Энэ хичээлийн төгсгөлд суралцагч:

(1) Есүсийг агуу удирдагч болгосон зан чанаруудыг таньж мэдэх болно.

(2) Бурханаас өгөгдсөн дуудлага, үүрэг даалгавар нь түүний өдөр бүрийн эрхэмлэх зүйлсийг тодорхойлдог болохыг хүлээн зөвшөөрөх.

(3) Ирээдүйн удирдагчдыг сургах, үйлчлэлийн багийг бүрдүүлэх үйл явцыг боловсруулах.

(4) Өөрийн удирдаж буй хүмүүстээ үйлчлэх үүргээ үнэлж сурах.

Удирдагчид бусдад үйлчилж байхдаа Есүстэй хамгийн адилхан байдаг.

Удирдлага гэдэг нь хүчтэй мэдрэмжийг өдөөдөг үг юм. Дэлхийлэг сэтгэлгээгээр хүмүүс удирдлагын тухай бодохдоо эрх мэдэл, албан тушаалыг чухалчилдаг. Тэдний хувьд удирдагч байх нь “Босс” байх явдал. Амбицтай удирдагчид өндөр албан тушаалд хүрч, хамгийн дээд цол хэргэмийг хүртэхийг хүсдэг. Ингэж боддог пасторууд ч байх боломжтой. Тэд чуулганаа илүү том болгох, өндөр албан тушаал, илүү их хүндлэлийг олж авахад гол анхаарлаа хандуулдаг.

Энэхүү дэлхийлэг сэтгэлгээний хариу болгон зарим Христэд итгэгчид удирдлага гэсэн нэр томъёоны эсрэг хариу үйлдлийг үзүүлдэг. Нэгэн пастор “Би чуулгандаа удирдагч байхыг хүсэхгүй байна. Би зүгээр л үйлчлэхийг хүсэж байна” гэж хэлжээ. Хэдийгээр түүний мэдэгдэл даруухан сонсогдож болох ч, энэ нь чуулганд нь ямар ч зорилго, чиглэлгүй байдлыг үлдээсэн юм. Бүх байгууллага, чуулгануудад хүртэл удирдагч хэрэгтэй.

Пастор гэдэг үгийн язгуур утга нь “хоньчин” гэдгийг пасторууд санаж байх ёстой. Хоньчин хүний ажил тийм ч дурламаар сайхан ажил биш! Хоньчин хүн элдэв үнэртэй хоньдтойгоо өдрийг өнгөрөөдөг. Түүний хийдэг зүйлсэд хоол, ус олох, тэнүүчилж одсон хургануудтайгаа хөөцөлдөх, гэмтэж бэртсэн хоньдоо анхаарч асрах гэх мэт уйтгартай ажлууд багтдаг.

Хоньчин хүн чухал үүрэг гүйцэтгэдэг. Хоньчин олон хүнд хүчир дорд ажлуудыг хийдэг ч хонин сүргээ аюулгүйгээр удирдан чиглүүлэх бүр илүү хүнд үүрэг хариуцлага хүлээдэг. Хонин сүрэг хоньчноос хамаардаг бөгөөд тэр бол удирдагч хүн юм.

Есүс жинхэнэ удирдагчийн хамгийн төгс үлгэр дуурайлыг харуулсан. Тэрээр даруухнаар үйлчилдэг хоньчин байсан ч, гүн гүнзгий зорилготой байв. Тэр хүчтэй байсан ч, мөн энэрэх сэтгэлээр дүүрэн байлаа. Тэр албан тушаал хайгаагүй ч, өөрийн үүрэг даалгавар, эрхэм зорилгодоо итгэл төгс байсан юм. Есүс үйлчлэгч-удирдагчдад үлгэр дуурайлыг харуулсан.

► Өөрийн хувьчлан таньдаг хамгийн амжилттай удирдагчийн талаар бодож үзээрэй. Энэ хүнийг сайн удирдагч болгосон гурав, дөрвөн шинж чанарыг жагсаана уу. Эдгээр шинж чанаруудыг Есүсийн үйлчлэлээс харж болох уу? Эдгээр шинж чанарууд таны үйлчлэлээс харагддаг уу?

Жинхэнэ удирдлагад даруу үйлчлэл багтдаг гэдгийг Есүс харуулсан. Даруу байдал нь сул дорой байдал эсвэл шийдэмгий бус байх гэсэн үг биш юм. Есүс хүчтэй хүн байсан. Сайнмэдээний номуудад Есүсийн эрх мэдлийг дахин давтан харуулдаг.[1] Хэдий тийм боловч Есүс хүндлүүлэхийг шаардаж бус, харин үйлчилснээр эрх мэдлийг олж авсан юм. Дагалдагч нар нь хаанчлал дахь байр суурийн талаар маргалдах үед Есүс:

Харийнхны хаад ард олноо ноёрхдог бөгөөд эрх баригчид нь “Буянтнууд” хэмээгддэг. Харин та нар тийм байж болохгүй. Та нарын дунд хамгийн агуу нь хамгийн өчүүхэн нь мэт болог, удирдагч нь зарц мэт байг. Ширээнд тухлагч, үйлчлэгч хоёрын хэн нь агуу вэ? Ширээнд тухлагч нь биш гэж үү? Харин Би та нарын дунд үйлчлэгч мэт байдаг (Лук 22:25-27).

Энэ хичээлээр бид Есүсийг агуу удирдагч болгосон шинж чанаруудаас үзэж, Түүний үлгэр дуурайлыг дагаснаар хэрхэн илүү үр нөлөөтэй удирдагчид байхад суралцах болно.

Агуу удирдагч нь тов тодорхой үүрэг даалгавартай нэгэн бөгөөд тэрхүү эрхэм зорилгодоо нэгэн үзүүрт сэтгэлээр төвлөрдөг. Есүс өөрийн үүрэг даалгаврыг мэдэж байсан. Марк 10:45-д Түүний үүрэг даалгаврын талаар “Учир нь Хүний Хүү үйлчлүүлэхийн тулд бус, харин үйлчлэхийн тулд мөн олны төлөө амиа золиос болгон өгөхийн тулд ирсэн билээ...” гэж дүгнэсэн байдаг.

Есүс олон нийтэд зориулж номлосон анхны сургаалдаа Исаиагийн эш үзүүлсэн үүргийг биелүүлэхээр ирсэн гэдгээ сонсогчдод:

“Над дээр Эзэний Сүнс байна. Учир нь ядууст сайнмэдээг хүргэхийн тулд Намайг Эзэн тосолсон юм. Тэр Намайг илгээсэн нь олзлогдогсдод эрх чөлөөг тунхаглах, сохруудад хараа оруулах, дарамтад байгсдыг чөлөөлөхийн сацуу, Эзэний тааламжит жилийг тунхаглахын тулд болой гэж уншаад…” (Лук 4:18-19, Исаиа 61:1-3-аас эш татсан) ийн өгүүлжээ.

Есүсийн үүрэг даалгавар нь түүний өдөр тутмын шийдвэрүүдийг чиглүүлдэг байв. Түүнийг Иудейгээс Галил руу аялах үед үүрэг даалгавар нь Түүний замыг удирдан чиглүүлсэн. Иудей раббичууд самаричуудыг бузартсан гэж үздэг байсан тул тэднээс зайлсхийж, ихэвчлэн Йордан голын зүүн эрэг дагуу аялдаг байжээ. Гэсэн хэдий ч, үүрэг даалгавар нь Есүсийн замыг самари эмэгтэйтэй уулзаж, Бурханы нигүүлслийг хуваалцахад хөтөлсөн. Үүний улмаас Тэр Самариар дамжин өнгөрөх шаардлагатай болжээ (Иохан 4:4). Христэч удирдагчийн хувьд таны үүрэг даалгавар өдөр тутмын тань шийдвэрүүдийг чиглүүлэх ёстой.

