Lesson 9: კულტურათაშორისი კომუნიკაცია

ამ გაკვეთილის ბოლოს სტუდენტმა უნდა:

(1) დააფასოს ბიბლიაში ურთიერთკავშირების მაგალითები.

(2) ისწავლოს პრაქტიკული გაკვეთილები კულტურათაშორისი კომუნიკაციისთვის.

(3) აღიაროს სიყვარულისა და პატივისცემის მნიშვნელობა კულტურათაშორის ურთიერთობებში.

(4) იცოდეს პრაქტიკული გზები, როგორ შეძლოს უკეთესი მოსმენა.

თქვენს მსახურებაში ნახავთ, რომ გჭირდებათ ურთიერთობა იმ ადამიანებთან, რომლებსაც არ აქვთ თქვენნაირი კულტურული წარმომავლობა. ეს შეიძლება იყოს სხვა ქვეყნის წარმომადგენელი, ან თუნდაც ახლომდებარე სოფლიდან ჩამოსული ადამიანი, თქვენს შორის მაინც იარსებებს განსხვავებები ურთიერთგაგებასა და კომუნიკაციაში.

ამ განსხვავებების გადალახვის უნარი უფრო ეფექტურს გაგხდით, როგორც ღვთის სამეფოს მსახურს. ამ მოკლე გაკვეთილში ჩვენ შევისწავლით კულტურათაშორისი კომუნიკაციის რამდენიმე ძირითად პრინციპს.

► განიხილეთ დრო, როდესაც გქონდათ ურთიერთობა სხვა კულტურის წარმომადგენელთან. რა სირთულეებს წააწყდით? წარმატებული იყავით სხვაობების გადალახვაში კომუნიკაცის საშუალებით?

კულტურათაშორისი კომუნიკაციის მაგალითები ძველ აღთქმაში

ღმერთმა აბრაამთან დადებული აღთქმით დაგვანახა, რომ სახარება მთელ მსოფლიოში გავრცელდებოდა და აბრაამში იკურთხებოდა "დედამიწის ყველა ტომი" (დაბადება 12:1-3). ეს ითვალისწინებდა მომავალს, სადაც მნიშვნელოვანი იქნებოდა კულტურათაშორისი კომუნიკაცია.

აქ მოცემულია რამდენიმე მაგალითი, თუ როგორ ურთიერთობდნენ ღვთის ხალხი სხვა კულტურებთან:

• აბრაამმა და იოსებმა მოიპოვეს ეგვიპტის ფარაონის პატივისცემა.

• სოლომონი მასპინძლობდა სტუმრებს მთელი ანტიკური სამყაროდან. ბევრმა მკვლევარმა დაინახა მსგავსება იგავების 22: 17–24: 22-სა და ეგვიპტის იგავთა კრებულს შორის, რომელსაც ამენემოპეს ინსტრუქცია უწოდეს. ეს იმაზე მეტყველებს, რომ სოლომონი იცნობდა ეგვიპტის კულტურას.

• დანიელი გახდა ბაბილონისა და სპარსეთის მმართველების პატივსაცემი მრჩეველი. დანიელის 1-ლი თავიდან ჩანს, რომ დანიელი იყო ძლიერი მრწამსის მქონე ახალგაზრდა ("გულში ჩაიდო დანიელმა, რომ თავი არ შეებილწა მეფის რჩეული ულუფით და მისი სასმელი ღვინით"); მაგრამ, ის ბაბილონელი გავლენიანი პირების პატივისცემითაც სარგებლობდა (”ნებართვა სთხოვა საჭურისთუხუცესს, რომ თავი არ შეებილწა”) (დანიელი 1:8).

• ახალგაზრდა ებრაელი გოგონა ესთერი გახდა მეფე არტაქსერქსეს (ახაშვეროშის) დედოფალი. თავისი უნარის წყალობით, რომ შეეთავსებინა გამბედაობა მეფესთან შესასვლელად (”...და, თუ დავიღუპები, დავიღუპო!") და სპარსული კულტურის პატივისცემა (მეფის ნადიმზე მოწვევა, ნაცვლად იმისა, რომ მოუმზადებლად წარედგინა თავისი თხოვნა), ის გახდა ღმერთის იარაღი მისი ხალხის გადასარჩენად (ესთერი 4:16).

კულტურათაშორისი კომუნიკაციის მაგალითები ახალ აღთქმაში

იესოს დიადმა დავალებამ კულტურათაშორისი კომუნიკაცია კიდევ უფრო მნიშვნელოვანი გახადა.

