Lesson 9: Хэрэгжүүлэлт

(1) Библийн хэрэгжүүлэлтийг хуурамч зүйлсээр орлуулахгүй байхад анхаарах.

(2) Текстийн хөрвүүлгээс хэрэгжүүлэлт рүү шилжих үйл явцыг дагах.

(3) Текстийн хэрэгжүүлэлтийг олохын тулд асуух тодорхой асуултуудыг мэдэх.

(4) Бичвэрийн сонгосон багц хэсгүүдэд эдгээр алхмыг туршиж дадлагажих.

► Таны одоо хийж байгаа Библи судлал дахь хөрвүүлэг ба хэрэгжүүлэлт хоорондын холбоо хамаарлын талаар ярилц. Та номлох эсвэл заах үед аль нь илүү хялбар вэ? Текстийг хөрвүүлэх үү, эсвэл өнөөгийн ертөнцөд хэрэгжүүлэх нь үү? Та Бичвэрийг судлахдаа эсвэл номлол сонсох үедээ өөрийн амьдралдаа тусгах хэрэгжүүлэлтийг олж чаддаг уу?

Дөлгөөн "Пастор аа, бид уулзаж болох уу? Надад Библийн талаар томоохон асуулт байна" гэж хэлэв. Тухайн долоо хоногийн сүүлээр пастор Дөлгөөнтэй уулзаж, түүнд тулгарч буй асуудлыг хөндсөн хэд хэдэн Бичвэрийг харцгаажээ. Хэдэн минутын дараа Дөлгөөн Библиэ хаагаад, "Би үнэнээ хэлье. Би Библи юу гэж хэлдгийг аль хэдийн мэднэ, гэхдээ би үүнийг хийхийг хүсэхгүй байна. Энэ нь надад хэтэрхий хүнд байна" гэж хэлэв.

[1]Дөлгөөний асуудал нь хөрвүүлэг биш, харин хэрэгжүүлэлт байжээ. Бичвэр юу гэж хэлж байгааг ажиглаж, түүний утгыг хөрвүүлэх нь хангалтгүй бөгөөд бид үүнийг өөрсдийн амьдралд хэрэгжүүлэх ёстой. Библи судлах үйл явц хөрвүүлгийн үе шатаар дуусах нь түгээмэл байдаг.

Бид текст юу гэж хэлж байгааг харах ажиглалтаар эхэлдэг. Тэгээд энэ нь юу гэсэн утгатай болохыг хөрвүүлэх үе шатаар үргэлжлүүлдэг. Улмаар текстийг өөрсдийн амьдралд хэрэгжүүлснээр бид дуусгах учиртай. Бид энэ үйл явцыг гурван асуултаар нэгтгэн дүгнэж болно:

• Текст юу гэж хэлж байна вэ? (Ажиглалт)

• Текст юу гэсэн утгатай вэ? (Хөрвүүлэг)

• Текст миний амьдралд хэрхэн ажилладаг вэ? (Хэрэгжүүлэлт)

Дуулаач Эзэний хуульд баярлаж, хуулийг бясалгадаг хүний талаар "Урсгал усны дэргэд тарьсан мод адил ургацын цагт үр жимсээ гаргадаг" (Дуулал 1:2-3) хэмээн бичжээ. Сатан биднийг Библиэс хол байлгахыг хичээдэг. Хэрэв бид Бурханы Үгийн хоол тэжээлээ авч чадахгүй бол бидний сүнслэг байдал суларч, үхэх болно гэдгийг тэр мэддэг.[1]

Хэрэв Сатан биднийг Бурханы Үгээс хол байлгаж чадахгүй бол биднийг үнэнийг амьдралдаа хэрэгжүүлэхээс хол байлгахыг оролддог. Бид Бурханы Үгээр амьдрахгүй л бол бидэнд үр жимс байхгүй. Хэрэв Сатан биднийг Библи уншихаас хол байлгаж чадахгүй бол тэр биднийг хэрэгжүүлэлтийг орлуулдаг зүйлсээр уруу татах болно.

Бид хэрэгжүүлэлтийг хөрвүүлгээр орлуулдаг

Бичвэрийн хэсгийг сайтар судалж, түүний утгыг үйлдэл болгохгүйгээр тодорхойлох боломжтой. Ядуу хүний хонийг хулгайлсан баян хүний тухай Натаны сургаалт зүйрлэлийг сонсоод Давид зөв хөрвүүлсэн. "ЭЗЭН амьд! Үүнийг үйлдэгч нь үхэг. Тэр хүнд өрөвдөх сэтгэл байсангүй. Ийм хэрэг үйлдсэн учраас охин хурганы төлөө тэрээр дөрөв нугалж төлөх ёстой гэв" (2 Самуел 12:5-6).

