Lesson 5: Хөрвүүлэг: Хам сэдэв

(1) Бичвэрийг хөрвүүлэхэд түүхэн ба соёлын нөхцөл байдал үнэ цэнтэй болохыг ойлгох.

(2) Бичвэрийн багц хэсгийн түүхэн ба соёлын нөхцөл байдлыг олж мэдэхийн тулд асуултуудыг ашиглах.

(3) Нэг эшлэл эргэн тойрны хам сэдэвтэйгээ хэрхэн зохицож байгааг таних.

(4) Хам сэдвийг судлахад гаргадаг нийтлэг алдаанаас зайлсхийх.

► Та өөрийн төрөлх хэл дээрээ олон утгатай ямар нэгэн үг хэлнэ үү? Хэн нэгэн тухайн үгийг хэлэхдээ аль утгаар нь хэрэглэж байгааг та хэрхэн мэдэх вэ?

Библийн хөрвүүлгийн хамгийн чухал талуудын нэг нь бидний судалж буй хэсгийн хам сэдэв юм. Энэ хичээлээр бид Бичвэрийн багц хэсгийн түүхэн ба соёлын хам сэдэв болон эшлэлийн эргэн тойронд буй Библийн хам сэдвийг судлах болно.[1]

► 2 Тимот 4:6-22 эшлэлийг унших.

Паул Тимотод "Өвлөөс өмнө ирэхийг хичээ" (2 Тимот 4:21) хэмээн бичжээ. Дараах нөхцөл байдлын дагуу Паулын хүсэлтийг анзаараарай:

• Паул Ромын шоронд байна. Тэр удахгүй итгэлийнхээ төлөө амиа өгнө.

• Тимот хэдэн зуун километрийн зайд орших Ефес хотод үйлчилдэг.

• Намар тэнгисээр аялах нь аюултай байсан бөгөөд харин өвөл ямар ч боломжгүй байжээ. Тимот өвлөөс өмнө очихын тулд энэ захидлыг хүлээн авсан даруйдаа явах ёстой байж.

Түүхэн хам сэдэв нь Паулын хүсэлтийн цаана буй сэтгэл хөдлөлийг ойлгоход тусалж байна. Паул зүгээр л "Боломжтой үедээ ирээрэй" гэж хэлээгүй. Тэр сүнслэг хүүгээсээ "Би үхэхээсээ өмнө чамайг дахин хармаар байна. Хэрэв чи өвөл хүртэл хүлээвэл аялах боломжгүй болно. Хэтэрхий оройтохоос өмнө ирээч" хэмээн гуйж байна. Та түүхэн хам сэдвийн талаар юу ч мэдэхгүй байсан ч захидлын утга санаа бол хэвээрээ л байна. Гэхдээ түүхэн хам сэдэв нь Паулын хүсэлт яаралтай байгааг харуулдаг.

Түүхэн ба соёлын хам сэдэв нь чухал ач холбогдолтой. Учир нь Бурхан дэлхийн хүн бүр ойлгож чадах ганцхан хэл дээр Библийг өгөөгүй. Бичвэрийн талаарх дараах хоёр чухал зүйлийг анзаараарай:

1. Бичвэрийн зарчмууд нь цаг үргэлж, газар сайгүй, хүн бүрийн хувьд үнэн байдаг.

2. Бичвэрийн зарчмууд нь тодорхой цаг үед, тодорхой газарт, тодорхой хүмүүст өгөгдсөн.

Библийг хөрвүүлэх нь[1]

Бичвэрийн түүхэн ба соёлын нөхцөл байдлыг сайн ойлгох тусам Библийн нийтлэг зарчмуудыг төдий чинээ сайн ойлгодог.

Түүхэн ба соёлын хам сэдвийг судлахдаа бид анхны сонсогчдод зориулсан мэдээ сургаалыг ойлгохын тулд Библийг "тэдний суурин" газарт уншдаг. Дараа нь бид эртний ертөнц болон бидний ертөнцийг тусгаарлаж буй "гол" буюу ахуй соёлын ялгааг авч үздэг. Библийн ертөнцийг сайн ойлгох тусам Бурханы Үг өнөөгийн бидний ертөнцөд хэрхэн ярьж байгааг илүү тод сонсох боломжтой болдог.

