► तपाई किन मण्डली जानुहुन्छ ?

जब मानिसहरूले मण्डली जाने बारे कुरा गर्छन्, तिनीहरूको मतलब एक तालिका अनुसारको आराधना सेवाको लागि मण्डली भवनमा जानु हो।

धेरै मानिसहरू परमेश्वरको बारेमा सिक्न मण्डलीमा जान्छन् भन्छन्। कहिलेकाहीं परमेश्वरबाट टाढा महसुस गर्ने मानिसहरू परमेश्वरको उपस्थिति महसुस गर्ने आशामा मण्डलीमा जान्छन्। परमेश्वरलाई चिन्ने मानिसहरू आराधनामा उहाँको उपस्थिति अनुभव गर्ने आशामा मण्डलीमा जान्छन्। मण्डली परमेश्वरको बारेमा हो। मानिसहरूले मण्डलीको आराधना सेवाहरूमा परमेश्वरको उपस्थिति अनुभव गर्न सक्षम हुनुपर्छ।

तर मण्डली एउटा भवन होइन, र यो आराधनाको लागि संगति मात्र होइन। मण्डली विश्वासीहरूको समूह हो जो मण्डली हुनको लागि एकसाथ प्रतिबद्ध छन्। त्यसैले, जब हामी मानिसहरूले मण्डली हेर्ने वा मण्डलीमा आउने बारेमा कुरा गर्छौं, हाम्रो मतलब विश्वासीहरूको समूह हो। जब हामी मण्डली परमेश्वरको बारेमा हो भन्छौं, हाम्रो मतलब केवल भवन र आराधना सेवा परमेश्वरको बारेमा हो भन्ने होइन। प्रतिबद्ध विश्वासीहरूको समूहले सँगै बिताएको जीवन परमेश्वरको बारेमा हो।

ग्रीक शब्द एक्लेसिया ekklesia (G१६७७/G1677)[1] नयाँ नियममा "मण्डली" भनेर सामान्यतया अनुवाद गरिएको शब्द हो। पहिलो शताब्दीमा यो ग्रीक शब्द सबैले प्रयोग गर्थे। जब एक सहरका नागरिकहरूलाई एक बैठकको लागि बोलाइन्छ, यस बैठकलाई एक्लेसिया भनिन्थ्यो।

यो शब्द नयाँ नियममा ११७ पटक प्रयोग गरिएको छ, तर ती सबै घटनाहरूले मण्डलीलाई बुझाउँदैन। कोही-कोहीले अन्य प्रकारका बैठकहरूलाई सङ्केत गर्छन् (प्रेरित १९:३२, ३९, र ४१)।

सुसमाचार हरेक जाति, सामाजिक वर्ग, स्थान र पेशाका मानिसहरूलाई दिइएको छ। जसरी सहरका सबैले बैठकको घोषणा सुन्न सक्थे, त्यसरी नै कुनै पनि वर्गका मानिसहरूलाई सुसमाचारको प्रस्ताव प्राप्त गर्नबाट अलग गरिएको छैन।

मण्डली मानिसहरूको समूह हो जसले सुसमाचारको बोलावटमा जवाफ दिन्छ। तिनीहरू ख्रीष्ट र उहाँको मण्डलीप्रति प्रतिबद्ध मानिसहरूको एउटा विशेष, विविध समूह गठन गर्न हरेक वर्गका मानिसहरूबाट आउँछन्।

त्रिएकका व्यक्तिहरू ‒ पिता, पुत्र र पवित्र आत्मा ‒ मण्डलीका विश्वासीहरूसित विशेष तरिकामा सम्बन्धित हुनुहुन्छ।

परमेश्वरले मण्डलीमा गर्नुभएका कामहरूको निम्ति अनन्ततासम्म उहाँ महिमित हुनुहुनेछ।

उहाँलाई नै पुस्‍ता-पुस्‍तासम्‍म मण्‍डली र ख्रीष्‍ट येशूमा सदासर्वदा महिमा होस्‌। आमेन (एफिसी ३:२१)।

किनभने परमेश्वरको महिमाको लागि मण्डली अवस्थित छ, परमेश्वरको अनादर हुने कुनैपनि कार्य मण्डलीले गर्नु हुँदैन। मण्डलीले परमेश्वर कस्तो हुनुहुन्छ भन्ने बारेमा मानिसहरूलाई गलत बुझाइ दिने वा परमेश्वरको सट्टा कुनै व्यक्तिलाई केन्द्रबिन्दु बनाउने कुनै पनि काम गर्नु हुँदैन।