Давидын хөрвүүлэг зөв байжээ. Тэр Эзэний нэрээр хариулсан; тэр шударга ёсыг шаардсан; тэр нөхөн төлбөр шаардсан. Давидын хөрвүүлгийг хэн ч буруутгахааргүй харагдаж байна. Гэхдээ Давид сургаалт зүйрлэлийг өөрийн амьдралдаа хэрэгжүүлж чадсангүй. Харин эш үзүүлэгч хэрэгжүүлэлтийг "Тэр хүн нь та билээ!" (2 Самуел 12:7) хэмээн хэлжээ.

Энэ бол номлогч, багш нарын хувьд онцгой аюул юм. Бид өөрсдийн дуулгаваргүй байдлыг үл тоомсорлож бусдад Бичвэрийг зааж чадна. Иаков дуулгавартай байдал үгүй хөрвүүлгийн эсрэг сэрэмжлүүлэг өгчээ. "Тиймд зөвийг үйлдэхийг мэддэг хэрнээ эс үйлддэг бол энэ нь түүнд нүгэл болно" (Иаков 4:17). Бид Бичвэрийг зөв хөрвүүлсний дараа үүнийг үйлдэл болгохоо мартаж болохгүй. Бид хэрэгжүүлэлтийг хөрвүүлгээр орлуулж болохгүй.

Бид бүрэн дуулгавартай байдлыг хэсэгчилсэн дуулгавартай байдлаар орлуулдаг

Бид Бичвэрийн багц хэсгийг судалж, түүний утгыг тодорхойлохдоо биднийг бүрэн өөрчлөх хэмжээний бус хэрэгжүүлэлтийг олж авах боломжтой. Бид Бичвэрт дуулгавартай байх талбаруудыг олж болох ч, амьдралынхаа хамгийн гүн, далд хэсэгт буй дуулгаваргүй байдлыг үл ойшоож болох юм.

Магадгүй бид Ефес 4:29 эшлэлийг судалж байсан байх. "Амнаас чинь ямар ч ялзарсан үг бүү гараг. Харин хэрэгтэй үед нь бусдыг босгон байгуулах тустай үг хэл. Тэгвэл энэ нь сонсож буй хүнд нигүүлсэл өгнө." Хэрэгжүүлэлтийн үе шатанд бид өөрсдийн амьдралын чухал харилцаануудыг шалгадаг. Бид ийнхүү асуудаг:

• "Миний номлолууд цуглааныг маань босгон байгуулж байна уу?" "Тийм ээ, би итгэмжит пастор."

• "Би хүүхдүүдээ урамшуулах үгсийг хэлдэг үү?" "Тийм ээ, би хайр халамжтай эцэг эх."

• "Би хань ижлээ босгон байгуулдаг уу?" "Үгүй ээ, би харилцахдаа ихэвчлэн сөрөг байдаг."

Таны хань ижилтэйгээ харилцах харилцаа бол Бурханы Сүнс таныг өөрчлөхийг хүсэж байгаа талбар юм. Сатан таныг энэхүү текстийн хань ижилтэйгээ харилцах амьдралыг өөрчлөх хэрэгжүүлэлтийг амьдралын бусад дуулгавартай байдлаар орлуулахад уруу татдаг. Тэр таныг бүрэн дуулгавартай байдалд өөрийгөө зориулахын оронд хэсэгчилсэн дуулгавартай байдлыг хүлээн авахад уруу татдаг.

Бид гэмшлийг шалтгаар орлуулдаг

Нэгэн хуульч Есүсээс "Багш аа, мөнх амийг өвлөн авахын тулд би яах ёстой вэ?" гэж асуусан (Лук 10:25). Хуульч хариултыг нь аль хэдийн мэддэг байжээ: "Чи Эзэн Бурханаа бүх зүрх, бүх сэтгэл, бүх хүч, бүх оюун ухаанаараа хайрла. Мөн хөршөө өөрийн адил хайрла" (Лук 10:27).

Хуульч Бичвэрийг ойлгосон. "Харин тэр өөрийгөө зөвтгөх гэж Есүст ‘Миний хөрш гэдэг чинь хэн бэ?’ гэжээ" (Лук 10:29). Түүний асуудал нь хөрвүүлэг биш, харин хэрэгжүүлэлт байжээ. Хайр байхгүй байдлаа тэр ухаарсан.