Бичвэрийг анхдагч хам сэдвийн хүрээнд унших нь чухал юм. Учир нь энэ нь Библийн хөрвүүлгийн чухал зарчмын суурь болдог: Өнөөдөр Библийн текстийг хөрвүүлэхэд хүчин төгөлдөр байгаа аливаа хөрвүүлэг нь текстийн анхдагч мэдээ сургаалтай нийцэх ёстой. Би текстийн анхдагч мэдээ сургаалтай зөрчилдөх утга санааг хайж болохгүй.

Түүхэн ба соёлын хам сэдэв гэж юу вэ? Түүхэн ба соёлын хам сэдэв гэдэг нь бидэнд текстийг өөрийг нь ойлгоход тусалдаг текстийн гадна байгаа зүйл юм. Үүнд дараах асуултуудын хариулт багтана:

• Цөлд израилчуудын амьдрал ямар байсан бэ? (Гэтлэл—Дэд хууль хам сэдэв)

• I зууны үеийн Палестины ахуй соёл ямар байсан бэ? (Сайнмэдээний хам сэдэв)

• Галат болон Филиппой хотод Паулыг ихэд бухимдуулсан хуурамч багш нар хэн байсан бэ?

Түүхэн ба соёлын хам сэдвийг судлахдаа асуух зарим асуултууд:

(1) Библийн бичигчийн талаар бид юу мэддэг вэ?

Бурхан хүмүүсээр дамжуулан айлдсан тул бичигчийн талаарх мэдлэг нь Бурханы Үгийг илүү сайн ойлгоход тусалдаг.

Паулын захидлуудыг уншихдаа итгэгч болохоос өмнөх түүний амьдралыг санах хэрэгтэй. Тэр "Махбодод түшиглэх шалтгаан гэвэл надад ч бий" (Филиппой 3:4-6) гэж бичсэн бөгөөд фарисайчууд Хуулийг нарийн чанд сахидаг байсныхаа төлөө өндөр хүндлэл хүлээдэг байсныг бид мэдэх хэрэгтэй юм. Тэдний хоёр нүүр гаргаж, Есүсийг хүлээн авахаас татгалзсаныг бид мэддэг. Түүнчлэн Бурханы хуулийн нарийн ширийн зүйлийг ч тэд хайрладаг байсныг мөн санах хэрэгтэй.

Нөгөөтэйгүүр, Паул өөрийгөө нүгэлтнүүдийн "эхнийх" гэж тодорхойлсон байдаг (1 Тимот 1:15) Ингэхдээ Паул чуулганыг хавчиж, Христэд итгэгчдийг үхэлд хүргэж байснаа санаж байв. Энэ нь Дамаск руу явах замд Христтэй уулзахаас өмнөх түүний амьдралын дурсамж юм.

Гэтлэл номыг уншихдаа Мосе Фараоны ордонд ямар эрх эдэлж байсныг мэдэх хэрэгтэй. Ордон дахь тансаг амьдралыг нь бодож үзвэл Еврей 11:25 эшлэлд Мосегийн тухай хэлсэн зүйлийг бүр илүү гүнзгий ойлгоно. "Нүглийн цаг зуурын зугаанаас Бурханы хүмүүсийн хамт ад үзэгдсэн нь дээр гэдгийг тэр сонгосон юм." Залуухан Мосед олгогдсон боловсрол, ахуй соёлын боломж бололцоог нь харвал Бурхан агуу үндэстнийг удирдуулахаар үйлчлэгчээ бэлтгэж байсныг ч бид олж хардаг.

(2) Библийн сонсогчдын талаар бид юу мэддэг вэ?

Библийн бичигчийн талаар суралцахын зэрэгцээ анхны сонсогчдын талаар аль болох ихийг мэдэж авах хэрэгтэй.

