Энэ хичээлийн төгсгөлд суралцагч:

(1) Есүсийн амьдрал, үйлчлэл хайранд төвлөрч байсныг ойлгоно.

(2) Бурханыг хайрлах хайранд Бурхантай харилцах харилцаа, Бурханы Үгийн мэдлэг, Бурханы хүсэлд итгэж найдах зэрэг нь багтдагийг ойлгоно.

(3) Үйлчлэхдээ хүмүүсийн төлөө байдаг Есүсийн хайрыг дуурайна.

(4) Бурханд байнга буулт хийхийн чухлыг ойлгоно.

(5) Өдөр бүрийн амьдралдаа Есүсийн зан чанарыг харуулах.

Христийн адил хайрлах нь Христийн адил үйлчлэх өдөөлт болдог.

Есүсийн бүхий л амьдрал, үйлчлэл хайраар хөтлөгдсөн байлаа. Бурханыг болон бусдыг хайрлах нь Түүний амьдрал, үйлчлэлийн гол зүйл гэдгийг Тэрээр олонтоо харуулсан юм. Хэрэв бид Есүсийн үлгэр дуурайлыг дагавал бидний амьдрал, үйлчлэлийн төвд хайр байна. Үүнийг сайн самари хүний ​​тухай сургаалт зүйрлэл хамгийн тодорхой харуулдаг.

► Лук 10:25-37 эшлэлийг унших.

Есүс энэ сургаалт зүйрлэлийг ярихын өмнө “Бурхан эдгээрийг ухаантан мэргэдээс нууцалж, балчир хүүхдүүдэд илчилжээ” (Лук 10:21) хэмээн сүнслэг ойлголтын талаарх чухал хичээлийг заасан. Сүнслэг үнэнийг ойлгоход оюуны сургалтаас илүү их зүйл шаардагддаг. Үүнд сүнслэг илчлэлт шаардлагатай. Бурханы Сүнсний тусламжтайгаар ойлгох хүүхдийн хувьд Бурханы үнэн их энгийн хэдий ч, дан ганц оюуны чадвараар ойлгох эрдэмтэн мэргэдийн хувьд энэ нь маш гүн гүнзгий ойлголт юм.

Яаж ийм зүйл байж болох вэ? Бурхан үнэнийг үүнийг хүсэмжилж буй хүмүүсээс нуудаг гэж үү? Хариулт нь хоёр зарчмыг агуулдаг.

1. Сүнслэг үнэн зөвхөн Ариун Сүнсээр илчлэгддэг. Паул “Бурханыхыг Бурханы Сүнснээс өөр хэн ч эс мэднэ” гэсэн байдаг. Иймээс бид “Сүнсний сургасан үгээр, сүнслэг зүйлсийг сүнслэг хүнд тайлбарладаг юм” (1 Коринт 2:11, 13).

2. Сүнслэг үнэн нь зөвхөн хүлээн авахад нээлттэй сонсогчдод л илчлэгддэг. Паул цааш нь “төрөлх хүн Бурханы Сүнсний зүйлсийг хүлээж авдаггүй. Ийм хүнд эдгээр нь мунхаглал бөгөөд сүнслэгээр цэгнэгдэх учиртай эл зүйлсийг тэр мэдэж чаддаггүй” (1 Коринт 2:14) гэсэн байна.

Сонсогчийн хандлага нь үрийн үржил шимийг тодорхойлдог гэдгийг Тариачны сургаалт зүйрлэлд харуулдаг (Матай 13:1-23). Үнэнийг хүлээн авахад нээлттэй хүмүүс л сонссон үнэнээ ойлгоно.[1]

Лук 10:25-д гарч буй хуульч бол хоёр дахь зарчмын бодит амьдрал дээрх жишээ юм. Хуульч үнэнээр цангасандаа асуусан бус, харин Есүсийг урхинд оруулах хүсэлтэй учраас тэгж асуужээ. Тэр Есүсийг сорьж шалгахыг хүссэн. Есүсийн хариултыг сонсоод хуулчийн хэлж байгаа хариу нь үржил шимтэй хөрс биш гэдгийг харуулж байна. Тэр хүн өөрийгөө зөвтгөх өөр асуулт асуусан юм (Лук 10:29).

Есүс түүний “мөнх амийг өвлөн авахын тул би яах ёстой вэ?” гэсэн асуултын хариуд “Чи Бурхан Эзэнээ бүх зүрх, бүх сэтгэл, бүх хүч, бүх оюун ухаанаараа хайрла. Мөн хөршөө өөрийн адил хайрла” (Лук 10:27) хэмээн Хуульд бичигдсэн гэж хариулжээ.

Энэ бол бидний үлгэр дуурайл болох Есүсийн зүрх сэтгэл юм. Есүстэй адил амьдарч, үйлчлэхийн тулд бид Бурханыг болон хөршөө Есүсийн адилаар хайрлах ёстой. Христийн адил хайрлахгүй бол энэ курсын бусад аль ч хичээлүүд нь ач холбогдолгүй байх болно. Хайрлахгүй л бол залбирал, удирдлага, зааж сургах, номлол зэрэг нь бүгд ач холбогдолгүй байх болно.

Магадгүй энэ нь хэтэрхий энгийн санагдаж болох юм. Та “Мэдээж бид Бурханыг хайрлаж, хүмүүсийг хайрлах ёстой. Би үүнийг аль хэдийн мэддэг шүү дээ!" гэж хэлж болох юм. Гэвч бид өдөр тутмын үйлчлэлийн ачааллаас болоод хайрлах сэтгэлээ алдаж болно. Чуулганы гишүүдээ хайрлахгүйгээр тэдэнд үйлчлэх боломжтой. Гэр бүлээ хайрлахгүйгээр үйлчлэх боломжтой. Бурханыг хайрлахгүйгээр Христийн үйлчлэлийг хийх боломжтой. Тиймээс л Христийн адил хайрлах нь христэч үйлчлэлийн маань өдөөлт байх учиртай.

Хүн төрөлхтөнд үйлчлэх Есүсийн үйлчлэл нь Бурхан Эцэгийг хайрлах хайраас эхтэй. Үйлчлэлдээ бухимдаж, цөхөрч туйлдахгүйн тулд хүмүүсийн төлөөх үйлчлэл маань Бурханы төлөөх хайраар өдөөгдөх ёстой. Бурханы төлөөх хайргүй үйлчлэл нь төд удалгүй хоосон, үр жимсгүй болдог.

Бидэнд үлгэрлэж буй, Эцэг Бурханы төлөөх Есүсийн хайранд гурван шинж бий. Эдгээр нь: харилцаа, мэдлэг, итгэж найдах нь юм.

Есүс Эцэгтэйгээ дотно харилцаатай байсан

Есүсийг Эцэгтэй дотно харилцаатай байсныг Сайнмэдээний номууд ахин дахин өгүүлдэг. Үүнийг дараах эшлэлүүдээс харж болно.

• Есүс гэрийнхэндээ “Эцэгийнхээ гэрт байх ёстойг минь мэдсэнгүй гэж үү?” (Лук 2:49) гэж хэлсэн байдаг.

• Иохан 17-р бүлэг Есүсийн дотно залбирлыг өгүүлсэн.

• Есүс загалмай дээр шаналан “Бурхан минь, Бурхан минь, юунд Та Намайг орхив?” (Матай 27:46) хэмээн хашхирчээ.

Гэтсемани цэцэрлэгт байхдаа Есүс гэр бүлийн хүмүүс хэрэглэдэг дотно үгээр “Ааба, Аав аа” (Марк 14:36) хэмээн Бурханыг дууджээ. Энэ бол Эцэгтэйгээ бат харилцаатай хүүгийн хэрэглэдэг үг юм.

Иудейчүүдийн уламжлалт залбиралд Бурханыг Абрахам, Исаак, Иаковын Бурхан; Бидний эцэг өвгөдийн Бурхан; Ерөөлт Нэгэн, Төгс Хүчит Нэгэн; Израилын Аврагч гэх мэт олон нэрээр дууддаг. Харин Есүс Ааба хэмээн дотночлон дууджээ. Есүс Бурхан Эцэгтэйгээ дотно харилцаатай амьдарсан юм.