Магадгүй Бурханы Сүнс танд "Үг яриа чинь хань ижлийг чинь босгон байгуулж чадахгүй байна; энэ нь харилцааг сүйтгэх боломжтой" гэж хэлсэн байж магадгүй. Та Үгийг уншсан; та Үгийг хөрвүүлсэн; одоо та Үгийг хэрэгжүүлэх цаг болжээ. Гэтэл та "Миний хань үргэлж сөрөг ханддаг. Хэрэв би түүнд сөрөг байдлаар ханддаг бол энэ нь миний хань хэтэрхий сөрөг байдаг учраас тэр юм. Энэ миний буруу биш ээ!" гэж бодсон байж болох юм. Ингэвэл та юу хийж байна вэ? Та Бурханы Үгэнд дуулгаваргүй байснаа гэмшихийн оронд өөрийнхөө зан байдлыг зөвтгөж байна гэсэн үг.

Бид хувьсан өөрчлөлтийг сэтгэл хөдлөлөөр орлуулдаг

Иаков Үгийг сонсоод үүнийг хэрэгжүүлдэггүй хүний тухай бичсэн (Иаков 1:23-24). Заримдаа хүн Үгийг сонсоод үнэхээр догдолдог ч, жинхэнэ өөрчлөлтийг орлож, сэтгэл хөдлөл нь хариу үйлдэхийг тэрээр зөвшөөрдөг. Пастор нь тодорхой сэдвээр номлол хийхэд хүмүүс "Энэ номлол намайг ятгасан" гэж хэлдэг ч, тэдний амьдралд удаан үргэлжлэх хувьсан өөрчлөлт харагддаггүй. Үүнээс болж олон пасторууд урам хугардаг.

Магадгүй та гэрлэлтийн семинар дээр Ефес 4:29 эшлэлийг зааж байгааг сонссон байх. Семинарын төгсгөлд шийдвэр гаргах цаг болоход та ханьдаа "Намайг уучлаарай. Би эерэг үгээр ярихыг хүсэж байна. Би илүү хичээх болно!" гэж хэлсэн ч байж болох юм. Гэсэн хэдий ч та удалгүй хатуу, сөрөг үгсээ хэлж, өвдөлттэй харилцааны хуучин зуршил руугаа буцаж ордог.

Юу болсон бэ? Сэтгэл хөдлөлийн хариу үйлдэл байсан, гэхдээ жинхэнэ өөрчлөлт байгаагүй. Энэ нь аюултай. Учир нь олон удаагийн бүтэлгүйтлийн дараа хувьсан өөрчлөгдөх нь боломжгүй гэдэгт бид итгэж эхэлдэг. Үнэнд сэтгэл хөдлөлөөр хариу үйлдэх нь жинхэнэ өөрчлөлт, дуулгавартай байдлыг дагалдах ёстой бөгөөд энэ нь Ариун Сүнсний ажилд өөрсдийгөө захируулах үед л боломжтой болдог.

Толинд өөрийгөө хараад төд удалгүй ямар харагдаж байснаа мартдаг хүнийг дүрсэлсний дараа Иаков амьдралдаа Бичвэрийг зөв хэрэгжүүлдэг хүний талаар өгүүлжээ. "Тиймээс мартамхай сонсогч бус, хэрэгжүүлэгч байж, эрх чөлөөний хууль болох төгс хуулийг няхуур үзэн, түүгээр байдаг хүн нь үйлсдээ ерөөгдөх болно" (Иаков 1:25). Үгийг сонсох нь хангалтгүй, бид Үгийг хэрэгжүүлэх ёстой. Бичвэрийг зөвөөр хэрэгжүүлэхэд юу шаардлагатай вэ?

Бичвэрийг зөвөөр хэрэгжүүлэхийн тулд та гурван зүйлийг хийх ёстой.

Алхам 1: Бичвэрийн утгыг мэдэх

Ажиглалт, хөрвүүлгийн хичээлүүд яагаад чухал байгаа шалтгаан бол энэ юм. Хэрэв бид текстийг мэдэхгүй л бол бидний хэрэгжүүлэлт зөв байж чадахгүй. Бид "I зууны Христэд итгэгчид энэ Бичвэрийг өөрсдийн ертөнцөд хэрхэн хэрэгжүүлсэн бэ?" гэсэн асуултаар хэрэгжүүлэлтийн алхмыг эхлүүлдэг.

