यस पाठले प्रश्नहरूको रूपमा परिपक्व मण्डलीको विशेषताहरू दिन्छ। मण्डलीले यी प्रश्नहरूले तिनीहरु कसरी विकास गर्नुपर्छ भनेर बुझ्न विचार गर्नुपर्छ।

यस कक्षाका विद्यार्थीहरूको समूहमा सबै एउटै मण्डलीबाट नहुन सक्छन् र मण्डलीमा हुने परिवर्तनहरूबारे निर्णय गर्न सक्नेहरू पनि नहुन सक्छन्। तिनीहरूले यी प्रश्नहरू मण्डलीको परिपक्वता स्तरको मूल्यांकन गर्न र आफ्नै सेवकाईको लागि लक्ष्यहरू निर्धारण गर्न प्रयोग गर्न सक्छन्।

तलको प्रत्येक प्रश्नको लागि, प्रदान गरिएको स्पष्टीकरणहरू प्रयोग गरेर प्रश्नको अर्थ छलफल गर्नुहोस्। त्यसपछि, मण्डलीलाई आवश्यक पर्ने विशेषताहरू विकास गर्न के गर्न सकिन्छ विचार गर्नुहोस्।

(१) मण्डलीलाई आत्मिक जीवन दिने स-साना समूहहरू कहाँ छन् ?

स्वस्थ मण्डलीमा सामान्यतया कुनै न कुनै प्रकारका स-साना समूहहरू हुन्छन् जहाँ आत्मिक जीवन दिगो भएको हुन्छ। यी समूहहरू घर मण्डलीहरू, आइतबार स्कूलका कक्षाहरू, वा अन्य प्रकारका समूहहरू हुन सक्छन्। यी कुराहरु संगठित हुन सक्छन्, वा तिनीहरू अनौपचारिक हुन सक्छन्। आत्मिक जागृति सामान्यतया सानो समूहमा सुरु हुन्छ। मण्डलीको आत्मिक जीवन केवल आराधना सेवामा मात्र दिगो वा पुनर्जीवित हुँदैन। आत्मिक जवाफदेहिता र जीवन परिवर्तन सामान्यतया सानो समूहमा हुन्छ। मण्डलीका अगुवाहरूले यी उद्देश्यहरू पूरा गर्ने स-साना समूहहरू अस्तित्वमा छन् कि छैनन् भनेर पक्का गर्नुपर्छ। यदि मण्डलीमा अवस्थित संरचनाहरूले आत्मिक जीवनलाई सक्षम बनाइरहेका छैनन् भने, परिवर्तनहरू आवश्यक छन्।

(२) मण्डलीको मालिक को हो ?

सेवकाई र यसको आर्थिक सहयोगको जिम्मेवारी लिने प्रतिबद्ध सदस्यहरूको समूह नभएसम्म मण्डली परिपक्व हुँदैन।

यदि सेवकाई पास्टरको लागि व्यक्तिगत व्यवसायको रूपमा सञ्चालन गरिन्छ भने, मण्डली कहिल्यै परिपक्व हुनेछैन। यदि मण्डलीको भवन भाडामा लिइएको छ भने, कुनै व्यक्ति वा बाहिरी संगठनले भाडा तिर्यो भने मण्डली परिपक्व हुँदैन।

आदर्शतया, भवन र सेवकाई मण्डलीका सदस्यहरूको समूहको स्वामित्वमा हुनुपर्छ। भवन भाडामा लिएको छ भने, त्यसको भाडा तिर्ने जिम्मेवारी मण्डलीले मिलेर लिनुपर्छ।

ख्रीष्टको दोस्रो आगमन नभए सम्म एक संस्थाको रूपमा जारी रहन स्थानीय मण्डलीको सेवकाई स्थापित गर्नुपर्छ।

(३) स्थानीय सेवकाईलाई कसरी आर्थिक सहयोग गरिन्छ ?