Кеннет Е. Бэйли Ойрхи Дорнодод олон жил багшилсан хүн бөгөөд Ааба бол Ойрхи Дорнодын хүүхдүүд хэлд орохдоо хэлж сурдаг анхны үг гэж бичсэн байдаг. Ааба нь хүүхэд аавыгаа дууддаг нэр юм.

Бид Бурханы хүүхдүүд тул Түүнд хандан “Ааба! Аав аа!” гэж дуудах эрхтэй (Ром 8:15, Галат 4:6) хэмээн Паул хэлжээ. Бид алс хол байдаг Бурханыг хүндэтгэн мөргөдөггүй. Харин Есүсийн адилаар Эцэгийнхээ хайранд аюулгүй, тав тухтай амьдардаг.

Пасторууд бидний хувьд өөрсдийгөө үйлчлэлийн амжилтаараа хэмжиж, соригддог байж болох юм. Хэрэв бид чуулганы хэмжээ, чуулгандаа хүлээн зөвшөөрөгдсөн байх эсвэл үеийнхэн дундаа танигдах зэргийг үнэ цэнээ болговол, амжилтанд хүрэхийн төлөө үнэнч байдлаа золиослох сорилтод унах болно. Хичээл зүтгэл маань амжилтгүй болбол бид шантарна. Харин бидний амжилтаас үл хамааран Ааба маань биднийг хайрладаг гэдэгт итгэлтэй байвал үр дүнг нь Түүнд үлдээж болно. Түүний хайр бидний гүйцэтгэлээс хамаардаггүй.

Есүс Эцэгийнхээ хүслийг мэддэг байсан

Газар дээрх үйлчлэлийнхээ төгсгөлд Есүс “Хий гэж Надад өгсөн ажлыг тань гүйцэтгэн Би” (Иохан 17:4) хэмээн гэрчилсэн юм. Эцэг нь юу хийлгэхээр өөрийг нь илгээснийг Есүс мэддэг байсан, тиймээс тэрхүү зорилгыг биелүүлэхийн тулд амьдралаа зориулжээ.

Есүс хүнийхээ хувьд Эцэгийн хүслийг залбирал болон Үгээр дамжуулан мэдэж авсан юм. Есүс залбирлаар дамжуулан Эцэгийн хүслийг мэдсэн.

Эцэгийн хүслийг Есүс мөн Үгээр дамжуулан мэдсэн. Есүс Капернаумд байхдаа Исаиагийн эш үзүүллэгийг биелүүлэх нь Түүний үүрэг даалгавар хэмээн дүгнэн хэлжээ (Лук 4:18-19). Есүс Баптисч Иоханы элч нарт авралын үйлчлэлийнхээ нотолгоо болгон Исаиа номын үгээр (Матай 11:4-5) хариу илгээсэн байдаг. Есүс Үгийг мэддэг байв.

Христэд итгэгчид бэрхшээлтэй үедээ үргэлж Бичвэр рүү хандаж байсныг бид Шинэ гэрээнээс олонтоо хардаг. Стефан итгэлийнхээ төлөө амиа өргөх үеийн сүүлчийн номлолдоо Хуучин гэрээний бичвэрүүд Есүс Христээр биеллээ олсон гэдгийг (Үйлс 7:1-53) багтаан өгүүлжээ. Иудей удирдагчид итгэгчдийг дахиж Есүсийн сайнмэдээг тунхаглахыг хориглох үед чуулганыхан хамтдаа цугларч залбирч байлаа. Тэдний залбиралд Дуулал 2-оос урт хэсгийг эш татсан байдаг (Үйлс 4:24-30, Дуулал 2:1-2). Анхны итгэгчид Бичвэрийг мэддэг байсан бөгөөд энэ нь тэдний залбирал, номлолын үндсэн хэл яриа нь байжээ.

Чуулганы түүхийн туршид дэлхийг өөрчилсөн номлогчид Үгийн хүмүүс байсаар иржээ. Мартин Лютер Вормстын уулзалтын үеэр "Би Бичвэрт хүлэгдсэн бөгөөд миний оюун ухаан Бурханы Үгэнд олзлогддог" хэмээн гэрчилжээ. Жон Весли өөрийгөө "Нэгэн Номын хүн" гэж тодорхойлсон бол, Чарльз Спержион "Библийн мөн чанар чамаас урсан гарах хүртэл" номлогч хүн Үгээр хооллох ёстой гэжээ. Хадсон Тэйлор Үгэнд маш их цаг зарцуулдаг байсан тул нэгэн зохиолч “Тэйлор Библиэр амьсгалж амьдардаг байсан” гэж бичжээ. Эдгээр хүмүүс Үгийг эрх мэдэлтэйгээр номлосон учраас өөрсдийн ертөнцийг өөрчилсөн билээ.

[1]Хэрэв Есүс шиг, анхны итгэгчид шиг мөн түүхэн агуу номлогчид шиг үйлчлэх хүсэлтэй бол бид ч хандлага, бодлоо Үгээр хэлбэржүүлэх ёстой. Паулын үйлчлэлд Бичвэр онцгой эрх мэдэлтэй байсан (2 Тимот 3:16-17). Есүс дагалдагч нарыгаа ариусгагдаж, үйлчлэлд тусгаарлагдаасай хэмээн залбирсан бөгөөд энэ нь “Үнэнээр тэднийг ариусгаач. Таны үг үнэн мөн” гэх үгээр гүйцэлджээ (Иохан 17:17). Үг дагалдагчдын үйлчлэлийг үр нөлөөтэй болгосон шиг, энэ нь бидний үйлчлэлийг ч үр нөлөөтэй болгодог.

Aжит Фернандо бүх амьдралаа Шри Ланкад үйлчлэхэд зориулжээ. Тэрээр Бичвэрт үндэслэхгүйгээр хэзээ ч том мэдэгдэл санааг дамжуулахгүй байх дадлага хийсэн талаараа бичсэн байдаг. Энэ нь Үгэнд суурилсан номлолоо хадгалахад түүнд тусалжээ. Итгэгч бидний хувьд Бурханыг Үгээр дамжуулан мэддэг. Үйлчлэгчдийн хувьд бид Бурханы Үгэнд суурилсан үйлчлэлээр дамжуулан хүчирхэг чуулганыг байгуулдаг.

Есүс Эцэгтээ итгэж найдсан

Есүс дэлхий дээрх үйлчлэлийнхээ үеэр Эцэгтэйгээ ямар харилцаатай байсныг “Гэвч Миний хүслээр биш, харин Таныхаар болог гэж” (Матай 26:39) Гетсемани цэцэрлэгт залбирсан үгээр нь дүгнэж болно. Энэ бол бүрэн төгс итгэлцэл ба дуулгавартай байдлын илэрхийлэл юм.

Итгэж чадахгүй хүнийхээ хүсэлд бүрэн бууж өгөх нь хэцүү. Тиймээс бид гаднаа бууж өгөхөөс өөр аргагүйд хүрдэг ч, зүрх сэтгэл маань ийм хүнд захирагдахыг эсэргүүцдэг. Есүс Эцэгийн хайр, сайн сайханд бүрэн итгэж найдсан учраас Эцэгийнхээ хүсэлд бууж өгсөн юм.

► Иохан 5:1-47 эшлэлийг унших.

Есүсийн бүх үйлчлэл Эцэгт туйлын найдсан хандлагыг харуулдаг. Амралтын өдөр доголон хүнийг эдгээсний төлөө Иудейн удирдагчид Есүсийг эсэргүүцэхэд Тэр:

Үнэнээр үнэнээр Би та нарт хэлье. Эцэгээс хийж харуулсныг нь л Хүү хийхээс Хүү юуг ч Өөрөөсөө хийдэггүй. Учир нь Эцэг юу хийнэ, Хүү нь бас эдгээрийг түүнчлэн хийдэг…. Би юуг ч Өөрөөсөө үйлдэж чадахгүй. Би сонссоноороо шүүх бөгөөд шүүлт минь шударга. Учир нь Би Өөрийнхөө хүслийг бус харин Намайг Илгээгчийн хүслийг хайдаг (Иохан 5:19, 30) гэж хариулсан юм.