Удирдагч хүний хувьд таны гүйцэтгэж чадахаас ч илүү их хийх зүйл бий. Та чухалчлах зүйлсээ хэрхэн тодорхойлдог вэ? Та бүх зүйлийг хийж чадахгүй, бүгдийг хийх ч ёсгүй. Өөрийн эрхэм зорилгын дагуу боломжуудаа та үнэлж үзэх учиртай. Удирдагч бүрд “Хийх” болон “Хийхгүй” гэсэн хоёр төрлийн жагсаалт байх хэрэгтэй. “Хийх” ажлын жагсаалтад таны гүйцэтгэх ёстой зүйлс багтсан байх бол “Хийхгүй” жагсаалтад таны анхаарлыг үүрэг даалгавраас тань холдуулах зүйлс багтдаг. Өөр хэн нэгнийг эдгээр зүйлсийг хийлгэхээр дуудаж болох ч, харин та тэр хүн нь биш юм. Таны үүрэг даалгавар өдөр тутмын тань чухалчлах зүйлсийг чиглүүлэх ёстой.

Элч Паул бол өөрийн үүрэг даалгавраа мэддэг удирдагчийн үлгэр дуурайл юм. Паул Ромын эзэнт гүрний гол хотуудад чуулган байгуулахаар дуудагджээ. Тэр өөр хэн нэгний суурин дээр барихыг хүсээгүй, харин сайнмэдээг сонсоогүй хүмүүст хүргэхийг хүссэн (Ром 15:20). Энэхүү үүрэг даалгавар нь Паулыг хаашаа аялахыг, тухайн газар оронд хэр удаан байхыг, түүнчлэн түүний номлол сургаалыг ч чиглүүлж байв. Паулын үүрэг даалгавар нь шийдвэр бүрийг нь чиглүүлсэн.

► Эдгээр асуултуудын дагуу ярилц:

• Бурханы танд өгсөн үүрэг даалгавар юу вэ? Үүрэг даалгавраа цөөн үгээр дүгнэж хэлнэ үү.

• Таны үйлчлэлд нэгддэг хүмүүст та тэрхүү үүрэг даалгаврынхаа талаар мэдэгдсэн үү?

• Таны өдөр тутмын шийдвэрүүдийг таны үүрэг даалгавар чиглүүлдэг үү?

Есүс үйлчлэлийнхээ эхнээс хэсэг хүмүүсийг няхуур сонгож, Эцэг рүүгээ буцсаны дараа Түүний үйлчлэлийг үргэлжлүүлэх дагалдагчдаа сургаж бэлтгэсэн. Эдгээр дагалдагчид Түүнээс суралцаж, Түүнтэй хамт цагийг өнгөрөөж, Түүнтэй хамт үйлчилж, Түүний сургаалыг дэлхий даяар түгээжээ. Есүс эдгээр дагалдагчдаа өөрийн дүр төрхөөр тамгалж, дараа нь өөрийн чуулганыг байгуулахад ашигласан юм.

[1]Лук үйлчлэлийн бэрхшээл дарамтын талаар “тэр хооронд хүмүүс үй түмээрээ хуран цуглаж, нэг нэгнээ гишгэчин байв. Тэр эхлээд шавь нартаа…” (Лук 12:1) хэмээн тэмдэглэсэн. Мянга мянган хүнд үйлчлэх нь илүү бахдалтай байж болох ч Есүс дагалдагч нартаа үйлчлэх ажлаа орхигдуулж байгаагүй юм. Тэрээр хаанчлалыг байгуулахын тулд дагалдагч нараа чуулганыг удирдахад сургах ёстой гэдгийг мэдэж байлаа. Дагалдагчдыг сургаснаар бид дараа үеийн удирдагчдыг бэлтгэдэг.

Паул ч мөн үүнтэй адил замналыг үргэлжлүүлсэн. Тэр олон хүмүүст хандан номлодог байсан ч хот болгонд цөөн удирдагчдыг бэлтгэхэд анхаарлаа хандуулж байсан. Энэ нь өнөөгийн удирдагчдад ч дуурайх загвар болдог. Паул пасторуудыг ариун хүмүүсийг үйлчлэлийн ажилд бэлтгэхээр дуудагдсан гэж хэлсэн байдаг (Ефес 4:12). Пастор хүн чуулганы бүх ажлыг хийх үүрэгтэй биш, харин тэр гишүүдийг чуулганы ажилд сургаж, бэлтгэх үүрэг хариуцлагатай. Үр нөлөөтэй удирдагчид бусад удирдагчдыг сургадаг.

Халамжлагч хүн дагалдагчдыг няхуур сонгодог[1]

► Иохан 1:35-51, Иохан 2:1-11, Матай 4:18-22, Лук 5:1-11, Лук 6:12-16-г унших.

Та эдгээр эшлэлийг уншиж байхдаа үйл явцыг анзаарч байна уу? Есүс олон нийтэд үйлчлэх эхний долоо хоногтоо Андрей, Иохан хоёрыг өөрийг нь дагахад урьжээ. Андрей Симон Петрийг Есүс рүү авчрав. Натанаелыг олж авчирдаг Филипийг Есүс дуудсан (Иохан 1:35-51). Энэ нь тэдний дуудлагын анхны үе шат юм. Тэд Есүсийг хүлээн зөвшөөрч байсан ч, хараахан тогтвортой дагалдагчид болоогүй байсан. Энэ бол Есүсийг дагах дуудлага байв. Хожим нь Есүс тэднийг бүтэн цагийн дагалдагч байхаар дуудах болно.

Иохан 2-р бүлэг нь энэхүү үйл явцын чухал үе шат юм. Канаа дахь хуримын ёслол дээр Есүс дагалдагч нартаа өөрийн алдрыг илчилсэн. Бусад зочид гайхамшгийн талаар мэдээгүй ч, харин энэ тэмдэг нь Түүний дагалдагч нарт зориулагдсан байв. Дагалдагчид нь Түүнд найдвараа тавихын тулд Есүс тэдэнд өөрийгөө илчилжээ. “Шавь нар нь Түүнд итгэсэн юм” (Иохан 2:11).

Матай 4:18-22-д болж байгаа үйл явдал Есүс Назараас Капернаумд буцаж ирээд номлож эхэлсний дараахан тохиожээ (Матай 4:12-17). Галилын эргээр явж байхдаа Есүс Симон, Андрей, Иаков болон Иоханыг дуудсан. “Тэд тэр даруй тороо орхиж, Түүнийг дагалаа” (Матай 4:20). Иохан 1-р бүлэг дэх анхны дуудлагын дараа эдгээр дагалдагчид загасчны ажлаа үргэлжлүүлэн хийсээр байжээ. Одоо Есүс тэднийг “үүнээс хойш чи хүмүүсийг загасчлах болно… ” (Лук 5:10) хэмээн үйлчлэлд дуудаж байна.

Энэ үйл явцын дараагийн үе шат нь Есүс арван хоёр элчийг сонгосон явдал юм. Есүс олон дагалдагч нар дундаас (Иохан 6-р бүлэгт “шавь” гэж нэрлэгдсэн) хамгийн ойрын хамтрагчид болох арван хоёрыг сонгожээ.

Есүс арван хоёр элчийг сонгохдоо яарсангүй. Энэ үйл явц хэдэн сарын турш үргэлжилсэн бололтой. Энэ нь Есүст тэдэнтэй хүн нэг бүрчлэн цагийг өнгөрөөх боломжийг олгожээ. Удирдагч нь тухайн хүнийг таньж мэдэхэд цаг хугацаа зарцуулалгүйгээр залгамжлагчаар хурдан сонгох тохиолдол олон гардаг. Ухаалаг удирдагч тухайн хүний удирдлагын чадварыг үнэлэх боломжтой тодорхой ажил үүргийг даалгаж өгдөг.

Халамжлагч хүн дагалдагч нартайгаа хамт цагийг өнгөрүүлэх ёстой

► Олон хүнд хүрэх, эсвэл цөөн хүмүүсийг халамжлахын аль нь илүү сонирхолтой вэ? Урт удаан хугацааны туршид аль нь илүү чухал вэ? Есүс яагаад арван хоёр хүнд ийм их цаг зав хүчин чармайлтыг гаргасан бэ?

Есүс арван хоёр элч нарт ихэнх цагаа зориулдаг байв. “Есүс арван хоёрыг томилон элч хэмээсэн нь тэднийг Өөртэйгөө хамт байлгаж, тунхаглуулахаар илгээх, чөтгөрүүдийг зайлуулах эрх мэдэлтэй байлгахын тулд байлаа” (Марк 3:14-15). Эхлээд тэд Түүнтэй хамт цагийг өнгөрөөж, арга барилыг нь сурдаг байж. Зөвхөн ингэсний дараа л тэд үйлчлэлд илгээгдэхээр бэлэн болох байв.

Марк Есүсийн Галилаар явсан аяллын нэгийг тэмдэглэсэн байдаг: “Хэн нэгэнд үүнийг мэдэгдэхийг Есүс хүссэнгүй [Тэр тэнд байсан], учир нь Есүс шавь нартаа зааж” (Марк 9:30-31) байсан. Есүс гол анхаарлаа олон нийтэд хүрэх хөтөлбөр боловсруулахад бус, харин чуулганыг удирдах хүмүүсийг хөгжүүлэхэд хандуулжээ.

Есүс мянга мянган хүмүүст номлож байсан ч, Түүний нэн тэргүүний ажил нь цөөн хэдэн хүнийг ирээдүйн үйлчлэлд бэлтгэх явдал байв. Сургалт нь жижиг бүлэгт төвлөрвөл илүү үр дүнтэй гэдгийг Есүс мэддэг байсан. Роберт Коулмэн “Таны үйлчлэл өсөн нэмэгдэх тусам хүмүүсийг хувьчлан дагалдуулахад цаг гаргах нь илүү хэцүү болдог. Гэхдээ үйлчлэл тань өсөх тусам хувьчлан дагалдуулахад цаг гаргах нь илүү чухал байх болно.”

Сайнмэдээний номуудыг уншихдаа Есүс хамгийн багадаа гурван дагалдагчаа өөртөө ойр байлгахгүйгээр үйлчлэл хийсэн тохиолдол маш ховор болохыг та харах боломжтой. Есүс дагалдагч нартаа зааж сургахаар ихэвчлэн эзгүй зэлүүд газарт дагуулж явдаг байв. Дэлхий дээрх үйлчлэлийнх нь төгсгөл ойртох тусам Есүс дагалдагч нартайгаа илүү их цагийг өнгөрөөсөн. Йерусалимд өнгөрөөсөн сүүлчийн долоо хоногт Есүс ихэнх цагаа дагалдагч нартайгаа хамт байхад зориулжээ. Эдгээр эрчүүдийг сургах нь Түүний хамгийн чухал ажлуудын нэг байв.

“Дагалдагч хүн бол багшийнхаа тоосыг иддэг хүн юм” гэсэн нэгэн еврей зүйр үг бий. Дагалдагч хүн багштайгаа маш ойрхон алхдаг учраас багшийнхаа хөлийн тоосыг залгих нь түгээмэл байж. Багшийн идсэнийг дагалдагч нь иддэг, багшийнхаа явсан газарт дагалдагч нь явдаг. Дагалдагч багшийнхаа сургаал, үлгэр дуурайлыг дагаж мөрддөг нэгэн юм. Есүсийн дагалдагчид багшийнхаа зан чанарыг олж авах хүртлээ Түүнтэй хамт цагийг өнгөрөөжээ. Хожим нь тэд “Христийнхэн” гэж нэрлэгдэх болно. Багштайгаа адил болно.

Үүний адилаар Паул үргэлж Тимот, Тит, Лук, Тухик зэрэг дагалдагчидтайгаа хамт байсан. Паул тэдэнтэй цагийг өнгөрөөж, тэднийг үйлчлэлд сургасан.

Дахин хэлэхэд энэ нь өнөөдөр бидэнд үлгэр жишээ, загвар болж байна. Та үйлчлэлээ хийхдээ багийнхаа залуу гишүүдийг таныг дагахад урамшуулж чадна. Ингэснээр тэд үйлчлэлд суралцах болно. Нэгэн амжилтанд хүрсэн чуулганы удирдагч “Би үйлчлэлийн аялалд явахдаа өөрөөсөө залуу үйлчлэгчийг авч яваагүй тохиолдол нэг ч байгаагүй. Ирээдүйн чуулганы удирдагчийг сургах нь миний хийж буй үйлчлэлтэй адил чухал юм” гэж хэлсэн байдаг. Энэ пастор үр нөлөөтэй удирдагчид бусад удирдагчдыг сургадаг гэдгийг ойлгожээ.

Халамжлагч хүн дагалдагч нартаа үйлчлэлийн үлгэр жишээг харуулах ёстой

Дагалдагч нарынхаа хөлийг угаасны дараа Есүс “Миний та нарт үйлдсэн лугаа адил та нарыг үйлд хэмээн Би ийм дуурайл өгөв” (Иохан 13:15) гэжээ. Есүс үлгэр жишээгээр заасан. “Үүнийг хий” гэж хэлэх нь хангалтгүй гэдгийг Тэр мэдэж байсан. Үүнийг яаж хийхийг бид харуулах ёстой. Есүс үүнийгээ хийж харуулах хүртлээ дагалдагч нараасаа ямар ч зүйлийг хийхийг асуугаагүй.

Дагалдагч нар нь Есүсийн залбирахыг хараад “Эзэн... залбирахыг... бидэнд зааж өгөөч” (Лук 11:1) хэмээн асуусан юм. Есүс залбирлын талаар зүгээр нэг хичээл заагаагүй. Тэр залбирсан. Түүнийг залбирахыг хараад дагалдагч нар залбирлыг ойлгохын тулд цангаатай болж эхэлсэн. Суралцагч хүмүүст ийм цангаа үүсвэл тэд илүү сайн сурдаг!

Есүс номлолдоо Бичвэрийг ашиглаж байгааг дагалдагч нар сонсож байсан. Есүс Хуучин гэрээнээс байнга дурддаг байв. Тэрээр Библийг номлох үлгэр жишээг харуулсан. Дагалдагч нар энэхүү хичээлд суралцсан болов уу? Мэдээжийн хэрэг! Үйлс 2-р бүлэгт Петр номлохдоо Иоел, Дуулал 16 болон Дуулал 110-ыг дурджээ. Бичвэрт үндэслэсэн номлолыг Петр Есүсээс суржээ. Үйлс ном дахь номлол бүр нь Хуучин гэрээнээс эш татсан байдаг.

Паул ч үүнтэй адил арга барилыг дагасан. Тэрээр “Та нар миний жишээг харсан. Миний үлгэр дуурайлыг дага”[2] хэмээн дахин давтан хэлсэн байдаг. Паул үлгэр жишээгээр заасан. Тит, Тимот зэрэг дагалдагч нар халамжлагч Паулын үлгэр дуурайлыг дагаж, пасторын ажилд суралцжээ.

Өнөө цагт, бид зааж сургаж буй хүмүүстээ үйлчлэлийн үлгэр дуурайлыг харуулах ёстой. Тэд бидний амжилт, алдааг хардаг. Хамгийн гол нь алдаагаа хүлээн зөвшөөрч, суралцаж байгаа бидний зан чанарыг тэд ажиглаж байдаг. Дагалдагч нар бидний үлгэр жишээг харснаар үйлчлэлийн бодит байдалд суралцдаг.

Халамжлагч хүн дагалдагч нартаа үүрэг хариуцлага хүлээлгэх ёстой

► Матай 10:5-11:1 эшлэлийг унших.

Анхнаасаа Есүс дагалдагчдыг үйлчлэлд бэлтгэх зорилготой байсан. Өөрийг нь дага гэж дуудахдаа Тэр тэднийг хүний загасчид болгохыг зорьжээ (Матай 4:19).

Есүстэй хамт байсан эхний жилийнхээ ихэнх хугацаанд дагалдагч нар Түүний үйлчлэлийг ажиглаж байсан. Тэд Түүний үлгэр жишээнээс суралцсан. Тэднийг ажигласны дараа Есүс дагалдагчдыг үйлчлүүлэхэр илгээсэн. Матай 10-р бүлэг нь Есүс дагалдагч нартаа хэрхэн үүрэг хариуцлагыг хүлээлгэж байгаа тухай өгүүлдэг.

Тэр тэдэнд эрх мэдлийг өгсөн (Матай 10:1).

Дагалдагчдыг илгээхийн өмнө Есүс тэдэнд өгөгдсөн үүрэг даалгаврыг гүйцэтгэх эрх мэдлийг өгчээ. Заримдаа удирдагчид тусалж буй хүмүүсийнхээ эрх мэдэлд найдаж чаддаггүй. Гэсэн хэдий ч эрх мэдэлгүй үүрэг хариуцлага нь таны сургаж буй хүмүүсийг эрэмдэг болгодог. Бид туслагчиддаа хариуцлагыг нь биелүүлэхэд хангалттай эрх мэдэл өгөөгүй бол тэдэнд хариуцлага хүлээлгэж болохгүй.

Тэр тэдэнд тодорхой заавруудыг өгсөн (Матай 10:5-42).

Есүс дагалдагч нартаа “Хаанчлалыг тунхагла” гэсэн тодорхой захиасыг өгчээ. Тэдний даалгавар тодорхой байсан. Есүс тэднээс юу хийхийг хүлээж байгааг тэд сайн мэдэж байлаа.

Есүс дагалдагч нарыг хаана үйлчлэх ёстой талаар хэлэхдээ Израилын гэрийн төөрсөн хоньдод гэж хэлсэн байдаг. Хожим нь тэд харь үндэстнүүдэд номлох байсан ч, үйлчлэлд дөнгөж суралцаж байгаа тэднийг гэрийнхээ ойроос эхлэхийг Есүс захижээ. Бид суралцагч хүмүүсээ амжилтанд хүргэхийн тулд чадах бүхнээ хийх ёстой. Хийж гүйцэтгэхэд хялбар ажлаас эхэл. Есүс боломжтой зорилтуудыг тавьсан.

Есүс дагалдагчдад хавчлагын талаарх зааврыг ч мөн өгсөн. Хавчлага нь дагалдагчид үйлчилж чадаагүй учраас биш, харин Есүсийг дагах дуудлага нь Түүнийг дагагчид болон эсэргүүцэгчдийн хооронд хагарал авчирдаг учраас ирэх болно.

Есүс тэднийг баг болгон илгээсэн (Марк 6:7).

Үйлчлэл дэх багуудын ач холбогдлыг Есүс харуулсан. Тэрээр дагалдагчдыг баг болгон хоёр хоёроор нь илгээжээ. Хэдэн сарын дараа Есүс 72 дагалдагчдыг мөн хоёр хоёроор нь баг болгон илгээв (Лук 10:1). Энэ нь анхны чуулганы үйлчлэл дэх үлгэр жишээ болсон. Петр, Иохан хоёр хамтдаа үйлчилсэн. Барнаб, Саул хоёр хамтдаа аялсан. Паул, Силас хоёр мөн хамтдаа үйлчилжээ.

Халамжлагч хүн дагалдагч нартаа зөвлөж чиглүүлэх ёстой

Дагалдагч нар үйлчлэлээсээ буцаж ирээд Есүст тайлагнасан (Марк 6:30). Даруй дагуулж эхлэх нь дагалдагч нараа сургах Есүсийн сургалтын чухал хэсэг байв. Үүрэг хариуцлага хүлээлгэх нь хангалтгүй. Харин үр нөлөөтэй удирдагч хүн дагалдагчийнхаа гүйцэтгэлийг үнэлэх болно. Үнэлгээ хийхгүйгээр ажил даалгах нь муу гүйцэтгэлийг дагуулдаг.

► Матай 17:14-21 эшлэлийг унших.

Ховард Хендрикс “Алдаа гаргах нь суралцах үйл явцын чухал хэсэг” гэж заасан. Дагалдагчид “Бид яагаад энэ хүүгээс чөтгөрийг зайлуулж чадсангүй вэ” гэж асуухад Есүс тэдэнд итгэлийн талаар сургасан байдаг. Есүсийг тэнгэрт өргөгдсөний дараа биш, харин одоо үйлчлэлийнхээ эхний үе шатанд ингэж бүтэлгүйтэж байгаа нь тэдний хувьд хамаагүй дээр байсан юм!

Үр нөлөөтэй чиглүүлэг нь үнэлгээг багтаасан байдаг. Дагалдагч даалгавраа биелүүлээгүй тохиолдолд түүнийг шууд багаас хөөж явуулахгүй. Харин оронд нь тэрхүү бүтэлгүйтлийн шалтгааныг судалж, цаашид сайжруулах төлөвлөгөө гаргах учиртай.

Есүс Лук 9-р бүлэгт энэхүү загварыг харуулсан:

• 9:1-6-д Есүс арван хоёр дагалдагчийг илгээсэн.

• 9:10-д тэд аяллынхаа талаар Түүнд тайлагнасан.

• 9:37-43-д дагалдагчид чөтгөрийг зайлуулж чадалгүй бүтэлгүйтсэн.

• 9:46-48-д Есүс тэдэнд Бурханы хаанчлалын агуу байдлын талаар сургасан.

• 9:49-50-д Есүс Иоханыг үйлчлэл дэх тааруу шийдвэрийнх нь улмаас зэмлэсэн.

• 9:52-д Есүс үйлчлэлийнхээ бэлтгэлийг хангуулахаар дагалдагчдыг Самарийн суурин руу илгээсэн.

• 9:54-55-д Есүс Иаков, Иохан хоёрыг дахиад нэг тааруу шийдвэрийнх нь улмаас зэмлэв.

• 10:1-д Есүс томоохон бүлэг хүмүүсийг үйлчлүүлэхээр илгээсэн.

Есүс заах, үүрэг даалгавар өгөх, үнэлгээ явуулах зэргийг ээлжлэн хийдэг байв. Тэр дагалдагч нараа бүтэлгүйтэхэд нь шантарч орхиогүй. Харин Тэрээр тэдний бүтэлгүйтлийг заах сургамж болгон ашигладаг байв.

Паул хожим нь адил жишгийг дагасан байдаг. Тэрээр Титийг Крет арлын чуулганыг удирдуулахаар, Тимотыг Ефест пастораар тус тус томилсон. Дараа нь тэр тэдэнд нэмэлт сургалт явуулахаар захидлуудыг бичжээ. Паул илгээлтийн анхны аяллаараа байгуулсан чуулгануудаа эргэж, тэднийг зааварлаж чиглүүлэхийн тулд хоёр дахь аяллаа эхлүүлж байсан юм (Үйлс 15:36).

Энэхүү загвар өнөө цагт ч үр нөлөөтэй хэвээр байна. Олон удирдагчид залуу үйлчлэгчдийг заавар чиглүүлэг, тэдэнд хариуцлагатай байх харилцаагүйгээр илгээдэг бөгөөд илгээснийхээ дараа тэднийг бүтэлгүйтэхэд гайхдаг. “Би хичээл заасан болохоор тэд үүнийг зөв хийх болно” гэж бид бодож болохгүй. Заавар чиглүүлэг нь тасралтгүй үйл явц юм. Хэрэв та удирдагчдыг сургахыг хүсвэл заавар чиглүүлэгт цаг зарцуулах ёстой.

Ховард Хендрикс шинэхэн ажилчдыг сургах дөрвөн үе шатыг жагсаасан байдаг:

1. Хэлж өгөх: Агуулгыг зааж өгөх. Есүс хаанчлалын сургаалыг дагалдагч нартаа номлож байсан.

2. Харуулах: Үйлчлэлийн үлгэр дуурайлаар хангах. Есүс дагалдагч нартаа үйлчлэхийг харуулж байсан.

3. Дадлагажих: Үйлчлэл нь шууд заавар чиглүүлэг дор явагдана. Есүс дагалдагч нараа үйлчлүүлэхээр илгээгээд, дараа нь тэдний туршлагад үнэлгээ өгдөг байжээ.

4. Хийх: Үйлчлэл нь шууд заавар чиглүүлэггүйгээр явагдана. Пэнтекостын дараа дагалдагчид Есүсийн шууд заавар чиглүүлэггүйгээр үйлчлэл хийсэн.

► Та дагалдагч нараа удирдлагад сургах талаар юу хийж байна вэ? Бидний суралцаж буй эдгээр үе шатуудын алийг нь үр нөлөөтэйгээр хийж байна вэ? Аль үе шатуудыг сайжруулах шаардлагатай байна? Ирээдүйн удирдагчдыг халамжлах тал дээр хэрхэн илүү үр нөлөөтэй байж болох талаар бүлгээрээ ярилцана уу. Үйлчлэлийнхээ хүрээнд удирдагчдыг хөгжүүлэх төлөвлөгөөтэй болох хүртлээ энэхүү хэлэлцүүлгийг үргэлжлүүлэх хэрэгтэй.

Бидний дагалдагчид бусад дагалдагчдыг төрүүлэх ёстой

Есүс дагалдагч нартаа “Та нар Намайг сонгоогүй, харин Би та нарыг сонгосон. Та нарыг явж, жимс гаргаж, үр жимс чинь үүрд байгаасай гэсэндээ Би та нарыг томилсон…” (Иохан 15:16) хэмээн өгүүлжээ. Дагалдагчдыг олон дагалдагч төрүүлэхэд Есүс сургаж бэлтгэжээ.

► Матай 13:31-32 эшлэлийг унших.

Гичийн үрийн тухай Есүсийн сургаалт зүйрлэлд Бурханы хаанчлал анхны хэмжээтэйгээ харьцуулшгүй том болж өсөх тухай өгүүлсэн байдаг. Өчүүхэн гичийн үр нь төсөөлж байснаас хамаагүй илүү том ургамал болж ургадаг шиг чуулган хэний ч төсөөлж байгаагүйгээр өсөх болно. Хуучин гэрээнд тэнгэрийн шувууд үүрээ засдаг модны тухай өгүүлсэн бөгөөд энэ нь олон үндэстнийг багтаасан агуу хаачлалыг төлөөлдөг (Даниел 4:12 болон Езекиел 31:6). Дагалдагчид үржин олшрох тусам чуулган анхны хэмжээнээсээ хавьгүй илүү өсөж томрон бүх үндэстэнд хүрнэ хэмээн Есүс амласан байдаг.

Др. Роберт Коулмэн бидний үйлчлэлийн эцсийн үнэлгээ нь үржин олшроход байгаа юм гэж бичжээ. Тэрээр “Эцсийн дүндээ бид бүгдээрээ амьдралаа хэрхэн үржүүлж олшруулсан бэ гэдэгтээ үнэлэлт дүгнэлт хийх ёстой болдог. Бидэнд даалгасан тэдгээр хүмүүс Агуу захирамж дахь алсын харааг хүлээн авч, үүнийг бусдад заах итгэмжит үйлчлэгч нарт дамжуулах болов уу? Бидний үйлчлэл тэдгээр хүмүүсийн гар дээр тун удахгүй очино шүү дээ.”[3]

Есүсийн зуучлан залбирлын дунд хэсэгт дагалдагчдынхаа төлөө онцлон залбирсан хэсэг бий (Иохан 17:6-19). Энэхүү залбирал дагалдагч нарыг халамжлах талаарх Есүсийн арга барилтай холбоотой үнэ цэнтэй сургамжуудыг заадаг.[1]

(1) Хамгийн түрүүнд бид халамжилж буй хүмүүсээ хамгаалах ёстой.

Есүс “Тэдэнтэй хамт байхдаа Би... тэднийг хамгаалж байсан” гэж залбирчээ. Сайнмэдээний номуудад Есүс дагалдагч нараа аюулаас сэрэмжлүүлж 20 гаруй удаа хэлсэн байдаг. Тэр тэднийг алдаанаас хамгаалсан. Бид дагалдагч нараа сургахдаа тэдний ертөнц дэх аюулаас нь тэднийг хамгаалах ёстой. Бидний сургалт амьдралд ойр байх ёстой.

► Танай ахуй соёлд залуу үйлчлэгч нарт ямар аюул бэрхшээл тулгарч байна вэ? Та халамжлагч хүний хувьд тэднийг эдгээр аюулд өртөхгүй байхад нь хэрхэн бэлтгэх вэ?

(2) Халамжилж буй хүмүүсээ өсөж төлөвших үед нь бид итгэл хүлээлгэх хэрэгтэй.

Есүс “Тэднийг Та ертөнцөөс аваач гэж Би гуйхгүй, харин муу муухайгаас хамгаалахыг гуйж байна” (Иохан 17:15) гэж залбирсан. Дагалдагч нар нь сорилттой тулгарах болно гэдгийг Есүс мэдэж байсан ч, сургасан хүмүүстээ итгэлтэй байжээ. Сургаж буй залуу удирдагч нартаа бид итгэж сурах ёстой. Энэ нь биднийг дарангуйлах удирдлагын арга барилаас татгалзаж, бусдад чухал шийдвэрүүдийг гаргахад нь итгэл хүлээлгэхийг шаарддаг.

Ажит Фернандо удирдагч хүн дагалдагчдаа харах хоёр өнцөг байдаг гэж хэлсэн.

• Сул дорой удирдагчид дагаж буй хүмүүсийнхээ сул тал дээр анхаарлаа хандуулдаг.

• Харин үр нөлөөтэй удирдагчид дагалдагчдынхаа давуу тал дээр анхаарлаа хандуулахын зэрэгцээ сул тал дээр нь үргэлжлүүлэн ажилладаг. Үр нөлөөтэй удирдагчид бусдыг “найдварын нүдээр” хардаг.

(3) Дагалдагчдаа сургаж бэлтгэсний дараа бид тэднийг ертөнцөд үйлчлүүлэхээр илгээдэг.

Есүс “Та Намайг ертөнцөд илгээсний адилаар Би мөн тэднийг ертөнцөд илгээв” (Иохан 17:18) хэмээжээ. Пэнтекостоос хойш дагалдагч нар Есүсийн тэдэнд даалгасан агуу үүрэг даалгаврыг эхлүүлжээ. Бид дагалдагчдыг халамжилдаг бөгөөд ингэснээр тэд сайнмэдээ хэрэгцээтэй ертөнцөд үүнийг аваачдаг.

Есүс “Би тэднээр алдаршуулагдлаа” (Иохан 17:10) гэж залбирсан. Бид сургасан хүмүүсээ илгээхдээ Есүс алдрыг авч буй эсэхийг шалгах хэрэгтэй. Өөрийн сургаж бэлтгэсэн хүмүүсээсээ өөртөө алдар хүндийг авахаар бид уруу татагдаж болох юм. Бусдыг дагалдуулах чадвараараа бид алдар хүндийг өөртөө олж авахаар соригдож ч болзошгүй. Харин эдгээрийн оронд алдар хүнд нь зөвхөн Бурханд очиж буй эсэхийг бид шалгах учиртай.

Есүсийн жишээ үйлчлэл дэх багуудын ач холбогдлыг харуулдаг. Багийн үйлчлэлд залуу хамтран ажиллагсдыг халамжлах болон мөр зэрэгцэн үйлчилдэг пасторуудтай харилцаагаа байгуулах аль аль нь багтдаг. Бид бусад хүмүүстэй харилцаатай байхаар бүтээгдсэн. Багууд яагаад ийм чухал байдаг вэ?

Багууд тэнцвэрийг өгдөг

Есүс өөр өөр угсаа гаралтай хүмүүсийг сонгосон. Петр, Иохан хоёр байнгын өрсөлдөгчид байв. Матай Ромын төлөө ажиллаж байсан бол Зеалот гэгдэх Симон ромчуудыг Иудейгээс хөөж гаргахыг хүсдэг байлаа. Эдгээр эрчүүд эсрэг тэсрэг хүмүүс байв. Дагалдагч нараа сонгохдоо Есүс хоорондоо ялгаатай бүлэг хүмүүсийг сонгожээ.

Хэдийгээр бид ийм эсрэг тэсрэг хүмүүстэй нэг багт байх нь ямар хэцүү байдгийг олонтоо олж хардаг ч, эдгээр ялгаатай хувьт чанаруудын давуу талыг үл тоомсорлож болохгүй. Элч Петр томоохон тунхаглал хийхдээ хурдан байсан бол Томас, Андрей зэрэг болгоомжтой элч нар түүнийг тэнцвэржүүлж байлаа. Анхны чуулганы удирдлагад эдгээр ялгаатай хувьт чанарууд ашиг тусаа өгсөн.