Жишээлбэл, Паул "Намайг хүчирхэгжүүлэгч Түүгээр би бүгдийг хийж чадна" (Филиппой 4:13) гэж бичсэн байдаг. Зарим багш нар үүнийг "Христ надад хүч өгдөг" учраас би хүссэн бүхнээ биелүүлж чадна гэсэн амлалт хэмээн тайлбарладаг. Тамирчид "Би өнөөдрийн тоглолтод ялна, учир нь "Би Христээр бүхнийг хийж чадна" гэж тунхагладаг. Итгэлээр эдгээх чадвартай гэгддэг хүмүүс сонсогчдод "Хэрэв танд хангалттай итгэл байвал та эдгэрэх болно. Учир нь "Та Христээр бүхнийг хийж чадна" гэж батлан хэлдэг. Хөгжил дэвшлийн хуурамч сайнмэдээг номлогчид “Бурхан таныг баян болгохыг хүсэж байна. Та зөвхөн Бурхантай хамтран ажиллах хэрэгтэй. Та ‘Христээр бүхнийг хийж чадна’” гэж зарладаг.

“Филиппой дахь Христэд итгэгчид энэ эшлэлийг хэрхэн хэрэгжүүлсэн бэ?” гэж асууснаар энэ нь энэ дэлхийн амжилтын тухай амлалт биш, харин сүнслэг тэвчээртэй холбоотой амлалт байсныг бид олж мэддэг. Энэ үед Паул Ромд баривчлагдсан, түүний сонсогчид хавчлагад өртсөөр байв. Дэлхийн ололт амжилтыг олж авсан талаар энд хэлээгүй, харин тэр итгэл, дуулгавартай байдлаар бүх нөхцөл байдлыг тэсвэрлэж чадсан хэмээн хэлжээ. Паул бүх нөхцөл байдалд сэтгэл хангалуун байхыг сурсан. Учир нь Христээр дамжуулан Бурхан түүнийг хийхийг хүссэн зүйлийг хийж чадсан юм. Энэ нь тав тухтай амьдралын тухай биш, харин бэрхшээл зовлонтой тулгарсан ч сэтгэл хангалуун байдлаа алдахгүй байх тухай юм.

Алхам 2: Бичвэр амьдралд хэрхэн хэрэгждэгийг ойлгох

Паул Тимотод бусдад үр нөлөөтэй үйлчлэхийн тулд өөрийгөө мэдэх ёстойг анхааруулсан. "Өөртөө ба сургаалдаа анхаар. Эдгээрт туйлбартай бай. Ингэснээр чи өөрийгөө болон сонсогчдоо хэн хэнийг нь аварна" (1 Тимот 4:16). Тимот өөртөө болон номлодог онол сургаалдаа анхаарлаа хандуулснаар сонсогчдод үр нөлөөтэй үйлчилж чадах байв.

Би текстийг болон анхны уншигчдад энэ нь хэрхэн хэрэгжсэнийг мэдсэнийхээ дараа өөрийгөө болон текст миний амьдралд хэрхэн хэрэгждэгийг мэдэх ёстой. Магадгүй би өөрийгөө харахдаа, Бурхан намайг ерөөж, туслаасай гэж ихэнхдээ хүсэн хүлээдэггүй ч байж болох юм. Филиппой 4:13 эшлэл надад амьдралын бэрхшээлийг итгэлтэйгээр даван туулахыг сануулдаг. Учир нь "намайг хүчирхэгжүүлэгч Түүгээр би бүгдийг хийж чадна."

Одоо хэрэгжүүлэлт тодорч, тодорхой болж байна. Энэ эшлэлийн хажууд би "Христийн үнэт зүйлсийг эсэргүүцдэг орчинд ажиллаж байхад минь Бурханы нигүүлсэл намайг итгэмжит байхад хүчирхэгжүүлнэ гэдэгт би итгэж найдах болно. Би Христээр бүхнийг хийж чадна" хэмээн бичих боломжтой. Энэ нь эшлэлийг 1-р зуунаас 21-р зуунд авчирдаг.

Бичвэрийн зөв хэрэгжүүлэлт нь бодит амьдрал дээр хэрэгжих болно. Бурханы Үг амьдралын бүх талбарыг хамардаг. Би Бичвэрийг хэрэгжүүлэхдээ "Энэ текстийн ‘шашны’ хэрэгжүүлэлт юу вэ?" гэж асуудаггүй. Харин "Энэ текст амьдралын бүх салбарт хэрхэн хэрэгжих вэ?" хэмээн асуудаг.