ამიტომ წადით და დაიმოწაფეთ ყველა ხალხი და მონათლეთ ისინი მამის, ძის და სულიწმიდის სახელით. ასწავლეთ მათ ყოველივეს დაცვა, რაც მე გამცნეთ (მათე 28:19-20).

იესომ თქვა, რომ მოციქულები იქნებოდნენ „ჩემი მოწმენი იერუსალიმში, მთელ იუდეასა და სამარიაში და დედამიწის კიდემდე” (საქმეები 1:8). ამ დავალების აღსრულება შეუძლებელია, თუკი ჩვენ არ მოვინდომებთ და ვერ შევძლებთ ვესაუბროთ მათ, ვინც არ იზიარებს ჩვენს კულტურულ წარმომავლობას.

იესომ წარმოგვიდგინა კულტურათაშორისი კომუნიკაციის მოდელი. მას სურვილიც და უნარიც ჰქონდა ემსახურა წარმართებისთვის. იმ დროს როცა სხვა ებრაელი რაბინები თავს არიდებდნენ წარმართთა რეგიონებს, იესომ განზრახ იმოგზაურა დეკაპოლისში. როდესაც სხვები სამარიას ერიდებოდნენ, იესო თავისი ნებით შეხვდა სამარიელ ქალს (იოანე 4).

მოციქული პავლე კულტურათაშორისი კომუნიკაციის შესანიშნავ მოდელს გვთავაზობს. რომაელ ჩინოსანთან საუბრისას მან მოითხოვა რომის მოქალაქის უფლებები (საქმეები 25:10-11). ათენში ქადაგებისას მან ის ფილოსოფიური ენა გამოიყენა, რომლითაც ეს ბერძენი მოაზროვნეები იყვნენ ცნობილნი (საქმეები 17:16-34).

პავლე ბევრს მუშაობდა, რომ სახარება ყველასთვის ექადაგა. კულტურათშორისი ურთიერთობა მნიშვნელოვანი იყო პავლესთვის, რადგან სახარება იყო მნიშვნელოვანი მისთვის.

ყველასთვის ყველაფერი გავხდი, რათა როგორმე მეხსნა ზოგიერთები. და ყოველივე ამას ვაკეთებ სახარებისთვის, რათა მეც გავხდე მისი თანამონაწილე (1 კორინთელთა 9:22-23).

მოუსმინეთ სანამ ილაპარაკებთ

იაკობი წერს, რომ ჩვენ უნდა ვიყოთ სმენაში სწრაფი, სიტყვაში დინჯი (იაკობის 1:19). მოციქული წერდა რისხვასა და ენაზე, მაგრამ მისი რჩევა კარგია კულტურათაშორისი კომუნიკაციისთვის. რაც უფრო მეტს მოვუსმენთ, მით უფრო მეტს ვისწავლით.

ეს მარტივად ჟღერს, მაგრამ რადგან დიდხანს უნდა ვისმინოთ, წარმატებული კულტურათაშორისი კომუნიკაცია დიდ დროს მოითხოვს. დროს ვერაფერი ჩაანაცვლებს. საუკეთესო კულტურათაშორისი კომუნიკატორი არის ის, ვინც დიდხანს ატარებს დროს სხვა კულტურაში.

ჩვენი სამყარო "სწრაფი კვების" სამყაროა. მიკროტალღურ ღუმელებს ვიყენებთ, რომ საჭმელი სწრაფად მოვამზადოთ. ჩვენ შეკვეთას ვაძლევთ მაკდონალდსში და ვწუწუნებთ, თუ შეკვეთას სწრაფად არ ვიღებთ. ბევრგან შეგიძლიათ დარეკოთ პიცის შესაკვეთად და მას თქვენს კარამდე მოიტანენ ოცდაათ წუთში. წამებში ვგზავნით ელექტრონულ გზავნილებს მსოფლიოს გადღმა. ჩვენ არ ვართ მიჩვეული ლოდინს! ინტერკულტურულ კომუნიკაციას დრო სჭირდება; ეს მოითხოვს ჩვენგან შენელებას და სხვების მოსმენას.

ბევრჯერ, ჩვენ ზანტები ვართ მოსმენაში და მკვირცხლები ლაპარაკში. ჩვენ ძალიან ბევრს ვსაუბრობთ და ძალიან ცოტას ვაკვირდებით. თუ გვინდა სხვების გაგება, უნდა მოვუსმინოთ. ეს სიმართლეა, მაშინაც, როცა სხვა ქვეყანაში ვმოგზაურობთ, როდესაც მეზობელ სოფელში მახარობლურ საქმეს ვეწევით, თუ სხვა ასაკობრივ ჯგუფებს ვასწავლით ან თუნდაც როცა საკუთარ ოჯახებს ვსტუმრობთ. ძალიან ხშირად, ჩვენ არ ვუსმენთ, და თვითონ ვლაპარაკობთ.

