Lesson 4: ქადაგების მექანიკა

ამ გაკვეთილის ბოლოს სტუდენტმა უნდა:

(1) შეისწავლოს და პრაქტიკაში გამოყენოს ქადაგების მომზადების ძირითადი ნაბიჯები.

(2) შეისწავლოს და პრაქტიკაში გამოყენოს ქადაგების შედგენის პროცესი.

(3) შეისწავლოს და პრაქტიკაში გამოყენოს ქადაგების შესაბამისი ილუსტრაციების მოძიების პროცესი.

(4) ისწავლოს ქადაგების კარგად ჩაწერა.

1-ელ გაკვეთილზე ვნახეთ, რომ ღმერთი არის კომუნიკატორი და ის იყენებს ადამიანურ კომუნიკაციას თავისი მიზნების განსახორციელებლად. მე–3 გაკვეთილზე დავინახეთ, რომ ღმერთმა აირჩია „ღვთისთვის სათნო იყო მორწმუნეთა გადარჩენა ქადაგების უგუნურებით” (1 კორინთელთა 1:21). საქმეების წიგნში ვხედავთ, რომ ღმერთმა იმოქმედა ისეთი ადამიანების ქადაგებით, როგორიცაა პეტრე, სტეფანე და პავლე, რათა სახარება მიეტანათ ქვეყნიერებისთვის.

ქადაგება მნიშვნელოვანია. ჩვენ, ვინც ქადაგებისკენ ვართ მოწოდებულნი, პასუხისმგებლები ვართ, რაც შეიძლება მეტი ეფექტურობით ვიქადაგოთ. მიუხედავად იმისა, რომ ქადაგებაში ძალა საბოლოოდ მოდის სულიწმიდის ცხებით, ჩვენ მაქსიმალურად, მთელი ჩვენი უნარების მობილიზებით უნდა მოვემზადოთ. მქადაგებელს უნდა ჰქონდეს მიზანი, რომ იყოს „შეურცხვენელი მუშაკი, ჭეშმარიტების სიტყვის სწორად გადამცემი” (2 ტიმოთეს 2:15).

ქადაგება არის უნარი, რომლის განვითარებაც შესაძლებელია. სხვა უნარების მსგავსად, ქადაგებაშიც გამოიყენება გარკვეული საშუალებები და ტექნიკა. შემდეგ გვერდებზე შევეცდები მქადაგებელს ავუხსნა ქადაგების მომზადების, წარდგენისა და შენარჩუნების მექანიზმები. ეს არ ჩაანაცვლებს ჩვენს დამოკიდებულებას და დანდობას სულიწმიდის ძალაზე. ამასთან, ჩვენ ვემზადებით, რომ ვიყოთ ჭურჭლები, რომელთა საშუალებითაც სულულიწმიდა შეძლებს იმოქმედოს.

გააკეთეთ ჩანაწერები

როდესაც იცით, რომ იქადაგებთ კონკრეტულ მუხლზე ან თემაზე, დაიწყეთ ჩამოწერა ნებისმიერი აზრის, რომელიც გაგიჩნდებათ ამ მუხლის ან თემის ირგვლივ. თქვენ შეგიძლიათ დაწეროთ კითხვები, პარალელური მუხლები წმიდა წერილიდან, დაკვირვებები, ციტატები, მათი გამოყენება, ილუსტრაციები, ამბები ან ნებისმიერი სხვა რამ, რაც აზრად მოგივათ. ჩამოწერეთ ეს იდეები ისე, როგორც მოგაფიქრდებათ და არ ეცადოთ მათ ორგანიზებას. თქვენს მოსაზრებებს მოგვიანებით დააწყობთ, ახლა კი მოინიშნეთ იდეები რაც შეიძლება სწრაფად და სრულად.

აზრების ჩამოწერისას კონცენტრირდით ორ რამეზე:

1. მოსინჯეთ სხვადასხვა თემები. ჩამოწერეთ რამდენიმე შესაძლო თემა. განაგრძეთ წერა, სანამ ყველაზე შესაფერის თემას არ იპოვით თქვენი ქადაგებისთვის.

2. მოსინჯეთ მონახაზები. რაც უფრო უახლოვდებით თქვენი თემის შემუშავებას, მით უფრო მზად ხართ გააკეთოთ მონახაზი, ანუ სქემა. ყველა კარგი გეგმა უნდა შეიცავდეს ორიდან ხუთ პუნქტამდე, ასე რომ განაგრძეთ პუნქტების მონიშვნა, რომლებიც შეიძლება იქცეს თქვენი გეგმის ნაწილად.

თქვენ შეგიძლიათ დაწეროთ ინფორმაციის რამდენიმე გვერდი. ეს ინფორმაცია შეიძლება გამოგადგეთ, ან არც მოხვდეს საბოლოო ქადაგებაში, მაგრამ ჩანაწერები ხელს შეუწყობს თქვენს შემოქმედებით უნარს, ქადაგების მომზადების დროს.

დაწერეთ თემა ქადაგებისთვის

თემა არის ის, რისი თქმა ან შესრულებაც გსურთ ქადაგებით. თქვენ უნდა ჩამოაყალიბოთ თემის სათაური ერთ წინადადებად ან მოკლე ფრაზად. მას შემდეგ რაც შეარჩევთ სასურველ თემას, ქადაგების ყველა დანარჩენი ასპექტი გარკვეულწილად უნდა ეხებოდეს ამ თემას. ყველა პუნქტი და ქვეპუნქტი, ყოველი ილუსტრაცია და გამოყენების ყველა პუნქტი, რაიმე კავშირში უნდა იყოს თემასთან.

