Lesson 13: ქრისტიანის სხეული

ამ გაკვეთილის ბოლოს სტუდენტმა უნდა:

(1) გაიაზროს, როგორ მოქმედებს ფიზიკური პრობლემები სულიერ ჯანმრთელობაზე.

(2) მიუძღვნას თავისი სხეული ღმერთს და ისწავლოს ახალი ჩვევები, რომლებითაც პატივს მიაგებს უფალს.

მარტინ ლუთერი ბერი გახდა, რადგან თვლიდა, რომ ეს იყო საუკეთესო გზა ღმერთისადმი მსახურებისთვის. ბერის ცხოვრების წესის დისციპლინები მოიცავდა კვებაში შეზღუდვას, მარხვას, უბრალო ტანსაცმელს, შეზღუდულ ქონებას და დაუქორწინებლობას. მარტინის სურვილმა, დაემორჩილებინა თავისი სხეული ღმერთს, აიძულა ის დაესაჯა მისი სხეული ასევე მათრახით. მას შემდეგ, რაც მარტინმა გაიგო მადლით ხსნის სახარება რწმენის მეშვეობით, მან გააცნობიერა, რომ მას არ შეეძლო მადლის მოპოვება მისი სხეულის ტანჯვით. მან უარყო თავისი სამონასტრო აღთქმა, როგორც არაბიბლიური. მან იქორწინა კატერინაზე, ყოფილ მონაზონზე და შეეძინა ექვსი შვილი.

ზოგიერთ ადამიანს კორინთოში არ სჯეროდა, რომ ქრისტიანები მკვდრეთით აღდგებოდნენ. ისინი ფიქრობდნენ, რომ სხეული უკუგდებული იქნება სიკვდილის შემდეგ და მხოლოდ ქრისტიანის სული წავა სამოთხეში.

ზოგიერთმა თქვა: „რადგან სხეული მოკვდება და უკუგდებული იქნება, არ აქვს მნიშვნელობა რას ვუზამთ მას ახლა. სხეულის ცოდვილ გამოყენებას არ აქვს მნიშვნელობა, რადგან მას არ აქვს საბოლოო ღირებულება.”

სხვებმა, ვინც უარყვეს აღდგომა, თქვეს: „სხეული განადგურდება, რადგან მისი სურვილები ბოროტია. ზეცაში ჩვენ არ გვექნება ფიზიკური სურვილები. იმის გამო, რომ ფიზიკური სურვილები ცუდია, ახლა მათ არ უნდა მივყვეთ. ჩვენ არ უნდა ვჭამოთ კარგი საჭმელი, ჩავიცვათ კომფორტული ტანსაცმელი ან თუნდაც გვქონდეს სექსი ქორწინებაში. ჩვენ უნდა დავთრგუნოთ სხეული ყველანაირად, სანამ არ დავტოვებთ მას.”

ორივე ეს შეხედულება მცდარი იყო. ორივე შეცდომაზე იყო დაფუძნებული. 1 კორინთელთა მე-15 თავში პავლემ განმარტა, თუ რატომ არის მნიშვნელოვანი აღდგომის მოძღვრება.

მართალია, ჩვენთვის მართებულია სულიერ ცხოვრებაზე უფრო მეტად ვისაუბროთ, ვიდრე ფიზიკურ საკითხებზე, მაგრამ ჩვენი სხეული გავლენას ახდენს სულიერ საკითხებზე. ღმერთმა შეგვქმნა არა მხოლოდ სულებად, არამედ სულებად ფიზიკური სხეულებით. ჩვენ არ ვართ უბრალო ცხოველები, მაგრამ ჩვენ არ ვართ მხოლოდ სულები, რომლებიც დროებით ცხოვრობენ სხეულებში.

► სტუდენტმა ჯგუფს უნდა წაუკითხოს 1 კორინთელთა 6:19-20.

ეს მუხლები გვეუბნება, რომ ჩვენი სხეულები ღმერთს ეკუთვნის, რადგან მან გამოგვისყიდა. ჩვენი სხეულები სულიწმიდის ტაძრებია და არ უნდა გამოვიყენოთ ცოდვისთვის.