मण्डली परमेश्वरको परिवार हो।

यसकारण मौका पाएअनुसार हामी सबै मानिसको भलाइ गर्दैजाऔं, विशेष गरी तिनीहरूको, जो हाम्रो विश्‍वासका परिवारका हुन्‌ (गलाती ६:१०)।

तर तिमीहरूचाहिँ यस किसिमले प्रार्थना गर: "हे हाम्रा पिता, जो स्‍वर्गमा हुनुहुन्‍छ, तपाईंको नाउँ पवित्र होस्‌" (मत्ती ६:९)।

किनभने मण्डली परमेश्वरको परिवार हो, परमेश्वरमा विश्वास नगरेसम्म र उहाँसँग सम्बन्ध नराखेसम्म कुनै पनि व्यक्तिलाई साँच्चिकै मण्डलीमा हुन सम्भव छैन। कुनै पनि व्यक्ति मण्डलीका मानिसहरूलाई चिनेर मात्र मण्डलीमा प्रवेश गर्दैन। उनीहरु परमेश्वरसँगको सम्बन्धमा आएर र त्यसपछि परमेश्वरका जनहरूसँग सम्बन्ध गाँस्न प्रतिबद्ध भएर मण्डलीमा प्रवेश गर्दछ।

► परमेश्वरलाई आफ्नो पिताको रूपमा पाउनुको अर्थ के हो ?

[1]मण्डली निर्माण गर्ने येशू नै हुनुहुन्छ। येशूले मण्डलीको अन्तिम सफलताको प्रतिज्ञा गर्नुहुन्छ।

म तिमीलाई भन्‍दछु, कि तिमी पत्रुस हौ। म मेरो मण्‍डली यस चट्टानमाथि स्‍थापित गर्नेछु, र नरकका ढोकाहरू त्‍यसमाथि विजयी हुनेछैनन्‌ (मत्ती १६:१८)।

येशूले मण्डलीसँग हुने प्रतिज्ञा गर्नुभयो।

...म युगको अन्‍त्‍यसम्‍म सधैँ तिमीहरूका साथमा छु (मत्ती २८:२०)।

किनकि जहाँ दुई कि तीन जना मेरो नाउँमा भेला हुन्‍छन्, त्‍यहाँ म तिनीहरूका माझमा हुनेछु (मत्ती १८:२०)।

ख्रीष्ट मण्डलीको शिर हुनुहुन्छ। यस संसारमा मण्डली उहाँको शरीर हो। मण्डलीसँग ख्रीष्टको व्यक्तिगत सम्बन्ध हामीले बुझ्न सक्ने भन्दा पनि निकै गहिराईमा छ।

र परमेश्‍वरले सबै कुरा उहाँका पाउमुनि राखिदिनुभयो, र मण्‍डलीको निम्‍ति उहाँलाई नै सबै कुराको शिर बनाइदिनुभयो, जुन मण्‍डली उहाँको शरीर, उहाँको पूर्णता हो। र उहाँले नै सबै थोक परिपूर्ण पार्नुहुन्‍छ (एफिसी १:२२-२३)।

किनभने हामी उहाँका शरीरको अङ्ग हौं (एफिसी ५:३०)।

[2] मण्डलीको सदस्य ख्रीष्टको शरीरको अङ्ग भएको हुनाले, जबसम्म कुनै पनि व्यक्तिले व्यक्तिगत रूपमा येशूलाई मुक्तिदाताको रूपमा उसको विश्वास नराखेसम्म र ख्रीष्टको अधिकारलाई प्रभुको रूपमा स्वीकार नगरेसम्म उ साँच्चिकै मण्डलीको भाग हुन सम्भव छैन।

► कस्तो प्रकारको व्यक्तिलाई ख्रीष्टको शरीरको अङ्ग भन्न सकिन्छ ?

