներ տալուց։ Ոմանք շարունակեցին նվիրատվությունները։ Մի քանի իբանացի հովիվներ շուտով ունեցան մեքենաներ և լավ տներ Բորոլի աջակցության շնորհիվ: Մյուս հովիվները նախանձում էին նրանց և ցանկանում կապեր հաստատել Բորոլի նվիրատուների հետ: Հեռավոր մարզերում սովալլուկ մարդկանց մեծ մասն այդպես էլ օգնություն չստացավ:

Ուորեն Բաֆեթը «Berkshire Hathaway» կոչվող ընկերության գործադիր տնօրենն էր: Նա ցանկանում էր գնել «McLane Distribution» անունով մի ընկերություն, որը պատկանում էր «Walmart»-ին: Գնումը կազմել էր 23 միլիարդ դոլար։ Սովորաբար այսպիսի գնումը պահանջում է ամիսներ տևող ստուգումներ, որպեսզի գնորդը կարողանա ստուգել ամեն ինչ: Բաֆեթը հանդիպեց Walmart-ի ղեկավարների հետ և պայմանավորվեց մեկ հանդիպման ընթացքում։ Նա ոչ ոքի չուղարկեց՝ համոզվելու, որ գույքն ու այլ ակտիվները կարգին են: Նա ավելի ուշ հայտնեց բոլորին. «Մենք գիտեինք, որ ամեն ինչ լինելու է հենց այնպես, ինչպես ասում էր Walmart-ը, և դա այդպես էր»: Այս հսկայական գործարքն արագ ավարտվեց, քանի որ առաջնորդները վստահում էին միմյանց[1]:

Հիմա մտածե՛ք նախորդ օրինակներում նկարագրված մարդկանց մասին: Նրանցից ոչ մեկին չէր հաջողվի այսպես պայմանավորվել, քանի որ վստահելի չէին։ Ամեն ինչ պետք է ստուգվեր, ինչը մեծ ծախսեր ու ժամանակ կպահանջեր։

► Որո՞նք են որոշ անազնիվ գործելակերպեր, որոնցից դժվարությամբ կհրաժարվեն ձեր մշակույթի մարդիկ:

► Ո՞րն է այն գործելակերպը, որը պետք է փոխեք ձեր կյանքում:

Երկնայի՛ն Հայր,

Մենք գովաբանում ենք Քեզ արդարության և ճշմարտության Աստված լինելու համար: Մենք շնորհակալ ենք Քեզ, որ միշտ ազնիվ ես մեզ հետ գործերում:

Օգնի՛ր մեզ հետևել ազնվության այն չափանիշներին, որոնք Դու ունես մեզ համար: Օգնի՛ր մեզ կիրառել ազնվության սկզբունքները մեր խոսքերում ու գործերում:

Շնորհակալություն մեր Հայրը լինելու համար, որ ապահովությամբ ես մեզ առաջնորդում: Մենք ուզում ենք վստահել Քեզ, որ հոգ տանաս մեզ համար:

Ամեն:

(1) Գրե՛ք մեկ պարբերություն հետևյալ կետերից յուրաքանչյուրի վերաբերյալ.

• Բացատրել մեզ համար Աստծո էության (ճշմարտության) և Աստծո չափանիշների (ազնվության) միջև կապը: Բացատրե՛լ, թե ինչու է Աստված մեզանից պահանջում ազնիվ լինել մեր խոսքով և մեր բոլոր գործերով:

• Ամփոփե՛լ, թե ինչ է ասում Աստվածաշունչն ազնվության մասին՝ օգտագործելով առնվազն երեք սուրբգրային խոսք:

• Բացատրե՛լ առնվազն չորս եղանակ, թե ինչպես է անազնվությունը կամ ազնվությունը ազդում ուրիշների հետ մեր հարաբերությունների վրա:

(2) Պատրաստե՛ք աստվածաշնչյան մի փոքրիկ քարոզ ազնվության մասին, որով կարող եք կիսվել ձեր մշակույթի մի խումբ մարդկանց հետ: Տվե՛ք աստվածաշնչյան հիմնավորում Աստծո չափանիշների համար, ապա կիրառե՛ք այն որոշակի իրավիճակներում: