Lesson 2: Есүстэй адил залбирах нь

Энэ хичээлийн төгсгөлд суралцагч:

(1) Есүсийн амьдрал ба үйлчлэлд залбирал чухал байсныг таньж мэдэх.

(2) Есүсийн сургаалаас залбирлын талаарх зарчмуудыг суралцах.

(3) Бидний өнөөгийн үйлчлэлд залбирал ямар чухал болохыг ухаарах.

(4) Залбирдаг хүн болох бодит алхмуудыг хөгжүүлэх.

Есүстэй адил үйлчлэхийг хүсвэл бид Есүстэй адил залбирах ёстой.

Профессор Ховард Хендрикс залбирлын талаарх номлолдоо энэхүү ятгалгын үгсийг хэлсэн байдаг:

Таныг Библиэ залбирахгүй уншихад Сатан тийм ч их дургүйцэхгүй. Учир нь ийм Бичвэрийн уншлага таны амьдралыг хэзээ ч өөрчлөхгүй. Харин та үүнийг маш сайн мэддэг учраас энэ нь танд сүнслэг бардамналыг өгч магадгүй юм.

Таныг залбирахгүйгээр итгэлээ хуваалцахад ч Сатан дургүйцэхгүй байж мэднэ. Учир нь тэр Бурханы талаар хүмүүст ярихаас хүмүүсийн талаар Бурханд ярих нь хамаагүй чухал гэдгийг мэддэг.

Таныг залбирахгүйгээр нутгийн чуулганы үйлчлэлд оролцоход ч Сатан дургүйцэхгүй. Учир нь та хэдий идэвхитэй байж болох ч их зүйлийг хийж чадахгүй.[1]

[2]Есүсийн дэлхий дээрх үйлчлэлийн гол цөм нь залбирал байв. Залбирлаас илүү дээр тавигдах зүйл гэж үгүй. Есүсийн үйлчлэл нь тэнгэрлэг Эцэгтэйгээ харилцах харилцаанд нь үндэслэгдсэн байлаа. Тэрээр энэхүү харилцаагаа залбирал, Бурхантай дотно нөхөрлөх байдлаар хөгжүүлж хадгалдаг байжээ.

► Энэ хичээлийг сурахаас өмнө өөрийн амьдрал, үйлчлэл дэх залбирлын үүрэг оролцоог цэгнэж үзээрэй. Асуух:

• Миний залбирлын амьдрал тогтвортой байна уу?

• Би залбирлынхаа тодорхой хариултыг хамгийн сүүлд хэзээ харсан бэ?

• Миний залбирлын амьдралд тохиолддог хамгийн том сорилтууд юу вэ?

• Би залбирлын амьдралдаа өсөж байна уу?

Есүс үйлчлэлийнхээ чухал мөчүүдэд залбирч байсныг бид Түүний үйлчлэлийн бүхий л хэсгээс хардаг. Сайнмэдээний номуудад Есүс залбирсан талаарх 15 тодорхой тохиолдлыг өгүүлсэн байдаг. Есүсийн амьдралд залбирал нь хэзээ ч хоёрдогч зүйл байгаагүй, харин Түүний амьдралын төв байсан юм.

Лук бусад бичигчдээс илүү ихээр Есүсийн үйлчлэл дэх залбирлын талаар онцолж бичсэн. Есүс арван хоёр дагалдагчаа сонгохын өмнө шөнөжин залбирсан талаар зөвхөн Лук өгүүлсэн байдаг (Лук 6:12). Түүнчлэн Есүс Петр, Иаков, Иохан нарыг уул руу дагуулж, залбирах үед дүр төрх нь хувирч өөрчлөгдсөн талаар зөвхөн Лук өгүүлдэг (Лук 9:28). Түүний залбирлын талаар онцолж бичсэн зүйлс Үйлс номд ч үргэлжилдэг бөгөөд анхны чуулганы залбирлын үүрэг оролцооны тухай Лук 35 удаа дурдсан байдаг.

Есүсийн өдөр тутмын үйлчлэл дэх залбирал

► Марк 1:32-39 эшлэлийг унших.

Есүсийн үйлчлэлийн эхэн үед тохиолдсон энэхүү түүх нь залбирал үйлчлэл хэрхэн хоорондоо холбоотой байдгийг харуулдаг. Энэхүү хүүрнэлийн үйл явцыг анзаарч хараарай. Өмнөх орой нь Есүсийн байрлаж байсан байшингийн гадаа хүмүүс цугларахад Тэр олон хүнийг эдгээжээ.

Маргааш өглөө нь Есүс үүрээр босож, эзгүй газарт залбирахаар явсан. Симон Петр Түүнийг хайж олоод “Бүгд Таныг эрж байна” гэхэд Есүс “Цөмөөрөө зэргэлдээх суурингуудад очицгооё. Би тэнд ч бас тунхаглах болно. Учир нь Би үүний төлөө ирсэн билээ гэж айлдав.” Залбирлыг нь үйлчлэл дагалддаг байсан нь Есүсийн үйлчлэлийн загвар байв.

Үйлчлэлийн загвар ийм байх ёстой. Залбиралгүйгээр бидний үйлчлэл сүнслэг байдлын хувьд цөхөрч туйлдахад хүрдэг. Үйлчлэлгүйгээр бидний залбирлын амьдрал өөртөө төвлөрсөн аминч болж хувирдаг. Бид эргэн тойрныхоо хүмүүсийн хэрэгцээнд үйлчлэх оролдлого чармайлтаа гээдэг. Залбирал, үйлчлэл нь хамтдаа холбоотой байх ёстойг Есүс харуулсан.

Шийдвэр гаргах үеийн залбирал

► Лук 6:12-16 эшлэлийг унших.

Есүсийн үйлчлэлийн хамгийн чухал шийдвэрүүдийн нэг нь арван хоёр элчээ сонгох байлаа. Есүсийн номлолыг сонсдог олон мянган хүмүүс дотроос дагалдагчид гэж нэрлэгдэх Түүнд ойр байсан олон хүн байжээ (Иохан 6:60, 66). Түүний дагалдагчдаас 72 хүн Есүсийн номлох аяллыг төлөөлөх хэмжээний ойр байв (Лук 10:1). Гэсэн ч Есүс арван хоёрыг л элчээр сонгосон юм.

