Lesson 8: Жергілікті қауымды қаржылық қолдау

► Жергілікті қауымдастық неге қауымды қамтамасыз етуі керек? Төмендегі тізімді қарастырмас бұрын, өзіңіз бірнеше нұсқа келтіріңіз.

1. Иса белгілі бір жердегі қызмет дұрыс басталуы керек екенін көрсетті. Ол шәкірттерінің қызметі Ізгі хабарға қызығушылық танытатын және көмектесуге дайын адамдар тобын тартуы үшін, оларды ақшасыз жіберді.

2. Құдай Жаңа Келісім қауымына нұсқау берді. Олар Иерусалимдегі алғашқы қауымға қолдау жіберулері (Қорынтт. 1-хат 16:1-3; Қорынтт. 2-хат 8:1-7, 9:1-6), жесірлер мен басқа да мұқтаж адамдарға қамқорлық көрсетулері (Тімотеге 1-хат 5:16; Жақыптың хаты 1:27, 2:15-16), сондай-ақ, қызметке толық қатысатын адамдарды қолдаулары (Ғалатт. хат 6:6) тиіс болды.

3. Құдай әрбір қауым өз орнында Мәсіхтің денесі болу үшін, оны жабдықтайды (Қорынтт.1-хат 12:27). Бұл жетілген қауым шешім қабылдап, өзінің қызметі үшін аян-мақсат қоя алады дегенді білдіреді. Егер қауым қаржылық жағынан тәуелді болып, сыртқы жетекшілердің нұсқауларын күтетін болса, жетілген қауым ретінде қызмет ете алмайды. Қауымның жетілуіне жергілікті қауымдастықтың қолдауы қажет.

4. Құдай ондық беретін адамдарды қаржылай баталайды. Ондықты бермейтін адамдардың қаржысы қарғысқа ұшырайды (Малахи 3:8-10).

5. сыртқы қаржыландыруға тәуелділік жергілікті қауымды осал етеді. Ұлттық және Халықаралық экономика тұрақсыз. Егер шетелдік демеушілер ақша беруді тоқтатса, оларға тәуелді қауым зардап шегеді.

6. бағушыларды олар қызмет ететін адамдар қолдауы керек (Ғалатт. хат 6:6). Жергілікті қауымдастық бағушының адал немесе адал емес екенін: ол қызметке өзін қаншалықты арнайтынын және қанша уақыт пен күш жұмсайтынын біледі. Бағушы қауымнан тыс адамдардан ұзақ мерзімді қолдау алмауы керек.

► Егер қауым шетелдік қаржыландыруға тәуелді болса, қандай мәселелер туындауы мүмкін?

Халықаралық миссия немесе деноминация қауымдарға көмек көрсетудің белгілі бір қағидаларын ұстануы керек. Ұйымдар қауымдарды тәуелдендірмей, күшті ету үшін оларға абайлап көмек көрсетулері керек. Төменде деноминацияларда болуы мүмкін ережелердің мысалдары келтірілген.

1. Ондық туралы мәсіхшілік қаржыландырудың негізі ретінде айту. Егер қауымдастық ондық бермесе, Құдай қауымның қаржысына батасын бермейді. Егер қауым мүшелері қолдарынан келгеннің бәрін қазір жасамаса, онда олар қызметті қаржыландыру туралы қате түсінікке ие. Сырттан келетін көмек жағдайды одан сайын нашарлатуы мүмкін.

2. Тек қаржы берудің орнына, тұрақты табыс әкелетін жобалар ұйымдастыру. Ұйым қауымның шетелдік қаржыландыруға тәуелді болмай, қаржылық жағынан мықты болуға көмектесетін жобаларға ақша жұмсауы керек. Егер қауым бірлестігі қауымға айлық жалақы беретін болса, онда ол өзін-өзі қамтамасыз ету үшін қауымға қалай көмектесуге болатындығы туралы ойлануы керек.

3. Жергілікті қауым ешқашан қаржыландыра алмайтын қызметтерді бастамау. Ұйымдар барлық уақытта сыртқы қаржыландыруға тәуелді болатын жобаларды бастамауы керек. Мақсат – жергілікті қауымға тиесілі болатын және онымен қаржыландыратын қызметті немесе кәсіпорындарды ұйымдастыру. Мысалы, мектеп жергілікті қауымның қызметі болуы мүмкін.

Жергілікті қауымдастық қаржыландыра алмайтын кез-келген қызмет қысқа мерзімді, тәуелділік тудырмайтындай, тез арада мақсатқа жететін болуы керек (мысалы, конференциялар мен семинарлар).

