Lesson 1: კომუნიკაციის თეოლოგია

ამ გაკვეთილის ბოლოს სტუდენტმა უნდა:

(1) გაათვითცნობიეროს კომუნიკაციის მნიშვნელობა ღვთის სამეფოში.

(2) სცნობდეს ღმერთის კომუნიკაციის გზებს სამების პიროვნებებს შორის, სხვა სულიერ არსებთან და კაცობრიობასთან.

(3) აფასებდეს იესოს დედამიწაზე ყოფნისას, მისი კომუნიკაციის სხვადასხვა მეთოდს.

(4) აღიარებდეს კომუნიკაციის უნარს, ღვთის ხატების ნაწილად კაცობრიობაში.

(5) პატივს სცემდეს ადამიანურ ენას, როგორც სიკეთისა და ბოროტების აღსრულების საშუალებას.

კომუნიკაცია არის ინფორმაციის გადაცემა ერთი ადამიანიდან მეორეზე. კომუნიკაცია მოიცავს ქადაგებას, სწავლებას, ერთი ერთზე კომუნიკაციას, წერას, დრამას და ინდივიდებს შორის ინფორმაციის გაზიარების სხვა გზებს.

მქადაგებლებისთვის და მასწავლებლებისთვის კომუნიკაცია განსაკუთრებით მნიშვნელოვანია. თუ მექანიკოსს არ შეუძლია კარგად კომუნიკაცია, არ ვღელავთ. თუ მას შეუძლია შეაკეთოს მანქანა, ჩვენ ბედნიერები ვართ. კარგი მზარეული აუცილებელი არ არის იყოს კარგი მოსაუბრე. მან უბრალოდ უნდა იცოდეს, როგორ მოამზადოს კარგი საკვები. ფერმერმა შეიძლება არ იცოდეს ლაპარაკი, თუ იცის მცენარეული კულტურების დარგვა, გაშენება და მოსავლის აღება.

ამავდროულად, მქადაგებელს ან მასწავლებელს კომუნიკაციის უნარი აუცილებლად უნდა ჰქონდეს. ქადაგების ან სწავლების მოწოდება არის კომუნიკაციის უნარის ქონის მოწოდება. ამის გამო, მქადაგებლებმა და მასწავლებლებმა უფრო მეტი უნდა იცოდნენ კომუნიკაციისა და საჯაროდ გამოსვლის შესახებ, ვიდრე ადამიანების უმეტესობამ.

ქრისტიანი ლიდერების კომუნიკაციის სამი ძირითადი ფორმაა: ქადაგება, სწავლება და წერა. ეს კურსი ყურადღებას გაამახვილებს ამ სამ ფორმაზე.

კომუნიკაციის უნარი არ ნიშნავს, რომ ყველა მასწავლებელს ან მქადაგებელს უნდა ჰქონდეს პრეზიდენტის ან ცნობილი სპიკერის უნარი. კომუნიკაციის მრავალი სხვადასხვა სტილი არსებობს. ზოგიერთი ადამიანი ძალიან კარგი კომუნიკატორი ხდება, მიუხედავად იმისა, რომ ისინი არ არიან შესანიშნავი საზოგადოებრივი ორატორები. ამ კურსის მიზანია უკეთეს კომუნიკატორთა მომზადება ღვთის სამეფოსთვის სამსახურებლად.

ამ პირველ გაკვეთილზე ვნახავთ, რომ კომუნიკაცია მნიშვნელოვანია ღმერთის სამეფოში.

ღმერთი არის პიროვნება, რომელიც ურთიერთობს სხვებთან. მრავალი რელიგიის უპიროვნო ღმერთებისგან განსხვავებით, ღმერთი არის კომუნიკატორი. ბიბლია გვიჩვენებს სამების კომუნიკაციას, ანგელოზებთან და სატანასთანაც კი კომუნიკაციას და ადამიანებთან ურთიერთობას.