प्रारम्भिक मण्डली पवित्र आत्माको उपस्थिति र शक्तिको बारेमा सचेत थियो भनेर प्रेरितको पुस्तकले देखाउँछ। पवित्र आत्मालेप्रचार गर्नको लागि प्रेरणा र शक्ति दिनुभयो (प्रेरित २:११)। उहाँले मानिसहरूलाई विशेष सेवकाईमा बोलाउनुभयो (प्रेरित १३:२)। उहाँले तिनीहरूलाई सेवकाईको लागि सही ठाउँहरुमा डोऱ्याउनुभयो (प्रेरित १६:६-१०)। उहाँले सैद्धान्तिक मुद्दाहरू समाधान गर्नुभयो (प्रेरित १५:२८)।

पवित्र आत्मा मण्डलीको विश्वव्यापी मिशन पूरा गर्नको लागि महान् निर्देशक हुनुहुन्छ।

कुनै पनि एकल मानव संगठनले सम्पूर्ण कार्य पूरा गर्ने आशा गर्न सक्दैन। परमेश्वरले मिसनरीहरूलाई बोलाउनुहुन्छ र पठाउनुहुन्छ, र उहाँले हरेक भौगोलिक क्षेत्रका आवश्यकताहरू जान्नुहुन्छ।

एक व्यक्ति पवित्र आत्माद्वारा पुनर्जन्मको आश्चर्यकर्मको अनुभव गरेर मण्डलीमा प्रवेश गर्दछ। पुनर्जन्म एक अलौकिक अनुभव भएकोले, सुसमाचार प्रचार अलौकिक तवरमा पवित्र आत्माद्वारा निर्देशित र सशक्त हुन्छ। सुसमाचार प्रचारको परिणामलाई प्राकृतिक कारणहरूले व्याख्या गर्न सकिंदैन।

मण्डलीको जीवन आत्मामा जीवन हो।

प्रारम्भिक मण्डलीमा आराधना पवित्र आत्माद्वारा निर्देशित थियो। उहाँले विभिन्न सदस्यहरू मार्फत बोल्नुभयो (प्रेरित ४:३०-३१)। पवित्र आत्माले आराधनाको योजनाबद्ध कार्यक्रम कुनै पनि समयमा परिवर्तन गर्न सक्नुहुन्छ।

मण्डली अन्य सबै प्रकारका मानव संगठनहरूभन्दा फरक छ। मण्डलीका सदस्यहरू एक-अर्कासँग संगतिमा हुन्छन् किनभने तिनीहरू परमेश्वरसँग सम्बन्धमा हुन्छन् र तिनीहरूको आत्मिक जीवन हुन्छ। परिवर्तित नभएको व्यक्ति मण्डलीलाई मन पराए तापनि र मण्डलीका मानिसहरूको मित्र भए तापनि वास्तवमा त्यो संगतिमा हुँदैन।

पवित्र आत्माले आत्मिक वरदानहरू दिनुहुन्छ ताकी यी मण्डलीका सदस्यहरूले एकअर्काको सेवा गर्न प्रयोग गर्नुपर्ने हुन्छ (१ कोरिन्थी १२:४-७)। यरूशलेममा प्रारम्भिक मण्डलीको सुरुवाती दिनहरूमा, सदस्यहरूको प्रतिबद्धता र एकता यति बलियो थियो कि आधुनिक विश्वासीहरूलाई त्यो कल्पना गर्न गाह्रो छ। मण्डलीका सदस्यहरूले सँगै जीवन बिताउन सकून् भनेर मानिसहरूले सम्पत्ति बेचे र पैसा दिए। जब हननिया र सफीराले झूट बोले, तिनीहरू मारिए किनभने तिनीहरूको पापले पवित्र आत्माले मण्डलीमा गरिरहनुभएको अद्भुत कार्यको अनादर गऱ्यो (प्रेरित ४:३२-३५, प्रेरित ५:१-४)।

मण्डलीको एकता आत्माको जीवनद्वारा पूरा भएको हुन्छ।

मण्डली (भवन होइन, तर विश्वासीहरूको समूह) लाई “जीवित परमेश्‍वरका मन्‍दिर” भनिन्छ किनभने मण्डलीमा आत्मा एक विशेष तरिकामा बस्नुहुन्छ (२ कोरिन्थी ६:१६)। जहाँ ख्रीष्टियन एकता भएको आत्मिक मन्दिरलाई हानि पुऱ्याउने कुनै पनि व्यक्तिलाई गम्भीर न्यायको फैसला सुनाइनेछ (१ कोरिन्थी ३:१६-१७)।

► पवित्र आत्माद्वारा आफूलाई शक्तिशाली भएको दाबी गर्ने तर मण्डलीमाथि आक्रमण गर्ने र विभाजन गर्ने व्यक्तिलाई तपाईं के भन्नुहुन्छ ?

