Lesson 4: Қауым бірлестіктері

Жетекшіге ескерту: Материал осы сабаққа дайындалу үшін қажет.Бұл сабақта қауымдар мен олардың бірлестіктері арасындағы қатынастар қарастырылады. Егер студенттер бірлестіктердің (конфессиялардың) құрамына кіретін қауымдардың құрамында болса, танысу үшін жетекші олардан бірлестік мүшелеріне қойылатын талаптардың көшірмесін сұрауы керек.

► Сіздің қауым кіретін қауым бірлестігі қалай аталады?

Сенушілер басқа жергілікті қауымдардан келген мәсіхшілермен кездескенде, олардың басында неге олардың сенім негіздері мен тәжірибелерінде айырмашылықтар бар деген сұрақ туындайды. Олар қауымдар арасында ілімдік айырмашылықтардың бар екенін және ғибадат ету стильдері де әртүрлі екенін байқайды.

Қауымдастық мүшесі өзінің қауымынан тыс діни бірегейлікті іздеуі мүмкін. Ол өз қауымдастығын бірдей ілімдерге сенетін, сонымен бірге бір-бірімен ынтымақтастықта болып, қарым-қатынас жасайтын қауымдар одағының бір бөлігі ретінде көргісі келуі мүмкін. Ол өзінің қауымдастығының осындай сенім мен тәжірибелерді ұстанатын әлемдегі жалғыз қауым емес екенін түсінгісі келуі мүмкін.

► Бір немесе бірнеше студенттен өзара ұқсас қауымдар арасындағы қарым-қатынастың қандай пайдасы бар екені туралы ойларымен бөлісулерін сұраңыз.

Бірінші сабақта біз келесі мәлімдемені зерттедік:

«Қауымдағы ілімдік тұрақтылықты сақтау үшін үш аспект болуы керек:

1. Киелі кітаптың абсолюттік билікке ие екеніне сену.

2. Іргелі ілімдер алғашқы қауым сенімдеріне негізделген.

3. Қарым-қатынас шынайы теологиясы бар қауымдар арасында жүзеге асырылады».

Бұл сабақта ілімдік тұрақтылықтың үшінші аспектісін қарастырамыз.

Қауым бірлестігінің анықтамасы:

Қауым бірлестігі дегеніміз – ортақ сенімге ие, ортақ мақсаттарға қол жеткізуге бағытталған және ортақ қарым-қатынастың қандай да бір түрін қолдайтын орталық басшылығы бар қауымдар тобы.

Бірлестікті оны ұстап тұрған элементтердің күші негізінде әлсіз немесе күшті деп атауға болады.

Әлсіз бірлестіктерде орталық басшылықтың жергілікті қауымда жоғары беделі жоқ; жалпы сенім негіздерінің тізімі қарапайым және өте қысқа болуы мүмкін, ал ортақ мақсаттар қауымдастықтың белсенді қатысуын қажет етпеуі мүмкін; бірлестіктің мүшелері, қауым өкілдерінің кездесулері өте сирек өтеді. Мұндай бірлестіктерде әр қауымдастық өзінің қауым меншігінің иесі болып табылады және кез-келген уақытта бірлестіктен шығу туралы шешім қабылдай алады. Кейбір қауымдар, егер бірлестік енді олардың қажеттіліктерін қанағаттандырмайды деп ойласа, одан тез шыға салады.

Әлсіз бірлестік мүшелері әдетте жергілікті қауымның дербестігін ерекше атап өтеді. Олар бірлестіктің жергілікті қауымдастықты басқарғанын қаламайды, сондықтан оның билігін жайлап шектейді. Бірлестікті «әлсіз» деп атау оның мақсатты орындамайтынын білдірмейді. Мұндай бірлестіктің мүшелері орталық биліктің әлсіз болғанын және биліктің жергілікті қауымдарға берілуін қалайды.

► Әлсіз қауымдастықтардың жағымды және жағымсыз жақтары қандай деп ойлайсыз?