मण्डलीको लागि सबैभन्दा राम्रो आर्थिक अवस्था दशांश दिने सदस्यहरूद्वारा समर्थित हुनु हो। यदि मण्डलीलाई बाहिरी संगठनले समर्थन गरेको छ भने यो परिपक्व मण्डली होइन र कमजोरी छ। यदि यसलाई पास्टर वा केही दाताहरूले समर्थन गर्छन् र साधारण भक्त विश्वासीहरुको समूहले होइन भने, भक्त विश्वासीहरु विश्वासको परिपक्व परिवारको रूपमा विकसित भएको छैन।

दशांश स्थानीय मण्डलीलाई समर्थन गर्ने परमेश्वरको तरिका हो। मण्डलीका अगुवाहरूले दशांशको बारेमा सिकाउनुपर्छ र बिस्तारै मण्डलीको सेवकाईको लागि स्थानीय समर्थन निर्माण गर्नुपर्छ। मण्डलीले आफ्नो सञ्चालनका लागि बाहिरी समर्थनमा भर पर्नु हुँदैन। मण्डलीको क्षमता निर्माण गर्ने परियोजनाहरूको लागि बाहिरी समर्थन प्रयोग गर्नुपर्छ।

(४) के मण्डलीले पूर्ण-समय सेवाकाई गर्ने पास्टरलाई समर्थन गर्छ ?

पास्टरको लागि बाइबलीय योजना यो हो कि उसले आफ्नो सेवकाईमा पूर्ण रूपमा आफ्नो समय समर्पित गर्दछ। कहिलेकाहीं यो नयाँ मण्डलीको लागि सम्भव हुँदैन, तर मण्डलीसँग समर्थन विकास गर्ने लक्ष्य हुनुपर्दछ जसले पास्टरलाई आर्थिक आवश्यकताहरूबाट विचलित नभइकन सेवकाईमा ध्यान केन्द्रित गर्न अनुमति दिन्छ।

(५) आर्थिक कुराको जवाफदेहिताको लागि प्रणाली के हो ?

भेटीहरू एक भन्दा बढी व्यक्तिहरूले सङ्कलन र गणना गर्नुपर्छ। मण्डलीको आर्थिक प्राथमिकता र नीतिहरू निर्धारण गर्न थुप्रै विश्वासयोग्य व्यक्तिहरू संलग्न हुनुपर्छ। मण्डलीका सदस्यहरूले मण्डलीको आर्थिक प्रणालीले कसरी काम गर्छ भनेर थाहा पाउनुपर्छ।

[1](६) मण्डली बाहिरका मानिसहरूलाई सुसमाचार सुनाउन कस्ता माध्यमहरू प्रयोग गरिंदैछ ?

मण्डलीको पहिलो जिम्मेवारी मण्डलीका प्रतिबद्ध सदस्यहरूको हेरचाह गर्नु हो। तथापि, मण्डलीसधैं छिमेकका मानिसहरूसम्म पुग्नुपर्छ। मण्डलीबाहिरका मानिसहरूले मण्डलीको काम हेरिरहेका छन् र सुसमाचार सुनिरहेका छन् भन्ने कुरा सुनिश्चित गर्ने गतिविधिहरू मण्डलीसित हुनैपर्छ। यीमध्ये केही गतिविधिहरू स्वतःस्फूर्त रूपमा भइरहेका हुन सक्छन्। नेताहरूले अरूलाई पनि सङ्गठित गर्नुपर्छ। क्षमता भएका सदस्यहरूलाई यी गतिविधिहरूको लागि आमन्त्रित र प्रशिक्षित गर्नुपर्छ।

(७) मण्डलीले छरछिमेकको आवश्यकताहरु प्रति कस्तो प्रतिक्रिया देखाइरहेको छन् ?

मण्डलीले छरछिमेकका आवश्यकताहरू पूरा गर्ने तरिकाहरू खोज्नुपर्छ। प्राथमिकता सधैं परमेश्वरको प्रेम देखाउनु र बाइबलका सिद्धान्तहरू प्रदर्शन गर्नु हुनुपर्छ।

(८) के त्यहाँ जातीय वा आर्थिक वर्गका मानिसहरू छन् जुन मण्डलीको पहुँचबाट बहिष्कृत छन् ?