Есүс Бурхан гэдгээ аль хэдийн мэдэгдэж: “Эцэг минь одоо болтол ажилласаар байна. Би ч ажиллаж байна” (Иохан 5:17) гэжээ. Тэрээр бүрэн дүүрэн Бурхан байсан ч, газар дэлхий дээр гүйцэтгэх туслах чанарын үүрэг даалгаварт хүсэлтэйгээр захирагдсан юм. Тэрбээр Эцэгтэйгээ эн тэнцүү боловч, Эцэгийн хүсэлд захирагджээ.

Хэдэн сарын дараа хуулийн багш нар болон фарисайчууд Есүсийг эсэргүүцэх үед Тэр мөн л Эцэгийн эрх мэдлийг заан, өөрийнхөө үйлдлийг хамгаалж “Би юуг ч Өөрөөсөө хийдэггүй, харин Эцэгийн Надад зааснаар Би эдгээрийг ярьдаг” (Иохан 8:28) гэж өгүүлсэн. Тэрбээр Эцэгт бүрэн итгэж найдсан учраас Эцэгийн хүсэлд дуртайяа бууж өгчээ.

Чуулганы удирдагч хүнд тэнцвэртэй байдал шаардагдана. Удирдах чадвар сайтай чуулганы удирдагч, пасторууд маш олон бий. Удирдагчдын хувьд тэд хүчирхэг үзэл бодол, зан чанартай байдаг. Энэ нь удирдагч хүний давуу тал, хүч нь байж болно. Гэсэн ч энэ хүч Бурханд хүсэлтэйгээр захирагдах байдалтай харьцуулахад тэнцвэртэй байх ёстой. Бид Бурханд итгэж найдан бууж өгөхгүй л бол, Бурханы арга замыг дагахын оронд өөрсдийнхөө арга замыг хүчээр тулгах хандлагатай болдог.

Магадгүй Мосе үүний хамгийн сайн жишээ байх. Мосе ... газрын хөрсөн дээрх хэнээс ч илүүгээр маш даруу нэгэн байлаа (Тооллого 12:3). Мосе хүчирхэг боловч, номхон даруу хүн байв. Тэр Египетийн хамгийн хүчирхэг хүн Фараонтой нүүр тулсан. Тэрээр зөрүүд израилчуудыг цөлд удирджээ. Мосе хүчирхэг удирдагч, бас Бурханд дуулгавартай хүн байлаа. Чуулганыг үр нөлөөтэй удирдахын тулд бид төрөлх хүчээ Бурханд даатгах ёстой. Энэ нь Бурханд итгэж найдсан амьдрал дотор Бурхантай хамт алхаснаар л боломжтой болдог.

► Эцэгийн хайрын талаарх энэ гурван шинж чанарын (харилцаа, Үгийг мэдэх мэдлэг, итгэж найддаг дуулгавартай байдал) аль нь таны хувьд бэрхшээлтэй зүйл болдог вэ?

Мормон, Ёховагийн гэрчүүд гэх мэт хуурамч тэрс үзэл, мөн Ислам гэх мэт Христийг үгүйсгэдэг шашнууд Есүсийг үнэхээр Бурхан байсан гэдгийг үгүйсгэдэг. Тэд Есүсийг агуу багш, эсвэл эш үзүүлэгч, анхны бүтээл, тэр ч байтугай Мессиа гэдгийг хүлээн зөвшөөрдөг. Гэхдээ Түүнийг жинхэнэ Бурхан байсан гэдгийг үгүйсгэдэг.[1]

Эдгээр шашны дагалдагчид “Есүс хэзээ ч Бурхан байгаагүй. Бид Бурханы хүүхдүүд гэдэг шиг тийм утгаар л Тэр Өөрийгөө Бурхан гэж хэлсэн” гэдэг.

Есүс өөрийгөө Бурхан гэж хэлсэн үү? Тийм. Түүнийг сонссон хүмүүс энэ мэдэгдлийг нь ойлгосон. Есүс Бурханыг “Эцэг минь” гэсэн тул иудей удирдагчид Түүнийг алахыг оролдсон юм. Яагаад тэр вэ? “Үүнээс болж иудейчүүд Түүнийг алахыг улам санаархах болжээ. Учир нь Есүс Амралтын өдрийг зөрчсөн төдийгүй мөн Бурханыг Эцэгээ хэмээн Өөрийгөө Бурхантай адилтгасан юм” (Иохан 5:18).

Өөрийгөө Бурхан гэж хэлсэн Есүсийн хамгийн тодорхой мэдэгдлийн нэг нь иудей удирдагчдад хандаж “Үнэнээр үнэнээр Би та нарт хэлье. Абрахамаас өмнө ч Би байгаа гэж айлдав” (Иохан 8:58) хэмээн хэлсэн үг юм. Эдгээр үг бол Бурхан өөрийгөө Мосед шатаж буй бутан дундаас илчлэхдээ хэлсэн үг буюу “Израилийн хөвгүүдэд чи “«Би байгаа» намайг та нар уруу илгээв” гэж хэл” гэсэн үгс байв (Гэтлэл 3:14). Эдгээр үгээр Есүс өөрийгөө Мосед харагдсан Бурхан гэдгийг илэрхийлжээ. Есүс яг юу гэж байгааг иудей удирдагчид ойлгосон учраас хариуд нь Түүнийг хөнөөхөөр чулуу шүүрч авсан юм. Чулуугаар нүүлгэх нь өөрийгөө Бурхан гэж худлаа хэлсэн хүний шийтгэл байв (Леви 24:16).

Есүсийг шүүх үедээ Кайаф “Чи Магтаалт Нэгэний Хүү, Христ мөн юм уу?” гэж асуухад Есүс маш тодорхойгоор “Би мөн. Та нар Хүний Хүүг Хүчит Нэгэний баруун талд заларч, тэнгэрийн үүлсээр ирэхийг харах болно” гэжээ. Энэ хариултаараа Есүс өөрийгөө Бурханы баруун талд суудаг, дэлхийг шүүхээр ирэх Хүний Хүү гэж Даниелын эш үзүүлсэн тэр Нэгэн гэдгээ мэдэгджээ (Дуулал 110:1 болон Даниел 7:13-14). Түүнийг өөрийгөө Бурхан гэж хэлнэ гэдгийг Кайаф мэдэж байсан бөгөөд тэрээр хувцсаа урж, “Бурханыг доромжлохыг нь та нар сонслоо” гэсэн юм (Марк 14:61-64).

Та Есүсийн хэлсэн үгэнд итгэхээс татгалзаж болох ч, Есүс өөрийгөө Бурханы Хүү гэж мэдэгдсэн гэдгийг хүлээн зөвшөөрөхгүйгээр Сайнмэдээний номуудыг нягтлан унших боломжгүй. Түүнийг сонсогчид энэ мэдэгдлийг нь сонсоод, нэг бол Есүсийг Бурхан гэж хүлээн зөвшөөрөх эсвэл Түүнийг хуурамч эш үзүүлэгч, Бурханыг доромжлогч гэж хөнөөхөөс өөр замгүй болжээ.

Есүс сургаал заахдаа татвар хураагчид болон нүгэлтнүүдийг олонтоо цуглуулдаг байв. Тэрээр тэдэнд заагаад зогсохгүй, хамт хооллодог байжээ. Фарисайчууд Есүсийг дуртайяа тэдэнтэй хооллож байгааг хараад шүүмжилж эхэлсэн. Харин Есүс гурван сургаалт зүйрлэлээр хариу барьсан юм. Та эдгээр түүхийг уншиж байхдаа хоёр чухал нөхцөл байдлыг ойлгох хэрэгтэй.