Ухаалаг удирдагчид өөр хоорондоо ялгаатай гарал үүсэлтэй хүмүүсийг багтаа олж авчирдаг. Хүчтэй баг нь чуулганы удирдлагыг олон талаар хүчтэй болгодог. Багийн нэг гишүүн санхүүгийн талаар илүү сайн ойлголттой байж болох юм. Өөр нэг нь бусадтай хувьчлан харилцахдаа гаргууд байж мэднэ. Мөн өөр нэг гишүүн Библийн гүн гүнзгий ойлголттой байх боломжтой. Чуулганд тэнцвэртэй удирдлагыг бий болгохын тулд эдгээр хүмүүс хамтдаа хэрэгтэй.

Багууд нь ухаалаг зөвлөгөө өгдөг

Дагалдагч нараа сургахдаа Есүс чуулганы суурийг тавьж байгаагаа мэдэж байлаа. Пэнтекостын дараа анхны чуулган олон хүнд хэцүү шийдвэрүүдтэй нүүр тулах болно. Дагалдагчид эдгээр шийдвэрийг гаргахдаа бие биедээ хэрэгтэй гэдгийг Есүс мэдэж байв.

Чуулганд тулгарч байсан анхны шийдвэрүүдийн нэг нь “Харь үндэстний итгэгчид хэрхэн чуулганы нэг хэсэг болох вэ? Тэд Иудейн хуулийг бүх талаар сахиж мөрдөх шаардлагатай юу?” зэрэг байлаа. Хэдийгээр энэ нь бидэнд энгийн мэт санагдаж болох ч хэцүү шийдвэр байсан юм. Энэ нь хувийн сонголттой холбоотой асуудал биш бөгөөд хоол хүнс, хозлолын талаарх хууль зааврууд нь Хуучин гэрээнд үндэслэгдсэн байлаа. Энэхүү шийдвэр нь урт хугацааны үр дагавруудыг дагуулсан юм. Өнөөдөр та бидэнд ч энэ шийдвэр нөлөөлсөн. Хэрэв Йерусалимын зөвлөл өөрөөр шийдвэрлэсэн бол өнөөдөр харь үндэстний итгэгчид иудейн хуулийг сахиж мөрдөх шаардлагатай болох байсан.

Үйлс 15-р бүлэгт анхны чуулган энэ чухал асуудлыг хэрхэн шийдвэрлэснийг харуулдаг. Олон янзын үзэл бодлыг сонссоны дараа тэд нэг шийдэлд хүрсэн. Элч нар харь үндэстний чуулганд илгээсэн захидалдаа гаргасан шийдвэрээ тайлбарлахын тулд маш сайхан үг хэллэг ашиглажээ “Учир нь Ариун Сүнс болон бидэнд… зүйтэй” (Үйлс 15:28). Сүнс чуулганы удирдагчдыг цуглуулж, санал бодлоо хуваалцах боломжийг олгож, дараа нь бүлгийг зөв шийдвэрт хөтлөх замаар удирдсан байна.

Сургаалт үгс номыг бичсэн хүн шийдвэр гаргахад олон тооны санаа бодол чухал болохыг онцолжээ.

• Мунхгийн зам нүдэнд нь зөв. Мэргэн нэгэн зөвлөгөөг сонсох (Сургаалт үгс 12:15).

• Олон зөвлөхтэй аваас аврагдах (Сургаалт үгс 11:14).

• Дайтваас мэргэн удирдамжийг дага. Зөвлөхүүд арвин аваас ялалт ирнэ (Сургаалт үгс 24:6).

Энэ бол чуулганы удирдагч нарын хувьд чухал зарчим билээ. Хэрэв та бусдыг сонсохыг хүсдэггүй бол Сургаалт үгс таныг мунхаг нэгэн гэж хэлж байна. Мунхаг нэгэн үргэлж өөрийгөө зөв гэж боддог бол, харин мэргэн хүн бусдыг сонсохыг хүсдэг.

Хэрэв багийн зорилго нь ухаалаг зөвлөгөө өгөх юм бол биднээс өөрөөр сэтгэдэг хүмүүс хэрэгтэй. Багаа сонгохдоо бид өөрсдийнхөө хуулбарыг хайх хэрэггүй. Бидэнтэй үргэлж амархан санал нэгддэг хүмүүс бидэнд хэрэггүй.

Багууд урам зоригийг өгдөг

Номлогчийн үгс номд багийн ашиг тусыг тодорхойлохдоо “Ганцаараа байснаас хоёул байх нь илүү дээр билээ. Тэгвэл тэдний зүтгэл сайнаар хариулагдах болно. Хэрэв тэд хамтдаа ойчих аваас нэг нь нөгөөгөө босгоно. Харин ганцаар байгч унахад түүнийг босгох хүн үгүй тул, хөөрхий” (Номлогчийн үгс 4:9-10).

Чуулган эсэргүүцэлтэй тулгарах үед элч нар бие биенээ урамшуулсан. Лук “нэг санаагаар” гэсэн хэллэгийг чуулганы анхны гишүүдийн харилцан дэмжлэгийг тайлбарлахдаа ашиглажээ.

Агуу илгээлтийн эзэн Хадсон Тэйлор энэ зарчмыг харуулсан. Тэйлор Хятад руу үйлчлэх хүсэл тэмүүлэлтэй явсан ч удалгүй шантарчээ. Түүнийг санхүүгээр дэмждэг зарим хүмүүс тусламж илгээхээ больсон байна. Түүнээс өмнө очсон илгээлтийн эзэд түүнийг шүүмжилсээр байлаа. Их Британийн засгийн газар хүртэл түүний ажлыг эсэргүүцэв. Сүйт бүсгүй нь түүнд Англиас захидал бичихдээ илгээлтийн эзэнтэй гэрлэх эсэхдээ эргэлзэж байгаагаа илэрхийлсэн. Тэйлор урам хугарч, гэртээ харихад бэлэн байв.

Харин тэр үед Шотландын настай илгээлтийн эзэн Виллиам Бернс Хадсон Тэйлортой хамт Хятадын гүн рүү сайнмэдээний аялал хийхдээ долоон сарыг хамт өнгөрөөжээ. Тэр хоёр хамтдаа аялж, хамтдаа залбирч, хамтдаа номлодог байв. Тэрхүү аяллын үеэр Тэйлор Хятадын төлөөх алсын хараагаа дахин олж авчээ. Жон Поллок түүний талаар “Виллиам Бернс Хадсон Тэйлорыг өөрөөс нь аварсан юм” хэмээн бичсэн байдаг.

Хадсон Тэйлор хожим нь Хятадын Дотоод Илгээлт байгууллагыг үндэслэсэн бөгөөд орчин үеийн хамгийн агуу илгээлтийн эздийн нэг гэдгээрээ олонд танигджээ. Харин Виллиам Бернсын талаар хүмүүс бараг мэддэггүй. Гэсэн ч Виллиам Бернс Хятадын Дотоод Илгээлт байгууллагын мянга мянган хүмүүсийг итгэлд авчирсан үйл хэргийн гавьяаны тодорхой хэсгийг хүртэх зохистой хүн юм. Багууд урам зоригийг өгдөг.

Багууд хариуцлагын харилцааг бий болгодог

Бидний хүн нэг бүрд харж чадахгүй хэсэг бий. Өөрөө олж харж чаддаггүй шинж чанарууд юм. Бид гэр бүлийнхээ гарал үүсэл, итгэгч болохоос өмнөх амьдрал, мөн хувийн зан араншинтай холбоотой гэх зэрэг сул талуудаа үйлчлэлд гарахдаа хамт авчирдаг. Тэдгээр нь бидний үйлчлэлд нөлөөлдөг.

Бид өөрсдийнхөө эдгээр сул талуудыг олж харахгүй байж болох ч, багийн бусад гишүүд бидний үйлчлэлийг сүйрүүлж болзошгүй эдгээр асуудлын талаар анхааруулж чадна. Еврей номыг бичигч Христэд итгэгчдийг сайн үйлсийн төлөө бие биенээ бадраадаг хүмүүс гэж хэлсэн (Еврей 10:24) байдаг. “Бадраах” гэдэг үгийн анхдагч грек язгуур нь хэн нэгнийг чичлэх, өдөөх гэсэн утгатай үг байжээ. Заримдаа энэ нь тийм ч таатай биш байдаг. Бид бүгдээрээ чичлүүлэх дургүй ч, хариуцлагын харилцаа бол үнэ цэнтэй юм. Христэч удирдагч хүн бүрд “Энэ чинь ухаалаг бус үйлдэл. Чи үүнийг дахин нягталж үзэх хэрэгтэй” гэж хэлэх дор хаяж нэг хүн байх хэрэгтэй.