Арван хоёр элч Есүстэй их цагийг хамт өнгөрүүлдэг байсан. Дэлхий дээрх үйлчлэлийнх нь төгсгөл хүртэл тэд Түүнтэй хамт байв. Түүнийг дээш өргөгдсөний дараа элч нарын арван нэг нь анхны чуулганы удирдагчид болцгоосон. Арван хоёрыг сонгох нь маш чухал шийдвэр байжээ. Есүс ямар нэгэн ном бичээгүй, ямар ч сургууль байгуулаагүй. Чуулганы төлөөх Түүний алсын хараа эдгээр хүмүүсээр биелэх учиртай байлаа.

Есүс арван хоёр элчээ сонгохын өмнө юу хийсэн бэ? Тэр залбирсан. Чухал шийдвэртэй нүүр тулахдаа Есүс шөнөжин залбирчээ. Хэрэв Бурханы Хүүд чухал шийдвэр гаргахын өмнө шаргуу залбирах нь чухал байсан бол, биднийг шийдвэр гаргахад залбирал нь ямар чухал үүрэгтэй байх бол!

Зовж шаналах үеийн залбирал

► Матай 26:36-46 эшлэлийг унших.

Есүс баривчлагдахаасаа хэдхэн цагийн өмнө залбирахаар Гетсеманид очжээ. Залбирлаар Тэр зовлон зүдгүүрт өөрийгөө бэлтгэжээ. Есүс хүмүүн чанарынхаа зовлонгоос зайлсхийхийн тулд бурхан чанараа хэзээ ч ашиглаагүй юм. Ингэхийн оронд Тэрээр зовлон зүдгүүрийг давах хүчийг олж авахаар залбиралд түшиглэжээ.

Цэцэрлэгт залбирсан Есүсийн залбирал нь өнөөгийн бидэнд үлгэр дуурайл болдог. Түүний залбирал нь хийсвэр байгаагүй. Есүс бодитоор зовж шаналж байсан. Есүс өвдөлт зовлонд хүмүүн байдлаар хандаж, хариу үйлдсэнийг ойлгох нь танд урам зориг өгч байна уу? Зовлонтой нүүр тулахдаа Есүс тайвшралын төлөө залбирчээ:

Тэр цэцэрлэгт “Өө Эзэн минь, Таны өмнөөс зовж шаналахаар намайг сонгосонд би маш их талархаж байна” гэж залбираагүй. Үгүй ээ, харин Тэр уй гашуу, айдас, хаягдаж, цөхрөлд орсон тийм байдлыг туулсан юм. Гэсэн хэдий ч, Тэр орчлон ертөнцийн төвд хайрын Бурхан, Эцэг нь амьдардаг гэдгийг мэддэг учраас юмс хэрхэн үзэгдэж буйгаас үл хамааран, Түүнд найдаж тэвчсэн юм.[1]

Зовлон зүдгүүртэй нүүр тулахдаа бид байгаагаасаа илүү хүчтэй мэт дүр эсгэх шаардлагагүй. Иов шиг бид гомдсондоо уйлж болох юм. Хүмүүн чанараараа Есүс ч мөн адил зүйлийг хийсэн! Гэсэн хэдий ч бидний хайртай тэнгэрлэг Эцэг маань бүгдийг бүрэн хянаж байгаа тул бид Есүсийн адил итгэмжит хэвээр үлдэж чадна.

Залбирлаар бид Эцэгийн хүслийг хүлээн авч чаддаг. Зовлон зүдгүүртэй нүүр тулсан Есүсийн залбирлын болон зовлон зүдгүүрийн үед бидний залбирлын гол түлхүүр нь Эцэгийн хүсэлд бууж өгөх явдал юм: “Гэвч Миний хүслээр биш, харин Таныхаар болог гэж” Тэр залбирсан.

Есүс залбирлын ач холбогдлыг өөрийн үлгэр дуурайлаар харуулаад зогсохгүй, сургаалынхаа үлэмж хэсгийг залбиралд хандуулсан байдаг. Дагалдагчдынхаа сүнслэг амьдралд залбирал амин чухал болохыг Есүс мэдэж байсан. Тийм ч учраас Тэр дагалдагчдаа залбирахад зааж сургасан.

Есүсийн уулан дээрх сургаал

► Матай 6:1-18 эшлэлийг унших.

Есүс уулан дээрх номлолдоо ядууст өглөг өгөх, залбирах, мацаг барих гэсэн гурван сүнслэг үйл ажиллагааны талаар заажээ. Энэ нь Есүс дагалдагчдаасаа хүлээж байсан ердийн үйл ажиллагаа гэдгийг сургаалаас нь тодорхой харж болно. Есүс “Хэрэв чи ядууст өгвөл…” эсвэл “Хэрэв чи залбирвал…” юм уу “Хэрэв чи мацаг баривал…” гэж хэлээгүй. Тэр тэднийг өгөөмөр, залбирдаг, сахилга баттай дагалдагчид байгаасай гэж хүсэн хүлээж байв.

Хэрэв эдгээр сахилга батууд нь ялзарсан сэдлээс үүдэлтэй бол энэ нь утга учиргүй болохыг Есүс харуулжээ. “Хоёр нүүрт” гэдэг нь эрт цагт олон янзын баг зүүж, өөр өөр дүрд тоглодог жүжигчнийг хэлдэг байжээ. Ингэж бусдын өмнө “шашинлаг дүрд тоглох” нь боломжтой юм.

• Өгөөмөр байдлаараа бусдыг гайхшруулахын тулд ядууст өгөх нь боломжтой зүйл юм. Есүс тийм хүмүүст “тэд шагналаа бүрэн авсан” гэжээ.

• Гоё чамин үгсээр сонсогчдод сэтгэгдэл төрүүлэхүйц залбирах нь ч боломжтой юм. Есүс тийм хүмүүст “тэд шагналаа бүрэн авсан” хэмээжээ.

• Бусдад сүсэг бишрэл, сахилга батаа гайхуулахын тулд мацаг барих ч боломжтой. Есүс тийм хүмүүст “тэд шагналаа бүрэн авсан” гэж хэлсэн юм.

Дээрх тохиолдол тус бүрд тухайн хүн ядууст өгөхдөө, залбирч, мацаг барихдаа бусдад гайхуулж, сэтгэгдэл төрүүлэхийн тулд эдгээрийг хийжээ. Хүмүүст ихэд сэтгэгдэл төрүүлсэн бол энэ нь түүний шагнал байв. Тиймээс тэр хүн Бурханаас ямар ч шагнал авахгүй юм.