Күшті бірлестіктерде жергілікті қауымдардың басшыларын басқаратын жетекшілер нақты күшке ие; ортақ сенім негіздерінің тізімі көптеген аспектілерді қамтиды. Қауымдар ортақ мақсаттарға атсалысып, бір-бірімен жиі қарым-қатынаста болады. Қауым меншігі бірлестікке тиесілі болуы мүмкін, сондықтан қауым бірлестіктен шыға алмайды.

Күшті бірлестіктердің мүшелері мәселелерді орталық жетекшілердің көмегімен шешуге ұмтылады және бірлестікке жергілікті қауыммен бірдей деңгейде бағышталуға баса назар аударады.

[1]Әртүрлі қауым бірлестіктері бар. Қауым бірлестігі күшті немесе әлсіз бірлестіктің барлық белгілеріне ие болуы мүмкін, бірақ белгілі бір сипаттамалардың болуына байланысты әлсіз немесе күшті деп жіктеледі. Күшті бірлестіктер көбінесе «деноминациялар» деп аталады.

► «Күшті» бірлестіктердің қандай жағымды және жағымсыз жақтары бар деп ойлайсыз?

► Сіз қандай қауым бірлестіктерін білесіз? Сіз оларды қалай сипаттайсыз?

Күшті бірлестікті деноминация деп атауға болады. Бұл оның күшті деноминацияның барлық сипаттамаларына ие болатынын білдірмейді, бірақ ол әлсіз дегенге қарағанда күшті деген сипаттамаға көбірек сәйкес келеді.

Ықпалды, беделді деноминация жергілікті қауымдарға қызмет ету үшін болып табылады. Олардың көпшілігі жалғыз жасай алмайтын тапсырмаларды бірге орындауға көмектеседі.

1. Ол басқа қауымдардан айырмашылығымен даралық сезімін қамтамасыз етеді. Жергілікті қауымның мүшелері сол жердегі басқа қауымдардан ерекшеленетінін біледі; ортақ ілімдерді ұстанатын қауымдар тобының құрамына кіретіндіктері оларды жігерлендіреді.

2. Ол ілімдерді бекітеді. Жергілікті қауым ешкімді тыңдамай, өз ілімдерін өзгертуге немесе дамытуға еркін болмауы тиіс. Деноминациялар мәсіхшіліктің тарихи негізгі ілімдерін ұстануы керек, сонымен бірге оның егжей-тегжейлі ілімдері киелі кітапқа сәйкес болуы керек.

3. Ол бағушылар мен қауым мүшелеріне қойылатын талаптарды белгілейді. Деноминация бағушылар мен қауым мүшелері мәсіхшілік өмірдің үлгісі бола алатын стандарттарды белгілеуі керек. Талаптардың негізі – Тімотеге 1-хат 3-тарау және Титке хат 1-тарау берілген сипаттамалар, бірақ олар әр заманауи мәдениетке қатысты талқылануы керек.

4. Ол қауымды басқару жүйесін қамтамасыз етеді. Деноминация жауапкершілікті сақтау және жергілікті қауымды адамдарды лауазымға тағайындау жүйесімен қамтамасыз етуі тиіс.

5. Ол бағушыларды оқыту үшін жағдай жасайды. Қауымдардың көпшілігінде болашақ бағушыларды дайындауға ресурстар мен материалдар жоқ; деноминация қол жетімді және тәжірибеге бағдарланған оқыту бағдарламасын құруы тиіс.

6. Ол қауымға бағушыларды табуға көмектеседі. Қауымы жоқ бағушылар мен бағушылары жоқ қауымдар деноминацияның жетекшілерінен көмек ала алады. Жақсы жетекші жергілікті қауымның адал жетекшілерінің шешімдерін құрметтейді.

7. Ол жергілікті қауымдарға дағдарыстық жағдайларда жетекшілікті қамтамасыз етеді. Егер жергілікті қауымда қандай да бір мәселелер бойынша бөлініс болса немесе қауымдастықта сенімді жетекшілер болмаса, онда деноминация жетекшілері көмекке келеді.