के गरीब मानिसहरूले आफूसँग भएको लुगा लगाएर मण्डलीमा उपस्थित हुदा स्वागतको महसुस गर्छन् ? आमाबाबुले नगरे तापनि के समुदायका बालबालिकाहरूलाई उपस्थित हुन स्वागत गरिएको छ ? के त्यहाँ मानिसहरूको कुनै जातीय समूह छ जसले मण्डली तिनीहरूका लागि होइन भनेर सोच्दछ ?

(९) आगन्तुकहरूलाई कसरी अभिवादन गरिन्छ ?

मण्डलीले मण्डलीका मानिसहरूलाई मण्डलीमा आउने मानिसहरूलाई अभिवादन गर्न तालिम दिनुपर्छ। आगन्तुकहरूलाई अभिवादन गर्ने सबैभन्दा महत्त्वपूर्ण उद्देश्य आगन्तुकलाई स्वागत र सहज महसुस गराउनु हो। धेरै मान्छेले आगन्तुक सँग परिचय प्राप्त गर्न प्रयास गर्नुपर्छ। उसलाई अर्को आराधना सेवामा मात्र होइन, तर सानो समूहको भेला वा घरको भेलामा पनि निमन्त्रणा गर्नुपर्छ जहाँ तिनले सिक्न सक्छन र प्रश्नहरू सोध्न सक्छन्।

(१०) नयाँ ख्रीष्टमा परिवर्तन गर्नेहरूलाई तुरुन्तै चेला बनाउन मण्डलीको तरिका के हो ?

जब कुनै व्यक्तिले उद्धार पाउँछ, चाहे त्यो मण्डलीमा होस् वा अन्यत्र, उसलाई आराधना सेवामा मात्र होइन, तर तुरुन्तै चेला बनाउने प्रणालीमा पनि आमन्त्रित गर्नुपर्छ। यो पास्टरसँग व्यक्तिगत भेटबाट सुरु हुन सक्छ। साप्ताहिक रूपमा भेला हुने एउटा सानो समूहमा उसलाई निमन्त्रणा गर्न सकिन्छ। मण्डलीले नयाँ ख्रीष्टमा परिवर्तन गर्नेहरूको सेवा गर्न तयार हुनुपर्छ।

(११) मण्डलीले आत्मिक परिपक्वतालाई कसरी वर्णन गर्छ ?

आत्मिक तवरमा परिपक्व व्यक्तिहरू कस्तो देखिन्छन् ? भक्त विश्वासीहरुलाई आत्मिक परिपक्वताका विशेषताहरू सिकाउनुपर्छ। यी विशेषताहरू सँधै अगुवापनको क्षमता वा प्रतिभासँग मेल खाँदैनन्, तर यी विशेषताहरू भएका व्यक्तिहरूलाई उदाहरणको रूपमा सम्मान गर्नुपर्छ।

(१२) उद्देश्यपूर्ण आत्मिक विकासको लागि प्रणाली के हो ?

मण्डलीको एउटा महत्त्वपूर्ण कार्य भनेको यसका सदस्यहरूको आत्मिक विकासमा सहयोग गर्नु हो (एफिसी ४:११-१३)। मण्डलीका अगुवाहरूले आत्मिक विकास भइरहेको छ भनेर मात्र आशा गर्न सक्दैनन्। तिनीहरूले मण्डलीमा प्रचार मात्र गर्नुहुँदैन र सम्पूर्ण आत्मिक विकासलाई व्यक्तिगत पहलमा छोड्नु हुँदैन। पास्टरहरूसित मानिसहरूलाई आत्मिक अनुशासनहरू प्रयोग गर्न प्रोत्साहन दिने प्रणाली हुनुपर्छ। तिनीहरूले यसलाई स्वीकार गर्ने सबैलाई जवाफदेही प्रदान गर्नुपर्छ। यो व्यक्तिगत कुराकानी, सानो समूह, कक्षाहरू र अन्य तरिकाहरू मार्फत गर्न सकिन्छ।

[2](१३) के त्यहाँ सदस्यता संरचना छ जसले मानिसहरूलाई मण्डलीमा प्रतिबद्ध हुने तरिका प्रदान गर्दछ ?