დუან ელმერმა, მისიონერმა და კულტურათმცოდნეობის პროფესორმა თქვა: ”თქვენ ვერ ემსახურებით ისეთ ადამიანს, ვისიც არ გესმით. თუ თქვენ ცდილობთ ემსახუროთ ხალხს მათი გაგების გარეშე, თქვენ სავარაუდოდ აღგიქვამენ როგორც კეთილგანწყობილ მჩაგვრელს.”[1] სხვა სიტყვებით რომ ვთქვათ, თქვენი მცდელობებიც კი ემსახუროთ, უსიამოვნო შედეგებს გამოიწვევს და არასწორად იქნება აღქმული. დახმარების მცდელობით მიაყენებთ ზიანს? რატომ? იმიტომ რომ თქვენ ვერ გამონახეთ დრო, რათა იმ ადამიანისთვის გაგეგოთ, რომლის დახმარებასაც ცდილობთ!

როდესაც ჯონ სიმანდსი იყო ინდოეთში ევანგელისტ-მისიონერად, მან გააცნობიერა მოსმენის მნიშვნელობა. თუ ის სოფელში მიდიოდა და ქადაგებას იწყებდა, ხალხი ყოყმანით უსმენდა და უკვირდა: „ვინ არის ეს უცხო? რატომ გვესაუბრება ჩვენ?”

თუმცა, თუ მოძღვარი სეიმანდსი ერთ დღეს გაატარებდა სოფლის მეთაურებთან, მოინახულებდა ადგილობრივ სკოლას და სვამდა კითხვებს, ის ბევრად განსხვავებულ მიღებას მოიპოვებდა. ამ შემთხვევაში ის უცხო აღარ იყო; ის იყო სტუმარი. ახლა მან იცოდა მათი სადარდებელიც და შეკითხვებიც.[2]

გამოიყენეთ იუმორი სიფრთხილით

იუმორი რთული საკითხია კულტურათაშორისი თვალსაზრისით. იუმორი მნიშვნელოვანია მოსაუბრეებისთვის, მაგრამ ბევრი ხუმრობა ცალკეული კულტურისთვისაა დამახასიათებელი და გასაგები. რაც სასაცილოა ჩინეთში, ფლორიდაში სასაცილო არ არის. რაც სასაცილოა ინდიანაში, ინდოეთში სერიოზულია. გამოყენების დაგეგმვისას ჰკითხეთ ვინმეს, შეესაბამება თუ არა თქვენი შერჩეული ამბავი თქვენთვის უცნობ კულტურას. ბევრმა პოლიტიკოსმა შეურაცხყოფა მიაყენა მსმენელს იუმორით, რომელიც არ ითარგმნება.

მოყევით ამბები

ამბების უმეტესობა კულტურულ ბარიერებს სცდება. ისტორიები, რომლებიც აღწერს ადამიანების მოქმედებებსა და ემოციებს, კარგად აღიქმება ინტერკულტურულადაც. ამასთან, თუ ისტორია ძალიან ბევრ კულტურულ კომპონენტს შეიცავს, ის კარგად ვერ ითარგმნება. სამიზნედ კვლავაც გამოგადგებათ კულტურის წარმომადგენელთან საუბარი. ჰკითხეთ: ”როგორ აღიქვით, ანუ რა გაიგეთ, როდესაც ეს ამბავი მოისმინეთ?”

მე კოლეჯში მუსიკის ისტორიის კურსს ვასწავლი. ამ კურსში ხშირად ვიყენებ ბეთჰოვენის მაგალითს. მიუხედავად იმისა, რომ ბეთჰოვენი დიდი კომპოზიტორი იყო, მას არ ჰქონდა კარგი ურთიერთობა ხალხთან. ის იყო გაბრაზებული ადამიანი, რომელმაც ბევრი ადამიანი გაანაწყენა. მეგობრებმა მას "დრაკონი" უწოდეს, რადგან ის ძალიან რთული პიროვნება იყო. დასავლელისთვის დრაკონი არის იგივე გველეშაპი, „ცეცხლისმფრქვეველი ურჩხული.”

ერთხელ ჩინეთში ვასწავლიდი ბეთჰოვენის შესახებ. როდესაც ბეთჰოვენს "დრაკონს" ვეძახდი, ჩემი სტუდენტები შეცბუნდნენ. ჩინეთში დრაკონი კარგი ბედის სიმბოლოა. ისინი გაოცდნენ: ”რატომ დაერქვა ამ გაბრაზებულ ადამიანს ასეთი კარგი სახელი?” მომიწია ამბის შეცვლა, რათა აზიელ სტუდენტებს უკეთ გაეგოთ ჩემი სათქმელი.