मण्डलीले मानिसहरूलाई परमेश्वरलाई सम्झन, परमेश्वरमा ध्यान केन्द्रित गर्न र परमेश्वरद्वारा परिवर्तनको अनुभव गर्न मदत गर्छ।

परमेश्वरद्वारा मण्डली रचना र सृष्टि गरिएको हो। पृथ्वीका अन्य कुनै पनि ठाउँभन्दा बढी, परमेश्वरलाई प्रेम गर्ने मानिसहरूले परमेश्वरको इच्छा जानीबुझीकन पूरा गर्ने ठाउँ नै मण्डली हो। त्यसकारण, मण्डलीले संसारलाई परमेश्वर कस्तो हुनुहुन्छ भनेर देखाउँछ।

► मण्डलीलाई हेरेर मानिसहरूले परमेश्वरबारे के-कस्ता कुराहरू देख्नुपर्छ ?

मण्डलीलाई हेरेर, मानिसहरूले परमेश्वर मायालु र दयालु हुनुहुन्छ, सबै मानिसहरूको ख्याल राख्नुहुन्छ, क्षमा दिनुहुन्छ, सत्यताको समर्थन गर्नुहुन्छ, प्रतिबद्धताहरू राख्नुहुन्छ र पापीहरूलाई प्रेम गर्दा पापलाई घृणा गर्नुहुन्छ भनेर देख्नुपर्छ।

► मण्डली परमेश्वरको बारेमा छ भनेर सम्झेर मानिसहरूले कस्ता त्रुटिहरू हटाउँछन् ?

मण्डली परमेश्वरको लागि अवस्थित भएकोले, मण्डलीको आराधना परमेश्वरमा केन्द्रित हुनुपर्छ। जब आराधना मानव अगुवाहरु वा कलाकारहरूमा केन्द्रित हुन्छ, त्यो मानव-केन्द्रित हुन्छ, जुन मूर्तिपूजा हो। गलत आराधना शारीरिक हुन्छ, जसले केही मानिसहरूलाई उच्च तुल्याउँछ र प्राकृतिक चाहनाहरूलाई आकर्षित गर्छ। गलत आराधना शैतानिक पनि बन्न सक्छ किनभने आराधकहरुले आफूलाई परमेश्वरबाट नआएका भावनाहरू र आत्माहरूको अधीनमा बसिरहेका हुन्छन्।

► एक बिद्यार्थीले समूहको लागि एफिसी ४:१-६ पढ्नुपर्छ। यस खण्डले मण्डलीको बारेमा मुख्य कुरा के भन्छ ?

पावलले विश्वासीहरूलाई एकतामा रहन आह्वान गरे। एकताको कारण यो हो कि त्यहाँ एउटै मात्र मण्डली छ, जसरी त्यहाँ एउटै परमेश्वर र एउटै सुसमाचार छ। सबै साँचो ख्रीष्टियनहरू एउटै शरीरमा हुन्छन्। त्यहाँ एउटै ख्रीष्टियन धर्म र एउटै मण्डली छ किनभने एउटै परमेश्वर हुनुहुन्छ।

एउटा विश्वव्यापी मण्डली छ भन्ने तथ्यलाई १ कोरिन्थी १२:१३ मा जोड दिइएको छ, जहाँ पावलले विश्वास गर्ने अन्यजातिहरू सबै एउटै शरीरमा आउँछन् भनी भनेका थिए।

सार भनेको आधारभूत ख्रीष्टियन विश्वासहरूको भनाई हो। प्रारम्भिक ख्रीष्टियन सारलाई “प्रेरितहरूको सार” भन्थियो जसमा “म क्याथोलिक मण्डलीमा विश्वास गर्छु” भन्ने भनाई समावेश थियो। सारमा क्याथोलिक शब्दले रोमन क्याथोलिक मण्डलीलाई उल्लेख गर्दैनथ्यो। यसको अर्थ “विश्वव्यापी” वा “पूर्ण” थियो। सारले भनिरहेको थियो कि त्यहाँ एउटै मण्डली छ जहाँ सबै ठाउँ तिर ख्रीष्टियनहरु द्वारा प्रतिनिधित्व गरिएको छ।