8. Ол жаңа қауымдарды орнатудағы қауымдар мен миссияларды басқарады және қолдайды. Қауымдар тобының жалпы миссионерлік аян-мақсаты болуы керек. Олар ресурстарын біріктіріп, миссионерлік мақсаттарға жетуде адамдарға қолдау көрсетеді.

[1]9. Бұл жергілікті қауымнан гөрі кеңірек деңгейде қарым-қатынасты қамтамасыз етеді. Қауым мүшелері деноминациядағы басқа қауымдардың мүшелерімен уақыт өткізуге шақырылады.

10. Ол жалпы іс-шараларды ұйымдастырады және қауымдарды бірге жинайды. Деноминация қауымдардың қарым-қатынаста болуына және ортақ мақсаттар қоюына көмектесетін конвенциялар мен конференцияларды ұйымдастыруы керек.

11. Ол кеңес беру және жігерлендіру үшін деноминацияның құрамындағы қауымдарға жетекшілерді жібереді. Бірлестіктің жетекшілерінің бірі қауымдарға жылына кемінде бір рет баруы керек.

12. Ол жергілікті қауымның қызметіне қаржылық қолдауды қалай дамыту керектігі туралы кеңес береді. Бірлестік жергілікті қауымның әлеуетін дамытуға және оны қаржылық жетілуге бағыттауға көмектесуі керек.

Егер деноминация осы мақсаттарға дұрыс қызмет етсе, бұл қауымдардың өз мақсаттарына жету үшін құнды көмек бола алады. Жергілікті қауымдардың көпшілігі өздеріне жүктелген міндеттерге жалғыз қол жеткізе алмайды; деноминация жетекшілері жергілікті қауымдарға қызмет ету – олардың басты міндеті екенін есте ұстауы керек.

► Бірлестіктің оған кіретін қауымдарға көмектесу мүмкіндігін қарастырғаннан кейін, келесі сұрақты түсінуге тырысайық: егер әлсіз қауым бірлестігінің мәселелерін ескермесе, оның қандай артықшылықтары бар?

► Егер қауым әлсіз жақтарын ескермесе, мықты қауым бірлестігінің артықшылықтарын қалай пайдалана алады?

Бұл тізім барлығына бірдей болмайды, бірақ онда әдетте деноминация өз қауымдарынан нені талап ететіні жалпы сипатталады.

Жергілікті қауым келесідей бағышталады:

1. Деноминацияның ілімдік ұстанымдарын қабылдау, ілімдерді үйрету және қарама-қайшы ілімдердің қауымда таралуына жол бермеу.

2. Қауым мүшелеріне дұрыс мәсіхшілік өмір сүруді үйрету және оны талап ету.

3. Конвенциялар мен басқа да шараларға қатысу және мүмкіндігінше қаржылай қолдау.

4. Қауым қызметіне қатысу, тәубеге келгендер саны, қызметкерлер мен кірістер туралы нақты жылдық есепті ұсыну.

5. Басқа қауымдастықтармен және деноминация жетекшілерімен бірлікті сақтау; түсініспеушіліктерді киелі кітаптық жолмен шешу.

6. Дәл осындай бағышталуды талап ететін басқа ұйымға кірмеу.

Егер бірлестікке кіретін қауымның студенттері болса, онда бірлестіктегі қауымдарға қойылатын талаптарды қарастыруға бірнеше минут бөліңіз.

► Сіздің бірлестіктеріңіз халықаралық миссионерлік ұйымның негізінде құрылды ма? Солай болса, қауымдар мен миссионерлік ұйым арасындағы қатынасты сипаттаңыз.

Кейде қауымдар халықаралық миссионерлік ұйыммен қарым-қатынаста болады. Миссия қауымдарды ұйымдастыра алады немесе бұрыннан бар қауымдар миссиямен ынтымақтаса алады. Миссиямен байланысты қауымдар бірлестік құрады.

Басында шетелдік миссионерлер елде тұрып, бірлестіктің жетекшісі бола алады. Уақыт өте келе бірлестіктің басшылығы жергілікті бағушыларға ауысады. Миссияның мақсаттарының бірі – шетелдік миссионерлер қауым бірлестігін тікелей басқармауы үшін – жергілікті жетекшілерді дамыту болуы керек.