1 ба 2 Шастир номд багтсан ихэнх материал нь Самуел болон Хаадын номд давтагдсан байдаг. Яагаад? Шастир ном нь израилчууд цөллөгөөс буцаж ирсний дараа бичигджээ. Бурхан Израилыг яагаад шүүлтийн зовлонд оруулсан талаар Хаад номд өгүүлдэг бол, Бурхан ард түмэндээ санаа тавьсан хэвээр байсныг Шастир номд харуулдаг.

Йерусалим бүслэгдэж, сүйрч байсан тэдгээр өдрүүдэд Иеремиа номлож байлаа. Түүний шүүлтийн тухай мэдээг уншихдаа амлагдсан шүүлт нь тун удахгүй болохыг санах хэрэгтэй. Гэсэн хэдий ч Иеремиа номоос Бурханы амлалтыг ч бид уншдаг: "Учир нь та нарт зориулж байгаа төлөвлөгөөнүүдийг Би мэдэх бөгөөд тэдгээр нь та нарт ирээдүй ба найдварыг өгөх гай гамшгийн бус, сайн сайхны төлөөх төлөвлөгөөнүүд юм" гэж ЭЗЭН тунхаглаж байна" (Иеремиа 29:11). Энэ амлалт хүмүүсийг харь улсад олзлогдохын өмнө иржээ. Бурханы ард түмэндээ зориулсан төлөвлөгөөнд тэднийг гэмшилд авчрах шүүлтүүд багтдаг.

1 Иохан захидал нь зөвхөн сүнслэг зүйл л сайн, харин махбод, биет зүйлс бузар муу гэсэн худал сургаалтай тулгарч байсан итгэгч хүмүүст зориулагджээ. Хуурамч багш нар Есүс жинхэнэ хүн байгаагүй, харин зөвхөн хүн шиг харагдаж байсан гэж сургаж байв. Иохан уншигчдадаа Есүс бие махбодтой байсныг сануулж бичсэн. "Эхнээсээ байсан бөгөөд бидний сонсож, нүдээрээ үзэж, харж, гараараа барьж үзсэн амийн Үгийн тухай" (1 Иохан 1:1).

Хуурамч багш нар мөн аврал нь цөөн хэдэн хүнд илчлэгдсэн нууц мэдлэгээр дамжин ирдэг хэмээн сургаж байлаа. Бурханыг үнэхээр таньж мэдэхийн тулд бид дуулгавартай байх ёстойг Иохан бичжээ. "Бид Түүний тушаалуудыг сахивал, үүгээрээ бид Түүнийг таньснаа мэднэ" (1 Иохан 2:3). Мөнх амийг өгдөг тэрхүү мэдлэг нь хайрыг агуулдаг. “Бид ах дүүсээ хайрладаг учраас үхлээс аминд шилжсэнээ мэднэ” (1 Иохан 3:14).

(3) Номын түүхэн нөхцөл байдлын талаар бид юу мэддэг вэ?

Нэгэн номлогч "Өнөөдөр би Христэд итгэгч хүн хэрхэн эхнэр авах ёстой талаар номлоно. Шүүгчид 21:20-21-д хэлсний дагуу бид хөрш зэргэлдээ суурин руу явж, бутанд нуугдах хэрэгтэй. Тосгоны залуухан бүсгүйчүүдийн нэг нь зөрж өнгөрөхөд түүнийг барьж аваад гэртээ авчрах хэрэгтэй. Энэ бол эхнэрээ сонгох Библийн загвар юм" хэмээн заасан гээд төсөөлөөд үз дээ. Бичвэрийг хэрэгжүүлж буй түүний арга барилд та эргэлзэх болно!

Номлогчийн хэрэгжүүлэлтэд юу буруу байна вэ? Шүүгчид номд Бениамин овгийн эрчүүд нэг удаа ийм аргаар эхнэр авсан гэж өгүүлсэн байдаг. Ингэхдээ Израилын нэг овгийг авч үлдэх сайн зорилгын төлөө ингэсэн гэж өгүүлдэг. Гэсэн хэдий ч номлогч түүхэн хам сэдвийг үл тоомсорлож байна. Энэ түүх нь Шүүгчид номын төгсгөлд гардаг бөгөөд Израил Бурханы төлөвлөгөөнөөс эмх замбараагүй байдал руу хэрхэн унаж доройтсоныг харуулдаг. Гэрлэлтийн талаарх Бурханы төлөвлөгөөг бус, харин Бурханы хүмүүс Түүний эсрэг босоход юу болдгийг энэ түүх харуулдаг.