1. Есүсийн цаг үед хүнтэй хооллох нь нөхөрлөлийн харилцаа тогтоож байна гэсэн үг байв.[1] Тэр нүгэлтнүүдтэй хооллож байсан нь зориуд тэдэнтэй хамт байсныг илтгэдэг. Энэ нь Бурхан хүмүүсийг өөрсдөө хүрээд ирэхийг хүлээж суудаггүй, харин төөрсөн хүмүүсийг идэвхтэй хайдаг гэдгийг харуулдаг.

2. Есүсийн үед иудейчүүд зөвт хүнийг нүгэлтнүүдтэй холбогдохыг цээрлэдэг байжээ. Рабби нар Мессиаг ирэх үедээ хорон муу хүмүүстэй харилцахаас зайлсхийж, зөвхөн зөвт хүмүүстэй хооллоно гэж сургадаг байжээ.

► Лук 15:1-32 эшлэлийг унших.

Энэ бол алдагдсан хонь, алдагдсан зоос, алдагдсан хүү гэсэн гурван хэсгээс бүрдэх том сургаалт зүйрлэл юм. Аль ч тохиолдолд сургаалт зүйрлэлийн сэдэв нь алдагдсан зүйлээ олсон хүний ​​баяр баясгаланг өгүүлнэ. Нүгэлтнийг гэмших үед тэнгэрт баяр баясгалан болдгийг Есүс харуулжээ.

[2]Рабби нарт “Нүгэлт хүн Бурханы өмнө сүйрэхэд тэнгэрт баяр хөөр болдог” гэх мэргэн үг байжээ. Есүс үүнийг орвонгоор нь эргүүлж: “гэмшсэн нэг нүгэлтний төлөө тэнгэрт илүү их баяр хөөр болох болно” гэсэн юм. Есүс ба рабби нарын хооронд ямар ялгаа байна вэ? Энэ бол Хайр. Хайрын зүрх сэтгэлээс үйлчлэх нь ямар утга учиртай болохыг Есүс харуулсан.

Хайргүйгээр үйлчлэх аваас байр суурь, зэрэг дэв маань хүмүүсээс илүү чухал болно. Харин бид хайраар үйлчилбэл, алдагдсан хүмүүсийн төлөө золиос гаргах хүсэлтэй байдаг. Есүс хайр хэрэгтэй хүмүүст хайраа харуулахын төлөө шашны удирдагч нарын шүүмжлэлд өртөж, зовлон амсахад бэлэн байжээ.

► Хэрэв “Та төөрсөн хүүг хайрлах уу?” гэж асуувал бид цөм л “Тийм” гэж хариулна. Үүний оронд “Миний замд хамгийн сүүлд тааралдсан төөрсөн хүү хэн байв? Би тэр хүнийг хэрхэн хайрлав?” гэж асуугаарай.

Есүс шаналж байгаа хүмүүсийг хайрлах хайраа өрөвдөх сэтгэлээрээ харуулсан

Сайнмэдээний номуудыг унших үедээ нүгэлтнүүд шашны удирдагч нараас зугтааж, Есүс рүү очиж байгааг анзаарсан уу? Юу нөлөөлсөн болоод нүгэлтнүүд Есүсийг хайсан бэ?

Есүс тэдний нүглийг үл тоосон гэсэн үг биш. Харин ч Есүс фарисайчуудаас ч илүү зөвт байх өндөр хэм хэмжээг шаарддаг байсан (Матай 5:20). Есүс хүнийг өрөвддөг байсан учраас нүгэлтнүүд Есүс рүү очдог байв. Тэр нүглийг зөвшөөрсөн хэрэг биш, харин нүгэлд эзлэгдсэн хүнийг өрөвдөж байсан хэрэг.

Бид үүнийг завхайрч байгаад баригдсан эмэгтэйд хандан хэлсэн Есүсийн үгээс харж болно. Буруутгагчид явсны дараа Есүс түүнд “Би ч чамайг шийтгэхгүй. Яв. Үүнээс хойш дахин нүгэл бүү үйлд” (Иохан 8:11) гэсэн билээ. Есүс нүглийг зүгээр өнгөрүүлээгүй, харин нүгэлт амьдралаа орхихыг тэр эмэгтэйгээс шаардсан. Гэхдээ Есүс яллахаас илүүгээр өрөвдөж энэрсэн сэтгэлээ харуулсан юм.

Лукийн Сайнмэдээнд өгүүлэх Есүсийн өрөвдөж энэрэх сэтгэл анхаарал их татдаг. Шашны удирдагчдын зэвүүцдэг татвар хураагч Закхайн тухай түүх Лук номд бий. Харин Есүс тэнд байсан хүмүүсийг цочирдуулж, нүгэлт хүний гэрт зочлохыг хүсжээ (Лук 19:7).

► Лук 5:12-16 эшлэлийг унших.

Лук энэхүү эдгэрлийн талаар өгүүлэхдээ олныг гайхшируулсан нарийн мэдээллийг өгчээ. Есүс гараа сунган тэр хүнд хүрсэн. Тэр үед уяман өвчтэй хүнд хэн ч хүрч байгаагүй. Халдвар авах аюултай байв. Харин иудейчүүдийн хувьд уяман өвчтэй хүнд хүрэх нь ёс заншлын хувьд бузарт тооцогддог байсан.

[3]Тэгвэл Есүс яагаад тэр уяман өвчтэй хүнд хүрэв? Есүс түүнийг өрөвдсөн учраас “Тэр өрөвдөн гараа сунгаж түүнд хүрээд” (Марк 1:41) гэжээ. Тэр хүнд биеийн эдгэрэл хэрэгтэй байсан шиг сэтгэл санааны эдгэрэл ч бас хэрэгтэй байсан. Уяман өвчтэй хүн бусдаас дөлж явах ёстой бөгөөд ийм хүнтэй харилцсан хүн өөр бусад хүнд хүрч болдоггүй байжээ. Есүс түүнд хүрэлгүйгээр эдгээж чадах л байсан, гэхдээ уяман өвчтэй хүнд өөр нэгний хүрэлт хэрэгтэй гэдгийг Тэр мэдэж байсан. Есүс өрөвдөн энэрчээ.

Хэрэв бид Есүсийн адил үйлчлэхийг хүсвэл, Есүс адил өрөвдөх сэтгэлтэй байх ёстой. Нүгэлтнүүд Есүсийн нүд рүү хараад хайр энэрлийг олж харсан. Нүгэлтнүүд чиний нүд рүү хараад юу олж хардаг вэ?

Есүс зовж зүдэрсэн хүмүүст үйлчилснээрээ хайраа харуулсан

“Би энэ хүнийг өрөвдөж байна” гэж хэлэх нь амархан боловч зовж зүдэрсэн хүмүүст үйлчлэх нь амаргүй. Есүс эргэн тойрондоо байсан тэдгээр хүмүүст үйлчлэхдээ хайраа харуулсан юм. Есүсийн бүхий л үйлчлэл нь нэг л үйлчлэл байсан. Паул Есүсийг боолын дүрийг авч, өөрийгөө хоосолсон хэмээн бичсэн байдаг (Филиппой 2:7). Есүс дагалдагч нартаа “Учир нь Хүний Хүү үйлчлүүлэхийн тулд бус, харин үйлчлэхийн тулд мөн олны төлөө амиа золиос болгон өгөхийн тулд ирсэн билээ гэв” (Марк 10:45) гэсэн юм.

Есүсийн гайхамшгууд нь Түүний бусдад үйлчлэх үйлчлэлийг харуулдаг. Гайхамшгууд нь Мессиа гэдгийг харуулах тэмдэг байсан ч, хүний ​​хэрэгцээг хангах хэрэгсэл байв. Заримдаа цөөн хүмүүсийн төлөө ч Тэр гайхамшгуудыг хийдэг байсан. Заримдаа гайхамшгууд нь ямар ч эрх мэдэл, нөлөөгүй хүмүүст ашиг тустай байв. Заримдаа (Амралтын өдөр үйлдсэн) гайхамшгуудаас нь болж хүмүүс Түүнийг үгүйсгэж, дургүйцэж байсан.