მამა ურთიერთობს სამების სხვა პირებთან

ბიბლიის დასაწყისში ვკითხულობთ:

თქვა ღმერთმა: "იყოს ნათელი!” და იქმნა ნათელი. კვლავ თქვა ღმერთმა: "შევქმნათ კაცი ჩვენს ხატად და ჩვენს მსგავსად; დაე იბატონოს ზღვაში თევზზე, ცაში ფრინველზე, პირუტყვზე, მთელ დედამიწაზე და ყოველ ქვეწარმავალზე, რომელიც დაძვრება მიწაზე” (დაბადება 1:3, 26).

ვის ელაპარაკებოდა ღმერთი? ღმერთი ესაუბრებოდა ღმერთს. სამების ერთი პირი ესაუბრებოდა სამების სხვა პირს; "შევქმნათ…”

ნოეს დღეებში ღმერთი სამების შიგნით ურთიერთობდა.

მაშინ შეწუხდა უფალი, ადამიანი რომ შექმნა ამქვეყნად და დანაღვლიანდა. თქვა უფალმა: "აღვგვი მიწის პირისაგან კაცს, ჩემ მიერ გაჩენილს, ასევე პირუტყვს, ქვეწარმავალსა და ცის ფრინველს, რადგან ვნანობ, რომ შევქმენი ისინი” (დაბადება 6:6-7).

ჩვენ არ ვიცით, როგორ ურთიერთობდა სამება ერთმანეთთან, მაგრამ როგორც გონიერი არსებები, ისინი ურთიერთობდნენ ერთმანეთთან.

ღმერთი ურთიერთობს სულიერ არსებებთან

იობის წიგნი მოგვითხრობს ღმერთსა და სატანას შორის საუბარზე.

და მივიდნენ ერთ დღეს ღვთის ძენი უფლის წინაშე წარსადგომად და სატანაც მივიდა მათ შორის. ჰკითხა უფალმა სატანას: "საიდან მოხვედი?” მიუგო სატანამ უფალს: "ქვეყნად დავწანწალებდი და მიმოვდიოდი” (იობი 1:6-7).

ჩვენ ბევრი არაფერი ვიცით ამ კონფერენციის შესახებ, მაგრამ ვიცით, რომ უფალი ელაპარაკებოდა სატანას, სულიერ არსებას.

როდესაც დავითი მოსახლეობის აღრიცხვისთვის ისჯებოდა, ღმერთმა ანგელოზს მიმართა. ანგელოზს მოჰქონდა სასჯელი მიწაზე. როდესაც ანგელოზი ორნან იებუსელის კალოსთან მივიდა, "უფალმა უბრძანა ანგელოზს და მან მახვილი ისევ ქარქაშში ჩააგო” (1 ნეშტთა 21:27. იხილეთ ასევე ზაქარია 1:13.). ღმერთი ურთიერთობს სულიერ არსებებთან.

ღმერთი ურთიერთობს ადამიანებთან

შექმნა ღმერთმა კაცი თავის ხატად, ღვთის ხატად შექმნა იგი. მამაკაცად და დედაკაცად შექმნა ისინი. აკურთხა ღმერთმა ისინი და უთხრა: "ინაყოფიერეთ და იმრავლეთ, აავსეთ ქვეყანა და იუფლეთ მასზე; იბატონეთ ზღვაში თევზებზე, ცაში ფრინველებზე, და ყოველ ცოცხალ არსებაზე, რაც კი მიწაზე იძვრის. თქვა ღმერთმა: "აჰა, მოგეცით საჭმელად ყოველი ბალახი თესლის მთესველი და ნაყოფიერი ხე, რაც დედამიწის ზურგზეა”. მიწის ყველა ცხოველს, ცის ყველა ფრინველს და ყველა ქვეწარმავალს დედამიწაზე, რასაც სიცოცხლის სუნთქვა აქვს, მცენარეები მივეცი საჭმელად”. და იქმნა ასე (დაბადება 1:27-30).

როდესაც ღმერთმა შექმნა ადამიანები, მან ისინი თავის ხატად შექმნა. ამ ხატების ნაწილი იყო კომუნიკაციის უნარი. ღმერთი ესაუბრებოდა ადამს და ევას. მან მათ ორი მცნება მისცა. პირველ რიგში, ისინი ნაყოფიერი უნდა ყოფილიყვნენ და მათი რიცხვი კიდევ უფრო უნდა გაზრდილიყო. მეორე, მათ დედამიწაზე უნდა ეზრუნათ. ადამიანებმა თავიანთი პასუხისმგებლობა კომუნიკაციის საშუალებით შეიტყვეს.