मण्डलीप्रति प्रतिबद्ध हुन चाहने मानिसहरूले प्रतिबद्धताको अर्थ के हो भनेर विशेष गरी जान्न आवश्यक छ। कुनै-कुनै मण्डलीले सदस्यता संरचना नभएको दाबी गर्छन्, तर हरेक मण्डलीसँग आफ्ना मानिसहरू को हुन् भनेर थाहा पाउने कुनै न कुनै तरिका हुन्छ। मण्डली बनाउने मानिसहरू को हुन् भनेर सबैले जान्न आवश्यक छ।

(१४) के सदस्यता आवश्यकताहरू स्पष्ट छन् र सबैलाई थाहा छ ?

सदस्यताका लागि के कस्ता प्रतिबद्धताहरू आवश्यक छन् भन्ने कुरा सबैलाई थाहा हुनुपर्छ। एक सदस्य बन्नको लागि आवश्यकताहरु र प्रक्रियाको विवरण छापिएको हुनु पदर्छ।

(१५) के सदस्यता आवश्यकताहरूले ख्रीष्टमा परिवर्तन भएका व्यक्तिलाई चाँडै संलग्न हुन अनुमति दिन्छ ?

एक ख्रीष्टमा परिवर्तन भएका व्यक्ति जो मण्डलीमा प्रतिबद्ध हुन तयार छ, तुरुन्तै मण्डलीलाई मद्दत गर्न सक्षम हुनुपर्दछ। यसको अर्थ यो होइन कि उसलाई पद वा अगुवापनको जिम्मेवारी दिइनुपर्छ, तर उसले आफू मण्डलीको भाग हो भनेर थाहा पाउनुपर्छ।

(१६) मण्डलीको मूल्य मान्यताहरु र स्तरहरू कायम राख्न जिम्मेवार समूह के हो ?

भक्त विश्वासीहरुको भेला भित्र प्रतिबद्ध सदस्यहरूको एउटा समूह छ जसले मण्डलीको प्रकृति निर्धारण गर्छ। तिनीहरू डिकनहरूको बोर्ड हुन सक्छन् वा तिनीहरू मतदान गर्ने सदस्यहरूको समूह हुन सक्छन् जसलाई परिचालक निकाय भन्न सकिन्छ। अगुवाहरूले यस समूहको विकासमा विशेष ध्यान दिनुपर्छ। त्यस समूहमा हुने परिवर्तनले मण्डलीको भविष्य निर्धारण गर्नेछ। पास्टर तिनीहरूप्रति जवाफदेही हुनुपर्छ र तिनीहरूलाई जानकारी गराउनुपर्छ। मण्डलीका लागि तिनीहरू र अगुवापनको टोलीको एउटै प्राथमिकता हुनुपर्छ।

(१७) के मण्डली स्पष्ट दर्शनप्रति प्रतिबद्ध छ ?

पास्टर, अगुवापन टोली र प्रतिबद्ध सदस्यहरूको समूहले मण्डलीको उद्देश्य र लक्ष्यहरूबारे छलफल गर्न धेरै समय बिताउनुपर्छ। तिनीहरूले मण्डलीको दर्शन विकास गर्नुपर्छ जुन तिनीहरूले समर्थन गर्न सक्दछन्। भक्त विश्वासीहरुले मण्डलीको दर्शनसित परिचित हुनु आवश्यक छ।

(१८) के मण्डलीका सदस्यहरूलाई मण्डलीका सिद्धान्तहरू थाहा छ ?