Бірлестіктің жергілікті жетекшілері пайда болған кезде ұйымның үш деңгейі болады: миссия жетекшілері, бірлестік жетекшілері және жергілікті қауымның бағушылары. Бірлестік жетекшілері тікелей жергілікті қауымдардың жетекшілерімен жұмыс істейді, ал миссия басшылары негізінен бірлестік жетекшілерімен жұмыс істейді.

Кейбір миссиялар қауымдардың күшті бірлестігін құратын ықпалды орталық басшылықты қамтамасыз етеді; ал басқалары әлсіз бірлестікке билік орнатпай-ақ, оған белгілі бір көмек көрсетеді.

Егер үш деңгей арасындағы қарым-қатынаста оларды құруға нақты басшылық болмаса, көптеген болжамдар мен түсініспеушіліктер орын алады. Кейде қауымдағы адамдар бірлестік жетекшілеріне жүгінудің орнына, қажеттіліктерін шешу үшін миссияның жетекшілерімен байланысады, өйткені олар миссияның ресурстары көбірек деп санайды. Миссия жетекшілері кейде бірлестіктің жетекшілерімен сөйлеспей, тікелей қауымдармен жұмыс істейді. Бұл бірлестік жетекшілерін шатастырады, өйткені бұл жағдайда олардың рөлі айқын болмайды.

Алдыңғы бөлімде біз деноминацияның жауапкершілік түрлерін қарастырдық. Миссия құрған қауымда бірлестік жетекшілері мен миссия басшылары бір-бірімен бірге қызмет ету арқылы өз міндеттерін орындайды. Уақыт өте келе бірлестік жетекшілері көбірек жауапкершілікті өз мойындарына алулары керек. Жетілген бірлестіктің мінсіз жағдайының көрсеткіші – бұл оның миссияның көмегінсіз сәтті жұмыс істеуі.

1. Қауым бірлестігі жергілікті қауымдастықтың тұрақты болуына көмектеседі.

2. Бірлестік орталық басшылықтың қаншалықты күшті екеніне байланысты әлсіз немесе күшті болуы мүмкін.

3. «Әлсіз» бірлестіктің мүшелері жергілікті қауымдардың дербестігін ерекше атап өтеді.

4. «Күшті» бірлестіктің мүшелері жергілікті қауымға бағышталумен қатар, бірлестікке бағышталуға баса назар аударады.

5. Қауым қатты бағышталуды қажет ететін бірлестікте бола отырып, басқа бір деноминацияның құрамында бола алмайды.

6. Деноминация қауымдарға бірге қызмет ету арқылы мақсаттарына жетуге көмектесу үшін бар.

7. Халықаралық миссия біртіндеп жауапкершілікті бірлестік жетекшілеріне беруі керек.

1. 4-сабақ бойынша Жеті қорытынды ұстанымды есте сақтау керек. Студенттер жеті қорытынды ұстанымның әрқайсысына (барлығы жеті абзац) түсініктеме жазып, олардың мәні мен маңыздылығын тақырыппен таныс емес адамдарға түсіндіре алатындай етіп жеткізулері керек. Жазбаша жұмыс келесі сабаққа дейін жетекшіге тапсырылуы тиіс. Талқылау кезінде жетекші сұраса, студенттер топқа белгілі бір пункттер бойынша орындалған тапсырмалардың нұсқаларымен бөлісуге дайын болу керек. Келесі сабақтың басында студенттер есте сақтау қабілеті бойынша, жеті қорытынды ұстанымды жазу керек.

2. Cтудент сабақты немесе сабақтың бір бөлігін топтан тыс адамдарға өткізуді жоспарлауы керек. Сабақты өткізген сайын студент бұл туралы жетекшіге есеп беруі керек.

3. Тест: келесі сабақтың басында студенттер есте сақтау қабілеті бойынша, кем дегенде, деноминациялық жауапкершіліктің 10 түрін және жергілікті қауымның бірлестікке бағышталуының 5 белгісін жазуы керек.