იყავით მგრძნობიარე კულტურის მიმართ

კარგი კომუნიკატორები იყენებენ ბევრ ილუსტრაციასა და სიტყვის ფიგურას თავიანთ კომუნიკაციაში. თუმცა, ილუსტრაციები უნდა იყოს კულტურასთან შესაბამისობაში. აზრი არ აქვს კომპიუტერის შესახებ ილუსტრაციის გამოყენებას იმ ადამიანთა ჯგუფთან, რომელთაც არასოდეს უნახავთ კომპიუტერი.

ყოფილი პრეზიდენტი ბილ კლინტონი კარგად ერკვეოდა კულტურათაშორის კომუნიკაციაში. ერთხელ მან ქრისტიანებისა და მუსლიმების ჯგუფს მოუყვა კეთილი სამარიელის ამბავი. მან თქვა: ”ერთი კაცი შეიარაღებულ მძარცველებს ჩაუვარდათ ხელში. მღვდელმა გვერდით ჩაუარა. ის რელიგიური ლიდერი იყო. შემდეგ გამოიარა ცნობილი ტომის წარმომადგენელმა. ბოლოს მტრული ტომის წარმომადგენელმა დაინახა დაშავებული მსხვერპლი“. პრეზიდენტი კლინტონი კულტურის თვალსაზრისით ხსნიდა ამ ამბავს.

გაითვალისწინეთ, რომ ზოგიერთ ინგლისურ სიტყვას სხვადასხვა მნიშვნელობა აქვს მსოფლიოს სხვადასხვა ნაწილში. თუ შეერთებული შტატებიდან ინგლისში გაემგზავრებით და ვინმეს სთხოვთ "რესთრუმ"-ი (საპირფარეშო) მიგასწავლოთ, ის მიგიყვანთ იქ, რასაც ამერიკელები "მოსასვენებელ ოთახს" ("ბრეიქრუმს") უწოდებენ (ადგილი, სადაც პერსონალი ისვენებს სამუშაოსგან). თუ ბრიტანელი ადამიანი ეწვევა შტატებს, და მოისურვებს შესვენებას, შეიძლება იკითხოს: სად არის ”რესთრუმ”? ის ძალიან გაკვირვებული დარჩება, როდესაც მას ტუალეტში მიიყვანენ!

სხეულის ენა მნიშვნელოვანია. ამერიკაში შეგიძლიათ ხელის გაშლილი მტევანი დაუქნიოთ ადამიანს მეგობრობის ნიშნად; ნიგერიაში კი ეს ჟესტი წყევლად არის მიჩნეული. ამერიკაში თითის დაქნევის ჟესტით შეიძლება მოუხმო ადამიანს; ჩინეთში ეს ჟესტი გამოიყენება მხოლოდ ძაღლებთან მიმართებაში.

ხალხს შორის მანძილი განსხვავებულია სხვადასხვა კულტურაში. ზოგიერთს ურჩევნია ახლოს იყოს; სხვებს ურჩევნიათ დისტანციის დაცვა. ხმის ჟღერადობაც კი მნიშვნელოვანია. ამერიკელები უფრო ხმამაღალი და ხმაურიანები არიან. ზოგიერთ კულტურაში ასეთი საუბარი უხეშობად არის მიჩნეული.

ადვილი სათქმელია: ”ამ რაღაცეებს მნიშვნელობა არ აქვს; ეს მხოლოდ კულტურული უპირატესობებია. ” თუმცა, თავიდან უნდა ავიცილოთ ყველაფერი, რაც სახარების აზრის გადაცემას გაართულებს. ამიტომ მნიშვნელოვანია ვისწავლოთ იმ ადამიანების კულტურული ჩვევები, ვისთვისაც გვსურს ვიმსახუროთ.

გაკვეთილი მაიმუნისგან

მაიმუნმა მდინარეში თევზი დაინახა. მაიმუნმა გაიფიქრა: ”იმ საწყალ თევზს ჩემი დახმარება სჭირდება! მშრალი მიწაზე კომფორტულად და უსაფრთხოდ ვარ, ხოლო თევზი წყალშია ჩარჩენილი! კეთილი მაიმუნი ვარ; თევზს დავეხმარები.”