Жон Веслей "Христийн сайнмэдээ шашныг бус, харин хамтын харилцааг таньдаг. Энэ нь хувьчилсан ариун байдлыг бус харин хамтын ариун байдлыг таньдаг " гэж бичсэн байдаг.”[1] Бид нийгмээс нуугдсан лам нар шиг биш, харин бусадтай харилцдаг итгэгчид адил сайнмэдээний амьдралаар амьдардаг. Бид бусдаас тусгаарлагдах замаар бус, харин чуулганы хамт олны нөхцөл байдал дунд ариун байдалд өсдөг.

Өмнө нь бид Ефес 4:29 эшлэлийг харсан. Би энэ эшлэлийн хэрэгжүүлэлтийг авч үзэхдээ үүнийг бусад итгэгчидтэй харилцах харилцаандаа хэрэгжүүлэх ёстой: "Миний үг яриа итгэгчдийг босгон байгуулж байна уу, эсвэл тэднийг нурааж байна уу?" Би энэ эшлэлийг гэр бүлийн харилцаатайгаа холбох ёстой: "Миний үг яриа гэр бүлийг минь босгон байгуулж байна уу, эсвэл хань ижил, хүүхдүүдийнхээ итгэлийг сулруулж байна уу?" Би энэ эшлэлийг ажилтайгаа холбох ёстой: "Би эерэг үг хэлдэг ажилтан уу, эсвэл сөрөг санаа бодлыг түгээдэг үү?" Ефес 4:29 эшлэл амьдралын бүх салбартай холбогдож байна.

Ийм учраас эзэдтэйгээ зөв харилцаанд байдаг боолууд бидний Аврагч Бурханы сургаалыг бүх талаар хүндэтгэлтэйгээр харуулдаг хэмээн Паул бичсэн юм (Тит 2:10). Бичвэрийг няхуур хэрэгжүүлэх үед бидний эргэн тойрны хүмүүс сайнмэдээнд татагддаг.

Алхам 3: Бичвэрт дуулгавартай байх

Библи судлалын эцсийн зорилго бол өдөр тутмын хэрэгжүүлэлт юм. 2 Тимот 2:3-6 эшлэлд Паул Христэд итгэгчдийг цэрэг, гүйгч, тариачин хэмээн тодорхойлсон байдаг. Эдгээр дүрслэл нь зорилгодоо тууштай байгаа хүнийг харуулдаг. Цэрэг тулалдааны үеэр амрахгүй; гүйгч уралдааны дундуур зогсохгүй; тариачин ажил нь дуусах хүртэл газар хагалахаа зогсоохгүй. Христитгэлийн амьдрал тэвчээрийг шаарддаг. "Өмнөө тавигдсан уралдаанд тэвчээртэйгээр гүйцгээе" (Еврей 12:1).

Та Бичвэрийг судлахдаа "Энэ үнэнийг хэрэгжүүлэх ёстой миний амьдралын талбар юу вэ?" гэж асуугаарай. Үнэнийг амьдралдаа системтэйгээр хэрэгжүүлэхэд туслахыг та Бурханаас хүс. Ийнхүү үйлдэх үед Бурхан танд үнэнийг илүү их илчлэх болно. Та сүнслэг хоол тэжээлийг бүр ихээр хүсэмжлэх байдлаа хөгжүүлэх болно.

Хэрэв Бурхан Ефес 4:29 эшлэлээр дамжуулан таны үг яриаг өөрчлөгдөхийг ятгавал та бусдыг босгон байгуулах үгийг хэлж хэвшихэд өөрийгөө зориулах ёстой. Энэ нь өдөрт нэг удаа хэн нэгний амьдралд нигүүлслийн үг хэлэх боломж олгохыг Бурханаас хүсэх гэх мэт энгийн байж болно. Энэ нь таны харилцаанд бусдыг гэмтээх үг яриа гарах үед найзыгаа танд сануулж хэлж байхыг хүсэх ч байж болно. Энэ нь Бурханы Үгийг өдөр бүр хэрэгжүүлэх арга зам болдог.

Коллежид сурдаг нэгэн залуу амьдралынхаа тодорхой талбарт сорилттой тулгарч тэмцэлддэг байв. Одбаяр хөгжим сонирхдог байсан бөгөөд зарим дуу бичлэг нь түүний сул тал болж, уруу татагддаг байжээ. Одбаяр уруу татлагыг ялахыг хүсдэг байсан ч Бичвэрийг тууштай хэрэгжүүлдэггүй байлаа.