Есүс хүчирхэг хүмүүсийг татахын тулд биш, харин тусламж хэрэгтэй хүмүүст үйлчлэхийн тулд гайхамшгуудыг үйлдсэн. Бичвэрт хоёр удаа Есүс гайхамшиг үйлдэхээс татгалзсан тухай өгүүлдэг. Фарисайчууд “Түүнийг сорихын тулд тэнгэрээс тэмдэг үзүүлэхийг шаардаж эхлэв” (Марк 8:11). Есүс тэмдэг үзүүлэхээс татгалзсан юм. Түүнчлэн Есүсийг шүүх үедээ Херод ямар нэг тэмдэг үзнэ гэж найдаж байсан (Лук 23:8). Тиймээс л Есүс Херодод хариу хэлэхээс татгалзсан юм. Тэрээр хүсэлтээр, эсвэл олныг гайхшируулахын тулд гайхамшиг үйлдэж байгаагүй.

Хэдийгээр Есүс Херод Антипаст гайхамшгаа үзүүлэхээс татгалзсан ч, загасчны хадам эх, уяман өвчтөн, хараагүй гуйлгачид гэхчлэн Түүнд хариу төлж чадахгүй хүмүүсийн төлөө гайхамшгаа үзүүлсэн. Тэрээр талархах сэтгэлгүй, өөрийг нь нь орхисон 5,000 хүнийг хооллож, өөрийг нь баривчлахаар ирсэн тэргүүн тахилчийн зарцыг эдгээж байсан. Есүс гайхамшгуудаараа дамжуулан тусламж хэрэгтэй хүмүүст үйлчилсэн юм.

Пастор ба чуулганы удирдагчдын хувьд бидэнд хариу барьж чадах хүмүүст туслах нь их амархан шийдвэр байж болно. Бид ядуусаас илүү баян чинээлэг хүмүүстэй цаг өнгөрөөхдөө “Бизнес эрхлэгчид чуулганы маань үйлчлэлийг дэмжиж чадна” хэмээн боддог. Бид нөлөө бүхий албаны хүнтэй уулзахын тулд бэлэвсэн эмэгтэйтэй уулзахаа хойшлуулах үедээ “Албаны хүний нөлөө Бурханы ажилд тус болно” гэж шалтаглаж ч болох юм. Есүс харин хэзээ ч тэгж байсангүй. Хэрэв бид Есүсийн адил үйлчлэхийг хүсвэл бид Есүс адил үйлчлэгч болох ёстой. Бид яг Түүнтэй адил үйлчлүүлэх гэж бус, харин үйлчлэхийг эрэлхийлэх ёстой (Матай 20:28). Паул “Учир нь бид өөрсдийгөө тунхагладаггүй, харин Христ Есүсийг Эзэн гэж, өөрсдийгөө Есүсийн төлөөх та нарын боол гэж тунхагладаг юм” (2 Коринт 4:5) гэсэн байдаг.

Зарим пасторууд “Би өндөр боловсролтой хүн. Би чуулганыхаа тариачин эрийн зарц биш!” гэж хэлж болох юм. Паул хэзээ ч тийм байгаагүй. Тэр хамгийн өндөр боловсролтой байсан ч, Есүсийн төлөө коринтчуудын зарц болсон юм. Паул “Миний боловсролыг хар даа. Би Иудейн утга зохиол, Грекийн гүн ухаан, Христитгэлийн теологийг эзэмшсэн. Би Иудейн санхедрин, Грекийн арейпаг, Ромын сенатад ярьж чадна” гэж хэлж болох байсан. Харин оронд нь тэрээр “Би Эзэн Есүсийнхээ төлөө Коринтын хамгийн боловсролгүй хүмүүсийн зарц болсон” гэж хэлсэн юм.

Хэрэв бид Есүсийн адил үйлчлэхийг хүсвэл зарц шиг амьдрах даруу зантай байх ёстой. Үйлчлэгчид бидний амьдралын хэв маяг бол захирагчийн амьдралын хэв маяг биш юм. Хэрэв бид Есүсийн адил хайрлахыг хүсвэл даруухан зарц байх учиртай.

Есүс дайснуудаа өршөөснөөр хайраа харуулсан

► Матай 5:43-48 эшлэлийг унших.

Есүс дагалдагч нартаа тэнгэрлэг Эцэг адил төгс бай хэмээн заасан нь, тэнгэрлэг Эцэг адил хайрлах ёстой гэсэн утгатай юм. Энэ нь дайснуудаа хайрла, та нарыг хавчигчдын төлөө залбир гэсэн үг. Хэрэв та нарыг тийм хайрыг харуулбал энэ дэлхий таныг тэнгэр дэх Эцэгийнхээ хүүхдүүд гэдгийг мэдэх юм.

Есүсийг Уулан дээрх сургаалаа номлохоос 200 орчим жилийн өмнө Сирах хэмээх нэгэн иудей гүүш сургаалын цоморлиг бичжээ. Тэрээр тусламж үзүүлэх шаардлагагүй хүмүүстэй яаж харьцахыг дагалдагч нартаа хэрхэн сургасныг харна уу.[4]

• Сайн үйл хийхдээ хэнд ашигтайг мэд. Тэгвэл хүч чинь дэмий үрэгдэхгүй.

• Даруу хүмүүст сайныг хий, харин сүсэггүй хүмүүст юу ч бүү өг.

• Сүсэггүйчүүдэд хоол битгий өг. Тийм хүмүүсийн төлөө хийсэн бүхэн чинь чамд хоёр дахин их гай авчирна.

• Дээдийн Дээд нь нүгэлтнүүдийг үзэн яддаг тул тийм хүмүүсийг шийтгэх болно.

• Сайн хүмүүст харин өг, нүгэлтнүүдэд бүү тусал.

Есүсийн цаг үед Бен Сирахын бүтээлийг иудейчүүд бичвэр хэмээн үздэг байжээ. Тиймээс Есүс “Хөршөө хайрла, дайснаа үзэн яд’ гэж хэлснийг та нар сонссон” (Матай 5:43) гэсэн нь Сирахын бичсэн “Сайн хүмүүст л сайныг хий, муу хүмүүст сайн үйлсээ дэмий бүү зарцуул” гэсэн хэсгийг хэлсэн болов уу.

► Матай 5:43-48 эшлэлийг дахин унш. Есүсийн сургаал хүмүүсийг цочирдуулж байгааг харж байна уу?

Хуучин гэрээнд Бурхан ард түмэндээ дайснуудаа хайрла хэмээн заасан учраас энэ нь шинэ сургаал биш байв. Энд нэгэн профессорын оюутнуудаасаа асуусан Хуучин гэрээний хичээлийн сорилын асуултыг оруулъя.

Таны хөрш бол чуулганы дайсан. Таныг өнгөрөн явахад араас чинь хараадаг. Таныг хуурч, малыг чинь хүртэл хулгайлахыг санаархдаг хүн. Нэг өдөр ширүүн бороо ороход хөршийн чинь үхэр алдууран одохыг та харжээ. Та хөршийнхөө өмнө ямар хариуцлага хүлээх вэ?

1. Та үхрийг нь гуядаад цааш хөөх үү?

Энэ зөв хариулт биш гэдгийг оюутнууд мэднэ!

2. Та зүгээр тоохгүй орхиж “Энэ миний асуудал биш” гэх үү?

Олон оюутнууд энэ сонголтыг сонгодог. Тэд “Энэ миний үхэр биш, хөршийнх. Би өөрийнхөө хэрэгт л санаа тавина. Түүнээс гадна хөрш надад дургүй, тэр миний тусламжийг үнэлэхгүй" гэдэг.

3. Та Гэтлэл 23:4 эшлэлийг биелүүлэх үү? “Хэрэв дайсныхаа алдуул үхэр, илжигтэй тааралдвал түүнийг заавал эзэнд нь буцаан аваачиж өг.”

Хуучин гэрээнд ч Бурхан дайснуудаа хайрлахыг ард түмэндээ уриалжээ. Харин Есүсийн цаг үед хүмүүс Хуучин гэрээний Гэтлэл 23-р бүлгээс илүүСирахын бүтээлийг эш татдаг байсан бололтой. Тэд хөршөө хайрлаж, дайснаа үзэн ядах сургаалд дуртай байж. Есүс харин “Таны тэнгэрлэг Эцэг сайн болон муу хүний аль алиныг хайрладаг учраас та дайснаа хайрлах ёстой” гэсэн. Бодит амьдрал дээр энэ нь ямархуу байдаг вэ? Дараах үйл явдлыг та үйлчлэлдээ тохиолдсон гэж төсөөлөөд үзээрэй.