Дундад зууны үеийн сүм хийдүүд, Веслийн ангийн уулзалтуудаас орчин үеийн Амлалтаа сахигчид зэрэг бүлгүүдийг хүртэл Христэч удирдагчид нь хариуцлагын харилцааг хөгжүүлж ирсэн эртний уламжлалтай. Долоо хоног бүрийн хариуцлагын харилцаа нь өнөөгийн чуулганы удирдагчдад ашиг тусыг үзүүлсээр байна. Үүнийг нэг нэгийн уулзалт, жижиг бүлгүүдээр болон утсаар ч хийх боломжтой. Энэхүү хариуцлагын харилцаа нь биднийг хэт холдохоос өмнө сүнслэг аюулаас сэрэмжлүүлж чадна.

Сайн хариуцлагын харилцаа нь хамтрагч бүрээс бүрэн үнэнч байдал, хамтрагчид хоорондын бүрэн нууцлалыг шаарддаг. Хариуцлагын харилцаандаа ашиглах олон асуултуудын жишээг та олж үзэх боломжтой. Нэг жагсаалтад дараах асуултууд багтсан байна. Үүнд:

• Энэ долоо хоногт та Бурхантай тогтмол цагийг өнгөрөөсөн үү?

• Энэ долоо хоногт үнэнч байдлаа сахиагүй ямар нэгэн зүйл болсон уу?

• Энэ долоо хоногт таны бодлын амьдрал цэвэр тунгалаг байсан уу?

• Энэ долоо хоногт та бэлгийн харилцааны нүгэл үйлдсэн үү?

• Энэ долоо хоногт та эхнэрийнхээ (эсвэл нөхрийнхөө) төлөө ямар чухал зүйл хийсэн бэ?

• Энэ долоо хоногт та үл итгэгч хүнтэй итгэлээ хуваалцсан уу?

• Та эдгээр асуулт болгонд үнэнч шударгаар хариулсан уу?

Уруу татагдах үед багийн хариуцлагын харилцаа нь чухал байдаг. Паул залуу пасторт хандан хэрхэн урт удаан үргэлжлэх үйлчлэлийг байгуулах талаар зөвлөж захидал бичжээ. Паул Тимотод “Залуу насны дур хүслүүдээс зугт. Цэвэр зүрхнээс Эзэнийг дуудагчдын хамт зөвт байдал, итгэл, хайр ба амар тайвныг мөшгө” (2 Тимот 2:22) хэмээн анхааруулсан байдаг. Эзэнийг цэвэр зүрхнээсээ дууддаг Бурханыг дагаж буй бусад хүмүүстэй нэгдэх нь Тимотын сүнслэг амьдралд ашиг тустай гэдгийг Паул ойлгож байсан.

► Хэрэв та үйлчлэлийн багийн нэг хэсэг бол багаас олж авсан ашиг тусын заримаас хуваалцана уу. Үйлчлэлийн багийн нэг хэсэг байхад ямар бэрхшээл тулгардаг вэ?

Багтай ажиллах нь

Есүс тэс өөр өөр зан чанартай хүмүүсийн бүлгийг нэгдмэл баг болгожээ. Есүс тэдний ялгаатай байдлыг авч, анхны чуулганыг удирдаж чадах багийг бүтээсэн юм. Чуулганд Петрийн зоримог удирдлага, Филипийн намуун зөөлөн сүнс хэрэгтэй байв. Удирдагч хүнд тулгардаг томоохон бэрхшээлүүдийн нэг нь хэсэг бүлэг дагалдагчдыг баг болгох явдал юм.

Шри Ланкийн чуулганы удирдагч Ажит Фернандо баг бүрдүүлэхэд тулгардаг бэрхшээлүүдийг сайн ойлгодог нэгэн юм. Тэрээр:

Магадгүй Эвангелийн чуулганд тулгарч байгаа нэг харамсалтай зүйл бол бидний шийдвэр гаргах, үйлдэх арга замыг теологи маань биш, харин мэдрэмж маань тодорхойлох нь их түгээмэл болсон явдал. Библийн дагуух итгэгч хүн “Би энэ хүний талаар ямар ч бодолтой байсан, би түүнийг хүлээн авах болно. Учир нь Бурхан намайг ингэж хийгээсэй гэж хүсдэг. Түүнтэй эв найртай ажиллах нигүүлслийг би Бурханаас гуйх болно” гэж хэлдэг. Хэдийгээр бидний мэдрэмж өөр зүйлийг хэлж болох ч энэ хүнтэй ажиллах оролдлого амжилтанд хүрнэ гэж бидний теологи хэлдэг. Бидний теологи энэхүү харилцаанд шаргуу ажиллахад хөтөлдөг. Бид тухайн хүний төлөө болон түүнтэй харилцах харилцааныхаа төлөө залбирна. Улмаар бид тогтмол уулзаж эхэлдэг. Бид түүнд Христитгэлийн хайрыг харуулахыг эрмэлзэж, түүнд хэрэгтэй хувийн зүйлсэд нь чадах бүхнээрээ тусалдаг. Багаар дамжуулан энэ хүн юунд хүрч болох талаар бид мөрөөдлүүдээ хөгжүүлдэг.[1]

1 Коринт 12:12-25-д бид хүмүүст зүгээр л дургүй учраас тэднийг Христийн Бие дотор үгүйсгэх тийм эрх бидэнд байхгүй гэдгийг заасан. Хэрэв та чуулган байгуулбал танд таалагдахгүй олон гишүүд тэнд байх л болно. Христэч удирдагчийн хувьд та “Миний хувийн мэдрэмж ямар ч байсан би энэ хүнийг хүлээж авах болно. Учир нь Бурхан түүнд санаа тавиулахаар над руу явуулжээ. Түүнтэй хамтран ажиллахын тулд би Бурханаас нигүүлслийг гуйж, түүнийг ерөөн, үйлчлэлд нь хөгжин дэвжүүлэхийг гуйх болно” гэж хэлэх учиртай.

Нэгэн удаа хэн нэгэн ирээдүйн пастор болох залуугаас “Чи яагаад пастор болохыг хүсдэг вэ?” гэж асууж. Залуу хариуд нь “Нисэх онгоцны буудал дээр би хэн нэгэн пасторынхаа чемоданыг барьж явахыг харсан. Хэн нэгэн бас миний чемоданыг барьж явахыг хүсэж байна!” гэжээ.

Есүсийн үзэл бодол тэс өөр байсан юм! Энэ залуу үйлчлүүлэхийг хүссэн бол харин Есүс үйлчлэхийг хүсжээ. “Учир нь Хүний Хүү үйлчлүүлэхийн тулд бус, харин үйлчлэхийн тулд мөн олны төлөө амиа золиос болгон өгөхийн тулд ирсэн билээ гэв” (Марк 10:45). Жинхэнэ удирдлагад үйлчлэл багтдаг гэдгийг Есүс харуулсан. Есүс өөрийгөө даруу болгож, боолын дүрийг авсан (Филиппой 2:7).

► Иохан 13:1-20 эшлэлийг унших.

Сайнмэдээний олон хэсгээс бид Есүсийн үйлчлэгч-удирдлагын үлгэр дуурайлд суралцах боломжтой бөгөөд үүний хамгийн хүчирхэг жишээнүүдийн нэг нь Есүс дагалдагч нарынхаа хөлийг угаасан түүх юм. Энэ хэсэгт Есүс үйлчлэгч байх нь ямар утга учиртай болохыг харуулж байна.

Зарим чуулганууд Сүүлчийн зоог дээрх Есүсийн үйлдлийг дахин сануулах үүднээс хөл угаах ёслолыг хийдэг. Энэ нь сайхан үйлчлэл байж болох ч, Есүс тэр үед онцгой ёслол хийгээгүй гэдгийг ойлгох нь илүү чухал байж болох юм. Харин оронд нь Тэр зүгээр л хийх хэрэгтэй ажлаа л хийсэн юм.