მთელს ბიბლიაში ვხედავთ, რომ ღმერთი აგრძელებს ადამიანებთან ურთიერთობას.

• ის ურთიერთობდა ადამთან და ევასთან, როდესაც საღამოხანს მიმოდიოდა ბაღში და ესაუბრებოდა მათ (დაბადება 3:8).

• ის ურთიერთობდა აბრაამთან კაცის შესახედაობის მიღებით და მასთან ერთად საჭმლის ჭამით (დაბადება 18:7).

• მას იოსებთან კომუნიკაცია სიზმრის საშუალებით ჰქონდა (დაბადება 37:5).

• მოსესთან ურთიერთობდა ცეცხლოვანი მაყვლოვანის საშუალებით (გამოსვლა 3:2).

• სამუელთან ხედვის საშუალებით ჰქონდა კომუნიკაცია (1 სამუელი 3:4-15).

• დავითთან წინასწარმეტყველის საშუალებით ურთიერთობდა (2 სამუელი 12:1).

• ის იოსებს სიზმრის საშუალებით დაუკავშირდა (მათე 1:20; მათე 2:13, 19, 22).

• მან დაამოწმა იესოზე ზეციური ხმით (მათე 3:17).

• პეტრესთან კავშირი ტრანსის საშუალებით დაამყარა (საქმეები 10:10-15).

• ის პავლესთან ხილვების საშუალებით ურთიერთობდა (2 კორინთელები 12:1).

• ის დღეს თავისი სულით ურთიერთობს ჩვენთან (რომაელები 8:16).

იესო არის სიტყვა

იოანემ წინასწარ აღწერა იესო ხორცშესხმამდე.

დასაწყისში იყო სიტყვა, და სიტყვა იყო ღმერთთან, და სიტყვა იყო ღმერთი. ის იყო დასაწყისში ღმერთთან… და სიტყვა გახდა ხორცი და დამკვიდრდა ჩვენ შორის მადლითა და ჭეშმარიტებით აღსავსე და ჩვენ ვიხილეთ მისი დიდება, როგორც მამისგან მხოლოდშობილის დიდება (იოანე 1:1, 2, 14).

ყველა სიტყვიერ სურათს შორის, რომლის შერჩევაც იოანეს შეეძლო, მან აირჩია ცნება „სიტყვა“. სიტყვა არის კომუნიკაციის ყველაზე პატარა ერთეული და ყველა კომუნიკაციის საფუძველი. სიტყვების გარეშე, კომუნიკაცია მცირეა. მაშინაც კი, როდესაც ჩვენ ვსაუბრობთ უსიტყვოდ, სიმბოლოები, რომლებსაც ვიყენებთ, წარმოადგენენ სიტყვებს. ის ფაქტი, რომ იესო აღწერილია, როგორც „სიტყვა“, იმაზე მეტყველებს, რომ როდესაც იესო ამქვეყნად მოვიდა, მას ჰქონდა ჩვენთვის რაღაც სათქმელი. იესოს საქმეები მისი სიტყვების დადასტურება იყო.

იესო დიდ დროს უთმობდა კომუნიკაციას

სახარების დაახლოებით ნახევარი შედგება იესოს სიტყვებისგან. 500 – ზე მეტჯერ სახარებებში ნაჩვენებია, რომ იესო საუბრობს, კითხვებს უსვამს და პასუხობს ხალხს. სხვა დროს, ჩვენ ვხედავთ, რომ ის უსმენს, როდესაც სხვები საუბრობენ. ყურადღება მიაქციეთ იესოს კომუნიკაციის რამდენიმე მიმართულებას:

• ის ურთიერთობდა მეგობრებთან.

• ის ურთიერთობდა ოჯახთან.

• ის ურთიერთობდა თავის მოწაფეებთან.

• ის ესაუბრა ქალს ჭასთან.

• მან მიმართა ავაზაკს ჯვარზე.

• ის ელაპარაკებოდა ხალხს სინაგოგაში.

• მან მიმართა მრუშობაში წასწრებულ ქალს.