Эдгээр сүнслэг сахилга батыг хэрэгжүүлэх сэдэл нь бидний тэнгэрлэг Эцэгийг баярлуулах учиртай. Ядууст өглөг өгөх, залбирах, мацаг барих бидний шагнал бол Бурхан өөрөө юм. Дэлхийлэг сайшаал, алга ташилтын төлөө бид эдгээр сүнслэг сахилга батыг үйлдэх ёсгүй. Харин үүний оронд Бурханы төлөөх улам бүр гүнзгийрэх хүсэл тэмүүллээр бид эдгээрийг үйлддэг.

Есүс дагалдагч нартаа энгийн бөгөөд шууд байдлаар залбирахыг заасан:

Тэнгэр дэх, бидний Аав аа, Таны алдар ариунаар дуурстугай. Таны хаанчлал иртүгэй. Таны таалал тэнгэрт шигээ газарт бас биелтүгэй. Бидний өдөр тутмын хүнсийг Өнөөдөр бидэнд хайрлаач. Бид өртөнгүүдээ уучилсан адил өөрсдийн минь өрийг уучлаач. Биднийг уруу татлагад бүү автуулаач, ёрын муугаас гэтэлгээч. Хаанчлал, хүч чадал, алдар суу мөнхөд Таных. Амен (Матай 6:9-13).

Энэ нь Матай 6:7-8 эшлэл дэх Есүсийн буруушаасан утга учиргүй хоосон үг хэллэгээр, ухаангүй давтах залбирал биш юм. Харин оронд нь бидний залбирлыг чиглүүлэх ёстой хандлагын загвар болдог залбирал юм.

Харилцаа

“Тэнгэр дэх, бидний Аав аа” гэдэг нь бидний Бурхантай ойр дотно харилцаатай байгааг харуулдаг. Бурханыг алс хол байгаа гэхээс илүүтэй хүүхдүүддээ сайн бэлэг өгөх дуртай Эцэг гэдгийг нь бид таньж мэддэг (Матай 7:11). Энэ хэллэг нь ойр дотно байдал (“бидний Аав аа”) болон эрх мэдэл (“Тэнгэр дэх”) аль алиныг нь харуулдаг. Бурхан бол сүр жавхлантай, мөн бодгаль юм.

Хүндлэл

“Таны алдар ариунаар дуурстугай” гэдэг нь тэнгэр дэх Эцэг ба бидний хоорондын ялгааг харуулдаг. Бурхан хэдийгээр хайр дүүрэн Эцэг боловч, Тэр ариун билээ.[1] Номлогчийн үгс дэх мэргэн хүний сурснаар, бид Бурханы оршихуйд хүндэтгэх, эмээх сэтгэлээр ойртон очих учиртай (Номлогчийн үгс 5:2).

Захирагдах

“Таны хаанчлал иртүгэй Таны таалал тэнгэрт шигээ газарт бас биелтүгэй” гэдэг нь бидний Түүний эрх мэдэлд захирагдах хүслийг төлөөлдөг. Бурханы хүсэл тэнгэрт төгс биелдэг шиг газар дээр биелээсэй гэж бид залбирах хэрэгтэй юм.

Хангамж

Дэлхий дээрх хүмүүсийн дийлэнх хувь нь хоол хүнснийхээ төлөө өдөр бүр ажиллах ёстой байдаг. “Бидний өдөр тутмын хүнсийг өнөөдөр бидэнд хайрлаач” гэдэг нь өдөр бүр Эцэгт итгэж найдахыг хэлдэг. Хүүхдүүд нь учраас Тэр бидний хэрэгцээг хангана гэдэгт бид итгэдэг.

Гэмшил

“Бид өртөнгүүдээ уучилсан адил өөрсдийн минь өрийг уучлаач” Лук 11:2-4 эшлэлд үүнтэй адил залбирлыг “Бидэнд өртэй бүхнээ бид уучилдаг учир бидний нүглийг мөн уучлаач” хэмээн тэмдэглэсэн байдаг. Нэгэнт бидний нүгэл нь Бурханд өр гэж тооцогддог болохоор (Колоссай 2:14) Матай болон Лук номд ижил утгаар бичигджээ.

Бусдыг өршөөж уучилснаар бид Бурханы уучлалыг олж авдаг гэсэн утгаар Есүс энд заагаагүй. Харин бид уучлагдсан учраас бидэнд муу зүйл хийсэн хүмүүсийг сайн дураараа уучилдаг. Есүсийн заасан өршөөл үзүүлдэггүй зарцын тухай сургаалт зүйрлэл нь бидний уучлал болон бидний бусдыг уучлах хүсэл хоорондын хамаарлыг харуулдаг (Матай 18:21-35).

Ялалт

“Биднийг уруу татлагад бүү автуулаач ёрын муугаас гэтэлгээч” гэдэг нь сорилт, уруу татлагыг ялахын төлөөх залбирал юм. Бурхан хүүхдүүдээ хэзээ ч сорьдоггүй (Иаков 1:13), харин бидний хүн нэг бүр сорилт, уруу татлагатай тулгарах болно (1 Петр 1:6-7). Тэр үед Бурхан биднийг тэсвэрлэхийн аргагүй тийм сорилтод орохыг хэзээ ч зөвшөөрөхгүй (1 Коринт 10:13).

Зоримог залбирах тухай Есүсийн сургаал

► Лук 11:1-13 эшлэлийг унших.

Лук Эзэний заасан залбирлын дараа хүүхдүүддээ сайн бэлэг өгөх дуртай Эцэгт хандан зоримог байдлаар залбирахыг бидэнд заадаг сургаалт зүйрлэлийг өгүүлсэн. Ойрхи Дорнодын соёлд зочиндоо санаа тавихын тулд хөршөөсөө зээлдэг тохиолдол түгээмэл байлаа. Хэрэв тухайн хүн зоригтой асуувал хөрш нь хэрэгцээтэй бүхнийг нь өгөх боломжтой байж. Тухайн хүсэлтэд “Үгүй” гэж хэлэх нь энэ соёлд бүдүүлэгт тооцогдоно. Хэдий хөршийнхөө гэрийнхний тухыг алдуулахыг хүсэхгүй байгаа ч тэр хүн тусламж гуйхаас татгалздаггүй.