ბიბლია გვეუბნება, რომ ფიზიკური სხეული მთლიანად ღმერთს უნდა დავუმორჩილოთ.

► სტუდენტმა ჯგუფს უნდა წაუკითხოს რომაელთა 12:1.

ეს მუხლი გვეუბნება, რომ ჩვენი სხეულები უნდა იყოს წმინდა და რომ ისინი ღმერთს ეკუთვნის. თაყვანისცემა, რომელიც ღმერთს ჩვენგან სურს, არის სრული მორჩილება.

ჩვენ ვერ შევძლებთ ვემსახუროთ ღმერთს თანმიმდევრულად, თუ ჩვენ გვაკონტროლებს ჩვენი სხეულის სურვილები. ცოდვის ნებისმიერი ჩვევა დამოკიდებულებას ჰგავს.

წარმოიდგინეთ ცხოველი, რომელსაც ორი პატრონი ჰყავს. ერთი პატრონი გასცემს ბრძანებას, მაგრამ ცხოველი ვერ ემორჩილება, რადგან მეორე პატრონს ცხოველი ჯაჭვზე ყავს. პატრონი ჯაჭვით ატარებს ცხოველს საითაც თვითონ მოისურვებს. ცხოველს შეიძლება სხვა პატრონი უფრო მეტად უყვარს, მაგრამ არ შეუძლია დაემორჩილოს მას. აი, როგორია დამოკიდებულება. ადამიანს შეიძლება სურდეს ემსახუროს ღმერთს, მაგრამ დამოკიდებულება არის ჯაჭვი, რომელსაც მას არ შეუძლია წინააღმდეგობა გაუწიოს.

დამოკიდებულება და ცოდვის უმეტესი ფორმები აზიანებს ადამიანის სხეულს და გონებას. იმის გამო, რომ ჩვენი სხეულები ღმერთს ეკუთვნის და მას ემსახურება, მათი დაზიანება არასწორია. რომაელების წერილში წაკითხული მუხლი გვეუბნება, რომ ჩვენი სხეული ღმერთს მსხვერპლად მიუძღვნათ, მაგრამ ამას ვერ გავაკეთებთ, თუ საკუთარ თავს ვერ ვაკონტროლებთ.

► სტუდენტმა ჯგუფს უნდა წაუკითხოს 1 კორინთელთა 9:24-27.

შენი სხეული შენი მსახურია, მაგრამ შენ უნდა გააკონტროლო ის. ის ძალიან კარგია როგორც მსახური. თუ ის კონტროლიდან გამოდის, ის ხდება თქვენი ბატონი, სხეული კი საშინელი ბატონია. პავლემ განაცხადა, რომ წინ აღუდგა ნებისმიერი სურვილის მასზე გაბატონებას (1 კორინთელთა 6:12).

► სტუდენტმა ჯგუფს უნდა წაუკითხოს რომაელთა 6:13.

სხეული ჰგავს ინსტრუმენტების ერთობლიობას, რომელიც თქვენ გეკუთვნით. ინსტრუმენტები თქვენი კონტროლის ქვეშაა. აღარ უნდა გამოიყენოთ ისინი ცოდვისთვის, არამედ ღვთისთვის.

ზოგი ფიქრობს, რომ ცოდვას ვერ ავიცილებთ ჩვენი ბუნებრივი სურვილების გამო. მართალია, ჩვენ დავიბადეთ ცოდვილი ბუნებით, რომელსაც შევყავართ ცოდვაში. ეს ბუნება მოიცავს არა მხოლოდ ფიზიკურ სურვილებს, არამედ გონების სურვილებს და ცოდვისკენ მიდრეკილ ნებას. ადამიანი, რომელიც არ არის განახლებული ღვთის სულით, არ შეუძლია თავი შეიკავოს ცოდვისგან, თუმცა ზოგიერთ ცოდვას შეუძლია წარმატებით შეეწინააღმდეგოს. ცოდვილს, რომელსაც არ განუცდია ღვთის მადლი, შეიძლება არ დაიჯეროს, რომ ოდესმე გამარჯვებით იცხოვრებს.