4. Жергілікті қауымның жетекшілігін елемей қоймай, керісінше күшейту. Сырттан келген немесе жоғары дәрежелі жетекшілер жергілікті қызметкерлерге қарамай, көмек көрсеткен кезде, бұл қызметкерлер тиімсіз деген сияқты әсер қалдырады. Қауымдағы адамдарға тікелей қаржы берудің орнына, ұйым қауым жетекшілеріне қауымдастықтың қажеттіліктерін қанағаттандыруды үйретуі керек.

► Қызметке көрсетілетін дұрыс емес көмектің қандай мысалдарын білесіз? Дұрыс көмектің қандай мысалдарын кездестірдіңіз?

Қауым «көмек индустриясын» құру арқылы өзінің басымдықтарынан алшақтамауы керек. Көмектесуге дайын адамдар мен ұйымдар бар, бірақ олардың мұқтаж адамдармен тікелей байланыстары болмайды, сондықтан «көмек ұйымдары» құрылады. Бұл демеушілерден ресурстар жинайтын және оларды тарататын құрылымдар. Кейде мұндай ұйымдардың әкімшілігі жиналған қаржыдан жалақы алады. Бұл жағдайда әділетсіздік жағдайлары да кездеседі. Содан кейін демеушілер де, қолдау көрсететілетін адамдар да алданады. Көмек белгіленген мақсатқа сай көрсетілсе де, мәселелердің бірі – мұндай ұйымдар адамдардың нақты қажеттіліктерін түсінудің орнына, демеушілердің көңілін табуға тырысады.

Қайырымдылық ұйымдары әдетте жергілікті қауымдарды айналып өтеді. Бұл қауымның көмек алатын адамдармен қарым-қатынасын елемейтін етіп береді. Алайда қайырымдылық қауым арқылы – адамдардың жағдайын білетін жетекшілер арқылы және қауымның маңыздылығын дәріптейтін жолмен көрсетілсе, жақсы нәтиже береді.

Егер ұйым кедейлердің негізгі (тамақ сияқты) қажеттіліктерін өмірлік жағдайларының өзгеруіне ықпал етпестен қанағаттандыратын болса, бұл мұқтаждарда тәуелділік тудырады. Жеткілікті ресурстарға ие бола отырып, олар тәуелді адамдардың үлкен қауымдастығын құруы мүмкін. Егер олар мұны ұзақ уақыт жалғастырса, олар тұтынушылардың жаңа ұрпақтарын өсіреді.

Қызмет көмек индустриясының бір бөлігіне айналмауы және өзінің негізігі басымдықтары туралы ұмытпауы керек. Егер жоғарыда айтылғандай жасайтын болса, онда бұл қауымға да, мұқтаж адамдарға да зиянын тигізеді.

► Көмек индустриясының қандай мысалдарын көрдіңіз және олардың нәтижелері қандай болды?

► Студенттердің біріне дауыстап Заңды қайталау 18:1-5 оқуды ұсыныңыз. Бұл үзіндіде қызметті қаржылық қолдау туралы не айтылады?

[1]Барлық уақыттарын қауымға арнаған қызметкерлерді қаржылық қолдау – Көне Келісімде ғибадат формасын құрған кезден бастап Құдайдың жоспары болды. Ғибадатта жұмысы үшін қызметкерлерге қолдау көрсетілді. Леуіліктер өз мұралық үлестерін алмады, өйткені олар оны өңдеуге қатыспаулары керек болды.

Алайда, Исраил халқы ғибадатқа деген адалдықтан тайынған кезде, діни қызметкерлерді қаржыландыру да қысқарды. Исраилдің сенімсіздігінің белгісі – қызметкерлердің киелі үйден кетіп, өмір сүру үшін жұмыс іздеуге мәжбүр болғандығы болды (Нехемия 13:10).

► Студенттердің біріне дауыстап Қорынтт. 1-хат 9:1-14 оқуды ұсыныңыз. Бұл үзіндіде қызметті қаржылық қолдау туралы не айтылады?

Пауыл Ізгі хабарды уағыздаушылар қызметтері үшін қаржылық қолдау алу керектігі – Құдайдың жоспары екенін айтты, Көне Келісім жүйесінде сияқты (Қорынтт. 1-хат 9:13-14).

Пауыл бірнеше мысалдарды қолданды. Астық бастырушы өзі өсіретін астығымен күн көреді. Малшы малының сүтін ішеді. Жауынгер өз жалақысын өзі төлемейді.

Елші «бағушы барлық назарын қызметке аударуы керек» дейді. Ол үшін ең жақсы әдіс – басқа жұмыс орындарынан кету (6-аят). Елші «қызмет бағушының әйелі мен балаларын да қамтамасыз етуі керек» дейді (5-аят).

► Студенттердің біріне дауыстап Тімотеге 1-хат 5:17-18 оқуды ұсыныңыз. Бұл Жазба үзіндісінде қызметті қаржылық қолдау туралы не айтылған?