თემა ჰგავს იმ სამიზნეს, რომელსაც ესვრით. ამერიკული ანდაზა ამბობს: ”თუ არაფერს უმიზნებ, სავარაუდოდ სწორედ არაფერს გაარტყამ”. თუ ქადაგებაში არაფერი სპეციფიკური არ გაქვთ შესასრულებელი, სავარაუდოდ, შედეგადაც ბევრს ვერაფერს მიაღწევთ.

თემა არის ქადაგების ის ნაწილი, რომელსაც სულ ახსენებთ. ყველა ძირითადი პუნქტის ბოლოს და ზოგჯერ შუაშიც კი, საჭიროა თემის ხელახლა გამოცხადება, მისი არსის ფორმულირება. თუ ქადაგება სწორად გაქვთ შემუშავებული, ის ყოველთვის სათანადო იქნება.

► წაიკითხეთ შემდეგი ადგილი წმიდა წერილიდან: გალატელთა 5:16-26; ფილიპელთა 2:1-11; გამოცხადება 3:14-22. წმიდა წერილის თითოეულ ჩამოთვლილ ადგილს, შეურჩიეთ და დაწერეთ თემის ერთწინადადებიანი სათაური, რომელიც შესაფერისი იქნება ამ მუხლების მიხედვით საქადაგებლად.

დაწერეთ ქადაგების მარტივი მონახაზი

მონახაზი უნდა ემყარებოდეს თემას.

მონახაზის, ანუ სქემის ყველა პუნქტი და ქვეპუნქტი უნდა ემყარებოდეს ქადაგებისათვის არჩეულ თემას. ეს ხელს შეუწყობს მსმენელების გონების კონცენტრირებას თქვენს მთავარ გზავნილზე, რომლის გადაცემაც გსურთ.

წაიკითხეთ ფსალმუნი 145. შემდეგ შეისწავლეთ მონახაზი ქადაგებისთვის, სახელწოდებით "დიდება უფალს". ამ განმარტებითი ქადაგების თემაა უფლის დიდება.

ყურადღება მიაქციეთ იმას, რომ ოთხივე მთავარი პუნქტი უკავშირდება უფლის დიდების თემას. თუ თქვენ ქადაგებთ უფლის განდიდებაზე, უადგილო იქნება ნათლობის მნიშვნელობის შესახებ საკითხის ჩართვა და განხილვა. მონახაზის თითოეული საკითხი უნდა ემყარებოდეს ქადაგების თემას.

მონახაზში უნდა იყოს პარალელური აზრებიც.

მქადაგებელთა შორის გავრცელებული შეცდომაა ისეთი მონახაზების მომზადება, რომლებსაც არ გააჩნიათ პარალელები. ეს უფრო ართულებს მსმენელის მიერ ქადაგების ძირითადი არსის აღქმას. გადახედეთ ამ მონახაზს ქადაგებისთვის, სახელწოდებით „იესო ქრისტე: თანამგრძნობი, გამგები მღვდელმთავარი“, ებრაელთა 8-თავზე დაყრდნობით.

ამ გეგმაში ორი პრობლემა არსებობს:

1. მეორე და მესამე ძირითადი პუნქტები პარალელურია ერთმანეთთან, მაგრამ ისინი არ არიან პირველი პუნქტის პარალელური.

2. მეორე მთავარი პუნქტის ქვეშ, სამი ქვეპუნქტია. პირველი ორი პარალელურია; მათში მოხსენიებულია სიტყვა "იესო" ორი წერტილით მის შემდეგ, რასაც მოსდევს იესოს აღწერა. თუმცა, მესამე პუნქტი არის დასრულებული წინადადება.

შეადარე ეს ქადაგება ქადაგებას სახელწოდებით - "დიდება უფალს". ნახავთ, რომ წინა ქადაგებას უფრო ადვილად გაყვებით აზრში.

1. თითოეული ძირითადი პუნქტი იწყება ფრაზით: ”ჩვენ ვადიდებთ ღმერთს…”

2. ქვეპუნქტები ერთმანეთის პარალელურია:

• პირველი ჩამონათვალი იწყება ფრაზით „ის არის“.

• მეორე ჩამონათვალი იწყება ფრაზით „ღმერთმა შექმნა“.

• მესამე ჩამონათვალი იწყება სიტყვით "ის" და აწმყო დროში მოცემული ზმნებით, როგორიცაა "ის იცავს" და "ის აღასრულებს.“

თქვენი ქადაგების თემის საფუძველზე მკაფიო გეგმის დაწერას მრავალი სარგებელი მოაქვს.

1. სქემა, ანუ მონახაზი სტრუქტურას აძლევს თქვენს ქადაგებას. მონახაზი წარმოადგენს ორგანიზების გეგმას.

2. მონახაზი ყურადღებას შეგანარჩუნებინებთ თქვენს მთავარ თემაზე. კარგი მონახაზის გარეშე, რომელიც გიადვილებთ საუბარს, მარტივია თემიდან გადახვევა. ამასთან, ძლიერი გეგმა-მონახაზი, რომელიც აგებულია თემაზე, ქადაგებას ყურადღების ცენტრში შეგანარჩუნებინებთ.