Заримдаа бид бичигч эсвэл сонсогчдын талаар бага мэдээлэлтэй байдаг ч, ерөнхий түүхэн нөхцөл байдлын талаар мэддэг. Бид Рут номыг хэн бичсэнийг мэдэхгүй ч, үйл явдлууд нь шүүгчид захирч байсан өдрүүдэд болсныг мэддэг (Рут 1:1). Энэ нь Израилд нийгмийн ёс бус байдал ноёрхож байсан цаг үе юм (Шүүгчид 21:25). Израил Бурханд итгэмжгүй хандсаныг моаб бэлэвсэн эмэгтэй Рутын итгэмжит байдалтай эсрэгцүүлж Рут номд өгүүлжээ.

Энэ хүүрнэлд Боаз хэрхэн хувиа бодолгүй Руттай гэрлэж, Наомигийн нас барсан хөвгүүдэд хууль ёсны өв залгамжлагчийг бий болгосон талаар мөн өгүүлдэг. Ойрын хамаатан-өв золигчийн хувьд Боаз Наомигийн төлөө хүү өгөхдөө өөрийн өв залгамжлах эрхээ золиосолжээ. Ийнхүү Боаз Давидын удам угсаанд байр суурийг эзэлсэн юм (Матай 1:6, 16).

Иона номыг хөрвүүлэхэд түүхэн нөхцөл байдал чухал:

• Ниневе нь Израилын хамгийн аюултай дайсан Ассирын нийслэл хот байв.

• Ионаг Ниневед номлож байсан тэр үед Амос болон Хосеа нар Бурханы Израилын дээрх шүүлт Ассираар дамжин ирнэ хэмээн сэрэмжлүүлж байлаа.

Хүний өнцгөөс харвал Ионагийн ассирчуудад номлохоос татгалзсаныг ойлгох боломжтой. Бүх хүмүүсийг ялгаварлалгүйгээр хайрладаг Бурханы үзэл бодлыг Иона ном харуулдаг.

(4) Номын ахуй соёлын нөхцөл байдлын талаар бид юу мэддэг вэ?

Бичвэрийн түүхэн ба соёлын хам сэдэв нь Библийн ертөнц дэх ахуй соёлын ёс заншлыг мөн авч үздэг. I зууны үеийн Палестин дахь ёс заншлыг мэдсэнээр бид Есүсийн заасан сургаалт зүйрлэлүүдийг шинээр харж ойлгох боломжтой:

• Сайн самари хүний тухай сургаалт зүйрлэл нь (Лук 10:30-35) иудей сонсогчдыг гайхшруулж байсан. Шашны удирдагчид шархадсан аялагч хүнд туслаагүйд Есүсийг сонсогч хүмүүс төдийлөн гайхаагүй. Харин түүнд тусалж, аврах нэгнийг гарцаагүй рабби эсвэл фарисай хүн байх гэж тэд хүлээсэн. Гэтэл тэдний жигшдэг самари хүнийг хайр энэрлийн үлгэр жишээ болгон Есүс сургажээ.

• Ачлалгүй хүүгийн тухай сургаалт зүйрлэлийг уншихдаа (Лук 15:11-32) иудей эцэг хүн нэр төрөө эрхэмлэдэг гэдгийг санаж байх хэрэгтэй. Сонсогчдын хувьд эцэг нь хүүгээ буцаж ирэхийг зөвшөөрөхгүй, эсвэл түүнийг боол болгохыг зөвшөөрнө хэмээн хүлээж байсан. Гэтэл эцэг нь төөрөлдсөн хүүгээ буцаж ирэхэд баярласандаа нэр төрөө хөсөр хаяж хүү рүүгээ гүйжээ. Энэ үйлдэл нь маш цочирдом байсан тул зарим дорно дахины соёлд энэ хүүрнэлийг "Гүйж буй эцгийн сургаалт зүйрлэл" хэмээн нэрлэдэг. Үүнтэй адилаар бидний тэнгэрлэг Эцэг биднээс уучлал эрэхийг хүлээхийн оронд, Тэрээр тэрслүү нүгэлтнүүдийг эрж хайдаг. Энэ бол бидний Эцэгийн хэмжээлшгүй агуу хайрын дүр зураг юм.