► एक बिद्यार्थीले समूहको लागि एफिसी २:२० पढ्नुपर्छ।

मण्डली एउटै जगमा निर्माण गरिएको छ: प्रेरितहरू र अगमवक्ताहरूले प्रकट गरेको सेवकाई र सत्यता; र येशू ख्रीष्टको सेवकाई, सन्देश, प्रायश्चित, र निरन्तर जीवन। त्यहाँ एउटै जग र एउटै मण्डली छ।

चीनमा एउटा धर्म छ जसलाई पूर्वी चट्याङ भनिन्छ। येशूको काम समाप्त भएको छ र परमेश्वरले आधुनिक समयको लागि नयाँ मसीह पठाउनुभएको छ भनी तिनीहरू विश्वास गर्छन्। नयाँ मसीह एक चिनियाँ महिला हुन् जसले नयाँ शिक्षाहरू सिकाउँछिन्।

► पूर्वीय चट्याङ धर्मका कुनैपनि व्यक्तिलाई तपाईं के उत्तर दिनुहुन्छ ?

विश्वव्यापी मण्डलीको एकताको अर्थ एउटै संगठन सम्पूर्ण मण्डली हो भन्ने होइन। संसारमा सबै ठाउँको मण्डलीको लागि परमेश्वरको उद्देश्य पूरा गर्न कुनै पनि एउटा संगठन नजिक आउँदैन येशूले आफ्ना प्रेरितहरुलाई सबै ख्रीष्टियनहरु एउटै संगठनमा भएको आशा नगर्न भन्नुभयो (मर्कूस ९:३८-३९)।

रोमन क्याथोलिक मण्डलीले परमेश्वरको सम्पूर्ण मण्डली भएको दाबी गर्दछ। मोर्मोन हरू र यहोवाका साक्षीहरू पनि यही दाबी गर्छन्।

► आफ्नो संगठन पृथ्वीमा परमेश्वरको सम्पूर्ण मण्डली हो भनी दाबी गर्ने व्यक्तिलाई तपाईं के भन्न चाहनुहुन्छ ?

स्थानीय मण्डलीले स्वतन्त्र रूपमा सिद्धान्त विकास गर्ने कुरामा स्वतन्त्र महसुस गर्नुहुँदैन। एक ठाउँमा, पावलले निर्देशनहरू दिए, त्यसपछि भने कि यो परमेश्वरको मण्डलीहरूमा यसरी गरिएको थियो (१ कोरिन्थी ११:१६)। उहाँले एउटा मण्डलीलाई भन्नुभयो कि तिनीहरूले केही सेवकहरूलाई स्वीकार गर्नुपर्छ किनभने तिनीहरूले अन्य मण्डलीहरूको प्रतिनिधित्व गर्थे (२ कोरिन्थी ८:२३-२४)। कुनै मण्डलीले अन्य सबै मण्डलीहरू भन्दा फरक सिद्धान्तहरू राख्ने निर्णय गर्नु गलत हुनेछ भनेर उनले स्पष्ट रूपमा संकेत गरिरहेका थिए।

कोरिन्थीका मण्डली आत्मिक वरदानहरूले आशिषित भएका थिए। तिनीहरूले आफैलाई स्वतन्त्र भएको सोच्न थाले, अरू कसैको कुरा सुन्नु आवश्यक थिएन। पावलले तिनीहरूको सोचाइ र अभ्यासलाई सच्याए र तिनीहरू परमेश्वरको वचनको मूल होइनन् भनेर सम्झाए; यो अरूहरूबाट तिनीहरूकहाँ आएको थियो र तिनीहरूकहाँ एक्लै आएको थिएन (१ कोरिन्थी १४:३६)। उनले आफ्नो मण्डलीमा आत्मिक रूपमा ज्ञानेन्द्रिय भएकाहरूले पावलको निर्देशनलाई परमेश्वरबाट प्रेरित भएको रूपमा चिन्नेछन् भनी बताए।

स्थानीय मण्डली स्व-शासित र स्व-पालित हुनुपर्छ; तर यसलाई सैद्धान्तिक स्थिरता, तालिमका स्रोतहरू र विश्व मिशन दृष्टिकोणको लागि विश्वव्यापी मण्डलीसँग सम्बन्ध चाहिन्छ।