Бурхан зоригтойгоор асуудаг хүүхдүүддээ эдгээр сайхан бэлгүүдийг бүр хавьгүй илүү арга замаар өгөхийг хүсдэг. Энэ сургаалт зүйрлэлд гардаг хүн зоримог байдлаар асуудаг шиг бид тэнгэрлэг Эцэгтээ ийнхүү итгэлтэйгээр хандаж чадна. Яагаад? Бурхан бидний хүсэлтээс татгалзах нь Түүнд ичгэвтэр учраас биш, харин бид гуйх, хайх, тогших зөвшөөрлийг Түүнээс хүлээн авсан учраас тэр юм (Лук 11:9).

Лук 11:1-13 эшлэлд зочиндоо өгөх хоол хүнс хэрэгтэй байгаа хөршдөө туслахыг хүсдэггүй, орноосоо ч өндийдөггүй нэгэн хүний талаарх түүхийг Есүс өгүүлдэг.

Энэхүү сургаалт зүйрлэлийг ойлгохын тулд та эхлээд еврейчүүдийн заах хэв маяг болох “арай бага ба илүү агуу” гэсэн санааг ойлгох хэрэгтэй. Энэ нь “Хэрэв A (арай бага) нь үнэн бол, Б (илүү агуу) нь бүр илүү үнэн байх ёстой” гэсэн санаа юм. Өнөөдөр бид “Хэрэв хүн өлсөж байгаа танихгүй хүнийг хооллож байгаа бол (А), хайраар дүүрэн эцэг хүн өөрийн хүүхдүүдээ бүр ч илүү ихээр хооллож санаа тавихгүй гэж үү (Б)” гэсэн утгатай.

Энэ сургаалт зүйрлэлийг уншихдаа “Бурхан тэрхүү залхмаар хөрштэй яг адил юм. Хэрвээ би Түүнийг сайн ятгаж чадвал залбиралд минь заавал хариулна” гэж бодож болохгүй. Есүс тэрхүү залхмаар найзыг тэнгэрлэг Эцэгийн хүсэлтэй харьцуулан харуулж байна. Хэрэв дэлхийн хөрш чинь зоримог хүсэлтэд чинь хариу өгч байгаа бол тэнгэрлэг Эцэг хүүхдүүддээ бүр илүү ихээр хариулахгүй гэж үү!

Зоримог залбирлын талаарх Есүсийн сургаал (үргэлжлэл)

Залбирал нь харилцаа юм.

Хэрэв Бурхан хүүхдүүдийнхээ залбиралд хариулахыг хүсдэг бол яагаад Түүний хариулт заримдаа хойшлогддог вэ? Гуй, хай, тогш гэсэн үгс одоо цаг дээр, тушаал хэлбэрээр бичигдсэн. Энэ нь бид үргэлжлүүлэн гуйсаар, хайсаар, тогшсоор байх ёстой гэсэн үг юм. Яагаад?

[1]Нэг шалтгаан нь залбирал бол гуйлт хүсэлтүүдийн жагсаалт биш. Залбирал нь бидний тэнгэрлэг Эцэгтэйгээ харилцах тасралтгүй харилцаа билээ. Паул бидэнд “Тасралтгүй залбир” (1 Тесалоник 5:17) гэж тушаасан шиг Есүс биднийг үргэлжлүүлэн гуйж, хайж, тогшсоор бай гэж тушаасан. Бурхантай тасралтгүй харилцах энэхүү яриагаар дамжуулан бидний харилцаа улам гүнзгийрч өсдөг. Залбирал бол хүсэлтийн жагсаалтаас ч илүү зүйл бөгөөд энэ нь харилцаа юм.

Тууштай залбирлын талаарх сургаалт зүйрлэл

Лук 17-р бүлэгт фарисайчууд Есүсээс Бурханы хаанчлал хэзээ ирэх талаар асуудаг. Есүс тэдэнд хариулахдаа онцгой тэмдгүүдийг хүлээх хэрэггүй бөгөөд оронд нь “Бурханы хаанчлал нь та нарын дунд байна гэв” (Лук 17:20-21). Бурханы хаанчлал нь Есүсийг дагаж буй хүмүүсийн дотор аль хэдийн ирсэн байв.

Дараа нь Есүс дагалдагч нартаа хандаж, Бурханы хаанчлалын талаар заажээ. Тэд Есүсийг улс төрийн хувьд төд удалгүй хаанчилж эхэлнэ гэсэн хүлээлттэй байв. Харин Есүс тэднийг хүлээхэд бэлтгэсэн бөгөөд энэ нь Түүний үхлээс хойш ч хамаатай байжээ. Хүлээж байхдаа тэд залбиралд тууштай байж, сэтгэл алдрахгүй байх ёстой. Үүний дараа Есүс итгэмжит залбирлын талаарх түүхийг өгүүлжээ.

► Лук 18:1-8 эшлэлийг унших.

Эрт үеийн хот суурин газрын шүүгчид хэзээнээс л ажлаа шударга хийдэггүй байжээ. Авлига өгөхөөс нааш хэнийг ч сонсдоггүй байв. Энэ бэлэвсэн эмэгтэйд тэдэнд өгөх мөнгө байгааүй учраас шүүгчид түүний хэрэг явдлыг сонсохоос татгалзжээ. Гэсэн хэдий ч энэ тууштай эмэгтэй бууж өгөлгүй асуусаар байлаа. Эцэст нь шударга бус шүүгч түүнд “Түүнийг өмгөөлөхөөс, эс тэгвээс тэр ирж үргэлж надад төвөг удах вий” гэжээ.

Энэхүү сургаалт зүйрлэл нь зоримог хөршийн тухай сургаалт зүйрлэл шиг “арай бага ба илүү агуу” заах хэв маягийг ашигласан байна. Та энэ сургаалт зүйрлэлийг уншихдаа дараах байдлаар ойлгож болно:

• [2]Бурхан бол шударга бус шүүгч бус. Бидний Эцэг сонгосон хүмүүстээ шударга байдлыг өгөхийг хүсдэг.

• Бид бол бэлэвсэн эхнэр биш. Тэр танил биш хүн байсан бол, бид Бурханы хүүхдүүд.

• Тэр эмэгтэй шүүгчтэй уулзах боломжгүй байсан бол, бид Есүсээр дамжуулан Бурханд хандах боломжтой болсон.

Энэ нь ялгаатай байдлыг харуулж буй сургаалт зүйрлэл юм. Шударга бус шүүгч хүртэл тууштай бэлэвсэн эмэгтэйд хариулж байгаа бол, тэнгэр дэх бидний Эцэг хүүхдүүдийнхээ залбиралд бүр илүү ихээр хариулах нь лавтай.