Таны итгэл үнэмшлийг байнга олны дунд ярьж, эсэргүүцдэг бүлэг хүмүүс цуглажээ. Тэд таныг урхинд оруулах асуулт тавьж, танай цуглааны гишүүдэд таныг хуурамч сургаал заадаг гэж хэлэхээс гадна, таныг дагалдагчидтайгаа ямар нэг асуудалд орох хэрэг тарина гэж найдан хүлээсээр. Та тэдэнд яаж хандах вэ?

1. Тэднийг хөөж явуулаад дахин эргэж ирэхийг хориглох уу?

2. Тэдний харьцаж байгаа шиг харилцах уу?

3. Тэдний алдаанд шударга байх ч, тэдэнд хайраар хандах уу?

Фарисайчууд Есүсийг эсэргүүцэх бүх арга замыг туршсан. Есүс тэдний алдааны тухайд шударга байж, тэдэнд үнэнийг заахыг оролдож байсан. Гэхдээ Есүс тэдэнд үргэлж хайраар хандаж байсан юм.

Хэрэв бид Есүсийн адил үйлчлэхийг хүсвэл дайснуудаа хайрлах ёстой. Энэ бол Есүсийн хамгийн ихээр биелүүлэхийг шаарддаг сургаал юм. Биднээс урвасан хүмүүс, бидний мэдээнээс татгалзсан хүмүүс, биднийг хавчин гадуурхсан хүмүүст бид Есүсийн болзолгүй хайрыг харуулах ёстой.

Бурханыг болон хөршөө хайрлах тухай бичих амархан. Харин өдөр бүрийн амьдралдаа хайрыг харуулах нь амаргүй. Бид Есүсийн зан чанарыг амьдралдаа хөгжүүлснээр л Есүсийг дэлхийд таниулахад бэлтгэгдэж чадна.

Тэгвэл Есүс шиг зан чанартай болох боломжтой юу? Бичвэрт Бурхан ард түмнээ өөр шигээ боддог болгож чадна гэж заасан. Тэрээр ард түмэндээ шинэ сүнсийг өгөхийг хүсдэг бөгөөд тэрхүү сүнсээр бид Бурханы хүссэн зүйлийг хүсэж, Бурханы дуудсан амьдралаар амьдардаг (Езекиел 36:26-27). Бурхан биднийг Хүүгийнхээ зан чанараар төлөвшүүлэхийг хүсдэг.

Өдөр тутмын үйлчлэлдээ итгэмжит байх тухайд Освальд Чамберс юу хэлснийг үзэцгээе.

Бурханаас ямар ч хараа ирэхгүй, амьдралд чинь ямар ч урам байхгүй, хэн ч чамайг харахгүй, урамшуулахгүй байх үед Бурханд зориулалт гаргах дараагийн алхмыг хийхийн тулд Төгс Хүчит Нэгэний нигүүлсэл хэрэгтэй. Дараагийн алхмыг хийхэд сайнмэдээ номлохоос хамаагүй их нигүүлсэл, Түүнийг илүү их таних ухаарал шаардагдана.

Бурханыг гэрчлэх, Бурханы хүмүүсийн төлөө удаан хугацаанд явах нь бусдад харагдахгүй ч, их тэвчээр шаарддаг. Түүнчлэн ялж амьдрах цорын ганц зам бол Бурханыг үргэлж хайх явдал юм. Сүнсний чинь мэлмий амилсан Христийг үргэлж ширтсээр байхыг хүсэн залбираарай.[1]

Бид үйлчлэлдээ энэхүү итгэмжит байдлыг яаж хадгалах вэ? Бид долоо хоногоос долоо хоногт, жилээс жилд Бурханыг болон хөршөө яаж хайрласаар байх вэ? Есүсийн зан чанарыг өдөр бүрийнхээ амьдралд хөгжүүлснээр чадна. Ингэхийн тулд бидэнд Христийн оюун ухаан хэрэгтэй.

Христийн оюун ухааны тодорхойлолт

► Филиппой 2:1-16 эшлэлийг унших.

Паулаас Филиппой чуулганд өгсөн заавар бол Христийн адил зан чанар гэж юу болохыг заасан хүчирхэг удирдамж юм. Хувь хүмүүсийн зөрчлөөс болж хуваагдсан чуулганд хандан Паул, “Юуг ч аминч санаархал эсвэл ихэрхэг зангаар бүү хий. Харин даруугаар бие биенээ өөрөөсөө дээр гэж үзэж, хүн бүр өөрийн ашиг сонирхлыг бус, харин бусдын ашиг сонирхлыг хар” (Филиппой 2:3-4) гэж бичжээ.

Тэд үүнийг яаж хийж чадах байв? Зөвхөн Паулын өгсөн “Өөр хоорондоо Христ Есүст байсан тийм бодолтой бай” гэх зааврыг дагаснаар чадах байв (Филиппой 2:5).

Паул Христэд итгэгчийн амьдралд байх ёсгүй дөрвөн зан чанарыг жагсаажээ.[2] Эдгээр зан чанар Христийг гэрчлэхэд хохирол учруулж, христитгэлийн үйлчлэлийг сүйтгэдэг. Энэ нь:

(1) Юуг ч аминч санаархал ... бүү хий (Филиппой 2:3).

Хувиа хичээсэн зан “Надад ямар хэрэгтэй юм бэ? Би үүнээс ямар ашиг хүртэх вэ?” гэдэг. Харин Есүс уяман өвчтэй хүнийг эдгээхдээ эсвэл загалмайтай тулгарах үедээ “Надад ямар ашигтай вэ?” гэж хэлсэн гээд төсөөлж чадах уу? Мэдээж үгүй!

Паул "Хэрэв бидэнд Христийн оюун ухаан байгаа бол, хэрэв бид Христтэй адил боддог бол, бид юуг ч хувиа хичээсэн сэдлээр хийхгүй” гэсэн. Бидэнд зарцын хандлага байх ёстой бөгөөд “Би яаж үйлчлүүлэх вэ?” биш, харин “Би яаж үйлчлэх вэ?” гэсэн хандлагатай байх ёстой.

(2) Юуг ч ... ихэрхэг зангаар бүү хий (Филиппой 2:3).

Ихэрхүү зан “Энэ намайг ямар харагдуулах бол? Хүмүүст ямар сэтгэгдэл төрүүлэх бол?” гэдэг. Дахиад төсөөлөөд үз. Есүс самари эмэгтэйтэй худгийн дэргэд уулзахаасаа өмнө “Хүмүүст ямар сэтгэгдэл төрүүлэх бол? гэж бодсон уу? Мэдээж үгүй!

Паул "Хэрэв бидэнд Христийн оюун ухаан байгаа бол, хэрэв бид Христтэй адил боддог бол, бардам зангаар юу ч хийхгүй." Бид байр сууриа олж авах боломжийг биш, харин Христийг харуулах боломжийг эрэлхийлнэ” гэж хэлсэн.

(3) Бүхнийг гомдол ... үгүйгээр хийцгээ (Филиппой 2:14).

Гомдол нь “Би үүнээс илүүг хүртэх эрхтэй!” гэдэг. Есүсийг “Би дагалдагчдын хөлийг угаахгүй. Би багш. Би илүүг хүртэнэ” гэж хэлсэн гээд төсөөлж чадах уу? Мэдээж үгүй!

Паул “Хэрэв бидэнд Христийн оюун ухаан байгаа бол, хэрэв бид Христтэй адил боддог бол бид хамгийн хүнд үед ч гомдоллохгүйгээр үйлчилж чадна” гэж хэлсэн юм. Бид илүү юу ч хүртэх албагүй гэдгээ ухаарах болно. Байгаа бүхэн маань Бурханы ивээл гэдгийг санах аваас үйчлэлийнхээ талаарх үзэл бодол маань өөрчлөгдөнө.