3. მონახაზის გაკეთება ეხმარება მსმენელს ქადაგების გაგებასა და დამახსოვრებაში. მიუხედავად იმისა, რომ ისინი ვერ ხედავენ მონახაზს, ისინი შეიგრძნობენ ორგანიზებულობას. კარგი მონახაზი ეხმარება მსმენელს ქადაგების უფრო დიდხანს დამახსოვრებაში, რადგან მონახაზი განამტკიცებს თემას. თუ ვუმარტივებთ ქადაგების არსის დამახსოვრებას, ღმერთი შეძლებს მსმენელებს ჭეშმარიტება ელაპარაკოს ქადაგების შემდეგაც რამდენიმე დღის განმავლობაში.

კარგი მონახაზი დამატებით შრომას მოითხოვს, მაგრამ საბოლოოდ ღირს ამად. ეს არის მძიმე შრომის ის ნაწილი, რაც გაქცევთ "შეურცხვენელ მუშაკად". საბედნიეროდ, რაც უფრო დიდხანს მუშაობთ მასზე, მით უფრო იოლი ხდება ის.

► იმის გასაგებად, თუ როგორ გვეხმარება ნიმუში ინფორმაციის დამახსოვრებაში, შეეცადეთ დაიმახსოვროთ თითოეული ქვემოთ მოცემული სია. რომელი უფრო იოლია? რატომ?

რიცხვები: 24, 15, 3, 30, 9, 6, 18, 27, 12, 21

რიცხვები თანმიმდევრულად (დაითვალეთ სამ-სამად): 3, 6, 9, 12, 15, 18, 21, 24, 27, 30

სახელები: ეზრა, კაენი, ბალაამი, გაბრიელი, დავითი, ფელიქსი, ადამი

სახელები ანბანურად: ადამი, ბალაამი, გაბრიელი, დავითი, ეზრა, კაენი, ფელიქსი

დაწერეთ ქადაგების გავრცობილი მონახაზი, ანუ სქემა

გავრცობილი მონახაზი აფართოებს თქვენს მიერ დაწყებულ მონახაზს. ამ მონახაზში შეგიძლიათ გამოიყენოთ ვრცელი წინადადებები, მაგრამ აზრებს მაინც აყალიბებთ მონახაზის ფორმით და არა აბზაცის ფორმატში. გავრცობილი მონახაზი, ანუ სქემა ადვილი გამოსაყენებელია კათედრასთან. როდესაც თქვენ პუნქტები, ქვეპუნქტები და სხვა დეტალები გაქვთ მწყობრად ჩამოყალიბებული იმ პუნქტის ქვეშ, რომელსაც ისინი განამტკიცებენ, იოლია იმ პუნქტების და ქვეპუნქტების დანახვა, რომლებიც შემუშავებას საჭიროებენ.

ჩაწერეთ შესავალი.

თქვენ სრულად უნდა დაწეროთ თქვენი შესავალი. შესავალი პირველია, რასაც მსმენელები ისმენენ. თუ პირველ წუთებში ვერ მიიპყრობთ აუდიტორიის ყურადღებას, შეიძლება მოგვიანებით აღარ მოგეცეთ შესაძლებლობა მიიპყროთ მათი ყურადღება. მაშინაც კი, თუ არ დაწერთ თქვენს მთელ ქადაგებას, უმჯობესია დაწეროთ შესავალი, რადგან ის ქადაგების ასეთი გადამწყვეტი ნაწილია.

ჩემი ქადაგების შესავალი მოიცავს შემდეგ ზოგად საკითხებს:

(1) ტექსტი წმიდა წერილიდან

(2) შესავალი სიტყვა (ზოგჯერ ვწეტრთ ტექსტამდე)

(3) თემა

მე ვწერ თემას, რომლის გამოყენებასაც ვაპირებ ქადაგებაში. ზოგჯერ აუდიტორიას თემის სათაურს ვეუბნები შესავალში; სხვა დროს მას მოგვიანებით ვაცხადებ. თუმცა, თემა ჩემს მონახაზში გამოკვეთილია და მახსენებს, თუ რაზე მსურს საუბარი.

(4) ფონური ანუ წინაპირობის ინფორმაცია

აქ მე ვთავაზობ იმ დეტალებს, რომლის ცოდნაც საჭიროა აუდიტორიისთვის ქადაგების გასაგებად. ის შეიძლება შეიცავდეს საღვთო წერილის ფონურ დეტალებს, ან ეხებოდეს პირად შემთხვევებს, მაგალითად, წმიდა წერილის ამ კონკრეტული ადგილით ჩემს მიერ დაინტერესების გზას. ეს შეიძლება იყოს განცხადება იმ შეხვედრის შესახებ, რომელზეც ვქადაგებ, განსაკუთრებით თუ თემა ან ტექსტი წმიდა წერილიდან განმისაზღვრეს და დამავალეს.

განავრცეთ თქვენი თავდაპირველი მონახაზი, ანუ სქემა მეტი დეტალებით.