• მას კომუნიკაცია უწევდა ავადმყოფებთან და შეზღუდული შესაძლებლობების მქონე ადამიანებთან.

• ის ელაპარაკებოდა პილატეს, ჰეროდეს და მის სხვა ბრალმდებლებს.

• ის სიტყვით მიმართავდა უამრავ ხალხს, მათ შორის ერთდროულად 5000-ს.

ის ურთიერთობდა ფარისევლებთან, სადუკეველებთან და სხვა ჯგუფებთან.

ყურადღება მიაქციეთ რამდენიმე ხერხს, რომელსაც იესო კომუნიკაციისთვის იყენებდა:

• მღეროდა.

• ასწავლიდა.

• აქებდა.

• საყვედურობდა.

• ქადაგებდა.

• რჩევას აძლევდა

• ის ამბებს ყვებოდა.

• ლექციებს კითხულობდა (სწავლებას ატარებდა).

• იგავებს ამბობდა.

• სვამდა კითხვებს.

• კომპლიმენტებს აძლევდა.

• კითხვებს პასუხობდა.

• საგნობრივ სწავლებებს უტარებდა.

• კითხულობდა ძველ აღთქმას.

• ლოცულობდა საჯაროდ და განცალკევებით.

• ის აგზავნიდა მოწაფეებს პრაქტიკულ მისიებზე.

საუბრით კომუნიკაციის გარდა, იესო იყენებდა დრამატულ კომუნიკაციას. იესოს მრავალი მოქმედება გამიზნული იყო კომუნიკაციისთვის. ერთხელ ის დაიხარა და მიწაზე წერდა. ჩვენ არ ვიცით რა დაწერა მან, მაგრამ წერის პროცესმა რაღაც კომუნიკაცია მოახდინა.

როდესაც იესომ ტაძრიდან გაყარა ფულის გადამცვლელები და ბიზნესმენები, იგი გამოხატავდა უკმაყოფილებას იმის გამო, რასაც ისინი აკეთებდნენ. სხვა შემთხვევაში, იესომ დაწყევლა ლეღვი. ლეღვის ხის დაწყევლის მიზანი იყო არა ლეღვის ხე, არამედ მისი მოწაფეებისთვის გზავნილის გადაცემის საშუალება.

იესოს თითოეული სასწაული მიზნად ისახავდა რაიმეს სწავლებას. მათი მოხდენა ნაწილობრივ ემსახურებოდა იესოს გზავნილის დადასტურებას. ჩვეულებრივ ადამიანს არ შეუძლია გააკეთოს ის, რაც იესომ გააკეთა. ის, რომ მას შეეძლო მათი გაკეთება, ნიშნავდა, რომ ის არ იყო ჩვეულებრივი ადამიანი.

კომუნიკაციის როლი იესოს მსახურებაში, რომელიც მთლიანად და სრულად ღმერთი იყო, აჩვენებს კომუნიკაციის მნიშვნელობას. კომუნიკაციის გარეშე, ჩვენ არ შეგვიძლია გავაკეთოთ ის, რაც ღმერთმა განგვისაზღვრა და რის გასაკეთებლადაც მოგვიწოდა. კომუნიკაცია უმნიშვნელოვანესია იმ მიზნებისათვის, რომლებიც ღმერთმა მოგვცა ამ ცხოვრებაში.

კომუნიკაცია ღვთის ხატის ნაწილია ადამიანებში

როდესაც ღმერთმა შექმნა ადამიანი, მან თქვა: "შევქმნათ კაცი ჩვენს ხატად და ჩვენს მსგავსად” (დაბადება 1:26). ჩვენ არ გვესმის კაცობრიობაში ღვთის ხატების ყველა ასპექტი, მაგრამ, როგორც ჩანს, კომუნიკაციის შესაძლებლობა ამ მსგავსების ნაწილია.

უსულო ობიექტებს არ აქვთ კომუნიკაციის უნარი. ქარი ქროლვისას, ისევე როგორც მდინარე დინებისას, გამოსცემს ხმას, მაგრამ ხმის გამოცემა არ ნიშნავს კომუნიკაციას. კომუნიკაცია მოითხოვს აზროვნების უნარს, ხოლო უსულო ობიექტებს ინტელექტი არ აქვთ.