Йерусалимын гудамжууд тоос шороо ихтэй байсан тул албан ёсны оройн зоог барих үед хөлсний зарц зочдын хөлийг угаадаг заншилтай байжээ. Энэ бол хамгийн доод албан тушаалтнуудад оногдсон даруухан үүрэг байв. Есүс дагалдагч нартайгаа Алгасал баярт оролцох үед өрөөнд нэг ч үйлчлэгч байсангүй. Дагалдагч нарын хэн нь ч энэ үүргийг сайн дураараа хийсэнгүй. Тэд Есүсийн хаанчлалд өндөр албан тушаалд хүрнэ гэж найдаж байсан болов уу. Есүс өвдөг сөгдөн хамгийн дорд боолын ажлыг хийж эхэлсэн.

Энэ хэсэг Есүсийн удирдлагын талаарх ойлголтыг харуулдаг. Хүмүүс байр суурь, эрх мэдлийн төлөө удирдлагыг хайдаг. Тэдний зорилго нь байгууллагынхаа оргилд гарах юм. Харин Есүсийн хувьд Тэр аль хэдийн оргилд гарсан байлаа. Тэр дагалдагч нарынхаа багш нь байв. Гэхдээ Тэрээр хамгийн дорд байр суурийг дуртайяа хүлээн авсан юм.

Энэ бол Христтэй адил удирдагч байхын утга учир юм. Христтэй адил удирдагч хэний ч хүсээгүй ажлыг хийдэг. Христтэй адил удирдагч бусдад тушаан зандрах боломжоороо бус, харин даруу үйлчлэлийн үлгэр дуурайлаараа бусдад урам зоригийг өгдөг.

[1]Нэгэн хүн “Надтай зарц шиг харьцах үед би яаж хариу хандах вэ?” гэдгээр үйлчлэгчийн сэтгэлтэй хүнийг таньж болно гэж хэлсэн байдаг. Есүсийн үлгэр дуурайлыг дагадаг удирдагч түүнтэй зарц мэт харьцахад гомдохгүй. Есүс бусад дагалдагч нарын хамт Иудасын хөлийг ч угаасан гэдгийг битгий мартаарай. Чамаас урвахаар шийдсэн хүний хөлийг даруухнаар угаана гээд төсөөлж байна уу?

Тэрээр дагалдагчдынхаа хөлийг угааж дуусаад, тэдгээр байр суурь горилогч эрчүүдэд хандан “Миний та нарт үйлдсэн лугаа адил та нарыг үйлд хэмээн Би ийм дуурайл өгөв” (Иохан 13:15) гэжээ. Гучин жилийн дараа Симон Петр “Бүгд бие биендээ даруу хандах байдлаар хувцасла” (1 Петр 5:5) гэж бичихдээ Есүсийн даруу байдлыг санасан байх. Есүс дагалдагч нартаа үйлчлэхийн тулд алчуураа бүсэлсэн шиг эргэн тойронд буй хүмүүстээ үйлчлэхийн тулд бид даруу байдлыг бүсэлдэг.

Христэч удирдагчдын хувьд бид үйлчлэх боломжоос илүүтэй байр суурь хайхад уруу татагдах боломжтой. Христэч удирдлага бол үйлчлэл гэдгийг Есүс харуулсан.

Амьдралынхаа төгсгөлд таны үйлчлэлийн хамгийн том өв нь магадгүй бусад Христэд итгэгч ажилчдын халамжлагч байж нөлөөлөх явдал байж болох юм. Хэрэв та үйлчлэлийнхээ туршид зөвхөн 12 Христэд итгэгч ажилчдыг халамжилсан бол таны нөлөөлөл тэдгээр 12 хүнээр үржигдээд зогсохгүй, нэмээд тэдний халамжлах ажилчдаар ч үржигдэх боломжтой.

Харамсалтай нь ихэнх Христэч удирдагчид халамжлахын ач холбогдлыг мэддэг ч, цөөхөн удирдагчид бусдыг халамжлахад шаардагддаг цагт өөрсдийгөө зориулдаг. Яагаад бид үйлчлэлийн энэ талбарыг орхигдуулаад байна вэ?

Үүний нэг шалтгаан нь халамжлахын өртөг юм. Халамжлах нь үнэ цэнтэй цаг хугацааг шаарддаг. Залуу удирдагчдыг халамжлахад зориулсан цаг хугацаа нь томоохон бүлэг хүмүүст үйлчлэхэд зарцуулсан цаг хугацаанаас илүү үр дүнтэй гэж бид итгэдэг.

Өөр нэг шалтгаан нь халамжлахыг дагалддаг урам хугаралт юм. “Би дараа үеийн удирдагчдыг бэлтгэж байна” гэж хэлэх нь гайхалтай сонсогдож болно. Гэхдээ энэ нь бодит байдал дээр ихэнхдээ тийм ч таатай байдаггүй.

Дагалдагч нарынхаа удаашралтай ахиц үйл явцыг хараад Есүс олон удаа урам хугарч байсан байх. Есүстэй гурван жил хамт байсны дараа Филип “Эзэн, бидэнд Эцэгээ харуулаач. Энэ л бидэнд хангалттай гэв” (Иохан 14:8). Есүс 5,000 хүнийг хооллосноос хэдхэн долоо хоногийн дараа дагалдагч нар 4,000 хүнтэй нүүр тулсан. Харин тэд “Энэ зэлүүд газар эднийг хэрхэн талхаар цатгаж чадах билээ?” (Марк 8:4) хэмээн асууж байв.

Элч Паул ч мөн адил урам хугаралтыг туулж байсан. Илгээлтийн анхны аяллын үеэр Иохан Марк түүнийг орхиод явсан (Үйлс 13:13). Паул Демийг хэдэн сарын турш сургаж бэлтгэсэн ч, тэрээр шоронд ганцаардан байхдаа “Дем өнөө үеийг хайрлаж, намайг орхиод…” (2 Тимот 4:10) хэмээн бичжээ.

Халамжлах нь өртөг ихтэй бөгөөд урам хугалдаг боловч удирдагчийн ажлын чухал хэсэг юм. Өсөж төлөвшсөн Христэч удирдагч бүр ирээдүйн удирдагчдыг халамжлах хэрэгтэй. Үүний зэрэгцээ Христэч удирдагч хүн бүрд тэмцэлдэх үед нь дэмжлэг үзүүлдэг халамжлагч хэрэгтэй.

Ховард Хендрикс “Хүн бүрийн амьдралд гурван хүн хэрэгтэй байдаг” гэж хэлсэн:

1. Хүн бүрд Паул хэрэгтэй. Тасралтгүй өсөлтөд уриалж халамжлах Паул адил хүн.

2. Хүн бүрд Барнаб хэрэгтэй. Чиний сул талыг шударгаар хэлэх хэмжээнд чамайг хангалттай хайрладаг Барнаб адил найз.

3. Хүн бүрд Тимот хэрэгтэй. Үйлчлэлд халамжилж, дагалдуулах залуу хүн.

► Эдгээр асуултаар хичээлээ төгсгөе:

• “Хэн миний Паул вэ?”

• “Хэн миний Барнаб вэ?”

• “Хэн миний Тимот вэ?”

(1) Доорх хүснэгтэд дагалдагч нар Есүсийн үйлчлэлийг ажиглаж байсан дөрвөн жишээ тохиолдлыг жагсаана уу. Дагалдагчид Есүсийг ажигласнаар юу сурсан талаар тэмдэглэ.

(2) Ирээдүйн үйлчлэлд нь бэлтгэж халамжлах хоёр эсвэл гурван хүний нэрийг жагсаана уу. Богино догол мөрөнд дараах хоёр асуултад хариулж бич:

• Халамжилж буй хүнээсээ ямар шалгууруудыг би харахыг хүсэж байна вэ?

• Миний халамжилж буй хүний дотор Бурхан юу хийхийг би хармаар байна вэ? (тодорхой байдлаар)

Өөрийн нэрлэсэн хүмүүсээ халамжлах алхмыг эхлүүлээрэй. Тэднийг үйлчлэлийн боломжуудад хэрхэн бэлтгэж болохыг харуулахыг Бурханаас гуй.

Хэвлэж болох PDF-ийг эндээс авах боломжтой.