9-р сард сургууль дээр нь сэргэлтийн цуглаан болдог бөгөөд Одбаяр тэр үед Бурханы өмнө очин шийдвэр гаргажээ. Тэрээр дотуур байранд өрөөндөө буцаж ирээд зохисгүй санагдсан хөгжим бичлэгүүдээ гарган хаяв. Хэдэн долоо хоног тэрээр сайн гэрчлэлтэй амьдарсан ч хэсэг хугацааны дараа тэр шинэ хөгжим бичлэгүүдийг худалдан авчээ. Удалгүй тэрээр урам хугарч, 11-р сар болоход "Би буцаад уначихлаа" гэж хэлэх болно.

2-р сар гарахад сургууль дээр нь Библийн конференц болно. Одбаяр Бурханы өмнө очоод шийдвэрээ гаргана. Тэр бичлэгүүдээ хаяж, хэдэн долоо хоног сайн гэрчлэлтэй амьдарна. Харин 4-р сар гарахад тэр дахин хөгжим бичлэгүүдээ худалдан авч, үйл явц дахиад эхэлнэ!

Одбаярт юу хэрэгтэй байсан бэ? Илүү сайн хөрвүүлэг үү? Үгүй! Тэр өөрийнхөө сул талыг сайн мэдэж байсан. Оюун бодлоо цэвэр байлгах талаар Библи юу гэж хэлснийг тэр мэддэг байсан. Тодорхой төрлийн хөгжим түүний сүнслэг алхаанд хэрхэн нөлөөлдгийг тэр мэддэг байсан. Одбаярын асуудал нь хөрвүүлэг биш, тэр зүгээр л мэддэг зүйлээ хэрэгжүүлэх хэрэгтэй байв.

Та амьдралынхаа аль талбарт хэрэгжүүлэлт хийх хэрэгтэй байна вэ?

Та Бичвэрийг амьдралдаа хэрэгжүүлэх арга замыг хайхдаа эдгээр таван асуултыг асуух нь тустай байж болно.

(1) Зайлсхийх ёстой нүгэл байна уу?

Олон итгэгчид Бичвэрийн шаардлагад нийцэхгүй байгаа амьдралынхаа талбарыг олж харахдаа цөхөрдөг. Бурхан бидний амьдрал дахь нүглийн талаар Үгээрээ дамжуулан ярих үед бид цөхрөх ёсгүй. Харин үүний оронд, бид Түүний Үгийг хүсэлтэйгээр дагах ёстой.

(2) Хүлээн авах ёстой амлалт байна уу?

Заримдаа хэрэгжүүлэлт нь зүгээр л Бурханы амлалтыг хүлээн авах байдаг. Бид амлалтыг зөвөөр хөрвүүлэхэд анхаарах ёстой. Зарим амлалтыг тодорхой хувь хүмүүст эсвэл Израил үндэстэнд өгсөн байдаг. Бид амлалтыг хам сэдвээс нь салгахгүй байхад анхаарах ёстой. Гэсэн хэдий ч бид тухайн амлалтыг Библийн хам сэдэвт нь няхуур хөрвүүлж, бүх итгэгчдэд өгөгдсөн амлалт гэдгийг мэдвэл тухайн амлалтыг өөрсдийн амьдралдаа хүлээн авах боломжтой.

(3) Хийх ёстой үйлдэл байна уу?

"Би Бичвэрийн энэ багц хэсгээс болоод юу хийх ёстой вэ? Энэ багц хэсэг ямар үнэнийг зааж байна вэ? Энэ нь миний онол сургаалд алдаа байгааг анхааруулж байна уу? Би Бичвэртэй нийцүүлэхийн тулд бодлоо өөрчлөх хэрэгтэй юу? Энэ Бичвэрийн багц хэсгээс болоод би ямар үйлдэл хийх хэрэгтэй вэ?" гэж асуугаарай.

Нэг жишээ бол залбирал юм. Бид Давид, Паул, Нехемиа, Есүсийн залбирлыг уншихдаа өөрсдийн залбирлын амьдралын загварыг олж хардаг. Паул эсвэл Есүсийн залбирлыг хуулбарлахаас илүү залбирахыг хэрхэн сурах вэ! Би үүнийг уншихдаа залбирлыг өөрийн амьдралдаа нийцүүлэх байдлаар үйлдэж чадна.

(4) Дуулгавартай дагах тушаал байна уу?