ცხოველებს აქვთ კომუნიკაციის შეზღუდული შესაძლებლობა. მათ შეუძლიათ გააფრთხილონ ერთმანეთი საფრთხის შესახებ. მათ შეუძლიათ შეატყობინონ, რომ საკვებია ხელმისაწვდომი. თუმცა, მათ არ შესწევთ უნარი იქონიონ ადამიანების მსგავსი დეტალური კომუნიკაცია.

კომუნიკაცია ჩვენი კაცობრიობის მნიშვნელოვანი ნაწილია. ყოველდღიური მუშაობის დიდ ნაწილს კომუნიკაციის საშუალებით ვაკეთებთ. ჩვენ ერთი თაობის სიბრძნეს მეორე თაობას კომუნიკაციის საშუალებით გადავცემთ. კომუნიკაციის საშუალებით ვირთობთ თავს.

ჩვენ სხვებს შეცდომებს ურთიერთობის საშუალებით ვუსწორებთ. ნათანმა დავითი ამბის საშუალებით ამხილა. პავლემ წერილით ამხილა გალატელები. ჩვენ კომპლიმენტებს ვუკეთებთ, ვაქებთ სხვებს კომუნიკაციის საშუალებით. პავლეს წერილები ხშირად იწყება შექებით. კომუნიკაცია მნიშვნელოვანია კაცობრიობისთვის.

ღმერთი აფრთხილებს კომუნიკაციის ბოროტად გამოყენების წინააღმდეგ

ღმერთი გვაფრთხილებს, რომ ჩვენ ბოროტად არ უნდა გამოვიყენოთ კომუნიკაციის უნარი. ეშმაკს არ შეუძლია შექმნას; მას მხოლოდ ღმერთის შექმნილის დამახინჯება შეუძლია. ღმერთის ხატების სხვა ასპექტების მსგავსად, კომუნიკაციის უნარიც შეიძლება ბოროტად იქნას გამოყენებული. სატანა ცდილობს დაამახინჯოს ჩვენი კომუნიკაციის უნარი. სიცრუე, ჭორი და ცილისწამება არის კომუნიკაციის დამახინჯება.

(1) ჩვენ არ უნდა ვიცრუოთ.

• “ამიტომ განიშორეთ სიცრუე და თითოეულმა ჭეშმარიტება ელაპარაკოს თავის მოყვასს, ვინაიდან ერთიმეორის ნაწილები ვართ” (ეფესელთა 4:25).

• “ნუ იცრუებთ ერთიმეორის მიმართ, რადგან შემოძარცული გაქვთ ძველი კაცი მის საქმეებთან ერთად” (კოლასელთა 3:9).

• “ნუ იცრუებთ ერთიმეორის მიმართ, რადგან შემოძარცული გაქვთ ძველი კაცი მის საქმეებთან ერთად” (ფსალმუნი 33:13).

• “ამრიგად, მოიშორეთ ყოველგვარი ბოროტება, ყოველგვარი მზაკვრობა და პირფერობა და შური და ყოველგვარი ავსიტყვაობა” (1 პეტრეს 2:1).

(2) ჩვენ არ უნდა ვიჭორაოთ და ცილი არ უნდა დავწამოთ სხვებს.

• “ჭორი არ გაავრცელო შენს ხალხში; საფრთხეში არ ჩააგდო შენი მოყვასის სიცოცხლე. მე ვარ უფალი..” (ლევიანთა 19:16).

• “ძმებო, ნუ ძრახავთ ერთმანეთს. ძმის დამძრახავი და განმკითხველი, რჯულს ძრახავს და რჯულს განიკითხავს. თუ რჯულს განიკითხავ, აღმსრულებელი კი აღარ ხარ, არამედ განმკითხველი” (იაკობის 4:11).

(3) ჩვენ არ უნდა ვგმობდეთ ღმერთს.

• “ღმერთს ნუ დაგმობ და შენი ხალხის თავკაცს ნუ დასწყევლი” (გამოსვლა 22:28).