მაიმუნი ავიდა ხეზე, რომლის ტოტებიც მდინარის მეორე ნაპირამდე გაზრდილიყო. ის ტოტზე გადავიდა, მიუხედავად იმისა, რომ ეს მისთვის საფრთხეს წარმოადგენდა. საკამოდ დაბლა დაეშვა და თევზი წყლიდან ამოიტაცა. მაიმუნი ხიდან ჩამოვიდა და ფრთხილად დადო თევზი მშრალ მიწაზე. რამდენიმე წუთის განმავლობაში თევზი აღელვებულად ფართხალებდა, მაგრამ მალევე მშვიდად მიყუჩდა. მაიმუნი ბედნიერი წავიდა; ის სხვა არსებას დაეხმარა.

მაიმუნს დახმარება სურდა, სამაგიეროდ მან თევზი მოკლა. რატომ? რადგან მას არ ესმოდა თევზის გარემოსი. მან გააკეთა ის, რასაც თვლიდა, რომ კარგია. კეთილი განზრახვა არ არის საკმარისი; უნდა მოვუსმინოთ მათ, ვისაც ვემსახურებით.[3]

იყავით სხვების მოყვარულნი და პატივისმცემელნი

ალბათ ყველაზე მნიშვნელოვანი რჩევა, რომლის სწავლაც კულტურათაშორისი კომუნიკაციისთვის შეგიძლიათ, 2000 წლის წინ მოგეცათ: ”გიყვარდეს მოყვასი შენი, ვითარცა თავი შენი” (მათე 22:39). ამ პრინციპის პრაქტიკულად გამოყენებისთვის იესომ თქვა: „როგორც გინდათ, რომ მოგექცნენ ადამიანები, თქვენც ასევე მოექეცით მათ, რადგან ეს არის რჯული და წინასწარმეტყველნი” (მათე 7:12).

კომუნიკაციის ერთ-ერთი უმარტივესი პრინციპია დასვათ კითხვა: ”რა მენდომებოდა, რომ ამ ადამიანს ეთქვა ჩემთვის? ვისურვებდი, რომ მათ ჩემზე ეს ხუმრობა ეთქვათ? ვისურვებდი, რომ ასეთი ტონით ელაპარაკათ ჩემთან? ვავლენ სიყვარულს მოყვასის მიმართ?”

ძალიან ხშირად ვუშვებთ შეცდომას, როდესაც ვთვლით, რომ ჩვენი კულტურა უკეთესია სხვა ადამიანების კულტურაზე. უნდა ვისწავლოთ, რომ ჩვენი კულტურა არ არის "უკეთესი"; ის უბრალოდ "განსხვავებულია". სხვისი პატივისცემის სწავლა მნიშვნელოვნად შეუწყობს ხელს ჩვენი კომუნიკაციის უნარის გაუმჯობესებას.

60 წლის ასაკში ჯუნიორს სთხოვეს ტაივანის ეკლესიის პასტორობა. ჯუნიორი არასოდეს ყოფილა შეერთებული შტატების გარეთ. ორმოცი წლის განმავლობაში ის იყო პატარა ეკლესიების მოძღვარი ამერიკული სოფლების თემებში; კაოსიუნგი დიდი ქალაქია. ჯუნიორი არ ფლობდა ინგლისურის გარდა სხვა ენას; ეკლესია იყო ჩინურენოვანი. ობიექტური სტანდარტებით, ჯუნიორი წარუმატებელი იქნება კულტურათაშორის კომუნიკაციაში.

ჯუნიორს მხოლოდ ერთი დადებითი რამ ჰქონდა, როგორც კულტურათაშორის კომუნიკატორს; მას ხალხი უყვარდა! ჯუნიორმა ორი წელი გაატარა კაოსიუნგში. მან ჩინური ენა - მანდარინი არ ისწავლა, მაგრამ საათებს ატარებდა თარჯიმნებთან ერთად, რათა დარწმუნებულიყო, რომ მისი გზავნილი კულტურულ ჭრილში გადაიცა. ხალხი ამ ეკლესიაში მოვიდა არა იმიტომ, რომ ჯუნიორი იყო ძლიერი სპიკერი, არამედ იმიტომ, რომ ჯუნიორი მათ ქუჩაში ხვებოდა, უღიმოდა და უსმენდა, როდესაც ისინი საუბრობდნენ.