Паулын захидлын 2-р хагас нь ихэвчлэн тушаалуудаас бүрддэг. Эдгээр тушаал нь ихэвчлэн маш энгийн бөгөөд шууд утгаар хэлэгдсэн. Заримдаа Христэд итгэгчид аль хэдийн мэддэг зүйлийнхээ энгийн хэрэгжүүлэлтийг үл ойшоон, гүн гүнзгий үнэнийг эрж хайдаг!

Нэгэн хүн илэрхий үнэнийг үл тоомсорлож, гүн гүнзгий үнэнийг хайх аюулын талаар бичсэн байдаг. Шинэ гэрээний грек хэл дээрх анхны судлалынхаа талаар тэр ярьсан. Матай 16:24 эшлэлд Есүс "Хэн нэг нь Миний араас дагахыг хүсвэл тэр өөрийгөө үгүйсгэн, загалмайгаа авч Намайг дага" гэж хэлсэн. Эх грек хэл дээр, гайхмаар өөр утга байхгүй. Грек хэлэнд энэ эшлэл яг сонсогдож байгаа шигээ адил утгатай. Утгыг нь ойлгоход хэцүү биш, харин дуулгавартай дагахад л хэцүү юм.”[1]

Заримдаа надад хэрэгтэй зүйл нь маш энгийн бөгөөд "Тийм ээ, Эзэн. Би дуулгавартай дагах болно" гэсэн үг байдаг.

(5) Дагах үлгэр дуурайл байна уу?

Бичвэрийн ихэнх хэсэг намтрыг агуулдаг. Бид намтрыг уншихдаа "Дагах үлгэр дуурайл байна уу?" гэж асуудаг.

Бид Эхлэл 18-р бүлгээс Абрахамын тухай уншихдаа Абрахамын загварыг дагаж, дэлхий ертөнцийн төлөө зуучлан залбирах боломжтой. Нэгэн багш Нигери улсад хичээл зааж байв. Нигери нь Муслим болон Христэд итгэгчдийн хоорондох зөрчилдөөнд ихээр өртсөн улс юм. Оюутнуудын нэг нь ангийнхаа хүүхдүүдээс "Бид тэдний төлөө залбирахаас илүүтэй яагаад муслимчуудтай тэмцдэг вэ? Бурхан тэднийг авралд авчирч чадна гэдэгт бид итгэдэг үү? Хэрэв тийм бол бид Абрахамын үлгэр дуурайлыг дагаж, тэдний авралын төлөө зуучлах ёстой!" гэж асуув. Энэ бол хэрэгжүүлэлт юм.

Бид Ром 12:1-2 эшлэл дээр ажиглалт хийж байсан. Бид эдгээр эшлэл дэх чухал нэр томьёоны талаар үгийн судалгаа хийсэн. Бид Паулын дамжуулсан сургаалыг зөв хөрвүүлэхийн тулд түүхэн ба соёлын, Библийн хам сэдвийг судалсан.

Одоо бид хамгийн чухал алхмыг хийхэд бэлэн боллоо. Та Ром 12:1-2 эшлэлийг амьдралдаа хэрхэн хэрэгжүүлэх вэ?

► Өмнөх хичээлүүдээр Ром 12:1-2 эшлэлийн талаар хийсэн тэмдэглэлээ эргэн хараарай. Дараа нь энэ текстийг амьдралдаа хэрэгжүүлэх гурван тодорхой зүйлийг жагсаан бич.

► Хэрэв та энэ хичээлийг бүлгээр судалж байгаа бол өөрийн хэрэгжүүлэлтийг бүлэгтэйгээ хуваалцаарай. Хэрэв та тэдэнтэй дараа нь дахин уулзах бол хариуцлагатай харилцааг бий болгоорой. Зарим шийдвэр зориулалт гаргахдаа бүлгийнхээ хүмүүсийг таны хэрэгжүүлэлт ямар байгаа талаар асууж шалгахыг хэлж болно.

Энэ курс нь Библийг бусдад заахын тулд хөрвүүлэх тухай юм. Энэ нь Бурханы Үгийн үйлчлэгчид бидний хийх ёстой дуудлага юм. Гэсэн хэдий ч үүнийг хийхэд аюул байгааг анзаарах ёстой. Хэрэв бид анхаарал болгоомжгүй хандвал Библийг зөвхөн номлох, заах зорилгоор л судлах болно. Бид Библийн үнэнийг өөрсдийн амьдралдаа хэрэгжүүлэхдээ алдах болно.