Хелен Рөүзвир бол 20-р зууны гайхалтай илгээлтийн эздийн нэг байлаа. Кембрижийн Их сургуулийн анагаахын доктор байсан тэр эмэгтэй Заир улсад эмч-илгээлтийн эзнээр ажиллаж байхдаа эмнэлэг барихыг хүсжээ. Гэхдээ тэнд барилгын материал байхгүй учраас хамгийн эхлээд тоосго шатаах ёстой байв. Ингээд Доктор Рөүзвир африк ажилчидтай мөр зэрэгцэн тоосго цохих болжээ. Тоосго цохих үед нь түүний зөөлөн гараас цус урсаж эхлэв. Тэгээд гомдоллож "Бурхан минь, би Африкт тоосго цохихоор биш, мэс засал хийх гэж ирсэн! Ийм дорд ажлыг хийх өөр хүмүүс гарцаагүй байгаа" гэжээ.

Хэдэн долоо хоногийн дараа африк ажилчдын нэг нь түүнд "Эмч ээ, та мэс заслын өрөөнд байхдаа эмчийнхээ хувьд биднийг айлгадаг. Гэхдээ та тоосгон дээр ажиллаж, бидэн шиг хуруунаасаа цус дуслуулж байгаа бидний эгч шүү. Бид танд хайртай" гэжээ. Доктор Рөүзвир гэнэт “Бурхан намайг Африк руу зөвхөн мэс засалч болгох гэж илгээгээгүй, Тэр намайг Христийн хайрыг харуулахын тулд илгээсэн" гэдгийг ухаарчээ.

(4) Бүхнийг ... маргаан үгүйгээр хийцгээ (Филиппой 2:14).

Маргаан нь “Тийм ээ, Эзэн, гэхдээ... Би дуулгавартай баймаар байна, гэвч...” гэдэг. Та дахиад Есүсийг “Эцэг минь, Би Танд үйлчлэхээр ирсэн. Та яагаад үүнийг ийм хэцүү болгоод байна?” гэж хэлсэн гээд төсөөлөөд үзээрэй. Мэдээжийн хэрэг, бид Есүсийг Эцэгтэйгээ маргалдаж байна гэж төсөөлж чадахгүй.

Паул “Хэрэв бидэнд Христийн оюун ухаан байгаа бол, хэрэв бид Христтэй адил боддог бол, маргалдаж, амар хялбар замыг эрэлхийлэхгүй” гэсэн. Бид илүү амар хялбар замыг наймаалцах замаар Бурханы хүслийг амьдралдаа зөрчихгүй. Харин хариулт маань “Тийм ээ, Эзэн” байх болно. Бидэнд Христийн оюун ухаан бий.

Паул Филиппой чуулганыхныг Христийн оюун ухаантай гэж хэлсэн нь ингэх боломжтой гэж үзсэнийх. Тэрээр тэднийг Есүсийн амьдралыг харуулсан даруу, дуулгавартай сэтгэлтэй байж чадна гэдгийг мэдэж байсан. Тэгвэл бид энэхүү Христийн оюун ухааныг хэрхэн олох вэ?

Бидний оюун ухаан Бичвэрээр дамжин хувьсан өөрчлөгддөг

Энэ хичээлийн эхэнд Бичвэр бидэнд Бурханы хүслийг хэрхэн заадаг тухай үзсэн. Есүс Бурханы Үгийг мэддэг байсан. Элч нар ч Бурханы Үгийг мэддэг байсан. Чуулганы түүхэн дэх удаан үргэлжилсэн сэргэлт Бурханы Үгийг судлахаас эхэлсэн байдаг.

Паул филиппойчуудыг амийн үгээс чанга зуур хэмээн уриалсан (Филиппой 2:16). Тэдний итгэл, сайнмэдээний төлөөх зүтгэл нь тэднийг тэдний ертөнцийн гэрэл болгоно.

Бурханы Үгийг сайтар судалснаар бид Есүстэй адил сэтгэж, Христийн оюун ухаантай болж эхэлнэ. Энэ бол Бичвэрийг ойлгохын тулд та грек, еврей хэл мэдэх ёстой гэсэн үг биш. Энэ бол Библийн тайлбаруудтай том номын сантай байх ёстой ч гэсэн үг биш. Энэ бол зүгээр л та Бурханы Үгэнд цаг зарцуулах ёстой гэсэн үг. Үгийг судлах нь таны амьдралын өдөр тутмын нэг хэсэг байх ёстой.

Христэд итгэгчдийн хувьд Бурханы Үг өдөр тутмын хоол байх ёстой. Энэ нь үүрэг биш, харин баяр баясгалан байх учиртай. Хэн ч эрүүл хүнд “Чи өнөөдөр идэх ёстой! Хэрэв идэхгүй бол бие чинь муудна" гэж хэлэхгүй. Харин эрүүл хүн бол сайхан хоол бэлтгээд идэхийг хүсдэг. Бурханы Үг өлссөн Христэд итгэгч бүрийн хоол байх ёстой.

Бурханы Үгээр хооллосноор бидний оюун ухаан Христийнхтэй адил болж өөрчлөгддөг. Олон итгэгчид дахин төрсөн хэдий ч, үл итгэгч байсан үе шигээ бодож сэтгэдэг хэвээр байдаг. Тэдний оюун ухаан Христийн оюун ухаан болж өөрчлөгдөөгүй гэсэн үг. Яагаад?

Шинэ итгэгчдийн хувьд бид оюун санаагаа Христийнхтэй адил болгож програмчлах ёстой. Итгэгч болохоос өмнө та хамгийн түрүүнд хэрэгцээнийхээ тухай боддог байсан. Ядуу хүнийг хараад та “Надад өөрт минь мөнгө хэрэгтэй. Тэр хүнд юм өгч чадахгүй нь” гэж боддог байсан байх. Харин итгэгч болоод “Ядууст өгдөг хүн хэзээ ч, юугаар ч үл дутагдана” (Сургаалт үгс 28:27) мөн, Есүсийн “Өгөгтүн, тэгвэл та нарт өгөгдөх болно. Тэгэхдээ шахагдсан, чигжсэн мөн бялхсан сайн хэмжээгээр өвөр дээр чинь асгарах болно. Өөрсдийнхөө хэмжсэн хэмжээсээр та нар хариуд нь хэмжигдэх болно гэлээ” (Лук 6:38) гэж хэлснийг уншдаг болсон. Та мөнгөний тухайд Христтэй адил боддог болсон. Та Бурханы Үгээр дамжуулан Христтэй адил бодол санаатай болж байна.

Бид Христэд итгэгч болохоосоо өмнө биднийг гомдоосон хүмүүсийг гомдоохыг оролддог байсан. Хэн нэг нь бидэнд ширүүн хандах үед бид уурлаж хилэгнэдэг байсан. Харин итгэгч болоод бид “өрөвч зүрхийг өмс” (Колоссай 3:12) хэмээн уншдаг. Бид мөн “Ерөөлийг өвлөхөөр дуудагдсан тул та нар мууг муугаар, эсвэл доромжлолыг доромжлолоор хариулахын оронд ерөөгтүн” (1 Петр 3:9) гэж уншдаг. Биднийг гомдоосон хүмүүст бид Христтэй адил хариу үйлдэл үзүүлж эхэлнэ. Ийнхүү бид Бурханы Үгээр дамжуулан Христийн оюун ухааныг олж авч байна.

Өдөр бүр буулт хийснээр бидний оюун ухаан хувьсан өөрчлөгддөг

Паул филиппойчуудад Христ Есүст байсны адил бодол санаатай бай хэмээн хэлсэн. Тэрээр Христийн бодол санаа гэж юу болохыг тодорхойлж, улмаар үүнийг амьдралдаа хэрхэн бий болгох тухай хэлж өгчээ. Тэрээр филиппойчуудыг авралыг олж авахын тулд биш, харин итгэмжит дуулгавартай байдлаараа авралаа үргэлжлүүлэн ажил хэрэг болгох ёстой гэжээ. Учир нь Бурхан аль хэдийн “хүсэл ба сайн тааллынхаа төлөө ажиллаж” байгаа юм (Филиппой 2:12-13). Хэрэв даруухнаар Бурханд бууж өгвөл Бурхан тэдэнд бурханлаг амьдралаар амьдрах хүсэл ("хүсэх") болон хүчийг ("ажиллах") өгөх болно.