ბუნებრივი სურვილები არ არის პრობლემა. ღმერთმა შექმნა ბუნებრივი სურვილები. ადამს ჰქონდა ბუნებრივი სურვილები, მაგრამ არ იყო ცოდვილი, სანამ არ გააკეთა არჩევანი არ დამორჩილებოდა ღმერთს. ეს სურვილები არის ნაწილი იმისა, რაც ღმერთმა კაცობრიობისთვის განიზრახა. ისინი თავისთავად არ არიან ცოდვილები, მაგრამ შესაძლებელს ხდიან ცდუნებას.

► როგორია ბუნებრივი სურვილების რამდენიმე მაგალითი?

ქვემოთ მოყვანილი დიაგრამა არ არის სრულყოფილი, მაგრამ მოცემულია ბუნებრივი სურვილების რამდენიმე მაგალითი, ამ სურვილების ზოგიერთი ჩვეულებრივი და სათანადო გამოხატვა და რამდენიმე გზაა, რომლითაც ისინი შესაძლებელს ხდიან ცდუნებას.

გაითვალისწინეთ, რომ ბუნებრივი სურვილები სულაც არ არის სხეულის სურვილები. ისინი ბუნებრივია, რადგან მომდინარეობენ ადამიანის ბუნებიდან, მაგრამ ისინი არ არიან ყველა ფიზიკური სურვილები.

► არის თუ არა რაიმე ბუნებრივი სურვილი, რომელსაც ყოველთვის შეიძლება დანებდე?

არც ერთ ბუნებრივ სურვილს არ შეუძლია გმართოს, კითხვების გაჩენის გარეშე. არ არსებობს ბუნებრივი სურვილი, რომელსაც ყოველთვის უსაფრთხოდ მიჰყვები, რადგან სურვილი არ შემოიფარგლება მხოლოდ იმით, რაც შენთვისაა მისაღები. მაგალითად, შიმშილის სურვილი არ განასხვავებს საკუთარ საკვებს, სხვის საკვებს ან საკვებს, რომლის შეძენაც ადამიანს არ შეუძლია.

არის შემთხვევები, როდესაც საჭიროა ჩაახშო სურვილის სწორად გამოხატვაც. ის, რომ ადამიანი შიმშილს განიცდის, არ ნიშნავს, რომ მას შეუძლია სხვისი საკვების აღება. დასვენების სურვილი ბუნებრივია, მაგრამ ზოგჯერ ადამიანს მოუწევს მუშაობა მაშინაც კი, როცა დაღლილია. ჩვენთვის ბუნებრივია საფრთხის თავიდან აცილების სურვილი, მაგრამ ადამიანმა უნდა გაუძლოს საფრთხისგან გაქცევის სურვილს, როდესაც ის არის პასუხისმგებელი სხვის დაცვაზე.

ბუნებრივი სურვილები შეიძლება გახდეს იმდენად დამახინჯებული და არასწორად მიმართული, რომ არაბუნებრივი და არაადამიანური ფორმები მიიღოს. ამიტომაცაა, რომ ზოგიერთი ადამიანი უკიდურესად გარყვნილ ან სასტიკ ქმედებებს ჩადის. ბუნებრივი სურვილები დამახინჯებულია ან მიმართულია არასწორი მიმართულებით 1) არასწორი სწავლების, 2) არასწორად აზროვნების სტერეოტიპების ჩამოყალიბების, 3) ცოდვილ გარემოში ყოფნის ან 4) ჩვენი ცოდვილი ქმედებების გამო.

ყოველი მორწმუნე უნდა ელოდეს ცდუნებას ბუნებრივი სურვილებიდან გამომდინარე. მადლი, როგორც წესი, არ გამორიცხავს ბუნებრივ სურვილებს, მაგრამ აძლევს ადამიანს შესაძლებლობას გააკონტროლოს თავისი ქმედებები და მიმართოს თავისი სურვილები კანონიერი ობიექტებისკენ.