• “ამიტომ გეუბნებით თქვენ: ყოველი ცოდვა და გმობა მიეტევებათ ადამიანებს, მაგრამ სულიწმიდის გმობა არ მიეტევებათ” (მათე 12:31).

(4) არ უნდა დავწყევლოთ ან შეურაცხვყოთ სხვები.

• “ლოცეთ თქვენი მდევნელები, ლოცეთ და ნუ წყევლით” (რომაელთა 12:14).

• “გსმენიათ, რომ ძველ ხალხს ეთქვათ: არა კაც კლა! ვინც მოკლავს, მსჯავრდადებული იქნება. მე კი გეუბნებით თქვენ, რომ ყოველი, ვინც თავის ძმას უმიზეზოდ განურისხდება, სამსჯავროს თანამდები იქნება; ვინც თავის ძმას ეტყვის - რაკა, სინედრიონის თანამდები იქნება; ხოლო, ვინც ეტყვის სულელოო, ცეცხლის გეენას თანამდები იქნება” (მათე 5:21-22).

ყველაზე ფასეული, ყველაზე საშიში

უძველესი ლეგენდა მოგვითხრობს მეფეზე, რომელმაც გაგზავნა მსახური, თავის სამეფოში ყველაზე ძვირფასი რამის მოსაძებნად. რამდენიმე კვირის ძებნის შემდეგ, მსახური დაბრუნდა და უთხრა: „თქვენო უდიდებულესობავ, თქვენს სამეფოში ყველაზე ძვირფასი ენაა. ენით, ბრძენ ადამიანს შეუძლია დაარწმუნოს სხვა ადამიანები, რომ გონივრულად მოიქცნენ; მართალ ადამიანს შეუძლია დაარწმუნოს სხვები, გააკეთონ ის, რაც მართებულია. ენა არის ყველაზე ღირებული რამ თქვენს სამეფოში.”

ამის შემდეგ მეფემ გაგზავნა თავისი მსახური, რომ მის სამეფოში ყველაზე საშიში რამ ეპოვნა, რათა მათ შეძლებოდათ მისი თავიდან მოშორება. რამდენიმე კვირის შემდეგ მსახური დაბრუნდა და უთხრა: „თქვენო უდიდებულესობავ, ყველაზე საშიში რამ თქვენს სამეფოში ენაა. ენით სულელს შეუძლია დაარწმუნოს გარშემომყოფები, რომ სულელურად მოიქცნენ. ენით ბოროტ ადამიანს შეუძლია დაარწმუნოს სხვები ბოროტება ჩაიდინონ. ენა არის ყველაზე საშიში რამ თქვენს სამეფოში.”

► წაიკითხეთ ფსალმუნი 14. ჩამოთვალეთ ამ ფსალმუნში მოყვანილი ურთიერთობის არასწორი გზები, რომელთა საშუალებითაც შეგვიძლია კომუნიკაცია.

► წაიკითხეთ იაკობი 3:1-12. იმსჯელეთ ენის ძალაზე როგორც სასიკეთოდ, ასევე ბოროტებისთვის.

კომუნიკაციის გამოყენება შეიძლება სასიკეთოდ

იაკობი ამბობს, რომ ყოველი კეთილი მისაცემელი და სრულყოფილი ნიჭი ღმერთისგან მოდის (იაკობის 1:17). კომუნიკაცია ღვთის ერთ-ერთი ნიჭი, ანუ საჩუქარია ჩვენთვის. უამრავი საოცარი რამის გაკეთება შეგვიძლია ამ ნიჭით:

• ჩვენ შეგვიძლია ვილოცოთ.

• ჩვენ შეგვიძლია ვადიდოთ ღმერთი.

• ჩვენ შეგვიძლია ღმერთის თაყვანისცემა.

• ჩვენ შეგვიძლია სხვები ვანუგეშოთ.

• ჩვენ შეგვიძლია სხვების გამხნევება.

• ჩვენ შეგვიძლია სხვებს ჭეშმარიტება ვასწავლოთ.

• ჩვენ შეგვიძლია ვამხილოთ ისინი, ვინც გზას გადაუხვია.

ღმერთმა აირჩია ადამიანური კომუნიკაციის გამოყენება თავისი სამეფოს გასაფართოვებლად.