Бурханд бууж өгсөн амьдралаар амьдрах үед Ариун Сүнс бидний дотор Есүсийн амьдрал үйлчлэлд байсан зан чанаруудыг хөгжүүлдэг. Бид өөрсдийнхөө хүч зүтгэлээр Христийн оюун ухаантай болохгүй, харин бууж өгснөөр Христийн оюун ухаантай болно.

Энэ бол өдөр бүр буулт хийнэ гэсэн үг. Паул бидэнд “өөрсдийн биеийг... амьд... тахил болгож өргө (Ром 12:1) гэсэн юм. Амьд тахил бол үхсэн биш, харин үргэлжлүүлэн амьдрах тахил гэсэн үг. Бурханы өмнө хүслээсээ татгалзаж, бүрэн бууж өгөх юм. Мөн өдөр бүрийнхээ амьдралыг Түүний хүсэлд нийцүүлэн олонтоо бууж өгөхтухай юм.

Нэнси Лэй ДеМосс бууж өгдөг амьдралыг ийнхүү дүрсэлжээ.[3] Та энэ дүрслэлийг унших үедээ “Би эдгээр талбар дээр өдөр бүр бууж өгч амьдарч байна уу? Би эдгээр тал дээр Христийн оюун ухааныг харуулж байна уу?” хэмээн өөрөөсөө асуугаарай.

• Махбод чинь шүүмжилсэн үгийг давтан хэлэхийг хүснэ. Сүнс “Хэнд ч муу үг бүү хэл” гэнэ (Тит 3:2). Бууж өгдөг хүний сэтгэл “За” гэдэг.

• Махбод чинь хэцүү нөхцөл байдлын талаар гомдоллохыг хүснэ. Сүнс “Бүх зүйлд талархалаа өргө” гэнэ (1 Тесалоник 5:18). Бууж өгдөг хүний сэтгэл “За” гэдэг.

• Махбод чинь бодлогогүй даргыгаа эсэргүүцэхийг хүснэ. Сүнс “Эзэний төлөө өөрсдийгөө... захируул” гэнэ (1 Петр 2:13). Бууж өгдөг хүний сэтгэл “За” гэдэг.

[4]Биднийг бууж өгөх үед Христийн дотор амьдарч байсан Сүнс бидний дотор амьдарч эхэлдэг. Бид өөрсдийнхөө сайн сэдлээр биш, харин Сүнсээр хүчирхэгжсэнээр өдөр тутмын бухимдал, урам хугаралт, уруу татлагад Христийн адил хариу үйлдэл үзүүлэн, Сатаны сорилтыг эсэргүүцдэг.

► Махбодын хүсэл чинь Бурханы хүсэлтэй зөрчилдсөн саяхны үйл явдлын талаар хуваалцаарай. Сорилттой тулгарсан ч, өдөр бүр бууж өгөх амьдралыг хэрхэн хэрэгжүүлсэн бэ? Бурханы хүсэлд дахин бууж өгөх ёстой болсон саяхны сорилт юу байв? Эдгээр асуудлын талаар ангид бие биеийнхээ төлөө залбираарай.

Бид зовлонтой дэлхийд амьдардаг. Энэ хичээлийг уншиж байгаа олон хүн засгийн газар, хуурамч шашин, нийгмийн дарамтууд чуулганыг заналхийлж буй газар оронд амьдарч байгаа. Бид дайснаа хайрласнаар дэлхийгээ үнэхээр өөрчилж чадна гэж бодох нь ухаалаг зүйл үү? Дайсан биднийг алах гэж байхад бид яаж дайснаа хайрлах юм бэ?

Багдад хотод амьдардаг Христэд итгэгч нэгэн ирак хүнтэй сурвалжлагч ярилцжээ.[1] Сурвалжлагчийг энэ хүнтэй ярилцаж байх зуур ISIS-ийн цэргүүд гэрээс нь 40 минутын зайтай байсан аж. Сурвалжлагч “Танай цуглаан хүндэтгэл мөргөл өргөсөн хэвээрээ юу?” гэхэд тэр итгэгч “Тийм ээ, бид чуулгандаа залбирлын хоёр шинэ бүлэг эхлүүлсэн. Нэг нь умардад байгаа хавчигдаж буй ахан дүүсийнхээ төлөө, нөгөө нь дайснуудынхаа төлөө залбирч байна” гэжээ.

Багдад дахь Гэгээн Жоржийн сүмийн гишүүд дайснуудынхаа төлөө залбирдаг. Тэд исламын шашинт бэлэвсэн эмэгтэйчүүдэд хүнсний багц тараадаг. Мөн тэд Есүсийн үлгэр дуурайлыг дагахаар дуудагдсан гэдэгт итгэдэг учраас дайснаа хайрладаг.

Энэ нийтлэл чуулганы түүхэнд байсаар ирсэн үнэнийг бидэнд сануулж байна. Бурханы ажиллах арга зам үргэлж хүний арга замтай зөрчилддөг. Хүний арга зам нь Дундад зууны исламын шашинт улсуудын эсрэг аян дайн явуулсан бол, Бурханы арга зам нь исламын ертөнц рүү сайнмэдээний сүүлийн аянаа хийж, 82 насандаа нас барсан Рэймонд Луллаар дамжуулан ажилласан юм. Хятадын гүнд хүмүүс цэргийн хүчээр ажилласан бол, Бурхан сайнмэдээ тараахын төлөө амьдралаа зориулсан Хадсон Тэйлороор дамжуулан ажилласан. Хүн хүчээр хийдэг, Бурхан сул доройгоор дамжуулан ажилладаг.

Бурханы арга хэзээ ч хүний арга зам байдаггүйгээс гадна, эцэстээ Бурханы арга зам л ялдаг. Христэд итгэгчид Есүстэй адил хайрладаг учраас л манай дэлхий өнө мөнхийн төлөө өөрчлөгдөж байна. Энэ өөрчлөлт удаан, өвдөлт ихтэй ч, уналтад орсон бидний дэлхийд ажиллах Бурханы арга зам ийм ажээ.

Есүстэй адил үйлчлэе гэвэл Есүстэй адил хайрлах ёстой. Сайнмэдээг тараагч нэгэн настай хүн үйлчлэлийнхээ нууцыг хуваалцахдаа “Бурхан өөрсдөд нь хэр их хайртай гэдгийг мэдэх цорын ганц зам бол та тэднийг хэр хайрлаж байгаагаа харуулах явдал юм” гэжээ. Энэ хүн Христийн хайр биднээр дамжуулан хэдий чинээ гэрэлтэнэ, төдий чинээ дэлхийн хүмүүс Бурхан руу ойртоно гэдгийг ойлгожээ. Үүнийг Есүсийн адил хайрлах гэнэ.

Есүс хэрхэн хайрлаж байсныг бид энэ хичээлээр үзлээ. Энэ даалгавар танд Есүсийн адил арга замаар хөршөө хайрлахыг даалгаж байна. Даалгаврыг хийхэд их хугацаа орохгүй боловч, үүнийг хэрэгжүүлэхэд их хугацаа шаардагдана. Хэрэгжүүлэхгүй байж болохгүй шүү. Бид Есүсийн адил хайрлахаар дуудагдсан.

Есүс хүмүүсийг хэрхэн хайрлаж байгаа гурван жишээг Сайнмэдээний номуудаас ол. Тэгээд амьдралдаа хэрэгжүүлэх гурван тодорхой хэрэгжүүлэлт гарга. Та Есүсийн үлгэр дуурайлыг хэрхэн дагах вэ? Энэ даалгавар танд зориулагдсан учраас аль болох тодорхой байгаарай.

Хэвлэж болох PDF-ийг эндээс авах боломжтой.