ბუნებრივი სურვილები სულიერ დისციპლინებს აუცილებელს ხდის სულიერი გამარჯვების შესანარჩუნებლად. მადლი არ ათავისუფლებს ადამიანს წმინდა წერილის მითითებების შესრულების, ღვთისმსახურებაზე დასწრების, სხეულის დამორჩილების, ლოცვისა და ბიბლიის შესწავლის აუცილებლობისგან. მორწმუნე, რომელიც სერიოზულად ესწრაფვის სულიერი გამარჯვების შენარჩუნებას, შეიძლება ასევე დაიწესოს პირადი შეზღუდვები, თავისი სუსტი წერტილების დასაცავად.

ცდუნება მომხიბვლელად გამოიყურება, მაგრამ თუ გულში დევს ღვთის ნების აღსრულების სურვილი, ადამიანს ნამდვილად შეუძლია უარყოს ცდუნება მთელი გულით (1 იოანეს 5:3). ის არ იფიქრებს, რომ უარს ამბობს იმაზე, რაც მას ნამდვილად გააბედნიერებს. რწმენით მან იცის, რომ ღმერთი არ კრძალავს არაფერს უწყინარს, მაშინაც კი, თუ აკრძალულში ზიანს ვერ ხედავს (მეორე რჯულის 6:24). რწმენით მან იცის, რომ ღვთის ნების საწინააღმდეგო არაფერი არ დააკმაყოფილებს მას, რადგან მისი კმაყოფილება ღმერთშია (ფსალმუნის 15:2, ფსალმუნის 83:11).

► რას ამბობს ბიბლია საკვებზე?

ბიბლია კონკრეტულად არაფერს კრძალავს საკვების მხრივ. ახალი აღთქმის ქრისტიანებს არ მოეთხოვებოდათ კვების საკითხებში შეზღუდვები, რაც ძველ აღთქმაში იყო (1 ტიმოთეს 4:4, მარკოზის 7:19). იყო პრობლემა კერპთშენაწირი საკვების შესახებ, მაგრამ არა იმიტომ, რომ თავად საკვები იყო არასწორი, არამედ იმიტომ, რომ ზოგიერთი ადამიანი ჭამდა საკვებს, როგორც კერპისადმი თაყვანისცემის ნაწილი (1 კორინთელთა მე-8 თავი).

სწორი კვება მნიშვნელოვანია ფიზიკური ჯანმრთელობისა და ძალისთვის. რადგან ჩვენ ღვთის მსახურები ვართ, უნდა გვინდოდეს ვიყოთ კარგ ფიზიკურ მდგომარეობაში. ჩვენ უნდა ვეცადოთ არ დავაზიანოთ ჩვენი სხეული და არ შევამოკლოთ სიცოცხლე კვების ცუდი წესით. ბევრ ადამიანს არ აქვს კვებაში დიდი არჩევანი, რადგან მათ უნდა ჭამონ ის, რაც ხელმისაწვდომია და რისი საშუალებაც აქვთ, მაგრამ მათ უნდა გააკეთონ საუკეთესო არჩევანი, რაც შეუძლიათ. მათ ასევე უნდა ასწავლონ შვილებს კვებაში კარგი არჩევანის გაკეთება.

ადამიანები, რომლებსაც აქვთ ფული საჭმელის შესაძენად, ხანდახან იღებენ ზედმეტად ბევრ ისეთ საჭმელს, რაც მათ მოსწონთ, იმის ნაცვლად, რომ აირჩიონ ისეთი საკვები, რომელიც მათ სარგებელს მოუტანს. ადამიანებს ასევე უჩნდებათ ცდუნება დახარჯონ ზედმეტი ფული არაჯანსაღ საკვებზე. ზოგი ვერ ყიდულობს მსახურებისთვის სასწავლო წიგნს, მაგრამ ყოველ კვირას იგივე თანხას ხარჯავს კანფეტებსა და კოლაზე.