ამ ეტაპზე თქვენს თავდაპირველ მონახაზს ამატებთ მეტ დეტალს. მონახაზში, ანუ სქემის გაფართოებულ (გავრცობილ) ფორმატში იყენებთ სრულ წინადადებებს, რომლებიც გადმოსცემენ თქვენი ქადაგების ყველა მნიშვნელოვან საკითხს. ქვემოთ მოცემულია შესაბამისი ასოებისა და ნუმერაციის სქემა, პუნქტებისა და ქვეპუნქტების ჩამოსათვლელად:

იპოვნეთ შესაბამისი ილუსტრაციები

კარგსა და ცუდ ქადაგებას შორის, ერთ-ერთ ყველაზე დიდ განსხვავებას შეიძლება წარმოადგენდეს მათი ილუსტრირების მეთოდი. ჩარლზ სპერჯენმა თქვა: ”ქადაგება არის სახლი. ილუსტრაციები არის ფანჯრები, რომლებიც სინათლეს შიგნით უშვებენ. "ილუსტრაციები სინათლეს ჰფენს და ოთახს უფრო კომფორტულს ხდის. სახლი ფანჯრების გარეშე შეიძლება დამთრგუნველი ადგილი იყოს.

ამბების გამოყენებას ქადაგებაში მრავალი უპირატესობა აქვს.

1. ამბები წარმოშობს ინტერესს. ადამიანები ხშირად ყურადღებით ისმენენ, როდესაც ამბავს ყვებით.

2. ამბები აუმჯობესებს აღქმას. ამბების მოყოლის შედეგად ადამიანები უკეთესად იგებენ თქვენს ქადაგებას.

3. ამბები ეხმარება მოსმენილის გამოყენებაში. კარგი ამბები ეხმარება თქვენს მსმენელს იმის აღქმაში, თუ როგორ გაატარონ თქვენი გადაგებიდან ნასწავლი გაკვეთილები საკუთარ ცხოვრებაში.

4. ამბები აუმჯობესებს მეხსიერებას. მსმენელს ახსოვს მონათხრობი ამბავი მას შემდეგაც, რაც ქადაგების მონახაზი დაავიწყდება. კარგად შერჩეული მოთხრობა მკაფიოდ ასახავს ქადაგების გზავნილს. ამრიგად, როდესაც მსმენელს ახსენდება ამბავი, ეს მას ქადაგების თემას ახსენებს.

5. ამბების თხრობა ბუნებრივი სწავლების ტექნიკაა. ხალხი მიჩვეულია ამბების მოსმენას და დადებითად რეაგირებს მათზე. საუკეთესო მქადაგებლები და მასწავლებლები არიან ისინი, ვისაც შეუძლია კარგი ამბების მოყოლა. არ მგონია, ოდესმე შემხვედროდა ადამიანი, რომელსაც არ მოსწონს კარგი ამბის მოსმენა.

იესო იყო ამბებისა და ილუსტრაციების ოსტატი. ის ჰყვებოდა როგორც ისტორიულ, ასევე ამბებს ყოველდღიური ცხოვრებიდან და ტრადიციულ ამბებსაც, რომლებიც მის დროში კარგად იყო ცნობილი. ის ასევე იყენებდა სიტყვიერ სურათებს საზოგადოების ყველა ფენის ცხოვრებიდან, რათა დახმარებოდა მსმენელს, მისი სათქმელის გაგებაში.

რატომ ჰყვებოდა იესო ამდენ ამბავს? რადგან ის არის შემოქმედი და ესმის ჩვენი ბუნება. მას ესმის, რომ ამბების საშუალებით საუკეთესოდ ვსწავლობთ.

► იმის გასაგებად, თუ როგორ გვეხმარება ამბები გაკვეთილების დამახსოვრებაში, გაიხსენეთ იესოს მიერ მოთხრობილი თითოეული ეს ამბავი. ბიბლიაში მოძებნის გარეშე შეგიძლიათ გაიხსენოთ ის გაკვეთილი, რომელიც იესომ გვასწავლა ამბის გამოყენებით?

• კეთილი სამარიელი

• ძე შეცდომილი, (უძღები შვილი)

• მდიდარი და ლაზარე

• მებაჟის და ფარისევლის ლოცვა

ბევრს ვმუშაობ კარგი ილუსტრაციებისა და ამბების შესაგროვებლად და ჩემს ქადაგებებში ჩასართავად. მე ვიწერ ამბებს მთლიანად, ასე რომ, ზუსტად ვიცი, როგორ მოვყვები თითოეულ ამ ამბავს კათედრიდან.

მიუხედავად იმისა, რომ ქადაგებებს ხშირად არ ვიმეორებ, განმეორებით ვუყვები ზოგიერთ ისტორიას. თუ შეიმუშავებთ კარგ ამბავს, რომელიც გარკვეულ აზრს ილუსტრირებას უკეთებს, იმის არანაირი მიზეზი არ არსებობს, რომ არ გამოიყენოთ ამბავი იმავე პუნქტის ილუსტრაციად სხვა ქადაგებაში, განსაკუთრებით თუ სხვა აუდიტორიისთვის ქადაგებთ. თუ მოხდა ისე, რომ კარგი ამბავი გაიმეორეთ, არავინ არ წამოდგება და არ გავა გარეთ. სინამდვილეში, ბავშვობაში მომწონდა გარკვეული მახარობლების ქადაგების მოსმენა, რადგან ისინი ერთსა და იმავე შესანიშნავ ისტორიებს ყვებოდნენ. ჩვენ მზად ვართ ვისმინოთ სიმღერები, რომლებსაც მრავალჯერ მღერიან. ადამიანების უმეტესობა სიამოვნებით ისმენენ მოყოლილ ამბებს განმეორებით.