ორი წლის შემდეგ მე კაოსიუნგს ვესტუმრე. დასახლებაში გასვლისას მაღაზიის მეპატრონემ ხელი დამიქნია. მან ჩინურად მითხრა: "თქვენ იცნობთ პასტორ ჯუნიორს?" "დიახ. რატომ მეკითხებით?" "მე მიყვარდა პასტორი ჯუნიორი". "თქვენ ქრისტიანი ხართ?" ”არა, მე ბუდისტი ვარ. მაგრამ თუ ქრისტიანი გავხდები, პასტორი ჯუნიორის ეკლესიაში წავალ. ” - რატომ? ”მას ვუყვარდი! ყოველდღე მოდიოდა ჩემს მაღაზიაში. ჩვენ ბევრ რამეზე ვსაუბრობდით მრავალი საათის განმავლობაში ”. გაოცებულმა დავტოვე მაღაზია. ჯუნიორს არ შეეძლო "მრავალი საათი ესაუბრა" ადამიანთან, ვინც ინგლისურს არ ფლობდა. მაგრამ მან სიყვარული გამოიჩინა მაღაზიის ბუდისტი მეპატრონის მიმართ.

ეს ამბავი არ ნიშნავს, რომ სხვა ენის სწავლა უმნიშვნელოა. ის არ აუქმებს ამ გაკვეთილზე ნასწავლ პრინციპებს. ეს ამბავი უბრალოდ ნიშნავს: ”გიყვარდეს მოყვასი შენი”. ღმერთს შეუძლია ჩვენი შეზღუდული შესაძლებლობები გამოიყენოს თავისი დიდებისათვის.

დუეინ ელმერმა დაწერა, რომ სხვებისთვის მსახურება მოითხოვს გაგებას, სწავლას, ნდობას, მიღებას და გახსნილობას. დოქტორ ელმერმა ეს მოდელი კულტურათაშორისი მსახურების შესახებ სწავლებაში გამოიყენა. ის თანაბრად მნიშვნელოვანია კულტურათაშორისი კომუნიკაციისთვისაც.[1]

ეფექტური კომუნიკაცია მოითხოვს:

• გაგებას. გაგება ვერ ხდება სწავლის გარეშე.

• სწავლა. ვერ შეძლებთ ვინმესგან სწავლას, სანამ ნდობა არ გექნებათ.

• ნდობა. ნდობის ასაშენებლად სხვებმა უნდა იცოდნენ, რომ თქვენ მათ აფასებთ, როგორც ადამიანებს. უნდა არსებობდეს მიღება, ისინი მიღებულნი უნდა იყვნენ.

• მიღებულობა. იმისათვის, რომ აგრძნობინოთ მიღებულობა, თქვენ უნდა გამოავლინოთ გახსნილობა.

• გახსნილობა. გახსნილობა არის მზადყოფნა, მიიღოთ ხალხი თქვენს სიახლოვეში და მათ თავი უსაფრთხოდ აგრძნობინოთ.

► განიხილეთ ის შემთხვევა, როდესაც ურთიერთობდით კარგ მსმენელთან. რომელი თვისებები გიადვილებდათ მასთან საუბარს? იმსჯელეთ იმ შემთხვევებზე, როდესაც თქვენ სცადეთ ურთიერთობა ისეთთან, ვინც არ იყო კარგი მსმენელი. რომელი თვისებები ართულებდა მასთან საუბარს? კარგი მსმენელი ხართ?

ვინაიდან მოსმენა ასე მნიშვნელოვანია ეფექტური კომუნიკაციისთვის, ისევე სერიოზულად უნდა მოვეკიდოთ ჩვენი მოსმენის უნარის გაუმჯობესებას, როგორც ვზრუნავთ საუბრისა და წერის უნარების დახვეწაზე. ყველაზე ბრძენმა ადამიანმა, რომელიც ოდესმე ცხოვრობდა, გაგვაფრთხილა, რომ უგუნურება და სირცხვილია მოსმენამდე პასუხის გაცემა (იგავები 18:13).

ჯონ სიმანდსმა მოყვა შრი-ლანკაში მყოფი ქრისტიანი მისიონერის ამბავი, რომელსაც ბუდისტი მღვდელი სტუმრობდა. ბუდისტი მღვდელი მოვიდა ქრისტიანობის შესახებ წიგნების სათხოვნელად. ქრისტიანმა მისიონერმა უთხრა: „გაინტერესებთ ქრისტიანობა?“ ბუდისტმა მღვდელმა უპასუხა: ”არა, მე არ მაინტერესებს, მაგრამ ვამზადებ ახალგაზრდა ბერებს, რომლებიც ბუდისტ მისიონერებად წავლენ დასავლეთში. მე ვფიქრობ, რომ ისინი მანამდე უნდა გაეცნონ ადგილობრივების რელიგიას, სანამ იქ ჩავლენ.”[1]

ამ ბუდისტმა მღვდელმა იცოდა, რომ ის უნდა დახმარებოდა თავის სტუდენტებს იმის გაგებაში, თუ რა რელიგია ჰქონდა ხალხს, რომლის „ევანგელიზაციასაც“ აპირებდნენ. რამდენად მნიშვნელოვანია ქრისტიანებისთვის შევიმეცნოთ მათი სწავლება, ვისთანაც ჭეშმარიტი სახარება უნდა მივიტანოთ!