ვარჯიში აუცილებელია იმისათვის, რომ ადამიანი კარგ ფიზიკურ ფორმაში იყოს. ადამიანმა არ უნდა დაუშვას, რომ ვარჯიშის ნაკლებობამ მას ძალის უკმარისობა ან ჭარბი წონა გამოიწვიოს, რაც ხელს შეუშლის მას, რომ ღმერთისთვის გამოსადეგი იყოს. თუ ადამიანის სამუშაო ფიზიკურ შრომას მოითხოვს, მას შეიძლება არ დასჭირდეს დამატებითი ფიზიკური ვარჯიში; წინააღმდეგ შემთხვევაში, მან უნდა მოაწესრიგოს თავისი სხეული, რათა ის კარგ ფორმაში იყოს.

ქრისტიანმა ყურადღება უნდა მიაქციოს სწორ კვებას და ვარჯიშს, რადგან მისი სხეული ღმერთს ეკუთვნის. თუმცა, დიეტისა და ვარჯიშის შესახებ კონკრეტული მითითებები ბიბლიაში არ არის. ადამიანებმა უნდა იპოვონ გზები, რათა გამოიყენონ ღმერთისადმი მიძღვნის პრინციპი საკუთარ სიტუაციაში. ჩვენ უნდა მოვერიდოთ სხვების განსჯას და კრიტიკას. ეს დეტალები არ უნდა იქცეს სულიერი ცხოვრების წესად, ოღონდ თუკი ადამიანთა შერჩეული ჯგუფი არ არის მიდრეკილი გარკვეული დისციპლინების მიმართ.

► სტუდენტმა ჯგუფს უნდა წაუკითხოს რომაელთა 14:4.

თითოეულმა ჩვენგანმა უნდა გამოვიყენოთ ბიბლიური პრინციპები კონკრეტული გზებით, მაგრამ არ უნდა განვსაჯოთ ადამიანები, რომლებიც მათ განსხვავებულად იყენებენ, როდესაც ამის შესახებ კონკრეტული მითითებები წმინდა წერილში არ არის მოცემული.

► სტუდენტმა ჯგუფს უნდა წაუკითხოს რომაელთა 8:18-23.

ავადმყოფობა არის შედეგი იმ წყევლისა, რომელიც მოვიდა მთელს ქმნილებაზე, როდესაც პირველმა ადამიანებმა შესცოდეს. ღვთის ხსნის გეგმა საბოლოოდ აღადგენს ქმნილებას და დაასრულებს ყველა ტანჯვას. თუმცა, ეს მუხლები გვეუბნება, რომ ეს აღდგენა არ არის მყისიერი. მიუხედავად იმისა, რომ ჩვენ უკვე დახსნილნი ვართ, ჩვენი სხეულები განაგრძობს ტანჯვას სიბერისა და დაავადებებისგან, სანამ ღვთის გადარჩენის გეგმა არ აღსრულდება.

ღმერთი სასწაულებს უკვე ახდენს მსოფლიოში. განკურნების მრავალი სასწაულია აღწერილი ბიბლიაში. ღმერთი გვპირდება განკურნებას ეკლესიის მიერ რწმენის ლოცვების საპასუხოდ (იაკობის 5:14-15). არ არის აუცილებელი, რომ ავადმყოფს ჰქონდეს საკუთარი განკურნების რწმენა; ეკლესიას შეუძლია ჰქონდეს რწმენა მისთვის. აქედან გამომდინარე, ავადმყოფი რწმენის ნაკლებობაში არ უნდა დადანაშაულდეს.[1]

არ უნდა გვქონდეს იმის მოლოდინი, რომ რწმენის მქონე ადამიანი არასოდეს დაავადდება. ღმერთმა დაუშვა იობზე, რომ ფიზიკურად დატანჯულიყო გარკვეული პერიოდის განმავლობაში, თუმცა იობი ღმერთის ერთგული დარჩა (იობის 2:8).