Паулын захидлуудыг I зууны ахуй соёлын нөхцөл байдлыг харгалзан унших хэрэгтэй. Ефес 5:21–6:9 хэсэг нь Паулын уншигчдын хувьд цочирдом мэдээ байсан. Эхнэр хүн нөхөртөө захирагдах ёстой гэсэн Паулын тушаал нь хэвийн сонсогдож байсан байх. Харин нөхрүүдэд Христ өөрийгөө золиослосон үлгэр дуурайлыг дагах ёстой хэмээн тушаах нь Ром гаралтай сонсогчдын ой тойнд багтахгүй байжээ. Хүүхдүүд эцэг эхээ дуулгавартай дагах ёстойг ойлгож болох байсан ч, хүүхдүүдээ уурлуулахгүй байхыг Ромын ертөнц дэх эцгүүдэд хэн ч урьд хожид хэлж байсангүй.

Паул Филиппойчуудад хандан тэнгэрт харьяалалтай иргэд адил амьдрахыг уриалсан байдаг (Филиппой 3:20). Тэр үүнийг иргэншил нь Ромын эзэнт гүрэнд онцгой эрх эдэлдэг Филиппой хотынхонд хандан бичсэн юм. Энэ хот нь тэтгэвэрт гарсан цэрэг армийнхныг суурьшуулахаар байгуулагдсан тул Филиппой хотын иргэд иргэншлээ маш өндрөөр үнэлдэг байжээ. Паул тэдний жинхэнэ иргэншил нь дэлхий дээрх аль нэг хотод биш, харин тэнгэрт байгааг сануулсан юм. Энэхүү түүхэн ба соёлын нөхцөл байдлыг мэдэх нь Филиппой захидлыг илүү сайн ойлгоход тусалдаг.

Түүхэн ба соёлын хам сэдвийг нээж илрүүлэх нь

Бидний үзсэнчлэн, Бичвэрийн багц хэсгийн түүхэн ба соёлын хам сэдвийг судлах нь асуулт асуух байдлаар эхэлдэг. Бид асуултуудынхаа хариултыг хэрхэн олох вэ? Курс хичээлийн хавсралтад бидэнд хариулт өгөх хэд хэдэн Библи судлалын эх сурвалжийг тайлбарласан байгаа. Мөн Shepherds Global Classroom байгууллагын бүтээсэн Хуучин гэрээ болон Шинэ гэрээг танилцуулах курс хичээлүүдийг ашиглахыг зөвлөж байна. Эдгээр курс нь Библийн ном тус бүрийн нөхцөл байдлыг мэдэхэд тусална.

Библийн хөрвүүлэг хийхэд анхаарах өөр нэг чухал зүйл бол эргэн тойрны хам сэдэв юм. "Энэ эшлэл, багц хэсэг, бүлэг, ном Библийн бусад хэсэгтэй хэрхэн холбогдож байна вэ?" гэж асуух нь чухал.

Та урагдсан захидлаас ганц өгүүлбэр бүхий тасархай цаас олсон гэж төсөөлөөд үз дээ. Тасархай дээр "Тийм, 7 бол OК" гэж бичсэн гэж бодъё. Энэ өгүүлбэр ямар утгатай вэ?

• Магадгүй бичсэн хүн нь хэн нэгэнтэй уулзах цаг товлосон байх. Тэрхүү уулзалтад 19:00 цаг тохиромжтой хэмээн баталсан байж болно.

• Магадгүй бичсэн хүний эхнэр нь "Баасан гарагийн оройн зоогт хэдэн хүн урих вэ?" гэж бичихэд тэр хариуд нь "Долоо (хүн) бол OК" гэж бичсэн ч байж мэднэ.