मण्डलीले आफ्ना मानिसहरूलाई आराधना सेवा गर्न र आत्मिक अनुभवहरू प्राप्त गर्न अगुवाई गर्नु बाहेक अरू धेरै केही गर्नै पर्छ। जब कुनै बाहिरी व्यक्तिले कुनै सदस्यलाई सोध्छ, “तपाईंको मण्डलीले के विश्वास गर्छ ?” सदस्यसँग राम्रो जवाफ हुनुपर्छ। सदस्यहरूले ईसाई धर्मका आधारभूत सिद्धान्तहरू र आफ्नो मण्डलीका विशेष सिद्धान्तहरूको व्याख्या गर्न सक्षम हुनुपर्छ।

(१९) के सदस्यहरूले मण्डली र यसको संगठन बीचको सम्बन्ध बुझ्छन् ?

मण्डलीले आफ्नो संगठन प्रतिको आफ्नो प्रतिबद्धता पूरा गर्नुपर्छ। संगठनमा भएको सङ्गतिले मण्डलीको सिद्धान्तलाई समर्थन गर्न मदत गर्न सक्छ। मण्डलीका मानिसहरूलाई संगठनका कार्यक्रमहरूमा भाग लिन प्रोत्साहन दिनुपर्छ।

(२०) आराधना सेवाहरूको योजना र मूल्यांकन कसरी गरिन्छ ?

अगुवाहरूले प्रार्थनाका साथ आराधना सेवाको योजना बनाउनुपर्छ। यदि पवित्र आत्माले सेवालाई अनपेक्षित दिशामा अगुवाई गर्नुहुन्छ भने, यो अचम्मको कुरा हो; तर अन्यथा, अगुवाहरूले पछ्याउने योजना बनाउनुपर्छ। त्यहाँ बैठकहरू हुनु पर्दछ जहाँ धेरै अगुवाहरूले सेवाहरूको विवरणमा सँगै काम गर्छन्।

यदि मण्डलीको राम्रो आराधना सेवा छ भने, भक्त विश्वासीहरु संलग्न हुन्छन् र चासो राख्छन्। मण्डलीले सेवाका विभिन्न भागहरूमा धेरै मानिसहरूलाई प्रयोग गर्ने प्रयास गर्नुपर्छ ताकि अझ धेरै मानिसहरूलाई चासो र प्रतिबद्ध राख्न मदत मिलोस्।

(२१) के बप्तिस्मा र प्रभु भोजको अभ्यास धर्मशास्त्रीय र अर्थपूर्ण तरिकामा गरिएको छ ?

प्रत्येक साँचो ख्रीष्टमा परिवर्तन गर्ने व्यक्तिले पहिल्यै बप्तिस्मा लिएको हुनुपर्छ वा चाँडै बप्तिस्मा लिने तालिकामा हुनुपर्छ। जो सँग अनुग्रहको गवाही भएकाहरूलाई प्रभु भोज दिनुपर्छ। सहभागीहरूलाई आराधना गर्न मदत गर्ने गरी प्रभु भोजको अभ्यास गर्नुपर्छ।

(२२) के मण्डलीले बाइबलीय मण्डलीको अनुशासनको अभ्यास गर्छ ?

मण्डलीले पापको विरुद्धमा उभिनुपर्छ। मण्डलीको कुनै सदस्य पापको दोषी छ भने, उसलाई सामना गर्नै पर्छ। उसलाई पश्चात्तापमा ल्याउने र उसलाई आत्मिक विजय तर्फ पुनर्स्थापना गर्न लक्ष्य हुनुपर्छ।

(२३) के सेवकाईको जिम्मेवारीहरु बाँड्ने कुनै टोली छ ?

अगुवापनको टोली नबनाए सम्म सेवाकाई अघि बढ्न सक्दैन। प्रत्येक व्यक्ति आफूले प्रभाव पार्न सक्ने मानिसहरूको संख्या र उसले बोक्न सक्ने जिम्मेवारीहरूमा सीमित हुन्छ। मण्डलीको सेवकाई एक व्यक्तिको सेवकाई हुनु हुँदैन।

(२४) सेवकाईको टोलीमा सदस्यहरू छान्नको लागि, प्रशिक्षण दिनको लागि र थप्नको लागि प्रणाली कस्तो छ ?