პავლემ თქვა, რომ ღმერთმა დაუშვა „სხეულში ეკალი”, რათა ის თავმდაბალი და ღმერთზე დამოკიდებული ყოფილიყო. პავლემ სამჯერ ილოცა გათავისუფლებისთვის, მაგრამ საბოლოოდ მიხვდა, რომ ღმერთს სურდა მისთვის ძალა მოთმინებისთვის მიეცა, ვიდრე განკურნებისთვის (2 კორინთელთა 12:7-9). როგორც ჩანს, „სხეულში ეკალი” ფიზიკური ტანჯვა იყო, თუმცა ეს დანამდვილებით არ ვიცით.

პავლემ ფიზიკური ავადმყოფობა განიცადა გალატელებისადმი ქადაგების დროს (გალატელთა 4:13-15). როგორც ჩანს, მას თვალების პრობლემა ჰქონდა, რადგან თქვა, რომ გალატელებს ისე უყვარდათ, რომ მზად იყვნენ მისთვის თავისი თვალები მიეცათ. ჩვენ არ ვიცით, მოგვიანებით განიკურნა თუ არა პავლე ამ პრობლემისგან, მაგრამ ცხადია, ის მაშინვე არ განკურნებულა. აშკარაა, რომ პავლე არ ასწავლიდა, რომ ყოველი მორწმუნე ყოველთვის თავისუფალი უნდა იყოს სნეულებისგან და გალატელები არ ფიქრობდნენ, რომ მისი ავადმყოფობა ეწინააღმდეგებოდა მის მიერ ნაქადაგებ სახარებას.

► სტუდენტმა ჯგუფს უნდა წაუკითხოს ფილიპელთა 2:25-30.

ეპაფროდიტე ავად იყო და სიკვდილის საფრთხე ემუქრებოდა. ის ავად გახდა, რადგან ძალიან ბევრს მუშაობდა პავლეს დასახმარებლად. პავლემ თქვა, რომ ეპაფროდიტე იმსახურებდა პატივისცემას, რადგან მან სიცოცხლე საფრთხეში ჩაიგდო ქრისტეს საქმისთვის.

იობის, პავლესა და ეპაფროდიტეს მაგალითები გვიჩვენებს, რომ არ უნდა დავადანაშაულოთ ადამიანები რწმენის ნაკლებობაში, როდესაც ისინი ავად არიან. არ უნდა ჩავთვალოთ, რომ ისინი ცოდვის გამო ისჯებიან. მხოლოდ ღმერთმა იცის, არის თუ არა ვინმეს ტანჯვის სულიერი მიზეზი. ისტორიის ზოგიერთი უდიდესი ქრისტიანი, დიდი მორწმუნე ადამიანები, ხანგრძლივი პერიოდის განმავლობაში განიცდიდნენ ავადმყოფობას.

ბიბლია არ კრძალავს ექიმებისა და მედიკამენტების გამოყენებას. მიუხედავად იმისა, რომ ჩვენ ვლოცულობთ ჯანმრთელობისა და განკურნებისთვის, არაფერია ცუდი იმაში, რომ ვისარგებლოთ არსებული დახმარებით.

არასწორია განკურნების ძიება იმ ადამიანებთან, რომლებიც ემსახურებიან მაგიას და სულებს, რომლებიც არ არიან ღვთისგან. ჩვენ არ ვემსახურებით სატანას და არ უნდა ვეძიოთ მისგან სარგებელი. ჩვენი ერთგულება ღმერთისადმია და კმაყოფილები უნდა ვიყოთ მისი კურთხევებით. თუ ის აირჩევს არ განკურნოს, უნდა ვილოცოთ მადლისთვის და ძალისთვის, რომ ვიყოთ ერთგულები.

ზოგიერთი ადამიანი იყენებს ნივთიერებებს, რომლებიც ანიჭებს მათ სხეულს სიამოვნებას, მაგრამ აქვს ცუდი შედეგი.

ნარკოტიკები აზიანებს სხეულს, ანადგურებს გონებას, იწვევს დამოკიდებულებას და არალეგალურია ბევრგან.