• Магадгүй бичсэн хүн номоо 8 доллараар зарах санал тавьсан байх. Хэн нэгэн "Үнийг нь 7 доллар болгож бууруулах уу?" гэж асуухад тэр хариуд нь "Тийм, 7 доллар бол OК" гэж хэлсэн ч байж болно.

Хам сэдвийг мэдсэний дараа л бид тухайн нэг өгүүлбэрийг ойлгодог. Бид нэг өгүүлбэрийг нийт багц хэсгийн хам сэдвийн хүрээнд уншдаг. Бид багц хэсгийг нийт захидлын хам сэдвийн хүрээнд уншдаг. Хүрээг томруулаад бид хоёр хүний хоорондох цуврал захидлуудын хам сэдвээр ч захидлыг уншиж ойлгох боломжтой.

Бичвэрийг ч мөн ийм байдлаар уншиж болно. Нэг эшлэлийг эргэн тойрных нь эшлэлүүд, бүлэг, номынх нь хам сэдвийн хүрээнд унших ёстой. Хам сэдэв нь тухайн хэсгээс эхлээд бүхэл бүтэн Библийг хамран өргөждөг.

Нэг эшлэлийг зөв ойлгохын тулд бид тухайн эшлэлийн эргэн тойрных нь хам сэдвийг харах ёстой. Дуулал 1:3-д Бурханы хуульд баярладаг хүнд зориулсан гайхамшигтай амлалт өгөгджээ. Тийм хүн усалгаа сайтай, үр жимсээ өгдөг мод адил юм. "Аливаа үйл нь түүнд амжилт авчирна." Зарим хүмүүс үүнийг итгэмжтэй итгэгч хүн бүрд өгөгдсөн эд баялгийн талаарх амлалт гэж үздэг.

Харин та Дуулал 1-ийн үлдсэн хэсгийг уншихад гол онцолж буй зүйл нь эд баялгийн ерөөл биш, харин Эзэний хуулийг даган явдаг хүмүүсийн сүнслэг үр жимсний тухай юм. Энэхүү дуулал "Зөвтийн замыг ЭЗЭН мэддэг, буруутын зам сөнөж мөхдөг" (Дуулал 1:6). гэсэн амлалтаар төгсдөг. Энд Бурханы мэддэг (харж, зөвшөөрдөг) зам болон сүйрэлд хүргэдэг замыг эсрэгцүүлэн харуулжээ.

Дуулал болон Библийг бүхэлд нь уншихад энэхүү мэдээ сургаал нь батлагддаг. Итгэгч хүний хөгжил дэвшил нь эд хөрөнгөөр биш, харин Бурханы таалалд оршдог. Энэ бол жинхэнэ хөгжил дэвшил юм.

Багц хэсгийг хам сэдвийн хүрээнд уншихын тулд гурван алхмыг дагаарай:

1. Номыг хэрхэн багц хэсгүүдэд хуваасныг тодорхойлох. Таны уншиж буй эшлэлийн шууд хам сэдэв нь аль вэ?

2. Багц хэсгийн гол санааг нэг эсвэл хоёр өгүүлбэрээр хураангуйлах. Энэ нь танд бүхэл хэсгийн мэдээ сургаалыг ойлгоход тусална.

3. Номыг бүхэлд нь уншаад "Миний судалж буй багц хэсэг номын мэдээ сургаалтай хэрхэн нийцэж байна вэ?" гэж асуугаарай.

Библи > ном > багц хэсэг ба бүлэг > эшлэл

Библи > Паулын захидлууд > Ром > Ром 12-15-р бүлэг > Ром 12:1-2

Ром 12:1-2 эшлэлд Бурханд өөрсдийгөө бүрэн захируулахыг бидэнд уриалжээ.

Иймд ах дүү нар аа, Бурханы өрөвч сэтгэлээр та нараас хичээнгүйлэн гуйя. Өөрсдийн биеийг Бурханд тааламжтай, амьд, ариун тахил болгож өргө. Ингэх нь та нарын сүнслэг мөргөл мөн. Энэ үеийн явдалд нийцэлгүй, харин оюун санаагаа шинэчилж, өөрчлөгдөгтүн! Тэгвэл Бурханы сайн, тааламжит, төгс төгөлдөр хүсэл юу болохыг таних болно.