Даруу залбирлын талаарх сургаалт зүйрлэл

► Лук 18:9-14 эшлэлийг унших.

Есүсийн дараагийн өгүүлсэн сургаалт зүйрлэл нь “Өөрсдийгөө зөвт хэмээн өөрсдөдөө итгээд, бусдыг басамжлагч хэсэг” хүмүүст зориулагджээ. Энэхүү сургаалт зүйрлэл нь залбирлын зөв хандлагын тухай заадаг.

Энэ сургаалт зүйрлэлийн санааг “Өөрийгөө өргөмжилдөг бүгд номхруулагдаж, харин өөрийгөө даруу байлгагсад өргөмжлөгдөнө” гэсэн төгсгөл хэсгээс нь харж болно. Өөрсдийнх нь зөвт байдлын улмаас залбирал нь хариултаа авдаг гэж фарисайчууд боджээ. Харин өөрсдөд нь зөвт байдал байхгүй тийм хүмүүс Бурханы нигүүлслийн ачаар залбиралдаа хариулт авдаг гэдгийг Есүс харуулж байна. Залбирлын хариултыг хэн ч хүртэх зохистой биш юм. Харин Бурхан юуг ч хүртэх зохисгүй хүмүүсийг нигүүлслийнхээ улмаас сонсож, залбиралд нь хариулдаг.

Христтэй адил хүмүүс залбирлын хүмүүс байдаг. 19-р зууны Ливерпүүлийн бишоп Ж.К. Райл түүхийн туршид хамгийн агуу нөлөө үзүүлсэн Христэд итгэгчдийн амьдралыг судалжээ. Эдгээр хүмүүсийн зарим нь баян, зарим нь ядуу байсан гэж тэр хэлсэн. Зарим нь боловсролтой, зарим нь боловсролгүй байв. Зарим нь калванист, зарим нь арминианчууд байсан. Зарим нь сүмийн тогтсон ёслолтой, зарим нь чөлөөт байв. “Гэсэн хэдий ч эдгээр хүмүүст нийтлэг нэг л зүйл байсан. Тэд бүгдээрээ залбирлын хүмүүс байлаа.”[1]

Чуулганы түүхийн туршид Христтэй адил хүмүүс нь залбирлын хүмүүс байсаар иржээ. Христэд итгэгч агуу удирдагч E.M. Баундс өглөө бүр 4:00-7:00 цагийн хооронд залбирдаг байсан. Тэрээр “Ариун Сүнс арга хэлбэрээр бус, харин хүмүүсээр дамждаг. Тэр техник төхөөрөмж дээр бус, харин хүмүүс дээр ирдэг. Тэрээр төлөвлөгөөг бус, харин хүмүүсийг, залбирлын хүмүүсийг тосолдог”[2] хэмээн бичсэн байдаг.

Жорж Мюллер олон мянган хүүхдүүдэд зориулж асрамжийн газар ажиллуулсан. Тэр хэзээ ч өөр хүнээс тусламж гуйхгүй, харин зөвхөн залбиралд найдна гэж шийдсэн байв. Тэр зөвхөн залбирлаар дамжуулан 7,000,000 гаруй долларыг хүүхдүүдийн төлөө хүлээн авчээ. Зөвхөн асрамжийн газруудыг дэмжээд зогсохгүй тэр бусад олон үйлчлэлд олон арван мянган долларыг зориулж өгсөн байдаг. Жорж Мюллер залбирлын хүчийг мэддэг хүн байлаа.

Бид яагаад залбирдаг вэ?

[3]Бид Бурханаас хамааралтай учраас залбирдаг.

Есүс хүмүүн байдлаараа Эцэгтэйгээ харилцахын тулд залбирахыг түшиглэж байсан. Залбирал бол Бурханаас хамааралтай үйл юм. Энэ нь бид өөрсдөдөө биш, харин Бурханд найдаж байгааг харуулдаг.

► Матай 26:31-46 эшлэлийг унших.

Симон Петрийн бүтэлгүйтэл нь залбирал ямар чухал болохыг харуулдаг. Есүс дагалдагч нартаа “Та нар энэ шөнө Надаас болж бүгд бүдрэх болно” гэж анхааруулж байсан. Есүс Петрт шууд хандан “Симон оо, Симон оо, үзтүгэй, чамайг буудай мэт шигшихийн тулд Сатан зөвшөөрөл гуйсан” (Лук 22:31) гэж анхааруулсан. Петр хоёр сул талаасаа болж унажээ.

1. Петр өөртөө хэт итгэлтэй байсан. Тэр “Танаас болж бүгд бүдэрлээ ч би хэзээ ч бүдрэхгүй гэхэд…. би Тантай хамт үхэх ёстой болсон ч Таныг үгүйсгэхгүй” (Матай 26:33, 35) гэж хэлж байсан. Бардам зан нь өөрийнхөө хүчинд хэт эрдэх байдлыг Петрт олгожээ.

2. Петр залбирсангүй. Петр өөрийнхөө хүчинд эрдсэн тул Бурханд найдсангүй. Тэр Есүстэй хамт залбирахын оронд унтаж орхисон. Бид Бурханаас бүрэн хамааралтай гэдгээ ухамсарласан үедээ чин сэтгэлээсээ залбирдаг. Дик Ийстмен “Зөвхөн залбирлаар л бид асуудал бэрхшээлүүдээ Бурханд бүрэн даатгадаг”[4] гэжээ.

Бурханыг бүр илүү мэдэхийн тулд бид залбирдаг.

[5]Орчин цагийн чуулганы нэг томоохон сул тал бол Бурханы талаарх бидний гүехэн мэдлэг юм. Ихэнхдээ бидний залбирлын хүсэлт маань зөвхөн материаллаг хэрэгцээ, хувийн биелүүлэх зүйлсээс бүрддэг. Бидний олонхи нь “Бурхан минь, миний хүүхдүүдийг өөрийн дүр төрх рүү хэлбэржүүлж өгөөч” гэдгээс илүү “Бурхан минь, миний хүүхдүүдэд сайн ажил олоход нь туслаач” гэж залбирахад их цагийг зарцуулдаг. Бид сүнслэг эдгэрлээс илүүтэй бие махбодын эдгэрлийн төлөө шаргуу залбирдаг. Энэ нь бид залбирлын жинхэнэ утга учрыг маш бага ойлгодог гэдгийг харуулж байна.