ძალიან მცირე რაოდენობით მიღების შემთხვევის გარდა, ალკოჰოლი გავლენას ახდენს ადამიანის აღქმაზე და აიძულებს მას იმოქმედოს ისე, როგორც არ მოიქცეოდა, რომ არა მისი ზემოქმედება. ალკოჰოლი ასევე იწვევს დამოკიდებულებას. დიდი რაოდენობით მიღება ზიანს აყენებს ჯანმრთელობას. ის ჭარბად გამოიყენება ამქვეყნიური, ამორალური გართობის ადგილებში. ბიბლია პირდაპირ არ კრძალავს ალკოჰოლს, მაგრამ ბევრი ეკლესია კრძალავს მას, რადგან ის გავლენას ახდენს ქცევაზე და განსჯაზე, იწვევს დამოკიდებულებას და ხშირად თან ახლავს ამორალურ ქცევას. ბევრი ქრისტიანი ფიქრობს, რომ თუ ადამიანი ფრთხილად იყენებს ალკოჰოლს და თავიდან იცილებს საფრთხეებს, მან შეიძლება ზიანი მიაყენოს სხვებს, განსაკუთრებით ახალგაზრდებს.

► სტუდენტმა კლასს უნდა წაუკითხოს იგავების 20:1 და 31:4–5.

თამბაქო, რეგულარულად მოწეული ან დაღეჭილი, იწვევს დამოკიდებულებას და ამცირებს სიცოცხლეს რამდენიმე წლით. მომხმარებელს აქვს კიბოს მაღალი რისკი.

ბიბლია არ კრძალავს კონკრეტულად ნარკოტიკებს, ალკოჰოლს ან თამბაქოს. თუმცა, ადამიანების უმრავლესობას, ვისაც ესმის მათი მავნებლობა, თვლის, რომ ქრისტიანმა არ უნდა გამოიყენოს ისინი. ეს ყოველთვის და ყველგან ასე არ ყოფილა, იმ დრომდე, სანამ ადამიანებმა გაიგეს ამ ნივთიერებების სრული ეფექტი.

ამ ნივთიერებების ყველაზე დიდი საშიშროებაა, მათი მიდრეკილება, გახადონ მომხმარებელი მათზე დამოკიდებული. დამოკიდებულებები აკონტროლებს ადამიანის ცხოვრებას. ისინი მოიხმარენ მის რესურსებს. ისინი გავლენას ახდენენ მის აღქმებზე, აიძულებენ მას არარაციონალურად გაამართლოს ისინი. ის იღებს მსხვერპლს, რომელიც ზიანს აყენებს მის ოჯახს და სამსახურს. დამოკიდებულება მოითხოვს ერთგულებას, რომელიც მსგავსია რელიგიისა და ეწინააღმდეგება ღმერთის ერთგულებას.

ქრისტიანს უნდა ჰქონდეს ფიზიკური სისუფთავის ჩვევები, რომლებიც მინიმუმ ისეთივე კარგია, როგორც მის კულტურაში გავრცელებული ჩვევები. მან გარშემომყოფების ყურადღება არ უნდა მიიქციოს უსიამოვნო სუნის, მოუვლელი თმის, ჭუჭყიანი ან ცუდი ტანსაცმლის გამო. სიღარიბეში მყოფ ადამიანს შეიძლება გაუჭირდეს კარგი გარეგნობის შენარჩუნება, მაგრამ მან უნდა გააკეთოს ის, რაც შეუძლია.

უნდა შეისმინოთ, თუ მეგობრები შენიშვნას გაძლევენ თქვენი გარეგნობის ან ჰიგიენის შესახებ. მშობლებმა შვილებს კარგი ჩვევები უნდა ასწავლონ.