Бурханд өөрийгөө бүрэн захируулах нь итгэгч хүний өдөр тутмын амьдралд хэрхэн харагдахыг өгүүлсэн хэсэг (Ром 12-15-р бүлэг) эндээс эхэлдэг. Ойрын хам сэдвээс цааш харвал Ром 12-15-р бүлэг нь бид Бурханы өмнө хэрхэн зөвт болсныг харуулдаг 11 бүлэг бүхий онол сургаалын зааврын дараа ордог.

Ром номын хам сэдвээс гадна, Паулын захидал бүр нь бидний христитгэлийн практик үйл хэрэгт анхаарал хандуулсан байдаг. Эцэст нь Ром 12:1-2 эшлэл нь Бурханд дуулгавартай байх болон өөрийгөө зориулах тухай бүхэл бүтэн Библийн мэдээ сургаалтай яв цав нийцдэг. Жишээлбэл, Ром 12:1-2 эшлэлийн хэллэг нь Леви ном дахь өргөл тахилын дүр зургийг тусгасан байдаг. Библийн өргөн хам сэдвийг илүү ойлгох тусам Паулын хэлсэн үгс улам хүчирхэг болдог.

Таны ээлж

► Дараах эшлэл бүрийг уншаад ойрын хам сэдвийг хараарай. Хам сэдэв нь эшлэлийг ойлгоход хэрхэн нөлөөлж байгааг ярилцаарай.

1. Матай 18:20 эшлэлийг унш. Энэ нь юу гэсэн утгатай вэ?

2. Одоо Матай 18:15-20 багц хэсгийг уншаарай. Энэ нь Матай 18:20 эшлэлийн утгад нөлөөлж байна уу?

1. Ром 8:28 эшлэлийг унш. Энд юуг амлаж байна вэ?

2. Одоо Ром 8:28-30 багц хэсгийг уншаарай. Ром 8:28 эшлэлд амласан “сайн сайхан” нь юу вэ?

1. Илчлэл 3:20 эшлэлийг унш. Хэнийг урьж байна вэ?

2. Одоо Илчлэл 3:14-21 багц хэсгийг уншаарай. Энэ урилга хэнд зориулагдсан бэ?

Энэ хичээлийг дүгнэхийн тулд бид Бичвэрийн хам сэдвийг судлахдаа хөрвүүлэгчдийн гаргадаг зарим нийтлэг алдааг авч үзэх хэрэгтэй.

Буруу мэдээлэл ашиглах

Нэгэн оюутан Матай 19:23-24 эшлэлээр танилцуулга толилуулжээ. Тэр Есүсийн цаг үед Йерусалим руу орох нэгэн хаалгыг "тэвнийн сүвэгч" гэж нэрлэдэг байсан гэж хэлэв. Энэ хаалга маш намхан байсан тул ачааг нь буулгаж байж тэмээ нүхээр нь багтах боломжтой байсан гэж тэр хэлэв.

Оюутны танилцуулгад хоёр асуудал байна:

1. Есүсийн цаг үед ийм хаалга байсан гэх түүхэн баримт байхгүй. "Тэвнийн сүвэгч" гэдгээр Есүсийн үед ч одоогийнх шиг оёдлын зүүний нүхийг хэлдэг байсан.

2. Нөхцөл байдлын талаарх мэдээлэл буруу байсан учраас оюутан текстийн талаар ташаа дүгнэлт гаргажээ. Түүний танилцуулгын дагуу бид тэнгэрийн хаанчлалд багтахын тулд амьдралдаа байгаа бүх илүү зүйлээс салах ёстой гэж дүгнэхээр байна.

Гэтэл Есүс баян, эрх мэдэлтэй хүмүүс Бурханы хаанчлалд орох нь маш хэцүү гэж заагаагүй. Харин боломжгүй гэж заасан! Дагалдагч нар нь үүнд маш их гайхсан тул "Тэгвэл хэн аврагдаж чадах вэ?" гэж асуусан байдаг.