ამ ნაწილში გავიგებთ რჩევებს უკეთესი მოსმენისთვის. ეს ეხება კულტურათაშორის კომუნიკაციას, ისევე როგორც ნებისმიერი სხვა ტიპის კომუნიკაციას.

განსხვავებაა "გაგონებასა" და "მოსმენას" შორის. მაგალითად, თქვენ შეიძლება გაიგონოთ ვინმეს საუბარი სხვა ენაზე, რომლის ვერცერთ სიტყვას ვერ გაიგებთ. თქვენ "გაიგონეთ", მაგრამ არ გესმოდათ. ლოზანის უილოვბანკის მოხსენებით, რომელიც მსოფლიოს სხვადასხვა ქვეყნის ქრისტიანმა ლიდერებმა გამოაქვეყნეს, გაკეთდა მოწოდება ევანგელისტების, მისიონერების, პასტორებისა და ქრისტიანი ლიდერების მიმართ: "მოუსმინეთ გულდასმით, იმისათვის, რომ ჩაწვდეთ და გააცნობიეროთ.”[2]

(1) მოიცილეთ ყურადღების გამფანტველი ფაქტორები

ჩვენ ვცხოვრობთ ყურადღების გამფანტავი საშუალებებით სავსე სამყაროში. ტელევიზია, რადიო, ინტერნეტი, მობილური ტელეფონები, ტექსტური შეტყობინებები და სხვა მოწყობილობები ჩვენს ყურადღებას იბყრობს. თუ ნამდვილად გვსურს ვინმეს მოსმენა, უნდა გავთიშოთ სხვა ყურადღების გადამტანი საშუალებები და ყურადღება მივაქციოთ მას.

ერთხელ ვსტუმრობდი ერთ ადამიანს, რომელიც ხშირად წყვეტდა საუბარს მობილურზე პასუხის გასაცემად. ყოველ ჯერზე, ის ამბობდა: ”შენთან საუბარი ბევრად უფრო მნიშვნელოვანია, ვიდრე ტელეფონზე პასუხის გაცემა, მაგრამ მაპატიე, სანამ ერთ ზარს ვუპასუხებ. ერთ საათში მან შვიდ სატელეფონო ზარს უპასუხა. მისმა ხმამ თქვა: ”შენ უფრო მნიშვნელოვანი ხარ”; მაგრამ მის მოქმედებებში ცხადადაა ნათქვამი: ”ჩემი მობილური ტელეფონი უფრო მნიშვნელოვანია!”

ჭეშმარიტი მოსმენა მოითხოვს, რომ ჩვენ ყურადღების ფოკუსირება სხვა ადამიანზე მოვახდინოთ. ბევრი რამ გვიშლის ხელს ნამდვილ მოსმენაში:

• სხვა რამეებზე ფიქრი ("რა არის შემდეგ ჩემს საქმეების სიაში?")

• სხვაზე შთაბეჭდილების მოხდენის მცდელობა ("იმედი მაქვს დავარწმუნებ, რომ მართალი ვარ")

• დაგეგმვა, რას ვიტყვით, როდესაც ისინი საუბარს შეწყვეტენ.

ჭეშმარიტი მოსმენა ნიშნავს ყველაფრის გვერდზე გადადებას და ყურადღების გამახვილებას მასზე, ვინც საუბრობს.

ბავშვობაში ვცდილობდი მამასთან საუბარს, როდესაც ის გაზეთს კითხულობდა. ის შესაბამის დროს რაღაცას წაილუღლუღებდა. დარწმუნებული ვარ, მას ეგონა, რომ მისმენდა, მაგრამ არა. ერთხელ გიჟური ამბავი ვუამბე, როდესაც ის თავისი გაზეთის კითხვას განაგრძობდა. მან განაგრძო ლუღლუღი: "ჰო, ეგ კარგია" და ვერც კი მიხვდა, რომ ჩემი ამბავი მთლიანად შეთხზული იყო.

(2) სხეულის ენა მნიშვნელოვანია

კომუნიკაციის მნიშვნელოვანი ასპექტი არის სხეულის ენა. არ არის საკმარისი მოსმენა; სხვამ უნდა იცოდეს, რომ უსმენთ.