Библи судлал нь зөвхөн сурч, заах зорилготой биш юм. Бурханы Үгийг бие махбодыг тэжээдэг хоолтой зүйрлэх боломжтой. Идэх нь өдөр тутмын болон урт хугацааны үр нөлөөг авчирдаг. Та нэг эрүүл хоолоор холестериноо бууруулахгүйн адил Бурханы Үгтэй нэг өдөр хамт байснаар сүнслэг хүч бий болохгүй. Бие махбодын эрүүл мэндийг бий болгохын тулд тогтмол эрүүл хоолны дэглэм шаардлагатай бөгөөд сүнслэг хүчийг бий болгохын тулд Үгийн урт хугацааны хоолны дэглэм шаардлагатай. Гэсэн хэдий ч өдрийн хоолтой адил Үг нь тухайн өдөр танд тулгарч буй бүх зүйлд чухал ач холбогдолтой бөгөөд сайн өглөөний цай нь хүнд өдрийн ард гарахад тусалдагтай адил юм.

Пастор, багш, чуулганы удирдагчдын хувьд бид өөрсдийн сүнслэг амьдралаа өдөр бүр тэжээн тэтгэх ёстой гэдгийг хэзээ ч мартаж болохгүй. Бусдад заахаар хичээн зүтгэхдээ бид өөрсдийн зүрхийг Бурханы Үгийн талхаар тэжээхээ мартах ёсгүй. Бид өөрсдийгөө тэжээн тэтгэх үед л сая Бурханы хүмүүст үйлчлэхэд шаардлагатай сүнслэг хүчийг олж авдаг.

Паул энэ аюулыг сайн мэддэг байсан. Тэр бусдад номлоод өөрөө тэнцэхгүй үлдэх аюулын талаар сэрэмжлүүлсэн байдаг (1 Коринт 9:27). Өөрсдийн зүрх сэтгэл дэх Бурханы нигүүлслийг үгүйсгээд бусдад заах нь ямар аймшигтай хэрэг вэ. Бусдад заахын тулд судал, гэхдээ зүрхэнд чинь Бурхан ярихыг сонсохын тулд мөн судал.

► Лук 14:25–17:10 багц хэсэгт цуврал сургаалт зүйрлэл болон зааврыг танилцуулжээ. Есүс Йерусалим руу сүүлчийн удаа аялахдаа дагалдагч нартаа эцсийн зааврыг өгсөн. Та Есүсийн сургаалыг уншихдаа эдгээр эшлэлээс тодорхой хэрэгжүүлэлтийг олж мэдээрэй. Таны асуулт:

• Зайлсхийх ёстой нүгэл байна уу?

• Хүлээн авах ёстой амлалт байна уу?

• Хийх ёстой үйлдэл байна уу?

• Дуулгавартай дагах тушаал байна уу?

• Дагах үлгэр дуурайл байна уу?

Хичээл бүрийн гол санаанууд

(1) Бурханы Үгийг зөв хөрвүүлэх нь хангалтгүй. Харин бид үүнийг өдөр тутмын амьдралдаа хэрэгжүүлэх ёстой.

(2) Сатан биднийг хэрэгжүүлэлтээ өөр зүйлсээр орлуулахад уруу татдаг:

• Бид хэрэгжүүлэлтийг хөрвүүлгээр орлуулдаг.

• Бид бүрэн дуулгавартай байдлыг хэсэгчилсэн дуулгавартай байдлаар орлуулдаг.

• Бид гэмшлийг шалтгаар орлуулдаг.

• Бид хувьсан өөрчлөлтийг сэтгэл хөдлөлөөр орлуулдаг.

(3) Бид Бичвэрийг амьдралдаа хэрэгжүүлэхийн тулд гурван алхмыг дагах ёстой:

• Бичвэрийн утгыг мэдэх.

• Бичвэр амьдралд хэрхэн хэрэгждэгийг ойлгох.

• Бичвэрт дуулгавартай байх.

(4) Амьдралдаа Бичвэрийг хэрэгжүүлэх арга замыг олохын тулд эдгээр асуултыг асуу:

• Зайлсхийх ёстой нүгэл байна уу?

• Хүлээн авах ёстой амлалт байна уу?

• Хийх ёстой үйлдэл байна уу?

• Дуулгавартай дагах тушаал байна уу?

• Дагах үлгэр дуурайл байна уу?

1-р хичээл дээр та энэ курсын туршид судлах Бичвэрийн багц хэсгийг сонгосон. Ажиглалт, хөрвүүлэг хийхдээ бэлтгэсэн тэмдэглэлээ ашиглан, судалж буй Бичвэрийнхээ практик хэрэгжүүлэлтийн алхмуудыг жагсаан бич.