ყოველთვის არსებობს ცდუნება, რომ მქადაგებელი ეცადოს უბრალოდ გასართობად გამოიყენოს თავისი ამბები. გართობა არ არის ქადაგების დროს ამბების გამოყენების საუკეთესო საბაბი. ამასთან, ისტორიები ძალიან სასარგებლოა თქვენი მსმენელის ყურადღების შესანარჩუნებლად და თქვენი ქადაგების არსის გარკვევით გადასაცემად.

რაც უფრო გრძელია ქადაგება, მით უფრო გამოსადეგია კარგი ამბების ჩართვა. როდესაც ამბის მოყოლას დაიწყებთ, ისინი, ვისაც ეძინებოდათ, გამოფხიზლდებიან; ვინც სხვა რამეზე ფიქრობდა, ყურადღებას გადმოიტანენ თქვენს ნათქვამზე და ვინც გისმენდათ, ბედნიერი იქნება ცვლილების გამო.

აქ მოცემულია რამდენიმე რჩევა ისტორიების მომზადებისა და თხრობისთვის:

1. ივარჯიშეთ თქვენი ისტორიების გამოყენებაში. ეს განსაკუთრებით მნიშვნელოვანია, თუ არ ხართ კარგი მთხრობელი.

2. გახადეთ ამბავი რაც შეიძლება რეალისტური. არ გამოიყენოთ "პიროვნება ა" და "პიროვნება ბ" ტიპის ენა. დაარქვით ნამდვილი სახელები და აღწერეთ ამბავი რაც შეიძლება რეალისტურად, მაშინაც კი, თუ თქვენ იძულებული ხართ შეცვალოთ სახელი და გარემოება კონფიდენციალურობის დასაცავად.

3. შეეცადეთ სიუჟეტში შეინარჩუნოთ მოულოდნელობის გარკვეული ელემენტი. არასოდეს თქვათ: ”სასაცილო ამბავს მოგიყვებით”. უმჯობესია წინასწარ არაფერი თქვათ ამბის შესახებ.

4. ნუ მოგერიდებათ პირველ პირში მოსაყოლი ამბების გამოყენება. ეს არის ამბები, რაც თქვენს თავს გადაგხდათ ან რომელთა შესახებაც პირადად იცით. ამ ამბებს პირველ პირში ვყვებით პირველი პირის ნაცვალსახელების გამოყენებით, როგორიცაა მე და ჩვენ. ეს ყველაზე ეფექტური ისტორიებია, რომელთა მოყოლაც შეგიძლიათ.

5. მოერიდეთ დეტალებში ჩაღრმავებას, რათა თქვენს მსმენელებს ამბის არსის აღქმაში ხელი არ შეუშალოთ. დეტალებმა ამბავი საინტერესო უნდა გახადოს, მაგრამ არსი არ უნდა დააკარგვინოს მსმენელს. თუ შეჩერდებით ამბის უმნიშვნელო დეტალების განმარტებაზე, ეს ყურადღებას გადაატანინებს მსმენელს მთავარი აზრიდან. მნიშვნელოვანია ამბის მთავარი აზრი და არა შემთხვევითი დეტალები.

6. ზოგჯერ შეიძლება საჭირო გახდეს ამბის დეტალების შეცვლა, რომ ის აუდიტორიისთვის გასაგები გახდეს. მაგალითად, როდესაც აფრიკაში ვყვები ამბავს, ჩემი საშუალო სკოლის პერიოდის შესახებ, ამერიკაში, მე ვსაუბრობ „პრეფექტზე“. ჩვენ არ გვყავდა პრეფექტები აშშ – ში, მაგრამ ტერმინი „პრეფექტი“ გასაგები იქნება ნიგერიაში.

7. მოყევით ამბები აწმყო დროში. როდესაც თქვენ ჰყვებით წარსულში მომხდარ რაიმე ამბის შესახებ, აწმყო დროში გადმოცემა ეხმარება აუდიტორიას უფრო ახლოს შეიგრძნოს მოვლენები. მაგალითად, როდესაც ჰყვებით ამბავს მათეს 14:22-33-დან შეგიძლიათ თქვათ: ”პეტრე გადმოდის ნავიდან და იწყებს წყალზე სიარულს”. ლუკა ამ ტექნიკას საქმეებში იყენებს.

8. ნუ მოჰყვებით სხვებისგან მოსმენილ ამბებს, თითქოს ეს თქვენ გადაგხდათ. არაფერია დასაძრახი სხვებისგან მოსმენილი ისტორიების გამოყენებაში. თუმცა, ზოგი ადამიანი ითვისებს ამბავს, რომელიც სხვას გადახდა და ისე ყვება, თითქოს ეს მათ შეემთხვათ. თუ მოგვიანებით თქვენი აუდიტორია გაიგებს, რომ ეს შემთხვევა სინამდვილეში არ შეგმთხვევიათ, ამან შეიძლება შეარყიოს მათი ნდობა თქვენ მიერ ნათქვამი დანარჩენი საკითხებისადმიც.