ქრისტიანები არ უნდა მიჰყვნენ ქვეყნიერების მაგალითს, გამოიყენონ ჩაცმულობა და მორთულობა, რათა აჩვენონ, რომ სხვებზე აღმატებულები არიან. თუმცა, უყურადღებო გარეგნობა შეიძლება გულისხმობდეს, რომ ადამიანი ნაკლებად სცემს პატივს ადამიანებს, რომლებსაც ხვდება. მაგალითად, თუ შეხვედრაზე მიდიხართ მოუწესრიგებელი გარეგნობით, შეიძლება შეიქმნას შთაბეჭდილება, რომ მიგაჩნიათ, რომ შეხვედრა და ხალხი პატივისცემას არ იმსახურებს. ქრისტიანებმა უნდა აჩვენონ, თუ როგორ უნდა მიაგონ პატივი ღმერთს და პატივი სცენ სხვებს კარგი გარეგნობით.

ადამიანები, რომლებსაც არ აქვთ სულიერი და მარადიული პრიორიტეტები, ხშირად ხაზს უსვამენ სხეულს, გამომწვევი ჩაცმულობით. კაცს შეიძლება სურდეს კუნთების ჩვენება. ქალს შეიძლება სურდეს, რომ იყოს ფიზიკურად მიმზიდველი მამაკაცებისთვის. ქრისტიანს არ უნდა სურდეს სიამაყის გამოხატვა ან არასწორი ყურადღების მიქცევა სამოსით.

მოუწოდეთ სტუდენტებს, დაფიქრდნენ იმაზე, თუ როგორ უნდა მოახდინოს ღვთისადმი მიძღვნამ, ცვლილებები მათ ცხოვრების წესში.

► როგორ გამოხატავენ თქვენი ჩვევები, რომ თქვენი სხეული ღმერთს ეკუთვნის?

მოერიდეთ ხანგრძლივ კამათს, რომელიც მიზნად ისახავს ქრისტიანებისთვის დიეტის წესების ან მსგავსი შეზღუდვების დაწესებას.

► როგორ აუხსნიდით ადამიანს, რატომ არ იყენებთ გარკვეულ ნივთიერებებს?

ზეციერო მამა,

მადლობა მშვენიერი ჩანაფიქრისთვის, რომელიც მოგვეცი, რომ გვეცხოვრა ჯერ დედამიწაზე და შემდეგ ზეცაში.

დამეხმარე ვიცხოვრო შენდამი სრული მიძღვნით, იმის ცოდნით, რომ შენ შემქმენი და გამომისყიდე.

დამეხმარე, ვიცხოვრო თავისუფლად ყველაფრისგან, რაც ხელს შეუშლის ჩემს მსახურებას და შენდამი თაყვანისცემას.

მადლობა იმ დიდი პრივილეგიისთვის, რაც მაქვს, რომ ვარ შენი სულიწმიდის ტაძარი. მინდა ვიცხოვრო ისე, რომ პატივი მოგაგო.

ამინ

(1) ჩაწერეთ თქვენი პასუხი ქვემოთ მოყვანილ თითოეულ კითხვაზე, პირადი ჟურნალის ჩანაწერში. (ის კლასის ლიდერს არ უნდა გადასცეთ.)

• სრულად მიუძღვენი თავი ღმერთს? რას ნიშნავს ეს შენთვის?

• ბუნებრივი სურვილებიდან ყველაზე ხშირად რომელი იწვევს თქვენს ცხოვრებაში ცდუნებას?

• წმინდა წერილის რომელი ორი ან სამი ადგილი უნდა დაიმახსოვროთ, რათა დაგეხმაროთ მუდმივად დაძლიოთ ეს ცდუნებები?

• რა ცვლილებების შესახებ დაგელაპარაკათ ღმერთი ამ გაკვეთილის შესწავლისას?

(2) შეისწავლეთ 1 კორინთელთა მე-15 თავი. თავდაპირველად დაყავით ის ნაწილებად, რომელშიც თითოეული ეძღვნება პატარა თემას. დაწერეთ აბზაცი თითოეული ნაწილისთვის, რომელიც ხსნის ამ ნაწილის არსს. რა პრაქტიკულ მიმართულებებს უნდა ეყრდნობოდეს ეს თავი?