Залбирлын үндсэн зорилгуудын нэг бол Бурханыг илүү ихээр мэдэх явдал юм. Залбирал дотор бид Бурханы зүрх сэтгэлтэй адил болж хөглөгддөг. Бурханаар хүссэн зүйлээ хийлгэх нь залбирал биш юм. Бурханы хүсэж байгааг бид хүсэх хүртэл Бурханы зүрх сэтгэлийн талаарх мэдлэгийг залбирал бидэнд өгдөг.

Бидний залбирал ба хүсэл нь Бурханы хүсэлд бүрэн нийцэх үед “Та нар юуны төлөө залбиран гуйна, түүнийгээ авсан гэдэгтээ итгэгтүн. Тэгвэл тэр чинь ёсоор болно” (Марк 11:24) хэмээн Есүс хэлжээ. Бидний зүрх сэтгэл Бурханы сэтгэлтэй нийцэж эхлэх учраас бид буруу сэдлээр эсвэл Бурханы хүслийг эсэргүүцэх зүйлсийг асууж залбирахгүй (Иаков 4:3 болон 1 Иохан 5:14). Энэхүү Бурханы зүрх сэтгэлийн талаарх мэдлэг нь байнгын залбирлаар дамжин ирдэг.

Пуританчууд “бид залбирах хүртлээ залбирах ёстой” гэж хэлдэг байжээ. Өөрөөр хэлбэл, бид хоосон үгсийг орхиж, Бурханы оршихуйд орохын тулд хангалттай удаан, тэвчээртэйгээр залбирах ёстой гэсэн санаа юм. Бид Бурханыг баярлуулах хүртлээ залбирах ёстой.

► Залбирал танд Бурханы болон Түүний хүслийн талаар гүн гүнзгий мэдлэг өгч байсан үеийн талаар ярина уу.

Бид хэрхэн залбирах вэ?

Есүсийн залбирлын үлгэр дуурайлд суралцсанаар бид үр нөлөөтэй залбирах чухал сургамжуудыг авах болно.

Бид тэвчээртэй залбирдаг.

Есүс Бурханы Хүү байсан. Түүний залбирлын амьдралыг “Эцэг минь, та намайг юу хийгээсэй гэж хүсэж байна?” гэж залбираад л тэр даруй хариугаа авдаг тийм хялбар, энгийн залбирал мэтээр хүмүүс ойлгодог. Гэтэл оронд нь Есүс арван хоёр элчийг сонгохын өмнө шөнөжин залбирч байсныг бид хардаг. Бид Түүнийг Гетсемани цэцэрлэгт залбирал дотор тэмцэлдэж байсныг мэднэ. Залбирал, Есүсийн залбирал ч мөн адил тэвчээр, цаг хугацааг шаардаж байв. Залбирал бол Бурханыг хүлээх явдал юм.

Гленн Паттерсон залбирлаар хүлээх тухай, үүний ач холбогдлын талаар “Биднийг хүлээж байх зуур Бурхан бидний дотор юу хийж байгаа нь бидний залбирлаараа хүлээж байгаа зүйлтэй адил чухал юм. Хүлээх нь Бурхан биднийг хэн байлгахыг хүсэж байгаачлан буй болгох үйл явцынх нь хэсэг байдаг” гэж хэлжээ. Бид Бурханыг хүлээх тусам Түүнийг илүү сайн мэдэхэд суралцдаг.

Дуулал 37:1-8-д залбирлын талаарх чухал сургамжууд бий. Эдгээр тушаалуудыг үзнэ үү:

• Санаа бүү зов.

• Эзэнд итгэ.

• Эзэнд баярлагтун.

• Эзэнд замаа даатга.

• Tүүнд итгэж найд.

• Эзэн дотор дуугүй бай.

• Түүнийг тэвчээртэйгээр хүлээ.

• Уурлахаа боль.

• Санаа бүү зов (давтан!)

Эдгээр тушаалууд нь таны төлөө санаа тавьдаг, зүрхний чинь хүслийг танд өгөх (Дуулал 37:4) Бурханд тэвчээртэйгээр итгэж найдахыг заадаг. Тэвчээртэй залбирлаар дамжуулан бид Бурханы хүсэж буй итгэж найддаг хүмүүс болдог.

[6]Тууштай залбирлын жишээ

Жорж Мюллер итгэлийн амьдралынхаа эхэн үед таван найзаа итгэгч болоосой гэж залбирч эхэлсэн. Олон сарын дараа тэдний нэг нь Эзэн рүү ирсэн. Арван жилийн дараа өөр хоёр нь итгэгч болов. Дөрөв дэх найз нь аврагдах хүртэл 25 жил зарцуулагджээ.

Мюллер тав дахь найзынхаа төлөө үхэх хүртлээ залбирсан. Тэр 52 жилийн турш найз нь Христийг хүлээн аваасай гэж залбирахаа хэзээ ч зогсоогоогүй юм! Мюллерийн оршуулгаас хэдхэн хоногийн дараа тав дахь найз нь аврагджээ. Мюллер тууштай залбиралд итгэдэг байв.

Бид даруугаар залбирдаг.

Есүс “Миний хүслээр бус, харин Таныхаар болог” (Лук 22:42) гэж залбирсан. Есүс Эцэгийнхээ төгс хүсэлд найдаж болно гэдгийг мэддэг байв.

Залбирал бол даруу байдлын үйл юм. Бид бусдад өөрсдийн мэргэн ухаанаар тусалж чадахгүй учраас бусдын төлөө залбирдаг. Бид Бурханд найдвараа тавих учиртай. Түүнчлэн бид амьдралаа өөрсдийн хүчээр удирдаж чадахгүй учраас бид өөрсдийнхөө төлөө ч залбирдаг. Бид Бурханыг түших ёстой.

Бидэнд Бурханы тусламж хэрэгтэйг залбирал ойлгуулдаг. Амьдралын асуудал бэрхшээлүүдээ өөрсдийн чадлаар шийдвэрлэнэ гэдэгтээ итгэлтэй байгаа хүн үнэн сэтгэлээсээ залбирах нь юу л бол. Бид амьдралаа өөрсдийнхөө хүчээр удирдаж чадахгүй гэдгээ ухаарсан үедээ бид даруугаар залбирдаг.