მქადაგებლებისთვის ერთი გაკვეთილი რომ მქონდეს სასწავლებელი, ეს იქნებოდა: ისწავლეთ როგორ გახდეთ კარგი მთხრობელები. წესი, რომელიც უნდა დაიცვას ყველა პასტორმა, არის: არასოდეს იქადაგოთ ქადაგება ამბის მოყოლის გარეშე.

თუ მომდევნო წლის განმავლობაში თქვენი ქადაგების მხოლოდ ერთ ნაწილზე გსურთ მუშაობა, იმუშავეთ კარგი ილუსტრაციების წარდგენაზე. თქვენი ხალხი დაუყოვნებლივ შეამჩნევს განსხვავებას. მე მჯერა, რომ თუ ქადაგებებში ამბების ეფექტურად გამოყენებას ისწავლით, საშუალოდან კარგ მქადაგებლად, ან კარგიდან დიდებულ მქადაგებლად იქცევით.

დაწერეთ თქვენი ქადაგება მთლიანად

მთელი თქვენი ქადაგების დაწერა ბევრ შრომას მოითხოვს! თუ ყოველ კვირას ქადაგებთ, შეიძლება ამის გაკეთება ვერ შეძლოთ ყველა ქადაგების წინ. თუმცა, შეამჩნევთ, რომ მთელი ქადაგების დაწერა კარგი საშუალებაა საკუთარი თავის დისციპლინირებისთვის და ქადაგების გასაუმჯობესებლად. მრავალი მიზეზი არსებობს, თუ რატომ უნდა დაწეროს ადამიანმა ქადაგებები მთლიანად.

წერა გეხმარებათ კონცენტრაციაში.

სწავლისას გონება ხშირად გვეფანტება. წერა გვეხმარება ყურადღების კონცენტრირებაში. როდესაც სწავლობთ, სასარგებლოა აიძულოთ თავი გააკეთოთ ჩანაწერი ყველა მუხლის ან ფრაზის ან თუნდაც ყველა სიტყვის შესახებ, რომელსაც სწავლობთ. კონცენტრირება იმის ძიებაში, თუ რა უნდა დაწეროთ, გაიძულებთ იაზროვნოთ; ფიქრი კი გამოიწვევს გამოცხადებებს იმაზე, რასაც აქამდე ვერ ხედავდით. აზრების ჩამოწერის პროცესი უფრო მეტ აზრს წარმოშობს.

სასწავლო სახელმძღვანელო ანალოგიურად მუშაობს. სასწავლო სახელმძღვანელო არის კითხვების ჩამონათვალი, რომელიც ეხება საღვთო წერილის მონაკვეთს. კითხვები აღძრავს დამატებით აზრებს საღვთო წერილის შესახებ. ეს სწავლებისას გამოსაყენებლად სასარგებლო ტექნიკაა. კითხვები, რომლებიც სტუდენტს აიძულებს შეისწავლოს ბიბლია, ძალიან სასარგებლოა.

წერა გეხმარებათ ჭეშმარიტების დანახვაში, რომელსაც სხვაგვარად ვერ დაინახავდით.

თუ თავს აიძულებთ დაწეროთ რაიმე ყოველი მუხლის შესახებ, რომელსაც შეისწავლით, მანამ მოძებნეთ, სანამ არ აღმოაჩენთ რაიმეს დასაწერად. ეს შეიძლება იყოს ისეთი რამ, რასაც აქამდე ვერ ხედავდით. თუ თავს აიძულებთ დაწეროთ ათი რამ კონკრეტული მუხლის შესახებ, გაოცდებით რამდენის შესწავლას შეძლებთ.

პურიტანები ცნობილი იყვნენ თავიანთი უნარით, დაენახათ უამრავი ჭეშმარიტება საღვთო წერილის მხოლოდ რამდენიმე მუხლში. დარწმუნებული ვარ, მათ ეს ინფორმაცია იმიტომ მოიპოვეს, რომ დროს უთმობდნენ ბიბლიური ადგილების განხილვას და თავიანთ აზრებს იწერდნენ. პურიტანმა პასტორმა თომას ბოსტონმა ეკლესიასტეს ერთი მუხლის შესახებ მთელი წიგნი დაწერა, „ჩაუკვირდი ღვთის მოქმედებას, ვინაიდან ვინ შეძლებს მისი გამრუდებულის გასწორებას?” (ეკლესიასტე 7:13). იფიქრეთ რამდენი დრო უნდა დაეხარჯა მას ამ მუხლზე ფიქრისა და საკუთარი აზრების ჩაწერაზე.

წერა გეხმარებათ თქვენი აზრების ორგანიზებაში.

იმისთვის, რომ რამე დაწეროთ, ამაზე დიდხანს უნდა იფიქროთ, რომ აზრები დაალაგოთ. ეს პროცესი დაგეხმარებათ აზრების ორგანიზებაში. გარდა ამისა, ფაქტების ჩამოწერა დაგეხმარებათ მოგვიანებით მათ ორგანიზებაში, როდესაც ქადაგების დალაგებას ეცდებით. როდესაც ვსწავლობთ, გვსურს დავიჭიროთ ყოველი აზრი, რომელიც თავში მოგვდის. ამის გაკეთების საშუალებაა მათი ჩაწერა. შემდეგ ეს აზრები ხდება ნედლეული, რომელსაც მოგვიანებით ქადაგების ჩამოსაყალიბებლად ვიყენებთ.