Елші жетекшілердің ерекше құрметке лайық екенін баса айтады. 18-аяттан біз қаржылық қолдаудың құрмет екенін білеміз.

► Студенттердің біріне дауыстап Ғалатт. хат 6:6 оқуды ұсыныңыз.

Қызметтен пайда көретін адам оны қаржыландыруға көмектесуі керек.

Бірінші ғасырдан бастап бүгінгі күнге дейін қауымдардың көпшілігі үйлерде жиналатын шағын топтардан басталды. Алғашқы 200 жыл ішінде қауым ғимараттары болған жоқ, бірақ соған қарамастан мәсіхшілік тез таралды. Кейбір қалаларда мыңдаған адамдар қауымдық қарым-қатынас құрамында болды, бірақ олар кішкентай үй топтарында кездесті.

Пауыл саяхаттап, Ізгі хабар таратып жүрген кезде, оның басты міндеті – әр жерде қауымдар отырғызу болды. Оның әдісі бағушыларды тағайындауды қамтыды (Елшіл. істері 14:23; Титке хат 1:5). Қауым жетекшісі сол жерде өмір сүріп, оның бір бөлігі болған адам болды.

Бағушы әдетте өз қызметін қаржылық қолдаусыз бастайды. Ол миссионерге көмектеседі немесе миссионерлер болмаған кезде Ізгі хабарды өзі уағыздай бастайды, өйткені оның көмектесуге деген құлшынысы болады. Ол рухани дарындары мен қызмет ету қабілеттерін қызметте қолданады және мұны ақы үшін емес, рухани ниетпен жасайды.

Сенушілер тобы құрылған сайын, бағушының міндеттері артып, оларды орындау көп уақытты ала бастайды. Топ өз уақытын қызметке арнауы үшін бағушыны қаржылай қолдау керек екенін көруі керек. Қолдау алдымен толықтай болмауы мүмкін, бірақ біртіндеп артуы тиіс.

► Бағушы болғысы келетін, бірақ қаржылық қолдауды күтетін адамға не айтар едіңіз?

Пауыл бағушыларды қаржыландыру – Құдайдың жоспары екенін түсіндірді, бірақ ол кейде өз қызметінде ерекше жағдайлар жасады. Кейбір жерлерде ол өзін қамтамасыз ету үшін жұмыс істеді (Салониқал. 1-хат 2:9; Салониқал. 2-хат 3:8).

Қауым жаңадан құрылған кезде, өзінің бағушысын толықтай қамтамасыз ете алмауы мүмкін. Миссионер Ізгі хабарды уағыздау үшін жаңа жерге барғанда, толықтай қамтамасыз етілмеуі мүмкін. Сондықтан уағыздаушы Құдайдың уағыздауға деген шақыруына мойынсұнып, ергісі келетін адам болуы керек. Ол мұны тіпті оған ақы төленбесе де жасайды, өйткені бұл қызмет шын жүрекпен істеледі.

Егер бағушы өзін-өзі қамтамасыз ету үшін жұмыс істегісі келмесе және қаржылық қолдаусыз уағыздағысы келмесе, онда оның бойында Құдайдың тиісті сүйіспеншілігі жоқ. Кейбір адамдар ақша алу үшін, Құдай үшін жасамайтын нәрсені жасайды. Біз Құдай үшін бәрін жасауға дайын болуымыз керек. Егер бағушы өзін жұмыс істеуге және өзін-өзі қамтамасыз етуге тым маңызды деп санаса, ол Пауылдың мысалын еске түсіруі керек. Одан асқан миссионер болған емес және елші өзінің қызметін орындау үшін қажет нәрсенің бәрін жасауға дайын болды.

Пауыл Құдай оны шақырғандықтан Ізгі хабарды уағыздағанын айтты. Ол Ізгі хабарды Иемізге ұнамды болу үшін таратты. Уағыздаушының ерекше міндеті бар және егер ол мойынсұнбаса, оны Құдай айыптайды (Қорынттық. 1-хат 9:16-17).

► Бағушының өз қызметін орындау үшін қандай уәжі болуы керек?

Елші Петір бағушы отарға оларды тамақтандыруға және қорғауға деген ықыласпен қарау керек, ал ақша оның басты мақсаты болмауы керек деді (Петірдің 1-хаты 5:1-2).

Димас елші Пауылдың көмекшісі болды, бірақ ол осы дүниені жақсы көріп, Пауылды тастап кетті (Тімотеге 2-хат 4:10). Димастың қандай артықшылығы бар болғанын елестетіп көріңіз – ол Пауылмен бірге қауымның бірінші буынында қызмет етті! Бірақ ол бай болғысы келгендіктен бәрін тастап кетті. Кейбір бағушылар әлемді Құдайдан гөрі қаттырақ жақсы көреді. Олардың белгілі бір бөлігі қауымнан кетеді, ал басқалары әлемде бағаланатын нәрселерді алу үшін қызметті пайдаланады.