आज त्यहाँ धेरै प्रकारका मण्डलीहरू र विभिन्न प्रकारका शिक्षाहरू छन्, यद्यपि तिनीहरू बाइबल को अनुसरण गर्ने दाबी गर्छन्। एउटा मण्डली विश्वव्यापी मण्डलीप्रति उत्तरदायी हुनुको अर्थ यसले वरपरका अन्य सबै मण्डलीहरूजस्तै हुने कोसिस गर्नुपर्छ भन्ने होइन। यसले ख्रीष्टियन धर्मका सिद्धान्तहरू कायम राख्नुपर्छ जुन नयाँ नियमको मण्डलीको सुरुमा अत्यावश्यक थियो। यो मण्डलीहरूको संगठनको भाग पनि हुनुपर्छ जसले एक-अर्काप्रति जवाफदेहीता प्रदान गर्दछ।

सैद्धान्तिक स्थिरताको लागि, स्थानीय मण्डलीमा तीनवटा कुरा हुनुपर्छ:

१. बाइबल नै पूर्ण अधिकार हो भन्ने यकिन

२. ऐतिहासिक ख्रीष्टियन धर्मका अत्यावश्यक सिद्धान्तहरू

३. असल ईश्वरशास्त्र भएका मण्डलीहरूको संगतिमा संगठन

यस पाठमा हामी सूचीमा दोस्रो अध्ययन गर्दैछौं। हामी अर्को पाठमा मण्डलीको सङ्गठनहरूबारे कुरा गर्नेछौं।

स्थानीय मण्डलीले प्रारम्भिक मण्डलीको अत्यावश्यक ख्रीष्टियन शिक्षाहरूको विपरीत सिद्धान्तहरू स्वीकार गर्न स्वतन्त्र महसुस गर्नु हुँदैन। ती सिद्धान्तहरू केही प्रारम्भिक सारहरूमा बताइएको छ। प्रेरितहरूको सार, निसेनको सार र चाल्सेडोनियनको सारले सुरुदेखि नै ख्रीष्टियन धर्मको लागि अत्यावश्यक सिद्धान्तहरू बताउँछ। यसमा त्रिएकका सिद्धान्तहरू र ख्रीष्ट र पवित्र आत्माको ईश्वरत्वका सिद्धान्तहरू समावेश छन्। यदि कुनै मण्डलीले ती सारका सिद्धान्तहरूलाई अस्वीकार गर्छ भने, उसले आफूलाई ख्रीष्टियन भन्नु हुँदैन, किनकि यो फरक धर्म हो।

म बिश्वास गर्दछु, एक सर्वशक्तिमान पिता, स्वर्ग र पृथ्वी सृष्टि गर्नुहुने माथि, जसले सबै दृश्य र अदृश्य थोकहरु बनाउनु भयो।

र एक पुत्र प्रभु येशू ख्रीष्ट माथि, परमेश्वरको एक मात्र पुत्र , सारा संसारका एक मात्र पिता, प्रभुका प्रभु, ज्योतिको पनि ज्योति, सत्य परमेश्वरका सत्य प्रभु, एक मात्र नबनाईएका, परमेश्वरको एउटै स्वरुपमा बनिएका, सबै थोकहरु उहाँ द्वारा बनिए, जो हामी मानिसहरुका लागि र मुक्तिको निम्ति स्वर्गबाट तल ओर्लनुभयो। पवित्र आत्माद्वारा कन्या मरियमको कोखमा गर्भधारण हुनुभयो र मानवको रुपमा जन्मनुभयो। जो पन्तियस पिलातसद्वारा कुसमा टागिनुभयो, दुख र कष्ट भोग्नुभयो र गाडिनुभयो र तेश्रो दिनमा मरेकाहरुबाट बिउँतनुभयो र धर्मशाश्त्र अनुसार स्वर्गमा उचालिनुभयो र परमेश्वरको दाहिने हातपट्टि बिराजमान हुनुहुन्छ र उहाँ फेरि महिमाका साथ जिउँदा र मरेकाहरुको न्याय गर्नलाई आउनुहुनेछ, जसको राज्यको कहिल्यै अन्त्य हुँदैन।

र म बिश्वास गर्दछु, पवित्र आत्मा परमेश्वर माथि, जसले जीवन दिनुभएको छ, जो पिता र पुत्रद्वारा अभिप्रेरित हुनुहुन्छ। जो पिता र पुत्रसँगै महिमित र आराधनाको योग्य हुनुहुन्छ। जुन कुरा अगमबक्ताहरुद्वारा पनि घोषित गरियो।