Бидний залбирал Бурханд бүрэн найдсан, даруу хандлагатай байх ёстой. Бид Бурханаас залбирлын хариултаа амар тайван ба баталгаа дотор хүлээж чадна. Учир нь хүүхдүүддээ хамгийн сайн сайхныг хүсдэг, бидэнд хайртай тэнгэрлэг Эцэгтээ хандан бид залбирдаг шүү дээ. Амьдрал ба үйлчлэлээс ирэх дарамт шахалт дунд даруу залбирал нь Бурханд чимээгүйхэн найдах итгэлийг өгдөг.

Бид хувьчлан залбирдаг.

Есүс дагалдагч нартаа “бидний Аав аа” хэмээн Бурханд хандан хүнийхээ хувьд залбирахыг заасан. Жинхэнэ залбирал нь бодгаль шинжтэй. Паул Мюллер “Олон хүн Бурханд бус, харин залбирахад анхаарлаа төвлөрүүлдэг учраас залбиралд суралцахдаа түүртдэг”[7] гэжээ. Бид ихэнхдээ Бурхантай ярихаас илүүтэй “залбирлыг хэлдэг.” Энэ нь залбирахдаа “хоосон үг” (Матай 6:7) хэрэглэхгүй байхыг заасан Есүсийн анхааруулгын гол утга учир юм.

Оройн хоолны ширээн дээр цээжилсэн үг хэллэгтэй хүн ирж байна гэж төсөөлье. Тэрээр “Би гэр бүлийнхэнтэйгээ яриа өрнүүлэхийг хүсэж байгаа тул хэлэх үгээ бэлдэж цээжилсэн” гэж хэлвэл ямар сонсогдож байна. Мэдээж энэ бол жинхэнэ ярилцлага байж таарахгүй. Хүн хэрэглэх үгэндээ биш, харин ширээ тойрон сууж буй хүмүүст анхаарлаа хандуулах нь зөв зүйтэй.

Өөрсдөө бичсэн, эсвэл бусад хүмүүсийн бичсэн залбирал нь залбиралд багтаах ёстой сэдвүүдийг санахад бидэнд тусалж болох ч, залбирал нь цээжилсэн үгсээс илүүтэй Бурханд төвлөрөх ёстой. Залбирал нь систем биш, харин харилцаа юм. Иймд залбирал бодгаль чанартай байх учиртай.

Бид хэрхэн залбирлын хүмүүс болох вэ?

5-р зууны үед Ромын язгууртан Анисиа Фалтониа Проба гэгч хүн Августинаас залбирлын талаар зөвлөгөө авахыг хүсжээ. Проба хэрхэн залбирлын хүн болж болохыг мэдэхийг хүссэн. Августин залбирлын тухай мэргэн зөвлөгөө бүхий урт захидлыг түүнд явуулжээ.[8] Энэ хэсэгт бид Августины залбирлын зарчмуудаас суралцах болно.

Ямар хүн залбирлын хүн болж чадах вэ?

Нэгд, залбирч буй хүн өөр ямар ч нөөц, эх сурвалжгүй хүн байх ёстой гэж Августин хэлжээ. Залбирдаг хүн зөвхөн залбирлыг л түшиглэнэ.

Проба нь Ромын хамгийн нөлөө бүхий, чинээлэг хүний бэлэвсэн эхнэр байжээ. Түүний гурван хүү нь Ромын консулаар ажиллаж байв. Августин Пробад “өөрийгөө энэ дэлхийд хоосорч, хаягдсан гэж тооцоорой” хэмээн бичжээ. Бид хичнээн чинээлэг, хүчирхэг, амжилттай байсан ч Бурханы өмнө сул дорой, арчаагүй байдлаа хүлээн зөвшөөрөх ёстой. Эс бөгөөс бидний залбирал татвар хураагчийнхтай адил бус, харин фарисайн залбиралтай адил байх болно.

Бид юуны төлөө залбирах ёстой вэ?

Августин Пробад сонирхолтой зөвлөгөө өгсөн. Тэрээр “Аз жаргалтай амьдралын төлөө залбир” гэж хэлж. Энэ нь хувиа хичээсэн сонсогдож болох ч, жинхэнэ аз жаргал зөвхөн Бурханаас ирдэг гэж Августин тайлбарласан байдаг. “Жинхэнэ аз жаргалтай хүн бол хүссэн бүхэн нь байгаа ч, зохисгүй, хор хөнөөлтэй зүйлсийг хүсэж шунадаггүй” тэр хүн юм гэжээ.

Христэд итгэгч хүн аз жаргалтай хүн юм. Учир нь түүнд Бурхан байгаа бөгөөд Бурхан түүнд байлгахыг хүсээгүй зүйлийг тэр өөртөө байлгахыг хүсдэггүй. Дууллыг бичсэн хүнтэй адил бид Бурханы оршихуйд сэтгэл хангалуун байдаг.

ЭЗЭНээс миний гуйсан, эрэх ганцхан зүйл гэвэл ЭЗЭНий гоо сайхныг харж, сүмд нь бясалган, амьдралынхаа бүхий л өдрүүдэд ЭЗЭНий өргөөнд суух явдал (Дуулал 27:4).

Хэрэв бид бүхнээс илүү Бурханы оршихуйг үнэхээр хүсэмжилдэг бол Бурхан бидэнд өөрийгөө өгснөөр бидний гүн гүнзгий хүсэл тэмүүллийг хангах болно гэдгийг мэдэх тийм аз жаргалын төлөө залбирч чадна!

Хүнд хэцүү цаг үед бид хэрхэн залбирах вэ?

Паул “учир нь яаж залбирах ёстойгоо бид мэддэггүй… ” (Ром 8:26) тийм үе тулгарна гэдгийг мэдэж байсныг Августин Пробад сануулжээ. Бид ямар ч тусламжгүй, арчаагүй байдалд байх үедээ хэрхэн залбирах вэ?

Августин Бичвэрийн гурван хэсгээс өгүүлдэг. (1) Тэрээр Паулын “махбодод… өргөс” буй бөгөөд үүнээсээ аврагдахын төлөөх түүний залбирлын жишээг онцолсон. Бурхан түүнийг чөлөөлөхийн оронд “Миний нигүүлсэл чамд хангалттай. Учир нь мөхөсдөлд [Миний] хүч бүрэн төгс болдог” хэмээн амласан. Паул цааш нь “Иймд Христийн хүч надад орших тул би ихэд баяртайгаар мөхөсдөлөөрөө илүү сайрхана… Учир нь би хэзээ мөхөсдөнө, тэр үедээ хүчтэй байдаг” (2 Коринт 12:8-10) хэмээн гэрчилжээ.