მოვიდა მათთან იესო და უთხრა: "მოცემული მაქვს მე მთელი ხელმწიფება ზეცაში და დედამიწაზე. ამიტომ წადით და დაიმოწაფეთ ყველა ხალხი და მონათლეთ ისინი მამის, ძის და სულიწმიდის სახელით. ასწავლეთ მათ ყოველივეს დაცვა, რაც მე გამცნეთ. და აჰა, მე თქვენთანა ვარ ყოველდღე წუთისოფლის აღსასრულამდე” (მათე 28:18-20).

პავლემ ახალგაზრდა ტიმოთეს მისცა რჩევა კომუნიკაციის სასიკეთოდ გამოყენებასთან დაკავშირებით.

• “რაც მრავალი მოწმის თანდასწრებით მოისმინე ჩემგან, ის გადაეცი ერთგულ ადამიანებს, რომელთაც სხვათა განსწავლის უნარიც ექნებათ” (2 ტიმოთეს 2:2).

• “მონას ღვთისას კი ჩხუბი არ მართებს, არამედ შემწყნარე უნდა იყოს ყველას მიმართ და მოთმინებით დამმოძღვრავი” (2 ტიმოთეს 2:24).

ჩვენ ვართ პასუხისმგებლები ჩვენს კომუნიკაციაზე

ჩვენი პასუხისმგებლობაა ურთიერთობა ვიქონიოთ ღმერთთან.

ღმერთმა შექმნა ადამიანები მასთან კომუნიკაციის უნარით. წმინდა წერილში აღნიშნულია ღმერთთან პოზიტიური კომუნიკაციის მრავალი გზა:

• საუბარი ღმერთთან (დაბადება 17:18; გამოსვლა 3:11; რიცხვნი 22:10; მსაჯულები 6:36).

• ლოცვა ღმერთის მიმართ (დაბადება 20:17; ლუკა 6:12; საქმეები 4:24; რომაელები 15:30).

• ღმერთის მიმართ ღაღადი (გამოსვლა 8:12; იობი 38:41; ფსალმუნი 56:2; 77:1).

• ღმერთისთვის აღთქმის დადება (რიცხვნი 21:2; 30:2; ეკლესიასტე 5:4).

• ღმერთის მიმართ ვედრება (მეორე რჯული 15:9; იობი 5:8 რომაელები 11:2).

• ღმერთისთვის დიდების მიძღვნა (იესო ნავეს ძე 7:19; იოანე 9:24; რომაელები 4:24).

• ღმერთისთვის გალობა (მსაჯულები 5:3; ნეემია 12:46; ფსალმუნი 47:6-7; 59:17; კოლასელთა 3:16).

• ღმერთის მოხმობა (ფსალმუნი 4:1; 55:16).

• ღმერთის ქება (ფსალმუნი 66:20; ლუკა 5:26; 17:18; საქმეები 12:23; რომაელები 15:7).

• ღმერთისთვის თხოვნით მიმართვა (დანიელი 9:20; ფილიპელთა 4:6).

• ღმერთის მიმართ მადლიერების გამოხატვა (ლუკა 2:38; საქმეები 27:35; რომაელები 14:6).

წმინდა წერილი ასევე გვაფრთხილებს ღმერთთან ურთიერთობის უარყოფითი გზების წინააღმდეგ:

• ღვთის გმობა (გამოსვლა 22:28).

• ღმერთის დაწყევლა, გინება (იობი 2:9).

• ღმერთის მოტყუება (საქმეები 5:4).

• ღვთის დაცინვა (4 მეფეთა19:16).

ჩვენ პასუხისმგებლები ვართ კომუნიკაციაზე ერთმანეთთან.

ღმერთმა შეგვქმნა არა მხოლოდ მასთან საურთიერთოდ, არამედ ერთმანეთთანაც. ჩვენ შეგვიძლია კომუნიკაცია როგორც პოზიტიური, ასევე ნეგატიური გზით; ჩვენ გვეუწყა: „ლოცეთ თქვენი მდევნელები, ლოცეთ და ნუ წყევლით” (რომაელთა 12:14). გაითვალისწინეთ კომუნიკაციის რამდენიმე პოზიტიური გზა, რომლითაც ერთმანეთთან გვაქვს ურთიერთობა:

• ერთმანეთის გამხნევება, წახალისება (მსაჯულები 30:22; 1 თესალონიკელთა 5:11; ებრაელთა 3:13; 10:25).