ჩანაწერის გაკეთებით ჩვენ სამუდამოდ ვაფიქსირებთ და ვინახავთ, რასაც ღმერთი გვასწავლის.

ფსალმუნი 137:4-6 მოუწოდებს მკითხველს ახსოვდეს ღვთის კურთხევები.

რადგან იქ მოგვთხოვეს ჩვენმა დამტყვევებლებმა სიმღერა და მჩაგვრელებმა - მხიარულება: გვიმღერეთო სიონის რომელიმე სიმღერა. უცხო მიწაზე როგორ ვიმღეროთ უფლის სიმღერა?თუ დაგივიწყო შენ, იერუსალიმო, დამივიწყოს მარჯვენამ ჩემმა. სასას მიეკრას ჩემი ენა, თუ არ გაგიხსენო, თუ იერუსალიმი არ დავაყენო ჩემი სიხარულის სათავეში!

ღმერთს არ სურს, რომ დავივიწყოთ ის კურთხევები, რომლებიც მან მოგვცა. არცერთ ჩვენგანს არ აქვს სრულყოფილი მეხსიერება; თუმცა, თუ რამეს ჩავიწერთ, გვექნება ჩანაწერი იმის შესახებ, თუ რას გვასწავლის ღმერთი მისი სიტყვის შესწავლისას.

როდესაც ღმერთი ეძებდა გზას, რომ შეენარჩუნებინა ჭეშმარიტება თაობიდან თაობამდე, მან გადაწყვიტა დაეწერა ეს წიგნად. სასამართლოზე ყველაფრის აღწერა წერილობით ხდება, სადაც ასახულია სასამართლოს დასკვნა (განაჩენიც). ექიმები წერენ პაციენტებისთვის დასმულ დიაგნოზს. არქიტექტორები შენობებისა და სხვა ნაგებობების გეგმებს იწერენ. რა არის უჩვეულო იმაში, რომ მქადაგებლები იწერდნენ იმას, რასაც ღმერთი აძლევს, რათა მომავალში მათ წვდომა ჰქონდეთ იგივე ჭეშმარიტებებზე?

წერა წარმოადგენს სასარგებლო ინსტრუმენტს სხვა ადამიანების დასახმარებლად.

ყოველთვის იქნებიან ადამიანები, რომლებიც იტანჯებიან და ვისაც თქვენი დახმარება სჭირდება. თუ ერთგულად იწერდით გაკვეთილებს, რომლებიც ღმერთმა გასწავლათ, ეს მასალა შეიძლება გამოგადგეთ მინიმუმ სამი მიმართულებით.

1. შეგიძლიათ განიახლოთ საკუთარ მეხსიერებაში, რა გასწავლათ ღმერთმა.

2. შეიძლება მოისურვოთ თქვენი ქადაგების გაზიარება ჩანაწერის ასლების სხვა ადამიანებისთვის გადაცემის გზით. ქადაგების შემდეგ ხშირად მთხოვენ ჩემი ქადაგების დაწერილ ასლს. მე ასობით ადამიანს გავუზიარე ასლები. ბევრი დადებითი პასუხი მივიღე მათგან, ვისაც ჩემი ქადაგებები დაეხმარა.

3. ჩანაწერი შეიძლება გამოგადგეთ მომავალი ქადაგების, სტატიების ან წიგნების საფუძვლად. თითქმის ყველა წიგნი იწყება სხვადასხვა მოსაზრებითა და შენიშვნით. ცოტა თუ ვინმე ჯდება და უბრალოდ წერს წიგნს თავიდან ბოლომდე. ქადაგებების ჩანაწერთა შეგროვება შეიძლება უფრო დიდი ნაშრომის საწყისი გახდეს.

თუ ექიმთან მიდიხარ, ის დაგისვამთ დიაგნოზს და მკურნალობას დაგინიშნავთ. ამის შემდეგ, ის გააკეთებს ჩანაწერებს იმის შესახებ, თუ რა დიაგნოზი დაგისვათ და რა მკურნალობა დაგინიშნათ. როდესაც ექიმთან დაბრუნდებით, მას აქვს თქვენი სამედიცინო ისტორიის ჩანაწერი. იურისტებიც იმავეს აკეთებენ. ისინი კარგ ჩანაწერებს აწარმოებენ თავიანთი მუშაობის შესახებ.

ღვთის საქმე კიდევ უფრო მნიშვნელოვანია ვიდრე ეს საერთო სამუშაოები. მნიშვნელოვანია, რომ მქადაგებლები სწავლობდნენ კარგი ჩანაწერების წარმოებას. მქადაგებლებმა უნდა შექმნან ჩანაწერების წარმოებისა და ქადაგების შეტანის სისტემა. აქ მოცემულია რამდენიმე შემოთავაზება ჩანაწერების შეტანის და შენახვისთვის.

სწორად შეიტანეთ თქვენი ქადაგებები

ქადაგების შეტანის რამდენიმე გზა არსებობს. შეგიძლიათ შეიტანოთ ქადაგება ბიბლიური ტექსტის მიხედვით, თემის მიხედვით ან თარიღის მიხედვით. ასევე შესაძლებელია ორი მეთოდის კომბინაციის გაკეთება.