[3]अगुवापनको टोलीका लागि नयाँ सदस्यहरू विकास नगरे सम्म सेवकाई अघि बढ्न सक्दैन। टोलीका लागि सदस्यहरू धेरै सावधानीपूर्वक छान्नु पर्दछ, तर मण्डलीले सधैं भविष्यमा जिम्मेवारी लिन सक्ने व्यक्तिहरू फेला पार्न र विकास गर्न काम गरिरहेको हुनुपर्छ। सेवकाईको वृद्धि अधिक अगुवाहरूको विकासमा निर्भर गर्दछ।

(२५) मण्डलीमा हुने विवाद र समस्याहरूको जवाफ दिने प्रणाली कस्तो छ ?

नसुल्झिएका विवादहरूले मण्डलीलाई ध्वस्त पर्दछ। मानिसहरूसितको व्यक्तिगत विवादलाई कसरी सुल्झाउन सकिन्छ भनेर भक्त विश्वासीहरुलाई सिकाउनुपर्छ। मण्डलीका अगुवाहरूले विवादलाई बेवास्ता गर्नुहुँदैन तर मेलमिलाप ल्याउन मदत गर्न तयार हुनुपर्छ।

(२६) के मण्डलीले अन्य मण्डलीहरूसँगको साझेदारीमा मिसनहरूलाई समर्थन गरिरहेको छ ?

यदि कुनै मण्डली साँच्चै परमेश्वरको राज्यलाई अघि बढाउन चाहन्छ भने, यसले आफ्नो स्थानीय प्रभाव विस्तार गर्ने काम गर्नु मात्र होइन, तर अन्य सेवकाईहरूलाई पनि समर्थन गर्नु हो। एउटा मण्डलीले परमेश्वरको महिमाको लागि हो भनेर देखाउँछ जब यी कुराहरु सेवकाईको लागि दिईन् छ जसले आफैलाई फाइदा गर्दैन।

(२७) के मण्डलीले नयाँ मण्डली सुरु गर्न मदत गरिरहेको छ ?

एउटा परिपक्व मण्डलीले नजिकैको इलाकामा नयाँ मण्डली सुरु गर्न मदत गर्नुपर्छ। नयाँ मण्डलीले ती मानिसहरूसम्म पुग्नेछ जसको पहुँच पहिले नै अवस्थित मण्डलीले पुर्‍याएको थिएन।

(२८) के मण्डलीको सेवकाईले मण्डलीका सबै उमेर र वर्गका मानिसहरूको सेवा गर्छ ?

बच्चाहरू, वृद्धहरू, जवान मानिसहरू, जवान परिवारहरू, पुरुषहरू, अविवाहित व्यक्तिहरू र अरूहरूको आवश्यकताहरू मण्डलीको लागि महत्त्वपूर्ण हुनुपर्छ। मण्डलीले आत्मिक परिपक्वताको सबै स्तरका मानिसहरूको आवश्यकताबारे पनि सोच्नुपर्छ।

(२९) के मण्डलीका जनहरूले सदस्यहरूको आवश्यकता पूरा गर्न मिलेर काम गर्छन् ?

मण्डलीका मानिसहरूको आर्थिक आवश्यकताबारे मण्डलीले ख्याल गर्नुपर्छ। प्रायजसो आवश्यकताहरू मण्डलीका अगुवाहरूद्वारा प्रशासन विना नै एकअर्कालाई मदत गर्ने मानिसहरूले पूरा गर्नुपर्छ। यदि अधिकांश सदस्यहरूले अरूलाई मदत गर्ने जिम्मेवारी महसुस गर्दैनन् भने, तिनीहरूले अझै पनि परिपक्व मण्डली गठन गरेका छैनन्।

(३०) मण्डलीका मानिसहरूको आर्थिक आवश्यकतापूरा भएको कुरा मण्डलीले कसरी सुनिश्चित गर्छ ?

मण्डलीमा डिकनहरू हुनुपर्दछ जसले आवश्यकताहरू ध्यान दिइएको छ भनेर सुनिश्चित गर्दछ। प्रेरित को पुस्तकमा मण्डलीले यस प्रयोजनको लागि पहिले डिकनहरू नियुक्त गऱ्यो।