დაჯექით იქ, სადაც ისინი კომფორტულად იგრძნობენ თავს და სადაც შეგიძლიათ თვალებში უყუროთ. ხშირად, უკეთესია დატოვოთ სამუშაო მაგიდა და უფრო თანაბარ მდგომარეობაში დაჯდეთ, როდესაც ესაუბრებით ეკლესიის წევრს ან თუ თქვენს დაქვემდებარებაში მყოფ პირს კონსულტაციას უწევთ. ხალხი ხშირად ყოყმანობს, რომ გულწრფელი იყოს იმ პიროვნების მიმართ, ვინც სამუშაო მაგიდას უზის. იმისათვის, რომ იყოთ უკეთესი კომუნიკატორი, გააკეთეთ ყველაფერი, რაც ხელს შეუწყობს სხვების მოდუნებას, განმუხტვას და გაუმარტივებს კომუნიკაციას.

(3) გააკეთეთ ჩანაწერები

სიტუაციიდან გამომდინარე, ჩანაწერების გაკეთებამ შეიძლება მიანიშნოს, რომ კარგი მსმენელი ხართ. ოფიციალურ გარემოში, მაგალითად, საკლასო ოთახში ან საბჭოს სხდომაზე, ჩანიშვნების გაკეთება მოგცემთ მოსმენილის კარგ ჩანაწერს. კერძო საუბრებში ან საკონსულტაციო შეხვერდრებზე შეიძლება სხვა პირისგან ნებართვის თხოვნა დაგჭირდეთ. შეგიძლიათ უბრალოდ თქვათ: ”მინდა რამდენიმე ჩანიშვნის გაკეთება, რომ დამეხმაროს უკეთესად კონცენტრირებაში.”

გამყიდველი რომ ყოფილიყავით, გენდომებოდათ, რომ ძალიან კარგად გესმოდეთ თქვენი მომხმარებლების. თქვენ გენდომებოდათ დარწმუებულიყავით, რომ ხელი არ შეუშალეთ თქვენს გაყიდვებს, რადგან ვერ შეძელით მკაფიო კომუნიკაცია.

როგორც მსახური ან ქრისტიანი ლიდერი, თქვენ არ "ყიდით" სახარებას, მაგრამ თქვენ აზიარებთ ხსნის კეთილ უწყებას. მსახურისთვის კომუნიკაცია კიდევ უფრო მნიშვნელოვანია, ვიდრე ჩვეულებრივი ბიზნესმენისთვის. პავლეს მსგავსად, შენც გინდა ყველაფერი გააკეთო იმისთვის, რომ სხვები მოიპოვო ქრისტესთვის. დროის დათმობა, იმისთვის რომ გაუგოთ თქვენს აუდიტორიას აგინაზღაურდებათ უფრო ეფექტური მსახურებით.

(1) შემდეგი გაკვეთილის დასაწყისში თქვენ გაივლით ტესტს ამ გაკვეთილის მასალის საფუძველზე. მომზადებისას ყურადღებით შეისწავლეთ ტესტის კითხვები.

(2) იპოვნეთ ადგილი, სადაც შეგიძლიათ მოინახულოთ სხვა კულტურის წარმომადგენელი. ეს შეიძლება იყოს რესტორანი, ეკლესია ან რომელიმე საზოგადოებრივი ორგანიზაცია. თქვენი პირველი ვიზიტის დროს, ნუ ეცდებით მახარობლობას. ამის ნაცვლად, წადით მოსასმენად და სასწავლებლად. დასვით კითხვები, იყავით მეგობრული და გამოავლინეთ სიყვარული. თქვენი ვიზიტის შემდეგ გაუზიარეთ თქვენი გამოცდილება თქვენს კლასს. რა ისწავლეთ სხვა კულტურის წარმომადგენლებთან დროის გატარებით?

(1) ჩამოთვალეთ ძველი აღთქმის კულტურათაშორისი კომუნიკაციის ორი მაგალითი.

(2) როგორ გახადა მათეს 28-ე თავში გადმოცემულმა იესოს დავალებამ კულტურათაშორისი ურთიერთობა კიდევ უფრო მნიშვნელოვანი?

(3) ჩამოთვალეთ ამ გაკვეთილზე ნასწავლი ხუთი პრაქტიკული მოსაზრება კულტურათაშორისი კომუნიკაციის შესახებ.

(4) რატომ არის იუმორი რთული საკითხი კულტურათაშორისი კომუნიკაციის თვალსაზრისით?

(5) რა თქვა იესომ, რა ეხმარება ყველა კულტურათაშორის კომუნიკაციას?

(6) დოქტორ ელმერის აზრით, რა არის ხუთი ინგრედიენტი, რომელიც აუცილებელია ეფექტური მსახურის ან კომუნიკატორისთვის?

(7) ჩამოთვალეთ სამი პრაქტიკული ნაბიჯი, რათა გახდეთ უკეთესი მსმენელი.