ორგანიზების ერთ–ერთი გზაა შემდეგი კატეგორიები:

აწარმოეთ თქვენი ქადაგების ჩანაწერები

ის უნდა შეიცავდეს თარიღს, თემას ან სათაურს, ტექსტს საღვთო წერილიდან და სხვა დეტალებს. ყველა ჩემს ძველ ქადაგებას ვინახავ საქაღალდეებში. დღევანდელ ქადაგებებს დიდ ბლოკნოტში ვინახავ. ყველა ქადაგება, რომლებიც 1986 წლიდან ვიქადაგე, მაქვს კომპიუტერში.

კომუნიკაცია ხელოვნებაც არის და მეცნიერებაც. ეს არის როგორც საჩუქარი, ანუ ნიჭი ღვთისაგან, ასევე ადამიანის შრომისმოყვარეობის შედეგი. ბიბლიაში ნათქვამია: „ვისაც მეტი მიეცა, მეტს მოსთხოვენ” (ლუკა 12:48).

ღმერთმა ჩვენ, მქადაგებლებს, მრავალი ძვირფასი ჭეშმარიტება მოგვცა. ყველაზე მცირე, რისი გაკეთებაც შეგვიძლია არის ის, რომ ყველაფერი გავაკეთოთ, რათა ეს სიკეთეები სხვებს გავუზიაროთ. ჩემი გამოწვევა თქვენ მიმართ არის - ძალიან სერიოზულად მოეკიდოთ თქვენს პასუხისმგებლობას ეფექტური ქადაგებების მოსამზადებლად.

ქადაგებას შეუძლია დიდი დივიდენდების მოტანა. ქადაგება მოსავლის მკის წესს მისდევს. თუ თესლი კარგად არის მომზადებული და დათესილი, მოსავალიც შესანიშნავი იქნება. თუ თესლს არ მოამზადებთ და არ დათესავთ, კარგ მოსავალს ნუ ელით.

კარგად მოამზადეთ თქვენი გულის ნიადაგი. დათესეთ ღვთის სიტყვის ჭეშმარიტება თქვენს ქადაგებებში. წარმატებული ქადაგების საზღაურს მოიმკით.

(1) შემდეგი გაკვეთილის დასაწყისში თქვენ გაივლით ტესტს ამ გაკვეთილის მასალის საფუძველზე. მომზადებისას ყურადღებით შეისწავლეთ ტესტის კითხვები.

(2) ამ დავალებისთვის, ჩვენ გამოვიყენებთ დოქტორ მაკკეინის საფეხურებს ქადაგების მომზადებისთვის. პრაქტიკისთვის აირჩიეთ შემდეგი ადგილებიდან ერთერთი.

• ფსალმუნი 8

• ესაია 55:1-9

• იოანე 3:1-21

• 1 კორინთელთა 13

(ა) დაწერეთ ქადაგებისათვის შესაფერისი ერთწინადადებიანი თემა.

(ბ) ამ გაკვეთილში მოცემული მითითებების გამოყენებით დაწერეთ ქადაგების მონახაზი, ანუ სქემა შერჩეული ადგილისთვის წმიდა წერილიდან.

(გ) დაწერეთ ქადაგების გავრცობილი მონახაზი.

(დ) იპოვეთ თქვენი ქადაგებისთვის მინიმუმ ორი შესაბამისი ილუსტრაცია.

(3) როგორც მე -3 გაკვეთილში, წარუდგინეთ კლასს 8-10 წუთიანი ქადაგება. კლასის თითოეული წევრი შეავსებს შეფასების ფორმას, რომელიც მოცემულია ამ კურსის სახელმძღვანელოს თავში.

(1) (აირჩიეთ სწორი პასუხი.) ქადაგებისთვის მუხლის ან თემის შესწავლისას, უნდა გააკეთოთ ჩანაწერები ____.

(A) მხოლოდ იდეების, რომლებზეც იცით, რომ ქადაგებაში გამოიყენებთ

(B) ნებისმიერი კითხვა, მითითება, ციტატა ან ამბავი, რომელზეც მომზადების დროს ფიქრობთ

(2) ქადაგების ______________ არის იმის ერთწინადადებიანი შეჯამება, რაც გსურთ გადასცეთ ქადაგებაში.

(3) (აირჩიეთ სწორი პასუხი.) მომდევნო ქადაგების მონახაზი არ ვარგა, რადგან _______.

(ა) ყველა პუნქტი არ ეხება თემას.

(ბ) მონახაზს არ აქვს პარალელური აზრები.

(გ) არც მონახაზი ვარგა.

(4) ჩამოთვალეთ სამიდან ორი უპირატესობა, რომელსაც მოგცემთ თქვენი ქადაგების მკაფიო მონახაზის დაწერა.

(5) ____ (სიმართლეა თუ ტყუილი) გავრცობილ მონახაზში თქვენ განავრცობთ თითოეულ პუნქტს სრულ წინადადებებად.

(6) კარგი ილუსტრაცია ჰგავს _______________- ს, რომელიც სახლში სინათლეს უშვებს.

(7) ჩამოთვალეთ სამი უპირატესობა, რასაც განიჭებთ ქადაგებისას ამბების გამოყენება.

(8) ჩამოთვალეთ ქადაგების სრულად დაწერის სამი უპირატესობა.