(2) Августин Гетсеманид залбирсан Есүсийн үлгэр дуурайлыг дурдсан. Есүс өөрийн хүслийг Бурханд захируулсан. Есүс чөлөөлөлтийн төлөө “Эцэг минь, болж өгвөл Надаас энэ аягыг өнгөрүүлээч” гэж хэлээд, төгсгөлд нь “Гэвч Миний хүслээр биш, харин Таныхаар болог” (Матай 26:39) хэмээн залбирчээ.

(3) Төгсгөлд нь Августин Ром 8:26-г заасан. Бид хэрхэн залбирахаа мэдэхгүй байх үед Ариун Сүнс бидний зүрх сэтгэлийг удирдан чиглүүлдэг. Сүнс бидний сул дорой байдалд тусалж, үгээр илэрхийлшгүйгээр ёолон бидний төлөө зуучлан залбирдаг. Үгээр илэрхийлж чадахгүй тийм үед Ариун Сүнс бидний залбирлыг Эцэгт авчрахад, Тэр хүлээн авч, Бурханы зорилгын дагуу дуудагдсан хүмүүсийн сайн сайхны төлөө бүх зүйлсийг хамтад нь ажиллуулдаг (Ром 8:26-28).

Заримдаа чимээгүй байх нь таны хийж чадах хамгийн сайн зүйл байх үе бий.[1] Та залбирахыг хүсдэг ч, яаж гэдгээ мэдэхгүй, залбирал амнаас гарахгүй тийм үе байдаг. Ийм үед юу хийх вэ? Нэг нууц нь Христ бидний Агуу Тэргүүн Тахилч гэдгийг ойлгох явдал юм.

Эвангелийн итгэгч хүмүүсийн хувьд, бүх итгэгчид тахилч гэдэгт бид итгэдэг. Энэхүү Шинэчлэлийн агуу онол сургаал нь бидний хүн нэг бүр Эцэгт хандах боломжтой гэдгийг заадаг. Гэсэн хэдий ч, энэ онол сургаал буруугаар ойлгогдвол сүнслэг төвөгтэй байдалд хөтөлж, “Би хангалттай залбирсан уу? Би үнэхээр өөрийн хийх зүйлээ хийж байна уу?” гэх зэрэг эргэлзээнд хүргэх боломжтой.

2013 онд болсон нэгэн конференц дээр профессор Алан Торранс эдгээр асуултуудтай нүүр тулж, тэмцэлдэж байгаа талаараа ийнхүү гэрчлэн ярьсан юм.

2008 оны 1-р сард миний эхнэр Жэйн хорт хавдраар нас барсан. Тэр минь хамгийн гайхалтай Христэд итгэгч эмэгтэй, эхнэр, ээж байсан юм. Хорт хавдар нь биеэр нь тархаж, өвдөж үхэхийг нь харах хэцүү, хүүхдүүд маань ээжийгээ зовж байгааг харах аймшигтай хэцүү байж билээ. Би уй гашуун дунд яаж залбирах, юуны төлөө залбирахаа ч мэдэхээ больсон үе байлаа. Би яаж залбирахаа мэдэхгүй байсан.

Тэр үед Христийн тахилчийн үйлчлэл миний ярьж чадахаас ч илүү их тус болсон юм. Би Жэйнийг тэвэрч өргөх үед дээш өргөгдсөн тахилч (Есүс Христ) бидний өмнөөс зуучлан залбирч байлаа. Бид Түүний оршихуйд амарч чаддаг билээ.

Тэр үед миний залбирдаг байсан гуйлт Эзэний заасан залбирал байв. Би энэ залбирлыг зөвхөн ганцаараа залбираагүй. Түүнчлэн “Тэнгэр дэх миний Аав аа, та миний байгаа газраас дэндүү хол байна” гэж залбираагүй, харин Ариун Сүнсээр дамжуулан би “Тэнгэр дэх, бидний Аав аа, Таны алдар ариунаар дуурстугай. Таны хаанчлал иртүгэй. Таны таалал... биелтүгэй” гэж залбирсан юм.

Христийн үргэлжилсээр буй тахилчийн үйлчлэлийн ач холбогдлыг олж илрүүлэх нь сайнмэдээ бидний амьдрал, мөргөл хүндэтгэлийн бүх хэсгийг хувьсган өөрчилдөг гэдгийг таньж мэдэх явдал юм.

Бүх итгэгчдийн тахилчийн үйлчлэлийг ярихдаа бид өөрсдийн сүнслэг хүчээр Эцэгт ойртон очих ёстой гэж бодвол энэ нь буруу ойлголт юм. Энэ бол алдаа. Христээс өөр зуучлагч бидэнд хэрэггүй гэдгийг бүх итгэгчдийн тахилчийн үйлчлэл онцолдог. Тэр бол бидний төлөө зуучлан залбирагч бөгөөд бидний дутуу дулимаг залбирах оролдлогыг хүлээн авч, Эцэг хүлээн авахуйц тахил золиос болгон өргөдөг Нэгэн билээ. Бидний залбирал Сүнсээр хүчирхэгждэг бөгөөд бидний Тэргүүн тахилч Есүс Христээр зуучлан хүрдэг.

Хэрхэн залбирахаа мэдэхгүй байгаа бол бүү цөхөр. Бидний төлөө залбирч, бидний хажууд өвдөг сөгдөн, Эцэгт зуучилж, бидний хэлж чадахгүй зүйлийг хэлдэг Нэгэн бидэнд бий.

(1) Библийн эшлэл хайх програм эсвэл конкорданс ашиглан Библиэс залбирлын гурван жишээг олоорой. Залбирал бүрийг Эзэний заасан залбиралтай харьцуулж үз. Библи дэх бусад залбирлууд Эзэний заасан залбирлын аль хэсэгтэй тохирч байна вэ? Дараагийн хуудас дахь хүснэгтийг ашиглан олж харсан зүйлээ бичнэ үү.

(2) Нэг сарын турш залбирлын тэмдэглэл хөтөл. Залбиралдаа урам хугарсан тухайгаа, залбирлаар ялалт байгуулсан болон залбиралд өгсөн Бурханы хариулт зэргийг тэмдэглээрэй. Залбирлын амьдралдаа өсөхөд урам болох үүднээс энэ тэмдэглэлийг ашиглаарай.

Хэвлэж болох PDF-ийг эндээс авах боломжтой.