Есүс "Энэ нь амаргүй, гэхдээ та хангалттай хичээвэл багтаж болно" гэж хариулаагүй. Харин сайнмэдээний сайн мэдээгээр хариулсан юм: "Энэ нь хүмүүст боломжгүй, харин Бурханд бүх юм боломжтой гэж айлдав." Хам сэдвийг судлахдаа буруу мэдээлэл таныг төөрөлдүүлэхээс зайлсхий.

Хам сэдвийн судалгааг мэдээ сургаалаас илүүд үзэх

Хоёр дахь аюул бол хам сэдвийн судалгааг текстийн мэдээ сургаалаас илүү чухал болгох явдал юм. Паул Коринтын итгэгчдэд буруу төрлийн мэдлэг ихэрхэг болгодог бол хайр бусдыг босгон байгуулдаг (1 Коринт 8:1)[1] хэмээн сургасан. Бид судалж буй текстийнхээ мэдээ сургаалыг орхигдуулж, хам сэдвийн нарийн ширийн зүйлд хэтэрхий их татагдах боломжтой.

Хэн нэгэн самаричуудын ахуй соёлын талаар бүгдийг сурч мэдээд, сайн самари хүний талаарх сургаалт зүйрлэлийн зорилгыг мартвал юу болох вэ: "Явж, үүний адил үйлдэгтүн" (Лук 10:37). Энэ тохиолдолд бидний мэдлэг ямар ч хэрэггүй болно. Бичвэрийн мэдээ сургаалыг ойлгохын тулд суралц. Зөвхөн судлахын тулд л бүү судал. Их мэдлэгтэйгээрээ гайхуулж бардамнахын тулд биш, харин илүү үр нөлөөтэй номлож, заахын тулд судал!

Хичээл бүрийн гол санаанууд

(1) Зөв хөрвүүлэг хийхийн тулд бид Бичвэрийн аливаа хэсгийн хам сэдвийг судлах шаардлагатай.

(2) Түүхэн ба соёлын хам сэдэв нь Библийн ахуй соёлын нөхцөл байдлыг авч үздэг. Энэ нь дараах асуултуудыг асуудаг:

• Библийн бичигчийн талаар бид юу мэддэг вэ?

• Библийн сонсогчдын талаар бид юу мэддэг вэ?

• Номын түүхэн нөхцөл байдлын талаар бид юу мэддэг вэ?

• Номын ахуй соёлын нөхцөл байдлын талаар бид юу мэддэг вэ?

(3) Библийн хам сэдэв нь тухайн эшлэл Бичвэрийн бусад хэсэгт хэрхэн нийцэж байгааг авч үздэг.

1-р хичээл дээр та энэ курсын туршид судлах Бичвэрийн багц хэсгийг сонгосон. Сонгосон багц хэсгийнхээ түүхэн ба соёлын, мөн Библийн хам сэдвийг судлаарай. Энэ хичээл дээр үзсэн хам сэдвийн талаарх яриа хэлэлцүүлгээс аль болох олон асуултад хариулж, нэг хуудас тэмдэглэл бэлтгэ.

Дараах асуултуудыг асуугаарай:

• Бичигч нь хэн байсан бэ?

• Тэр хэзээ бичсэн бэ?

• Түүний гарал үүсэл, нөхцөл байдал нь ямар байсан бэ?

• Түүний сонсогчид хэн байсан бэ?

• Тэдэнд ямар асуудлууд тулгарч байв?

• Энэ багц хэсгийн эргэн тойронд буй нөхцөл байдал ямар байсан бэ?

• Энэ ном бичигдэж байсан цаг үед ямар түүхэн үйл явдлууд тохиолдсон бэ?

• Ахуй соёлын ямар хүчин зүйлс номыг тайлбарлахад туслах вэ?

Тус хэсгийн Библийн хам сэдвийг тодорхойлохын тулд өмнө нь болон хойно нь өгүүлсэн бүлгүүдийг уншаарай.