• ერთმანეთის სწავლება (იერემია 9:20).

• შეკითხვების დასმა ერთმანეთის მიმართ (იერემია 22:8; ლუკა 8:25; იოანე 11:56).

• მსჯელობა ერთმანეთთან (მათე 8:16; ლუკა 6:11).

• ერთმანეთის დარიგება (რომაელები 15:14).

• ერთმანეთის მოკითხვა (რომაელები 16:16; 1 კორინთელთა 16:10; 2 კორინთელთა 13:12).

• ერთმანეთის შეგონება (კოლასელთა 3:16).

გვაქვს გაფრთხილება, რომ თავიდან ავირიდოთ ნეგატიური კომუნიკაცია:

• ერთიმეორე არ მოატყუოთ (ლევიანნი 19:11).

• ნუ განვიკითხავთ ერთმანეთს (რომაელები 14:13).

• ნუ ძრახავთ ერთმანეთს (იაკობი 4:11).

ჩვენ პასუხისმგებლები ვართ სახარების გადაცემაზე

იესომ თავის მოწაფეებს დააკისრა პასუხისმგებლობა, წაეღოთ სახარება მთელი ქვეყნიერებისთვის. არსებობს მოლოდინი, რომ ღვთის ხალხი სახარებას ევანგელიზმის საშუალებით გადასცემს ურწმუნოებს. ღმერთმა, იესო ქრისტეზე სასიხარულო უწყების გავრცელების ძირითად საშუალებად, აირჩია ზეპირი კომუნიკაცია. იესომ თავის მოწაფეებს უთხრა,

წადით და დაიმოწაფეთ ყველა ხალხი და მონათლეთ ისინი მამის, ძის და სულიწმიდის სახელით. ასწავლეთ მათ ყოველივეს დაცვა, რაც მე გამცნეთ (მათე 28:19-20).

ვინაიდან კომუნიკაცია, ადამიანებში ღმერთის ხატების ასეთი მნიშვნელოვანი ნაწილია, ქრისტიანი ლიდერებისათვის უმნიშვნელოვანესია ესმოდეთ კომუნიკაციის ხელოვნება და პრაქტიკა. ეს კურსი დაგეხმარებათ კომუნიკაციის სხვადასხვა ფორმის დაფასებაში. ის საშუალებას მოგცემთ გამოიყენოთ კომუნიკაციის უნარები, რომ უფრო ეფექტურად იმსახუროთ ღვთის სამეფოში.

(1) შემდეგი გაკვეთილის დასაწყისში თქვენ გაივლით ტესტს ამ გაკვეთილის მასალის საფუძველზე. მომზადებისას ყურადღებით შეისწავლეთ ტესტის კითხვები.

(2) წარუდგინეთ სამწუთიანი მოხსენება იმ კლასს, რომელშიც ისაუბრებთ იმ მსახურების შესახებ, რომელშიც ღმერთმა მოგიწოდათ. თქვენ შეგიძლიათ ისაუბროთ, როგორც თქვენს ამჟამინდელ მსახურებაზე, ასევე თქვენი სამომავლო ხედვის შესახებ.

(1) რომელია კომუნიკაციის სამი ძირითადი ფორმა ქრისტიანი ლიდერებისთვის?

(2) როდესაც ღმერთმა თქვა: “შევქმნათ კაცი ჩვენს ხატად და ჩვენს მსგავსად,” ვინ იყო ის, ვისაც ის ელაპარაკებოდა?

(3) რა იყო პირველი ორი მცნება, რომლებიც ღმერთმა ადამიანებს გადასცა?

(4) რომელი სიტყვა-სიმბოლო გამოიყენა იოანემ იესოს აღსაწერად მის ხორცშესხმამდე?

(5) ჩამოთვალეთ ადამიანის კომუნიკაციის სამი დარღვევა.

(6) რომელია ღმერთის მიერ არჩეული ქრისტეს კეთილი უწყების გავრცელების ძირითადი საშუალება?