Жалған тәлім берушілердің сипаттамасы – олар барлығын тек ақша үшін жасайды (Титке хат 1:11; Петірдің 2-хаты 2:3).

► Студенттердің біріне дауыстап Қорынтт. 2-хат 12:17-18 оқуды ұсыныңыз. Осы үзіндіден Пауыл мен Тит туралы не білеміз?

► Студенттердің біріне дауыстап Філіпіл. хат 2:19-22 оқуды ұсыныңыз. Осы үзіндіден Тімоте туралы не білеміз?

Пауыл бізге Құдайға деген сүйіспеншіліктің негізінде қызмет етудің үлгісін көрсетті; Тімоте мен Тит оның үлгісімен жүрді (Филіпіл. хат 2:19-22; Қорынтт. 2-хат 12:17-18).

Жергілікті қауымда қаржылық есеп беруді құру маңызды. Елші Пауыл біз үшін осы салада үлгі болды. Ол бір қауымдастықтан екіншісіне беру үшін ақша жинағанда, ештеңе жасырын түрде жасалмағанын растайтын куәгерлер болды (Қорынтт. 2-хат 8:20-21).

Көптеген адамдар ақшаны басқаратын адамдарға сенбейді, олар қаржыны ұрлауы мүмкін деп күдіктенеді. Олар сонымен қатар көптеген бағушылар тек ақша үшін қызмет етеді деп сенеді. Жергілікті қауым үшін олардың бағушысына сенуге болатындығын дәлелдейтін қаржылық есеп беру жүйесін құру өте маңызды.

► Қауым қандай жолмен қайырымдылықтың адал пайдаланылатынын көрсете алады?

Дұрыс қаржылық есептілік үшін қайырымдылықты бір адам емес, бірнеше адам жинап, санауы керек. Бағушыдан басқа біреу жиналған ақшаның қалай жұмсалғаны туралы есеп жүргізуі керек.

Кейбір қауымдастық жетекшілері барлық жиналған ондықтар оларға тиесілі деп айтады. Киелі кітап мұны растамайды: ондық көптеген мақсаттарда қолданылды (Заңды қайталау 26:12).

Бағушы ондық пен қайырымдылықты қауымның қызметіне қамқорлық жасай алатындай етіп үлестіруге көмектесуі керек. Егер қаржыны адал пайдаланатынын көрсе, қауымдастық көбірек беруге дайын болады.

1. Жаңа жердегі қызмет дұрыс адамдарды тартуы үшін Ізгі хабарды басымдыққа айналдыруы керек.

2. Жетілген қауым сырттан қаржыландыруға немесе сырттан жетекшілікке тәуелді болмайды.

3. Ұйымдар қауымдарға жергілікті қаржыландыруды әлсіретпейтіндей етіп көмектесуі керек.

4. Көмек көрсететін құрылымдар адамдарды сырттан қаржыландыру есебінен тәуелді етіп, қауым қызметіне жиі кері әсерін тигізеді.

5. Қауым бағушы өзін қызметке толығымен арнай алуы үшін, оны қамтамасыз етуі керек.

6. Қауымда қауымдастықтың адалдығын дәлелдейтін есеп беру жүйесі болуы керек.

7. Құдайға деген сүйіспеншілік пен адамдарға қызмет етуге деген ұмтылыс бағушының негізгі қозғаушы күші болуы керек.

1. 8-сабақ бойынша Жеті қорытынды ұстанымды есте сақтау керек. Студенттер жеті қорытынды ұстанымның әрқайсысына (барлығы жеті абзац) түсініктеме жазып, олардың мәні мен маңыздылығын тақырыппен таныс емес адамдарға түсіндіре алатындай етіп жеткізулері керек. Жазбаша жұмыс келесі сабаққа дейін жетекшіге тапсырылуы тиіс. Талқылау кезінде жетекші сұраса, студенттер топқа белгілі бір пункттер бойынша орындалған тапсырмалардың нұсқаларымен бөлісуге дайын болу керек. Келесі сабақтың басында студенттер есте сақтау қабілеті бойынша, жеті қорытынды ұстанымды жазу керек.

2. Cтудент сабақты немесе сабақтың бір бөлігін топтан тыс адамдарға өткізуді жоспарлауы керек. Сабақты өткізген сайын студент бұл туралы жетекшіге есеп беруі керек.

3. Тест: студенттер жергілікті қауымдастықтың неге өзін-өзі қаржыландыруы керек алты себебінің кемінде бесеуін, сондай-ақ қызметтің төрт қаржылық ережесін есте сақтау қабілеті бойынша жазуға дайын болулары керек.