र म बिश्वास गर्दछु , एक पवित्र विश्वमण्डली र प्रेरितीय मण्डलीमाथि। पापमोचनको निम्ति एकमात्र बप्तिष्मा मैले स्वीकारर गर्दछु र मृतकको पुनरुत्थान र संसारको आउने जीवनको निम्ति म हेर्दछु।

यदि कुनै व्यक्तिले निसेनको सारको कुनै एउटा भनाइसित सहमत नभएको निर्णय गर्छ भने के हुन्छ ? किनभने यी सिद्धान्तहरू मण्डलीले सुरुदेखि नै पालना गर्दै आएको छ, यदि उसले एउटालाई अस्वीकार गर्छ भने, उसले आफुसँग सत्यताको बुझाइ भएको दाबी गरिरहेको छ जुन मण्डलीसँग २,००० वर्षदेखि थिएन। यदि कुनै मण्डली वा व्यक्तिले प्रेरितहरूको सार, निसेनको सार र चाल्सेडोनियनको सारको सिद्धान्तहरू थामी राख्दैन भने, तिनको सिद्धान्तलाई विश्वास गर्नु हुँदैन। सारका सिद्धान्तहरूले सुसमाचारलाई समर्थन गर्दछ। यदि कुनै व्यक्तिले सारको सिद्धान्तलाई अस्वीकार गर्छ भने, उसले सुसमाचारको खण्डन गरिरहेको हुन सक्छ।

► कुनै पनि व्यक्तिले म ईसाई हुँ भन्छ तर निसेनको सारको भनाइसित असहमत हुन्छ भने तपाईं के भन्नुहुन्छ ?

१. एक स्थानीय मण्डली भनेको विश्वासीहरूको समूह हो जसले एक विशेष स्थानमा मण्डली हुन एकसाथ प्रतिबद्ध हुन्छन्।

२. मण्डलीले संसारलाई परमेश्वरको स्वभाव देखाउँछ।

३. आत्माको जीवन नै मण्डलीको जीवन र एकता हो।

४. मण्डलीको सदस्यता परमेश्वरसँगको सम्बन्ध र विश्वासीहरूको समूहप्रतिको प्रतिबद्धतामा आधारित हुन्छ।

५. त्यहाँ एउटा ख्रीष्टियन धर्म पछ्याउने एउटा विश्वव्यापी मण्डली छ किनभने मण्डली एउटै परमेश्वरको बारेमा हो।

६. कुनै पनि मानव संगठन पृथ्वीमा परमेश्वरको सम्पूर्ण मण्डली होइन।

७. एउटा स्थानीय मण्डलीले विश्वव्यापी मण्डलीका आवश्यक, ऐतिहासिक सिद्धान्तहरू कायम राख्नुपर्दछ।

१. पाठ १ को लागि सात सारांश भनाईहरू कण्ठ गर्नुहोस्। सात सारांश भनाईहरू (सात अनुच्छेदहरू) मध्ये प्रत्येकको अर्थ र महत्त्व को व्याख्या गर्दै एक अनुच्छेद कसैलाई लेख्नुहोस् जो तपाईको कक्षामा भाग लिएको छैन। अर्को कक्षा सुरु हुन अगाडी नै यो कार्य तपाईको कक्षा अगुवालाई बुझाउनु होला। छलफलको समयमा कक्षा अगुवाले तपाईंलाई सोध्नुभयो भने समूहलाई अनुच्छेद बाँड्न तयार हुनुहोस्। अर्को कक्षा सत्रको सुरुमा सम्झनाबाट भनाईहरू लेख्नुहोस्।

२. यस पाठश्रृङ्खलाको क्रममा, तपाईंले तपाईको कक्षामा भाग नभएको व्यक्ति वा समूहलाई पाठ, वा पाठको अंश सिकाउनु पर्नेछ। तपाईं कुन सामग्री सिकाउने हो छनौट गर्न सक्नुहुन्छ। तपाईंले विभिन्न सामग्रीको साथ, यो तीन पटक गर्नु पर्छ। आफ्नो शिक्षण अवसरहरूको तालिका आफैं बनाउनुहोस् र पढाएपछि कक्षाको अगुवालाई प्रतिबेदन दिनुहोस्।